1-3. Fa a situwâsi fu son brada nanga sisa di e du a furuten diniwroko kenki?

„BAKA di wi prisiri na ini a zendelingwroko 21 yari langa, den papa nanga mama fu unu ala tu ben kon siki”, na dati Robert nanga Mary Jo taki. „Wi no ben si en leki wan problema fu sorgu gi den. Ma toku a ben hati wi taki wi ben musu gowe libi a presi pe wi ben e dini leki zendeling èn di wi ben lobi so te.”

² William nanga en frow Terrie e taki: „Di wi kon sabi taki wi no ben o man drai go baka na wi toewijzing fu di wi ben siki, wi krei. Ala ten wi ben wani dini Yehovah na ini wan tra kondre, ma now wi no ben man du dati moro.”

³ Aleksey e taki: „Wi ben sabi taki lanti ben wani tapu a bijkantoro pe wi ben e dini. Toku wi ben sari di den tapu Betel trutru èn di wi ben musu gowe fu drape.”

4. Sortu aksi wi o luku na ini na artikel disi?

⁴ Wan tra sani na taki dusundusun brada nanga sisa di ben e dini na Betel èn trawan di ben e du a furuten diniwroko kisi wan nyun toewijzing. * A kan muilek gi den brada nanga sisa disi fu tapu nanga a wroko di den ben e du. San kan yepi den fu fiti densrefi na a kenki disi? Fa wi kan yepi den? Den piki tapu den aksi disi kan yepi wi alamala te sani e kenki na ini wi libi.

5. San kan pasa efu wi kisi wan nyun toewijzing?

⁵ Awinsi wi e dini na Betel noso wi e du a furuten diniwroko na tra fasi, wi e kon lobi den sma èn a presi pe wi e  dini. Dati meki wi e sari te wi abi fu gowe libi den. Wi e misi den brada nanga sisa èn wi e broko wi ede nanga den, spesrutu te wi musu gowe fu di sma e frufolgu den (Mat. 10:23; 2 Kor. 11:28, 29). Boiti dati, te wi musu froisi go na wan tra presi a kan muilek srefisrefi fu kon gwenti a kulturu drape. A kan muilek srefi fu go baka na oso. Robert nanga Mary Jo e taki: „Wi ben musu kon gwenti a libi baka na ini wi eigi kondre èn a ben muilek srefi fu preiki na ini wi eigi tongo. Wi ben abi a firi leki wi ben de trakondre sma na ini wi eigi kondre.” Son sma di kisi wan nyun toewijzing kan kisi kostu di den no ben fruwakti. Den sani disi kan meki den bruya èn den kan firi brokosaka. San kan yepi den?

6. Fa wi kan tan krosibei na Yehovah?

⁶ Tan krosibei na Yehovah (Yak. 4:8). Fa wi kan du dati? Frutrow tapu Yehovah, „a sma di e arki begi” (Ps. 65:2). Psalm 62:8 e taki: „Fruteri en ala san de na tapu un ati.” Yehovah kan du „moro leki iniwan sani di wi e aksi noso prakseri” (Ef. 3:20). A no e du soso san wi e aksi en na ini begi. A kan du sani tu di wi no e fruwakti, fu lusu den problema fu wi.

7. (a) San wi musu du fu tan krosibei na Yehovah? (b) Soleki fa Hebrewsma 6:10-12 e sori, dan san o de a bakapisi efu wi e tan dini Yehovah fayafaya?

⁷ Fu kan tan krosibei na Yehovah, dan wi musu leisi Bijbel ibri dei èn wi musu denki dipi fu san wi e leisi. Wan brada di ben dini leki zendeling fosi e taki: „Tan hori na Osofamiri Anbegi ibri wiki èn sreka gi den konmakandra, neleki fa yu ben e du kaba na ini a toewijzing di yu ben abi fosi.” Tan du a preikiwroko fayafaya tu na ini a nyun gemeente fu yu. Yehovah no e frigiti den sma di e tan dini en, awinsi den no man du ala san den ben e du fosi.​—Leisi Hebrewsma 6:10-12.

8. Fa den sani di skrifi na 1 Yohanes 2:15-17 e yepi wi fu no feti baka gudu?

⁸ No feti baka gudu. No meki den broko-ede fu a grontapu fu Satan meki yu tapu fu dini Yehovah (Mat. 13:22). No arki sma di no e dini Yehovah noso mati nanga famiri di e gi yu deki-ati fu suku gudu na ini a grontapu fu Satan. (Leisi 1 Yohanes 2:15-17.) Frutrow tapu Yehovah, di pramisi  taki a o yepi wi „na a yoisti ten” (Hebr. 4:16). A o yepi wi fu tan abi wan tranga bribi èn fu no bruya. Boiti dati, a o gi wi den sani di wi abi fanowdu.​—Hebr. 13:5, 6.

