URHOMU-ẸMRO UYONO 34
Oborẹ Ene ru Mẹrẹn Omamerhomẹ Uvuẹn Owian Ọkpokpọ
“Osolobrugwẹ rhẹ ọvwọkon rọ nọ sẹrerhumuji ewian are ọrhẹ ẹguọlọ are i dje kpahen odẹ ọnẹye-en.”—HEB. 6:10.
IJORO 38 Ono Ruo Gbanhon
ẸZẸKOKO *
1-3. Mesoriẹ imizu buebun ra ga ọke vuọnvuọn e wene ewian aye?
ROBERT ỌRHẸ MARY JO, ni tare: “Ọke ame a ghwọghọ ẹgbukpe 21 rhẹ owian imishọnari ame ne, eri vwiẹre ame ne kpomẹ. Oma ọ merhenren ame taghene ame a hẹrote aye. Ọrẹn, ọ dare ame ọke ame a nyajẹ owian ame vwo.”
2 William ọrhẹ Terrie ni tare: “Ọke ame e rhon taghene emiamo ame ọ lẹrhẹ ame ghwẹrioma riẹ owian ame-e, ame ni viẹre. Ame i guọlọ ga i Jehova uvuẹn ẹkwotọre ọrọrọ, ọrẹn vwana ame i sabu ruie ghwomara-an.”
3 Aleksey nọ tare: “Ame i rheri taghene ihworho re sehiẹn ame i guọlọ dobọ owian na uvuẹn Oghọn Ukoko ame i havwọ ji. Ọrẹn, ọ ji da mẹ ọke ra ta rẹn ame taghene ame i nẹ Oghọn Ukoko na.”
4. Enọ ego ya na kpahenrhọ uvuẹn urhomu-ẹmro ọnana?
4 Haba iyẹnrẹn imizu enana, ihworho buebun ra ga ọke vuọnvuọn ọrhẹ eri ha uvuẹn Oghọn Ukoko ni vwo ewian ekpokpọ. * Ọnọ sabu bẹn rẹ imizu enana ri vwo atamwu ina nyaji owian aye i vwo ẹguọlọ kpahen vwo. Me yọ nọ ha userhumu rẹn aye nyerẹn ghele ewene enana? Marhẹ wu ne ru ha userhumu rẹn aye? Ẹkpahenrhọ harẹn enọ enana ina sabu ha userhumu rẹn ọwan ephian nyerẹn ghele ewene ri homaphia uvuẹn akpenyerẹn ọwan.
OBORẸ ENE RU NYERẸN GHELE EWENE
Mesoriẹ ọnọ bẹn rẹ imizu ra ga ọke vuọnvuọn nẹ aye i nyaji owian aye vwo? (Ni udjoghwẹ 5) *
5. Marhẹ owian ro wenerin ono ru sabu hobọte ọwan?
5 Sẹ a ga uvuẹn uvuẹn Oghọn Ukoko yanghene ekete ọrọrọ, ana sabu vwo ẹguọlọ kpahen ekete ra havwọ ọrhẹ ihworho ri ha avwaye. Omarana, nọ da ọwan omamọ orhianẹ owian ọwan o wenerin. Ọwan i vwo ẹguọlọ kpahen imizu ọwan, e ji brudu kpahen aye, maido orhianẹ ọwan a nyajẹ aye vwo fọkiẹ ẹkparehaso. (Matt. 10:23; 2 Cor. 11:28, 29) Habaye, ọ lọhọ re ne wene riẹ owian ọkpokpọ-ọ, ọnana o ji sekpahen ọke ra ta rẹn ọwan na ghwẹrioma ya ga uvuẹn ukoko re nurhe. Robert ọrhẹ Mary Jo, ni tare: “Irueruo ẹkwotọre ame ọ sẹrerẹ ame ẹro ne, omarana nọ bẹn ame ina ha edjadjẹ ame ghwoghwo. Nọ họhọre taghene ame nẹ epha uvuẹn ẹkwotọre ame.” Ihworho ezẹko re wene ewian aye ina sabu dẹrughwaroghwẹ ebẹnbẹn igho. Ẹhẹn aye ọnọ sabu seriotọre, aye ina ji sabu vwo ẹhẹn eveva. Me yọ nọ ha userhumu rẹn aye?
