1-3. Tukuy tiemponkuwan Diospaq llamkaq iñiqmasinchikkunaqa, ¿imakunaraykum saqinku imapas ruwasqankuta?

ROBERTWAN Mari iñiqmasinchikkunaqa 21 watapunim huk law nacionpi Diosmanta willakurqaku. Chayna kachkaptinkum tayta-mamanku unqururqa. Willakunkum: “Kusikurqanikum paykunawan kuskaña kaytaqa, ichaqa llakikuypaqmi karqa kasqayku lawta saqiyqa”, nispa.

² Iñiqmasinchik William hinaspa warmichan Terriem nin: “Unqusqaykurayku, Diosmanta willakusqayku lawman manaña kutinaykumanta yacharuspaykum waqayllaña waqarqaniku. Ñuqaykuqa ancha-anchatam munarqaniku huk law nacionpi Jehova Diosmanta willakuyta”, nispa.

³ Alexey iñiqmasinchikpas ninmi: “Autoridadkunawan chiqniwaqninchik runakuna betel wasita wichqay munasqankumantaqa yacharqanikum. Chayta yachachkaspaykuñapas, astawanraqmi sasachakurqaniku betel wasita wichqaruptinkuqa”, nispa.

4. ¿Ima tapukuykunamantam yachasun?

⁴ Kay iñiqmasinchikkunallachuqaya chayna sasachakuykunapiqa tarikurqaku. Yaqa chaynam betelpi llamkaq waranqantin iñiqmasinchikkunata pasarqa hinaspa tukuy tiemponkuwan Diosmanta willakuq iñiqmasinchikkunatapas. * Kay iñiqmasinchikkunapaqqa mayna sasaraq karqa imapas ruwasqankuta saqiyqa. Chayrayku, ¿imam paykunata yanapanman? ¿Imatam  ruwachwan yanapaykunapaq? Chaykunamanta yachayqa anchatam yanapawasun ñuqanchiktapas qunqayllamanta imapas kawaptinchik.

5. ¿Imakunam sasachawachwan kasqanchik lawmanta huk lawmanña rinanchikpaq niwaptinchik?

⁵ Betelpi llamkaspanchik utaq huk ruwaykunapi kaspapas, llapallanchikmi kasqanchik lawpi runakunaman hinaspa chay llaqtapi imayna kawsakuyman amañanchik. Chayraykum, chaymanta huk lawmanña rinanchikta yachaspaqa ancha-anchata llakikunchik. Ancha-anchatam llakikunchik iñiqmasinchikkunamanta, aswanraqmi autoridadkuna chay llaqtapi Diosmanta willakuyninchikta harkakusqankurayku pasakuspanchikqa (Mat. 10:23; 2 Cor. 11:28, 29). Chaymantapas, huk lawpiña kayqa anchatam sasachawanchik chay lawpi runakunapa kawsakuyninwan ñuqanchikpa mana chaynalla kasqanrayku, yaqa chaynam unay watamantaña llaqtanchikman kutiptinchikpas. Robertwan Marim nin: “Llaqtaykupi tukuy ima kaqkunapas huk law llaqtayuqkunapa hinañam kawarqaku. Kikiykupa rimayniykupi willakuypas hukmanmi karqa. Llaqtaykuqa hukmanñam rikchakapuwarqaku”, nispa. Chaymantapas wakinpiqa sasachakusunpaschá qullqirayku. Yaqapaschá iskayrayasun utaq hukmanyasunpas. ¿Imam yanapawasun chayna tarikuptinchik?

6. Jehova Diosman, ¿imaynatam astawan asuykuchwan?

⁶ Diosmanyá astawan asuykusun (Sant. 4:8). ¿Imaynatam chayta ruwanchik? Payllapi hapipakuspam, payqariki tukuy ima mañakusqanchiktam uyariwanchik (Sal. 65:2). Salmo 62:8 nin: ‘Paypa qayllanpiyá sunquykita kichariy’, nispa. Jehova Diosqa ñuqanchikraykum ruwanman tukuy imakunata, wakinpiqa mana suyasqanchik kaqkunata (Efes. 3:20). Payqa mañakusqanchik kaqkunallatachuqaya quwanchik, aswanqa tukuytam ruwanqa imapas sasachawaptinchikqa.

