1-3. Соске несаве полновремена слуге мора сине те чхинавен пле задачаја?

ОТКЕДА накхле 21 берш ки мисионерско служба, о Роберти хем лескири ромни и Мери доживинѓе бари промена ко живото. Ола мора сине те чхинавен пле задачаја те шај те грижинен пе пумаре пхуре родителенге колен со сине лен проблемија састипаја. О Роберти хем и Мери вакерена: „Иако уживинѓем ки мисионерско служба, спремно прифатинѓем те грижина амен башо амаре родителија. Ама, адалеске со бут заманглем о тхан коте со служинѓем, сине аменге пхаро со мора сине те џа аменге“.

² О Вилијам хем и Тереза вакерена: „Кеда дознајнѓем кај адалеске со иси амен проблемија састипаја ка нашти више те ачхова ки амари задача, почминѓем те рова. Амаро суно те служина е Јеховаске ки јавер пхув завршинѓа“.

³ О Алексеј вакерела: „Џанаја сине кај о властија мангена те пханден и подружница коте со служинава сине. Сепак сием сине вознемириме кеда случинѓа пе адава хем кеда мора сине те икљова таро Бетел“.

4. Кола пучиба ка дикха ки акаја статија?

⁴ Освен акала примерија, бут полновремена слуге, коте сој вклучиме окола да со служинѓе ко Бетел, добинѓе неви задача. * Акале верна пхраленге хем пхењенге шај нане локхо со мора сине те чхинавен пле задачаја која со  бут мангена ла. Со шај те поможинел ленге те прилагодинен пе ко неве околностија? Сар шај ту те поможине ленге? О одговорија таро акала пучиба ка поможинен аменге кеда доживинаја промене ко амаро живото.

5. Ако тари несави причина мора те чхинава е задачаја, сар шај асавки промена те влијајнел упри аменде?

⁵ Бизи разлика дали сием ко Бетел или ки јавер полновремено служба, шај бут те поврзина амен е манушенцар, па чак е тханеа коте со служинаја. Адалеске, ако тари несави причина мора те чхинава е задачаја, осетинаја бари дукх ко вило. Бут фалинена аменге о пхраља хем о пхења хем секириме сием ленге, посебно ако мора сине те џа аменге соске иси прогонство (Мат. 10:23; 2. Кор. 11:28, 29). Исто аѓаар, о селибе ко јавер тхан шај те овел аменге бут пхаро соске шај ка ваљани те прилагодина амен ки јавер култура. Аѓаар шај те осетина амен чак ако ваљани те ирана амен кхере. О Роберти хем и Мери вакерена: „Адалеске со бут време служинѓем ко јавер тхан, осетинѓем амен сар странција ки амари пхув“. Несаве со мора те чхинавен пле задачаја шај таро јекх пути те овен лен финансиска проблемија. Шај нане те осетинен пе сигурна хем ка овен обесхрабриме. Со шај те поможинел ленге ки адаја ситуација?

6. Сар шај те ачхова паше е Јеховаја?

⁶ Ачхов паше е Јеховаја (Јак. 4:8). Сар шај те кере адава? Аѓаар со ка овел тут доверба кај ов шунела тле молитве (Пс. 65:2). Ко Псалм 62:8 пишинела: „Пхравен тумаро вило леске!“ О Јехова „чаче шај те керел бут повише таро са о буќа со родаја лестар или со замислинаја аменге“ (Еф. 3:20). Ов на дела амен само адава со родаја лестар ки молитва, него исто аѓаар шај те решинел амаре проблемија ко начин со нашти ни те замислина аменге.

7. а) Со ка поможинел аменге те ачхова паше е Јеховаја? б) Спрема Евреите 6:10-12, саво ка овел о резултати ако понадари да верно служинаја е Јеховаске?

⁷ Те шај те ачхове паше е Јеховаја, читин и Библија секова диве хем хор размислин баши лате. Јекх пхрал со служинѓа сар мисионери вакерела: „Редовно икер и Фамилијарно рат хем спремин тут башо состанокија, исто сар со кереа сине адава ки тли пурани задача“. Исто аѓаар, понадари да де тутар са те шај те проповедине о шукар хабери ко подрачје е неве собраниескоро. О Јехова на бистрела околен со понадари да верно служинена леске, чак ако нашти керена ки служба добором бут сар англедер. (Читин Евреите 6:10-12.)

8. Сар шај о лафија таро 1. Јованово 2:15-17 те поможинен аменге те живина едноставно?

