1-3. ¿Imanirtaq llapan tiempunkunawan yanapakïkaq wakin wawqi panikunaqa, tsënö yanapakur sïguita puëdiyannatsu?

ROBERTWAN warmin Maryqa, juk nacionchömi 21 watapana yanapakïkäyarqan. Tsënö këkäyaptinmi, ishkankunapa teytankuna qeshyakurkuyarqan. Pëkunam kënö willakuyan: “Teytäkunata cuidëqa alläpam gustayäman, peru yanapakuyanqä nacionchö yachakashqana karmi, tsëpita ëwakurqa alläpa llakikuyarqä”.

² Williamwan warmin Terrienam kënö niyan: “Salornïkunarëkur yanapakïkäyanqä nacionman manana kutita puëdiyänäpaq kaqta musyarirqä, alläpa llakikurmi waqayarqä. Juk nacionchö Diospita yachatsikïta munayanqäqa tsë höram ushakärirqan”.

³ Wawqi Alekseynam kënö nin: “Betel wayita chikiyämaqnïkuna llawita o wichqëta munayanqantaqa musyayarqämi. Peru tsëta lograriyaptin y Betelpita ëwakuyänäpaq kaqta musyarirqa alläpam llakikuyarqä”.

4. ¿Ima tapukïkunapitataq kë yachatsikïchö yachakushun?

⁴ Manam tsë wawqikunallatsu tsënö cambiukunapaqa pasayashqa. Jina Betel wayichö mëtsika waranqa trabajaq wawqi panikunata y llapan tiempunkunawan juknöpa yanapakïkaqkunatapis tsëqa pasashqam. * Tsë wawqi panikunaqa alläpachi llakikuyarqan tsënö yanapakïkäyanqanta jaqiyänan kaqta musyarir. ¿Imaraq yanapanman? ¿Imataraq pëkunapaq rurashwan? Tsënö cambiukunapa pasanqantsik höraqa, kë tapukïkunapa respuestanmi noqantsiktapis yanapamäshun.

5. Diospa kaqchö juknöpana yanapakunapaq nimashqaqa, ¿imakunaparaq itsa pasashwan?

⁵ Betelchö yanapakushqa o imachöpis Diospa kaqchö llapan tiempuntsikwan yanapakushqaqa, tsëchö nunakunata y tsë sitiutapis kuyarmi qallëkuntsik. Tsëmi imarëkurllapis ëwakurqa alläpa llakikuntsik. Dejanqantsik amïguntsikkunatam llakintsik y pëkunapaqmi yarpachakuntsik, masqa Diospita yachatsikïta gobiernu michäkur qallanqanrëkur ëwakushqa karmi (Mat. 10:23; 2 Cor. 11:28, 29). Jina costumbrikuna jukläya jukläya kaptinmi, juk läduchö yanapakur qallëqa fäciltsu kanman, hasta yurikunqantsik markaman kutishqa karnimpis. Robertwan warmin Marym kënö willakuyan: “Kikïkunapa markäkunachö costumbrikunaqa jukläyanam niräpuyämaq y parlayanqä idiömachö yachatsikurpis jukläyam sientikuyaq kayä. Tsë markapita karpis juk markapitanömi sientikuyaq kayä”. Jina mana pensanqantsik gastukunapaqmi faltapakur qallëkushwan. Y tsërëkurqa itsa llakikushwan y qelanärishwan. Tsëkunapa pasashqaqa, ¿imaraq yanapamäshun?

6. ¿Imatataq Jehoväpita mas tsaripukunapaq ruranantsik?

⁶ Jehoväpita mas tsaripukushun (Sant. 4:8). Tsëpaqqa, ¿imatataq ruranantsik? Pëmanmi confiakunantsik, pëqa “mañakïkunata wiyaq” Diosmi (Sal. 65:2). Salmus 62:8 textum, “llapan shonqïkikunawan pëta parlapäyë” nin. Jehoväqa, mañanqantsikpita y pensanqantsikpitapis masta rurëtam puëdin (Efes. 3:20). Peqa manam mañakunqantsikllatatsu noqantsikpaq ruramun. Problëmantsikkunata altsamunampaqqa, mana shuyaranqantsik o ichikllapis mana pensanqantsik cösaskunatam ruraramunman.

