1-3. ¿Maijan huauqui panicunaca imamantataj Dios mingashca trabajota saquishcacuna?

HUAUQUI Robert paipaj huarmipish 21 huatacunatami misionero carcacuna. Pero paicunapaj yaya mamacunami ungurca. Paicunaca: “Ñucanchij yaya mamacunata cuidana tucushcamantami cushilla sintirircanchij. Shinapish ñucanchij munashca lugarpi sirvinata saquishcamantami llaquilla sintirircanchij” nincunami.

² Huauqui William, paipaj huarmi Terrieca: “Ungüimanta ñucanchij sirvicushca lugarman mana tigrai tucushcamantami huacarcanchij. Shujtaj llajtapi sirvinataca ña mana pudishunchu nishpami yuyarcanchij” nincunami.

³ Huauqui Alexéica: “Ñuca sirvicushca sucursaltaca Diospaj contracuna huichcajpimi chaipi sirvinata saquircani. Chaimantami llaquilla sintirircani” ninmi.

4. ¿Cai yachaipica ima tapuicunamantataj yachashun?

⁴ Tucui punllacuna Diosta sirvij achca huauqui panicunami paicunaman mingashca trabajota saquina tucushcacuna. * Cai huauqui panicunapajca paicuna munashca trabajota saquinaca sinchimi cashcanga. ¿Amañaringapajca imatataj rurana can? ¿Ñucanchijpish paicunata ayudangapajca imatataj rurana canchij? Cai yachaipimi cai tapuicunamanta yachashun. Cai tapuicunata alli intindishpami cambiocuna tiyajpipish ñaupajman catishun.

5. ¿Shujtaj lugarpi sirvina tucujpica ima shinataj sintirinchij?

⁵ Betelpi sirvicushpa, maipi Diosta sirvicushpaca chaipi causanatami amañarinchij. Gentecunahuanpish allimi apanacunchij. Chaimantami shujtaj lugarpi Diosta sirvinaman rishpaca llaquilla sintirinchij. Shinallataj huauqui panicunata saquishcamantami llaquirinchij. Autoridadcuna Diosta sirvichun jarcajpicarin paicunamantami ashtahuan sustarinchij (Mateo 10:23; 2 Corintios 11:28, 29). Ashtahuanpish shujtaj lugarpi sirvi callarishpaca chaipi tiyaj costumbrecunata amañarinaca sinchimi canga. Ñucanchij llajtaman tigrana tucujpipish sinchimi ricuringa. Robert, paipaj huarmica: “Ñucanchij llajtaman tigrashpaca chaipi tiyaj costumbrecunata cutin amañarinaca sinchimi carca. Ñucanchij propio shimillapitaj predicanapish jirumi ricurirca. Ña mana chai lugarmanta cashca shinami sintirircanchij” nincunami. Shinallataj ñucanchijpish mana yuyashcapichari cullqui illaj saquirishun. Chaimantachari desanimado sintirishun. Chashna sintirishpapish ¿ñaupajman catingapajca imatataj rurana canchij?

6. ¿Diospajman cꞌuchuyangapajca imatataj rurana canchij?

⁶ Diospajman cꞌuchuyashunchij (Santiago 4:8). ¿Ima shinataj paipajman cꞌuchuyai tucunchij? Diosca ñucanchij mañashcacunataca uyanmi. Chaimantami paipi confiana canchij (Salmo 65:2). Salmo 62:8-pica: “Tucui shunguhuan paipaj ñaupajpi mañaichigari” ninmi. Jehová Diosca mana ñucanchij mañashcallatachu cun. Ashtahuanpish ñucanchijta ayudangapajca imata mañashcatapish, imata yuyashcatapish ashtahuan yallimi cun (Efesios 3:20).

7. a) ¿Diospajman ashtahuan cꞌuchuyangapajca imatataj rurana canchij? b) Hebreos 6:10 al 12-pica ¿imatataj yachachin?

