NDRIMA NYA GIHEVBULO 34
Hi nga tsaka kharini thumoni nya wuphya?
“Nungungulu khwadi, kha divaledwi khu thumo mu wu giridego enu, ni lihaladzo mu li yeyedzidego.” — HEBH. 6:10.
NDZIMO 38 A na gu tiyisa
ESI HI NA SI HEVBULAGO AVBA NYA NDRIMA YEYI *
1-3. Khu sevbini sighelo nyo khaguri si girago sithumi nya tepo yatshavbo si vbindrugedzwa mithumo yaso?
ROBERT ni Mary Jo vari khavo: “Hwane nyo vbedze 21 myaga nya gu tsakise ngudzu na hi gu thuma kha nga vamisiyonariyo, vatshavbo vavelegi vathu nya vana va di rereka. Si hi tsakiside gu va sayisa. Ganiolu si vbiside ngudzu gu khuga khu wulanga hi nga ba hi wu gola ngudzu.”
2 William ni Terrie vari khavo: “Tepo hi nga tugula gu khethu kha hi na nga bweleya gambe thumoni gwathu khu kotani nya mawugelo yathu, hi di liya. Makungo yathu nyo thumeye Jehovha ga limbe litigo ma di vbeya.”
3 Aleksey wari khuye: “Hi di gu dziti gu khethu vawugeyi vathu va di gu vbweta gu sega xikiritori nya litamo avba nyi nga ba nyi thumeya avbo, ganiolu si vbiside ngudzu tepo si nga girega nigu si di lomba gu hi khuga khu Bheteli.”
4. Khu sevbini siwudziso hi na bhulago khiso avba nya ndrima yeyi?
4 Nigu, gutala nya ava va nga ba vari thumoni nya tepo yatshavbo, gupata ni ava va thumago Bheteli, va ningidwe mithumo nya yiphya. * Isoso si garadzede ngudzu vandriyathu vovo nyo tumbege gu diga mithumo va nga ba va yi gola ngudzu. Ginani gi va phasidego gu emisana ni gigaradzo gyogyo? Hi nga va phasa kharini? Mihlamulo nya siwudziso sesi yi na hi phasa hatshavbo gu emisana ni guvbindrugedza nya siemo womini gwathu.
EDZI HI NGA EMISANAGO KHIDZO NI GU GUVBINDRUGEDZA?
Khu ginani gu diga thumo si khalago gigaradzo ga ava va thumago thumoni nya tepo yatshavbo? (Wona ndrimana 5) *
5. Guvbindrugedzwa nya thumo wathu hengeledzanoni gu nga hi khuha khu dzindziya muni?
5 Gani ho thumeya Bheteli mwendro thembweni, adzina hi nga gola ngudzu vathu va omu hi thumeyago umo ni wulanga wakone. Go tshuka gu girega gilogyo si lombega gu hi diga thumo wathu, si ngu vbisa ngudzu. Kholu hi na va suva vandriyathu hi bwe hi va garadzegeya, ngudzungudzu so ba si lombega gu diga thumo wathu khu kotani nya gu wugedwa. (Mat. 10:23; 2 Kor. 11:28, 29) Nigu, adzina si nga hi garadzeya gu khaleya gu rureteya kholu si na lomba gu hi dzipwananisa ni mavbanyelo nya maphya nya wulanga ni wulanga. Hi nga dzipwa khu ndziya yayimweyo ambari ha gu ba hi bweleya omu hi tago khumo. Robert ni Mary Jo vari khavo: “Hi di divaledwe khu silo nyo khaguri nya tumbunugo wathu ambari gu tshumayela khu lidimi lathu, kholu hi thumide khu myaga nya yingi ga limbe litigo, khu kharato ha gu dzipwa nga vapfhuma tigoni gwathu.” Vambe va vbindrugedzidwego mithumo yawe hengeledzanoni, khavba ni avba adzina va nga tshangana ni gigaradzo nya dzitsapawu va nga ba va sa gi vireya. Adzina va nga dzipwa na va si phasi gilo, na va sa tiya ambari gu vbeya tshivba. Ginani gi nga va phasago?
