EDWƐKƐ 34
Kɛ Ɔkɛyɛ Na Ɛ Nye Alie Wɔ Gyimalilɛ Fofolɛ Nwo La
“Nyamenle ɛnle nzisi mɔɔ ɔ rɛle bavi bɛ gyima nee ɛlɔlɛ mɔɔ bɛlale ye ali wɔ ye duma ne anwo” la.—HIB. 6:10.
EDWƐNE 38 Ɔbamaa Wɔayɛ Se
MƆƆ YƐBAZUKOA *
1-3. Duzu a maa menli mɔɔ wɔ dahuu ɛzonlenlɛ gyima ne anu la nyia gyimalilɛ fofolɛ a?
ROBERT yɛɛ Mary Jo ka kɛ: “Mɔɔ yɛnyianle ɛvolɛ 21 wɔ edwɛkpatɛlɛvolɛ gyima ne anu la yɛɛ yɛ mu nwiɔ yɛ awovolɛ anwo dole bɛ a. Ɛnee yɛ nye die nwo kɛ yɛbanlea bɛ, noko ɛnee ɔnla aze kɛ yɛbadu yɛavi ɛleka mɔɔ yɛkulo ye kpalɛ la.”
2 William yɛɛ Terrie ka kɛ: “Mɔɔ yɛnwunle kɛ yɛ kpɔkɛdelɛ ɛnrɛmaa yɛnrɛhola yɛnrɛdoa yɛ gyimalilɛ ne azo la, yɛzunle. Bodane mɔɔ yɛlɛ kɛ yɛsonle Gyihova wɔ maanle gyɛne zo la rale awieleɛ.”
3 Aleksey ka kɛ: “Ɛnee yɛze kɛ yɛ agbɔvolɛma kulo kɛ bɛto Bɛtɛle ne anu, noko mɔɔ bɛdole nu na ɔwɔ kɛ yɛfi Bɛtɛle ɛkɛ la, ɔyɛle yɛ kɛ ɛlalɛ.”
4. Kpuya boni mɔ a yɛbazuzu nwo wɔ edwɛkɛ ɛhye anu a?
4 Ɛye anwubielɛ ɛhye mɔ ɛsie ahane a, menli mɔɔ ɛnee sonle wɔ Bɛtɛle yɛɛ ɛleka gyɛne na bɛnyianle gyimalilɛ fofolɛ la noko lɛ dɔɔnwo ka. * Ɔnla aze ɔmmaa mediema ɛhye mɔ mɔɔ di nɔhalɛ la kɛ bɛbagyakyi gyimalilɛ mɔɔ bɛ nye die nwo kpalɛ la. Duzu a baboa bɛ yeamaa bɛali nzenzaleɛ mɔɔ ɛra la anwo gyima a? Kɛ ɔkɛyɛ na wɔaboa bɛ ɛ? Kpuya ɛhye mɔ anwo mualɛ bahola aboa yɛ muala amaa yɛagyinla nzenzaleɛ mɔɔ ba ɛbɛlabɔlɛ nu la anloa.
KƐZI ƐBAHOLA WƆAGYINLA NZENZALEƐ NLOA LA
Duzu ati a bɛkakyi mekɛ kɔsɔɔti azonvolɛ gyimalilɛ a ɔkola ɔyɛ ngyegyelɛ a? (Nea ɛdendɛkpunli 5) *
