1-3. ¿Imajtintaj wakin hermanos Jehovapaj llankʼayninkuta saqesqanku?

HERMANO Robert, warmin Mary Jo ima, 21 watastaña misioneros jina llankʼasharqanku. Chayllapitaj iskayninkoj tatasninku onqoykorqanku. Paykuna ninku: “Tatasniykuta kusisqa cuidasharqayku. Jinapis misioneros jina llankʼayniykuta saqesqaykumanta, sonqoyku nanawarqayku. Chay lugartaqa llajtaykuta jinaña qhawarqayku”, nispa.

² Hermano Williamwan señoranwanqa ninku: “Sirvisharqayku chayman onqoykusqaykurayku niña kutinaykuta yachaspa, mayta waqarikorqayku. Waj suyupi sirviyta maytapuni munaj kayku, jinapis yacharqayku niña atinaykuta”, nispa.

³ Aleksey nin: “Sirvisharqani chay sucursalpi tukuyniyku yacharqayku, chay sucursalta gobiernos wisqʼayta munasqankuta. Chayta yachaspapis sucursalniykuta wisqʼajtinku, may llakisqas riporqayku”, nispa.

4. ¿Ima tapuykunamantaj kay yachaqanapi kutichisun?

⁴ Mana chay hermanospa kausaynillankuchu cambiarqa. Ashkha betelitas, misioneros, precursores especialespis, waj llankʼayta japʼerqanku. * Chay hermanosqa Jehovapaj astawan llankʼaspa, mayta kusikoj kanku. Chayrayku chayta saqeyqa mana facilchu karqa. ¿Imataj paykunata yanapanman Diosta kusisqallapuni sirvinankupaj? ¿Imatataj ruwasunman paykunata yanapanapaj? Kay yachaqanapi chay tapuykunaman kutichisun. Chaytaj noqanchejtapis kausayninchej cambiajtin mayta yanapawasun.

5. ¿Imaspitaj rikukusunman waj lugarpiñataj Jehová Diosta sirvinanchej kajtin?

⁵ Betelpi sirvispapis chayri Jehová Diospaj waj jinasmanta llankʼaspapis, chay lugarman, runasman ima yachaykukunchej. Chayrayku ripunanchej kajtenqa, mayta sonqonchej nanawanchej. Chaypi kaj amigosninchejtapis faltachanchej, paykunamantataj llakikunchej, astawanraj chay lugarpi qhatiykachay kasqanrayku riporqanchej chayqa (Mat. 10:23; 2 Cor. 11:28, 29). Chantapis llajtanchejpi, chayri waj lugarpiñataj Jehová Diosta sirvinanchej kajtenqa, ichapis chay lugarman mana yachaykukuyta atillanchejchu. Robertwan señoranwan ninku: “Llajtaykuman kutipuspaqa, qallariypi mana yachaykukuyta atillarqaykuchu. Runasman parlayniykupi predicaypis, uj jinaña karqa. Niñapis chay lugarmantachu kaykuman jina karqayku”, nispa. Chantapis ichá llakiypi rikhurisqanchejrayku qolqeta necesitasunman. Manataj yachasunmanchu imatachus ruwayta, llakikusunmantaj. Ajinapi rikukuspa imatachus ruwananchejta qhawarina.

6. ¿Imaynatá Jehová Diospa qayllallanpipuni kasunman?

⁶ Jehová Diospa qayllallanpipuni kana (Sant. 4:8). Jehovaj qayllallanpipuni kanapajqa, paymanta mañakuna (Sal. 65:2). ‘Sonqonchejpi kaj chhikata payman’ willakuna (Sal. 62:8). Jehová “Diosqa mañakusqanchejmantapis chayri yuyasqanchejmantapis, aswan ashkhataraj ruwayta atin” (Efe. 3:20). Payqa mana mañakullasqanchejtachu qowanchej. Manaqa problemasninchejta allinchanapaj, yuyasqanchejmantapis astawanraj ruwayta atin.

