STUDY ARTICLE 34
Hao for Change Fitim Wanfala Niu Assignment
“God hem raeteous so hard for hem forgetim waka wea iufala duim and love wea iufala showimaot for nem bilong hem.”—HEB. 6:10.
SONG 38 Hem Bae Mekem Iu Strong
WANEM IUMI BAE STORYIM *
1-3. Wanem nao samfala reason why samfala lo full-taem service mas change assignment?
“BIHAEN 21 year wea mifala enjoyim missionary waka, dadi and mami blo mitufala evriwan, olo and sik. Mitufala hapi for lukaftarem olketa, nomata olsem mitufala sorre tumas for lusim ples wea mifala barava lovem.” Hem nao wanem Robert and Mary Jo talem.
2 William and Terrie sei: “Taem mifala herem hao mifala no fit for go bak lo assignment bikos lo health problem, mitufala krae bikos goal blo mitufala for serve lo nara kantri hem nomoa nao.”
3 Aleksey sei: “Nomata mifala savve olketa wea persecutim mifala laek for klosim branch office wea mifala waka, taem datwan happen and mifala mas lusim Bethel, mi seke tumas.”
4. Olketa wanem kwestin nao bae iumi storyim lo disfala study?
4 Witim thrifala experience hia, tingim tu experience blo olketa staka thousand Bethelite, and olketa narawan insaed full-taem service wea kasem olketa niu assignment. * Maet olketa faithful brata and sista hia faendem hem hard for lusim assignment wea olketa lovem tumas. Wanem nao helpem olketa for deal witim datfala change? Hao nao iu savve helpem olketa? Ansa blo olketa kwestin hia savve helpem iumi for savve hao for deal witim laef taem olketa change kamap.
HAO FOR DEAL WITIM WANFALA CHANGE
Why nao wei for lusim assignment hem wanfala challenge for olketa lo full-taem service? (Paragraph 5 storyim diswan) *
5. Taem assignment hem change, hao nao datwan savve affectim iumi?
5 Nomata iumi waka lo field or Bethel, iumi savve lovem tumas pipol, and maet ples wea iumi stap. Sapos iumi mas lusim assignment blo iumi, bae iumi sorre tumas. Iumi savve missim olketa brata and sista and wari abaotem olketa, especially sapos iumi lusim ples bikos lo persecutim. (Matt. 10:23; 2 Cor. 11:28, 29) And tu, taem iumi kasem wanfala niu assignment or iumi kasem assignment for go hom, staka taem hem no isi for change fitim culture. Robert and Mary Jo sei: “Mitufala no getius nao lo culture blo mifala, and nomata for preach lo languis blo mifala tu. Mitufala feel olsem hem no hom blo mitufala nao.” Samfala wea mas change assignment, maet seke nomoa olketa feisim problem saed lo selen. Diswan maet mekem olketa no savve wanem for duim, olketa maet wari, and wikdaon. Wanem nao savve help?
Hem barava important for iumi stap klos lo Jehovah and trustim hem (Paragraph 6-7 storyim diswan) *
6. Hao nao iumi savve stap klosap lo Jehovah?
6 Stap klosap lo Jehovah. (Jas. 4:8) Hao nao iumi savve duim datwan? Taem iumi trustim dat hem savve herem olketa prea blo iumi. (Sams 65:2) Lo Sams 62:8 hem sei: “Talemaot olketa trabol blong yufala long hem.” Jehovah savve duim olketa samting wea “barava winim nao wanem iumi askem or tingim.” (Eph. 3:20) Hem no just givim nomoa samting wea iumi prea for hem. Maet hem bae duim samting winim wanem iumi expectim for stretem olketa problem blo iumi.
7. (a) Wanem nao bae helpem iumi for gohed stap klosap lo Jehovah? (b) Olsem Hebrew 6:10-12 storyim, wanem nao savve kamaot from wei for gohed faithful for worshipim Jehovah?
