ČLANKO PROUČIBASE 34
Sar te ove bahtalo ked meninena pe teklje okolnostija?
O Devel nane nepravedno te bistrel odova so čerdžen hem o mangipe kova mothovdžen premalo oljeso nav (JEVR. 6:10)
DŽILI 38 Bog će te ojačati
SOSTAR KA VAČERA *
1-3. Sose disave morandilje te čhinaven pi služba?
„SAR misionarija služindžam 21 berš. Palo odova, amare roditeljija naborsalje“, phenena o Robert hem i Meri Džo. „Amendže hine drago so šaj te brinina amen oljendar. Ama, hine amendže but pharo te mukha o than kova ulo amaro čher“.
2 „Ked haljiljam so sebepi amaro sastipe našti te irina amen ki phuv kuri služindžam, amen rundžam“, phenena o Vilijam hem i Teri. „Amaro suno te služina e Jehovase ki aver phuv, našaldilo“.
3 „Amen džandžam so amare protivnikija mangena te phanen o Betel kuri me služindžum“, phenela o Aleksej. „Ama, ipak hine maje but pharo ked odova ulo hem morandiljam te ikljova kotar Betel“.
4. Kotar kola pučiba ka vačera ko akava članko?
4 Asavke iskustvija hine ljen but phralja hem phenja kola hine ko Betel hem avera koljengo zaduženje menindža pe ja kola morandilje te mukhen i specijalno punovremeno služba. * Akalje phraljendže hem phenjendže šaj te ovel but pharo sose manglje odova so čerdže. So šaj te pomožini ljen te prihvatinen i promena? Sar šaj tu te pomožine ljen? O odgovorija ko akala pučiba šaj te pomožinen sarinendže ked amare okolnostija meninena pe.
SO TE ČERA KED AVENA O PROMENE
Sose šaj te ovel pharo e phraljendže ki punovremeno služba ked valjani te džan? (Dikh o 5. odlomko) *
5. Sar šaj o promene te utičinen upro amende?
5 Bilo te služina ki punovremeno služba ko područje ja ko Betel, amaro mangipe premalo manuša ja čak premalo than kuri služinaja, šaj sigate te barjol. Odoljese, amaro vilo šaj te ovel phago ked valjani te dža. Amendže nedostajinena amare phralja hem phenja hem brininaja amen oljendže, posebno ako dželjam sebepi o progonstvo (Mat. 10:23; 2. Kor. 11:28, 29). Šaj te ovel but pharo te dža ko aver than, sebepi so mora te sikljova i nevi kultura. Isto adžahar, šaj te ovel pharo čak ked irinaja amen čhere. O Robert hem i Meri Džo phenena: „Amari kultura but menindža pe, čak bisterdžam sar te propovedina ki amari čhib. Ked aljam čhere, osetindžam amen sar strancija“. Disave sebepi o promene šaj iznenada te ovel ljen finansijska problemija. Tegani, šaj te oven obeshrabrime ja šaj te osetinen pe so nane sigurna ja bezbedna. So šaj te pomožini ljen?
But tano važno te ačhova uzo Jehova hem te oslonina amen upro ljeste (Dikh o 6. hem 7. odlomko) *
6. Sar šaj te ačhova paše e Jehovaja?
6 Ačhov paše e Jehovaja. (Jak. 4:8). Sar šaj te čera odova? Adžahar so ka ovel amen poverenje upro „okova so šunela o molitve“ (Ps. 65:2). „Anglo ljeste phraven tumaro vilo“, pisini ko Psalam 62:8. O Jehova šaj te čerel „pobuter kotar sa so molinaja lje ja zamislinaja“ (Ef. 3:20). O Jehova na samo so ka del amen odova so molinaja lje ki molitva, već šaj te rešini amare problemija ko način kova niked na adžičerdžam.
7. (a) So šaj te pomožini amen te ačhova paše e Jehovaja? (b) Premalo Jevrejima 6:10-12, so ka ovel ako nastavinaja verno te služina e Jehovase?