7. 1) ¿Imatá ruwasunman Jehová Diospa qayllallanpipuni kanapaj? 2) Hebreos 6:10-12 nisqanman jina, ¿imaraykutaj Jehová Diosta sirvinallanchejpuni tiyan?

⁷ Jehová Diospa qayllallanpipuni kanapajqa, Bibliata sapa día leena, leesqanchejpitaj tʼukurina. Uj hermano pichus ñaupajta misionero karqa nin: “Familiapi Diosta yupaychayta, sapa semana reunionespaj wakichikuytapis ama saqenachu”, nispa. Chantapis mosoj congregacionninchejmanta hermanoswan tukuy atisqanchejta predicaj rina. Jehová Diosqa, payta sirvisqanchejta mana qonqanchu, niña ñaupajta jinachu paypaj llankʼajtinchejpis (Hebreos 6:10-12 leey).

8. Kay 1 Juan 2:15-17 nisqan, ¿imaynatá yanapawanchej kapuwasqallanchejwan kausakunapaj?

⁸ Kapuwasqallanchejwan kusisqa kausakuna.  Ama saqenachu Satanaspa mundonmanta llakiykuna, Jehová Diospaj ruwanasninchejpi pantachinawanchejta (Mat. 13:22). Ichá amigosninchej, familiasninchej, chayri wajkuna, allinninchejta munaspa qolqeta maskʼanata niwasunman. Ama chay niwasqanchejta kasunachu (1 Juan 2:15-17 leey). Jehová Diospi atienekuna, payqa “necesitajtinchej” yanapanawanchejta nin. Jehovaqa yanapawasun sinchʼi creeyniyojllapuni, sonqo tiyasqataj kanapaj. Chantapis imatachus necesitasqanchejta qowasun (Heb. 4:16; 13:5, 6).

9. 1) Proverbios 22:3, 7 nisqanman jina, ¿imaraykutaj mana qhasita manuchakunanchejchu tiyan? 2) ¿Imataj yanapawasun imatapis sumaj yuyaywan ruwanapaj?

⁹ Ama qhasita manuchakunachu (Proverbios 22:3, 7 leey). Waj ladoman ripunaqa ashkha qolqepaj kanman, manuchakusunmantaj. Chayrayku ama qhasita imatapis rantirpanallachu. Llakiypi kashaspaqa, mana yachasunmanchu mashkha qolqetachus manuchakunanchejta. Uj llakeyqa kanman, familianchejmanta pillapis onqoykojtin. Chay jinapi rikukuspaqa, Jehová Diosmanta mañakuna, rogakunataj. Payqa imatapis sumaj yuyaywan ruwanapaj yanapawasun, sonqo tiyaykuytataj qowasun. Chaytaj sonqonchejta, yuyayninchejtawan waqaychanqa, imatapis allinta ruwanapaj (Fili. 4:6, 7; 1 Ped. 5:7).

10. ¿Imataj yanapawasun amigosta ruwakunapaj?

¹⁰ Sumaj amigosta maskʼana. Amigosninchejman imaynachus kashasqanchejta, imachus llakichiwasqanchejta ima willarina. Astawanqa pikunachus noqanchej jina llakiypi rikukorqanku, chaykunawan parlarina. Chayta ruwayqa mana anchata llakikunapaj yanapawasun (Ecl. 4:9, 10). Maypichus sirverqanchej chaypi amigosniyoj kaspapis, mosoj amigosta ruwakunallanchejtaj tiyan. Chaypajqa noqanchej paykunaman qayllaykunanchej tiyan. Paykunaman willarisunman ima bendicionestachus Jehová Dios qowasqanchejta. Ajinamanta Jehovata sirvispa kusisqa kasqanchejta reparanankupaj. Wakin hermanosqa, ichapis mana entiendenqankuchu imaraykuchus Jehovapaj llankʼayta sumajpaj qhawasqanchejta. Jinapis wakenqa ichapis noqanchej jinallataj Jehovapaj astawan llankʼayta munanqanku, amigosninchejtaj kanqanku. Chaywanpis ama noqallanchejmanta chayri llakiynillanchejmanta anchata parlanachu, nillataj Jehová Diospaj imastachus ruwasqanchejmantapis.

