1-3. Ndali ti ambeni raison wa la peut-être kua ti ambeni wakua ti ngoi kue achangé?

ROBERT na Mary Jo atene: “Na peko ti ngu 21 ti pendere kua ti missionnaire so e sara, ababâ na amama ti e ala osio kue ayeke na ngangu encore ape. A nzere lani na e mingi ti bâ lege ti ala. Me a sara lani e vundu ti quitté ndo so e ye ni mingi.”

² William na Terrie atene: “Na ngoi so a tene na e so seni ti e ayeke mû lege na e pëpe ti kiri na ndo so a tokua e dä ti sara kua ti Jéhovah, e toto. E ye lakue ti sara na Jéhovah na kodro-wande, me fadeso e lingbi ti sara ni encore ape.”

³ Aleksey atene: “E [so e sara kua na Béthel e] hinga lani so azo ti gouvernement aye ti kanga yanga ti Béthel so mbi yeke sara kua dä. Me na ngoi so ala kanga ni na e doit ti quitté, bê ti e ason mingi.”

4. Ahundango ndo wa la e yeke kiri tënë na ni na yâ ti article so?

⁴ Na ndö ni, a mû na aita saki mingi so ayeke sara kua na Béthel nga na ala so ayeke gï na yâ ti akua ti ngoi kue afini kua. * A lingbi ti duti kete ye ape na aita be-ta-zo so ti quitté ndo so ala ye ni mingi. Nyen la alingbi ti mû maboko na ala ti gbu lê ni na yâ ti changement so? Tongana nyen la mo lingbi ti mû maboko na ala? Akiringo tënë na ahundango ndo so alingbi ti mû maboko na e kue ti gbu lê ni tongana dutingo ti e achangé.

5. Tongana kua ti e achangé, aye ti peko ni alingbi ti duti nyen?

⁵ Atâa e yeke sara kua na yâ ti territoire wala na Béthel, e lingbi ti ye mingi azo nga même ndo so e yeke sara kua dä. Tongaso vundu ayeke sara e mingi tongana e doit ti quitté. Aita so e zia ala ayeke manke e mingi nga e yeke gi bê ti e ndali ti ala, mbilimbili tongana e quitté ndali ti so azo asara aye ti ngangu na e (Mat. 10:23; 2 aCor. 11:28, 29). Na ndö ni, a lingbi ti duti ngangu ti gue na mbeni ndo nde ndali ti so peut-être e doit ti sara ye alingbi na angobo ti fini ndo so e gue dä. A lingbi même ti duti ngangu tongana e kiri na kodro ti e. Robert na Mary Jo atene: “E habitué encore ape na angobo ti kodro ti e nga même na fason ti fango tënë na yanga ti kodro ti e. E bâ so e yeke awande na kodro ti e wani.” Ambeni ita so a tokua ala na mbeni ndo nde alingbi ti wara hio kpale ti nginza so ala ku terê ti ala na ni ape. Ala lingbi ti hinga ye so ala peut ti sara ape, ala yeke na confiance na ala wani ape nga ala découragé. Nyen la alingbi ti mû maboko na ala?

6. Tongana nyen la e lingbi ti ngbâ nduru na Jéhovah?

⁶ Ngbâ nduru na Jéhovah (Jacq. 4:8). E lingbi ti sara ni tongana nyen? E yeke sara ni na lege so e sara confiance na Lo so ‘ayeke mä sambela’. (Ps. 65:2). Psaume 62:8 atene: “Ala zi bê ti ala kue na lo.” Jéhovah alingbi ti “sara ye mingi ahon ndö ti aye kue so e hunda wala so e bi bê ti e dä.” (aÉph. 3:20). Lo yeke ngbâ gï pëpe na ndö ti aye so e hunda na lo na yâ ti asambela ti e. Ti leke akpale ti e, lo lingbi ti sara aye so e ku terê ti e na ni ape na mbeni lege so e pensé na ni lâ oko ape.

7. (a) Aye wa la ayeke mû maboko na e ti ngbâ nduru na Jéhovah? (b) Ti gue oko na aHébreu 6:10-12, tongana e ngbâ ti sara na Jéhovah be-ta-zo, ye ti peko ni ayeke nyen?

