XIINXALLOTE BIRXICHO 34
Haaro Soqqanshote Qoosso Rosa Dandiineemmohu Hiittoonniiti?
“Maganu halaalaancho yoo yaannoho; loosoˈnenna albano ikko xaano qullaawa manna kaaˈlatenni leellishshinoonnisi baxille dihawanno.”—IBI. 6:10.
FAARSO 38 Jawaachishannohe
GUULCHO *
1-3. Mite woˈma yanna soqqamaanora haaro soqqanshote qoosso uyinoonninsahu mayira ikkara dandaanno?
ROOBERTINNA Meeri Joo togo yiino: “Misiyoone ikkine 21 diro hagiirrunni soqqammummo gedensaanni, lamunku anniranna amara towaanyo hasiissinonsa. Maatenke towaaxxankenni tashshi yiinonke. Ikkirono, lowo geeshsha banxeemmo qooxeessa agurre haˈrankenni baasa dadillinoommo.”
2 Wiiliyaaminna Teeri togo yiino: “Fayyimmate qarrinni kainohunni soqqanshonke agurreemmota anfummoti wiˈlinoommo. Xaate wole gobba haˈne Yihowara soqqama didandiineemmo.”
3 Alekiseyi togo yiino: “Gibbannonkeri sinu biironke cufa hasidhannota anfoommo. Biironke cunfeenna Beeteeletenni fulle haˈnummo yannara kayinni roore dadillinoommo.”
4. Konni birxichira hiikkuri xaˈmuwa xiinxallineemmo?
4 Aleenni kulli roduuwano agurranna, lowo kume ikkitannori Beeteelete soqqantanno roduuwirano ikko wole woˈma yanna soqqamaanora haaro soqqanshote qoosso uyinoonninsa. * Kuri ammanantino roduuwira, baxxanno soqqanshonsa agura qarra ikkitinonsaha ikkara dandaanno. Ikkina insa haaro soqqanshonsa rosate mayi kaaˈlannonsa? Ninke insa kaaˈla dandiineemmohu hiittoonniiti? Kuri xaˈmuwara dawaro afiˈranke, ninke baalunku heeshshonke gari soorramanno woyite tenne dandee heeˈrate kaaˈlitannonke.
HAARO SOQQANSHONKE ROSA DANDIINEEMMOHU HIITTOONNIITI?
Woˈma yanna soqqamaano soqqantanno qooxeessa agure haˈra qarra ikkitansara dandiitannohu mayiraati? (Gufo 5 lai) *
5. Wole soqqanshote qoosso uyinanninke woyite ma ikkinammora dandiineemmo?
5 Soqqammeemmohu Beeteeleteno ikko qanchoho, soqqammeemmowa heeˈranno manna, wole agurina heeˈneemmo qooxeessa nafa lowo geeshsha banxammora dandiineemmo. Konnira, tenne soqqanshonke agurreemmo gede assannori iillannonke woyite, baasa dadillineemmo. Ledonke soqqantanno roduuwi qalli assitannonke; roorenkanni soqqanshonke agurre haˈnoommohu dartunni kainohunni ikkiro insara yaandammora dandiineemmo. (Mat. 10:23; 2 Qor. 11:28, 29) Qoleno, wolewa sonkanninke woyite wole agurina uminke gobba nafa wirro haˈneemmo woyite hatte gobba bude rosa qarrissankera dandiitanno. Roobertinna Meeri Joo togo yiino: “Uminke budeno ikko qaalinkenni sabbaka hamboommo. Gobbankera heeˈne wole gobbare ikkinoommoha lawinonke.” Haaro soqqanshote qoosso uyinoonninsaha mito roduuwa miinju qarri amadansara dandaanno. Insa kadde amaddannori baˈˈansara, yaaddaranna hexxo mudhitara dandiitanno. Ikkina insa kaaˈlannonsari maati?