11. ¿Imatataj casarasqas ruwankuman kusisqallapuni kanankupaj?

¹¹ Wakin casarasqa kajkunaqa, ujninku onqoykusqankurayku Jehovapaj astawan llankʼayta saqenku. Ajinapi rikukuspaqa, ama qosaykita chayri warmiykita juchachaychu, nillataj qanpis juchachakuychu. Ama yuyaychu juchaykirayku Jehovapaj llankʼayta saqesqaykichejta. Astawanpis yuyarikuychej ‘iskayniykichej  ujlla kasqaykichejta’, jinallataj Jehovaman “ima kajtinpis khuska kasqayku” nisqaykichejta (Mat. 19:5, 6). Wakenqa mana suyaspalla wawayoj kasqankurayku Jehovapaj astawan llankʼayta saqerqanku. Ajinapi rikukuspaqa, wawaykiman niy chay llankʼaymanta nisqa, payta astawan munakusqaykita. Wawaykiman sapa kuti niy, Jehová Diosmanta uj herencia kasqanta (Sal. 127:3-5). Chantapis willariy, Diospaj llankʼaspa ima bendicionestachus japʼisqaykita. Ajinamanta paypis ichá qan jinallataj ruwayta munanqa.

12. 1) ¿Imaynatataj Jehovapaj astawan llankʼajkunata yanapasunman? 2) Jehovapaj astawan llankʼaj hermanota congregacionninchejman kachamojtinku, ¿imaynatá payta yanapasunman?

¹² Ashkha congregaciones, jinallataj ashkha hermanospis, Jehovapaj astawan llankʼaj hermanosta tukuy atisqankuta yanapanku. Wakenqa chay hermanosta Jehovapaj llankʼanallankupajpuni kallpacharinku. Wakintaj paykunaman qolqeta qorinku, imatachus necesitasqankuta jaywarinku, chayri familiasninkuta qhawaspa yanapanku. Chay ruwasqankutaj may sumajpuni (Gál. 6:2). Jehovapaj astawan llankʼaj hermanota congregacionninchejman kachamojtinkoqa, ama yuyanachu llankʼayninta mana allinta ruwasqanrayku, chayri pantasqanrayku kachamusqankuta. * Astawanpis Jehovapaj llankʼanallanpajpuni yanaparina, allinta jamusqantataj nina. Niña ñaupajta jina ruwayta atejtinpis, Jehovapaj llankʼasqanta sumajpaj qhawasqanchejta nina. Chay hermanota astawan rejsinapaj kallpachakuna. Paypa yachayninmanta, imastachus ruwayta yachasqanmanta ima yachakuna.

13. Congregacionninchejman jampoj hermanota, ¿imaynasmantá yanaparisunman?

 ¹³ Congregacionninchejman jampoj hermanoqa, ichapis uj wasita chayri trabajota maskʼaysinanchejta necesitanqa. Ichapis necesitallanqataj imaynatachus maymanpis rinanta yachachinata, chayri waj imaswan yanaparinata. Chantapis ichá willarinanchej kanqa, imaynatachus impuestosta paganata, waj tramitesta ruwanata ima. Jinapis astawanqa imaynachus kashasqanta entiendenanchejta necesitanqa. Ichapis pay chayri mayqen familianpis onqosqa kashan. Chayrí familianmanta pillapis wañupusqanrayku llakisqa kashan. * Chantapis ichá ni piman willarejtinpis, ñaupa amigosninta faltachashan. Ajinapi rikukoj hermanoqa, llakisqataj kusisqataj kanman. Sonqon tiyaykunanpajqa tiempo pasanan tiyan.

14. ¿Imaynatá hermanos congregacionninkuman jampoj hermanata yanaparqanku?

