MWISAMBO WA KULONGA 34
Kyodya kukita nsaa ayipu sunga ayishintuluka mudimo oobe
“Efile Mukulu mmululame, tammulombeene kuluba kyanudi bakite, na kifulo kyanudi baleeshe bw’eshina dyaaye.”—Eb. 6:10.
LOONO 38 Akakunyigisha
KYABAKWILA MWANKA *
1-3. Mmyanda kinyi ilombene kukita’shi mudimo wa mufubi a nsaa yoso ushintulukye sunga kupwa?
ROBERT na Mary Jo abamba’shi: “Kunyima kwatwe kukisha bipwa 21 mu mudimo wa bu misionere, baledi betu boso bananka abangile kukumba. Tubaadi na muloo wa nkebakwasha. Anka, tubaadi bapushe bibubi ngofu pa kukatuka mbalo ibaatudi bafule.”
2 William na Terrie abamba’shi: “Patubamwene’shi mbidi tayitupa dingi mushindo wa kwalukiila mu mudimo wetu, tubadidile, mwanda kitshibilo kyatubadi bate kya nkafubila Yehowa mu dingi eumbo takibaadi kilombane nya.”
3 Aleksey amba’shi: “Tubaadi atuuku’shi beshikwanyi betu abakyebe kufunga Betele kunadi nafubu, na pababadi bamufungye bibaadi bitukalakashe ngofu, mwanda abitunganga’shi tukatukye.”
4. Nkonko kinyi yatukyebe kwisambila mu uno mwisambo?
4 Kukatusha bino bileshesho, kwi bingi bileshesho bya bena Betele bebungi bapete kushintuluka mu mudimo wabo. Bi bukopo bwa bano bakwetu balume na bakashi kuleka midimo yabo yabadi bafule ngofu. * Nkinyi kilombene kwibakwasha bwabadya kukila na kuno kushintuluka? Twikwibakwasha naminyi? Ngaluulo ya ino nkonko ayitukwasha nsaa yatufumankana na kwakwa kushintuluka.
MBIKUNYI BYATUDYA KUKILA NA KUSHINTULUKA KWA MYANDA
Bwakinyi kukatuka mu mudimo wa nsaa yoso a kwikala bu lukalakashi kwi bafubi ba nsaa yoso? (Tala kikoso 5) *
5. Kupwa kwa mudimo wetu nkulombene kwitukalakasha naminyi?
5 Sunga twekala atufubila mu teritware sunga ku Betele, twibalombene kutamisha kifulo kyetu bwa bantu ba mbalo yatufubila. Su mudimo wetu wapwa bwa kabingilo kampanda, twikupusha bubi mu mashimba. Atupusha bushiye bwa baaba abashala, na atwikalakasha bwabo, bikishekishe su atukatuka mwanda wa kubingwabingwa. (Mat. 10:23; 2 Kod. 11:28, 29) Dingi, twi kupusha bibubi pa kwenda mu kufubila ku ingi mbalo, sunga pa kwalukiila kwetu mwanda abitungu tushintuule bipikwa. Robert na Mary Jo abamba’shi: “Tatubaadi dingi beubidishene na bipikwa bya kwetu nya, sunga kulungula mukandu wibuwa mu kya kwetu, tubaadi atwimono nka bu benyi kwetu.” Bangi bakwete kupeta lukalakashi lwa makuta nsaa ayipu mudimo wabo. Byabya mbilombene kwibabofusha ku mashimba. Nkinyi kilombene kwibakwasha?
Kwifubwila peepi na Yehowa na ku mu kulupila kwi na muulo
(Tala kikoso 6-7) *
6. Mbikunyi byatudya kwifubwila peepi na Yehowa?
6 Shaala peepi na Yehowa. (Shak. 4:8) Mbikunyi byatudya kushala peepi na Yehowa? Mpa kukulupila mwadi ‘aye apushaa nteko yetu.’ (Mis. 65:3, EEM) Mukanda wa Misambo 62:9, awamba’shi: “Mufungwileeyi mashimba eenu.” Yehowa mmulombene kukita “bikile pa byaabya byaatutekye naa byaatupwandjikisha.” (Ef. 3:20) Yehowa tetupeyaa nka penda byatumutekye nya. mmulombene kwitukitshina bikile byatupwandikishanga bwa kupudisha myanda yetu.
7. (a) Nkinyi kikumbene kwitukwasha bwa kushaala peepi na Yehowa? (b) Muyile Beena-Ebelu 6:10-12, nkinyi akikitshika su twatungunuka na kufubila Yehowa na lulamato?