7. (1) ¿Imataq yanapamäshun Jehoväta sirwir sïguinapaq? (2) Hebrëus 6:10 a 12 textu ninqannöpis, ¿imatataq lograshun Jehoväta mana jaqipa sirwirqa?

⁷ Jina Jehoväpita mas tsaripukunapaqqa, Bibliatam cada junaq leyinantsik y leyinqantsikmanmi shumaq pensanantsik. Juk nacionchö unëna yanapakushqa wawqim kënö nin: “Noqakunapaqqa alläpam precisan juk nacionchö yanapakuyanqä witsanchönölla, Familiachö Diosta Adorana Hörata mana qonqayänä y reunionkunapaq preparakuyänä”. Jina chanqantsik congregacionchömi llapan puëdinqantsikmannö wawqi panintsikkunawan Diospita  yachatsikur sïguinantsik. Unë witsankunanö rurëta manana puëdiyaptimpis, Jehoväqa mana jaqipa sirweqninkunataqa manam qonqanqatsu (leyi Hebrëus 6:10-12).

8. 1 Juan 2:15 a 17 textu ninqanqa, ¿imanötaq yanapamantsik kapamanqantsikkunallawan kushishqa kawakunapaq?

⁸ Kapamanqantsikllawan kushishqa kawakushun. Satanaspa mundunchö imëkapaq yarpachakïkunaqa Diospa kaqchö rurapakïnintsikkunatam chipyëpa nitirinman. Tsënö pasakunantaqa ama jaqishuntsu (Mat. 13:22). Noqantsikpaq allita munar següru kawakunapaq mas qellëyoq kanantsik alläpa precisanqanta nir amïguntsikkuna, kastantsikkuna o juk nunakuna consejamashqaqa, ama cäsushuntsu (leyi 1 Juan 2:15-17). Jehoväqa “precisaq tiempuchö” yanapamänapaqmi änimantsik. Pëqa mas markäkunapaq, tranquïlu sientikunapaq y wananqantsikkunata tarinapaqmi yanapamäshun (Heb. 4:16; 13:5, 6).

9. Proverbius 22:3 y 7 textu ninqannöpis, ¿imanirtaq jaqa këman ishkishwantsu y imataq yanapamäshun allita decidinapaq?

⁹ Ama jaqa këman ishkishuntsu (leyi Proverbius 22:3, 7 *). Juk läduchö täkunapaq cösasnintsikkunata apapakïqa chaniyoqmi kanman y rasmi jaqa këman ishkirishwan. Tsëqa ama qellëta prestakïkur mana wananqantsik cösaskunataqa rantishuntsu. Alläpam yarpachakuntsik juk kuyashqa kastantsik qeshyaptin o ima pasakuptimpis, tsëmi tsë hörakuna ëka qellëta prestakunapaq kaqta decidiqa, fäciltsu kanman. Tsë hörakunaqa, allita decidinapaq Jehoväman ‘mañakunqantsik y rogakunqantsik’ yanapamänapaq kaqtam yarpänantsik. Pëqa pensënintsikchö y shonquntsikchömi yamëyäratsimäshun, y imatapis manaraq rurar shumaq pensanapaqmi yanapamäshun (Filip. 4:6, 7; 1 Pëd. 5:7).

10. ¿Imaraq yanapamäshun alli amïgukunata tarinapaq?

¹⁰ Amïguntsikkunawan y familiantsikwan alli apanakushun. Imanö sientikunqantsikpita y imakunapa pasanqantsikpita amïguntsikkunawan parlashun, masqa pasëkanqantsikpa pasashqa kaqkunawan. Tsëmi mas alli sientikunapaq yanapamäshun (Ecl. 4:9, 10). Unë yanapakunqantsik markachö amïgukunayoq kashqa karpis, kanan këkanqantsik markachömi mas amïgukunayoq këta procuranantsik. Tsëpaqqa noqantsikmi wakinkunapa amïgun këta tïranantsik. Jehovä imanö bendicimashqa kanqantsikta pëkunata willashun, tsënöpa kushishqa sirwinqantsikta rikäyänampaq. Llapan tiempuntsikwan Jehoväta sirwi alläpa kushitsimanqantsikta wakinkuna mana entiendiyaptimpis, itsa wakinqa noqantsik ruranqantsikta rurëta munayanqa y amïguntsik këta munayanqa. Peru unë ruranqantsikkunallapita y mana alli sientikunqantsikpita  alläpa mana parlanapaqmi cuidädu kanantsik.

