1-3. Andi da wantu soni di sa mbei dee sëmbë dee ta du di hii-ten diniwooko, musu disa di wooko u de?

WAN baaa de kai Robert, ku hën mujëë Mary Jo, bi taki taa: „Di u du di sëndëlengiwooko söwan 21 jaa longi, hën mi mama ku mi tata, ku mi mujëë mama ku hën tata tuu ko suwaki. Hii fa u bi kë heepi de, tökuseei a bi hati u seei taa u bi musu go disa di kamian ka u bi ta dë.”

² Wan baaa de kai William, ku hën mujëë Terrie, bi taki taa: „Di u jei taa di gösöntu fuu an bi o da u pasi möön fuu toona go ta du di wooko fuu, hën u këë te na soni. Na tide jaa u bi kë go heepi a wan woto köndë, hën nöunöu a ko dë taa wa sa du ën möön.”

³ Wan baaa de kai Aleksey, bi taki taa: „U bi sabi taa dee sëmbë dee bi ta du ku u bi kë tapa di bëikantoo ka u bi ta wooko, ma tökuseei di de tapa di bëikantoo, a bi hebi da u seei, u di u bi musu kumutu a Bëtëli.”

4. Un hakisi woo piki a di woto aki?

⁴ Sömëni baaa ku sisa di ta du di hii-ten diniwooko, ku so u dee baaa ku dee sisa dee ta wooko a Bëtëli seei bi kisi wan woto wooko u de du. * A sa ta taanga da dee baaa ku dee sisa aki u de disa di wooko u de di de bi lobi gaanfa. Andi sa heepi de u de sa ta dini Jehovah waiwai go dou? Unfa useei sa heepi de? Dee piki u dee hakisi aki sa heepi hii u tuu fuu dini Jehovah waiwai go dou te soni ko tooka a u libi.

5. Andi sa pasa te soni ko tooka a u libi?

⁵ Te u ta du di peleikiwooko nasö te u ta wooko a Bëtëli, nöö u ta ko lobi dee sëmbë dee u ta peleiki da gaanfa seei, söseei u ta ko lobi di kamian ka u ta du di wooko fuu gaanfa tu. Fëën mbei ee a ko dë taa u musu disa di wooko di u ta du, nöö a ta hati u gaanfa seei. Wan soni di ta mbei a ta hati u tu, hën da u di u ta hangi dee baaa ku dee sisa u di kamian dë, nöö u ta booko u hedi ku de tu, möönmöön ee u bi musu foloisi kumutu dë, u di sëmbë bi ta du ku u a di köndë (Mat. 10:23; 2 Kol. 11:28, 29). A sa ta taanga da u fuu go libi a wan woto kamian, u di u musu ko guwenti soni u di kamian ka woo go dë. A sa ta taanga da u tu te u musu toona go a di köndë ka de kiija u. Robert ku Mary Jo, bi taki taa: „U bi ko fëëkëtë so guwenti di dee sëmbë u di köndë ka de kiija u, bi abi, söseei wa bi sa’ u peleiki a di mamabëë töngö fuu möön. U bi ta fii kuma wa bi dë sëmbë u di köndë dë möön.” Te so baaa ku sisa an dë a di hii-ten diniwooko möön, nöö a sa pasa taa soni ko taanga da de a di së u möni soni. Di soni dë sa mbei de fii bookosaka. Andi sa heepi de?

6. Unfa u ku Jehovah sa dë gaan mati go dou?

⁶ Mbei möiti fii ku Jehovah sa dë gaan mati go dou (Jak. 4:8). Unfa u sa du di soni aki? U sa du di soni aki, te u ta biibi taa hën da „di Sëmbë di ta haika begi” (Ps. 65:2). Psalöm 62:8 ta taki taa u musu ’konda hii dee soni dee dë a u hati’ da Jehovah. Jehovah sa du soni da u „gaanfa möön leki fa u ta begi ën. A sa du soni pasa ka pakisei fuu sa dou seei” (Ef. 3:20). Na dee soni dee u ta hakisi Jehovah nöö a ta da u. A sa heepi u ku wan fuka fuu a wan fasi di wa bi pena mëni seei.

7. (a) Andi o heepi u fuu ku Jehovah dë gaan mati go dou? (b) Te u luku Hebelejën 6:10-12, nöö andi o pasa ee u dini Jehovah ku hii u hati go dou?