O fori ne tikẹrẹ i Jehova jeghwai hẹrosuiẹ (Ni idjaghwẹ 6-7) *
6. Marhẹ ene ru daji kẹrẹ i Jehova?
6 Daji kẹrẹ i Jehova. (Jas. 4:8) Marhẹ ene ru ọnana lele? Nyoma ra na hẹroso Osolobrugwẹ ro rhiẹ “Ohworho ro rhon ẹrhomo.” (Ps. 65:2) Psalm 62:8 ọrhọ ta, “Are i ta ọsoso ẹhẹn are riẹn.” Jehova ọnọ sabu ru “vrẹn ekwakwa rẹ ọwan i nekpẹn yen mie yi.” (Eph. 3:20) Jehova o ruẹ vrẹn oborẹ ọwan i nọ mie yi uvuẹn ẹrhomo. Ọnọ sabu kwaphiẹ ebẹnbẹn na rhọ izede ọwan i vwe fiẹrorhọ.
7. (a) Me yọ nọ ha userhumu rẹn ọwan daji kẹrẹ i Jehova? (b) Lele oborẹ ọ ha uvuẹn Hebrews 6:10-12, erere ego ya na mẹrẹn erhe fiomarhọ ẹga i Jehova rhẹ atamwu?
7 Na sabu daji kẹrẹ i Jehova, se i Baibol na kẹdẹkẹdẹ, jeghwai roro kodo kpahen oborẹ wu seri. Omizu owu ro rhiẹ imishọnari bi nọ tare: “Rhe ruẹ ogame ekrun ọnọ, ji rhe mwuegbe hẹrhẹ uyono ukoko ọke ephian jerẹ oborẹ we ruẹ uvuẹn owian wu havwọ bi.” Habaye, rhe fiomarhọ owian aghwoghwo na uvuẹn ukoko ọkpokpọ wu havwọ na. Jehova ọ karorhọ ihworho ra fuevwan ga ye ọke ephian, ọrhọ tobọ rhianẹ aye i vwa sabu ruẹ oborẹ aye ruẹ bi-i.—Se Hebrews 6:10-12.
8. Marhẹ ẹmro rọ ha 1 John 2:15-17 ono ru sa ọwan erhumu ruẹ akpọ ọwan lọhọ?
8 Ruẹ akpenyerẹn ọnọ lọhọ. Wu vwa lẹrhẹ ọfiamu rọ ha akpọ Echu lẹrhuọ dobọ ogame i Jehova ji-i. (Matt. 13:22) Wu vwa kerhọ ihworho ri vwa ga i Jehova-a, yanghene igbehian ọrhẹ ihworho ekrun ọnọ ra ta wẹn taghene wu guọlọ igho buebun neneyo akpenyerẹn ọnọ ọ sabu rhomu. (Se 1 John 2:15-17.) Hẹroso i Jehova ro veri taghene ọnọ yẹ ọwan i kemru kemru ra guọlọre uvuẹn “ọke ra guọliẹ.”—Heb. 4:16; 13:5, 6.
9. Lele oborẹ ọ ha Proverbs 22:3, 7, mesoriẹ ọ ghanren na kẹnoma rẹn osẹriọ, me yọ nọ ha userhumu rẹn ọwan brorhiẹn ẹghwanren?
9 Kẹnoma rẹn osẹriọ. (Se Proverbs 22:3, 7.) Ra na kwa ọnọ sabu ghanren, ọnọ ji phẹrẹ ra na riosa. Ne wu kẹnoma rẹn osẹriọ, wu vwa kpare ekwakwa wu vwa guọlọ dẹ riosa-a. Arha ha ebẹnbẹn fọkime a hẹrote ihworho ọwan re vwo ẹguọlọ kpahen re kpomẹ, ọnọ sabu phẹrẹ ra na riosa. Uvuẹn erhirhiẹ ọrana, karorhọ taghene “ẹrhomo kugbe orẹ” ọnọ sabu ha userhumu rẹn ọwan brorhiẹn ẹghwanren. Jehova ọnọ kpahenrhọ ẹrhomo ọwan, nyoma rọ nọ yẹ ọwan ufuoma rọ nọ “sẹrorẹ ọmudu ọrhẹ oghwa iroro” ọwan, jeghwai ha userhumu rẹn ọwan dabu roro ekwakwa fiotọre.—Phil. 4:6, 7; 1 Pet. 5:7.
