CIBALO CAKWIIYA 34
Mbomukonzya Kukkomana Nokuba Kuti Bukkale Bwacinca
“Leza tali Leza uutaluleme pe uunga waluba milimo yanu alimwi aluyando ndomwakatondezya kuzina lyakwe.”—HEB. 6:10.
LWIIMBO 38 Uyoomuyumya
IZILI MUCIBALO *
1-3. Ntwaambo nzi itukonzya kupa kuti bukkale bwababelesi baalubazu bucince?
BA ROBERT alimwi aba Mary Jo bakaamba kuti: “Notwakakkwanya myaka iili 21 mumulimo wesu wabumisyinali, bazyali besu boonse bone bakatalika kuciswa. Twakalikkomene kubalanganya, pele cakali kuusisya kusiya munzi wesu ngotwakali kuyanda kapati.”
2 Ba William alimwi aba Terrie bakaamba kuti: “Ciindi notwakazyiba kuti tatukoojokela kumulimo wesu akaambo kakuciswa, twakalila. Makanze eesu aakubelekela Jehova kucisi cimbi, akagola.”
3 Ba Aleksey bakaamba kuti: “Twakalizyi kuti mfwulumende yakali kuyanda kwiijala ofesi yamutabi nkondakali kubelekela. Pele twakausa kapati ciindi eeco nocakacitika alimwi twakazwa a Beteli.”
4. Mibuzyo nzi njotutiibandike mucibalo eeci?
4 Kuyungizya waawo, babelesi baciindi coonse banji, kubikkilizya abaabo ibabelekela a Beteli, bukkale bwabo bwakacinca. * Cilakonzya kukatazya kapati kubakwesu alimwi abacizyi aaba basyomeka kusiya mulimo ngobakali kuyanda kapati. Ncinzi cikonzya kubagwasya ciindi bukkale nobwacinca? Mbuti mbomukonzya kubagwasyilizya? Bwiinguzi bwamibuzyo eeyi bulakonzya kutugwasya toonse ciindi bukkale bwesu nobwacinca.
NCOMUKONZYA KUCITA CIINDI BUKKALE NOBWACINCA
Nkaambo nzi ncocitali cuubauba kubabelesi baciindi coonse kuti bukkale bwacinca? (Amubone muncali 5) *
5. Muunzila nzi kucinca kwabukkale mokukonzya kutujatikizya?
5 Tacikwe makani naa tubelekela a Beteli naa mumbazu zimwi zyamulimo waciindi coonse, tulakonzya kwiiya kubayanda bantu alimwi abusena nkotubelekela. Aboobo tulausa kapati ikuti naa twazwa kubusena bumwi akaambo kakucinca kwabukkale. Tulabayeeya bakwesu alimwi abacizyi mbotwakasiya, tulalibilika kujatikizya mbabo, kwaambisya ikuti twakazwa kubusena oobo akaambo kakupenzyegwa. (Mt. 10:23; 2Kor. 11:28, 29) Kuyungizya waawo, cilakonzya kukatazya kapati kuunka kubusena bumbi nkaambo inga twayandika kwiiya zilengwa zipya. Tulakonzya kulimvwa boobo noliba leelyo notwajokela kubusena nkotwakazwa. Ba Robert aba Mary Jo bakaamba kuti: “Zilengwa zyakubusena nkotuzwa zyakatubeda zipya alimwi nokuba kukambauka mumwaambo wesu cakali kukatazya. Akaambo kakuti twakali kubelekela kucisi cimbi kwaciindi cilamfwu, twakalimvwa mbuli kuti tuli bamuzwa kule mucisi cesu.” Bamwi, akaambo kakucinca kwabukkale balakonzya kujana buyumuyumu bwamali oobo mbobatakali kulangila. Balakonzya kulibilika alimwi akutyompwa. Ncinzi cikonzya kubagwasya?