7 Te šaj te ačhove paše e Jehovaja, čitin i Biblija svako dive hem razmislin odoljestar. Jekh phral kova angljeder hine misionari phenela: „Čer tuče plan ked ka ovel tut porodično proučibe hem ked ka spremine tut e sastankonendže, sar so čerdžan angljeder“. Isto adžahar, dža ki služba e phraljencar kotar tiklji nevi skupština. O Jehova na bistrela okoljen so nastavinena verno te služinen oljese, čak iako našti te čeren sa so čerdže angljeder. (Čitinen Jevrejima 6:10-12.)
8. Sar odova so pisini ki 1. Jovanova 2:15-17 šaj te pomožini tut o najvažna buča te oven tuče ko prvo than?
8 O najvažna buča nek oven tuče ko prvo than. Ma mukh akalje svetose brige te čhinaven tut te služine e Jehovase (Mat. 13:22). Ma šun e manušen kola na služinena e Jehovase, te amaljen ja te familija kola phenena so valjani te zaradine but pare te šaj to dživdipe te ovel pošukar. (Čitinen 1. Jovanova 2:15-17.) Nek ovel tut poverenje ko Jehova, kova dela po lafi so ka del tut odova so valjani tuče ko pravo vreme. Ov ka pomožini tut tiklji vera te ovel zoralji hem te ovel tut mir (Jevr. 4:16; 13:5, 6).
9. (a) Premalo Poslovice 22:3, 7, sose na valjani te khuva ko dugo ako nane potrebno? (b) So šaj te pomožini amen te ana mudra odluke?
9 Ma khuv ko dugo ako nane potrebno. (Čitinen Poslovice 22:3, 7.) Šaj but lokho te khuva ko dugo ked valjani te selina amen. Odoljese, ma khuv ko dugo te čine o buča kola na valjanena tuče. Ked hijam ki stresno situacija, na primer ked brininaja amen nekastar koj tano nabormo ki amari porodica, šaj te ovel but pharo te odlučina kobor pare te pozajmina. Ko asavke situacije, ma bistri so i molitva šaj te pomožini tuče te ane mudra odluke. O Jehova šaj te odgovorini ki tiklji molitva adžahar so ka del tut mir te šaj te ane šukar odluke (Fil. 4:6, 7; 1. Petr. 5:7).
10. Sar šaj te ovel amen neve amala?
10 Ov paše e manušencar kola šukar utičinena upro tute. Vačer teklje najpaše amaljendže sar osetineja tut hem kola pharipa nakheja, posebno okoljendže kola hine ki tiklji situacija. Odova šaj but te pomožini tut (Prop. 4:9, 10). O amala kola hine tut odothe kuri služindžan ka ačhon te amala. Ama, akana valjani te arakhe neve amaljen. Ma bistri, so ako mangeja te ovel tut amala, tu valjani te ove amal. Šar šaj te čere odova? Vačer teklje šukar iskustvija kola hine tut te šaj hem on te osetinen tiklji radost. Čak, iako disave na ka haljon sose odobor mangeja i punovremeno služba, avera šaj ka mangen te džanen pobuter hem šaj ka oven teklje šukar amala. Ama, ma vačer but tutar ja ando buča kola tu čerdžan ki služba e Jehovase ja ando negativna osećanja kola šaj isi tut.
11. Sar šaj hem ponodri to brak te ovel bahtalo?
11 Ako valjani te mukhe i punovremeno služba sebepi so to bračno drug naborsalo, tegani ma krivin olje. Ama, ako tu hijan nabormo ma krivin kokri tut hem ma mislin so odoljeja razočarindžan te rome ja te romnja. Ma bistri, tumen hijen jekh telo, hem ked ljeljen tumen, obećindžen e Jehovase so ka brininen jekh jekhestar so god te ovel (Mat. 19:5, 6). Ako valjani te mukhen i punovremeno služba sebepi so ka ovel tumen beba, a na planirindžen odova, tegani tumaro čhavo valjani te džanel so ov tano považno nego i punovremeno služba. Uverinen tumare čhave so tumen dikhena lje sar „nagrada“ ando Devel (Ps. 127:3-5). Isto adžahar, vačeren ljese tumare šukar iskustvija kola hine tumen ki punovremeno služba. Ked čerena odova šaj te pomožinen tumare čhavese te služini e Jehovase punovremeno sar so tumen čerdžen.
