1-3. Soske nesave polnovremena sluge mora sine te čhinaven ple zadačaja?

OTKEDA nakhle 21 berš ki misionersko služba, o Roberti hem leskiri romni i Meri doživingje bari promena ko životo. Ola mora sine te čhinaven ple zadačaja te šaj te grižinen pe pumare phure roditelenge kolen so sine len problemija sastipaja. O Roberti hem i Meri vakerena: „Iako uživingjem ki misionersko služba, spremno prifatingjem te grižina amen bašo amare roditelija. Ama, adaleske so but zamanglem o than kote so služingjem, sine amenge pharo so mora sine te dža amenge“.

² O Vilijam hem i Tereza vakerena: „Keda doznajngjem kaj adaleske so isi amen problemija sastipaja ka našti više te ačhova ki amari zadača, počmingjem te rova. Amaro suno te služina e Jehovaske ki javer phuv završingja“.

³ O Aleksej vakerela: „Džanaja sine kaj o vlastija mangena te phanden i podružnica kote so služinava sine. Sepak siem sine voznemirime keda slučingja pe adava hem keda mora sine te ikljova taro Betel“.

4. Kola pučiba ka dikha ki akaja statija?

⁴ Osven akala primerija, but polnovremena sluge, kote soj vklučime okola da so služingje ko Betel, dobingje nevi zadača. * Akale verna phralenge hem phenjenge šaj nane lokho so mora sine te čhinaven ple zadačaja koja so  but mangena la. So šaj te pomožinel lenge te prilagodinen pe ko neve okolnostija? Sar šaj tu te pomožine lenge? O odgovorija taro akala pučiba ka pomožinen amenge keda doživinaja promene ko amaro životo.

5. Ako tari nesavi pričina mora te čhinava e zadačaja, sar šaj asavki promena te vlijajnel upri amende?

⁵ Bizi razlika dali siem ko Betel ili ki javer polnovremeno služba, šaj but te povrzina amen e manušencar, pa čak e thanea kote so služinaja. Adaleske, ako tari nesavi pričina mora te čhinava e zadačaja, osetinaja bari dukh ko vilo. But falinena amenge o phralja hem o phenja hem sekirime siem lenge, posebno ako mora sine te dža amenge soske isi progonstvo (Mat. 10:23; 2. Kor. 11:28, 29). Isto agjaar, o selibe ko javer than šaj te ovel amenge but pharo soske šaj ka valjani te prilagodina amen ki javer kultura. Agjaar šaj te osetina amen čak ako valjani te irana amen khere. O Roberti hem i Meri vakerena: „Adaleske so but vreme služingjem ko javer than, osetingjem amen sar strancija ki amari phuv“. Nesave so mora te čhinaven ple zadačaja šaj taro jekh puti te oven len finansiska problemija. Šaj nane te osetinen pe sigurna hem ka oven obeshrabrime. So šaj te pomožinel lenge ki adaja situacija?

6. Sar šaj te ačhova paše e Jehovaja?

⁶ Ačhov paše e Jehovaja (Jak. 4:8). Sar šaj te kere adava? Agjaar so ka ovel tut doverba kaj ov šunela tle molitve (Ps. 65:2). Ko Psalm 62:8 pišinela: „Phraven tumaro vilo leske!“ O Jehova „čače šaj te kerel but poviše taro sa o bukja so rodaja lestar ili so zamislinaja amenge“ (Ef. 3:20). Ov na dela amen samo adava so rodaja lestar ki molitva, nego isto agjaar šaj te rešinel amare problemija ko način so našti ni te zamislina amenge.

7. a) So ka pomožinel amenge te ačhova paše e Jehovaja? b) Sprema Evreite 6:10-12, savo ka ovel o rezultati ako ponadari da verno služinaja e Jehovaske?

⁷ Te šaj te ačhove paše e Jehovaja, čitin i Biblija sekova dive hem hor razmislin baši late. Jekh phral so služingja sar misioneri vakerela: „Redovno iker i Familijarno rat hem spremin tut bašo sostanokija, isto sar so kerea sine adava ki tli purani zadača“. Isto agjaar, ponadari da de tutar sa te šaj te propovedine o šukar haberi ko podračje e neve sobranieskoro. O Jehova na bistrela okolen so ponadari da verno služinena leske, čak ako našti kerena ki služba doborom but sar angleder. (Čitin Evreite 6:10-12.)

8. Sar šaj o lafija taro 1. Jovanovo 2:15-17 te pomožinen amenge te živina ednostavno?

 ⁸ Živin ednostavno. Ma mukh o sekiracie so anela o životo ko e Satanaskoro sveto te čhinaven tut te služine e Jehovaske (Mat. 13:22). Ma šun manušen kola so na služinena e Jehovaske ili amalen hem nekas tari familija kola so šukar nameraja vakerena tuke kaj valjani te zarabotine poviše pare te šaj te ovel tut pošukar životo. (Čitin 1. Jovanovo 2:15-17.) Neka ovel tut doverba ko Jehova kova so vetinela kaj ko pravo vreme ka del amen sa so valjani amenge. Ov ka pomožinel amenge ponadari da te ovel amen zorali vera, andruno mir hem o materijalna bukja kola so valjanena amenge (Evr. 4:16; 13:5, 6).

