LONGO DIA 34
Khala Hehi ha Gutshigina Usombegeshi Wagasue Wajiya Gutagana Nawo
‘Nzambi gashigo nu lutondo ha gubuita mutshima gu mudimo muatshitshile nu guzumba muamonesele mukunda nu jina dienji.’—HEB. 6:10.
LUNGIMBO 38 Yehowa Mbawuguhana Ngolo
NDAGA JIDI MU LONGO EDI *
1-3. Itshi yajiya gutuma aphangi ana gutshita mudimo wa tangua diagasue ha gusombegesa inemo yawo?
PHANGI Robert nu Mary Jo adi muzuela egi: “Tangua tuatagenesele ivo 21 mu mudimo wa gimisionere, mvuaji jietu jiagasue nguana jiakatele. Tuasuangulugile ha guya guakuatesa. Uvi, yatuhanele lamba gu mutshima ha gubemba mudimo wetu tuakhalele muzumba.”
2 William nu Terrie adi muzuela egi: “Tangua tuajiyile egi sante yetu ishigo gutuhana njila ya guvutuga mu mudimo wetu, tuadidile. Sendese mualeha, tuana gudifelela ha guya mu ifutshi iko ha gukalekela Yehowa mudimo, uvi henyaha tushigo nu luholo lua guya.”
3 Aleksey udi muzuela egi: “Tuakhalele mujiya egi mbalagaji mbajikanga Betele fundo tuakhalele mutshita mudimo. Uvi yatuhanele lamba diavula ha gukatuga gu Betele tangua ayikangele.”
4. Mihu itshi tuza muzuelela mu longo edi?
4 Tuajiya gutanga luko ndaga jiko jiataganele najio aphangi avula ana gutshita mudimo gu Betele nu aphangi ako ahetele inemo ihe-ihe. * Yakhalele lamba gudi aphangi awa a mala nu a akhetu ha gubemba midimo yakhalele ene muzumba muavula. Itshi yajiya guakuatesa ha gujidila nu usombegeshi owu? Luholo lutshi wajiya guakuatesa? Mvutu gu mihu eyi jiajiya gutukuatesa mukut’etu agasue gula tuatagana nu usombegeshi wa luholo elu mu lujingu luetu.
LUHOLO TUAJIYA GUJIDILA NU USOMBEGESHI
Mukunda natshi yajiya gukhala lamba gudi aphangi gula mudimo wa tangua diagasue wasuga? (Tala paragrafe 5) *
5. Mu maluholo atshi usombegeshi wa inemo wajiya gutusagesa?
5 Ngatshima tudi mukalagala mudimo mu terituare nga gu Betele, tuajiya gukudisa guzumba guetu gudi athu fundo diagasue tudi mujinga. Uvi gula yatoga egi tukatuge fundo diene, tuana guvua gubola ha gubemba mudimo wetu. Tuajiya guvua gikenene gia gudikhapha nu aphangi tuajidila gale nawo, gikenene giene giajiya gubalega guvula gula tuakatuga mukunda nu usageshi wa mbalagaji. (Mat. 10:23; 2 Kol. 11:28, 29) Luko, Yajiya gukhala lamba ha guya fundo diko handaga tudi naye gukamba gujidila nu makalegelo ahe-ahe. Tuajiya gudivua ngenyi ngatshima tuavutuga gumbo dietu. Robert nu Mary Jo adi muzuela egi: “Tuakhalelego luko mujiya muabonga makalegelo a gumbo dietu, gulongesa mu zuelelo dietu guakhalele gutuhana nji lamba. Tuakhalele gudivua gifua ngenji.” Aphangi ako ana gusombegesa inemo ana gutagana nu lamba dia falanga. Ajiya guleba diago muila. Itshi yajiya guakuatesa?