10. Marhẹ ene ru vwo igbehian ekpokpọ?
10 Sẹrorẹ omamọ okugbe. Ta rẹn obọdẹn igbehian wu vwori kpahen ebẹnbẹn ọrhẹ aghọghọ wu mẹrẹn ne, maido eri dẹrughwaroghwu aruẹ erhirhiẹ ọnọ na ne. Wu rhe ruẹ ọnana, ọnọ ha userhumu wẹn. (Eccl. 4:9, 10) Igbehian wu vwori uvuẹn owian wu havwọ bi ine ji rhiẹ igbehian. Omarana, damoma vwo igbehian ekpokpọ. Karorhọ taghene ne wu sabu vwo igbehian, wu ne rhiẹ omamọ ugbehian vwẹre. Marhẹ wu ne ru vwo igbehian ekpokpọ? Ta rẹn awọrọ kpahen ekwakwa irhorhomu wu rhiẹromẹrẹn uvuẹn ogame i Jehova ne, jenẹ awọrọ i mẹrẹn aghọghọ wu vwori uvuẹn ogame i Jehova. Ọrhọ tobọ rhianẹ ezẹko uvuẹn ukoko na e vwẹruọ oborẹ ọsoriẹ we vwo ẹguọlọ kpahen ogame Uvie na vuọnvuọ-ọn, awọrọ ina sabu yono nẹ omamọ udje ọnọ jeghwai rhiẹ obọdẹn igbehian. Ọrẹn, wu vwa ta kpahen oma phan yanghene ekwakwa wu ru ne uvuẹn ogame i Jehova-a, wu vwe ji vwo iroro ọsọsọ kpahen oma-a.
11. Marhẹ wu ne ru sẹrorẹ omamerhomẹ uvuẹn orọnmo ọnọ?
11 Orhianẹ wu nyaji owian ọnọ vwo fọkime ane yanghene esa ọnọ o kpomẹ, wu vwe kperie-e. Habaye, orhianẹ wẹwẹ ye kpomẹ, wu vwe jẹ ẹhọn seriotọre-e. Karorhọ taghene are “ugboma owu,” are i ji ve obaro i Jehova taghene are ina hẹrote omomare uvuẹn erhirhiẹ ephian. (Matt. 19:5, 6) Orhianẹ are i nyaji owian are vwo fọkime anuọ ọ mẹrenvwan are i vwe fiẹrorhọ, yẹ ọmọ na imwẹro taghene ọ ghanren ghwẹ owian ọnọ. Yẹ ye imwẹro taghene ọye “uku” ro nẹ obẹ Osolobrugwẹ rhe. (Ps. 127:3-5) Habaye, ji ta riẹn kpahen ekwakwa irhorhomu wu rhiẹromẹrẹn uvuẹn owian ọnọ. Ọnana ọnọ sabu lẹrhẹ ọmọ na brorhiẹn rọ nọ ha akpenyerẹn ye ga i Jehova vuọnvuọn jerẹ oborẹ wu ruru.
OBORẸ AWỌRỌ INE RU HA USERHUMU PHIA
12. (a) Marhẹ ene ru ha userhumu rẹn ihworho ri ha owian Uvie na vuọnvuọn nẹ aye i sabu rha ga i Jehova? (b) Marhẹ ene ru ha userhumu rẹn aye riẹnrioma rhẹ owian ọkpokpọ na?
12 Ọrẹ omamerhomẹ, ikoko buebun ọrhẹ owuowọnwan a damoma ha userhumu rẹn ihworho ri ha owian Uvie na vuọnvuọn nẹ aye i sabu rha ga i Jehova. Aye e ruẹ ọnana nyoma aye a ha urhebro rẹn aye, ha userhumu rẹn aye izede ọrẹ ugboma, yanghene nyoma aye a ha userhumu rẹn aye hẹrote ihworho ekrun aye ri ha oboghwa. (Gal. 6:2) Erhe wene owian omizu rọ ha owian Uvie na vuọnvuọn jeghwai dje yi rhiẹ ukoko ọnọ, wu vwe roro taghene o ruẹ oborẹ ọ sọre yanghene o ruẹ ọdanda-an. * Ukpomaran, ha userhumu riẹn nọ kiki riẹnrioma rhẹ ewene na. Ọrhọ tobọ rhianẹ ọ vwọ sabu wian buẹn fọkiẹ emiamo-o, dabu rhiabọ dedie jeghwai kpẹmiẹ fọkiẹ owian yen. Damoma rhiẹ ugbehian yen. Jeghwai yono nẹ irherhe ọrhẹ oborẹ o rhiẹromẹrẹn ne.