5. Adenle boni azo a gyimalilɛ fofolɛ mɔɔ yɛbanyia la bahola aha yɛ ɛ?
5 Saa yɛlɛsonle wɔ Bɛtɛle anzɛɛ ɛleka gyɛne biala a, yɛbahola yɛanyia ɛlɔlɛ kpole yɛamaa menli mɔɔ wɔ ɛkɛ ne yɛɛ ɛleka mɔɔ yɛlɛsonle la. Yemɔti saa debie bie ati ɔwɔ kɛ yɛgyakyi yɛ gyimalilɛ ne a, ɔyɛ yɛ nyane kpalɛ. Ɔluakɛ yɛ nwo balɔ menli mɔɔ yɛlɛgyakyi bɛ wɔ yɛ nzi la ati, ɔmaa yɛdi nyane, titili saa ɛkpɔlɛ ti a yɛlɛfi ɛkɛ a. (Mat. 10:23; 2 Kɔl. 11:28, 29) Bieko, gyimalilɛ fofolɛ mɔɔ yɛkayɛ anzɛɛ sua nu mɔɔ yɛkɔ la nee ye ngyegyelɛ lua—ɔwɔ kɛ yɛbɔ ɔ bo yɛsukoa ninyɛne bie mɔ ɛyɛlɛ bieko. Robert yɛɛ Mary Jo ka kɛ: “Yɛdele nganeɛ kɛ yɛminli bɔkɔɔ, na ɛnee ɔnla aze bɔbɔ kɛ yɛbali daselɛ wɔ yɛ aneɛ nu.” Menli mɔɔ nyia gyimalilɛ fofolɛ la bie mɔ yia ezukoa nwo ngyegyelɛ. Bie a bɛ adwenle nu bayɛ bɛ kesee na bɛ sa nu ado. Duzu a baboa bɛ a?
Nwolɛ hyia kɛ yɛbabikye Gyihova na yɛanyia ye nu anwodozo (Nea ɛdendɛkpunli 6-7) *
6. Kɛ ɔkɛyɛ na yɛabikye Gyihova ɛ?
6 Kɔ zo bikye Gyihova. (Gye. 4:8) Kɛ ɔkɛyɛ na yɛayɛ ɛhye ɛ? Ɔwɔ kɛ yɛnyia ye nu anwodozo kɛ ‘asɔneyɛlɛ Tievolɛ.’ (Edw. 65:2) Edwɛndolɛ 62:8 ka kɛ: “Bɛha bɛ ngyianlɛ kɔsɔɔti bɛhile ye.” Gyihova “kola yɛ maa ɔtɛla mɔɔ yɛbiza nee mɔɔ yɛdwenle nwo” la. (Ɛfɛ. 3:20) Tɛ mɔɔ yɛbiza wɔ asɔneyɛlɛ nu la ala a ɔyɛ ɔmaa yɛ a. Ɔbahola yeayɛ ninyɛne mɔɔ yɛ nye ɛnla bɔbɔ la yeamaa yɛ yeava yeali yɛ ngyegyelɛ nwo gyima.
7. (a) Duzu a baboa yɛ amaa yɛabikye Gyihova a? (b) Kɛ mɔɔ Hibuluma 6:10-12 maa yɛnwu ye la, saa yɛfa nɔhalɛlilɛ yɛsonle Gyihova a, duzu a bavi nu ara a?
7 Amaa wɔabikye Gyihova kpalɛ la, kenga Ngɛlɛlera ne na dwenledwenle nwolɛ dahuu. Adiema bie mɔɔ zonlenle kɛ edwɛkpatɛlɛvolɛ la ka kɛ: “Ɔwɔ kɛ ɛyɛ abusua ɛzonlenlɛ dahuu na ɛsiezie ɛ nwo ɛmaa debiezukoalɛ ne mɔ kɛ mɔɔ ɛyɛ ye dɛba la.” Eza kɔ zo fa ɛ nwo wula daselɛlilɛ gyima ne anu kpalɛ wɔ asafo fofolɛ mɔɔ wɔhɔ nu la anu. Gyihova kakye menli mɔɔ kɔ zo fa nɔhalɛlilɛ sonle ye la, saa bɔbɔ bɛngola bɛnyɛ ye kɛ mɔɔ ɛnee bɛyɛ ye dɛba la a.—Kenga Hibuluma 6:10-12.