7 Bwa kushaala peepi na Yehowa, abitungu tubadikye Bifundwe efuku dyoso na kunangushena ku byanka. Ungi mukwetu baadi bu misionere amba’shi: “Lama nka yawa programe a lulangwilo lwa mu kifuko na kulumbuula bisangilo obodi naye pobodi mu mudimo wa nsaa yoso.” Dingi, tungunuka na kulungula mukandu wibuwa mu kakongye kobe kapya. Yehowa atentekyeshaa boso abatungunuka na kumufubila na lulamato, sunga byekala’shi tabakii na ngobesha yakukita byoso bibabadi abakitshi kumpala.—Badika Beena-Ebelu 6:10-12.
8. Mayi e mu mukanda wa 1 Yowano 2:15-17 e kwitukwasha naminyi bwa kwikala na nshelelo mupelepele?
8 Tungunuka nka na kwikala na nshalelo mupelepele. Totadiilanga twinyongoshi twa mu ndumbulwilo a Satana tukwimikye bwa kufubila Yehowa. (Mat. 13:22) Totemeshanga bantu bashabafubila Yehowa sunga ba kuuku sunga bakwenu ba mu kifuko, abakutakula bwa kwipana mu kukimba bintu bya ku mbidi mu uno ndumbulwilo a Satana. (Badika 1 Yowano 2:15-17.) Kulupila mwi Yehowa, aye mwitulee bwa kwitupa byatudi nabyo lukalo “apakumbana kipungo.”—Eb. 4:16; 13:5, 6.
9. Muyile Nkindji 22:3, 7, bwakinyi bi na muulo kupela kutwela bishiyo bishi na muulo, na nkinyi kilombene kwitukwasha bwa kwata bitshibilo bibuwa?
9 Leka kutwela bishiyo bishi na muulo. (Badika Nkindji 22:3, 7.) Kufiluka bwa kwenda ingi mbalo kwi kuteka makuta ebungi, na mbibofule bwa kwiyapula makuta. Bwa kupela kutwela mabasa, leka kwiyapula makuta bwa kuula bintu byoshi nabyo lukalo. Nsaa yatudi na lukalakashi, sunga nsaa ayikumbu mukwetu a mu kifuko, bi kwikala bukopo bwa kuuka bungi bwa makuta aatungu’shi twiyapule. Mu myanda i byabya, tentekyesha’shi ‘nteko na kwiyaaya’ mbilombene nkukwasha bwa kwata bitshibilo bibuwa. Yehowa mmulombene nkupa butaale ‘abulama eshimba dyobe na binangu byobe,’ bwa nkukwasha onangushene kalolo.—Fid. 4:6, 7; 1 Mp. 5:7.
10. Mbikunyi byatudi balombene kupeta ba kuuku bapya?
10 Ikala na ba kuuku bebuwa. Lungula ba kuuku bobe byabya byopusha na myanda yodi nayo, bikishekishe baba bafumankane na myanda i bu yobe. Kukita byabya, akukukwasha bodya kupusha bibuwa. (Mul. 4:9, 10) Ba kuuku bobodi nabo mu mudimo oobe wa nsaa yoso be nka kwanka. Kadi binobino, pabapu mudimo oobe, abitungu’shi opete ba kuuku bapya. Tentekyesha’shi, bwa kupeta kuuku abitungu obe nabene wekale na kalolo. Mbikunyi byodya kupeta ba kuuku bapya? Ebalungule myanda ibuwa yabadi bakukitshine kwi Yehowa, bwa’shi bangi bapushe namu miloo yodi mupete mu mufubo waye. Sunga bangi bakwetu mu kakongye bakutwa kupusha muloo odi nao bwa mudimo wa nsaa yoso, bangi namu be kusankila kileshesho kyobe kibuwa na kukumiina kufika bu ba kuuku bobe. Tokishakishanga kwakula penda bwa myanda yodi mukite mu mudimo oobe wa nsaa yoso sunga bwa binangu bibubi bibaadi abikufwila.
11. Mbikunyi byanudya kwikala na muloo mu dibaka dyenu?
11 Su nwakatuka mu mudimo wenu pa mwanda wa maladi a mwina dibaka nobe, twekalanga omusumbwila kilumbu. Su nobe nabeene e na maladi, twekalanga wetopeka, na kunangushena’shi bolwishisha mwina dibaka nobe. Tentekyesha’shi nwi “mbidi imune” na’shi botshipile kumpala kwa Yehowa’shi okamupasukila mu bipungo bya miloo sunga bya makyenga. (Mat. 19:5, 6) Su mudimo obe ubapwile mwanda w’eyimi dyanush’anwikalanga batengyele, uukayi’shi, mwan’enu auku’shi e na muulo ukata kwanudi kukila mudimo wenu. Byabya, mulunguleyi’shi nukwete kumumona bu “kya-buntu” akifiki kwi Efile Mukulu. (Mis. 127:3-5) Dingi, mulunguleyi myanda ibuwa yanudi bapete mu mudimo wenu. Kukita byabya, kwi kumukwasha bwadya kwipana mu mufubo wa Yehowa nka bu’nwe.