⁷ Fuu ku Jehovah sa dë gaan mati go dou, nöö u musu ta lesi di Bëibel hiniwan daka, söseei u musu ta pakisei fundu u dee soni dee u ta lesi. Wan baaa di bi ta du di sëndëlengiwooko, bi taki taa: „I musu ta hoi di Wosudendu Dini hiniwan wiki, söseei i musu ta seeka iseei da dee komakandi, leti kumafa i bi ta du ën di i bi ta du di hii-ten diniwooko.” Boiti di soni di di baaa taki aki, i musu ta du di peleikiwooko fajafaja a di kemeente ka i go. Jehovah an ta fëëkëtë dee sëmbë dee bi dini ën ku hii de hati, aluwasi  ee a ko dë taa de an sa du sö hia soni a di dini di de ta dini ën möön.​—Lesi Hebelejën 6:10-12.

8. Unfa dee soni dee sikifi a 1 Johanisi 2:15-17 sa heepi i fu ja biinga a gudu baka?

⁸ Na biinga a gudu baka. Na mbei dee bookohedi u di goonliba u Saatan aki tapa i fii dini Jehovah (Mat. 13:22). Na haika sëmbë di an ta dini Jehovah, söseei na haika dee mati fii ku dee famii fii dee ta piki i taa ee i kë abi wan bunu libi, nöö i musu ko abi wan wooko ka de ta paka i hia möni. (Lesi 1 Johanisi 2:15-17.) Futoou Jehovah. A ta paamusi u taa a o ta heepi u fuu sa ta feni dee soni dee u abi fanöudu „te u dë a wan fuka”. A o ta heepi u u di biibi fuu an ko suwaki, a o ta heepi u fu wa ta dë pantapanta, söseei a o ta heepi u fuu sa feni dee soni dee u abi fanöudu fuu sa dë a libi.​—Heb. 4:16; 13:5, 6.

9. Te u luku Nöngö 22:3, 7, nöö faandi mbei a dë fanöudu fuu ta köni fu wa buta useei a paima ee an dë fanöudu, nöö andi sa heepi u fuu du soni a wan köni fasi?

⁹ Na buta iseei a paima ee an dë fanöudu. (Lesi Nöngö 22:3, 7.) So juu i musu paka hia möni fii sa foloisi kumutu a wan kamian go a wan woto kamian. Nöö te fii kë mëni, i sa buta iseei a paima. Fëën mbei i musu mbei möiti fu ja go leni möni a sëmbë fii bai soni di an dë fanöudu, sö taa ja ko dë a gaan paima. A sa ta taanga da u fuu sabi un mëni möni u musu leni te u dë ku wan bookohedi. A sa ta taanga da u, u di kandë u musu sölugu wan sëmbë fuu di dë ku suwaki. Te a dë sö, nöö a bi o bunu fii hoi a pakisei taa ee i „ta begi Masa Gadu nöömö ta . . . tja hii dee fuka fii nango ta konda dëën”, nöö a sa heepi i fii du soni a wan köni fasi. Jehovah sa da i di kötöhati fëën di bigi pasa hii sëmbë fusutan, nöö a o ’tjubi i hati ku i fusutan’. Di soni aki o heepi i fii du soni a wan köni fasi.​—Fil. 4:6, 7; 1 Pet. 5:7.

10. Unfa u sa ko abi njunjun mati?

¹⁰ Dë mati ku sëmbë di o da i taanga fii du soni a wan bunu fasi. Konda da dee mati fii unfa i ta fii, söseei piki de andi ta taanga da i, möönmöön ee dee lö soni dë bi miti de tu. Ee i ta du di soni aki, nöö a sa heepi i fii ko ta fii möön bunu (Peleik. 4:9, 10). Dee mati dee i bi abi a di kamian ka i kumutu, o dë mati fii jeti. Ma fa i foloisi ko dë a wan woto kamian, nöö i musu suku woto mati. Hoi a pakisei taa ee i kë ko abi mati, nöö i musu ko dë wan sëmbë di wotowan bi o kë tei kuma mati u de. Unfa i sa ko abi njunjun mati? Wë i sa ta konda da wotowan unfa Jehovah bi ta heepi i a di dini di i bi ta dini ën, sö taa deseei sa si unfa a bi dë wan piizii soni da i tjika. Kandë so baaa ku sisa an o fusutan faandi mbei i lobi di hii-ten diniwooko sö, ma kandë wotowan o kë fii konda möön soni da de, nöö i ku de o ko dë gaan mati. Ma i musu ta köni be ja konda hia soni fu iseei poi, u lei sëmbë unfa i du  soni da Jehovah tjika, nasö u lei sëmbë unfa soni bi hebi da i tjika.