8. Kɛzi edwɛkɛ mɔɔ wɔ 1 Dwɔn 2:15-17 la baboa wɔ yeamaa wɔatete ninyɛne zo ɛ?
8 Tete ninyɛne zo wɔ wɔ ɛbɛlabɔlɛ nu. Mmamaa Seetan ewiade ne anu adwenleadwenle “mia” sunsum nu ninyɛne mɔɔ ɔwɔ kɛ ɛyɛ la. (Mat. 13:22) Mmamaa ewiade ne anzɛɛ ɛ gɔnwo mɔ tinlitinli ɛ nwo zo kɛ ɛkpondɛ ezukoa dɔɔnwo wɔ Seetan ewiade ɛhye anu. (Kenga 1 Dwɔn 2:15-17.) Nyia Gyihova mɔɔ ɛbɔ ɛwɔkɛ kɛ ɔbava debie biala mɔɔ ɛhyia wɔ sunsum nu, nganeɛdelɛ nu yɛɛ nwonane nu yeamaa wɔ “wɔ mekɛ kpalɛ nu” la anu anwodozo.—Hib. 4:16; 13:5, 6.
9. Kɛ mɔɔ Mrɛlɛbulɛ 22:3, 7 ka la, duzu ati a ɔnle kɛ ɛtwe kakɛ mɔɔ anwo ɛngyia la ɛmaa ɛ nwo a, na duzu a baboa yɛ amaa yɛazi kpɔkɛ mɔɔ nrɛlɛbɛ wɔ nu la ɛ?
9 Mmatwe kakɛ mɔɔ ɛngyia la ɛmaa ɛ nwo. (Kenga Mrɛlɛbulɛ 22:3, 7.) Saa ɛlɛtu wɔahɔ ɛleka fofolɛ a, bie a ɔbahyia ezukoa dɔɔnwo, na wɔannea a, ɔbamaa wɔabɔ kakɛ. Amaa wɔade kakɛ ne azo la, mmafili ninyɛne mɔɔ ɛngyia nwo la. Saa ɛlɛnea dɔvolɛ bie mɔɔ ɛnde kpɔkɛ la a, ɔnla aze kɛ ɛbazuzu ninyɛne nwo kpalɛ, yemɔti wɔannea a ɛbahwe kakɛ wɔamaa ɛ nwo. Wɔ tɛnlabelɛ zɛhae mɔ anu, kakye kɛ “asɔneyɛlɛ nee modolɛ” nzɛlɛlɛ baboa wɔ yeamaa wɔazi kpɔkɛ kpalɛ. Gyihova bahola ‘abɔ wɔ ahonle nee wɔ adwenle nzuzulɛ nwo bane,’ amaa wɔadɔ ɛ rɛle aze wɔali ninyɛne nwo gyima.—Fel. 4:6, 7; 1 Pita 5:7.
10. Kɛ ɔkɛyɛ na yɛanyia agɔnwolɛma kpalɛ ɛ?
10 Kpondɛ agɔnwolɛma kpalɛ. Ka wɔ anwubielɛ kile ɛ gɔnwo mɔ, titili menli mɔɔ bɛyia wɔ tɛnlabelɛ ne bie ɛlɛ la. Ɛhye bamaa ɛ rɛle adɔ wɔ azule nu. (Nol. 4:9, 10) Agɔnwolɛma mɔɔ ɛnyianle bɛ wɔ wɔ gyimalilɛ dɛba ne anu la bahɔ zo ayɛ ɛ gɔnwo mɔ. Noko kɛkala, ɔwɔ kɛ ɛnyia agɔnwolɛma fofolɛ wɔ wɔ gyimalilɛ fofolɛ ne anu. Kakye kɛ, saa ɛbanyia agɔnwolɛ kpalɛ a, ɔwɔ kɛ ɛdawɔ noko ɛyɛ agɔnwolɛ kpalɛ. Kɛ ɔkɛyɛ na wɔanyia agɔnwolɛma fofolɛ ɛ? Ka kɛzi Gyihova ɛyila wɔ kpole la anwo edwɛkɛ na maa awie mɔ ɛnwu kɛzi ɛ nye die wɔ Gyihova ɛzonlenlɛ nu la. Saa asafo ne anu amra bie mɔ ɛnnwu deɛmɔti ɛ nye die dahuu ɛzonlenlɛ gyima ne anwo bɔbɔ a, awie mɔ gyɛne anye balie ɛ nwo na bɛarayɛ ɛ gɔnwo mɔ. Noko nea na wɔandwe adwenle wɔammaa ɛ nwo zo somaa, yɛɛ mmafa wɔ adwenle ɛsie nganeɛdelɛ ɛtane biala mɔɔ ɛlɛ la azo.