Gusala yagujinginyina gudi Yehowa nu gumuhagela mutshima gudi nu ndando yavula (Tala paragrafe 6-7) *
6. Luholo lutshi tuajiya gukhala hehi nu Yehowa?
6 Khala hehi nu Yehowa. (Yak. 4:8) Luholo lutshi wajiya gukhala n’enji hehi? Gula tudi gumushila mutshima handaga muene ‘wana guvua gukombelela.’ (Ngi. 65:2) Ngimbo 62:8 idi muzuela egi: “Mujiyisenu malamba enu agasue.” Yehowa wajiya gutshita ‘ndaga jiavula gubalega ima yagasue tuajiya gumutoga nga guheta.’ (Ef. 3:20) Yehowa ganago gutuhana phamba ima tuamutogi mu gisambu gietu. Wajiya gumanesela malamba etu mu luholo tuakhalelego mutangiza.
7. (a) Itshi yajiya gutukuatesa ha gukhala hehi nu Yehowa? (b) Ha gutadila Hebelu 6:10-12, mbuto itshi tuajiya guheta gula tualandula gukalegela Yehowa nu gujinginyina guagasue?
7 Ha gukhala hehi nu Yehowa, tudi naye gutanga Biblia lusugu nu lusugu nu gutangigiza milonga tudi mutanga. Phangi mumoshi wakhalele misionere udi muzuela egi: “Ubembigo gutshita gukombelela gua mu fami nu gudilondega mukunda nu gudubungisa gua mu hungu, gifua luholo wakhalele muyitshita thomo.” Luko, tshita yagasue ha gulongesa lukuma luabonga hamoshi nu hungu diaye dihe-dihe. Yehowa ganago gubuita mutshima wa athu adi mulandula gumukalegela nu gujinginyina guagasue, nga ajiyilego guyitshita gifua hathomo.—Tanga Hebelu 6:10-12.
8. Luholo lutshi mbimbi jidi mu 1 Yone 2:15-17 jiajiya gugukuatesa ha gukhala nu lujingu lualeba?
8 Khala nu lujingu lualeba. Ubembigo egi gikenene gia ha mavu awa a Satana gigukange njila ha gukalegela Yehowa. (Mat. 13:22) Ulandulago matangi abola a athu anago gukombelela Yehowa, ikhale mafuta nga enya fami yaye, gula aguwambela egi udi naye gukhala nu falanga jiavula ha gukhala nu lujingu luabonga. (Tanga 1 Yone 2:15-17.) Zegemena gudi Yehowa, handaga udi gutulaya egi mbawutukuatesa ha gukolesa gutshigina guetu, ha gudivua muabonga, nu mbawutuhana ima ya lujingu tudi nayo funu, ‘mu tangua diabonga’—Heb. 4:16; 13:5, 6.
9. Ha gutadila Ishima 22:3, 7, mukunda natshi idi yatagana gutuna khadilo dia gulaba guzangula mikudi, nu itshi yajiya gutukuatesa ha guzula desizio diabonga?
9 Tuna khadilo dia gulaba guzangula mikudi. (Tanga Ishima 22:3, 7.) Gukatuga fundo wakhalele guajiya gutoga makuta avula, nu yajiya gugutuma ha gusomba makuta. Ha gutuna gukhala nu mikudi yavula, usombigo makuta ha gusumba ima ushigo nayo diago funu. Gula tuatagana nu ndaga imoshi yakola, gifua ukhashi wa muthu tuana guzumba, yajiya gukhala lamba ha gujiya gula falanga guvula gutshi wajiya gusomba. Mu ndaga ya luholo elu, jiya egi ‘gukombelela nu gububila’ guajiya gugukuatesa ha guzula desizio diabonga. Ha guhana mvutu mu gukombelela guaye, Yehowa wajiya guguhana guhuima guajiya ‘gubamba mutshima waye nu matangi aye,’ guajiya gugukuatesa ha gutangigiza ndaga nu mutshima watuluga.—Phil. 4:6, 7; 1 Pet. 5:7.