⁷ Diospajman ashtahuan cꞌuchuyangapajca Bibliatami tucui punllacuna liyina canchij. Liyishcacunapipish cutin cutinmi yuyana canchij. Shuj huauquica misioneromi carca. Paica: “Familiahuan Diosta adoranataca mana saquinachu canchij. Tandanacuicunaman ringapajpish allimi prepararina canchij” ninmi. Ñucanchijpish mushuj congregacionpi huauqui panicunahuan ashtahuan predicashpa catishunchij. Yaya Diostaca ñaupa punllacunapi laya ña mana tantochari sirvi tucunchij. Pero tucui shunguhuan sirvijpica Diosca mana cungaringachu (Hebreos 6:10-12-ta liyipai).

8. 1 Juan 2:15 al 17-pi nishca shinaca ¿minishtirishcacunallahuan causangapajca imatataj rurana canchij?

 ⁸ Minishtirishcacunallahuan causashunchij. Cai tiempopica achca gentecunaca cai mundopaj cosascunata charina yuyaillami causancuna. Pero ñucanchijca Diostami punta lugarpi churana canchij (Mateo 13:22). Maipica familiacuna, rijsishcacunaca alli causachun munashcamantami cai mundopi cosascunata charichun animancuna. Paicunataca mana uyanachu canchij (1 Juan 2:15-17-ta liyipai). Jehová Diospi confiajpica pai agllashca horaspimi ñucanchij feta sinchiyachinga. Tranquilo sintirichunpishmi ayudanga. Minishtirishca cosascunatapishmi cunga (Hebreos 4:16; 13:5, 6).

9. a) Proverbios 22:3, 7-pi nishca shinaca ¿imamantataj mana dibiyana canchij? b) ¿Alli decidingapajca imatataj rurana canchij?

⁹ Ama deganalla dibiyashunchij (Proverbios 22:3, 7-ta liyipai). Shujtaj lugarpi causana tucujpica cosascunata apanaca achca cullquichari minishtiringa. Shinallataj imata charingapajca jahuallami deudari tucunchij. Chaimantami mana ministirishca cosascunataca mana randina canchij. Ashtahuanpish shuj familia ungujpica prestamopi mashna cullquita llujchinata decidinaca sinchichari ricuringa. Alli decidingapajca Jehová Dios ayudachunmi tucui shunguhuan mañana canchij. Paica ñucanchij shungupipish yuyaipipish tranquilo sintirichunmi ayudanga (Filipenses 4:6, 7; 1 Pedro 5:7).

10. ¿Shujtaj amigocunata charingapajca imatataj rurana canchij?

¹⁰ Alli amigocunata charishunchij. Maijan amigocunaca ñucanchij shinallatajmi sintirishcacuna. Chaimanta, ñucanchij ima shina sintirishcata paicunaman parlashunchij. Chaita rurashpaca allimi sintirishun (Eclesiastés 4:9, 10). Ñaupa mingashca trabajopi amigocunata charishpapish shujtaj amigocunatami charinata minishtinchij. Chaipajca caishuj huauqui panicunamanmi Dios ima shina bendiciashcata parlana canchij. Chashnami paicunaca Diosta cushilla sirvicushcata ricungacuna. Maijan huauqui panicunaca chaitaca mana intindingacunachu. Pero shujtajcunaca alli ejemplota ricushpami ñucanchij amigos tucusha ningacuna. Shinapish ñucanchijllamanta, desanimachij cosascunamantapish mana parlanachu canchij.

11. ¿Cusa huarmica cushilla causashpa catingapajca imatataj rurana canchij?

