1-3. ¿Jasche rajawaxik kkiya kan ri kasignación e jujun qachalal re tiempo completo?

ARE chiʼ Robert xuqujeʼ Mary Jo e misioneros pa veintiún junabʼ, ri kitat kinan xeyawajik. Kkibʼij: «Utz xqilo xeqachajij. Are kʼu, xojbʼisonik are chiʼ xqaya kan ri lugar jachiʼ xojpatanin wi che uxinaq chi qachoch».

² Jun chi kʼulaj, William xuqujeʼ Terrie, kkibʼij: «Xojoqʼik are chiʼ xqetaʼmaj che kojtzalij ta chi pa ri qasignación rumal jun yabʼil. Ri qarayinik che upatanixik ri Jehová pa jun chi tinamit xsach uwach».

³ Alexéi kubʼij: «Xqetaʼmaj che ri e qakʼulel kkaj kkitzʼapij ri sucursal che xinkʼojiʼ wi. Are kʼu chi xekun che utzʼapixik xojbʼisonik, rumal laʼ xojel lo pa Betel».

4. ¿Jas preguntas kqil na pa wajun kʼutunem riʼ?

⁴ Xaq xiw ta ri e qachalal riʼ kiriqom ri e jastaq riʼ pa kikʼaslemal. E miles betelitas xuqujeʼ e nikʼaj chi qachalal re tiempo completo jeʼ kikʼulmam. * Weneʼ kʼax kkiriq ri e qachalal riʼ che uyaʼik kan ri kichak che sibʼalaj utz kkilo. ¿Jas ketowik? ¿Jas kqabʼan che kitoʼik? Ri respuestas re wariʼ kojutoʼ qonojel are chiʼ kkʼextaj ri qakʼaslemal.

5. ¿Jas kubʼan pa qakʼaslemal we kkʼextaj jujun taq jastaq?

⁵ We oj kʼo pa Betel o pa jun chi chak re tiempo completo,  kukʼam qawach chkij ri e winaq xuqujeʼ chrij ri lugar. Rumal laʼ, we kʼo jun rumal che rajawaxik kqaya kan ri lugar, sibʼalaj kojbʼisonik. Keqabʼisoj ri e winaq che keqaya kanoq xuqujeʼ kqabʼisoj ri kkikʼulmaj na, más na we kqilo che xmajix uqʼatexik ri qaqʼijilanik (Mat. 10:23; 2 Cor. 11:28, 29). Xuqujeʼ, umajixik chi jun kʼakʼ asignación amaqʼel kuya kʼax rumal ri e jastaq re ri cultura, xuqujeʼ are chiʼ kojtzalij chi jumul jachiʼ xojkʼiy wi. Robert xuqujeʼ Mary Jo kkibʼij: «Oj naqʼatal ta chi che ri qacultura xuqujeʼ qas ta utz chi xqanaʼ are chiʼ kqatzijoj ri utzij ri Dios pa ri qachʼabʼal. Xqanaʼ che kʼo ta chi kqabʼan chilaʼ». Jun chi jastaq, weneʼ xaq kʼateʼ kqariq kʼax che uriqik ri pwaq. Weneʼ kqanaʼo che kʼo ta qachuqʼabʼ xuqujeʼ kojbʼisonik. ¿Jas kojtoʼw chuwach ri e kʼax riʼ?

6. ¿Jas kqabʼano rech kojkʼojiʼ chunaqaj ri Jehová?

⁶ Chojkʼol chunaqaj ri Jehová (Sant. 4:8). ¿Jas kqabʼan che ubʼanik? Kqakubʼsaj qakʼuʼx chrij areʼ, rumal che areʼ kutatabʼej «ri chʼawem» (Sal. 65:2). Salmo 62:8 kubʼij: «Chixchʼaw rukʼ, rukʼ ronojel jikibʼam kʼuxaj». Jehová kkunik kuya más chuwach ronojel ri kqataʼ che o ri kqachomaj (Efes. 3:20). Areʼ xaq xiw ta kuya ri kqataʼ che pa qachʼawem. Sibʼalaj mayibʼal kubʼan che usukʼumaxik ri e kʼax kqariqo, kubʼan ri xqachomaj taj che kkʼulmatajik.

7. a) ¿Jas kojtowik rech kojkʼojiʼ naqaj che ri Jehová? b) Junam rukʼ ri kubʼij Hebreos 6:10-12, ¿jas kqariqo we kqaya ta kan upatanexik ri Jehová rukʼ sukʼilal?