Yihowawa shiqqi yiiyye, hattono iso addaxxe (Gufo 6-7 lai) *
6. Yihowawa shiqqi yine heeˈra dandiineemmohu hiittoonniiti?
6 Yihowawa shiqqi yite heeˈri. (Yai. 4:8) Hatto assa dandiineemmohu hiittoonniiti? ‘Huuccatto macciishshanno’ magano addaxxatenniiti. (Far. 65:2) Faarso 62:8 “Qarraˈne baala isira hasaaphe” yitanno. Yihowa “hendeemmohunni aleenni quwa sayise assara dandaanno.” (Efe. 3:20) Isi huucciˈnoommokkireno aankera dandaanno. Yihowa qarranke, ninke horonta hendoommokki garinni tirara dandaanno.
7. (a) Yihowawa shiqqi yee heeˈrate mayi kaaˈlannonke? (b) Ibiraawoota 6:10-12 kultanno garinni, woˈmante yannara Yihowara ammanamme soqqamanke mayi guma abbitanno?
7 Yihowawa shiqqi yee heeˈrate, Qullaawa Borro barru baala nabbawanna hiinca hasiissannonke. Mittu alba misiyoone ikke soqqamino rodii togo yiino: “Albi soqqanshoˈne yannara assitinanninte gede, maatete magansiˈra assiˈratenna gambooshsheho qixxaawate yanna gaaˈme.” Qoleno, haaro songoˈne giddo dancha duduwo diinaggaabbine dudubbe. Yihowa albi geeshsha soqqama hoogguro nafa, isira woˈmate yannara ammanante soqqantannore dihawanno.—Ibiraawoota 6:10-12 nabbawi.
8. Umi Yohaannisi 2:15-17 noo hedo, heeshshonke bikkunnita assiˈrate kaaˈlitannonkehu hiittoonniiti?
8 Bikku heeshsho heedhe. Sheexaanu alame abbitanno yaaddo ayyaanaamittete loosoˈne “qalxitara” wodhitinoonte. (Mat. 13:22) Tini alameno ikko kiˈnera heddanno jaallaˈne woy fiixiˈne Sheexaanu alame giddo jiro duuˈnitinanni gede xixxiibbannoˈne woyite tennera qeelantinoonte. (1 Yohaannisi 2:15-17 nabbawi.) Hatteentenni, ayyaanaamitteteno ikko maalaamittete hasattonke wonshate qaale einoha Yihowa addaxxe.—Ibi. 4:16; 13:5, 6.
9. Lawishsha 22:3, 7 kultanno garinni, hasiisannokki asali giddora eˈneemmokki gede qoropha hasiissannonkehu mayiraati? Dancha doorsha doodhate mayi kaaˈlannonke?
9 Hasiisannokki asali giddora eˈinoonte. (Lawishsha 22:3, 7 nabbawi.) Bayichunni bayicho haˈneemmo woyite, lowo woxi fulankera dandaanno; konnira hendummokki asale eˈneemmoha ikkara dandaanno. Asalu amadannoˈnekki gede, hakkeeshshi geeshsha hasiisannoˈnekkire hidhate woxe liqiidhinoonte. Maatenke miilla dhiwansiisiˈneemmo woyite, woy wolu yaachishanno coyi iillannonke yannara, mageeshshi woxe liqiiˈra hasiissannonkero afa hoongammora dandiineemmo. Togoo yannara, ‘huuccatto’ assiˈranke, dancha doorsha doodhate kaaˈlitannonketa deˈinoonte. Yihowa ‘wodanankenna hedonke agarannoha’ giddiidi keere oye huuccattonkera dawaro qolanno; kuni keeri wodanaaˈmine hendeemmo gede kaaˈlannonke.—Fil. 4:6, 7; 1 Phe. 5:7.
