1-3. ¿Tuku xlakata makgapitsi tiku putum kilhtamaku skujnanikgo Jehová makgxtakgkgo niku makgtayanamakgo?

ROBERT chu Mary Jo lakapastakkgo pi akxni puxamatum kata kskujmakgo la misioneros, xnatlatnikan tatatlakgolh. Xlakan lichuwinankgo: «Xaklipaxuwayaw la xakkakuentajtlawayaw. Pero lu klilipuwaw akxni kmakgxtakgwi niku xakmakgtayanamaw xlakata xaklismaninitawa».

² William chu Terrie na lichuwinankgo: «Akxni kkatsiw pi nialh xakamaw taspitaw niku xakmakgtayanamaw xlakata xaktatlayaw, lu ktsukuw tasayaw. Nialhla xakamaw skujnaniyaw Jehová alakatanu país».

³ Alexéi lichuwinan: «Xakkatsiyaw pi kintalamakgasitsinkan xmalakchuwaputunkgo sucursal niku xakmakgtayanamaw. Maski chuna, nitlan kmakgkatsiw akxni chuna tlawakgolh chu ktaxtuw kBetel».

4. ¿Tuku takgalhskinin nakgalhtiyaw kʼuma artículo?

⁴ Ni kajwatiya umakgolh natalan talakaskin nalismanikgo tuku lakapala talakgpalilh kxlatamatkan. Nachuna titaxtukgonit lhuwa betelitas chu amakgapitsin tiku putum kilhtamaku skujnanikgo Jehová. * Umakgolh natalan max tuwa makgkatsikgo namakgxtakgkgo niku lu xlismanikgonit la kskujnanimakgolh Jehová. ¿Tuku tlan nakamakgtaya? ¿La tlan nakamakgtayayaw? Xatakgalhtin umakgolh takgalhskinin lu nakinkamakgtayayan akxni wi tuku natalakgpali kkilatamatkan.

5. ¿Tuku max tuwa namakgkatsiyaw akxni natalakgpali niku skujmaw?

⁵ Komo skujmaw kBetel o alakatanu, lu kapaxkiyaw latamanin chu asta lismaniyaw niku makgtayanamaw. Wa xlakata, komo namakgxtakgaw niku makgtayanamaw max lu nitlan katilimakgkatsiw. Max lu nakalakapastakaw natalan, liwaka komo makgxtakgwi kintaskujutkan kaj xlakata nialh mastakan talakaskin nalichuwinanaw Dios (Mat. 10:23; 2 Cor. 11:28, 29). Nachuna, akxni kinkamalakgachakanan alakatanu, max tuwa namakgkatsiyaw xlakata tanu talismanin anan anta, asta maski anta nataspitparayaw niku xlamaw xapulana. Robert chu Mary Jo lichuwinankgo: «Asta talismanin nema xkinkalimakgastakkanitan lu tanu xakakxilhaw chu nialh xaklismaniyaw nakkalitachuwinanaw xtachuwin Dios latamanin tiku xchuwinankgo kintachuwinkan. Xakmakgkatsiyaw pi nialh anta xaktapakgsiyaw». Nachuna, max lakgachunin tuwa natatakgsaw chu namaklakaskinaw tumin. Max namakgkatsiyaw pi taxlajwanimaw. ¿Tuku tlan nakinkamakgtayayan akxni chuna natitaxtuyaw?

6. ¿La tlan lakatsu natawilaniyaw Jehová?

⁶ Lakatsu katawilaniw Jehová (Sant. 4:8). ¿La tlawayaw? Nalipawanaw, xlakata xla «Xkgaxmatna oración» (Sal. 65:2). Salmo 62:8 wan: «Kawanitit tu lakaskin minakujkan». Jehová tlan nakinkamakgtayayan, chu asta tlakg nakinkamaxkiyan nixawa tuku naskiniyaw (Efes. 3:20). Xla ni kajwatiya tlawa tuku skiniyaw kkiʼoracioneskan. Lhuwa tuku tlan natlawa xlakata nakinkamakgtayayan nalakkaxtlawayaw kintaʼakglhuwitkan, asta max natlawa tuku ni lakpuwanitaw.

7. 1) ¿Tuku nakinkamakgtayayan lakatsu natawilaniyaw Jehová? 2) Chuna la wan Hebreos 6:10-12, ¿tuku nakitaxtu komo chuntiya naskujnaniyaw Jehová chu ni namakgxtakgaw?