7. (1) ¿Imam yanapawasun hinalla Jehova Dioswan kuyachikunapaq? (2) Hebreos 6:10-12 nisqanman hina Jehova Diosqa, ¿imatam mana qunqanqachu?

⁷ Sapa punchaw bibliata ñawinchaspanchik yuyaymanayninchikpas yanapawanchikmi Jehova Diosman astawan asuykunapaq. Huk iñiqmasinchikmi karqa huk law nacionkunapi Diosmanta willakuq, kunanmi ichaqa manaña.  Paymi willakun: “Hinallam ayllunchikwan Diosta yupaychanapaq tiempochakunanchik hinaspa huñunakuypi yachanapaq kaq qillqanchikkunatapas hinallam ñawinchananchik, sapa kuti ruwasqanchikman hina”, nispa. Chaynaqa, Diosmanta willakuqpas hinallam lluqsinanchik. Jehova Diosqa manam qunqanqachu payrayku imapas ruwasqanchiktaqa, ñawpaqpi hina manaña ruwaptinchikpas (qaway Hebreos 6:10-12).

8. 1 Juan 2:15-17 nisqanqa, ¿imapaqmi kallpanchawanchik?

⁸ Kapuqllanchikwanyá kawsakusun. Amayá saqikusunchu kay pachapi kaqkuna Jehova Diosmanta karuncharuwananchiktaqa (Mat. 13:22). Ayllunchikkunawan riqsinakusqanchik runakunaqa qullqilla maskaypi kanapaqmi niwasun, chaynaqa imataña niwaptinchikpas nisqankutaqa amayá ruwasunchu (qaway 1 Juan 2:15-17). Astawanqa Jehova Diospiyá hapipakusun, payqa anchatam kallpanchawasun hinaspa imapas pisipuwaqninchiktam quwasun tantiasqan tiempopi (Heb. 4:16; 13:5, 6).

9. (1) Proverbios 22:3, 7 nisqanman hinaqa, ¿imanasqataq mana manukunanchikchu? (2) ¿Imam yanapawasun allinta tantiakunapaq?

⁹ Amayá yanqapas-yanqaqa manukusunchu (qaway Proverbios 22:3, 7). Yachasqanchik lawmanta huk lawman astakuyqa achka qullqipaqmi kanman, chaywanqa yaqapaschá manuyuq qiparuchwan. Chaynaqa, amayá yanqapas-yanqaqa manukusunchu. Wakinpiqa ayllunchikkuna unqurusqanraykum manukuyman chayaruchwan. Chayna sasachakuypi tarikuspaqqa Jehova Diostayá qayakusun, chaynapi paypa yanapakuyninwan allinta tantiakunapaq. Payqa hawkayaytam quwasun, yanapawasuntaqmi allinta tantiakunapaqpas (Filip. 4:6, 7; 1 Ped. 5:7).

10. ¿Imam yanapawasun iñiqmasinchikkunawan astawan riqsinakunapaq?

¹⁰ Huk sunqullayá kasun iñiqmasinchikkunawan hinaspa ayllunchikkunawan. Riqsinakusqanchik iñiqmasinchikkunawanyá rimasun sasachakuyninchikkunamanta utaq llakichiwaqninchik kaqkunamanta. Astawanqa sasachakuyta atipaq iñiqmasinchikkunawanyá. Chay ruwayninchikqa anchatam yanapawasun (Ecl. 4:9, 10). Ñawpaq yachasqanchik lawpi iñiqmasinchikkunawan hinalla parlanakuspapas, astakusqanchik lawpi iñiqmasinchikkunawanmi astawan riqsinakunanchik. Chaypaqa, paykunapaqmi kuyakuqllaña kananchik. Willachwantaqmi Jehova Dios tukuy imapi yanapawasqanchikmanta, chaynapi kusisqallaña kasqanchikta qawanankupaq. Wakin iñiqmasinchikkunaqa manapaschá llumpaytachu qawanqaku Diosmanta tukuy tiemponchikwan willakusqanchikrayku kusisqa kasqanchiktaqa, wakinkum ichaqa chayta qawaspanku astawan riqsiwasun. Chayna kaptinpas, manam ruwasqallanchikmantañaqa hinaspa  llakichiwaqninchik kaqkunallamantañaqa rimanachu.

