1-3. Ngera bebil er a uchul me tirke el ngar er a mui el taem el omesiou a mo kirir el melodech a rolel a omesiungir?

A ROBERT me a Mary Jo a melekoi el kmo: “A uriul er aki mosiou el 21 el rak el missionari, e a demmam me a delemam a mlo mechitechut. Me ngkmal mle ungil a rengmam el omekerreu er tir, engdi ngmlo klou a kngtil a rengmam er sera ki mtobed er a beluu el kmal mla mo betik a rengmam er ngii.”

² A William me a Terrie a kmo: “Sera ki bo modengei el kmo a secheram a uchul me ngdikea el sebecham el melemolem er a omesiungam, e aki di lilangel. A urungulam el kmal somam el mesiou er a Jehovah er a ngodech el beluu a dikea el sebecham el meruul er ngii.”

³ A Aleksey a melekoi el kmo: “Aki mle medengei el kmo a ruldechelakl er kemam a mle sorir el chosmerii a obis er a Resioning er a Jehovah er sel beluu el kusiou er ngii. Engdi ngdirk mechas a renguk er a ledubech tia el tekoi e bo el kiram el tuobed er a Bethel.”

4. Ngera el ker a bo dosaod er tia el suobel?

⁴ A rebetok el mesiou el mui el taem, el uldimukl er tirke el mesiou el ngar er a Bethel, a dirrek el mlukngerachel er a beches el rolel a omesiou. * Me ngsebechel kmal mo meringel er tirka el blak a rengrir el rudam me a rudos sel bo el kirir el melodech er a omesiungir el kmal mle sorir. Me ngera sebechel ngosuterir sel bo el chelebangel er tia el omelodech? E mekera sebechem el ngosuterir? A nger er aika el ker a sebechel ngosukid el rokui sel bo dechelebangel a omelodech er a klengar er kid.

5. Ngokiu a ngera el rolel e a omeldechel a omesiunged a sebechel ngar ngii a lerellii er kid?

⁵ Alta kede mesiou el omerk er a klumech me a lechub e kede ngar er a Bethel, ngsebeched el mekurulii a dmolech el bltikerreng er kid el mora rechad me a dirrek el basio el dosiou er ngii. Me sel bo lak doruul er tia el omesiunged, e ngmo uchul a klou el kngtil a rengud. Kede mo oureng er a rudam me a rudos er kid e dirrek el mo suebek a rengud er tir, el ileakl a lsekum e ngmo kired el merael e le ngodechelakl a uchul. (Mt. 10:23; 2 Ko. 11:28, 29) Ngdirrek el sebechel kmal mo meringel er kid el mora ngodech el basio e le ngbelkul a kmo ngmocha kired el omeksau er kid er a beches el rolel a klengar. E tia dirrek el sebechel el duubech sel sekum kede lmuut el mora beluad. A Robert me a Mary Jo a melekoi el kmo: “Aki mla obes a siukang er a belumam e dirrek el mlo meringel er kemam el oldingel e le ki mla obes a tekingam. Kemam el milsiou er a ngodech el beluu el kemanget el taem a uchul, me ngdi ua ki ble mchad er a ngodech el beluu.” A rebebil el mlengodech a rolel a omesiungir a locha dirrek el mo chelebangel a mondai er a udoud. Nglocha mo suebek a rengrir, e mo diak lulterekokl a rengrir e dirrek el mo mechitechut a rengrir. Me ngera sebechel ngosuterir?

6. Ngmekera dolemolem el kmeed er a Jehovah?

⁶ Molemolem el kmeed er a Jehovah. (Jak. 4:8) Ngmekera doruul er tiang? Ngokiu sel doumerang el kmo Ngii a ‘onger a nglunguuch.’ (Psa. 65:2) A Psalm 62:8 a kmo: “Msbedii er a ikel ngar a rengum.” A Jehovah a sebechel el “kudmokl a lmuut el kmal obdois el tekoi er a ikel sebeched el olengit, ma me soiseb er a uldesued.” (Efe. 3:20) Ngdiak di lomeskid aike el dolengit el ngar er a nglunguched. Nglocha mo sumechokl a mondai er kid lousbech er a rolel el dimlak a ta el dolatk el kirel.

7. (a) Ngera sebechel ngosukid me kede melemolem el kmeed er a Jehovah? (b) A doltirakl er a Hebru 6:10-12, e ngera mo duubech e le kid el blak a rengud el mesiou er a Jehovah?

