STADI ATIKOL 34
Lain Long Nupela Asainmen
“God i no man bilong mekim pasin i no stret na bai em i lusim tingting long ol wok yupela i bin mekim na pasin bilong yupela long laikim tru nem bilong em.”—HIB. 6:10.
SINGSING 38 [23] Em Bai Strongim Yu
PRIVIU *
1-3. Wai na senis inap kamap long asainmen bilong ol fultaim sevan?
ROBERT na Mary Jo i tok: “Bihain long mipela i mekim wok misineri inap 21 yia, ol papamama bilong mitupela wantaim i kamap lapun na bodi bilong ol i no gat strong. Mipela i amamas long lukautim ol. Tasol mipela i pilim sore olsem mipela i mas lusim ples mipela i laikim tru.”
2 William na Terrie i tok: “Mipela i krai taim mipela i painimaut olsem mipela i gat hevi long sait bilong helt, na mipela i no inap go bek long asainmen bilong mipela. Mipela i laik tru long mekim wok bilong Jehova long narapela kantri, tasol nau mipela i no gat rot moa long mekim olsem.”
3 Aleksey i tok: “Mipela i save olsem ol birua i laik pasim brens ofis bilong mipela. Maski dispela samting i kamap na mipela i lusim Betel, mipela i bel hevi yet.”
4. Yumi bai skelim wanem ol askim long dispela atikol?
4 I gat ekspiriens bilong planti tausen fultaim sevan, na ol Betelait tu, em ol i kisim ol nupela asainmen. * Ol i wari tru bikos ol i laikim tumas olpela asainmen bilong ol. Wanem samting inap helpim ol long lain long senis i kamap? Olsem wanem yu inap helpim ol? Ol bekim bilong ol dispela askim inap helpim yumi olgeta wan wan taim senis i kamap long laip bilong yumi.
SAMTING YUMI INAP MEKIM TAIM SENIS I KAMAP
Taim ol fultaim sevan i lusim asainmen, wai na dispela inap givim hatwok long ol? (Lukim paragraf 5) *
5. Wanem ol samting inap kamap taim asainmen i senis?
5 Maski yumi mekim wok painia o wok long Betel, yumi inap laikim tru ol manmeri na ples yumi stap long en. Olsem na yumi inap bel hevi tru taim asainmen bilong yumi i senis. Yumi inap misim tru na wari moa yet long ol bratasista sapos ol birua i mekim nogut long yumi na yumi lusim ol. (Mat. 10:23; 2 Kor. 11:28, 29) Taim yumi kisim nupela asainmen o yumi go bek long asples bilong yumi, yumi bai lainim gen nupela kalsa. Robert na Mary Jo i tok: “Mipela i lusim tingting long kalsa na tokples bilong mipela. Mipela i pilim olsem mipela ol lain bilong narapela ples.” Taim asainmen bilong sampela i senis, ol i luksave olsem ol i mas tromoi mani long baim planti samting em pastaim ol i no save baim. Ol inap wari, tingting planti, na pilim olsem ol i no gat rot bilong kisim helpim. Wanem samting inap helpim ol?
Yumi mas i go klostu long Jehova na trastim em (Lukim paragraf 6-7) *
6. Olsem wanem yumi inap stap klostu long Jehova?
6 Stap klostu long Jehova. (Jems 4:8) Hau bai yumi inap stap klostu long em? Yumi mas bilip olsem em “Man Bilong Harim ol prea.” (Sng. 65:2) Song 62:8 i tok: “Autim olgeta tingting i stap long bel bilong [yu].” Jehova inap “mekim ol samting i winim tru ol samting [yumi] askim o tingting long en.” (Efe. 3:20) Em bai givim ol samting yumi askim long en na em inap givim planti samting moa. Em inap mekim ol samting yumi no ekspektim em long mekim bilong helpim yumi long karim ol hevi.
7. (a) Wanem samting bai helpim yumi long stap klostu long Jehova? (b) Olsem Hibru 6:10-12 i kamapim, wanem samting bai kamap sapos yumi stap gut yet long mekim wok bilong Jehova?
7 Sapos yumi laik stap klostu yet long Jehova, orait yumi mas ritim Baibel long olgeta de na tingim tingim ol tok bilong en. Wanpela brata i mekim wok misineri long pastaim i tok: “Yu mas bihainim yet sediul bilong yu long redim miting na mekim famili lotu olsem yu bin mekim long pastaim.” Na tu, givim bel yet long sapotim nupela kongrigesen bilong yu long autim gutnius. Jehova i tingim ol manmeri i stap gut yet long em, maski sapos ol i no inap mekim olgeta wok ol i bin mekim long pastaim.—Ritim Hibru 6:10-12.