9. a) Sprema Izreki 22:3, 7, soske tano važno te na khuva ko borči bizi potreba? b) So šaj te pomožinel amenge te ana mudra odluke?

⁹ Ma khuv ko borči bizi potreba. (Čitin Izreki 22:3, 7.) O selibe šaj but te koštinel hem adaleske lokheste šaj te zaglavine ko borčija. Te šaj te izbegine adava, ma le krediti ili borči te kine bukja kola so na valjanena tuke čače. Keda siem ki stresno situacija, sar na primer, keda grižinaja amen nekaske taro amare paše soj nasvalo, šaj te ovel amenge pharo te procenina kobor valjani čače te la borči. Ko asavke situacie, na valjani te bistra kaj amare molitve šaj te pomožinen amenge te ana mudra odluke. O Jehova šaj te odgovorinel ko amare molitve agjaar so ka pomožinel amenge ponadari da te ovel amen andruno mir te šaj te ana i najšukar odluka so šaj (Fil. 4:6, 7; 1. Pet. 5:7).

10. Sar šaj te kera amenge neve amala?

¹⁰ Ačhov paše okolencar so vlijajnena šukar upri tute. Tle paše amalenge, posebno okolenge so sine ki slično situacija, vaker lenge sar osetinea tut hem kola pharipa isi tut. Adava šaj te pomožinel tuke te osetinen tut pošukar (Prop. 4:9, 10). Tle amala taro than kote so angleder služingjan ka ačhoven tuke amala. A akana, ko neve okolnostija, valjani te kere tuke neve amala. Ma bistre, te šaj te oven tut amala, tu da valjani te ove amal. Sar šaj te kere tuke neve amala? Vaker e javerenge o šuže iskustvija tari zadača so sine tut, soske agjaar ka dikhen kobor bahtalo kerela tut i služba bašo Jehova. Čak ako nesave taro sobranie na haljovena soske doborom mangea i polnovremeno služba, o javera šaj ka mangen te džan palo tlo primer hem ka oven tuke šukar amala. Ama, ov obzirno hem ma ker celo vreme lafi baši tute hem bašo adava so sa kergjan ki služba e Jehovaske, ili bašo nesave negativna čuvstvija so šaj isi tut.

11. Sar šaj te kere tlo brako ponadari da te ovel bahtalo?

¹¹ Ako mora sine te mukhe tli zadača adaleske so nasvalilo tlo bračno partneri, ma krivin le bašo adava. Tari javer strana, ako kergjen adava bašo problemija tle sastipaja, ma osetin tut krivo hem te misline kaj razočaringjan tle bračno partnere. Ma bistre — tumen  sien „jekh telo“ hem anglo Jehova vetingjen kaj ka grižinen tumen jekh jekheske ko bilo save okolnostija (Mat. 19:5, 6). Ako čhinavgjen e polnovremeno službaja adaleske so ka ovel tumen bebe kova so na planiringjen le, trudinen tumen te džanel kaj ov tano but považno tari zadača so sine tumen. Često vakeren tumare čhaveske kaj dikhena ki leste sar nagrada taro Devel (Ps. 127:3-5). Osven adava, vakeren leske o šuže iskustvija so sine tumen ki polnovremeno služba. Agjaar ka pottikninen tumare čhave te džal palo tumaro primer hem te služinel e Jehovaske polnovremeno.

12. a) Sar šaj te pomožina e polnovremena slugenge ponadari da te keren pli služba? b) Sar šaj te pomožina lenge polokhe te prilagodinen pe ko neve okolnostija?

¹² Šukar tano so but sobranija hem poedincija kerena sa so šaj te pomožinen okolenge soj ki polnovremeno služba te ačhoven ki pli zadača. Ola kerena adava agjaar so ohrabrinena len ponadari da te keren pli zadača, pomožinena len materijalno, ili grižinena pe nekaske tari lengiri familija so živinela lendar dur (Gal. 6:2). Ako nesavo polnovremeno sluga dobingja nevi zadača hem tano prefrlimo ko tlo sobranie, ma mislin kaj adava slučingja pe adaleske so na kerela sine šukar i služba ili adaleske so kergja nesavi greška. * Namesto adava, pomožin leske polokhe te prilagodinel pe ko neve okolnostija. Sikav leske kaj sian bahtalo so alo ko tlo sobranie hem pofalin le baši leskiri služba, čak ako našti više te kerel but adaleske so isi le problemija sastipaja. Zapoznajn tut lea pošukar. Trudin tut te sikljove taro sa adava so džanela, tari leskiri obuka hem taro leskoro iskustvo.