11. Unfa womi ku mujëë di tööu sa ta dë waiwai go dou?

¹¹ Ee a ko dë taa ja sa du di hii-ten diniwooko möön u di i manu nasö i mujëë ko suwaki, nöö ja musu tei ën u hogi. Nasö ee iseei ko dë ku suwaki, nöö ja musu tei iseei u hogi u di i ta si kuma ju hën mbei i ku ën an ta du di hii-ten diniwooko möön. Hoi a pakisei taa un ko dë „wan sinkii”, söseei taa un bi soi a Jehovah fesi taa un bi o ta lobi unuseei aluwasi andi ta pasa (Mat. 19:5, 6, NW). Ee ja sa du di hii-ten diniwooko möön u di i mujëë ko dë ku bëë, nöö bakaten i musu mbei di mii fii ko sabi taa i lobi ën möön fa i lobi di wooko di i bi ta du. Mbei di mii fii ko sabi taa i ta si ën kuma „wan gaan bunu” di Gadu da i (Ps. 127:3-5). Konda dëën unfa soni bi dë da i di i bi dë a di hii-ten diniwooko. Te i ta du sö, nöö di soni aki sa heepi di mii fii faa sa kë go du di hii-ten diniwooko tu.

12. (a) Unfa u sa heepi dee baaa ku dee sisa dee ta du di hii-ten diniwooko u de sa du di wooko u de go dou? (b) Andi u sa du u heepi de u de ko guwenti di njunjun libi u de?

¹² Sömëni baaa ku sisa ta heepi dee baaa ku dee sisa dee ta du di hii-ten diniwooko u de du di wooko u de go dou. De ta da de taanga, de ta da de dee soni di de abi fanöudu, nasö de ta heepi de luku dee famii u de dee an ta libi zuntu ku de (Gal. 6:2). Ee dee baaa manda wan baaa nasö wan sisa di bi ta du di hii-ten diniwooko ko a di kemeente ka i dë, nöö na si kuma de mandëën ko u di an bi ta du di wooko fëën a wan bunu fasi, nasö u di a du wan soni di an bi bunu. * Wa musu mbei soni taanga da de, ma u musu heepi de. Tei de ku wai, nöö gafa de u di wooko di de bi du, hii  fa de an sa du hia soni möön, u di di gösöntu u de an ta da de pasi. Mbei möiti fii ko sabi de, söseei mbei möiti fii lei soni a de.

13. Unfa u sa heepi dee baaa ku dee sisa dee foloisi ko a di kemeente fuu?

¹³ Kandë bigibigi a o dë fii heepi dee baaa ku dee sisa dee foloisi ko a di kemeente ka i dë, u de sa feni wan wosu, wan wagi nasö wan woto soni di de o abi fanöudu u de sa nango a kamian. Kandë a o dë fanöudu tu fii heepi de u de feni wan wooko, ku woto soni di de o abi fanöudu. Kandë u sa heepi de u de seeka pampia soni. Ma di soni di de ta kë möön gaanfa, hën da i musu ta fusutan unfa soni taanga da de tjika. Kandë soni o ta taanga da de, u di de dë ku suwaki, nasö u di wan sëmbë u de dë ku suwaki. Kandë de ta tjali u di wan sëmbë u de ko lasi libi. * A kan tu taa de ta tjali u di de ta hangi dee mati u de u di kamian ka de bi dë fosu. A sa tei ten ufö de kisi deseei.