⁷ Ti tene mo ngbâ nduru na Jéhovah, diko Bible lâ na lâ nga gbu li na ndö ni. Mbeni ngbene missionnaire atene: “Ngbâ ti bata kapa ti vorongo Nzapa na yâ ti sewa nga ti lekengo abungbi gï tongana ti so mo yeke sara lani na ndo so mo sara kua dä kozo.” Na ndö ni, ngbâ ti sara ye kue so mo lingbi ti sara ti fa nzoni tënë mingi na yâ ti fini congrégation ti mo. Jéhovah ayeke dabe ti lo lakue na azo so angbâ ti sara na lo be-ta-zo, même tongana ala lingbi pëpe ti sara aye kue tongana ti kozo.—Diko aHébreu 6:10-12.

8. Tongana nyen la atënë so ayeke na 1 Jean 2:15-17 alingbi ti mû maboko na mo ti ngbâ ti duti na aye mingi ape na yâ ti fini ti mo?

⁸ Ngbâ ti duti na aye mingi ape na yâ ti fini ti mo. Zia pëpe si agingo bê ti dunia ti Satan  “apete ndö ti” akua so mo yeke sara na Jéhovah (Mat. 13:22). Mä pëpe azo ti dunia so wala akamarade wala afami so agi ti mû maboko na mo so atene mo bezoin gbâ ti nginza si mo duti nzoni mingi na yâ ti dunia ti Satan. (Diko 1 Jean 2:15-17.) Duti na confiance na Jéhovah, so amû zendo ti mû na e aye so ayeke mû maboko na e ti ngbâ ti kpengba mabe ti e, ti duti na siriri nga ti wara aye so e bezoin ni “na ngoi so e yeke na bezoin” ti aye ni so.—aHéb. 4:16; 13:5, 6.

9. Ti gue oko na aProverbe 22:3, 7, ngbanga ti nyen la a yeke kota ye ti sara bon senge senge ape? Nyen la alingbi ti mû maboko na mo ti mû adesizion na lege ti ndara?

⁹ Sara bon senge senge ape. (Diko aProverbe 22:3, 7.) Ti gue na mbeni ndo alingbi ti hunda gbâ ti nginza na a yeke duti ngangu ape ti sara bon. Tongaso, sara bon ape ti vo na aye so mo yeke biani pëpe na bezoin ni. A lingbi ti duti ngangu ti hinga nginza oke la e lingbi ti sara bon ni na ngoi so e yeke na yâ ti mbeni ngangu kpale, na tapande na ngoi so e yeke bâ lege ti mbeni zo ti sewa ti e so terê ti lo ason. Na yâ ti mara ti ye tongaso, girisa ape so ‘ti sambela na ti voro terê na Nzapa’ alingbi ti mû maboko na mo ti mû adesizion na lege ti ndara. Ti kiri tënë na asambela ti mo, Jéhovah alingbi ti mû na mo siriri so ayeke “bata bê ti [mo] nga na lege ti hingango ndo ti [mo]” ti mû maboko na mo ti duti kpô ti mû desizion na ndö ti ye so ayeke nzoni mo sara.—aPhil. 4:6, 7; 1 Pi. 5:7.

10. Tongana nyen la e lingbi ti wara afini kamarade?

¹⁰ Ngbâ ti duti na anzoni kamarade. Fa na akota kamarade ti mo atënë ti bê ti mo nga na akpale so mo wara, mbilimbili na ala so peut-être awara mara ti ngia nga na akpale so mo wara. Tongana mo sara ni, a lingbi ti sara si mo duti nzoni mingi (Zo-ti. 4:9, 10). Akamarade ti mo so ayeke na ngbene ndo so mo yeke dä ayeke ngbâ akamarade ti mo. Me fadeso na fini ndo so mo yeke dä mo bezoin afini kamarade. Girisa ape so ti wara kamarade a lingbi mo duti na anzoni sarango ye. Tongana nyen la mo lingbi ti wara afini kamarade? Fa na aita anzoni ye so mo wara na yâ ti kua ti Jéhovah, tongaso si ala lingbi ti bâ ngia so mo wara dä. Même tongana ambeni ita ti congrégation acomprendre ape ndani so mo ye kua ti ngoi kue mingi, ambeni alingbi ti gi ti hinga ye mingi na ndö ni nga ala yeke ga akota kamarade ti mo. Me sara tënë ahon ndö ni ape na ndö ti mo wani wala na ndö ti aye so mo sara na yâ ti kua ti Jéhovah wala na ndö ti aye so asara mo nzoni ape na yâ ti kua ni.