Cilayandika kapati kuyumya cilongwe cesu a Jehova alimwi akumusyoma (Amubone muncali 6-7) *
6. Mbuti mbotukonzya kuzumanana kuba acilongwe ciyumu a Jehova?
6 Amuzumanane kuba acilongwe ciyumu a Jehova. (Jak. 4:8) Ino mbuti mbotukonzya kucita boobo? Kwiinda mukumusyoma mbwaanga ngu ‘Sikuswiilila mipailo.’ (Int. 65:2) Lugwalo lwa Intembauzyo 62:8 lwaamba kuti: “Amumwaambile zyoonse zili mumyoyo yanu.” Jehova ulakonzya kucita “zintu zinji kapati kwiinda aali zyeezyo nzyotumulomba naa nzyotuyeeyela.” (Ef. 3:20) Jehova tatupi buyo zyeezyo nzyotumulomba mumipailo yesu. Ulakonzya kutugwasya mumapenzi eesu munzila njotutayeeyeli.
7. (a) Ncinzi cikonzya kutugwasya kuzumanana kuba acilongwe a Jehova? (b) Kweelana alugwalo lwa Bahebrayo 6:10-12, mbubotu nzi buboola ikuti twazumanana kubelekela Jehova cakusyomeka?
7 Kutegwa tuzumanane kuba acilongwe ciyumu a Jehova, tweelede kubala Bbaibbele buzuba abuzuba alimwi akuzinzibala kuyeeya nzyotubala. Mukwesu umwi iwakali misyinali wakaamba kuti: “Amuzumanane kuutobela mulongo wanu wakukomba mumukwasyi alimwi akulibambila miswaangano mbubwenya mbomwakali kucita ooko nkomwakazwa.” Kuyungizya waawo, amuzumanane kucita kufwumbwa nzyomukonzya mumulimo wanu wakukambauka makani mabotu mumbungano yanu mpya. Jehova tabalubi aabo ibazumanana kumubelekela cakusyomeka, nokuba kuti tabacikonzyi kucita zyoonse nzyobakali kucita musyule.—Amubale Bahebrayo 6:10-12.
8. Ino majwi aali kulugwalo lwa 1 Johane 2:15-17 inga amugwasya buti kuubyaubya buumi bwanu?
8 Amuubyeubye buumi bwanu. Mutalekeli kulibilika kwamunyika ya Saatani kuti ‘kusyaanikizye’ milimo yanu yakumuuya. (Mt. 13:22) Mutabaswiilili bantu ibatabelekeli Jehova, balongwe naa banamukwasyi ibasola kumugwasya kwiinda mukumwaambila kuti muyandika kujana mali manji kutegwa mube abuumi buli kabotu. (Amubale 1 Johane 2:15-17.) Amusyome Jehova, uutusyomezya kutupa zintu zyoonse zyakumuuya, zyamumizeezo alimwi azintu zyakumubili nzyotuyandika “aciindi ceelede.”—Heb. 4:16; 13:5, 6.
9. Kweelana alugwalo lwa Tusimpi 22:3, 7, nkaambo nzi ncociyandika kutantamuka zikwelete alimwi ncinzi cikonzya kutugwasya kusala cabusongo?
9 Amutantamuke zikwelete izitayandiki. (Amubale Tusimpi 22:3, 7.) Kulonga kuladula alimwi ncuubauba kuba azikwelete. Aboobo mutani kukweleti mali kutegwa muule zintu nzyomutayandiki. Cilakonzya kukatazya kuzyiba mweelwe wamali ngotweelede kukweleta ciindi notuli mubukkale butyompya. Mucikozyanyo, ciindi notulanganya munamukwasyi uuciswa. Mubukkale buli boobu, amuyeeye kuti ‘mupailo akukombelezya’ zilakonzya kumugwasya kusala cabusongo. Kutegwa aingule mipailo yanu, Jehova ulakonzya kumupa luumuno oolo ‘iluyookwabilila myoyo yanu amizeezo yanu,’ akumugwasya kukkalikana mumizeezo kutegwa musale cabusongo.—Flp. 4:6, 7; 1Pet. 5:7.