Si na ni lisima ngudzu gu hi hidzimeya ga Jehovba hi bwe hi mu tumba (Wona dzindrimana 6-7) *
6. Hi nga hidzimeya kharini ga Jehovha?
6 Hidzimeya ga Jehovha. (Jas. 4:8) Hi nga gira kharini isoso? Mu tumbe kha nga a ‘muyingisi nya milombelo.’ (Ndzi. 65:2) Ndzimo 62:8 yari khiyo: “Mu embeledzeleni mabala ya monyoni gwanu.” Jehovha a nga gira nya singi “guvbindra, satshavbo esi hi mu lombago, ambari ni esi hi alakanyago.” (Efes. 3:20) Jehovha kha hi ningi basi esi hi mu lombago omu nya milombelo yathu. Uye a nga gira silo hi nga mba si vireya, adzina silo nya gu gima hi di ngasi si pimisi gasi gu lulamisa sigaradzo sathu.
7. a) Ginani gi na hi phasago gu simama vbafuvbi ni Jehovha? b) Khu guya khu Vahebheru 6:10-12, khu wevbini handro hi na wu manago khu gu simama gu thumeya Jehovha na hi tumbegide?
7 Gasi gu simama gu hidzimeya ga Jehovha, hi yede gu leri milowo tshigu ni tshigu hi bwe hi dundrugeya khesi hi hevbulago. Misiyonariyo moyo nya nyamayi wari khuye: “Gira longoloko nya wukhozeyi nya ndranga ni gu dongiseya mitshangano, kha nga edzi u ba u gira khidzo thumoni wago wa gale.” Nigu, simama gu gira satshavbo u si kodzago thumoni nya gu tshumayele mahungu nya yadi libandlani gwago nya liphya. Jehovha a ngu va dundruga vatshavbo va simama gu mu thumeya khu gu tumbega, ambari va gu ba va si si kodzi gu gira satshavbo va nga ba va gira gale. — Leri Vahebheru 6:10-12.
8. Malito ma gomogo omu ga 1 Johane 2:15-17 ma nga gu phasa kharini gu vbevbugisa womi wago?
8 Vbevbugisa womi wago. U nga dzumeleyi gugaradzega nya litigo leli la Sathane gu gu digisa gu thumeya Jehovha. (Mat. 13:22) U nga dzumeyi gu ndreyiswa khu vathu va gu mba thumeya Jehovha, dzipari mwendro valongo va pimisago gu khavo womi nya wadi khu gu mana dzitsapawu nya dzingi. (Leri 1 Johane 2:15-17.) Tumba Jehovha oyu a tumbisago gu hi ninga esi si hi keneleyago khu tepo yakone. Uye a na hi phasa gu simama gu tiyisa gukhodwa gwathu, hi rula a bwe a hi ninga esi si hi keneleyago khu nyamani. — Hebh. 4:16; 13:5, 6.
9. Khu guya khu Mavingu 22:3, 7, khu ginani si gu sa lisima gu potsa mangava nya mba na gighelo nigu ginani gi nga hi phasago gu hunga makungo nya yadi?
9 U nga fiyari nya mu fiyari dzitsapawu. (Leri Mavingu 22:3, 7.) Guvbindrugedza si nga hi gira hi gastari dzitsapwu nya dzingi, nigu si ngu vbevbuga ngudzu gu hi gira mangava. Gasi gu vbungula mangava, diga gu renga silo si sirigo nya litshina gasi gu vbanya. Si ngu garadza guti dzitsapawu u na dzi thumisago wa gu ba u romo omu nya giemo nyo garadze, nya nga gu khataleya muthu nyo khaguri u mu golago a dwalago. Wa gu ba uri ga giemo nya nga gyogyo, dundruga gu khuwe gu lombeleya “gikhati gyatshavbo nyamba garala” si nga gu phasa gu hunga makungo nya yadi. Jehovha a nga hlamula milombelo yago khu gu gurudzisa monyo gasi u hunga makungo nya yadi. — Filp. 4:6, 7; 1 Ped. 5:7.