10. Jaalooma kalaqiˈra dandiitinannihu hiittoonniiti?
10 Dancha jaalla kalaqidhe. Hedoˈnenna tuncu yiinoˈne coye muli jaallaˈnera roorenkanni kiˈnera iillinoˈne gedee coyi iillinonsarira hasaaphaˈne kaaˈlitannoˈne. Tini yaaddoˈnenni beya afidhinanni gede assitara dandiitanno. (Ros. 4:9, 10) Albi soqqanshoˈne yannara kalaqidhinoonni jaalla xaano jaallaˈneeti. Wolewa sonkanniˈne woyite kayinni, haaro jaalla kalaqiˈra hasiissannoˈne. Jaalla afiˈrate kiˈne umiˈne wolootaho dancha jaalla ikka hasiissannoˈneta habbinoonte. Haaro jaalla kalaqiˈra dandiitinannihu hiittoonniiti? Yihowara soqqantinanni afidhinoonni woˈnaalsha kultine, wolootu hagiirreˈne affanno gede asse. Mitu songoˈne miilla woˈma yanna soqqansho mageeshshi geeshsha baxxinanniro huwata hoogguro nafa, wolootu kiˈne lawishsha harunsitaranna jaallaˈne ikkitara dandiitanno. Ikkollana, Yihowa soqqanshora assitinoonnire kula batissinoonte; hattono yaachishinoˈne coye calla illachishshinoonte.
11. Maateˈne giddo noo hagiirri baikkinni heeˈra dandiitinannihu hiittoonniiti?
11 Soqqanshokki aguroottohu galtekki dhiwantinohura ikkiro, ise bushiishshooti. Wole widoonni kayinni fayyimmate qarri amadinohehu ate ikkiro, galteˈyara guficho ikkoommo yite ateneeto bushiishshooti. “Mitto biso” ikkitinoonnitanna aye geeshshi coyi iilliˈnerono mimmito towaatate Yihowa albaanni qaale eˈinoonnita deˈinoonte. (Mat. 19:5, 6) Soqqanshokki aguroottohu hedeweelcho minaamakkira godowu gateennase ikkiro, qaaqqiˈne albi soqqanshoˈnenni roore iso baxxinannisita huwatanno gede asse. Qoleno, Maganu uyinoˈne “elto” gede assitine laˈinannisita kullesi. (Far. 127:3-5) Hattono albi soqqanshoˈne yannara afidhinoonniha hagiirsiisanno woˈnaalsha kullesi. Tenne assaˈne, qaaqqiˈne kiˈnente gede woˈma yannasinni Yihowara soqqamanno gede kakkayissasira dandiitanno.
WOLOOTU KAAˈLA DANDIITANNOHU HIITTOONNIITI?
12. (a) Woˈma yanna soqqamaano soqqanshonsa agurtannokki gede kaaˈla dandiineemmohu hiittoonniiti? (b) Insa haaro qooxeessa rossanno gede kaaˈla dandiineemmohu hiittoonniiti?
12 Batinye songonna roduuwi, woˈma yanna soqqamaano soqqanshonsa agurtannokki gede dandiitu deerrinni kaaˈlitannonsa; tini hagiirsiissannote. Togo assitannohu, insa soqqanshonsa agurtannokki gede jawaachishatenni, woxe woy wole hasiisannonsaha maalaamittete coye aatenni, hattono soqqantannohu xeertowa ikkiro kayinni maatensa kaaˈlatenniiti. (Gal. 6:2) Alba woˈma yanna soqqansho soqqantanno roduuwi songoˈne sonkeenna dagguro, kiˈne songo dagginohu soˈro loosse woy seejjineennansaati yitine heddinoonte. * Hatteentenni haaro qooxeessa rossanno gede kaaˈlensa. Anga fantine haadhensa, hattono fayyimmate qarrinni kainohunni albi geeshsha soqqama dandiitannokkiha ikkiro nafa, konni albaanni assitinorira galattensa. Insa ledo egennamate woˈnaalle. Afidhino egennonni, qajeelshinni hattono woˈnaalshinni rosate sharramme.