11. Tongana nyen la mo lingbi ti ngbâ ti duti na ngia na yâ ti mariage ti mo?

¹¹ Tongana mo doit ti zia kua ti mo ndali ti so terê ti wali wala ti koli ti mo ason, tene ape so faute ni ayeke ti lo. Na mbage, tongana mo wani mo yeke na akpale ti seni, bâ pëpe so tënë ayeke na li ti mo nga pensé ape so mo zia vundu na bê ti koli wala wali ti mo. Girisa ape so ala yeke “terê oko” nga ala mû zendo na gbele Jéhovah ti bâ lege ti mba atâa nyen la asi (Mat. 19:5, 6). Tongana  mo zia kua ti mo ndali ti ngo so ala ku terê ti ala na ni ape, sara kue ti tene molenge ti mo ahinga so lo yeke kota mingi na lê ti mo ahon kua so mo yeke sara lani. Tene na molenge ti mo fani mingi so mo bâ lo tongana “mbeni futa” so alondo na Nzapa (Ps. 127:3-5). Nga, sara lisoro na lo na ndö ti apendere ye so mo wara lani na yâ ti kua ti mo. Tongana mo sara tongaso, a lingbi ti mû maboko na molenge ti mo ti sara kua ti ngoi kue tongana ti so mo sara lani.

12. (a) Tongana nyen la e lingbi ti mû maboko na aita so ayeke na yâ ti kua ti ngoi kue ti ngbâ ti sara kua ni? (b) Tongana nyen la e lingbi ti mû maboko na ala tongana kua ti ala achangé?

¹² A yeke nzoni mingi so acongrégation mingi nga na aita mingi asara aye so ala lingbi ti sara ti mû maboko na aita so ayeke na yâ ti kua ti ngoi kue ti ngbâ ti sara kua ni. Ala sara ni na lege so ala wa aita ni ti ngbâ ti sara kua ti ala, ala mû na ala nginza wala aye so ala bezoin ni wala ala mû maboko na ala ti bâ lege ti azo ti sewa ti ala so ayo na ala (aGal. 6:2). Tongana kua ti aita so ayeke na yâ ti kua ti ngoi kue achangé si ala ga na yâ ti congrégation ti mo, pensé ape so ala sara kua nzoni ape wala ala sara mbeni ye na lege ni ape. * Me mû maboko na ala ti tene changement ni ayapu na ala. Yamba ala na ngia nga gonda ala ndali ti kua so ala sara lani, même tongana kpale ti seni asara si ala lingbi pëpe ti sara kua mingi. Gi ti hinga ala. Manda ye na lege ti aye kue so ala hinga, aye so a fa na ala nga na aye so asi na ala.

13. Mungo maboko wa la e lingbi ti mû na azo so kua ti ala achangé?

¹³ Na tongo nda ni, azo so kua ti ala achangé ayeke peut-être na bezoin ti tene mo aidé ala ti  wara da, kua wala ambeni ye so ala bezoin ni. Mo lingbi nga ti aidé ala ti hinga tongana nyen ti wara oto ti gue na ando nde nde. Ala yeke peut-être na bezoin ti afini sango na ndö ti aye so azo ayeke sara, na tapande futango impôt nga na assurance. Me ye so ala bezoin ni mingi ayeke ti tene mo gi ti comprendre dutingo ti ala. Peut-être ala, wala mbeni zo ti sewa ti ala, ayeke na kpale ti seni. Peut-être ala yeke na vundu ndali ti mbeni zo so ala ye lo mingi so akui. * Nga même tongana ala tene ni ape, peut-être ala yeke na vundu ndali ti so akamarade ti ala ti ngbene ndo so ala yeke lani dä amanke ala mingi. Ala bezoin ngoi ti hon ndö ti kota vundu ti ala so alingbi ti sara si li ti ala aga kirikiri.

14. Tongana nyen la awafango tënë ti ndo so mbeni ita-wali ague dä amû maboko na lo ti sara achangement ti lingbi na fini ndo ni?