10. Hi nga gira kharini dzipari nya dziphya?
10 Simama gu dzi tshanganisa ni vathu nya vadi. Bhuleya edzi u dzipwago khidzo ni sigaradzo u tshaganidego naso dzipari dzago nya dzadi, ngundzungudzu ava adzina va emisanidego ni gigaradzo nyo fane. Wa gu gira isoso si na gu phasa gu dzipwa gwadi. (Muh. 4:9, 10) Dzipari u giridego eyi u nga ba u thuma gale, dzi ngari dzipari dzago. Ganiolu, olu thumoni gwago nya wuphya u yede gu gira dzipari nya dziphya. Dundruga gu khuwe gasi gu mana dzipari, u yede gu khala muthu nya wupari. Ina ka, u nga gira kharini dzipari nya dziphya? Bhuleya vambe matshango u ma manidego thumoni wa Jehovha ni gutsaka u gupwidego. Ambari vambe libandlani va gu mba pwisisa sighelo si gu girago u gola thumo nya tepo yatshavbo, vambe adzina va nga vbweta guti nya singi va bwe va khala dzipari dzago. U nga ganeleyi basi khuwe mune, mwendro khu silo u giridego thumoni wa Jehovha nigu u nga khaleyi gu khumbuga sigaradzo u tshanganidego naso.
11. Lipango lago li nga simama kharini na li tsakide?
11 Abari gu so lomba gu diga thumo nya tepo yatshavbo khu kotani ya pari yago nya wugadzi yi dwalago, u nga yi zangareyi. Nigu, abari gu khuwe u dwalago, u nga dzipwi dandru u pimisa gu khuwe wa gu khunguvanyisa pari yago nya wugadzi. Dundruga gu khuwe enu mu “nyama mweyo,” nigu tepo mu nga tshadha mu tumbiside Jehovha gu khenu mu na sayisana ambari go dugeleya ginani. (Mat. 19:5, 6) Abari gu so lomba gu diga thumo khu kotani nya gyanana mu nga ne gi vireya, gi tiyisegiseni gu khenu khya lisima ngudzu gwanu guvbindra thumo mu nga ba mu gira. Gi embeyeni gu khenu igyo ‘tshatshazelo’ wu tago khiyo ga Nungungulu. (Ndzi. 127:3-5) Gi bhuleyeni gambe khu matshango nyo tsakise mu ma manidego thumoni gwanu nya tepo yatshavbo. Isoso si nga kutsa gyanana gyanu gu thumeya Jehovha thumoni nya tepo yatshavbo kha nga enu.
EDZI VAMBE VA NGA PHASAGO KHIDZO
12. a) Hi nga phasa kharini ava va thumago thumoni nya tepo yatshavbo gu simama thumoni gwawe? b) Hi nga va phasa kharini gu dzi pwananisa ni giemo nya giphya?
12 Si ngu tsakisa gu wona gu khethu vatshavbo vandriyathu mabandlani va ngu phasa ava va gomogo thumoni nya tepo yatshavbo gu simama thumoni gwawe. Avo va gu gira isoso khu va tiyisa gasi va simama thumoni gwawe, gu va ninga esi si va keneleyago khu nyamani, mwendro gu va phasa gu khathaleya valongo vawe va khalago hwindzo. (Gal. 6:2) Vo gara ava va thumago thumoni nya tepo yatshavbo va rumedwa libandlani gwago khu gu ba wu vbindrugedzidwe thumo wawe, u nga pimisi gu khuwe kha va nga ba va gira thumo nya wadi mwendro gyomo nyo khaguri va nga gi ghodhosa. * Vbavbandze nya isoso va phase gasi silo si va vbevbugeya. Va hoyozeye khu gu tsaka, u va zundza khu thumo va wu girago, ambari na va si si kodzi gu gira nya singi khu kotani nya madwali. Zama gu vati gwadi. Hevbula nya singi khu guti gwawe, esi va si hevbudego ni matshango yawe.