BILOMBENE BANGI NKUKWASHA
12. (a) Mushindo kinyi watudya kukwasha baba be mu mudimo wa nsaa yoso bwabadya kutungunuka na mudimo wabo? (b) Mbikunyi byatudya kwibakwasha bwa’shi beubidishene na nshalelo mupya?
12 Mwanda wa muloo, mu tukongye twibungi mpa na bangi bakwetu bebungi, bakwete kwitatshisha bwa kukwasha baaba be mu mudimo wa nsaa yoso bwabadya kutungunuka na mudimo wabo. Bakwete kukita byabya pa kwibanyingisha bwabadya kutungunuka na mudimo wabo, kwibapa ekuta sunga kukwasha bifuko byabo bii kula nabo. (Nga. 6:2) Su mukwetu baadi mu mudimo wa nsaa yoso afika mu kakongye kenu, tokumanga kumwamba’shi taakitanga mudimo kalolo sunga’shi mukite kintu ki bubi. * Kadi abitungu omukwashe, bwadya kwiubidishena na nshalelo mupya. Museme na muloo oso na omutumbule bwa mudimo waye wadi mukite, sunga ekala na mukumbo aumukutshishwa kukita bibungi. Kimba bya kwiukena naye. Longyela ku kyukilo kyabo, myanda yabadi balongye na yabadi bamone.
13. Nkinyi kyatudya kukita bwa kukwasha bantu abaadi mu mudimo wa nsaa yoso sunga abapete mudimo upya?
13 Baaba bakyabakatuka mu mudimo wa nsaa yoso, be kwikala na lukalo lwa’shi webakwashe bwabadya kupeta nshibo ya kufutshila, mudimo, na bingi bintu bya kwibakwasha. Be kwikala dingi na lukalo lwa kwibalungula myanda yanufumankana nayo mu nshalelo a efuku dyoso bu kufuta kwa bitadi, na ingi myanda. Kintu ki na muulo nkya’shi, opushe nshalelo abadi naye. Pangi bakwete kwitatshisha bwa kumona bya kukila na mukumbo wabadi nao sunga wi nao mwina kifuko kyabo. Pangi mbafwishe muntu abadi bafule. * Dingi be kwikala abapusha bushiye bwa bakwabo bena Kidishitu babadi balekye pabekalanga mu mudimo wabo. Abibatungu mafuku ebungi bwabadya kuubila na kukatusha twatwa twinyongoshi.
14. Balungudi abaadi bakwashe ungi mukwetu mukashi bwadya kubiila teritwate mupya naminyi?
14 Nsaa y’olungula nabo mukandu wibuwa, na kileshesho kyobe mbilombene kwibanyigiisha bwa kubiila. Ungi mukwetu mukashi mufube bipwa bibungi mu dingi eumbo amba’shi: “Mbalo inaadi nafubila kumpala, naadi nalongo Bible na bantu Efuku dyoso. Kadi mu mudimo upya, bibaadi bukopo bwandya kubadikila muntu kifundwe sunga kumulesha video mu bulungudi. Anka bakwetu balume na bakashi ba mu kakongye kande kapya, abadi abangata bwatudya kwenda mu kutala bantu baabo. Pakumona katshintshi kabo na bibabadi abakunkusha kulonga kwa Bible, na bantu abende kumpala mu kikudi, bibaadi binkwashe bwa kusankila yawa teritware. Nadi mulongye bya kubanga mwisambo mu tetitware mupya. Boso abankwashishe bwa kupetuula muloo.”
TUNGUNUKA NA KWENDA KUMPALA!
Kimba bya kutamisha mudimo wa bulungudi mu teritware odi binobino (Tala kikoso 15-16) *
15. Mbikunyi byodi mulombene kobesha mu mudimo oobe upya?
15 We mulombene kobesha su bakupa mudimo upya sunga’shi su mudimo obe wapwa. Topwandikishanga’shi tobodi okitshi mudimo oobe kalolo, sunga’shi tokii na muulo nya. Nangushena mushindo ukwete Yehowa nkukwasha na tungunuka na kulangula mukandu wibuwa. Ambula lukumiino lwa bena Kidishitu ba mu siekele a kumpala. Mbalo yoso ibaabadi abende, ‘abaukishaga mukandu wibuwa.’ (Bik. 8:1, 4) Su otungunuka na kulungula mukandu wibuwa, opete bipeta bibuwa. Bu kileshesho, ba mbala-mashinda bababadi babingye mu dingi eumbo, abayile mwiumbo dipeepi, mubaadi lukalo lukata lwa balungudi ba mu ludimi lwabo. Myeshi ipeela kunyima, abaadi batushe tusaka mu lwalwa ludimi.