⁷ Me a lsoad el melemolem el kmeed er a Jehovah, e ngkired el menguiu er a Biblia er a bek el sils e mo dmolech el melebedebek aike el donguiu. A ta el chad el milsiou el missionari a melekoi el kmo: “Molemolem el meruul er a omengull el telungalek er kau e mongetmokl er kau el mora miting, el di uaike el murruul er a omesiungem er a uchei.” E dirrek el moruul aike el rokui el sebechem el mo teloi er a ureor er a berkel a ungil chais el ngar er a ongdibel er kau. A Jehovah a kmal diak lobes er tirke el blak a rengrir el mesiou er ngii, el mo lmuut me a lsekum e ngdiak el sebechir el remuul  aike el rokui el lurruul er a ngar er a mong.​—Monguiu er a Hebru 6:10-12.

8. Ngmekera tekoi el ngar er a 1 Johanes 2:15-17 a lengesukau el melemolem el omekbeot er a klengar er kau?

⁸ Molemolem el omekbeot er a klengar er kau. Lak bechei a sebekreng er a klengar er a beluulechad er a Satan me le “chuucheb” a omesiungem el mora Jehovah. (Mt. 13:22) Lak morrenges er a rechad el diak losiou er a Jehovah me a lechub a resechelim me a lechub a rechedam el tir a sorir el olengeseu er kau sel lolekoi el kmo, ngkirem el mo mengereker a betok el udoud me bo lungil a klengar er kau. (Monguiu er a 1 Johanes 2:15-17.) Moumerang er a Jehovah, el ngii a tibir el mo meskau ‘sel mousbech er ngii’ el kirel a tekoi er a klereng, me a uldesuem, me a klechad er kau.​—Heb. 4:16; 13:5, 6.

9. A doltirakl er a Osisechakl 22:3, 7, e ngera uchul me ngklou a ultutelel a dongeroid er kid er a diak a ultutelel el blals? Ngera sebechel ngosukid el meruul a ungil omelilt?

⁹ Mongeroid er kau er a diak a ultutelel el blals. (Monguiu er a Osisechakl 22:3, 7.) Ngsebechel kmal mo klou el udoud a cho mchitii a lsekum ke melukl, e tiang a sebechel rullau el mo beot er a rengum el omals er kau. Me lak momals er kau el di omechar aike el tekoi el diak el sal meklou a ultutelel. Engdi ngsebechel el kmal mo meringel a uldesuem el kirel a ildisel a udoud el bo momals er kau sel bo mchelebangel er a meringel el blekeradel, el uai sel momekerreu er a chedal a telungalek er kau el smecher. Ngar chouaika el blekeradel, e lak mobes el kmo a ‘omolengit e moluluuch’ e ngsebechel el ngosukau el mo ungil melilt a tekoi. E a Jehovah a sebechel el onger a nglunguchem lokiu sel lengesukau el mo chelellakl a uldesuem me bo modengei el kmo ngera sel kot el ungil tekoi el sebechem el rullii.​—Fil. 4:6, 7; 1 Pe. 5:7.

10. Ngmekera lebo er ngii a rebeches el sechelid?

¹⁰ Molemolem el kmeed er tirke el ungil sechelim. Mongedecheduch er a rekmeed el sechelim el louchais a uldesuem me a ringel el cho mchelebangel, el ileakl el mo er tirke el mla chelebangel a osisiu el deurreng me a omelsemai. Tiang a sebechel ngosukau el mo dmeu a rengum. (Oli. 4:9, 10) Tirke el mle sechelim er a omesiungem er a uchei a dirk sechelim. Engdi chelecha el mngar er a beches el omesiungem, e ngkirel mo er ngii a rebeches el sechelim. Lak mobes, a lsoam a lebo er ngii a resechelim, e ngkirem el mo ungil sechelei. Me ngmekera e mo er ngii a rebeches el sechelim? Mouchais er a rebebil el kirel aike el ungil tekoi el dilubech er a omesiungem el mora Jehovah me bo el sebechir el melechesuar a deurreng er kau. A rebebil el ngar er a ongdibel a locha diak lodengelii a uchul me ngkmal soam a mui el taem el omesiou, engdi a rekuk bebil a locha mo sorir el mo medengei a lmuut el betok e mo sorir el mo sechelim. Engdi lak di mosaod a tekoi el di kirem me a lechub a tekoi el bla mruul er a omesiungem el mora Jehovah, e dirrek el diak di mosaod a mekngit el uldesuem.