13. Giphaso muni hi nga ningago ava va hakhidego thumo nya wuphya?
13 Gupheyani, ava va hakhago thumo nya wuphya adzina va nga vbweta giphaso gyago gasi gu mana nyumba nyo khale avbo, guti avba dzi emago dzimovha, gu mana thumo, ni simbe silo nya litshina si va keneleyago. Si nga gira va vbweta gambe guti edzi silo sa tshigu ni tshigu si thumago khidzo nya nga avba gu livbwago avbo mikhupo ni simbe. Igyo nya lisima ngudzu va gi vbwetago, khandri gu pwedwa wusiwana ganiolu gupwisiswa basi. Si nga gira na va gu dwala mwendro gu dwaledwa khu nongo wawe. Avo adzina va ngupwa wuvi nya wukhongolo khu kotani nya gu fedwe khu gigodwa gyawe. * Ambari va gu mba ganeya khiso, avo adzina va ngu garadzega khu kotani nya olu va suvago dzipari dzawe va dzi giridego thumoni wawe wa gale. Si nga dzega tepo na va gu emisana ni gudzipwa gogo, a gu silo si vbisisago hungo.
14. Vahuweleyi va libandlani va phaside kharini ndriyathu moyo nya nyamayi gu dzi pwananisa ni thumo nya wuphya?
14 Wa gu tshumayela navo ni gu va tiyisa khu giyeyedzo gyago nya gyadi, u nga va phasa gu dzi pwananisa ni giemo nya giphya. Ndriyathu moyo nya nyamayi a thumidego khu myaga nya yingi ga limbe litigo wari khuye: “Thumoni gwangu nyo pheye, nyi di gu gimbidzisa sihevbulo nya Bhibhiliya tshigu ni tshigu. Ganiolu omu nya thumo wangu nya wuphya, si ngu garadza ambari gu manega ni lithomo nyo tule Bhibhiliya mwendro gu yeyedza vhidhiyu gutshumayelani. Ambari ulolo, vandriyathu va libandlani gwangu nya liphya va nyi lombide gu hongola navo maendroni yawe nyo bweleleye ni sihevbuloni saye. Tepo nyi nga wona vandriyathu vovo nyo tumbege ni sighingi na va gu gimbidzisa sihevbulo nya Bhibhiliya si tshunguhedzago si nyi giride nyi tsakiswa khu wulanga wule. Nyi hevbude gu pheya mabhulo ga gipandre nya giphya hi nga ba hi tshumayela avbo. Satshavbo soso si nyi phaside gu tsaka gambe.”
SIMAMA GU GIRA SATSHAVBO U SI KODZAGO
Vbwetedzeya dzindziya nya gu engedzeye thumo wago gipandreni u tshumayelago umo (Wona dzindrimana 15-16) *
15. U nga dugeleya kharini thumoni gwago nya wuphya?
15 Anuwe u nga dugeleya thumoni gwago nya wuphya. U nga pimisi gu khuye khwa gira thumo nya wadi thumoni wago nyo pheye mwendro gu khuwe olu khu ngo phasa ngudzu. Dundrugeya khu dzitepo nya dzingi edzi Jehovha a gu phasago khidzo olu u bwe u simama gu tshumayela. Pimedzeya maKristo nyo tumbege ya lizana myaga nyo pheye. Ni hayini va nga ba va romo avo va di “gimbila khu talala ni talala va gu hevbudza Mahungu nya Yadi.” (Mith. 8:1, 4) Mizamo yago nyo simame gu tshumayela yi nga vbwera mihandro nya yadi. Khu giyeyedzo, tsawa nyo khaguri nya vapiyonero wu di tutumiswa tigoni gwawe khavbovbo va hongola ga litigo la vbafuvbi avbo gu nga ba gu vbwetega vahuweleyi nya vangi va nga ba va ganeya lidimi lawe. Khu migimana nya yidugwana, tsawa wu di dandra ngudzu.
16. U nga gu mana kharini gutsaka thumoni gwago nya wuphya?
16 “Litsako la Pfhumu khilo li gu tshivba yathu.” (Neh. 8:10) Gutsaka gwathu nya gukhongolo gu vbwetega gu kutswa khu wupari hi gu nawo khu Jehovha, nasiri khu thumo hi girago ambari ha gu ba hi wu haladza kharini. Khu kharato ha gu ba hi vbweta gu manega ni gutsaka, hi yede gu tiyisa ngudzu wupari wathu ni Jehovha hi bwe hi tumba uye gasi gu mana guti, wuthangeyi, ni giphaso. Dundruga gu khuwe u wu gode thumo wago wa gale kholu u nga ba u gira satshavbo u nga ba u si kodza gasi gu phasa vathu. Dzi garadze gambe thumoni gwago nya wuphya, u bwe u wona edzi Jehovha a na gu phasago khidzo gu wu haladza nuwo. — Muh. 7:10.