16. Mbikunyi byodya kupeta muloo mu mudimo odi nao binobino?
16 “Muloo wa Yehowa, ngi mbwenu bukome.” (Ne. 8:10) Kyakumpala atupete muloo wetu mwi Yehowa, kushi mu mudimo wetu sunga twekala beufule. Su atukyebe kwikala na muloo, abitungu tushale peepi na Yehowa na kutungunuka na kukulupila mwadi. Uka’shi wekalanga mufule mudimo obe mwanda okitanga mobe moso bwa kukwasha bantu ba yaya mbalo. Tula eshimba dyobe dyoso ku mudimo odi nao binobino na omono abikukwasha Yehowa bodya kwiufula.—Mul. 7:10.
17. Nkinyi akitungu’shi tuukye pabitale mudimo watudi nao binobino?
17 Abitungu tuwukye’shi atufubila Yehowa bwa loso, na’shi uno mudimo watudi nao lelo uno ngwa kapindji kapeela. Atwe boso, atukapete midimo ipya mu nsenga ipya. Aleksey atutemunga kumbagilo kwa uno mwisambo, ashinkamisha’shi kushintuluka kwadi mupete mu mudimo waye lelo akumulumbula ku kushintuluka kwa mu mafuku aafiki. Amba’shi: “Nauku’shi Yehowa na nsenga ipya mbya binyibinyi, kadi naadi namono bu be kula. Binobino nkwete namono Yehowa bu e kumpala kwande na’shi nsenga ipya inka binobino.” (Bik. 2:25) Sunga twekala na mudimo kinyi, tutungunukyeyi na kwikala peepi na Yehowa. Taketulekyeela nya, aketukwasha bwakupeta muloo mu kyoso kyatukitshi mu mudimo waye.—Yesh. 41:13.
LOONO 90 Twinyigisheeneyi
^ par. 5 Ingi nsaa, mudimo wa nsaa yoso wa bakwetu balume na bakashi wi kwimana sunga’shi be kwibapa mudimo upya. Uno mwisambo awakwila nkalakashi yabafumankanaa nayo na kilombene kwibakwasha bwabadya kuubiila na kwakwa kushintuluka kwa myanda. Awisambila dingi kilombene kukita bangi bwa kwibanyingisha na kwibakwatshishena, mpa na mayi a kulonda alombene kwitukwasha atwe boso nsaa yatufumankana na nkalakashi.
^ par. 4 Dingi, mwanda wa kukula, bakwetu balume bebungi abaadi na mashito, mbealekyele bakwetu balume bakii ba nsongwa. Tala mwisambo awamba’ shi: “Bena kidishitu batabadi banunu—Yehowa ataa lulamato lwenu na muulo,” mu Kitenta kya Mulami kya mweshi wa Kitema 2018, na mwisambo awamba’shi: “Lama butaale bwa mwishimba sunga nshalelo ashintuluka,” mu Kitenta kya Mulami kya mweshi w’Ekumi 2018.
^ par. 12 Abitungu bakulu ba mu tukongye tubabadi kumpala, bafunde mukanda wa kwibalubula nao mu kangi kakongye kushi kunyengakana, bwabadya kutungunuka na kufuba pangi bu bakulu, bafubi ba midimo sunga bu ba mbala-mashinda ba myeshi yoso.
^ par. 13 Tala miisambo ayamba’shi: “Quand on perd quelqu’un qu’on aime” mu Réveillez-vous! No. 3 a mu 2018, mu Fwalanse.
^ par. 56 BI MU BIFWATULO: Ba mulume na mukashi ba misionere abemika mudimo wabo na bakwete kuladika bena kakongye kabekalanga mwiumbo dyenyi na kudila.
^ par. 59 BI MU BIFWATULO: Pababafiki mwiumbo dyabo, bano ba mulume na mukashi bakwete kuteka Yehowa bwadya kwibakwasha bwa’shi bamone bya kukila na nkalakashi yabakwete kufumankana nayo.
^ par. 61 BI MU BIFWATULO: Kubukwashi bwa Yehowa bano ba mulume na mukashi abaluka dingi mu mudimo wa nsaa yoso. Abakula ludjimi lwabekalanga balongye pabekalanga bu ba misionere bwa kulungula mukandu wibuwa kwi bantu bafilukye be mu teritware a kakongye katabadi.