11. Kɛ ɔkɛyɛ na wɔamaa wɔ agyalɛ ne anu ayɛ anyelielɛ ɛ?
11 Saa ɛ ye anzɛɛ ɛ hu ɛnde kpɔkɛ la ati a bɛgyakyi bɛ gyimalilɛ ne a, mmatendɛ ɛtia ye. Yɛɛ saa ɛdawɔ noko ɛnde kpɔkɛ a, mmamaa wɔ adwenle bua wɔ fɔlɛ kɛ wɔmaa wɔ bokavolɛ ne ɛlɛdi nyane. Bɛhakye kɛ, bɛle “nwonane ko” yɛɛ bɛbɔle Gyihova ɛwɔkɛ kɛ, bɛ nuhua ko biala banlea ɔ gɔnwo wɔ tɛnlabelɛ biala anu. (Mat. 19:5, 6) Saa arɛlevilɛ nu ɛnrenzɛlɛ ba a, maa kakula ne ɛnwu kɛ ɔ nwo hyia tɛla wɔ gyimalilɛ ne. Maa ɛ ra ne ɛnwu ye kɛ ɔle “agyadeɛ” mɔɔ vi Nyamenle ɛkɛ. (Edw. 127:3-5) Eza ka anwubielɛ ngɛnlɛma mɔɔ ɛnyianle ye wɔ wɔ gyimalilɛ ne anu la kile ye. Ɛhye bamaa kakula ne ava ye ɛbɛlabɔlɛ ayɛ Gyihova gyima ne mɔɔ yɛ anyelielɛ la bie kɛ mɔɔ ɛyɛle la.
KƐZI AWIE MƆ BAHOLA ABOA LA
12. (a) Kɛzi yɛbaboa menli mɔɔ wɔ dahuu ɛzonlenlɛ gyima ne anu la yɛamaa bɛadoa bɛ gyimalilɛ ne azo ɛ? (b) Kɛzi yɛbaboa bɛ wɔ gyimalilɛ fofolɛ ne anu ɛ?
12 Asafo dɔɔnwo yɛɛ mediema bie mɔ yɛ mɔɔ bɛbahola la bɛboa menli mɔɔ ɛlɛyɛ dahuu ɛzonlenlɛ gyima ne la amaa bɛahola bɛadoa bɛ gyimalilɛ ne azo. Bɛmaa bɛ anwosesebɛ kɛ bɛdoa bɛ gyima ne azo, bɛfa ezukoa nee nwonane afoa nu ninyɛne gyɛne bɛmaa bɛ anzɛɛ bɛboa bɛ bɛmaa bɛnea bɛ mbusuafoɔ mɔɔ bɛwɔ sua nu la. (Gal. 6:2) Saa menli mɔɔ ɛlɛyɛ dahuu ɛzonlenlɛ gyima ne la bie nyia gyimalilɛ fofolɛ wɔ wɔ asafo ne anu a, mmate nganeɛ kɛ ninyɛne angɔ ye boɛ anzɛɛ bɛhwe bɛ nzo la ati a bɛzia bɛra a. * Emomu boa bɛ maa bɛli nzenzaleɛ ne anwo gyima ndɛndɛ. Fi ahonle nu yɛ bɛ akoaba na kanvo bɛ wɔ gyima mɔɔ bɛyɛ la anwo, saa bɔbɔ bɛngola bɛnyɛ dɔɔnwo ɔlua bɛ kpɔkɛdelɛ ti a. Nwu bɛ kpalɛ. Sukoa dɔɔnwo fi bɛ nrɛlɛbɛ, ndetelɛ yɛɛ anwubielɛ mɔɔ bɛnyia ye la anu.