⁷ Usikʼixik uwach ri Biblia ronojel taq qʼij xuqujeʼ uchomaxik rij kojutoʼ rech kojkʼojiʼ naqaj che ri Jehová. Jun qachalal che xux misionero nabʼe kubʼij: «Rajawaxik che kqaya ta kan ubʼanik ri qʼijilanik pa ri familia xuqujeʼ amaqʼel kqatijoj qibʼ rech kojbʼe pa ri riqbʼal ibʼ, junam rukʼ ri xqabʼan pa ri asignación jachiʼ oj kʼo wi nabʼe». Xuqujeʼ, amaqʼel chqatzijoj ri utzij ri Dios kukʼ ri e qachalal re ri kʼakʼ congregación. Ksach ta che ri Jehová ri e sukʼ upatanelabʼ, paneʼ qas ta kekun chik kkibʼan ri chak junam rukʼ nabʼe kanoq (chasikʼij uwach Hebreos 6:10-12).

8. ¿Jas tobʼanik kkiya ri e tzij kʼo pa 1 Juan 2:15-17 rech kkʼojiʼ jun qakʼaslemal xa rukʼ kebʼ oxibʼ jastaq?

⁸ Chkʼol jun qakʼaslemal rukʼ kebʼ oxibʼ jastaq. Kqaya taj che ri e jastaq re wajun  uwach Ulew riʼ che kʼo pa uqʼabʼ ri Satanás kubʼan kʼax che ri qachilanik rukʼ ri Dios (Mat. 13:22). Kqatatabʼej ta ri kkibʼij ri e qachiʼl, ri e qafamiliares o nikʼaj chi winaq che rukʼ rutzil kanimaʼ kkibʼij chqe che kqatzukuj más pwaq o jastaq pa wajun uwach Ulew riʼ (chasikʼij uwach 1 Juan 2:15-17). Chqakubʼsaj qakʼuʼx chrij ri Jehová, che kuya ri kutzujuj chqe «pa ri qʼij ri rajawaxik na chqe» pa ri qakojonik, ri kqanaʼ pa qanimaʼ xuqujeʼ ri kajwataj chqe pa ri qakʼaslemal (Heb. 4:16; 13:5, 6).

9. Junam rukʼ ri kubʼij Proverbios 22:3, 7, ¿jasche nim ubʼanik che kqajal ta pwaq che kajwataj taj, xuqujeʼ jas kojutoʼ rech kqachaʼ utz taq jastaq pa ri qakʼaslemal?

⁹ Kqanim ta qibʼ pa kʼasaj che kajwataj taj (chasikʼij uwach Proverbios 22:3, 7). Ukʼexik jun ja nim kel wi. Rumal laʼ kqakʼas ta jastaq che rajawaxik ta chqe. Are chiʼ kojqʼax chuwach jun kʼax, junam rukʼ uchajixik jun yawabʼ, weneʼ kʼax kqabʼan che uchomaxik jampaʼ pwaq kqajalo. Are chiʼ kkʼulmataj wariʼ, utz che knaʼtaj chqe che ubʼanik chʼawem rukʼ Jehová kojutoʼ rech kqachaʼ utz jastaq pa ri qakʼaslemal. Areʼ kuya ri jamaril pa ri qanimaʼ xuqujeʼ kojutoʼ rech qas kqachomaj na ri kqaj kqabʼano (Filip. 4:6, 7; 1 Ped. 5:7).

10. ¿Jas kojtowik rech keqatzukuj e kʼakʼ taq qachiʼl?

¹⁰ Chkʼol jun utz qachilanik kukʼ ri e qachiʼl xuqujeʼ ri qafamilia. Chojchʼaw chrij ri kqanaʼo xuqujeʼ ri kkʼulmataj kukʼ ri e qachiʼl, más na kukʼ ri e qachiʼl che e qʼaxinaq pa ri e jastaq che tajin kqaqʼaxej. Wariʼ kuya utzilal chqe (Ecl. 4:9, 10). Qastzij che kqaj taj kesachan ri e qachiʼl chqe re ri nabʼe qasignación, are kʼu rajawaxik keqatzukuj e kʼakʼ qachiʼl. Xuqujeʼ kojux kachiʼl ri e nikʼaj chik. Chqatzijoj chke ri e tewchibʼal uyaʼom ri Jehová chqe rech jeriʼ kkilo che kojkikot che upatanixik. Paneʼ jujun qachalal kkichʼobʼ ta ri rumal che sibʼalaj nim kqil ri chak re tiempo completo, kʼi mul kubʼano che e nikʼaj chik kkaj kkiterenej ri qakʼutbʼal xuqujeʼ keʼux qachiʼl. Are kʼu chqachajij qibʼ rech xaq xiw ta kojchoman chrij ri qabʼanom xuqujeʼ xaq xiw ta kojchoman chrij ri jastaq che kojkun ta chik kqabʼano.