10. Mbuti mbotukonzya kujana balongwe bapya?
10 Amuzumanane kuba azilongwe zibotu abamwi. Amubandike abalongwe banu kujatikizya mbomulimvwa alimwi abuyumuyumu mbomujisi, ikapati aabo ibakali mubukkale bukozyenye abukkale bwanu. Kucita boobu kulakonzya kumugwasya kulimvwa kabotu. (Muk. 4:9, 10) Balongwe mbomwakajisi kubusena nkomwakazwa bayoozumanana kuba balongwe banu. Lino kubusena nkomwalongela, mweelede kujana balongwe bapya. Amuyeeye kuti kutegwa mujane balongwe, mweelede kuba aluzyalo. Mbuti mbomukonzya kujana balongwe bapya? Amwaambile bamwi zyakuluula izikulwaizya nzyomwakajana mumulimo wa Jehova kutegwa balubone lukkomano lwanu. Nokuba kuti bamwi mumbungano tabamvwisyi cimupa kuukkomanina kapati mulimo waciindi coonse, ibamwi inga bayanda kuzyiba zinji alimwi akuba balongwe banu babotu. Pele mutaciindizyi kwaamba zinji zijatikizya buyo ndinywe naa zintu nzyomwakacita mumulimo wa Jehova alimwi mutani kubikkili maano kuzintu zibyaabi izyakamucitikila.
11. Mbuti mbomukonzya kuzumanana kuba alukkomano mulukwatano lwanu?
11 Ikuti naa mwakaleka mulimo ngomwakali kubeleka akaambo kakuti ngomukwetene limwi wakatalika kuciswa-ciswa, mutamupi mulandu. Kulubazu lumwi, ikuti naa ndinywe mwakali kuciswa-ciswa, tamweelede kulipa mulandu akuyeeya kuti mwakamutyompya ngomukwetene limwi. Amuyeeye kuti muli “mubili omwe” alimwi mwakakonka kuli Jehova kuti munoobikkilana maano ziyume zitete. (Mt. 19:5, 6) Ikuti naa mwakaleka mulimo wanu akaambo kakuti mukaintu wanu wakamita cakutayeeyela, amumwaambile mwanaanu kuti mulamuyanda kapati kwiinda mulimo ngomwakali kubeleka. Mutamupi mulandu wakuti ngowakapa kuti muleke mulimo wanu. Muciindi caboobo, amumwaambile kuti mumubona kuti “mbulumbu” kuzwa kuli Leza. (Int. 127:3-5) Kuyungizya waawo, amumwaambile zyakuluula zikkomanisya nzyomwakajana mumulimo wanu. Kucita boobo kulakonzya kumukulwaizya mwanaanu kuyoobelekela Jehova mumulimo waciindi coonse mbuli mbomwakacita.
MBOBAKONZYA KUGWASYILIZYA BAMWI
12. (a) Mbuti mbotukonzya kubagwasya aabo ibali mumulimo waciindi coonse kutegwa bazumanane kubeleka mulimo wabo? (b) Ino inga twabagwasya buti kutegwa bafwambaane kuzyibila?
12 Mbungano zinji, bakwesu alimwi abacizyi bamwi balabagwasyilizya aabo ibali mumulimo waciindi coonse kutegwa bazumanane kubeleka mulimo wabo. Balacita oobo kwiinda mukubakulwaizya kuzumanana mumulimo wabo, kubapa mali naa zintu zimwi buyo zyakumubili nzyobayandika, naa kubagwasya kulanganya banamukwasyi mbobakasiya kumaanda. (Gal. 6:2) Ikuti babelesi baciindi coonse aaba batumwa kumbungano yanu ciindi bukkale bwabo nobwacinca, mutayeeyi kuti bakaalilwa kuubeleka mulimo naa kuti kuli cintu cimwi cibyaabi ncobakacita. * Muciindi caboobo, amubagwasye kutegwa bafwambaane kuzyibila. Amubatambule amaanza obilo alimwi akubalumba akaambo kamulimo ngobakacita, nokuba kuti tabacikonzyi kucita zinji akaambo kakuciswa-ciswa. Amubazyibe kabotu. Amugwasyigwe alwiiyo alimwi aluzyibo lwabo.