⁷ Atanu tuku tlan nakinkamakgtayayan xlakata lakatsu natawilaniyaw Jehová wa pi ankgalhin nalikgalhtawakgayaw Biblia chu nalilakpuwanaw. Chatum tala tiku skujnit la misionero lichuwinan: «Lu xlakaskinka pi chuntiya nakakninaniyaw Dios kfamilia chu ankgalhin nalakkaxwiliyaw tuku nataʼakxilha ktamakxtumit, chuna la xtlawayaw akxni nina xtalakgpali niku kskujmaw». Nachuna chuntiya kaliskujwi xlakata naʼanaw lichuwinanaw Dios kxasasti kincongregacionkan. Jehová ankgalhin kalakapastaka  tiku chuntiya skujnanimakgo chu ni makgxtakgkgo, maski nialh lu lhuwa tuku tlawakgo (kalikgalhtawakga Hebreos 6:10-12).

8. ¿La kinkamakgtayayan tuku wan 1 Juan 2:15-17 xlakata ni lhuwa tuku nakgalhiyaw?

⁸ Ni lhuwa tuku kakgalhiw. Ni kamastaw talakaskin pi taʼakglhuwit nema anan kxkakilhtamaku Satanás natlawa pi nialh nalilakgaputsayaw tuku xla kintakanajlakan (Mat. 13:22). Ni kakakgaxmatniw kiʼamigoskan chu kintalilakgapasnikan o atanu latamanin akxni nakinkawanikgoyan pi kakgalhiw lhuwa tumin kʼuma kakilhtamaku (kalikgalhtawakga 1 Juan 2:15-17). Kalipawaw Jehová, xla kinkawaniyan pi nakinkamaxkiyan tuku maklakaskinaw chu tuku xla kkintakanajlakan «kilhtamaku akxni xlilat» (Heb. 4:16; 13:5, 6).

9. Chuna la wan Proverbios 22:3, 7, ¿tuku xlakata ni nasakuayaw tumin komo ni maklakaskinaw chu tuku nakinkamakgtayayan tlan tuku nalaksakaw?

⁹ Ni kasakuaw tumin komo ni maklakaskinaw (kalikgalhtawakga Proverbios 22:3, 7). Max lu tapalaxla nakinkamatajikanan komo natalakgpaliyaw niku wilaw, chu chuna natlawa pi nalaklinaw tumin. Wa xlakata, ni kamakgsakuaw tumin akgtum Banco o chatum lataman xlakata nalitamawayaw tuku ni maklakaskinaw. Akxni titaxtumaw tuku tuwa, la komo kuentajtlawamaw tiku tatatla xalak kifamiliajkan, max ni katikatsiw la xlilhuwa tumin nasakuayaw. Akxni chuna titaxtuyaw, kalakapastakwi pi komo xliputum kinakujkan natlawaniyaw oración Jehová nakinkamakgtayayan tlan tuku nalaksakaw. Xla nakinkamaxkiyan takaksni nema maklakaskin kinakujkan chu kintalakapastaknikan, chu nakinkamakgtayayan liwana nalakapastaknanaw (Filip. 4:6, 7; 1 Ped. 5:7).

10. ¿Tuku nakinkamakgtayayan nakgalhiyaw xasasti amigos?

¹⁰ Tlan kakatalaliw kiʼamigoskan chu kifamiliajkan. Kakalitachuwinaw kiʼamigoskan tuku makgkatsiyaw chu tuku titaxtumaw kkilatamatkan, liwaka tiku na chuna titaxtukgonit. Komo chuna natlawayaw tlakg tlan namakgkatsiyaw (Ecl. 4:9, 10). Maski chuntiyaku tlan katalalinaw kiʼamigoskan tiku kalakgapaswi niku xmakgtayanamaw xapulana, talakaskin nakaputsayaw xasasti amigos. Xlakata chuna natlawayaw, talakaskin tlan nakatalalinaw amakgapitsin. Kakalitachuwinaw tasikulunalin nema Jehová kinkamaxkinitan xlakata chuna naʼakxilhkgo pi lu paxuwayaw la skujnaniyaw. Maski makgapitsi natalan ni akgatekgskgo pi lu lakgatiyaw putum kilhtamaku skujnaniyaw Jehová, max wi tiku nalakgati tuku nakalitachuwinanaw chu kiʼamikgoskan nawamputunkgo. Pero kuenta katlawaw ni lu nalichuwinanaw tuku tlawanitaw makgasa chu ni wa nalichuwinanaw pi ni tlan makgkatsiyaw.

