1-3. Hi swini swin’we swa swivangelo leswi nga yentxaka vatizreli va nkama hinkwawu va suka ka swiyavelo swavu?

A NTSRHAKU ka ku tizra 21 wa malembe swanga vazrumiwa, Robert na Mary Jo va sindzriseke ku tsrhika xiyavelo xavu akuva va ya hlayisa vapswele vavu va mune lava a va vabya. Va titwise kuyini ke? Va li: “Ka hine, ku hlayisa vapswele a swi li nkateko, kambe hi twe mbilu yi vavisa loko hi boheke ku suka hi siya mbangu lowu a hi wu zrandzra swinene.”

² William na Terrie na vone a va tizra a tikweni dzrin’wana. Va li: “Loko hi tive leswaku, hi kola ka mavabyi yezru, afa hi nge ti swi kota ku tlhelela ka xiyavelo xezru, hi dzrile ngopfu. Ku sukela khale afa hi navela ku tizrela Yehovha a tikweni dzrin’wana, kambe afa hi nge he na ku swi kota.”

³ Aleksey a a tizra Betele. A hi byela leswi: “Nambi leswi afaka hi swi tiva hi khale leswaku vaxanisi vezru afa va djula ku pfala Betele, loko swoswo swi yentxekile hi va hi sindzriseka ku suka hinkwezru, hi tlhaveke timbilu.”

4. Hi swini swivutiso leswi hi taka bula ha swone ka nhloko-mhaka leyi?

⁴ Handle ka vamakwezru lava, vona leswi yentxekeliki magidi-gidi ya swizro swa ndangu wa Betele ni vamakwezru van’wana lava yamukeliki swiyavelo swimpswha. * Ka vamakwezru lava va ku dumbeka, ku siya swiyavelo leswi a va swi zrandzra ngopfu a swi nabyali. Kutani va nga yentxa yini leswaku va kota ku titwananisa ni ku txintxa koloko? I yini leswi u nga swi yentxaka akuva u va pfuna? Tinhlamulo ta swivutiso leswo ti nga pfuna hinkwezru ku tiva leswi hi nga swi yentxaka loko hi kumana ni ku txintxa ka swiyimu a wuton’wini byezru.

5. Xana ku suka ka xiyavelo lexi hi xi toloveliki swi nga hi khumba hi ndlela yini?

⁵ Loko hi li ka ntizro wa nkama hinkwawu, ku nga va a nsin’wini kumbe a Betele, hi kuma vanghanu vanyingi hi tlhela hi dondzra ku zrandzra mbangu lowu hi tizrelaka ka wone. Kutani, loko swi vilela kuva hi suka hi xivangelo xa kukazri, hi nga ha twa mbilu yi vavisa. Hi xuva lava hi va siyiki hi tlhela hi vilela ha vone, ngopfu-ngopfu loko xivangelo lexi xi hi susiki ku ve ku xanisiwa. (Mt 10:23; 2Ko 11:28, 29) Handle ka leswo, ku yamukela xiyavelo ximpswha​—nambi ku tlhelela a kaya—​swi nga ha hi sindzrisa ku dondzrela mahanyela lamampswha. Robert na Mary Jo va li: “Afa hi nga ha tolovelanga mahanyela ya lomu hi kuleliki kone. Nambi ku txhumayela hi lidzrimi dzrezru afa swi hi lutukela. Afa hi titwa ingiki afa hi li vayeni.” Xikazratu xin’wana ku nga va swizralanganya swa timali leswi nga yimeliwangakiki. Leswo swi nga ha hi yentxa hi hlatiyela, hi txhava hi tlhela hi hela ntamu. I yini leswi nga hi pfunaka?

6. Xana hi nga byi tiyisa hi ndlela yini wunghanu byezru na Yehovha?

⁶ Tiyisa wunghanu byaku na Yehovha. (Yk 4:8) Xana hi nga swi yentxisa kuyini leswo? Hi ku dumba leswaku yene hakunene i ‘Muyingeli wa swikhongoto’. (Ps 65:2) Amapsalma 62:8 yi li: ‘Txhululani timbilu tenu mahlweni kwakwe.’ Yehovha a nga yentxa ku ‘tlula ni hinkwaswu leswi hi swi kombelaka ni leswi hi swi yanakanyaka’. (Ef 3:20) A nga hi nyiki ntsena leswi hi mu kombelaka ka swikhongoto swezru. Yehovha a nga tlhantlha swikazratu swezru hi ndlela leyi a hi nge ti txhuka hi yi pimisile.

7. a)I yini lexi taka hi pfuna ku tsrhama kusuhi na Yehovha? b) Hi ku ya hi Ba-Heberu 6:10-12, dzri tava dzrini bindzru dzra ku tama hi tizrela Yehovha hi ku dumbeka?