11. ¿Imanötaq casädu kawënintsikchö kushishqalla këta puëdishun?

¹¹ Majantsik qeshyanqanrëkur Diospa kaqchö llapan tiempuntsikwan yanapakïta jaqishqa karqa, ama majantsikta culpatsashuntsu. Y noqantsik qeshyakurkushqa karqa, ama culpatsakushuntsu, ni majantsikta llakitsishqa kanqantsikta pensashuntsu. “Juk ëtsallana” kanqantsikta y imapa pasarpis ishkantsik cuidanakunapaq kaqta Jehoväta änishqa kanqantsikta yarpäshun (Mat. 19:5, 6). Jina warmintsik qeshyaq tikranqanrëkur munanqantsiknö yanapakïta manana puëdirqa, wamrantsikta shumaq entienditsishun llapan tiempuntsikwan Diospa kaqchö yanapakïpitapis, pëta cuidë noqantsikpaq mas precisanqanta. Jehoväpa juk qarënin cuenta kanqanta yarpapätsishun (Sal. 127:3-5). Jina llapan tiempuntsikwan Diosta sirwinqantsikchö alläpa shumaq cösaskunapa pasanqantsikta willashun, itsa tsëta wiyarqa, pëpis noqantsiknölla llapan tiempunwan Diosta sirwita munanqa.

12. (1) ¿Imanötaq llapan tiempunkunawan Diospa kaqchö yanapakïkaqkunata yanapashwan? (2) ¿Imatataq rurashwan kanan yanapakuyänampaq kaqchö yachakäyänampaq?

¹² Mëtsika congregacionkunam y wawqi panikunam llapan tiempunkunawan Diospa kaqchö yanapakïkaq cristiänukunata yanapayänampaq imëkata rurayan. Höraqa rurëkäyanqannö Diospa kaqchö yanapakur sïguiyänampaqmi parlapäyan, qellëninkuna o wanayanqankunata qarayan o kastankunata cuidayäpun. Tsënö rurayanqanqa alläpa allim (Gäl. 6:2). Tsënö llapan tiempunkunawan yanapakïkaq cristiänukuna congregacionnintsikman chäyämuptinqa, ¿imataraq rurashwan? Ama mandayanqanta mana rurashqa kaptin o imatapis mana allita rurashqa kaptin congregacionnintsikman  mandayämunqantaqa pensashuntsu. * Tsëpa rantinqa, ras yachakänampaq yanapashun. Salorninkunarëkur munayanqannö yanapakïta manana puëdiyaptimpis, unë rurayanqampita felicitäshun y kushishqa chaskishun. Maslla reqita tïrashun. Llapan musyayanqampita, yachakuyanqampita y imakunapa pasayanqampita yachakushun.

13. Juk wawqita o panita Diospa kaqchö juknöpana yanapakunampaq niriyaptin, ¿imanötaq yanapashwan?

¹³ Itsapis qallananllachöqa, tsë wawqi panikunaqa juk wayita, mëtapis imanö chäyänampaq kaqta musyëta, trabäjuta o juk precisaq cösaskunata wanayanqa. Jina itsa ima impuestukunata pagayänampaq kaqta o gobiernupa ima yanapakïnin kanqampita willarishwan. Peru masqa imanö sientikuyanqanta entiendinantsiktam wanayan y manam llakipänantsiktatsu. Itsa pë o mëqan familianllapis qeshyëkan. O itsa mëqan familiampis wanushqa kaptin llakishqa këkan. Y mana nimashqapis, itsa dejanqan amïgunkunarëkur llakishqa këkan. Tsë llakikïninkunata qonqanampaqqa tiemputaraqmi wananqa. *

14. ¿Imanötaq wawqikuna y panikuna juk panita yanapayarqan chanqan congregacionchö yachakänampaq?