¹¹ Huarmi o cusa ungujpica canmantami Diostaca ña mana tucui punllacuna sirvi tucunchij nishpaca mana culpanachu canchij. Cutin ñucanchij ungushca cashpaca ñuca culpamantami Diostaca ña mana tucui punllacuna sirvi tucunchij nishpapish mana yuyanachu canchij. Yuyarishunchij, cusa huarmica “shuj aichallami” canchij. Jehová Diosmanca llaqui horaspi, cushi horaspipish cuidanacushpami causashun nishcataca mana cungarinachu canchij (Mateo 19:5, 6). Shinallataj  maipica mana yuyashcapimi huahuata chari tucunchij. Chaimantachari Diosta tucui punllacuna sirvinataca saquishun. Chashna tucujpica huahuata huiñachina, cuidana ashtahuan importante cashcatami ricuchina canchij. Huahuamanca canca Dios cushca sumaj herenciami cangui ninami canchij (Salmo 127:3-5). Yayitu Diosta tucui punllacuna sirvishca sumaj experienciacunamantapish ñucanchij huahuaman parlashunchij. Chaimi huahua jatunyashpaca chashnallataj Diosta tucui punllacuna sirvinata munanga.

12. a) ¿Tucui punllacuna Diosta sirvijcunata ayudangapajca imatataj rurana canchij? b) ¿Ñucanchij congregacionpi sirvinaman shamuj huauqui o pani amañarichunca imatataj rurana canchij?

¹² Tucui punllacuna Diosta sirvijcunataca chꞌican chꞌican huauqui panicunami ayudancuna. Por ejemplo, paicunapaj familiacunata cuidashpa, ima minishtishcacunata cushpa, cullquita cushpami ayudancuna. Shinallataj Diosta sirvishpa catichunmi sumaj shimicunahuan animancuna (Gálatas 6:2). Tucui punllacuna Diosta sirvij shuj huauqui o pani ñucanchij congregacionpi sirvinaman shamujpica ¿imatataj rurana canchij? Paiman mingashca trabajota mana alli pajtachishcamanta o mana alli cosascunata rurashcamantami shamun nishpaca mana yuyanachu canchij. * Chaita yuyanapaj randica cꞌuyaihuanmi chasquina canchij. Paipaj ungüimanta mana ñaupa laya Diosta sirvi tucujpipish imallata rurashcamantami felicitana canchij. Shinallataj cai huauqui o panica achca experienciatami charin. Preparaciontapishmi chasquishca canga. Chaimantami paita rijsingapaj esforzarina canchij.

13. ¿Shujtaj lugarmanta Diosta sirvinaman shamuj huauquitaca ima shinallataj ayudai tucunchij?

 ¹³ Shujtaj lugarmanta Diosta sirvinaman shamuj huauquica maipi causanata, ima shina carrota japinata, maipi trabajanatami yachasha ninga. Shinallataj impuestocunata ima shina paganata, seguropi ima shina afiliarinatami yachasha ninga. Chaimantami paita ayudana canchij. Pero cai huauquica paimanta llaquirichunllaca mana munangachu. Ashtahuanpish paipaj causai ima shina cashcata intindichunmi munanga. Maipica paillataj o paipaj familiachari ungushca can. Mana cashpaca paipaj familiachari huañurca. * Shinallataj paipaj amigocunata ricunatachari munan. Chaicunamantami llaquilla sintiringa. Paipaj yuyaipi tranquilo sintiringapajca tiempo pasanami minishtiringa.

14. ¿Shujtaj lugarmanta Diosta sirvinaman shamuj pani amañarichunca caishuj huauqui panicunaca imatataj rurarcacuna?

¹⁴ Shujtaj lugarmanta Diosta sirvinaman shamuj huauqui o pani amañarichunca paihuanmi predicana canchij. Alli ejemplotapishmi ricuchina canchij. Shuj panica achca huatacunatami shujtaj llajtapi Diosta sirvirca. Paica: “Ñaupaca tucui punllacunami Bibliamanta yachachij carcani. Pero cunanca predicacushpa Bibliamanta shuj versota liyina, shuj videota ricuchinallapish ñucapajca sinchimi can. Shinapish turi ñañacunami paicunahuan gentecunata visitachun, estudiocunata cuchun invitajcuna carca. Cai turi ñañacunaca estudiocunata charingapajmi achcata esforzarircacuna. Chaita ricushpami ñucapish animarircani. Mushuj lugarpi gentecunahuan ima shina parlanacunatami yacharcani. Chaimantami cutin cushilla sintirircani” ninmi.