SAR AVERA ŠAJ TE POMOŽINEN?
12. (a) Sar šaj te pomožina okoljendže kola tane ki punovremeno služba te ačhon ki pi služba? (b) Sar šaj te pomožina ljen te prilagodinen pe?
12 But skupštine sar hem disave phralja hem phenja čerena sa so šaj te pomožinen okoljendže kola tane ki punovremeno služba hem ponodri te ačhon ki pi služba. On čerena odova adžahar so hrabrinena ljen, pomožinena ljen materijalno ja pomožinena ljen te brininen pe nekastar kotar oljengi porodica (Gal. 6:2). Ako disave više nane ki punovremeno služba hem akana tane ki tiklji skupština, ma mislin so on na čerdže diso šukar ja so diso pogrešindže. * Nego trudin tut te pomožine ljen te prilagodinen pe. Mothov ljendže soj tano tuče drago soj tane odothe hem pohvalin ljen, iako akana sebepi po sastipe našti te čeren odova so čerdže angljeder. De sa tutar šukar te pendžare ljen. Sikljov oljendar hem ando oljenge iskustvija.
13. Sar šaj te pomožina okoljendže so nane više ki punovremeno služba?
13 Okoljendže so nane više ki punovremeno služba valjani pomoć te arakhen pese čher, buti ja te pendžaren i diz hem avera buča. Isto adžahar, valjani oljendže pomoć te arakhen kuri tano o doktori ja o pazari. Ama, odova so najviše valjani ljendže tano te haljove ljen, a na te žaline ljen. On šaj borinena pe odoljeja so on ja neko kotar oljengi familija tano nabormo. Šaj tane dukhavde sebepi so neko mulo oljendar. * Isto adžahar, iako šaj na vačerena odoljestar, on tane možda tužna sebepi so nedostajinena oljendže oljenge amala. Ka valjani oljendže but vreme te borinen pe peklje osećanjencar hem te navikninen pe.
14. Sar o objaviteljija pomožindže jekha phenjače te prilagodini pe ko neve okolnostija?
14 Isto adžahar, tiklji podrška hem toklo primer ka pomožini ljen te prilagodinen pe ko neve okolnostija. Jekh phen koja but berša služindža ki strano phuv phenela: „Odothe kuri služindžum angljeder, svako dive hine man kursija. A akana tano pharo čak te phravav nekase i Biblija ja te mukhav dijekh film ki služba. Ama, o objaviteljija vičinena man ko oljenge posete ja kursija. Ked dikhava so akala revna hem hrabra phralja isi ljen kursija kola napredujinena, odova pomožini man te razmislinav pozitivno kotar manuša ko tereni. Sikljiljum sar te počminav te vačerav e manušencar ko nevo tereni. Sa akava pomožini man paljem te ovav bahtalji.“
NASTAVIN TE DE TOKLO NAJŠUKAR
Dikh sar šaj pana pošukar te čere i služba ko toklo nevo tereni (Dikh o 15. hem 16. odlomko) *
15. Sar šaj te ove bahtalo hem ko neve okolnostija?
15 Šaj te ove bahtalo hem ko neve okolnostija. Ma mislin so i promena mothovi so angljeder na čerdžan o buča šukar ja so akana na hijan odobor vredno. Razmislin sar o Jehova akana pomožini tut hem nastavin te propovedine. Oponašin o primer ando hrišćanja ko prvo veko. On kuri god „dželje [...] vačerdže o šukar haberi“ (Dela 8:1, 4). Odova so tu deja sa tutar ki služba šaj te pomožini averendže. Na primer, o pionirija kola hine paldime kotar jekh phuv, selindže pe ki aver phuv kuri hine potreba te propovedini pe ki oljengi čhib. Palo nekobor masek, hine baro porast hem ulje grupe ki čhib koja vačerena akala pionirija.