14. Unfa dee baaa ku dee sisa u wan köndë bi heepi wan sisa faa bi ko guwenti di njunjun libi fëën?

¹⁴ Te i ta peleiki makandi ku de, söseei te i ta da de degihati ku di fasi fa i ta libi ku de, nöö a o heepi de gaanfa seei. Wan sisa di bi ta du di hii-ten diniwooko sömëni jaa longi a wan woto köndë, bi taki taa: „A di köndë ka mi bi dë, mi bi ta lei sëmbë soni u Bëibel hiniwan daka. Ma a di köndë ka mi ko dë nöunöu, ma bi sa ta feni pasi seei u mi lesi wan tëkisi u Bëibel da wan sëmbë, nasö u lei de wan fëlön. Ma dee baaa ku dee sisa u di kemeente ka mi bi go, bi ta kai mi u mi go makandi ku de te de nango luku wan sëmbë baka. Te mi bi ta si unfa dee baaa ku dee sisa bi ta mbei möiti u lei sëmbë soni u Bëibel, söseei te mi bi ta si unfa dee sëmbë dë bi nango a fesi a di biibi, nöö mi bi ta fii bunu. Mi ko sa’ u peleiki da dee sëmbë u di pisiwata ka mi ta peleiki. Hii dee soni aki bi heepi mi u mi ta dë waiwai baka.”

15. Andi sa heepi i u soni waka bunu da i a di kamian ka de manda i fii go peleiki?

¹⁵ Soni sa waka bunu da i te de manda i go du di diniwooko fii a wan woto kamian. Na si kuma du ja bi du soni bunu tjika, mbei de puu i a di kamian ka i bi dë, söseei ja musu si kuma Jehovah an abi i fanöudu möön. Pakisei dee peipei fasi  fa Jehovah ta heepi i nöunöu. Djeesi dee fesiten Keesitu sëmbë. Aluwasi ka de bi go, de bi ta „tja di buka u Masa Jesosi ta paaja tu a dee köndëköndë nöömö be sëmbë jei” (Tjab. 8:1, 4). Ee i ta mbei möiti u du di peleikiwooko go dou, nöö soni o waka bunu da i. Lanti bi puu so baaa ku sisa di bi ta du di pioniliwooko a di köndë ka de bi dë. Ma de bi foloisi go a wan köndë di bi dë zuntu ku di köndë dë, u di möön peleikima bi dë fanöudu ala di ta fan di töngö u de. A wantu liba dendu, hën sömëni sëmbë bigi ta ko a dee komakandi.

16. Unfa i sa ta piizii ku di njunjun wooko di i kisi?

¹⁶ „Di piizii di Jehovah ta da sëmbë, hën ta da unu taanga” (Neh. 8:10). Di soni di musu ta möön mbei u ta dë waiwai, hën da di dë di u ku Jehovah musu dë gaan mati, ma an musu dë di wooko di u ta du, aluwasi ee u lobi di wooko di u ta du. Fëën mbei ee u kë ta dë waiwai, nöö u musu ta mbei möiti fuu ku Jehovah ta dë mati hii juu, söseei u musu futoou ën. Hoi a pakisei taa i bi ko lobi di fosu kamian ka i bi ta peleiki, u di i bi ta mbei hii möiti fii heepi dee sëmbë dee i bi ta peleiki da. Fëën mbei i musu mbei möiti fii ko lobi di njunjun wooko di i ta du, nöö joo si taa Jehovah o heepi fii ko lobi ën tu.​—Peleik. 7:10.

17. Andi u musu hoi a pakisei te a nama ku di wooko di Jehovah da u fuu du dëën?

¹⁷ U musu hoi a pakisei taa di dini di u ta dini Jehovah dë u teego, ma di wooko di a da u fuu du dëën nöunöu, dë u wan pisiten nöö. Kandë na dee wooko dee u ta du da Jehovah a di ten aki, woo ta du a di njunjun goonliba. Baaa Aleksey, di u bi taki soni fëën a bigi u di woto, ta biibi taa di du di a ta du peipei soni a di dini di a ta dini Jehovah, ta seekëën da di fasi fa soni o dë a di njunjun goonliba. A bi taki taa: „Hii juu mi bi ta biibi taa Jehovah dë tuutuu, söseei taa di njunjun goonliba da wan soni di o dë tuutuu. Ma mi ku Jehovah an bi dë gaan mati sö, söseei ma bi ta si kuma di njunjun goonliba o ko a di ten u mi. Nöunöu mi ku Jehovah ko dë gaan mati, söseei mi ta fii taa abiti möön di njunjun goonliba o ko” (Tjab. 2:25). Aluwasi un wooko Jehovah da u fuu du dëën, u musu mbei möiti fuu ku ën dë gaan mati go dou. Nöiti Jehovah o disa u. A o heepi u fuu ta dë waiwai, aluwasi un wooko u ta du a di dini di u ta dini ën, söseei aluwasi naasë u musu du di wooko dë.​—Jes. 41:13.