9. Soleki fa Odo 22:3, 7 e sori, dan fu san ede a prenspari fu no meki paiman di no de fanowdu, èn san kan yepi wi fu teki koni bosroiti?

⁹ No meki paiman efu dati no de fanowdu. (Leisi Odo 22:3, 7.) Te wi musu froisi, dan wi kan abi furu kostu èn wi kan kon na ini paiman makelek. Sobun, no leni moni fu bai sani di yu no abi fanowdu trutru. Son leisi a kan muilek fu bosroiti omeni moni wi musu leni, spesrutu te wi abi furu broko-ede. Fu eksempre, kande wi musu sorgu gi wan famiri di siki. Na ini den sortu situwâsi disi a bun fu ’begi fayafaya’. Dati o yepi yu fu teki koni bosroiti. Yehovah o arki den begi fu yu. A o gi yu a freide di o ’kibri yu ati nanga yu frustan’ èn dati o yepi yu fu teki koni bosroiti.​—Fil. 4:6, 7; 1 Petr. 5:7.

10. Fa wi kan meki nyun mati?

¹⁰ Tan abi bun mati. Fruteri den bun mati fu yu fa yu e firi èn sortu problema yu abi. Yu kan taki spesrutu nanga den wan di ben de na ini a srefi situwâsi tu. Te yu e du dati, dan yu o firi moro bun (Preik. 4:9, 10). Den mati di yu ben abi na a presi pe yu ben dini fosi o tan yu mati. Ma now yu musu meki nyun mati. Hori na prakseri taki efu yu wani mati, dan yu musu du muiti fu de wan mati gi trawan. Fa yu kan meki nyun mati? Fruteri trawan sortu moi sani yu ondrofeni na ini a furuten diniwroko èn meki trawan si taki yu e prisiri fu dini Yehovah. Son sma na ini a gemeente no o frustan fu san ede yu lobi a furuten diniwroko, ma trawan o wani sabi moro èn den o tron bun mati fu yu. Ma luku bun taki yu no e taki tumusi furu fu yusrefi èn no krutukrutu fu a nyun situwâsi fu yu.

11. Fa yu kan tan abi wan koloku trowlibi?

¹¹ Efu yu ben musu tapu nanga a furuten diniwroko fu di yu trowpatna siki, dan yu no musu gi en a fowtu. Ma efu yu na a wan di e siki, dan yu no musu prakseri taki na fu yu ede meki yu trowpatna ben abi fu komoto na ini a toewijzing fu en. No frigiti taki unu na „wán skin” èn unu pramisi na fesi Yehovah taki un ben o sorgu gi makandra awinsi san e pasa (Mat. 19:5, 6). Efu yu ben musu tapu nanga a furuten diniwroko fu di yu kon de nanga bere, dan yu musu meki yu pikin sabi taki a prenspari moro a toewijzing di yu ben abi. No meki a kisi a firi taki na fu en ede yu ben musu tapu nanga a wroko fu yu. Na presi fu dati yu musu abi a gwenti fu taigi yu pikin taki en na „wan blesi” fu Gado  (Ps. 127:3-5). Ma yu musu fruteri en tu sortu moi sani yu ondrofeni na ini a toewijzing fu yu. Te yu e du dati, dan yu kan gi yu pikin deki-ati fu du a furuten diniwroko tu neleki fa yu ben du dati.

12. (a) Fa wi kan yepi den wan di e du a furuten diniwroko fu tan du a wroko fu den? (b) Fa wi kan yepi den fu gwenti a nyun situwâsi fu den?

¹² Furu gemeente nanga tra brada nanga sisa e yepi den wan di e du a furuten diniwroko fu man tan du a wroko fu den. Wan fasi fa den e du dati na taki den e gi den deki-ati èn den e gi den moni nanga tra sani di den abi fanowdu. Boiti dati, efu den wan di de na ini a furuten diniwroko e tan fara fu den famiri, dan a gemeente e yepi fu sorgu den famiriman fu den (Gal. 6:2). Efu wan sma di e du a furuten diniwroko kisi wan nyun toewijzing èn a kon dini na ini a gemeente fu yu, dan yu no musu denki taki a no ben du en wroko bun noso taki a du wan ogri. * Na presi fu dati yu musu pruberi fu meki en moro makelek gi den. Gi den wan switikon èn prèise den gi a wroko di den du, srefi efu den no man du so furu moro fu di den siki. Meki muiti fu kon sabi den. Yu kan leri furu fu den lepi brada nanga sisa disi.