10. Luholo lutshi tuajiya gukuata mafuta ahe-ahe?
10 Kuata ufuta nu athu adi nu makalegelo abonga. Wambela mafuta aye luholo udi gudivua nu ndaga udi mutagna najio, wambela diago awa ataganele gale nu ndaga gifua eyi udi mutagana nayo. Gutshita ngenyi guajiya gugukuatesa muavula. (Mulo. 4:9, 10) Mafuta aye wakuatele mu mudimo waye wa thomo mbaashigo gugutuna. Uvi, henyaha udi mu mudimo uhe-uhe, udi naye gukuata mafuta ahe-ahe. Ujimbilago egi, gula udi nu funu ya guheta futa, udi naye gu khala nu gisemo. Luholo lutshi wajiya gukuata mafuta ahe-ahe? Atele mene jia ndaga jiabonga wahetele mu mudimo wa Yehowa, ngenyi ene mbaamona gusuanguluga wahetele mu mudimo wa Yehowa. Nga gula aphangi avula mu hungu ashigo mukotelesa mukunda natshi udi muzumba mudimo wa tangua diagasue, ako mbaakamba gujiya ndaga jiavula nu mbaabua mafuta aye awaha. Uvi utelago athu mene phamba jiaye nga jia ndaga wakadigile mu mudimo wa Yehowa, nu waatelago ndaga jishigo muhana gikhesa wataganele najio.
11. Luholo lutshi wajiya gubamba gusuanguluga mu ulo waye?
11 Gula udi naye gubemba mudimo waye handaga mulumi’aye nga mukajiaye udi mukata, umuvuilago jikhabu. Nga ndo, gula udi naye gubemba inemo yaye mukunda nu ukhashi waye, udivilago jikhabu. Ujimbilago egi mudi “muthu mumoshi,” nu muadilayele gu phala ya Yehowa egi mbamudikuatesa mu gusuanguluga nga mu malamba. (Mat. 19:5, 6) Gula udi naye gubemba mudimo handaga mukaji’aye wamita, tshita yagasue hagula mun’aye ajiye egi udi nu ndando yavula gubalega mudimo wa tangua diagasue wakhalele mutshita. Wambela mun’aye egi wana gumumona gifua “khapho” dia Nzambi. (Ngi. 127:3-5) Luko, mutele maga a ndaga jiabonga watagenele najio mu mudimo wa Yehowa. Gutshita ngenyi mbagukuatesa mun’aye ha gukalegela Yehowa mudimo wa tangua diagasue mu monyo wenji gifua aye.
UKUATESHI WA ATHU AKO
12. (a) Luholo lutshi tuajiya gukuatesa athu adi mu mudimo wa tangua diagasue ha gulandula gutshita mudimo wawo? (b) Luholo lutshi tuajiya guakuatesa ha gujidila nu ndaga jihe-jihe?
12 Mahungu avula nu aphangi a mala nu a akhetu ana gutshita yagasue ha gukuatesa aphangi adi mu mudimo wa tangua diagasue ha gulandula gukalagala mudimo wawo. Ana guakuatesa tangua ana guahana gikhesa ha gulandula gukalagala mudimo wawo, tangua ana guakuatesa nu ndambo ya falanga nga ima iko, nu tangua ana gukuatesa enya fami yawo asalele guembo. (Gal. 6:2) Gula athu akhalele mu mudimo wa tangua diagasue avutuga mu hungu dienu, utangizago egi atshitshile mudimo wabola, nga egi atshitshile ndaga yabola. * Akuatese ha gujidila nu ndaga jihe-jihe. Ayambe nu gusuanguluga guagasue nu ashimane mukunda nu mudimo akalegele, ngatshima sante ishigo guahana njila ha guwutshita luko muavula. Kamba guajiya muabonga. Ujiyi wawo, nu formasio yawo nu ndaga ataganele najio jiajiya gugukuatesa muavula.