11. ¿Jas kojkunik kqabʼano rech amaqʼel kojkikot pa ri qakʼulanem?

¹¹ We kqaya kan ri nabʼe qasignación rumal che ri qakʼulaj xuriq jun yabʼil, kqabʼij taj che umak areʼ. Are kʼu, we oj ri xojyawajik, kqachomaj taj che qamak oj ri xkʼulmatajik xuqujeʼ kqachomaj taj che xqabʼan jun kʼax che ri qakʼulaj. Chnaʼtaj chqe che xa oj «jun winaq chik» xuqujeʼ che xqatzujuj che ri Jehová che kqachajij  qibʼ pa ronojel jastaq (Mat. 19:5, 6). Xuqujeʼ, we ri rumal are che kkʼojiʼ jun alaj qalkʼwal che qachomam taj, chqabʼij che ri qalkʼwal che are más nim ubʼanik areʼ chuwach ri qasignación nabʼe kanoq. Amaqʼel chqabʼij che ri akʼal che are jun sipanik re ri Jehová (Sal. 127:3-5). Xuqujeʼ, chojchʼaw rukʼ chrij ri utzalaj taq qʼij che xqaqʼaxej, wariʼ kubʼano che areʼ kumajij ri tiempo completo, junam rukʼ ri xqabʼan oj.

12. a) ¿Jas kqabʼan che kitoʼik ri e qachalal re tiempo completo rech kkiya ta kan ri kasignación? b) ¿Jas kqabʼan che ubʼixik utz taq tzij chke rumal ri kʼakʼ kasignación?

¹² Pa kʼi congregaciones, e kʼi qachalal pa kijujunal, kkibʼan ronojel ri kekun che ubʼanik rech kekitoʼ ri qachalal re tiempo completo rech kkiya ta kan ri kasignación. Jun kʼutbʼal, kkiya pwaq o nikʼaj chi jastaq che kitoʼik, o kekichajij ri kifamiliares. Qas yaʼtal ubʼixik utz taq tzij chke ri e qachalal che kkiya ri e tobʼanik riʼ (Gál. 6:2). ¿Jas kqabʼano we kul pa ri qacongregación jun qachalal re tiempo completo? Kqachomaj taj che xkʼex ri rasignación rumal che weneʼ utz ta xubʼan che ri uchak o xa xubʼan jun itzel jastaq. * Chqayaʼ utz upetik xuqujeʼ chqabʼij utz taq tzij che rumal ri xubʼano, weneʼ rumal jun yabʼil kkun ta chik kubʼan junam rukʼ nabʼe. Chqakojoʼ qachuqʼabʼ che retaʼmaxik uwach, chqetaʼmaj chrij ri retaʼmabʼal xuqujeʼ ri xukʼulmaj pa ri ukʼaslemal.

13. ¿Jas kqabʼan che utoʼik jun qachalal che xyaʼ jun kʼakʼ asignación che?

¹³ Are chiʼ kʼateʼ kopanik, weneʼ ri  qachalal kajwataj tobʼanik che rech kuriq rachoch, transporte, uchak o nikʼaj chi jastaq. Weneʼ rajawaxik kbʼix che ri kbʼan pa ri lugar junam rukʼ ri utojik impuestos o utaʼik jun seguro. Are kʼu ri más utz are che kqachʼobʼ ri kunaʼ, are ta xa kqabʼisoj uwach. Weneʼ areʼ o jun ufamiliar kʼo pa kʼax. O weneʼ kbʼisonik rumal che xkam jun ufamiliar. * Paneʼ kubʼij taj, weneʼ keʼubʼisoj ri e rachiʼl. Kukʼam tiempo rech ksukʼumataj ri uchomanik rech kkikot chi jumul.

14. ¿Jas xkibʼan ri publicadores che utoʼik jun qachalal ixoq rech kukʼam uwach pa ri kʼakʼ uterritorio?