13. Sar šaj te pomožina okolenge so meningje pe lengere okolnostija?

 ¹³ Ko početok, okolenge so meningje pe lengere okolnostija šaj ka valjani tli pomoš te šaj te arakhen than živibaske, buti hem javera bukja so valjani lenge. Osven adava, šaj ka valjani lenge o najneve informacie bašo voobičaena bukja, sar na primer bašo platibe danokija hem sar te oven osigurime ko zdravstvo. Ama najvažno tano te haljove lengiri situacija. Šaj len ili nekas tari lengiri familija isi len problemi sastipaja. Šaj mulo lendar nekoj soj lenge paše. * Isto agjaar, iako na kerena lafi bašo adava, šaj tane tažna adaleske so falinena lenge o amala taro than kote so služinena sine angleder. Valjani vreme te šaj te ikljoven ko krajo akale čuvstvoncar kola so šaj te oven but silna.

14. Sar pomožingje o objavitelija jekhe phenjake te prilagodinel pe ko neve okolnostija?

¹⁴ Ako propovedinea lencar hem ohrabrinea len tle šukar primerea, ka pomožine lenge te prilagodinen pe. Jekh phen koja so služingja but berša ki javer phuv vakerela: „Ko than kote so angleder služinava sine, sekova dive vodinava sine bibliska kursija. A akana ki služba edvaj uspejnava te čitinav čak jekh stiho ili te sikavav nesavo videoklipi. Ama o phralja hem o phenja taro mlo nevo sobranie vikinena man te džav lencar ko lengere povtorna posete hem bibliska kursija. Keda dikhava sar adala revna phralja hem phenja vodinena bibliska kursija, adava pomožinela mange te ovel man popozitivno stavi bašo podračje. Sikliljum sar te počminav razgovor e manušencar ko akava podračje. Sa akava pomožingja mange palem te ovav bahtali“.

15. So ka pomožinel tuke uspešno te kere tli služba ko neve okolnostija?

¹⁵ Tu šaj uspešno te kere tli služba ko neve okolnostija. Ma mislin kaj i zadača so sine tut angleder na kerea la sine šukar ili kaj akana na sian doborom korisno. Razmislin bašo adava ko kobor načinija pomožinela tut o Jehova akana hem propovedin ponadari da. Dža palo primer e verna hristijanengoro  taro prvo veko, kola so bilo kote te oven sine „ko sekova than vakergje o haberi taro e Devleskoro lafi“ (Dela 8:1, 4). Ako ponadari da propovedinea, šaj te oven tut šuže iskustvija. Na primer, jekh grupa pionerija kola so sine paldime tari phuv kote so služinena sine, selingje pe ki jekh phuv so sine paše kote so isto agjaar sine bari potreba taro objavitelija ki čhib kolate so o pionerija kerena sine lafi. Bašo samo nekobor masekija sine kerde neve grupe ki adaja čhib kola so but sigate bajrona sine.

16. Sar šaj te ove bahtalo ki služba so kerea la ko neve okolnostija?

¹⁶ O Neemija vakergja e Evreenge kaj o bahtalipe so dela o Jehova kerela te oven silna (Neem. 8:10). Amaro najbaro bahtalipe valjani te avel taro amaro amalipe e Jehovaja, a na tari amari zadača, bizi razlika kobor but mangaja la. Adaleske, ako mangaja te ova bahtale, valjani te ačhova paše e Jehovaja hem ponadari da te molina amen te del amen mudrost, vodstvo hem poddrška. Ma bistre kaj i zadača so kerea la sine angleder zamangljan la soske dengjan tutar sa te šaj te pomožine e manušenge ko adava than. Ako celo vilea kerea tli služba ko neve okolnostija, ka dikhe sar o Jehova pomožinela tuke te zamange akaja da zadača (Prop. 7:10).

17. So na valjani te bistra baši zadača so keraja la akana?

¹⁷ Na valjani te bistra kaj ka služina e Jehovaske ki celo večnost, ama i zadača so keraja la akana tani privremeno. Ko nevo sveto šaj sarine amen te dobina nevi zadača. O Aleksej, kole so spomningjem le ko početok, verujnela kaj o promene so doživingja len ki služba bašo Jehova pomožinena leske te spreminel pe bašo promene so ka oven ki idnina. Ov vakerela: „O Jehova hem o nevo sveto sekogaš sine mange realna. Ama akana sium panda popaše e Jehovaja hem uverimo sium kaj o nevo sveto tano but paše“ (Dela 2:25). Znači, bizi razlika savi zadača isi amen akana, te ačhova paše e Jehovaja. Ov nikogaš nane te mukhel amen hem ka pomožinel amenge te ova bahtale ki služba so keraja la bizi razlika ko save okolnostija siem (Isa. 41:13).