¹⁴ Na ndö ni, mungo maboko ti mo nga na tapande ti mo alingbi ti mû maboko na ala ti sara achangement ti lingbi na fini dutingo ti ala. Mbeni ita-wali so asara kua ti Jéhovah na kodro-wande ngu mingi atene: “Na ndo so mbi sara kua ti Jéhovah dä kozo, mbi yeke manda lani Bible na azo lâ na lâ. Na fini ndo so mbi yeke dä, a yeke même ngangu ti wara lege ti diko versê wala ti fa mbeni vidéo na mbeni zo na fango tënë. Me awafango tënë ti ndo ni atisa mbi ti tene mbi na ala e gue e sara avizite na a-étude ti ala. Tongana mbi bâ aita so ayapu na fango tënë nga so asara ye na mbeto ape ayeke sara a-étude so ayeke gue na li ni asara si mbi duti na nzoni bango ndo na ndö ti territoire ni. Mbi manda tongana nyen ti komanse lisoro na azo ti yâ ti fini territoire ni. Aye so kue amû maboko na mbi ti kiri ti duti na ngia.”

15. Tongana nyen la mo lingbi ti sara kua nzoni na fini ndo so mo yeke dä?

¹⁵ Mo lingbi ti sara kua nzoni na fini ndo so mo yeke dä. Pensé ape so mo sara kua nzoni ape na ndo so mo yeke dä kozo wala fadeso nengo ti mo akiri na gbe ni. Gbu li na ndö ti aye mingi so Jéhovah asara ti mû maboko na mo fadeso nga ngbâ ti fa tënë. Mû tapande ti akozo Chrétien  so ayeke lani be-ta-zo. “Ala so akangbi kirikiri ayeke hon na yâ ti sese ni, ala yeke fa nzoni tënë ti tënë ti Nzapa.” (Kus. 8:1, 4). Angangu so mo sara ti ngbâ ti fa tënë alingbi ti ga na anzoni ye. Na tapande, apionnier so akota zo ti kodro atomba ala na mbeni kodro ague na mbeni kodro so ayeke na terê ti kodro so a tomba ala dä, so a bezoin awafango tënë dä mingi na yanga ti kodro ti ala. A sara nze mingi ape, azo mingi aga na yâ ti groupe ti yanga ti kodro so apionnier ni ayeke fa tënë dä.

16. Tongana nyen la mo lingbi ti wara ngia na fini ndo so mo yeke dä?

¹⁶ “Ngia so alondo na Jéhovah la ayeke ngangu” ti mo (Néh. 8:10). A lingbi songo ti e na Jéhovah la amû na e ngia mingi, me pëpe ndo so e sara kua dä même tongana e ye ni mingi. Tongaso, zia e ngbâ ti tambela na Jéhovah, e ngbâ ti bâ ndo na mbage ti lo ti wara ndara, fango lege nga na mungo maboko ti lo. Girisa ape so mo ye lani ngbene ndo so mo sara kua dä ndali ti so mo sara kue ti mû maboko na azo ti ndo ni. Sara kua na bê ti mo kue na fini ndo so mo yeke dä na bâ tongana nyen la Jéhovah ayeke mû maboko na mo ti ye ni nga mingi.—Zo-ti. 7:10.

17. Nyen la a lingbi e girisa ape na ndö ti kua so e yeke sara laso?

¹⁷ A lingbi e girisa ape so e yeke ngbâ ande ti sara na Jéhovah teti lakue lakue, me peut-être ye so e yeke sara laso ndali ti lo ayeke changé ande na yâ ti fini dunia. Aleksey, so a sara tënë ti lo fade na tongo nda ti article so, atene so, so ndo so lo sara kua dä achangé, a mû maboko na lo ti leke terê ti lo ti ku na achangement so ayeke si ande. Lo tene: “Mbi hinga lani lakue so Jéhovah ayeke dä biani nga fini dunia ayeke duti ande dä biani, me na lê ti mbi Jéhovah nga na fini dunia ayo na mbi kete. Fadeso mbi bâ Jéhovah tâ na devant ti mbi nga mbi bâ so fini dunia ayeke si tâ fafadeso.” (Kus. 2:25). Tongaso, atâa ndo wa la e yeke dä, zia e ngbâ ti tambela na Jéhovah. Lo yeke zia e lâ oko ape, me lo yeke mû maboko na e ti wara ngia na yâ ti aye kue so e sara na yâ ti kua ti lo atâa ndo wa la e sara kua ni dä.—És. 41:13.