⁷ Akuva u tsrhama kusuhi na Yehovha, u fanela ku dondzra Matsralwa siku ni siku u tlhela u yanakanyisisa ha wone. Makwezru wa kukazri lweyi a a tizra swanga muzrumiwa a te: “Yana mahlweni u landzrisela xiyimiso xaku xa wugandzreli bya ndangu ni xa ku lulamisela mintlhanganu, hi ndlela leyi a wu yentxa ha yone ka xiyavelo xaku xa khale.” Nakambe, hlengela hi xitalu a ku zrezreni a bandleni dzraku dzra nyiwana. Yehovha a nga va dzrivali lava tamaka va mu tizrela hi ku dumbeka, nambi loko va nga ha swi koti ku yentxa hi lani a va yentxa ha kone khale.​—Dondzra Ba-Heberu 6:10-12.

8. Xana mazritu lama kumekaka ka 1 Yohan 2:15-17 ma nga ku pfuna hi ndlela yini ku hanya hi switsrongo?

⁸ Hanya hi switsrongo. U nga txhuki u pfumelela  minhlatiyelo ya misava ya Sathana yi “kamalata” ntizro lowu u wu yentxelaka Yehovha. (Mt 13:22) U nga pfumele ku wongiwa hi misava kumbe hi vanghanu ni maxaka lava pimisaka leswaku vo hi pfuna, leswaku u djula mali ya ku tala ka misava ya Sathana. (Dondzra 1 Yohan 2:15-17.) Dumba Yehovha, lweyi a dumbisaka ku hi nyika ‘a nkameni lowu fanekelaka’ hinkwaswu leswi hi swi vilelaka hi le moyeni, mbilwini ni le nyameni.​—Hb 4:16; 13:5, 6.

9. Hi ku ya hi Amaproverbia 22:3, 7, ha yini swi li swa lisima ku tivonela swikweneti leswi nga djulekiki, nakone i yini leswi nga hi pfunaka ku yentxa swiboho swa wutlhazri?

⁹ Tivonele swikweneti leswi nga djulekiki. (Dondzra Amaproverbia 22:3, 7.) Ku zruzra ku nga ha hi tekela mali, nakone swi nga ha nabyala leswaku hi pela ka swikweneti. Akuva u nga peli swikwenetini leswikulu, tivonele ku txeneka mali akuva u xava mintxhumu leyi u nga yi vilelikiki. Loko hi kamekile a mbilwini, ni loko hi hlayisa maxaka lawa ma vabyaka, swi nga ha hi bindzrela ku tiva leswaku hi fanela ku hamba xikweneti xa ku gama kwini. A swiyin’wini leswo, dzrimuka leswaku “ku khongota ni ku kombela” swi nga ku pfuna ku yentxa swiboho swa wutlhazri. Yehovha a ta hlamula swikhongoto swaku hi ku ku nyika ku zrula loku taka ‘bekisa mbilu yaku ni miyanakanyu yaku’, akuva u yentxa swiboho leswinene.​—Flp 4:6, 7; 1Pe 5:7.

10. Xana hi nga va kumisa kuyini vanghanu vampswha?

¹⁰ Yaka xinghanu ni vhanu vanene. Bula ni vanghanu lavanene hi leswi u titwisaka xiswone ni leswi u swi hanyiki, ngopfu-ngopfu lava viki ka swiyimu swa ku nyonxisa xikan’we ni swa ku kazrata ku fana na wene. Ku yentxa leswo swi nga ku tlema mbilu. (Ekl 4:9, 10) Vanghanu lava u va kumiki laha a wu tizrela kone va ta tama va va vanghanu vaku. Kambe swoswi, ka xiyavelo lexi u nga ka xone, u fanela ku djula vanghanu vampswha. Dzrimuka leswaku, akuva u kuma vanghanu, u fanela ku va ni xinghanu. Xana u nga swi yentxisa kuyini? Bula ni van’wana hi ndlela leyi Yehovha a ku tovokisiki ha yone, nakone va yentxe va swi vona leswaku wa nyonxa hi ku tizrela Yehovha. Nambi loko van’we a bandleni va nga swi twisisi leswaku ha yini u hisekela ntizro wa nkama hinkwawu, van’wana va nga kokiwa hi xikombiso xaku va va va ndzruluka vanghanu vaku. Kambe tivonele, akuva u nga tidjuleli lidzrumu hi leswi u kotiki ku swi yentxa, nakone u nga tsrhamele ku khanela hi mintxhumu ya ku xukuvalisa leyi u kumaniki na yone.