13. Moalɛ boni a yɛbahola yɛava yɛamaa menli mɔɔ ɛnyia gyimalilɛ fofolɛ la ɛ?
13 Bie a menli mɔɔ ɛnyia gyimalilɛ fofolɛ la bahyia wɔ moalɛ amaa bɛanyia sua, gyima, kale mɔɔ bɛfa bɛadu adenle yɛɛ ninyɛne gyɛne. Bie a bɛbahyia wɔ moalɛ wɔ kɛzi bɛyɛ ninyɛne bie mɔ la anu. Kɛ neazo la, kɛzi bɛtua adwule, insurance nwo edwɛkɛ yɛɛ mɔɔ bokɛboka nwo la. Mɔɔ hyia kpalɛ la, ɔnle kɛ yɛmaa bɛte nganeɛ kɛ bɛ nwo yɛ yɛ alɔbɔlɛ, emomu ɔwɔ kɛ yɛte bɛ edwɛkɛ bo. Bie a bɛdabɛ mumua ne anzɛɛ bɛ busuanli bie ɛlɛyia kpɔkɛdelɛ nwo ngyegyelɛ. Bie a bɛlɛdi bɛ kulovolɛ bie mɔɔ ɛwu la anwo nyane. * Bie a bɛ nwo ɛlɛdɔ menli mɔɔ bɛgyakyile bɛ bɛ nzi la ati, yemaa bɛlɛdi nyane wɔ bɛ kunlu. Ɔhyia mekɛ amaa bɛahola bɛali ngyegyelɛ ɛhye mɔ anwo gyima ngyikyi ngyikyi.
14. Kɛzi mediema mɔɔ wɔ asafo ne anu la boale adiema raalɛ ko maanle ɔ nye liele wɔ ye gyimalilɛ fofolɛ ne anu ɛ?
14 Wɔ neazo yɛɛ wɔ moalɛ bamaa bɛ anwosesebɛ yeamaa bɛali bɛ tɛnlabelɛ ne anwo gyima. Adiema raalɛ bie mɔɔ ɛva ɛvolɛ dɔɔnwo ɛzonle wɔ maanle fofolɛ zo la ka kɛ: “Wɔ me gyimalilɛ dɛba ne anu, ɛnee meyɛ Baebolo ɛzukoalɛ dahuu. Noko wɔ me gyimalilɛ fofolɛ ne anu, mengola membuke Baebolo nu yɛɛ mengola menye vidio bɔbɔ wɔ daselɛlilɛ nu. Noko mediema mɔɔ wɔ me asafo ne anu la to ɛsalɛ fɛlɛ me maa yɛkɔ daselɛlilɛ na yɛyɛ Baebolo ɛzukoalɛ. Saa menwu mediema mrenyia nee mraalɛ zɔhane mɔ mɔɔ bɔ mɔdenle la kɛ bɛlɛyɛ Baebolo ɛzukoalɛ mɔɔ ɛlɛnyia anyuhɔlɛ la a, ɔmaa me nye die. Akee menzukoale kɛ mebabɔ adwelielilɛ bo wɔ azɛlɛsinli ne anu. Ɛhye mɔ amuala boale me ɔmaanle menyianle anyelielɛ bieko.”
KƆ ZO YƐ MƆƆ ƐBAHOLA LA!