13. Haaro soqqanshote qoosso uyinoonninsare kaaˈla dandiineemmohu hiittoonniiti?
13 Haaru qooxeessira soqqantanno gede sonkoonni roduuwi heedhanno mine, hodhishsha, loosonna wole hasiisannonsa coye afiˈrate kiˈne kaaˈlo hasiissannonsaha ikkara dandaanno. Qoleno giwire baata woy wole hajo lainohunni haaro mashalaqqe hasiissannonsaha ikkara dandaanno. Insa roore hasidhannohu noo gara huwattinansaraati. Insa uminsa woy maatensa miilla dhiwantinoha ikkara dandiitanno. Woy shiidhe manchittinoha ikkara dandaanno. * Qoleno, mannaho hasaapha hooggurono, albi soqqanshonsa yannara kalaqidhino jaalla qalli assitinonsaha ikkara dandaanno. Togoo xisso qeelate lowo yanna hasiissanno.
14. Mitte rodoo haaro qooxeessa rossanno gede songose halashshaano kaaˈlitinosehu hiittoonniiti?
14 Kiˈne kaaˈlonna danchu lawishshiˈne haaro soqqanshonsa rosate kaaˈlannonsa. Mitte wole gobbara lowo diro soqqantino rodoo togo yitino: “Albi soqqanshoˈya yannara barru baala haammata manna Qullaawa Maxaafa xiinxalliseemma. Xa soqqameemma qoqqowira kayinni Qullaawa Maxaafa fane nabbawa woy viidiyo leellisha nafa qarraho. Songoˈyara noo halashshaano manna galagalte marte hasaawissanno woyitenna Qullaawa Maxaafa xiinxallissanno woyite koyissannoe. Kuri worbuullu roduuwira, ayyaanaamittetenni lophitanni nooti Qullaawu Maxaafi rosaano noonsata afaˈya hexxo mudheemmakki gede kaaˈlitinoe. Haaru qooxeessira mannu ledo hasaawa hanafa dandiinanni gara rosoomma. Tini wirro hagiirraame ikkeemma gede kaaˈlitinoe.”
DANDIITINANNIRE BAALA ASSA AGURTINOONTE
Gobbaˈnera albinni roore soqqama dandiitinanni doogga hasidhe (Gufo 15-16 lai) *
15. Haaro soqqanshshoˈnenni dancha guma afiˈra dandiitinannihu hiittoonniiti?
15 Haaro soqqanshshoˈnenni hagiirraamma ikka dandiitinanni. ‘Haaro qoosso uyinoonniehu albi soqqanshoˈyanni seekke soqqama hoogoommohuraati woy kaaˈleemmori nookkihuraati’ yite heddooti. Yihowa assinohere hedi; hattono sabbaka agurtooti. Umi xibbi diri Kiristaani lawishsha harunsi. Insa “hadhuwa baala Maganu qaale [kultino].” (Soq. 8:1, 4) Kiˈneno sabbaka agura hoogginiro dancha guma afidhinara dandiitinanni. Hanni mitto lawishsha laˈno; mitte gobbara suwisaano heedhanno gobbanni fultanno gede kullinsata mule noo gobba hadhino; hakkiicho insa coyidhanno qaale coyiˈrannohu hasatto noonsa manninni xaaddino. Boodu agani giddo hakkiicho duucha gaamo xintantino.
16. Haaro soqqanshshoˈnenni hagiirraamma ikka dandiitinannihu hiittoonniiti?
16 Yihowa “hagiirri wolqaˈneeti.” (Neh. 8:10) Soqqanshonke lowo geeshsha banxeemmoha ikkiro nafa, roore hagiirsiisannonkehu Yihowa ledo noonke jaaloomaati ikkinnina soqqanshote qoossonke diˈˈikkitino. Konnira, Yihowa ledo nooˈne jaaloomi baˈˈannokki gede agadhe; hattono hayyo, biddishshanna kaaˈlo afiˈrate iso addaxxe. Albi soqqanshoˈne baxxinoonnihu, hakko heeˈranno manna kaaˈlate sharrantinoonni daafiraati. Haaro soqqanshoˈneno woˈma giddonni soqqamate sharramme; hatto assitiniro, Yihowa tenne soqqanshoˈne baxxinanni gede kaaˈlannoˈne.—Ros. 7:10.