 ⁸ Живин едноставно. Ма мукх о секирацие со анела о живото ко е Сатанаскоро свето те чхинавен тут те служине е Јеховаске (Мат. 13:22). Ма шун манушен кола со на служинена е Јеховаске или амален хем некас тари фамилија кола со шукар намераја вакерена туке кај ваљани те заработине повише паре те шај те овел тут пошукар живото. (Читин 1. Јованово 2:15-17.) Нека овел тут доверба ко Јехова кова со ветинела кај ко право време ка дел амен са со ваљани аменге. Ов ка поможинел аменге понадари да те овел амен зорали вера, андруно мир хем о материјална буќа кола со ваљанена аменге (Евр. 4:16; 13:5, 6).

9. а) Спрема Изреки 22:3, 7, соске тано важно те на кхува ко борчи бизи потреба? б) Со шај те поможинел аменге те ана мудра одлуке?

⁹ Ма кхув ко борчи бизи потреба. (Читин Изреки 22:3, 7.) О селибе шај бут те коштинел хем адалеске локхесте шај те заглавине ко борчија. Те шај те избегине адава, ма ле кредити или борчи те кине буќа кола со на ваљанена туке чаче. Кеда сием ки стресно ситуација, сар на пример, кеда грижинаја амен некаске таро амаре паше сој насвало, шај те овел аменге пхаро те проценина кобор ваљани чаче те ла борчи. Ко асавке ситуацие, на ваљани те бистра кај амаре молитве шај те поможинен аменге те ана мудра одлуке. О Јехова шај те одговоринел ко амаре молитве аѓаар со ка поможинел аменге понадари да те овел амен андруно мир те шај те ана и најшукар одлука со шај (Фил. 4:6, 7; 1. Пет. 5:7).

10. Сар шај те кера аменге неве амала?

¹⁰ Ачхов паше околенцар со влијајнена шукар упри туте. Тле паше амаленге, посебно околенге со сине ки слично ситуација, вакер ленге сар осетинеа тут хем кола пхарипа иси тут. Адава шај те поможинел туке те осетинен тут пошукар (Проп. 4:9, 10). Тле амала таро тхан коте со англедер служинѓан ка ачховен туке амала. А акана, ко неве околностија, ваљани те кере туке неве амала. Ма бистре, те шај те овен тут амала, ту да ваљани те ове амал. Сар шај те кере туке неве амала? Вакер е јаверенге о шуже искуствија тари задача со сине тут, соске аѓаар ка дикхен кобор бахтало керела тут и служба башо Јехова. Чак ако несаве таро собрание на хаљовена соске добором мангеа и полновремено служба, о јавера шај ка манген те џан пало тло пример хем ка овен туке шукар амала. Ама, ов обѕирно хем ма кер цело време лафи баши туте хем башо адава со са керѓан ки служба е Јеховаске, или башо несаве негативна чувствија со шај иси тут.

11. Сар шај те кере тло брако понадари да те овел бахтало?

¹¹ Ако мора сине те мукхе тли задача адалеске со насвалило тло брачно партнери, ма кривин ле башо адава. Тари јавер страна, ако керѓен адава башо проблемија тле састипаја, ма осетин тут криво хем те мислине кај разочаринѓан тле брачно партнере. Ма бистре — тумен  сиен „јекх тело“ хем англо Јехова ветинѓен кај ка грижинен тумен јекх јекхеске ко било саве околностија (Мат. 19:5, 6). Ако чхинавѓен е полновремено службаја адалеске со ка овел тумен бебе кова со на планиринѓен ле, трудинен тумен те џанел кај ов тано бут поважно тари задача со сине тумен. Често вакерен тумаре чхавеске кај дикхена ки лесте сар награда таро Девел (Пс. 127:3-5). Освен адава, вакерен леске о шуже искуствија со сине тумен ки полновремено служба. Аѓаар ка поттикнинен тумаре чхаве те џал пало тумаро пример хем те служинел е Јеховаске полновремено.

12. а) Сар шај те поможина е полновремена слугенге понадари да те керен пли служба? б) Сар шај те поможина ленге полокхе те прилагодинен пе ко неве околностија?

¹² Шукар тано со бут собранија хем поединција керена са со шај те поможинен околенге сој ки полновремено служба те ачховен ки пли задача. Ола керена адава аѓаар со охрабринена лен понадари да те керен пли задача, поможинена лен материјално, или грижинена пе некаске тари ленгири фамилија со живинела лендар дур (Гал. 6:2). Ако несаво полновремено слуга добинѓа неви задача хем тано префрлимо ко тло собрание, ма мислин кај адава случинѓа пе адалеске со на керела сине шукар и служба или адалеске со керѓа несави грешка. * Наместо адава, поможин леске полокхе те прилагодинел пе ко неве околностија. Сикав леске кај сиан бахтало со ало ко тло собрание хем пофалин ле баши лескири служба, чак ако нашти више те керел бут адалеске со иси ле проблемија састипаја. Запознајн тут леа пошукар. Трудин тут те сикљове таро са адава со џанела, тари лескири обука хем таро лескоро искуство.