11. I yini leswi u nga swi yentxaka leswaku wukati byenu byi tama byi nyonxisa?

¹¹ Minkama yin’wana, swi nga ha sindzrisa leswaku vatekani va yima ntizro wa nkama hinkwawu hi mhaka ya leswi nuna kumbe nsati a vabyaka. Loko leswo swi ku yentxekelile, u nga zrwexe nkataku nandzru. Hi tlhelo dzrin’wana, loko ku li wene u vabyaka, u nga titwe nandzru, u pimisa leswaku u txhele nkataku tingana. Dzrimuka, n’wine mi ‘nyama yin’we’, nakone mi dumbise Yehovha leswaku mi ta hlayisana a swiyin’wini hinkwaswu. (Mt 19:5, 6) Handle ka leswo, swi  nga ha yentxeka leswaku vatekani va siya xiyavelo xavu hi mhaka ya leswi nsati a kumiki khuzri na va nga swi laviselanga. Loko leswo swi mi yentxekelile, pfunani n’wanenu ku vona leswaku yene i wa lisima ngopfu ku tlula xiyavelo lexi a mi li naxu. Mu tiyisekisani leswaku ka n’wine yene i ‘pfindla ledzri pfaka ka Yehovha’. (Ps 127:3-5) Hi nkama wun’we, mu bulelani mimfambu ya ku nyonxisa leyi mi yi kumiki ka xiyavelo xenu. Hi ku yentxa leswo mi nga pfuna n’wanenu ku tizrisa wutomi byakwe a ntizrweni wa nkama hinkwawu ku fana na n’wine.

12. a) Xana hi nga va pfuna hi ndlela yini vatizreli va nkama hinkwawu ku ya mahlweni ni swiyavelo swavu? b) I yini leswi hi nga swi yentxaka leswaku a ku txintxa kwavu ku va loku nyonxisaka?

¹² Swa nyonxisa ku vona leswi mabandla ni vamakwezru va ku siyana-siyana va swi yentxaka akuva va seketela vamakwezru lava nga ka ntizro wa nkama hinkwawu leswaku va tama va tizra a swiyavelweni swavu. Va yentxa leswo hi ku va kutxa leswaku va ya mahlweni ni ntizro wavu, hi ku va seketela hi tlhelo dzra timali kumbe hi mintxhumu leyi vonekaka. Handle ka leswo, va va pfuna hi ku va hlayisela swizro swa ndangu wavu. (Ga 6:2) Loko makwezru wa kukazri lweyi a nga ka ntizro wa nkama hinkwawu a txintxiwa leswaku a kumeka a bandleni dzraku, u nga pimise leswaku ku txintxa koloko ku vangiwe hi leswi a a nga wu hetisisi ha hombe ntizro wakwe kumbe hi kuva a hone swa kukazri. * A matsrhan’wini ya leswo, mu pfune ku yentxa leswaku ku txintxa kwakwe ku va loku nyonxisaka. Mu hoyozele hi lizrandzru u tlhela u mu kulungela hi ntizro lowu a wu yentxiki, nambi loko mavabyi ma mu sivela ku yentxa swa ku tala swoswi. Dzringisa ku mu tiva  ha hombe. U nga dondzra swa ku tala ka mfambu wakwe ni wutivi byakwe.

13. Hi swini swin’wana swa leswi hi nga va pfunaka ha swone lava va yamukeliki xiyavelo leximpswha?

¹³ A ku sunguleni, vamakwezru lava kumiki xiyavelo leximpswha, va nga ha djula mpfunu waku akuva va kuma ka ku tsrhama kone, swa ku famba ha swone, ntizro ni swin’wana swa ku hanya ha swone. Handle ka leswo, va nga ha djula ku tiva leswi yengetelekiki mayelanu ni timhaka ta siku ni siku, ta ku fana ni ku hakela tinemba kumbe ku kuma maseguru. Lexi ngopfu-ngopfu va xi djulaka i kuva hi va twisisa, ku nga li ku va tsretsra. Swi nga yentxeka leswaku vone hi ntshima va kazri va lwisana ni mavabyi kumbe va vabyeliwa hi xaka. Swi nga ha yentxeka mfuzri va li ku dzrileni ka muzrandzriwa wavu. * Nakambe nambi loko hi nga va voni, swi nga ha yentxeka va xukuvala hi leswi va nga ha hlangamelikiki ni ndangu wavu wa moya wa lomu a va tizrela kone. Ku hlula matitwela wolawo lama hlomulaka mbilu ma tlhela ma ku siya u pfilunganyekile i ntxhumu lowu tekaka nkama.

14. Hi swini leswi vazrezri va swi yentxiki akuva va pfuna makwezru mun’wana wa xisati akuva a tolovelana ni xiyavelo leximpswha?