13. Ndugwasyo nzi ndotukonzya kubapa aabo ibalongela kubusena bupya?
13 Kumatalikilo, aabo ibalongela kubusena bupya inga bayandika kuti mubagwasyilizye kujana ŋanda, zyakweendela, kujana mulimo alimwi azintu zimwi buyo nzyobayandika. Kuyungizya waawo, inga bayandika lugwasyo kujatikizya zintu ziyandika mubukkale bwabuzuba abuzuba, mbuli kubbadela mitelo alimwi akubweza mainsyuwalansi. Pele ncobayandika kapati ncakuti musoleke kubumvwisya bukkale bwabo. Ambweni balwana penzi lyakuciswa-ciswa lwabo kubagama naa ambweni bajisi munamukwasyi uuciswa-ciswa. Alimwi balakonzya kabali mubuumba akaambo kakufwidwa muyandwa wabo. * Kunze lyaboobo, nokuba kuti inga tiibaamba cakupozya, ambweni baluuside akaambo kamukwasyi wakumuuya ngobakasiya nkobakazwa. Citola ciindi kulwana penzi lyakulimvwa boobo alimwi cilanyonganya mumizeezo.
14. Mbuti bakwesu alimwi abacizyi mbobakamugwasya mucizyi umwi kuzyibila kubusena bupya?
14 Kwaciindi cino, lugwasyo lwanu alimwi acikozyanyo canu zilakonzya kubagwasya kufwambaana kuzyibila. Mucizyi umwi iwakabeleka kwamyaka minji kucisi cimbi wakaamba kuti: “Kubusena nkondakazwa ndakali kusololela ziiyo zya Bbaibbele abuzuba, pele kubusena bupya cakali kukatazya nokuba kujula Bbaibbele naa kutondezya vidiyo mumulimo wamumuunda. Nokuba boobo, bakwesu alimwi abacizyi mumbungano mpya bakali kunditamba kuunka ambabo kunyendo zyabo zyakupilukila alimwi akuziiyo zyabo. Kubona bakwesu alimwi abacizyi aaba basungu alimwi basicamba kabasololela ziiyo zya Bbaibbele ziyaambele kwakandipa kucikkomanina cilawo. Ndakaiya bwakutalisya mibandi mucilawo cipya. Zyoonse eezyi zyakandigwasya kuba alukkomano alimwi.”
AMUZUMANANE KUCITA NZYOMUKONZYA
Amuyandaule nzila zyakuyungizya mulimo wanu wakukambauka mucilawo canu (Amubone muncali 15-16) *
15. Mbuti mbomukonzya kuzwidilila kubusena bupya?
15 Mulakonzya kuzwidilila kubusena bupya. Mutayeeyi kuti tiimwakali kuubeleka kabotu mulimo wanu kubusena nkomwakazwa naa kuti lino munyina mpindu. Muciindi caboobo, amuyeeye mbwamugwasya Jehova munzila zinji lino alimwi akuzumanana kukambauka. Amwiiye Banakristo basyomeka ibamumwaanda wamyaka wakusaanguna. Kufwumbwa nkobakali kuunka, bakali ‘kwiinda koonse-koonse kabayaabwaambilizya makani mabotu aajwi lya Leza.’ (Mil. 8:1, 4) Ikuti mwazumanana kukambauka, muyoojana lukkomano. Mucikozyanyo, bapainiya ibakatandwa mucisi cimwi bakalongela kucisi cimbi icakali munsi-munsi, kwalo ikwakabulide basikumwaya mumwaambo wabo. Mumyezi misyoonto buyo, kwakapangwa tubunga tupya.
16. Mbuti mbomukonzya kujana lukkomano mumulimo wanu mupya?
16 “Lukkomano lwa Jehova ninguzu zyanu.” (Neh. 8:10, bupanduluzi buyungizyidwe) Tweelede kujana lukkomano, ikapati muli Jehova ikutali mumulimo wesu, tacikwe makani ambotuuyandisya mulimo. Aboobo amuzumanane kweenda a Jehova, akulangila kulinguwe kuti amupe busongo, busolozi alimwi alugwasyo. Amuyeeye kuti mwakaukkomanina kapati mulimo ngomwakali kubeleka akaambo kakuti mwakabeleka camoyo woonse ikugwasya bantu bakubusena ooko. Amuubeleke camoyo woonse mulimo ngomujisi lino, aboobo muyoobona mbwayoomugwasya Jehova kutegwa muukkomanine awalo.—Muk. 7:10.