¹⁴ Tsë witsankunaqa, yanapanqantsik y pëkunawan yachatsikoq yarqunqantsikmi ras yachakäyänampaq yanapanqa. Atska watapa juk nacionchö yanapakushqa juk panim kënö willakun: “Unë yanapakunqä nacionchöqa cada junaqmi nunakunata Bibliapita estudiatseq kä. Peru kanan yachatsikurqa, manam textukunata leyita ni videukunata rikätsikïllatapis puëdïtsu. Peru turikuna y nanakunam, pëkunawan nunakunata yapë watukaq y estudiëkätsiyanqan nunakunaman ëwayänäpaq invitayämaq. Tsënö gänas gänas yachatsikoq turi nanakuna Bibliapita nunakunata estudiëkätsiyanqanta y tsë nunakuna Diosta mas kuyar qallayanqanta rikarmi, pëkunanölla yachatsikur qallanapaq yanapamashqa. Tsë markachö nunakunata parlapar qallëtam yachakurqä. Tsënö yanapayämanqampitam kananqa yapë kushishqana sientikü”.

15. Juk läduta yanapakoq ëwanapaq nimashqaqa, ¿imanötaq kushishqa këta puëdishun?

¹⁵ Kanan këkanqantsik congregacionchöqa Diosta sirwirnin kushishqa këtam puëdintsik. Ama pensashuntsu tsënö cambiukuna kaptin qepapärinqantsikta. Jehovä imanö yanapëkämanqantsiktam rikëta procuranantsik y yachatsikurnin sïguinantsik. Apostolkuna kawayanqan witsanchö cristiänukuna rurayanqanta qatishun, pëkunaqa “Diospa palabrampita alli willakïkunata willakurmi më tsëman ëwayaq” (Hëch. 8:1, 4). Yachatsikur sïguirninqa, itsa yachakïta munaqkunata tarishun. Juk pasakunqanta rikärishun. Juk precursorkunatam yanapakïkäyanqan nacionpita gobiernu qarqurirqan, tsëmi parlayanqan idiömachö Diospita yachatsikoqkunata wanayanqan nacionman ëwakuyarqan. Tsëpita wallka killakunallachömi, mushoq grüpukuna patsakäriyarqan y mas mirarnin sïguiyarqan.

16. ¿Imaraq yanapamäshun kanan yanapakïkanqantsikchö kushishqa kanapaq?

¹⁶ ‘Jehoväpita shamoq kushikïqa tsapämaqnintsik wayinö’ kanqantam judïukunata Nehemïas nirqan (Neh. 8:10). Kushishqa kanapaqqa manam Diosta sirwinqantsik sitiuchö yachakashqana kanqantsikpitatsu kanan, sinöqa Jehoväwan alli amïgu kanqantsikpitam. Tsëmi mëchö këkarpis yachaq kanapaq, pushamänapaq y yanapamänapaq kaqman confiakurnin Diosta sirwirnin sïguishun. Yarpäshun, yanapakunqantsik sitiuchöqa yachakärirqantsik, llapan shonquntsikwan nunakunata yanapëta munanqantsikpitam. Jina kanan këkanqantsik sitiuchö llapan shonquntsikwan yanapakushqaqa, Jehoväqa kushishqa kanapaqmi yanapamäshun (Ecl. 7:10).

17. Kanan witsan mëchö y imanö yanapakïkanqantsikpita, ¿imatataq yarpänantsik?

¹⁷ Kanan witsan mëchö y imanö yanapakïkanqantsik ushakäreqlla kanqantam yarpänantsik, peru Jehovätaqa imëyaqpis sirwikäshunllam. Itsa mushoq patsachöqa Jehoväta sirwirnin kanan rurëkanqantsikkunataqa manana rurashunnatsu. Qallanan pärrafukunachö parlanqantsik wawqi Alekseymi, tsë cambiukuna shamoq tiempupaq yanapëkanqanta nin. Kënömi nin: “Jehovä y änikunqan patsa rasumpa kanqantaqa imëpis musyarqömi, peru tsëpaqqa atska tiempuraq faltanqantam pënsaq kä. Peru kananqa frentïchö Jehovä këkanqantanö y mushoq patsa këllachöna këkanqantanömi rikä” (Hëch. 2:25). Mëchö y imanö yanapakïkashqapis Diosta sirwitaqa ama jaqishuntsu. Mëchö këkashqapis Pëqa manam jaqimäshuntsu y puëdinqantsikmannö kushishqa sirwir sïguinapaqmi yanapamäshun (Is. 41:13).