Kpondɛ ndenle dua zo tɛlɛ wɔ ɛzonlenlɛ gyima ne anu wɔ azɛlɛsinli ne mɔɔ wɔhɔ nu la anu (Nea ɛdendɛkpunli 15-16) *
15. Kɛ ɔkɛyɛ na wɔanyia nvasoɛ dɔɔnwo wɔ wɔ gyimalilɛ fofolɛ ne anu ɛ?
15 Ɛbahola wɔanyia nvasoɛ dɔɔnwo wɔ wɔ gyimalilɛ fofolɛ ne anu. Mmate nganeɛ kɛ nzenzaleɛ mɔɔ ɛra la kile kɛ bɛmbu wɔ. Kpondɛ ndenle mɔɔ Gyihova ɛlɛdua zo ayila wɔ la na kɔ zo di daselɛ. Sukoa ɛvoya mɔɔ limoa nɔhalɛ Kilisienema ne. Ɔnva nwo ɛleka biala mɔɔ ɛnee bɛwɔ la, bɛbɔle “edwɛkpa ne nolo wɔ ɛleka biala mɔɔ bɛhɔle la.” (Gyi. 8:1, 4) Nvasoɛ dɔɔnwo bavi mɔdenle mɔɔ ɛlɛbɔ wɔali daselɛ la anu ara. Kɛ neazo la, adekpakyelɛma bie mɔɔ bɛdule bɛ bɛvile maanle ko anu la hɔle maanle gyɛne mɔɔ bikye bɛ la azo. Ɛnee menli mɔɔ ka bɛ aneɛ ne bie la hyia moalɛ dɔɔnwo. Wɔ siane ekyi anu, bɛdele ekpunli dɔɔnwo mɔɔ nyinli ndɛndɛ a.
16. Kɛ ɔkɛyɛ na ɛ nye alie wɔ wɔ gyimalilɛ fofolɛ ne anu ɛ?
16 “Fɛlɛkolilɛ ne mɔɔ [Gyihova] fa maa la le bɛ anwosesebɛ.” (Nih. 8:10) Agɔnwolɛvalɛ mɔɔ yɛ nee Gyihova lɛ titili a ɔwɔ kɛ maa yɛ nye die a, na tɛ yɛ gyimalilɛ ne ɔ. Yemɔti, ɛ nee Gyihova ɛhɔ zo ɛlua dahuu na sɛlɛ nrɛlɛbɛ, adehilelɛ yɛɛ moalɛ fi ye ɛkɛ. Kakye kɛ, ɛ nye liele wɔ gyimalilɛ dɛba ne anwo ɔluakɛ ɛnee ɛkulo kɛ ɛboa menli mɔɔ wɔ ɛkɛ la ati. Yemɔti, fa wɔ ahonle wula wɔ gyimalilɛ fofolɛ ne anu na Gyihova baboa wɔ yeamaa ɛ nye alie nwo.—Nol. 7:10.
17. Duzu a ɔwɔ kɛ yɛkakye ye wɔ gyimalilɛ mɔɔ yɛlɛyɛ ye kɛkala la anwo a?
17 Ɔwɔ kɛ yɛkakye kɛ, ɛzonlenlɛ mɔɔ yɛfa yɛmaa Gyihova la badɛnla ɛkɛ dahuu, noko yɛ gyimalilɛ mɔɔ yɛlɛ kɛkala la bara awieleɛ. Wɔ ewiade fofolɛ ne anu, yɛ muala yɛbanyia gyimalilɛ fofolɛ. Aleksey mɔɔ yɛhanle ɔ nwo edwɛkɛ wɔ mɔlebɛbo ne la die di kɛ, ye anwubielɛ ne ɛlɛsiezie ye yeamaa mɔɔ bara kenle bie la. Ɔka kɛ: “Meze kɛ Gyihova wɔ ɛkɛ ne amgba yɛɛ ewiade fofolɛ ne bara, noko ɛnee ɔzɔho kɛ bɛwɔ moa. Kɛkala, menwu kɛ Gyihova bikye me yɛɛ ewiade fofolɛ ne asɛɛ ɛra awie.” (Gyi. 2:25) Ɔnva nwo gyimalilɛ biala mɔɔ yɛnyia la, bɛmaa yɛhɔ zo yɛ nee Gyihova ɛlua dahuu. Ɔnrɛgyakyi yɛ ɛlɛ, ɔbaboa yɛ yeamaa yɛ nye alie wɔ debie biala mɔɔ yɛlɛyɛ ye wɔ ye ɛzonlenlɛ nu la anu.—Aye. 41:13.