7 Wei for readim Bible evriday and ting raonem bae helpem man for gohed stap klosap lo Jehovah. Wanfala brata wea missionary bifor sei: “Gohed for garem gudfala schedule for famili worship and prepare for olketa meeting, olsem iu duim lo assignment bifor.” And tu, gohed duim evri samting wea iu fit for duim lo preaching waka lo niu kongregeson blo iu. Jehovah bae no forgetim olketa wea gohed faithful for worshipim hem, nomata olketa no fit nao for duim wanem olketa savve duim bifor.—Readim Hebrew 6:10-12.
8. Hao nao olketa toktok lo 1 John 2:15-17 helpem iumi for mas garem simpol laef?
8 Garem simpol laef. No letem olketa wari blo disfala world blo Satan, for stopem iumi for duim olketa spiritual samting. (Matt. 13:22) No letem pipol lo world or olketa fren or relative for mekem iumi trae for mas aftarem selen lo disfala world blo Satan. (Readim 1 John 2:15-17.) Trustim Jehovah, bikos hem promis for helpem iumi lo spiritual wei, saed lo feeling, and olketa material samting lo “taem iumi needim.”—Heb. 4:16; 13:5, 6.
9. Olsem Provebs 22:3, 7 storyim, why nao hem important for mas trae for no garem kaon, and wanem nao savve helpem iumi mekem olketa wise disison?
9 Trae for no garem kaon. (Readim Provebs 22:3, 7.) Taem man hem muv, datwan savve expensive tumas, and hem isi for man garem kaon. So for no garem bigfala kaon, careful for no peim samting wea iumi no needim. Taem iumi kasem olketa hevi lo laef, olsem example, iumi lukaftarem samwan lo famili wea sik, maet hem no isi for disaedem haomas selen nao bae iumi kaonem. Lo olketa kaen situation olsem, tingim hao wei for ‘prea and barava askem’ help from Jehovah savve helpem iu for disaed lo wisefala wei. Jehovah savve ansarem prea blo iu and givim iu peace wea bae “gaedem heart and tingting” blo iu for helpem iu no wari and mekem iu disaedem best samting.—Phil. 4:6, 7; 1 Pet. 5:7.
10. Hao nao iumi savve garem olketa niufala fren?
10 Gohed fren gud witim olketa narawan. Story witim olketa klos fren blo iu abaotem hao iu feel, and hard samting wea iu deal witim, especially olketa wea experiencem semkaen samting. Wei for duim olsem savve helpem iu for hapi moa. (Eklesiastes 4:9, 10) Olketa fren lo old assignment blo iu, olketa still fren blo iu yet. Lo niu assignment blo iu distaem, iu need for faendem olketa niu fren. Tingim diswan, for garem wanfala fren, iu mas mek fren tu. Hao nao iu savve garem olketa niu fren? Storyim olketa naesfala experience wea iu kasem lo waka blo Jehovah, and olketa narawan bae lukim hapi wea iu garem from datwan. Nomata maet samfala lo kongregeson no minim wei wea iu lovem full-taem service, olketa narawan bae lukim example blo iu and laek for kamap gudfala fren blo iu. Bat mas careful for no story tumas abaotem iuseleva or olketa samting wea iu duim lo waka blo Jehovah, and no garem olketa negative tingting.
11. Hao nao iu savve mekem marit blo iu gohed hapi?
11 Sapos iu mas lusim assignment bikos lo health problem blo marit partner, no blamem hem for datwan. And, sapos iuseleva nao garem health problem, no feel guilty and tingse iu nao mekem iutufala for lusim assignment. Tingim, iutufala “wanfala body nomoa,” and iutufala promis front lo Jehovah for kea for each other nomata wanem nao happen. (Matt. 19:5, 6) Sapos iu mas lusim assignment bikos iutufala bae garem baby wea iutufala no expectim, mas mek sure pikinini blo iu savve dat hem important winim assignment wea iutufala garem bifor. Talem pikinini dat iu ting lo hem olsem wanfala “present wea kam from Jehovah.” (Sams 127:3-5) And tu, storyim lo hem olketa naesfala experience wea iu garem taem iu lo assignment blo iu. Taem iu duim olsem, datwan bae muvim pikinini blo iu for laek duim full-taem service for Jehovah olsem iu bin duim bifor.