13. Ukuateshi utshi tuajiya guhana gudi aphangi abembi mudimo wa tangua diagasue?
13 Gula aphangi asugisa mudimo wawo wa tangua diagasue, nu avutuga mu hungu dienu, ajiya gukhala nu funu ya ukuateshi waye ha guheta inzo, ha gujiya transport adi naye guzula, ha guheta mudimo, nu gukamba ndaga jiko jia ndando. Ajiya gukhala nu funu ya gujiya ndaga jia lusugu nu lusugu, gifua fundo didi mazando (isalo) nu ndando jia ima adi naye gusumba nu luholo lua gusumba ima yene. Adi nu funu egi waakotelese uvi ashigo nu funu egi waavile phamba khenda. Ajiya gutagana nu lamba gula adi nu ukhashi nga gula muenya fami yawo udi mukata. Yajiya gukhala adi nu gikenene gia gufua gua muthu akhalele muzumba. * Ngatshima ayizuelelego, ajiya nji gukhala nu gikenne luholo ashigo luko gudimona nu mafuta awo akhalele nawo tangua akhalele mu mudimo. Matangua ajiya gubalega avula gutuama egi matangi awa adi guasagesa akatuge.
14. Luholo lutshi aphangi a mu hungu dimoshi akuatesele phangi mumoshi wa mukhetu ha gujidila nu ndaga jihe-jihe?
14 Ukuateshi waye nu gifezegeselo giaye giabonga giajiya guakuatesa ha gujidila. Phangi mumoshi wa mukhetu wakhalele thomo mutshita mudimo mu gifutshi giko, udi muzuela egi: “Tangua ngakhalele mu gifutshi giene, ngakhalele mulonguga Biblia nu athu masugu agasue. Uvi haha, yakhalele lamba ha guheta okazio wa gutangela muthu Biblia nga ha gutalesa muthu video mu mudimo wa gulongesa. Uvi aphangi a mu hungu diami dihe-dihe anguzudile ha guya nawo muvutugila athu nu ha gulonguga nu athu Biblia. Tangua ngamonele aphangi awa mulongesa athu Biblia nu gikhesa, ngasendesele gusuanguluga nu terituare yami. Ngalongugile gusendesa guta maga nu athu mu terituare yami ihe-ihe. Ndaga eji jiagasue jiangukuatesele ha gubamba gusuanguluga guami.”
LANDULA GUKALAGALA NDAGA JIA BONGA!
Kamba maluholo wajiya gukudisa mudimo waye wa gulogesa mu terituare ya gumbo dienu (Tala paragrafe 15-16) *
15. Luholo lutshi wajiya gutshita ndaga jiawaha tangua mudimo wa tangua diagasue wasuga?
15 Wajiya gutshita ndaga jiawaha tangua mudimo wa tangua diagasue wasuga. Utangizago egi usombegeshi owu udi mumonesa egi wakhalelego mutshita mudimo waye muabonga, nga egi aye ushigo nu funu. Tangiza ukuateshi wa Yehowa mu lujingu luaye, nu landula gulongesa mbimbi yenji. Landula gifezegeselo gia Aklisto a mu siekle ya thomo. Fundo diagasue diakhalele ene, akhalele ‘muya nu gulongesa lukuma luabonga mu gifutshi giagasue.’ (Makal. 8:1, 4) Ngolo udi mukalagala ha gulongesa lukuma luabonga jiajiya gubuta mbuto yabonga. Ha gufezegesa, avundji a njila amoshi akayewe mu gifutshi gimoshi, ayile mu gifutshi gia hehi giakhalele nu funu yavula ya alongeshi a lukuma luabonga mu zuelelo diawo. Gungima dia mbeji, athu avula amonegele nu akangudile ga hungu gahe-gahe mu zuelelo diene.
16. Luholo lutshi wajiya gukhala nu gusuanguluga tangua mudimo wa tangua diagasue wasuga?
16 ‘Gusuanguluga gudi muza gudi Yehowa mbagumihua jingolo.’ (Neh. 8:10) Tudi naye gusuanguluga thomo mukunda nu Yehowa uvi ishigo mukunda nu mudimo wetu, ngatshima tuawuzumba. Hene, tulandule guwenda hamoshi nu Yehowa, tukambe ndunge jienji, utuameji wenji nu ukuateshi wenji. Ujimbilago egi wana guzumba mudimo wa tangua diagasue handaga wana gukhala nu funu ya gukuatesa athu. Henyaha mudimo wa tangua diagasue wasuga, haga mutshima gu mudimo wa Yehowa udi mutshita luenyelu, Yehowa mbawugukuatesa ha guwuzumba nji.—Mulo. 7:10.