17. Xaa noonkete soqqanshote qoosso daafira maa qaaga hasiissannonke?
17 Yihowara soqqammeemmohu hegerera ikkinota, hattono xa noonketi soqqanshote qoosso hegerera heedhannokkita qaaga hasiissannonke. Haaro alamera, ninke baalunkura xa noonkehunni baxxino looso uyinankera dandiinanni. Konni birxichi hanafora kullihu Alekiseyi xaa iillinosi coyi haaro alamera qixxaawanno gede kaaˈlanni noosita coyiˈrino. Isi togo yiino: “Yihowa nooha ikkinotanna haaro alame daase gattannokkita huluullame diegennoommo; Yihowa albaˈyaanni noohu gede ikke leellinoehunna haaro alame dagge furduggi yitara noota seekke huwatoommohu kayinni xaati.” (Soq. 2:25) Soqqammeemmohu ikkiwano ikkiro, woˈmante yannara Yihowa ledo qaanfo. Isi horo tuge diagurannonke; hatteentenni soqqanshonke ikkitutano ikkituro wolqanke assitu geeshsha isira soqqamatenni hagiirraamma ikkineemmo gede kaaˈlannonke.—Isa. 41:13.
FAARSO 90 Mimmito Jawaachishshe
^ GUFO 5 Mite yannara woˈma yanna soqqansho soqqamanno roduuwi, tenne soqqansho agurara dandaanno, woy wole soqqanshote qoosso uyinansara dandiinanni. Konni birxichira, togoo roduuwira iillannonsa fonqolonna konne fonqolo qeelate mayi kaaˈlannonsaro ronseemmo. Qoleno wolootu insa jawaachishanna irkisa dandiitanno gara laˈneemmo; hattono ninke baalunku heeshshonke giddo iillannonkeha haaro coye rosate kaaˈlannoha xintu seera ronseemmo.
^ GUFO 4 Mitu roduuwi jajjabbooˈmitanno woyite, qoossonsa diro insanni ajjanno roduuwira uyitino. Wocawaaro 2018 Agarooshshu Shaera nooha “Jajjabba Roduuwa—Yihowa Ammanamaˈne Dihawanno” yaanno birxichonna Birra 2018 Agarooshshu Shaera nooha “Heeshshoˈne Gari Soorramanno Woyite Giddiidi Keeriˈne Baˈˈannokki Gede Agadhe” yaanno birxicho lai.
^ GUFO 12 Songote cimeeyye woˈma yanna soqqamaano wole songo hadhanno woyite haaro songora egensiishshu sokka dandaaminsa deerrinni rakke borreessa hasiissannonsa; hatto assansa kuri roduuwi, haaro songo martanni heedhe suwisaano, cimeeyye woy songote soqqamaano ikkitanno gede kaaˈlitannonsa.
^ GUFO 13 Baqqi Yiiyye! 2018 (Kiiro 3) [Amaaru Afoo] yinanni metseetera, “Shiidhe Manchitinore Mayi Kaaˈlannonsa?” yitanno cuˈmo hunda noo birxichuwa nabbawi.
^ GUFO 57 MISILLATE XAWISHSHA: Wole gobbara misiyoone ikke soqqamanno minaanninna minaama hatte gobbanni haˈranni heeˈre songonsanni wiˈle babbaxxanni no.
^ GUFO 59 MISILLATE XAWISHSHA: Kuri minaanninna minaama gobbansa higi gedensaanni iillannonsa fonqolo cince saˈˈanno gede kaaˈlansara Yihowa huucciˈranni no.
^ GUFO 61 MISILLATE XAWISHSHA: Yihowa kaaˈlonni kuri minaanninna minaama wirro woˈma yanna soqqansho hanafino. Insa misiyoone ikkino yannara rosino qaalinni, haaru qoqqowinsara heeˈrannohu wole gobbanni dayino mannira farcidhanni no.