EDWƐNE 90 Bɛmaa Yɛmaa Yɛ Nwo Anwosesebɛ
^ ɛden. 5 Ɔdwu mekɛ ne bie a, ɔbahyia kɛ mediema mrenyia nee mraalɛ mɔɔ wɔ dahuu ɛzonlenlɛ gyima ne anu la gyakyi bɛ gyimalilɛ ne na bɛkɔ sua nu anzɛɛ bɛnyia gyimalilɛ fofolɛ. Edwɛkɛ ɛhye bamaa yɛanwu ngyegyelɛ mɔɔ bɛyia nee kɛzi bɛbamaa bɛ nye alie bɛ gyimalilɛ fofolɛ ne anwo la. Eza ɔbamaa yɛanwu mɔɔ awie mɔ bahola ayɛ aboa bɛ na bɛamaa bɛ anwosesebɛ la. Akee eza yɛbanwu ngyinlazo mɔɔ baboa yɛ muala amaa yɛali nzenzaleɛ mɔɔ bara anwo gyima la.
^ ɛden. 4 Eza saa mediema mrenyia dwu ɛvolɛ bie a, bɛgyakyi nwolɛ adenle mɔɔ bɛlɛ la bɛmaa mgbavolɛ. Nea edwɛkɛ, “Kilisienema Mɔɔ Bɛnyi—Gyihova Anye Sɔ Bɛ Nɔhalɛlilɛ Ne” mɔɔ wɔ September 2018 Ɛzinzalɛ Arane ne anu yɛɛ “Sie Ɛ Nwo Dii Saa Bɔbɔ Tɛnlabelɛ Ne Kakyi A” mɔɔ wɔ October 2018 Ɛzinzalɛ Arane ne anu la.
^ ɛden. 12 Ɔwɔ kɛ asafo nu mgbanyima mɔɔ bɛwɔ bɛ asafo dɛba ne anu la kɛlɛ kɛlata ndɛndɛ ne ala, amaa bɛakpa bɛ kɛ adekpakyelɛma, asafo nu mgbanyima anzɛɛ asafo nu azonvolɛ.
^ ɛden. 13 Nea edwɛkɛ “Help for Those Who Grieve,” mɔɔ wɔ 2018 Awake! mɔɔ tɔ zo 3 anu la.
^ ɛden. 57 NVONINLI NWO EDWƐKƐ: Agyalɛma bie mɔɔ bɛle edwɛkpatɛlɛvolɛma mɔɔ bɛlɛfi ɛleka mɔɔ bɛzonlenle la ɛlɛdi nyane wɔ mekɛ mɔɔ bɛlɛkɛla bɛ asafo ne anu amra la.
^ ɛden. 59 NVONINLI NWO EDWƐKƐ: Agyalɛma ko ne ala ɛlɛyɛ asɔne ahile Gyihova kɛ ɔboa bɛ ɔmaa bɛgyinla tɛnlabelɛ ne anloa.
^ ɛden. 61 NVONINLI NWO EDWƐKƐ: Ɔlua Gyihova moalɛ zo, agyalɛma ne ɛzia ɛra dahuu ɛzonlenlɛ gyima ne anu bieko. Bɛlɛfa aneɛ mɔɔ bɛzukoale wɔ mekɛ mɔɔ bɛle edwɛkpatɛlɛvolɛma la bɛali gyima wɔ bɛ asafo fofolɛ ne azɛlɛsinli ne anu.