17. Ginani hi yedego gu gi dundruga khu thumo hi wu girago olu?
17 Gu vbwetega hi dundruga gu khethu hi na thumeya Jehovha kala gupindruga, ganiolu thumo hi wu girago olu khwa gitepwana. Mafuni nya maphya, hatshavbo hi na ba hi vbindrugedzedwe mithumo hi girago. Aleksey a khumbugidwego gupheyani nya ndrima, ganede gu khuye guvbindrugedzwa nya thumo waye si di gu mu dongiseya gu emisana ni guvbindrugedza a na manegago nago mindru ga tshigu. Uye wari khuye: “Tepo yatshavbo nyi ngu dziti gu kheni Jehovha ni mafu maphya silo nya lisine, ganiolu dzimbe dzitepo si di gu gira khatshi somo hwindzo, ganiolu olu nya gu wona Jehovha nga khatshi womo mbeli gwangu, nigu mafu maphya nyo ma wona na mari vbafuvbi ngudzu.” (Mith. 2:25) Khu kharato, ambari ha gu ningwa thumo nyo khale kharini, ethu ha gu vbweta gu simama vbafuvbi gwaye. Uye gima kha na nga hi diga, ganiolu uye a na hi phasa gu mana gutsaka ga satshavbo esi hi na si kodzago gu gira thumoni gwathu, ni hayini hi na thumeyago umo. — Isa. 41:13.
NDZIMO 90 Hongoleni hi tiyisana
^ ndri. 5 Dzimbe dzitepo vandriyathu va gu romo thumoni nya tepo yatshavbo, si nga lombega gu va diga thumo va ningidwego mwendro gu ningwa wumbe thumo. Ndrima yeyi yi na ganeya khu sigaradzo va tshanganago naso ni egi gi nga va phasago gu dugeleya avba nya guvbindrugedza gogo. Yi na ganeya gambe khedzi vambe va nga va phasago khidzo ni gu va tiyisa ni edzi matshina nya milayo nya Bhibhiliya ma nga phasago khidzo ethu hatshavbo gu emisana ni guvbindrugedzwa.
^ ndri. 4 Khu gu fana, tepo vandriyathu va vbohago ga tanga nyo khaguri gutala nya avo va gu ningeya malungelo yawe ga vandriyathu nya vaphya. Wona dzindrima “Irmãos mais velhos – Jeová dá muito valor à vossa lealdade,” omu nya Mukhedziseyi nya Setembro nya 2018 khu giputukezi ni “Simamani ni gurula monyoni ambari siemo so vbindrugedza,” omu nya Mukhedziseyi nya Outubro nya 2018.
^ ndri. 12 Gasi va si hweyi gu thuma kha nga mdhota, vaphasedzeyi nya libandla, mwendro vapiyonero, madhota nya libandla va thumedego umo va yede gu lova lidangaliya nyo va tivegise “carta de apresentação” khu gu vbiredza va rumeleya libandla lawe nya liphya.
^ ndri. 13 Wona gipandre gi gu khigyo “Como lidar com a dor da morte,” omu nya Khendzugani! nya N.° 03 nya 2018, khu giputukezi.
^ ndri. 57 TSHAMUSELO NYA DZIFOTO: Patwa wu gurumedzigidego gu diga thumo wawe nya wumisiyonariyo ga litigo nyo khaguri, wu tshadzisago libandla khu ndziya nya lihaladzo.
^ ndri. 59 TSHAMUSELO NYA DZIFOTO: Na vari tigoni gwawe nya mavelego, patwa wawumowo wo simama gu gombeya ga Jehovha gasi a va phasa gu pala sigaradzo va emisanago naso.
^ ndri. 61 TSHAMUSELO NYA DZIFOTO: Khu gu phaswa khu Jehovha, patwa wule wu bwelede gambe thumoni nya tepo yatshavbo. Avo va gu thumisa lidimi va li hevbudego tepo va nga ba vari vamisiyonariyo gasi gu tshumayela vathu va dzudego gipandreni nya libandla lawe nya liphya.