11. Ngmekera omrellii a chebechiieliu me lebo er ngii a deurreng er a chelsel?

¹¹ A lsekum e ngsecherel a bechim a uchul e ngmocha kiriu el mo diak moruul er a omesiungiu, e lak moltelechakl er a bechim. Me a lechub, e ngsecherem a uchul, e lak bo lemekngit a rengum,  el omdasu el kmo kau a uchul me a bechim a mekngit a rengul. Lak mobes el kmo kemiu a “tal chelechad” e sera obo bechiil, e kom tilbir el mora Jehovah el kmo, kom mo kaukerreu er a chelsel a ngii di el blekeradel. (Mt. 19:5, 6) E a lsekum e ngdimlak el telbiil el cheroll a uchul e ngmocha kiriu el mo diak moruul er a omesiungiu, e moterekeklii a rengul a ngelekiu el kmo ngii a kot el klou a ultutelel, el diak el sel mle omesiungiu. Bo blechoel louchais er a ngelekiu el kmo kom momes er ngii el “sengk” el mla er a Dios. (Psa. 127:3-5) E dirrek el mouchais er ngii el kirel aike el ungil tekoi el dilubech er sera omngar er a omesiungiu. Tiang a sebechel ngosuir a ngelekiu el mo mesiou er a Jehovah el mui el taem el di uai kemiu.

12. (a) Ngmekera dengesuterir tirke el ngar er a mui el taem el omesiou me lolemolem el ngar er a omesiungir? (b) Ngmekera dengesuterir el mesmechokl a uldesuir el kirel tia el beches el rolel a omesiungir?

¹² Kede chemat a betok el ongdibel me a derta el rudam me a rudos el tir a olengeseu er tirke el mesiou el mui el taem me lolemolem el meruul er a omesiungir. Te meruul er tiang lokiu sel lolisiich er tir, e lomesterir aike el lousbech, me a lechub sel lolengeseu el omekerreu er a rechedal a telungalek er tir el ngar er a belurir. (Gal. 6:2) Me a lsekum tirke el ngar er a mui el taem el omesiou a mukngerachel el mo mesiou er a ongdibel er kau, e lak momes er tia el omeldechel a omesiungir el olechotel a kmo, ngdimlak leketmeklii a ungil ureor me a lechub e ngar ngii a mekngit el lerirellii. * Bai mngesuterir el sumechokl a uldesuir el kirel tia el omelodech. Moutkeu er tir e mchat er tir el kirel a ureor el bla leruul, el mo lmuut me a lsekum ngdikea lsebechir el remuul a betok e le ngchelitechetul a bedengir er chelechang a uchul. Bo mungil medengelterir, e mosuub a betok er a klemedengei er tir, me a osisecheklir, me a tekoi el dilubech er a klengar er tir.

13. Ngera el ngeso a sebeched el mesterir tirke el nguu a beches el rolel a omesiou?

 ¹³ Tirke el nguu a beches el rolel a omesiou a locha mo ousbech a ngeso el osiik a blai, me a mlai, me a ureor me a lmuut el bebil er a tekoi el lousbech. Te locha dirrek el kirir el mo medengei a beches el omesodel a tekoi er a bek el sils, el ua rolel a de harau a tax e dolai a insurance. E sel klou a ultutelel a kmo, te ousbech er kau el mo medengei aike el tekoi el lechelebangel. Tir me a lechub a chedal a telungalek er tir a locha ngar ngii a secherir. Me a lechub e te locha ngar er a klengiterreng el kirel a kodellel a betik er a rengrir. * E dirrek, alta ngdiak losaod er ngii, engdi nglocha mekngit a rengrir e le te oureng er a resechelirir er sel dimla omesiungir. Me te ousbech a taem el mo mesmechokl aike el uldesuir, el sebechel rulleterir el mo rrau a rengrir.

14. Te milekera re publisher e ngosuir a ta el odos el mo sumecheklii a uldesuel el kirel a beches el rolel a omesiungel?