11. Qusanchikwan utaq warmichanchikwan kusisqa kawsakunapaqqa, ¿imam yanapawasun?

¹¹ Qusanchik utaq warmichanchik unqurusqanrayku tukuy tiemponchikwan Diosmanta willakuyninchikta saqiruspaqa, amayá nisunchu payrayku saqirusqanchiktaqa. Utaq ñuqanchik unquq kaspapas amayá ñakakusunchu, amataqyá nisunchu qusanchikwan utaq warmichanchikwan ruway munasqanchikkuna yanqachakurusqantaqa. Aswanqa yuyarisunyá hukllaña kasqanchikta hinaspa imaña kaptinpas iskayninchik yanapanakunamanta Jehova Diosman nisqanchikta (Mat. 19:5, 6). Wakiqninchikqa mana churi-wawayuq kanapaqmi tantiakurqanchik, ichaqa qunqayllamantam churi-wawayuq rikurirunchik. Chayna kaptinqa, amayá nisunchu “qamraykum ruwayniykunata saqirqani” nispaqa. Paykunaqariki Jehova Diospa quwasqanchikmi (Sal. 127:3-5). Chaymantapas churi-wawanchikwanyá rimasun tukuy tiemponchikwan Diospaq llamkaspa kusisqa kasqanchikmanta, chaynapi paykunapas ñuqanchik hina tukuy tiemponkuwan Diospa llaqtanpi llamkanankupaq.

12. (1) Tukuy tiemponkuwan Diospaq llamkaq iñiqmasinchikkuna hinalla imapas ruwayninkupi kanankupaq, ¿imaynatam yanapaykuchwan? (2) Kasqanchik lawman chayaramuptinqa, ¿imatam ruwachwan?

¹² Achka iñiqmasinchikkunam atisqankuman hina yanapanku tukuy tiemponkuwan Diospaq llamkaq iñiqmasinchikkuna hinalla imapas ruwasqankupi yanapakunankupaq. Wakinmi kallpanchan hinalla llamkanankupaq, wakinñataqmi qullqichankuwan utaq imachankuwanpas yanapanku utaq aylluntapas yanapanku. Tukuy kaykuna ruwasqankuqa suma-sumaqmi (Gal. 6:2). Tukuy tiemponwan Diospaq llamkaq iñiqmasinchik, kasqanchik  lawman chayaramuptinqa, ¿imatam ruwachwan? * Tukuyta ruwaspam yanapaykuchwan hinaspa kallpanchaykuchwan, unqusqanrayku manaña ñawpaqpi hina ruwaptinpas. Chaymantapas astawan riqsinakunapaqyá kallpanchakusun. Hinaspapas yachasunyá tukuy ima ruwasqankunamantawan yachasqankunamanta.

13. ¿Imakunata ruwaspam yanapaykuchwan astakamuq iñiqmasinchikta?

¹³ Astakamuq iñiqmasinchiktaqa yanapaykunanchikchá kanqa yachananpaq wasi maskaypi, llamkay maskaypi hinaspa hukkunapipas. Yaqapaschá yachachinanchik utaq riqsichinanchik kanqa maypi rantiyta, maynin puriyta, maypi hospital kasqanta hinaspa hukkunatapas. Chaywanpas, astawanqa imayna tarikusqanpim yuyaymanananchik. Yaqapaschá ayllun utaq kikin unquchkanman. Utaq ayllun wañukusqanrayku llakisqallaña kachkanman. Chaykunamanta mana niwaspanchikpas, yaqapaschá sunqunpiqa llakisqallaña tarikunman kuyasqan iñiqmasinkunata yuyarispan. Chaykuna atipayqa sasamriki. *

14. ¿Imaynatam yanapaykurqaku astakamuq iñiqmasinchikta?