HAO OLKETA NARAWAN SAVVE HELP
12. (a) Hao nao iumi savve helpem olketa wea insaed full-taem service for gohed lo assignment blo olketa? (b) Hao nao iumi savve helpem olketa for change for fitim assignment blo olketa?
12 Iumi tinghae lo samting wea staka kongregeson and brata and sista duim for helpem olketa lo full-taem service for gohed lo assignment blo olketa. Olketa savve encouragem olketa for no lusim assignment blo olketa, givim lelebet selen or nara samting wea olketa needim, or help for lukaftarem olketa famili member wea stap lo hom. (Gal. 6:2) Sapos olketa lo full-taem service change assignment and kam stay lo kongregeson blo iu, no tingse olketa change assignment bikos olketa no duim gud waka blo olketa or olketa duim eni rong samting. * Bat, iumi mas helpem olketa for change fitim assignment blo olketa. Iumi welkamim olketa and thankiu for waka wea olketa bin duim, nomata olketa no fit for duim staka samting distaem bikos lo health blo olketa. Trae for savve gud lo olketa. Lane from savve, experience, and training wea olketa kasem.
13. Wanem nao iumi savve duim for helpem olketa wea change assignment?
13 First samting, olketa wea change assignment maet needim helpem saed lo ples for stap, transport, faendem waka, and olketa nara samting. Olketa maet need for savve tu lo olketa latest information abaotem olketa samting wea olketa mas feisim evriday, olsem tax and olketa bill for peim. Bat, samting wea barava important nao, olketa needim iu for minim situation blo olketa. Maet olketa stragol for deal witim health problem blo olketa seleva or narawan lo famili. Olketa maet sorre bikos olketa lusim samwan lo dae. * And nomata olketa no talem, maet olketa feel sorre bikos olketa missim olketa fren blo olketa lo old assignment. Hem savve tek taem for man deal witim olketa kaen feeling olsem wea maet mekem hem konfius.
14. Hao nao olketa pablisa helpem wanfala sista for change fitim assignment blo hem?
14 Sapot and example blo iu savve helpem olketa for change fitim niu situation blo olketa. Wanfala sista wea serve lo nara kantri for staka year sei: “Lo assignment blo mi bifor, mi conductim Bible study evriday. Bat lo hia, hem no isi bikos mi no savve garem chance for openem Bible or showim video lo ministry. Bat olketa pablisa, invaetem mi for go witim olketa lo return visit and Bible study. Taem mi lukim olketa faithful brata and sista hia wea no fraet, olketa gohed conductim Bible study wea muv ahed, datwan mekem mi feel gud. Mi lane for startim story lo niu territory. Evri samting hia helpem mi for kasem bak hapi blo mi.
GOHED DUIM BEST BLO IU!
Trae for duim moa samting lo ministry lo territory wea iu stap (Paragraf 15-16 storyim diswan) *
15. Hao nao iu savve duim gud niu assignment blo iu?
15 Iu savve duim gud niu assignment blo iu. No tingse change wea kamap hem bikos iu no duim gud old assignment blo iu, or iu no fit. Tingim staka wei wea Jehovah gohed helpem iu and iu mas no givap for preach. Followim example blo olketa faithful Christian lo first century. Nomata wea nao olketa stap, olketa gohed for “talemaot gud nius long pipol long evri ples wea olketa kasem.” (Acts 8:1, 4) Taem iu gohed waka hard for preach, iu bae kasem staka gud samting. Olsem example, samfala pioneer wea gavman raosem from wanfala kantri, go lo nara kantri wea stap klosap, wea garem big need for preach lo pipol wea story lo sem languis blo olketa. Insaed tu-thri month nomoa, staka languis grup nao kamap and olketa gohed for grow.