¹⁴ Me a lsekum e ke oldingel el obengterir e melisiich er tir lokiu a ungil kerebai er kau, e ngsebechem el ngosuterir el melodech a uldesuir. A odos el milsiou er a ngodech el beluu el betok el rak a kmo: “Ngar sel dimla omesiungek, e te mla er ngii a rechad el kusuub a Biblia lobengterir er a bek el sils. Engdi ngar tia el beches el omesiungek, e ngdiak a kmal techellek el lomkais er a Biblia er ngak me a lechub ak ulecholt er a video sel kuldingel a obliil. Engdi a rudam me a rudos el ngar tia el beches el ongdibel er ngak a ullengit er ngak el mo obengterir el lmuut el oldingel er tirke el semeriar. Me sel kumes er a blakerreng me a meringel el urerir tirka el rudam me a rudos el mesuub er a Biblia el obengterir a rechad, e ngosukak el mo ungil a osengek el kirel a territory. Me ak mla mesuub el mo meduch el omuchel a cheldechedechak. E tia mla ngosukak el lmuut el mo dmeu a renguk.”

15. Ke mekera e mo ungil er tia el beches el omesiungem?

¹⁵ Ngsebechem el rullii a omesiungem el lmuut el mo ungil. Lak momdasu el kmo ngdimlak a klungiolel a urerem er sel dimla omesiungem me a lechub e ngua lak a ultutelem er chelechang. Molatk aike el betok el rolel e a Jehovah a olengeseu er  kau er chelechang, e molemolem el omerk er a klumech. Moukerebai er a reblak a rengrir el Kristiano er a irechar. A ngii di el basio el lebla er ngii, me tir a di “ullisechakl a tekingel a Dios er ker me ker.” (Rel. 8:1, 4) A lsekum e ke melemolem el omerk er a klumech, e ngsebechem el mo meridm a ungil tekoi. El ua tiang, a re pioneer el luleldik er tir er a ta er a beluu a mlo er a kuk ta er a kmeed el beluu el kmal luluusbech er a rechad el melekoi a omelekingir. Me ngdi mle chelsel a kesai el buil, e a rebetok el chad a mlo teloi aike el beches el group el ngar sel omelekoi el tirka el pioneer a uluusbech er ngii.

16. Ngmekera sebechel el mo dmeu a rengum el ngar tia el beches el omesiungem?

¹⁶ “A deurreng el le beskemiu a RUBAK a mo melisiich er kemiu.” (Neh. 8:10) A kot el klou el deuil a rengud a kirel el mei lokiu a deleuill er kid me a Jehovah, el diak el omesiunged, alta kede kmal mekreos er ngii. Me a lsoad el mo dmeu a rengud, e ngkired el melemolem el kmeed er a Jehovah e mo blechoel lultuil er ngii el kirel a llomeserreng, me a ulekrael, me a ngeso. Lak mobes el kmo ngmlo betik a rengum er sel dimla omesiungem e le kau el mirruul er a tkurrebab el sebechem el ngosuterir a rechad er sel beluu. Me bo er a tkurrebab el sebechem el meruul er tia el omesiungem er chelechang e mesa rolel e a Jehovah a lengesukau el dirrek el mo betik a rengum er ngii.​—Oli. 7:10.

17. Ngera kired el melatk er ngii el kirel a omesiunged er chelechang?

¹⁷ Lak dobes el kmo a omesiunged el mora Jehovah a diak a ulebengelel, engdi omesiunged er chelechang a di tedeb. Ngar sel beches el beluulechad, e kid el rokui a locha mo mengodech a omesiunged. A Aleksey el dulsaod er ngii er a uchei, a oumerang el kmo a omeldechel a omesiungel a olengeseu er ngii el mo kltmokl el kirel aike el tekoi el di kmedung el mo er ngii. Ngmelekoi el kmo: “Ak ungil el medengei el kmo ngmera el ngar ngii a Jehovah me a beches el beluulechad, engdi ngkora ua lecheroid. Engdi chelechang, e ak kmal kmeed er a Jehovah, me ngkora ua lsal kmeed a beches el beluulechad er a renguk.” (Rel. 2:25) Me dolemolem el merael el obengkel a Jehovah el ngar er a ngii di el rolel a omesiou. Ngkmal diak a ta el bo lechitid, e ngbai ngosukid el mo dmeu a rengud er a ngii di el rolel a omesiou el doruul er ngii, er a chelsel a ngii di el beluu.​—Isa. 41:13.