¹⁴ Astakamuq iñiqmasinchikkunapaq imapas ruwaykusqanchikqa anchatam yanapanqa. Achka watakunaña huk law nacionpi tukuy tiemponwan Diosmanta willakuq iñiqmasinchiktam nirqaku kasqan lawmanta huk lawmanña rinanpaq, paymi nin: “Manaraq kayman astakamuchkaspayqa sapa punchawmi bibliamanta yachachiq kani. Kaypim ichaqa anchata sasachakuni uyariwaqniy runapaq biblia ñawinchaykuyllatapas utaq video qawaykachiyllatapas. Chaywanpas, kaypi iñiqmasinchikkunam anchata yanapawanku, niwankum bibliamanta yachachiq riysinaypaq utaq watuq riysinaypaqpas. Yachachisqanku runakuna chaylla ñawparisqankuta qawasqaymi anchata yanapawarqa. Tukuy chaykunata qawaspaymi kusisqallaña kani”, nispa.

15. ¿Atichwanchu astakusqanchik lawpi kusisqa kayta?

¹⁵ Imaña haykaña kaptinpas, astakusqanchik lawpi kusisqa kaytaqa atichwanmi. Amayá nisunchu “imatapas mana allinta ruwarusqayraykuch astakunaypaqqa niwachkanku” nispaqa. Aswanqa Jehova Diospa yanapawasqanchikpi yuyaymanaspayá hinalla willakusun. Ñawpaq tiempopi iñiqkunatayá qatipakusun, paykunaqa maypiña tarikuspankupas utaq maymanña rispankupas Diosmantam hinalla willakurqaku (Hech. 8:1, 4). Hinalla Diosmanta willakuspaqa anchatam yanapakusun. Chaynam karqa tukuy tiemponkuwan Diosmanta willakuq iñiqmasinchikkunawan. Paykunataqa kasqanku nacionmanta lluqsinankupaqmi autoridadkuna nirqa. Chaymi paykunaqa astakurqaku huk lawmanña Diosmanta hinalla willakunankupaq. Astakusqanku lawpi anchata yanapakusqankuraykum manapas watapi mirarurqaku.

16. ¿Imam yanapawasun huk lawman astakuspapas kusisqa niwasqanchikta ruwananchikpaq?

¹⁶ Nehemiaspas judiokunatam nirqa Jehova Diospaq imapas ruwasqankuwan kusisqa kasqanku kallpanchananmanta (Neh. 8:10). Kusisqa kayninchikqa manam maypi kasqanchikmantachu, aswanqa Jehova Dioswan kuyachikusqanchikmantam. Chaynaqa, Jehova Diospiyá hapipakusun. Yuyarisuntaqyá runakunata tukuy sunqumanta yanapasqanchikwan kusisqa kasqanchikta. Jehova Diosqa yanapawasunmi ñawpaqpi hina kusisqa tarikunapaq imapas niwasqanchikta sunqumanta ruwaptinchikqa (Ecl. 7:10).

17. ¿Imatam yuyarinanchik?

¹⁷ Yuyarinanchiktaqmi Jehova Diosta yupaychayninchikqa wiñaypaq kasqanta, imapas ruwayninchikñataq tukuruqlla kasqanta. Kay pacha huertaña kaptinqa manapaschá ruwasunñachu kunan ruwasqanchikkunataqa. Alexeypas ninmi kunan ruwasqankuna hamuq tiempopaq yanapasqanta. Ninraqmi: “Ñuqaqa yacharqanim Jehova Diosmantaqa, manataqmi iskayrayanichu kay pacha huertayananmantapas, ichaqa ‘nirqanim haykapichiki chayqa kanqa’ nispa. Kunanmi ichaqa kaychallapiña kasqanta musyakuni”, nispa (Hech. 2:25). Imapiña yanapakuspapas, hinallayá Jehova Diospi hapipakusun. Payqa manam haykaqpas saqiwasunchu, aswanmi yanapawasun maypiña kaspapas kusisqa, imapas ruwaypi hinalla yanapakunapaq (Is. 41:13).