17. Itshi tushigo naye gujimbila mu ndaga yatadila inemo yetu mangino?
17 Tudi naye gujiya egi mudimo wa Yehowa ushigo nu gisugishilo, uvi inemo tuana guheta mu mudimo wene idi ya tangua diazonda. Mu mavu ahe-ahe, mukut’etu agasue mbatukhala musombegesa midimo. Aleksey, yonu tuazuelela guthunda, udi muzuela egi usombegeshi gatanele nawo mu mudimo wenji wamukuatesele ha gudilonda mukunda nu usombegeshi wa masugu adi muza. Udi muzuela luko egi: “Ngana gami gujiya egi Yehowa nu mavu ahe-ahe akhala a giamatshidia, uvi ana gumonega gifua akhala gualeha. Henyaha gudi mumona egi Yehowa udi hehi nu ame, nu gifua mavu ahe-ahe mbasedesa hamene mungueze.” (Makal. 2:25) Tulandule gukhala hehi nu Yehowa nga mudimo tudi gumukalegela udi wa luholo lutshi. Mbagashigo gutubemba, uvi mbawutukuatesa ha gusuanguluga mu ndaga yagasue tuajiya gukalagala mu mudimo wenji—mudimo wene nga udi gikuatshi.—Yesh. 41:13.
LUNGIMBO 90 Tudihanenu Gikhesa
^ par. 5 Matangua ako, aphangi a mala nu akhetu adi mu mudimo wa tangua diagasue ajiya gubemba inemo yawo, nga guheta inemo ihe-ihe. Mu longo edi, tudi muzuelela malamba ana gutagana nawo nu luholo ajiya gujidila nu usombegeshi wene. Gungima, tuza mutala luholo athu ako ajiya guahana gikhesa (ngolo) nu guakuatesa, nu tuza mumona luko luholo Biblia yajiya gutukuatesa mukut’etu agasue gula tuatagana nu usombegeshi mu mudimo wetu.
^ par. 4 Luholo lumoshi nji, hana gukula aphangi avula, ana gubemba inemo yawo gudi aphangi a mavuala. Tala longo edi “Frères d’expérience, Jéhovah chérit votre fidélité,” mu Inzo Yaleha ya Mutaledi ya septembre 2018, nu longo edi “Garde ta paix intérieure malgré les changements,” mu Inzo Yaleha ya Mutaledi ya octobre 2018.
^ par. 12 Akulu a hungu diakhalele muene adi naye gusonega mukanda muphushi gudi akulu a hungu didi muene muya. Ashigo naye gumukatula inemo yenji gifua mudimo wa muvundji wa njila, gukhala mukulu nga mukuateshi wa mudimo.
^ par. 13 Tala longo “Quand on perd quelqu’un qu’on aime,” mu Réveillez-vous ! No. 3 ya 2018.
^ par. 57 UKOTELESHI WA IFUANESA: Phangi mumoshi nu makaji’enji adi mudilaya nu hungu lusugu adi ene mukatuga mu mudimo wawo wa gimisionere mu gifutshi giangane.
^ par. 59 UKOTELESHI WA IFUANESA: Tangua avutuga gu gifutshi giawo, aphangi ene adi mukombelela muavula ha gutoga ukuateshi gudi Yehowa hagula abinge malamba adi mutagana nawo.
^ par. 61 UKOTELESHI WA IFUANESA: Mu ukuateshi wa Yehowa, aphangi ene avutugila mudimo wa tangua diagasue. Adi mukalegela zuelelo alongugile mu yifutshi akhalele ba misionere ha gulongesa lukuma luabonga gudi athu a mu ifuthi yene adi mu terituare ya hungu diawo.