11. ¿Tuku nakinkamakgtayayan chuntiya nakgalhiyaw tapaxuwan kkintamakgaxtokgatkan?

¹¹ Komo makgxtakgwi niku xmakgtayanamaw xlakata tiku tamakgaxtokgaw tatatlalh, ni kawaniw  pi wa lin kuenta. Chu komo akinin tiku tatatlaw, ni kalakpuwaw pi akinin linaw kuenta chu ni kalakpuwaw pi makgatsankgananiw tiku tamakgaxtokgaw xlakata max nialhla tlakg katiskujnaniw Jehová. Kalakapastakwi pi «akgtum makni» akinin chu malaknuniw Jehová pi xʼamaw kuentajtlawayaw tiku tamakgaxtokgaw maski xtitaxtuw tuku tuwa (Mat. 19:5, 6). Nachuna, komo makgxtakgwi niku xmakgtayanamaw xlakata katsiw pi nakgalhiyaw skgata, liwana kawaniw kinkgawasakan pi lu lanka xtapalh akxilhaw nixawa niku xmakgtayanamaw. Ankgalhin kawaniw pi liʼakxilhaw la akgtum xtamaskiwin Jehová (Sal. 127:3-5). Chu ankgalhin kalitachuwinaw tuku lu tlan titaxtunitaw, xlakata uma namakgpuwantini na xliputum kilhtamaku naskujnani Jehová, chuna la tlawaw akinin.

12. 1) ¿La tlan nakamakgtayayaw tiku skujmakgo putum kilhtamaku xlakata chuntiya natlawakgo taskujut nema kalakgayawakanit? 2) ¿La nakamakgtayayaw xlakata ni tuwa namakgkatsikgo namakgantaxtikgo xtaskujutkan?

¹² Lhuwa congregaciones chu lhuwa natalan tlawakgo putum tuku matlanikgo xlakata nakamakgtayakgo tiku putum kilhtamaku skujnanimakgo Jehová. Akgtum liʼakxilhtit, kamaʼakgpuwantinikgo xlakata ni namakgxtakgkgo la skujmakgo, kamaxkikgo tumin o tanu tuku maklakaskinkgo, o kuenta katlawakgo tiku xalak xfamilia. Putum uma tuku tlawakgo lu lanka xtapalh liʼakxilhaw (Gál. 6:2). ¿Tuku tlan natlawayaw komo kkincongregacionkan nachinkgo tiku skujmakgo putum kilhtamaku? Ni kalakpuwaw pi kalakgpalika xlakata ni liwana makgantaxtikgolh xtaskujutkan o xlakata tlawakgolh tuku nitlan. * Wata kakamakgtayaw xlakata ni tuwa namakgkatsikgo namakgantaxtikgo  xtaskujutkan. Tlan kakamakgamakglhtinaw chu kakawaniw lakwan tachuwin xlakata tlan taskujut tlawakgonit, maski la uku tajatat nialh kamaxki talakaskin tlakg naskujkgo. Kaliskujwi xlakata tlakg nakalakgapasaw. Kakatsiniw tuku xlakan titaxtukgonit chu tuku xlakan katsinikgo.

13. ¿La tlan namakgtayayaw chatum tala tiku lakgayawaka xasasti taskujut?

¹³ Xapulana, max uma tala nalakaskin namakgtayayaw xlakata tlan natekgsa niku natawila, taskujut, niku natamawanan chu namasiyaniyaw niku tlan nachipa putlaw. Max natalakaskin pi nawaniyaw la nalatama kkinkachikinkan, la komo naxokgo impuestos. Tuku tlakg nalakaskin wa pi naʼakgatekgsniyaw chu ni kaj nalakpuwanaw pi nitlan tuku titaxtuma. Max xla o chatum tiku xalak xfamilia kgalhi akgtum tajatat. O max wi tiku nilh kxfamilia. * Chu maski ni nakinkawaniyan, max lilipuwan xlakata kalakapastaka xʼamigos. Tuku nitlan makgkatsikan max ni lakapala katilakgsputli.

14. ¿La makgtayakgolh natalan chatum tala puskat nalismani niku malakgachaka?