16. Hao nao iu savve gohed hapi lo niu assignment blo iu?
16 Hapi wea kam from Jehovah nao mekem iu strong. (Nehemaea 8:10) Nomata sapos iumi lovem tumas assignment blo iumi, samting wea shud mekem iumi hapi hem bikos iumi lovem Jehovah, no bikos lo datfala assignment. So gohed depend lo Jehovah for leadim iumi, givim iumi wisdom, and sapotim iumi. Reason why iu lovem old assignment blo iu hem bikos iu laek duim best blo iu for helpem pipol lo there. So duim best lo assignment blo iu and bae iu lukim hao Jehovah bae helpem iu for lovem disfala assignment tu.—Eklesiastes 7:10.
17. Hao nao iumi shud ting lo assignment wea iumi duim distaem?
17 Iumi mas remember, wei for servem Jehovah hem samting wea bae gohed for olowe, bat assignment iumi duim distaem hem temporary nomoa. Lo niu world, iumi evriwan maet garem niufala assignment. Aleksey, wea iumi storyim lo start blo study, hem luksavve wanem hem experiencem distaem hem redyim hem for future. Hem sei: “Mi evritaem savve Jehovah and niu world hem real samting bat mi tingse hem farawe yet. Distaem, mi barava klos lo Jehovah and mi feel olsem niu world hem next samting wea bae kamap.” (Acts 2:25) Nomata wanem nao assignment blo iumi, iumi laek for gohed wakabaot witim Jehovah. Hem bae no enitaem lusim iumi, bat hem bae helpem iumi for gohed hapi nomata wanem nao iumi fit for duim and wea nao iumi maet stap.—Aesaea 41:13.
SONG 90 Encouragem Narawan
^ par. 5 Samfala taem, brata and sista wea duim full-taem service maet lusim assignment blo olketa or olketa maet kasem wanfala niu assignment. Disfala study bae storyim olketa challenge wea olketa feisim and olketa samting wea savve helpem olketa for change for fitim situation blo olketa. And tu, bae iumi storyim wanem olketa narawan savve duim for encouragem and sapotim olketa, and hao olketa Bible principle savve helpem iumi evriwan for deal witim olketa change wea savve kamap.
^ par. 4 Olsem tu, taem samfala brata wea garem responsibility kasem wanfala age, olketa mas givim datfala responsibility for brata wea young winim olketa. Lukim article, “Iufala Olketa Olo—Jehovah Tinghae Long Faithful Fasin Bilong Iufala,” lo Wastaoa blo September 2018, and “Garem Peace Long Mind and Heart Nomata Eni Change Kamap,” lo Wastaoa blo October 2018.
^ par. 12 Olketa elder lo kongregeson wea olketa bin serve lo hem shud raetem kwiktaem wanfala introduction leta mekem datwan no delayim tufala for gohed serve olsem pioneer, elder, or ministerial servant.
^ par. 13 Lukim article “Comfort for Olketa wea Lusim Samwan,” lo 2018 Wekap! No. 3.
^ par. 57 PIKSA: Wanfala couple wea lusim missionary waka lo wanfala kantri, sorre tumas taem tufala baebae lo kongregeson blo olketa.
^ par. 59 PIKSA: Datfala sem couple stay lo hom blo tufala, and evritaem prea lo Jehovah for helpem tufala for deal witim olketa challenge.
^ par. 61 PIKSA: Jehovah helpem datfala couple and tufala duim moa full-taem service. Lo niu territory, tufala iusim languis wea tufala lanem taem tufala missionary for sharem gud nius lo pipol from kantri wea tufala bin stap lo hem.