¹⁴ Mpfunu waku ni xikombiso xaku swi nga pfuna vamakwezru loko va ha tolovelana ni xiyavelo xavu leximpswha. Makwezru mun’wana wa xisati lweyi a tizriki malembe ya ku tala ka tiko dzrin’wana a li: “Ka xiyavelo xanga xa ku sungula, afa ni fambisa swidondzro swa Bibele siku ni siku. Kambe ka xiyavelo leximpswha, afa ni nga li na wone mukhandlu wa ku pfula Bibele kumbe wa ku kombisa vídeo a nsin’wini. Kambe vazrezri va bandla dzranga ledzrimpswha va ni zrambe leswaku hi yela timpinda kun’we ni swidondzro swavu. Loko ni vone vamakwezru lavo va xinuna ni va xisati lava nga ni nkhinkhi ni xixixi va fambisa swidondzro leswi kombisaka nhluvuku, ni sungule ku va ni vonela ledzrinene. Ni dondzre ku sungula mabulu ka muganga lowumpswha. Leswo hinkwaswu swi ni yentxe ni kuma ku nyonxa.”

15. U nga humelelisa kuyini ka xiyavelo xaku leximpswha?

¹⁵ U nga swi kota ku humelela ka xiyavelo leximpswha. U nga pimise leswaku ku txintxa i ku ba hansi kumbe ku tlhelela ntsrhaku. Vona tindlela  ta ku hambana-hambana leti Yehovha a ku pfunaka ha tone u va u ya mahlweni u zrezra. Yetisa vakriste va ku dumbeka va dzana dzra ku sungula. Kwini na kwini lomu a va li kone ‘afa va famba hi matiko, va hlaya evhangeli’. (Min 8:1, 4) Minzamu yaku ya ku ya mahlweni u zrezra yi nga beka mihandzru leyinene. Hi xikombiso, maphayona lawa ma hlongoliwiki tikweni dzra kukazri ma zruzrele ka tiko dzrin’wana dzra le kusuhi lani a ku ni xivileleko xikulu xa vatizri lava a va khanela lidzrimi dzra tiko ledzri ma hlongoliwiki ka dzrone. Ndzreni ka tiwhetinyana, ku simekiwe mintlawa yinyingi hi lidzrimi ledzri maphayona a ma zrezra ha dzrone.

16. U nga ku kumisa kuyini ku tsrhava ka xiyavelo xaku leximpswha?

¹⁶ ‘Ku titsrhavela ku Yehovha hi ntamu wenu.’ (Neh 8:10) I ntiyiso leswaku hi nga va hi xi zrandzra ngopfu xiyavelo xezru. Kambe a ku tsrhava kweru lokukulu ku fanela kuva ka ku tizrela Yehovha ku nge ka ntizro lowu hi wu yentxaka. Xileswo, yana mahlweni u famba na Yehovha na u tlhela u mu kombela leswaku a ku nyika wutlhazri, a ku kongomisa ni ku ku seketela. Dzrimuka leswaku u kote u zrandzra xiyavelo xaku xa khale hi leswi a wu yentxa hinkwaswu leswi u swi kotaka akuva u pfuna vhanu. Kutani yana mahlweni u yentxa hinkwaswu leswi u nga swi kotaka ka xiyavelo xaku leximpswha kutani u vona leswi Yehovha a taka ku pfunisa xiswone akuva u xi zrandzra.​—Ekl 7:10.

17. I yini leswi hi fanelaka ku swi dzrimuka mayelanu ni xiyavelo xezru xa swoswi?

¹⁷ Hi fanela ku dzrimuka leswaku a ntizro wezru ka Yehovha i wa hi la ku nga helikiki, kambe a xiyavelo xezru xa swoswi i xa nkamanyana. A misaveni leyimpswha, swi nga ha yentxa leswaku hinkwezru hi txintxa hi ntizro wun’wana. Aleksey, lweyi hi khaneliki ha yene, a kholwa leswaku leswi a swi hanyaka swoswi swi mu lulamisela ku langutana ni ku txintxa koloko ka nkama lowu taka. Yene a li: “Nkama hinkwawu afa ni swi tiva leswaku Yehovha ni misava leyimpswha a hi nkaringana, kambe hi ndlela ya kukazri afa swi yentxa ingiki swo va kulenyana. Swoswi ni vona Yehovha kola a mahlweni kwanga mfuzri a misava leyimpswha yi swanga xititxhi lexi landzrelaka xa liyendzro dzranga.” (Min 2:25) A swi na mhaka leswaku a xiyavelo xezru hi lexa kuyini, a hi yeneni mahlweni hi famba na Yehovha. Yene a nge txhuki a hi tsrhika, kambe a ta hi pfuna leswaku hi va ni ku nyonxa ka ntizro wini na wini lowu hi mu yentxelaka​—a nga va kwini na kwini.​—Eza 41:13.