13. Fa wi kan yepi den wan di kisi wan nyun toewijzing?

¹³ A kan taki na ini a bigin, wi musu yepi den brada nanga sisa di kisi wan nyun toewijzing fu feni wan oso, wan wroko noso tra sani di den abi fanowdu. Kande yu musu sori den fa den kan kisi son sani soleki datra karta. Ma a moro prenspari sani  di yu kan du, na fu pruberi fu frustan a situwâsi fu den. Kande den siki noso wan famiriman fu den siki. Kande den e sari fu di wan sma fu den dede. * Kande den no e taki fu en, ma a kan tu taki den e sari fu di den e misi den mati di den ben abi pe den ben e dini. Disi kan meki den bruya èn a e teki ten fosi den firi disi gowe.

14. Fa den brada nanga sisa fu wan gemeente yepi wan sisa fu fiti ensrefi na a nyun situwâsi fu en?

¹⁴ Efu yu e du a preikiwroko makandra nanga den èn efu yu de wan bun eksempre gi den, dan dati kan yepi den fu fiti densrefi na a nyun situwâsi fu den. Wan sisa di ben dini furu yari na ini wan tra kondre e taki: „Na a presi pe mi ben dini fosi, mi ben studeri Bijbel nanga sma ala dei. Na ini a nyun toewijzing mi no ben kisi na okasi srefi fu leisi wan Bijbeltekst gi sma na ini a preikiwroko noso fu sori den wan felem. Ma den brada nanga sisa fu a gemeente ben tyari mi go na den gobaka nanga Bijbelstudie fu den. Te mi ben si a muiti di den e meki fu studeri Bijbel nanga sma, dan dati ben meki mi si taki sma de ete na ini a kontren di wani sabi moro. Mi leri fu bigin takimakandra nanga sma na ini a kontren fu a nyun gemeente. Ala den sani disi yepi mi fu abi prisiri baka.”

15. San yu musu du fu kan abi bun bakapisi na ini a nyun toewijzing fu yu?

¹⁵ Yu kan abi bun bakapisi na ini a nyun toewijzing fu yu. No denki taki yu no ben du yu wroko bun na ini a toewijzing di yu ben abi fosi èn no denki taki sma no abi warderi gi san yu e du now. Prakseri o furu Yehovah e yepi yu now èn tan du a preikiwroko. Teki na eksempre fu den Kresten fu a ten fu den apostel. Den wan di ben lowe go na tra presi fu di den ben e kisi frufolgu, ben „waka a heri kondre fu preiki a bun nyunsu” (Tori 8:1, 4). Efu yu e tan preiki, dan yu kan abi bun bakapisi. Fu eksempre, wan tu pionier no ben mag  tan moro na ini a kondre pe den ben e dini. Dati meki den froisi go na wan tra kondre di ben de krosibei èn pe yepi ben de fanowdu na ini wan tongo di den ben man taki tu. Na ini wan tu mun nomo den ben man seti nyun grupu na ini a tongo dati.

16. San kan yepi yu fu abi prisiri na ini yu nyun toewijzing?

¹⁶ „A prisiri di Yehovah e gi, de leki wan fortresi gi unu” (Neh. 8:10). Awinsi o furu wi lobi a toewijzing di wi abi, toku na a matifasi di wi abi nanga Yehovah musu gi wi moro prisiri. Fu dati ede, tan krosibei fu Yehovah. Aksi en fu gi yu koni, fu tiri yu èn fu yepi yu. Hori na prakseri taki yu ben kon lobi a toewijzing di yu ben abi fosi, fu di yu ben e du ala san yu man fu yepi sma. Du a srefi na ini yu nyun toewijzing, dan Yehovah o yepi yu fu lobi a wroko disi tu.​—Preik. 7:10.

17. San wi musu hori na prakseri fu a toewijzing di wi abi now?

¹⁷ Wi musu hori na prakseri taki wi o dini Yehovah fu têgo, ma a toewijzing di wi abi now kan kenki. A kan taki na ini a nyun grontapu wi alamala o kisi tra wroko fu du. Aleksey di wi ben kari na a bigin, e bribi taki den sani di a e ondrofeni now, e sreka en gi den kenki di o kon na ini a nyun grontapu. A e taki: „Ala ten mi ben bribi na ini Yehovah èn na ini a nyun grontapu. Ma now fosi mi e firi taki mi de krosibei fu Yehovah èn now mi de seiker taki a nyun grontapu de leti na baka uku” (Tori 2:25). Awinsi pe wi e dini, wi musu tan krosibei fu Yehovah. Noiti a o gowe libi wi, ma a o tan yepi wi fu prisiri nanga a wroko di wi e du gi en, awinsi pe wi de.​—Yes. 41:13.