13. Userhumu ego ya na sabu yẹ ihworho ri vwo owian ọkpokpọ?
13 Imizu re wene owian aye obọ, i guọlọ userhumu are neneyo aye i sabu mẹrẹn oghwa, rhe oborẹ a ruẹ imoto lele, vwo iruo ọrhẹ ekwakwa ekokamu erọrọ. O ji fo na ta rẹn aye kpahen oborẹ e ruẹ ekwakwa lele, jerẹ uchunu igho ra kwa rẹn era hẹrote ukpẹ, ọrhẹ osa urhomu. Ọrọ mai ghanren, o fori na damoma vwẹruọ erhirhiẹ aye. Ọkezẹko aye yanghene ohworho ekrun aye o kpomẹ. Aye ina sabu rhe mwuomarhọ fọkiẹ uhwu ohworho aye i vwo ẹguọlọ kpahen. * Aye ina sabu rhe mwuomarhọ fọkiẹ igbehian aye ri ha ekete aye i havwọ bi. Ọ lọhọ re ne nyerẹn ghele aruẹ iroro ikokodo enana-a.
14. Marhẹ ighwoghwẹmro ri ha ukoko owu i ru ha userhumu rẹn omizu ọmase owu riẹnrioma rhẹ owian ọkpokpọ ye?
14 Are i rha ha userhumu rẹn aye jeghwai dje omamọ udje phia, are ina sabu ha userhumu rẹn aye nyerẹn ghele ewene na. Omizu ọmase owu rọ gare uvuẹn ẹkwotọre ọrọrọ ẹgbukpe buebun ne nọ tare: “Uvuẹn owian mẹ bi, mia ha i Baibol yono ihworho kẹdẹkẹdẹ. Ọrẹn, uvuẹn owian ọkpokpọ mẹ na, mi vwe kiki mẹrẹn uphẹn mi ne se ekete i Baibol owu yanghene dje ividio rẹn ihworho-o. Ọrẹn, imizu ukoko ọkpokpọ mi havwọ na, na ha use mẹ ne mi lele aye ya ha uyono i Baibol phia. Oborẹ imizu na e dje oruru ọrhẹ uduefigbere phia lele ọke aye a ha uyono i Baibol phia, nọ lẹrhere mẹ vwo ẹguọlọ kpahen okogho na. Ne mi yono oborẹ a tuẹn ẹmro rhọ uvuẹn ẹkwotọre ọkpokpọ na. Enana ephian ni ha userhumu mẹ rharhumu mẹrẹn aghọghọ.”
RHE RUẸ RIARORHỌ!
Guọlọ izede wu ne kerabọ owian Uvie na uvuẹn ukoko ọkpokpọ wu havwọ (Ni idjaghwẹ 15-16) *
15. Marhẹ wu ne ru sabu fikparobọ uvuẹn owian ọkpokpọ ọnọ?
15 Wu na sabu fikparobọ uvuẹn owian ọkpokpọ ọnọ. Wu vwe roro taghene owian wa wian bi, o fiemru-u. Roro kpahen izede i Jehova o ru ha userhumu wẹn vwana, ne wu ji rhe ghwoghwo. Hẹrokele Ilele Kristi ri havwiẹ ọke inyikọ na. Ekete aye i havwọ ephian, aye i “ghwoghwo iyẹnrẹn esiri na lele ọsoso ẹkwotọre na.” (Acts 8:1, 4) Wu rhe fiomarhọ owian aghwoghwo na, wu na mẹrẹn ebrurhọ buebun. Jerẹ udje, ekobaro ezẹko re le nẹ ẹkwotọre owu, ni kwa riẹ ẹkwotọre ọrọrọ rọ guọlọ userhumu omamọ rọ kẹrẹ avwaye, rọ ji djẹ edjadjẹ aye. Uvwre ibiamo ezẹko ọvo, na ha ẹko ekpokpọ buebun mwu.
16. Marhẹ wu ne ru mẹrẹn aghọghọ uvuẹn owian ọkpokpọ na?
16 “Aghọghọ i Jehova yẹ omẹgbanhon are.” (Neh. 8:10, ekete ra djokarhọ) Ọrhọ tobọ rhianẹ e vwo ẹguọlọ kpahen owian ọwan omamọ, o fori na ha i Jehova ruẹ aghọghọ ọwan ukperẹ ono rhiẹ owian na. Omarana, rhe lele i Jehova wian kugbe, jeghwai nekpẹn ẹghwanren, ọkpọvi ọrhẹ userhumu mie yi. Karorhọ taghene wu vwo ẹguọlọ kpahen owian wa wian bi, fọkime wu ha ọsoso ọmudu ọnọ ha userhumu rẹn ihworho ri ha avwaye. Fuevwan wian owian ọkpokpọ na, ne wu mẹrẹn oborẹ i Jehova ọnọ ha userhumu wẹn vwo ẹguọlọ kpahiẹn.—Eccl. 7:10.