15. ¿Shujtaj ladopi sirvinaman rishpa cushilla cangapajca imatataj rurana canchij?

¹⁵ Shujtaj ladopi sirvinaman cachajpica mana alli trabajashcamantami cachan nishpa o imapaj mana sirvijpimi cachan nishpaca mana yuyanachu canchij. Dios mingashca mushuj trabajotaca cushillami pajtachi tucunchij. Jehová Dios ima shina ayudacushcata yuyarishpami  huillashpa catina canchij. Ñaupa punllapi Diosta alli sirvij huauqui panicunapaj ejemplota catishunchij. Paicunaca “maita rishpapish alli huillaita huillashpami rircacuna” (Hechos 8:1, 4). Ñucanchijpish huillanata mana saquishpaca achcacunatami ayudashun. Por ejemplo, huaquin precursorcunataca autoridadcunami shuj llajtamanta llujshichishpa cacharcacuna. Chaimantami chai precursorcunaca paicunapaj propio shimipi huillana minishtirishca llajtapi sirvinaman rircacuna. Asha quillacuna qꞌuipallami chaipica achca gentecuna chꞌican chꞌican grupocunapi tandanacui callarircacuna.

16. ¿Shujtaj lugarpi Diosta cushilla sirvingapajca imatataj rurana canchij?

¹⁶ Nehemiasca judiocunataca: “Mandaj Dios cushichishcaca, cancuna fuerzayuj tucunapajmi” nircami (Nehemías 8:10). Huaquinpica shuj lugarpichari Diosta sirvinata munanchij. Pero mana chaipi sirvishcallamantachu cushilla causaita charishun. Ashtahuanpish Jehová Diospaj ñaupajpi alli ricurishpami cushilla causashun. Chaimanta, Yaya Diosllataj ñucanchij causaita pushana cashcata, ayudana cashcata, yachaita cuna cashcataca tucui shunguhuan crishunchij. Yuyarishun, ¿imamantataj shuj lugarpi Diosta sirvinataca munarcanchij? Gentecunata tucui shunguhuan ayudasha nishcamantami chaipi sirvinata munarcanchij. Shujtaj lugarpipish Dios mingashcata tucui shunguhuan pajtachijpica paillatajmi cushilla sirvichun ayudanga (Eclesiastés 7:10).

17. ¿Imatataj yuyaipi charina canchij?

¹⁷ Jehová Diosta sirvinaca manataj tucuringachu. Shinapish cunan punllacunapi Dios mingashca trabajoca ima horapish tucuringallami. Chaitami yuyaipi charina canchij. Shamuj punllacunapica paraíso Allpapica shujtaj trabajocunata rurachunmi Diosca minganga. Párrafo 3-pi parlashca Alexéica cunan punllacunapi Diosta sirvinapi cambiocuna tiyashcamantami shamuj punllacunapajpish preparado can. Paica: “Ñaupaca Yaya Dios ñucamanta asha carupi cashcata, paraisopish mana utca pajtarina cashcatami yuyarcani. Pero cunanca Jehová Diosta ricucuj shina, paraíso Allpamanpish ña chayacuj shinami sintini” ninmi (Hechos 2:25). Yaya Dios ima trabajota mingajpipish paita sirvishpa catishunchij. Paica ñucanchijtaca manataj saquingachu. Ashtahuanpish maipi cajpipish pai mingashca trabajota cushilla rurachunmi ayudanga (Isaías 41:13).