¹⁴ ¿Imaynatá congregacionninchejman jampoj hermanota yachaykukunanpaj yanaparisunman? Paywan predicaj llojsispa, ruwasqanchejwan yanaparispa ima. Uj hermana ashkha watasta waj suyupi Jehovapaj llankʼarqa. Pay nin: “Ñaupaj congregacionniypeqa, sapa día runasman Bibliamanta yachachej kani. Mosoj congregacionniypitaj, mana atillarqanichu uj textollatapis runaspaj leepuyta, ni videostapis rikuchiyta atejchu kani. Chaywanpis hermanoswan hermanaswanqa mayta yanapawarqanku. Paykunaqa revisitasninkuman, estudiosninkuman pusariwaj kanku. Chantapis kusiywan llankʼaj kanku, estudiosninkupis ñauparisharqanku. Chayta rikoyqa mayta kallpachawarqa. Paykunamanta yachakorqani imaynatachus kay lugarmanta runasman predicayta. Chayta ruwaspa watejmanta kusisqa karqani”, nispa.

15. Jehová Dios waj llankʼayta qowajtinchej, ¿imatá ruwasunman kusisqallapuni kanapaj?

¹⁵ Jehová Dios mosoj llankʼayta qowajtinchej, kusisqa juntʼayta atisunman. Ama yuyanachu ñaupaj llankʼayninchejta mana allinta ruwasqanchejrayku  cambiawasqanchejta, nillataj yuyanachu niña valesqanchejta. Astawanpis imaynatachus Jehová yanapashawasqanchejta reparana, predicanallapunitaj. Ñaupa tiempomanta cristianos jina ruwana. Paykunaqa chʼeqerasqa kaspa, “maymanchus risqankupi Diospa palabranmanta sumaj willaykunata” willallarqankupuni (Hech. 8:1, 4). Tukuy atisqanchejta predicajtinchejqa, ashkha runasta yanapasunman. Imachus uj suyupi kasqanmanta parlarina. Chay suyumanta ashkha precursoresta wijchʼumorqanku. Paykunataj waj suyuman riporqanku, chaypitaj parlayninkupi ashkha yanapa necesitakorqa. Chayrayku parlayninkupi predicallarqankupuni. Pisi killasninman mosoj grupos rikhurerqa, chay grupostaj rato wiñarqa.

16. Jehovamanta waj llankʼayta japʼejtinchej, ¿imataj yanapawasun kusisqa kanapaj?

¹⁶ “Tata Diospa kusikuynenqa kallpachawanchej” (Neh. 8:10). Jehovapaj ruwashanchej chay llankʼay mayta gustawajtinchejpis, kusisqa kananchejqa mana chaymantachu kashan. Manachayqa Jehová Dioswan allinpi kasqanchejmanta kashan. Chayrayku paypa qayllallanpipuni kana, paypitaj atienekuna. Payqa yachayta, yuyaytawan qowasun, yanapawasuntaj. Runasta yanapayta munasqanchejrayku, ñaupaj llankʼayninchejta munakorqanchej. Mosoj llankʼayninchejtapis tukuy sonqo ruwasun chayqa, Jehová Dios yanapawasunchej chay llankʼayta munakunapaj (Ecl. 7:10).

17. Jehovapaj ima llankʼayta ruwaspapis, ¿imatataj mana qonqananchejchu tiyan?

¹⁷ Jehová Diostaqa wiñaypaj sirvisunchej. Paymanta ima llankʼaytapis japʼisqanchejrí uj tiempollapaj. Paraisopeqa ichapis tukuyninchej Jehovamanta waj llankʼayta japʼisunchej. Alekseymanta parlarqanchejña. Payqa nin: “Diospa llajtanpi waj llankʼaykunata qowasqankoqa, aswan qhepapaj wakichishawan. Jehová Dios kasqanta, paraisopis jamunanta yacharqani. Jinapis wakin kutis tumpata iskayrayajpuni kani. Kunantajrí Jehovaman astawan qayllaykuni, yachanitaj paraíso qayllitapiña kasqanta”, nispa (Hech. 2:25). Jehovapaj ima llankʼayta ruwaspapis, paypaj qayllallanpipuni kana. Payqa ni jaykʼaj saqerpariwasunchu. Astawanpis maypi llankʼajtinchejpis, payta kusisqa sirvinallapajpuni yanapawasun (Isa. 41:13).