13. Сар шај те поможина околенге со менинѓе пе ленгере околностија?

 ¹³ Ко почеток, околенге со менинѓе пе ленгере околностија шај ка ваљани тли помош те шај те аракхен тхан живибаске, бути хем јавера буќа со ваљани ленге. Освен адава, шај ка ваљани ленге о најневе информацие башо вообичаена буќа, сар на пример башо платибе данокија хем сар те овен осигуриме ко здравство. Ама најважно тано те хаљове ленгири ситуација. Шај лен или некас тари ленгири фамилија иси лен проблеми састипаја. Шај муло лендар некој сој ленге паше. * Исто аѓаар, иако на керена лафи башо адава, шај тане тажна адалеске со фалинена ленге о амала таро тхан коте со служинена сине англедер. Ваљани време те шај те икљовен ко крајо акале чувствонцар кола со шај те овен бут силна.

14. Сар поможинѓе о објавителија јекхе пхењаке те прилагодинел пе ко неве околностија?

¹⁴ Ако проповединеа ленцар хем охрабринеа лен тле шукар примереа, ка поможине ленге те прилагодинен пе. Јекх пхен која со служинѓа бут берша ки јавер пхув вакерела: „Ко тхан коте со англедер служинава сине, секова диве водинава сине библиска курсија. А акана ки служба едвај успејнава те читинав чак јекх стихо или те сикавав несаво видеоклипи. Ама о пхраља хем о пхења таро мло нево собрание викинена ман те џав ленцар ко ленгере повторна посете хем библиска курсија. Кеда дикхава сар адала ревна пхраља хем пхења водинена библиска курсија, адава поможинела манге те овел ман попозитивно стави башо подрачје. Сиклиљум сар те почминав разговор е манушенцар ко акава подрачје. Са акава поможинѓа манге палем те овав бахтали“.

15. Со ка поможинел туке успешно те кере тли служба ко неве околностија?

¹⁵ Ту шај успешно те кере тли служба ко неве околностија. Ма мислин кај и задача со сине тут англедер на кереа ла сине шукар или кај акана на сиан добором корисно. Размислин башо адава ко кобор начинија поможинела тут о Јехова акана хем проповедин понадари да. Џа пало пример е верна христијаненгоро  таро прво веко, кола со било коте те овен сине „ко секова тхан вакерѓе о хабери таро е Девлескоро лафи“ (Дела 8:1, 4). Ако понадари да проповединеа, шај те овен тут шуже искуствија. На пример, јекх група пионерија кола со сине палдиме тари пхув коте со служинена сине, селинѓе пе ки јекх пхув со сине паше коте со исто аѓаар сине бари потреба таро објавителија ки чхиб колате со о пионерија керена сине лафи. Башо само некобор масекија сине керде неве групе ки адаја чхиб кола со бут сигате бајрона сине.

16. Сар шај те ове бахтало ки служба со кереа ла ко неве околностија?

¹⁶ О Неемија вакерѓа е Евреенге кај о бахталипе со дела о Јехова керела те овен силна (Неем. 8:10). Амаро најбаро бахталипе ваљани те авел таро амаро амалипе е Јеховаја, а на тари амари задача, бизи разлика кобор бут мангаја ла. Адалеске, ако мангаја те ова бахтале, ваљани те ачхова паше е Јеховаја хем понадари да те молина амен те дел амен мудрост, водство хем поддршка. Ма бистре кај и задача со кереа ла сине англедер замангљан ла соске денѓан тутар са те шај те поможине е манушенге ко адава тхан. Ако цело вилеа кереа тли служба ко неве околностија, ка дикхе сар о Јехова поможинела туке те заманге акаја да задача (Проп. 7:10).

17. Со на ваљани те бистра баши задача со кераја ла акана?

¹⁷ На ваљани те бистра кај ка служина е Јеховаске ки цело вечност, ама и задача со кераја ла акана тани привремено. Ко нево свето шај сарине амен те добина неви задача. О Алексеј, коле со спомнинѓем ле ко почеток, верујнела кај о промене со доживинѓа лен ки служба башо Јехова поможинена леске те спреминел пе башо промене со ка овен ки иднина. Ов вакерела: „О Јехова хем о нево свето секогаш сине манге реална. Ама акана сиум панда попаше е Јеховаја хем уверимо сиум кај о нево свето тано бут паше“ (Дела 2:25). Значи, бизи разлика сави задача иси амен акана, те ачхова паше е Јеховаја. Ов никогаш нане те мукхел амен хем ка поможинел аменге те ова бахтале ки служба со кераја ла бизи разлика ко саве околностија сием (Иса. 41:13).