16. Sar šaj te ovel tut radost ki tiklji nevi služba?
16 „E Jehovasi radost tani tumari snaga“ (Nem. 8:10). Amen valjani te ova radosna sebepi amaro šukar odnos e Jehovaja, a na sebepi i služba koja čeraja, kobor god mangaja la. Odoljese, ako mangaja te ovel amen radost valjani te ačhova paše oljeja hem te oslonina amen upro ljeste. Ma te bistre, so o zadatko kova čerdžan angljeder mangljan lje odoljese so dindžan sa tutar te pomožine e manušendže uduri. Isto adžahar, hem pana ponodri celone teklje viljeja čer adžahar sar so čerdžan hem dikh sar o Jehova akana pomožini tut te mange hem akava zadatko (Prop. 7:10).
17. Sa na valjani niked te bistra?
17 Amen na valjani te bistra so e Jehovase ka služina večno, a o zadatko kova čeraja tano samo privremeno. Ko raj, sarinenge zadatkija ka meninen pe. O Aleksej, koljestar vačerdžam ki početka, phenela so o promene kola akana isi lje spreminena lje aso promene kola ka oven ki budućnost. Ov phenela: „Uvek džandžum so o Jehova hem o nevo sveto tane diso čače, ama nesar dičhilje maje but dur. Ama, akana o Jehova tano maje anglo jačha hem osetinava so o nevo sveto tano but paše“ (Dela 2:25). Kova god zadatko te čera, amen mangaja te ova paše e Jehovaja. Ov niked na ka mukhel amen, nego ka pomožini amen te arakha radost ko so sa čeraja oljese (Is. 41:13).
DŽILI 90 Hrabrimo jedni druge
^ odl. 5 Disavo puti, o phralja hem o phenja našti više te oven ki specijalno punovremeno služba ja šaj dobinena nevo zaduženje. Ko akava članko ka vačeri pe ando pharipa kola on nakhena hem sar šaj amen te pomožina ljen ko oljenge neve okolnostija. Isto adžahar, ka dikha sar šaj avera te ohrabrinen ljen hem te pomožinen ljen, hem kola načelija šaj te pomožinen amen ked avena disave promene ko dživdipe.
^ odl. 4 Isto hem sebepi o phuripe, but phralja dindže peklje zaduženja e terne phraljendže. Dikh ki Stražarsko kula kotar septembar 2018, o članko „Jehova ceni vernost starije braće“ hem oktobar 2018, o članko „Sačuvajmo unutrašnji mir uprkos promenama“.
^ odl. 12 O starešine andi skupština kuri on služindže valjani te pisinen o ljil ando preseljenje, te šaj so posig paljem te služinen sar pionirija, starešine ja sluge pomoćnikija.
^ odl. 13 Dikh i serija ando člankija „Kako prebroditi gubitak voljene osobe“: „Kad je tuga prevelika“, „Šta možete očekivati“, „Kako se izboriti s tugom — šta već sada možete učiniti“, „Prava uteha za one koji tuguju“ ko Probudite se!, br. 3 kotar 2018.
^ odl. 57 SO DIKHAJA KO SLIKE: Jekh bračni par morandilo te mukhel piklji misionarsko služba hem ljendže tano pharo dži pozdravinena pe e skupština.
^ odl. 59 SO DIKHAJA KO SLIKE: Ked akava bračno par irindža pe čhere, on viljestar molinena pe e Jehovase te pomožini ljen te borinen pe peklje problemencar.
^ odl. 61 SO DIKHAJA KO SLIKE: Sebepi so oslonindže pe ko Jehova, akava bračno par irindža pe ki punovremeno služba. On koristinena i čhib koja sikljilje ked hine misionarija te vačeren o šukar haberi okoljendže kola našlje ki oljengi phuv.