¹⁴ Kiliʼakxilhtitkan chu tuku tlan natlawayaw kxpalakatakan nakamakgtaya nalismanikgo tuku talakgpalilh kxlatamatkan. Chatum tala puskat tiku akglhuwa kata skujli kʼatanu país, lichuwinan: «Niku xakmakgtayanama chali chali wi tiku xakmakgalhtawakge. Pero niku kimalakgachaka lu tuwa xakmakgkatsi naklikgalhtawakga maski kaj akgtum texto o nakmasiya akgtum video akxni xakan lichuwinan Dios. Pero, natalan xalak kincongregación xkiwanikgo pi xakkataʼalh akxni wi tiku xʼankgo makgalhtawakgekgo. Akxni xakakxilha pi umakgolh natalan ni xpekuankgo chu tiku xkamakgalhtawakgekgo xmatliwakglhmakgo xtakanajlakan lu tlan kimamakgkatsinilh. Kkatsinilh la nakkatachuwinan latamanin. Xlakata kliskujli uma, tlakg kpaxuwa».

15. ¿La tlan nakgalhiyaw tapaxuwan niku nakinkamalakgachakanan?

¹⁵ Tlan nakgalhiyaw tapaxuwan niku nakinkamalakgachakanan. Ni kalakpuwaw pi komo nakinkalakgpalikanan  kaj nitlan tuku tlawaw. Kalilakpuwaw la kinkamakgtayaman Jehová chu chuntiya kalichuwinaw xtachuwin. Kastalaniw xliʼakxilhtitkan kstalaninanin Cristo xalak pulana siglo, kaniwa niku xwilakgo, «Xlichuwinantilhakgo xtachuwin Dios» (Hech. 8:1, 4). Komo chuntiya naʼanaw lichuwinanaw xtachuwin Dios, max lu tlan nakinkakitaxtuniyan. Akgtum liʼakxilhtit, makgapitsi precursores katamakxtuka kʼakgtum país chu ankgolh latamakgo alakatanu niku lu xtalakaskin tamakgtay kxtachuwinkan. Ni makgas, xʼanan lhuwa congregaciones xlakata lakapala kstakma taskujut.

16. ¿Tuku natlawa pi nakgalhiyaw tapaxuwan niku nakinkamalakgachakanan?

¹⁶ Nehemías kawanilh judíos pi tapaxuwan nema limin skujnanikan Jehová wa tuku xkamatliwakglha (Neh. 8:10). Maski lu lismaninitaw chu lu xlakgatiyaw niku xapulana xmakgtayanamaw, ni xlilat kaj wa nalipaxuwayaw wata wa nalipaxuwayaw la talalinaw Jehová. Wa xlakata, chuntiya kaskujnaniw kiDioskan chu kalipawaw pi xla nakinkamaxkiyan liskgalala, pi nakinkapulalinan chu nakinkamakgtayayan. Kalakapastakwi pi tuku tlawalh lu nalakgatiyaw niku xapulana xmakgtayanamaw wa xlakata xkamakgtayaputunaw latamanin. Jehová nakinkamakgtayayan chuna namakgkatsiyaw niku kinkamalakgachakan komo naliskujaw nakamakgtayayaw latamanin (Ecl. 7:10).

17. ¿Tuku kililakapastakatkan xlakata tuku kinkalakgayawakanitan la uku?

¹⁷ Kalakapastakwi pi max tuku kinkalakgayawakanitan natalakgpali, pero putum kilhtamaku naskujnaniyaw Jehová. Kxasasti kakilhtamaku, max tanu taskujut nakinkalakgayawakanan nixawa tuku tlawayaw la uku. Alexéi, tiku lichuwinawa, lakpuwan pi tuku titaxtuma la uku namakgtaya kkilhtamaku nema aku namin. Xla wan: «Ankgalhin klakpuwanit pi Jehová chu xasasti kakilhtamaku xaxlikana, pero xaklakpuwan pi makgatku xwi. La uku kmakgkatsi pi Jehová wi kkilakatin chu xasasti kakilhtamaku lakatsu wi» (Hech. 2:25). Lata tuku titaxtumaw, chuntiya kaskujnaniw Jehová. Xla nikxni kintikamakgxtakgni, wata nakinkamakgtayayan xlakata tlan nalipaxuwayaw putum tuku tlawayaw la skujnanimaw, kaniwa niku wilaw (Is. 41:13).