17. Me ya na vi karorhọ uvuẹn owian ra wian vwana?
17 O fori na karorhọ taghene ana ga i Jehova bẹmẹdẹ, ọrẹn owian ra wian vwana ọrẹ ibiọke. Uvuẹn akpọ ọkpokpọ na, ana sabu wene owian ọwan ephian. Aleksey, ra hunute uvuẹn ọtonrhọ na, o vwo imwẹro taghene oborẹ o rhiẹromẹrẹn vwana, ọ lẹrhiẹ mwuegbe hẹrhẹ oborẹ ọnọ phia obaro na. Aleksey nọ tare: “Mi rheri taghene Jehova o nyerẹn, akpọ ọkpokpọ na ọnọ rhiọ, ọrẹn nọ họhọre taghene aye i tephe mẹ. Vwana, mia mẹrẹn i Jehova obaro mẹ, akpọ ọkpokpọ na oborẹ ọnọ rhiọ phẹrẹkpẹ.” (Acts 2:25) O toro oborẹ owian ọwan ọ havwọ-ọ, jenẹ erhe leli Jehova wian kugbe. Ọ sẹrerhumuji ọwa-an, ọrẹn ọnọ ha userhumu rẹn ọwan mẹrẹn aghọghọ uvuẹn owian ra wian riẹn, o toro ekete ra wian ye-en.—Isa. 41:13.
IJORO 90 Arha Vwa Oma, Bọn Ọwọnwan
^ Udjoghwẹmro 5 Ọkezẹko imizu ọwan re vwobọrhọ owian Uvie na vuọnvuọn ina sabu nyaji owian aye vwo, yanghene vwo owian ọkpokpọ. Urhomu-ẹmro ọnana ọnọ ta kpahen ebẹnbẹn aye a dẹrughwaroghwẹ ọrhẹ oborẹ ọnọ ha userhumu rẹn aye fikparobọ uvuẹn ewene ọkpokpọ ọnana. Ọnọ ji ta kpahen oborẹ awọrọ ine ru ha udu rhẹ aye aghwẹ jeghwai hobọtua aye, ọrhẹ iruemru-urhi Baibol ri na sabu ha userhumu rẹn ọwan nyerẹn ghele ewene.
^ Udjoghwẹmro 4 Omaran ọ ji havwọ, imizu ehworhare ra kobaro ri te ẹgbukpe ezẹko ne, na ha ewian aye rẹn idama ri mwuovwan. Se irhomu-ẹmro na “Ilele Kristi Ri Kpako Ne—Jehova ọ ha Ukẹro Ọghoghanren ni Atamwu are,” rọ ha uvuẹn Oghwa Odẹrẹ ọrẹ September 2018, ọrhẹ “Sẹrorẹ Ufuoma Udabọ Erhirhiẹ rọ Wẹnẹ,” rọ ha uvuẹn Oghwa Odẹrẹ ọrẹ October 2018.
^ Udjoghwẹmro 12 Ekpako ri ha ukoko aye bi, i gba kiki ya ileta vwe ukoko ọkpokpọ na neneyo a sabu kwenu rẹn aye nẹ aye i rharhumu ga ẹrhẹ ọkobaro ọke ephian, ọkpako ukoko yanghene odibo owian.
^ Udjoghwẹmro 13 Se irhomu-ẹmro na “Help for Those Who Grieve,” rọ ha uvuẹn Awake! No. 3 ọrẹ 2018.
^ Udjoghwẹmro 57 IDJEDJE IFOTO: Esa ọrhẹ ane owu re wene owian imishọnari aye uvuẹn amwa ọrọrọ, re kpogho abọ rẹn imizu na ri ha ukoko aye i havwọ, aye a jeghwai viẹ.
^ Udjoghwẹmro 59 IDJEDJE IFOTO: Uvuẹn ẹkwotọre aye i nurhe, esa ọrhẹ ane na a nẹrhomo vwe i Jehova ọke ephian nọ ha userhmu rẹn aye nyerẹn ghele ebẹnbẹn aye a dẹrughwaroghwẹ.
^ Udjoghwẹmro 61 IDJEDJE IFOTO: Nyoma userhumu i Jehova, aye i rharhumu vwobọrhọ owian ọkobaro ọke ephian. Aye a ha ena edjadjẹ aye i yonorin uvuẹn owian imishọnari aye ghwoghwo iyẹnrẹn esiri na rẹn epha ri ha okogho ọkpokpọ aye i havwọ na.