¹⁴ Pa ri tiempo riʼ, ri qatobʼanik xuqujeʼ ri utz qabʼantajik kutoʼ ri qachalal rech kukʼam uwach pa ri kʼakʼ asiganción. Jun qachalal ixoq che xpatanin kʼi junabʼ pa jun chi tinamit kubʼij: «Pa ri wasignación ojer, ronojel qʼij kinya etaʼmanik re ri Biblia. Are kʼu pa ri kʼakʼ asignación kʼax kinbʼan che usikʼixik uwach jun texto re ri Biblia xuqujeʼ ukʼutik jun video are chiʼ kintzijoj ri utzij ri Dios. Are kʼu ri e qachalal pa ri kʼakʼ congregación kinkisikʼij rech kinbʼe kukʼ che kisolixik ri e winaq xuqujeʼ ri kkiya etaʼmanik chke. Are chiʼ xwil ri ukowil kikʼuʼx ri e qachalal riʼ xuqujeʼ e kʼo kʼi kitijoxelabʼ re ri Biblia che tajin kekʼiy pa ri kikojonik xinutoʼ rech kinbʼison ta chik. Xwetaʼmaj umajixik tzijonem kukʼ ri e winaq pa ri kʼakʼ territorio. Ubʼanik wariʼ xuya chi jumul kikotemal chwe».

15. ¿Jas kqabʼano rech kojkikot pa jun kʼakʼ asignación?

¹⁵ Kojkunik kqariq kikotemal pa jun kʼakʼ asignación. Kqachomaj taj che we xkʼextaj ri qasignacion are jun nimalaj kʼax. Chqilaʼ ri tobʼanik tajin kuya ri Jehová chqe xuqujeʼ kqaya ta kan utzijoxik Utzij. Chqabʼanaʼ qe ri xkibʼan ri cristianos re ri nabʼe siglo che, apastaneʼ ri lugar e kʼo wi, «kkitzijoj ri  utzij ri Dios chke ri winaq» (Hech. 8:1, 4). We kqaya ta kan utzijoxik utzij ri Dios kojkun riʼ keqariq winaq che kkaj kketaʼmaj. Jun kʼutbʼal, jujun precursores xeʼesax bʼi pa jun tinamit rumal laʼ xebʼe chi pa jun lugar che kajwataj wi tobʼanik pa ri chʼabʼal che ketaʼm. Kʼateʼ kebʼ oxibʼ ikʼ qʼaxinaq, xebʼan kʼakʼ taq grupos che chanim xekʼiyarik.

16. ¿Jas kojtowik rech kukʼam qawach chrij ri kʼakʼ qasignación?

¹⁶ Nehemías xubʼij chke ri judíos che ri kikotemal che kpe rukʼ ri Jehová are ri kyaʼow chuqʼabʼ (Neh. 8:10). Paneʼ sibʼalaj kqaloqʼoqʼej ri lugar ri xojpatanin wi, are ta ri kyaʼow kikotemal chqe xaneʼ are ri qachilanik rukʼ ri Jehová. Rumal laʼ, maqayaʼ kan rachilaxik ri Dios xuqujeʼ chqakubʼsaj qakʼuʼx che kuya qanojibʼal, kukʼam qabʼe xuqujeʼ kojutoʼ. Chnaʼtaj chqe che ri xbʼanowik che utz xqil ri nabʼe qasignación are che rukʼ qanimaʼ xeqatoʼ ri e winaq. Jehová kojutoʼ rech xaq junam kqanaʼ chrij ri kʼakʼ qasignación we xuqujeʼ rukʼ ronojel qanimaʼ kqabʼan ri jastaq (Ecl. 7:10).

17. ¿Jas rajawaxik knaʼtaj chqe chrij ri qasignación che kʼo kimik?

¹⁷ Rajawaxik knaʼtaj chqe che ri qaqʼijilanik che ri Dios kʼo ta ukʼisik, are kʼu ri qasignación kʼo kimik xa re jun tiempo. Pa ri kʼakʼ uwach Ulew, weneʼ ri chak kqabʼan che ri Jehová junam ta rukʼ ri kqabʼan kimik. Alexéi, che xojchʼaw chrij nabʼe, kuchomaj che ri tajin kuriq kimik tajin kutoʼ chuwach ri petinaq. Xubʼij: «Wetaʼmam che Jehová qas kʼolik xuqujeʼ ri kʼakʼ uwach Ulew qas kpe na, are kʼu xinchomaj che sibʼalaj naj kʼo wi. Kimik kwilo che Jehová kʼo chnunaqaj xuqujeʼ kinnaʼo che ri kʼakʼ uwach Ulew naqaj chi kʼo wi» (Hech. 2:25). Apastaneʼ ri qasignación kʼolik, kqaya ta kan rachilaxik ri Jehová. Areʼ kojuya ta kanoq; qastzij wi kojutoʼ rech kqariq kikotemal are chiʼ kqakoj qachuqʼabʼ che upatanexik, apachiʼ taneʼ ri oj kʼo wi (Is. 41:13).