17. Ncinzi ncotweelede kuyeeya kujatikizya mulimo ngotubeleka lino?
17 Lyoonse tweelede kuyeeya kuti kubelekela Jehova takugoli, pele mulimo ngotubeleka lino ngwaciindi buyo cisyoonto. Munyika mpya, ambweni toonse tuyoobeleka milimo iimbi, ikutali njotubeleka lino. Ba Aleksey, ibaambwa kumatalikilo aacibalo, bakaamba kuti kucinca ikubacitikila lino mumulimo wabo kubagwasya kulibambila kucinca kuboola kumbele. Bakaamba kuti: “Lyoonse ndakalizyi kuti Jehova nkwali ncobeni alimwi akuti nyika mpya iyooba ncobeni, pele zimwi ziindi ndakali kubona mbuli kuti Jehova uli kule alimwi akuti ayalo nyika mpya icili kule. Pele lino ndibona kuti Jehova uli kumbele lyangu alimwi ndilimvwa kuti nyika mpya ilaafwaafwi kuboola.” (Mil. 2:25) Kufwumbwa naa tubeleka mulimo nzi, atuzumanane kweenda a Jehova. Kunyina nayootusiya, pele uyootugwasya kujana lukkomano mumulimo uuli woonse ngotukonzya kubeleka, tacikwe makani abusena nkotubelekela.—Is. 41:13.
LWIIMBO 90 Amukulwaizyanye
^ munc. 5 Zimwi ziindi, bakwesu alimwi abacizyi tabakonzyi kuzumanana mumulimo wabo waalubazu, ambweni bukkale bwabo bulakonzya kucinca. Mucibalo eeci, tulabandika buyumuyumu mbobakonzya kujana alimwi acikonzya kubagwasya kuzumanana kukkomana nokuba kuti bukkale bwabo bwacinca. Kuyungizya waawo, tulabandika kujatikizya bamwi mbobakonzya kubakulwaizya, kubagwasyilizya alimwi tulabona mbolikonzya kutugwasya Bbaibbele toonse ciindi bukkale bwesu nobwacinca.
^ munc. 4 Mbubwenya buyo, akaambo kaciimo, bakwesu banji ibakajisi mikuli bakapa bakwesu ibacili bana-bana mikuli eeyo. Amubone cibalo cakuti: “Nobanakristo Bacembeede—Jehova Ulakukkomanina Kapati Kusyomeka Kwanu,” mu Ngazi Yamulindizi yamu September 2018, alimwi acakuti: “Amuzumanane Kuba Aluumuno Lwamumizeezo Nokuba Kuti Bukkale Bwacinca,” mu Ngazi Yamulindizi yamu October 2018.
^ munc. 12 Baalu ibali mumbungano oomo mobakazwa bakwesu abacizyi aaba beelede kufwambaana kulemba lugwalo lwakubazyibya kumbungano ooko nkobalongela, kutegwa batamuki kuzumanana kubeleka kabali bapainiya, baalu naa bakutausi.
^ munc. 13 Amubone zibalo zyakuti “Luumbulizyo Kuli Baabo Ibali Mubuumba” mu Sinsimuka! yamu 2018 ya No. 3.
^ munc. 57 BUPANDULUZI BWACIFWANIKISO: Banabukwetene ibaleka mulimo wabumisyinali mucisi citali cabo balaya mbungano yabo kumwi kabauside.
^ munc. 59 BUPANDULUZI BWACIFWANIKISO: Kabali kucisi cabo, banabukwetene mbemunya balapaila cakutaleka kulomba Jehova kuti abagwasye kulwana buyumuyumu mbobajana.
^ munc. 61 BUPANDULUZI BWACIFWANIKISO: Kwiinda mukugwasyigwa a Jehova, banabukwetene aaba bajokela alimwi mumulimo waciindi coonse. Balaubelesya mwaambo ngobakaiya kabali bamisyinali kukambauka makani mabotu kubantu ibazwa kuzisi zimbi ibalongela mucilawo cambungano yabo mpya.