8. Olsem wanem tok bilong 1 Jon 2:15-17 inap helpim yu long holim liklik kago tasol?
8 Holim liklik kago tasol. No ken larim ol wari bilong laip i stopim yu long mekim wok lotu. (Mat. 13:22) Sakim presa taim ol pren, ol wanfamili, na ol lain i no wanbilip i laik kirapim yu long bungim mani kago. (Ritim 1 Jon 2:15-17.) Yu mas trastim Jehova. Em i tok promis long givim helpim long “taim stret”; em bai strongim bilip bilong yumi, givim bel isi, na lukautim yumi long ol samting yumi nidim.—Hib. 4:16; 13:5, 6.
9. (a) Olsem Provep 22:3, 7 i kamapim, wai na yumi mas abrusim pasin bilong kisim nating dinau? (b) Yumi mas mekim wanem na bai yumi inap mekim ol gutpela disisen?
9 Abrusim pasin bilong kisim nating dinau. (Ritim Provep 22:3, 7.) Taim yu go sindaun long narapela ples, em isi tru long bungim hevi bilong dinau bikos yu inap tromoi planti mani long baim ol samting. Abrusim pasin bilong kisim dinau long baim ol samting yu no nidim. Taim yumi wari na tingting planti bikos yumi lukautim ol wanfamili i sik, dispela inap mekim na yumi no skelim gut hamas dinau yumi kisim. Long kain taim olsem, tingim olsem yu inap mekim ‘ol beten, na ol prea we yu beten strong’ na askim God long helpim yu long mekim ol gutpela disisen. Jehova inap harim beten bilong yu na givim yu bel isi we inap ‘lukautim bel na tingting bilong yu’ na bai yu inap skelim gut ol samting.—Fili. 4:6, 7; 1 Pita 5:7
10. Yumi ken mekim wanem na bai yumi inap painim ol nupela pren?
10 Pas gut wantaim ol gutpela pren. Kamapim tingting na filings bilong yu long ol gutpela pren, moa yet ol pren husat i kisim ol wankain blesing olsem yu bin kisim o ol i karim ol wankain hevi olsem yu bin karim. Dispela inap mekim gut bel bilong yu. (Ekl. 4:9, 10) Ol pren yu lusim long olpela asainmen bilong yu, ol bai stap yet olsem ol pren bilong yu. Tasol nau yu kisim nupela asainmen, olsem na yu mas painim ol nupela pren. Tingim: Yu yet i mas stap olsem gutpela pren na bai yu inap i gat ol pren. Yu ken mekim wanem na bai yu inap painim ol nupela pren? Taim yu bung wantaim ol wanbilip, stori long ol naispela ekspiriens yu bin kisim taim yu mekim wok bilong Jehova, na long dispela rot ol tu bai pilim wankain amamas yu pilim. Maski sapos sampela long kongrigesen i no pilim amamas bilong yu long fultaim sevis, eksampel bilong yu inap kirapim ol narapela long kamap gutpela pren bilong yu. Tasol no ken apim nem bilong yu yet, o stori tumas long ol wok yu mekim insait long fultaim sevis, na no ken stori tu long ol tingting kranki bilong yu yet.
11. Yu inap mekim wanem na bai marit bilong yu i stap gut?
11 Sapos yu lusim asainmen bilong yu bikos poroman marit i gat bikpela sik, no ken sutim tok long em. Na tu, sapos yu gat hevi long sait bilong helt na yupela i lusim asainmen bilong yupela, orait yu no ken pilim olsem yu gat asua na poroman marit i bel hevi long yu. Tingim: Yutupela i “wanpela bodi,” na yutupela i bin tok promis long Jehova olsem yupela bai lukautim narapela narapela maski wanem samting i kamap. (Mat. 19:5, 6) Sapos yu lusim asainmen bikos yu gat pikinini, orait soim klia long pikinini olsem yu laikim em moa yet winim asainmen bilong yu. Oltaim yu mas tokim pikinini olsem em i “gutpela blesing tru” i kam long God. (Sng. 127:3-5) Yu ken stori long em long ol naispela ekspiriens yu kisim long asainmen bilong yu. Dispela inap kirapim pikinini tu long insait long fultaim sevis.
OL NARAPELA INAP HELPIM
12. (a) Olsem wanem yumi inap helpim ol fultaim sevan long mekim yet asainmen bilong ol? (b) Olsem wanem yumi inap helpim ol long lain gut long nupela asainmen?
12 Planti kongrigesen na ol bratasista i save helpim ol fultaim sevan long stap gut yet long asainmen bilong ol. Ol i helpim ol long sait bilong mani, ples slip, kaikai, o lukautim ol wanfamili. (Gal. 6:2) Sapos ol fultaim sevan i kisim nupela asainmen na kam long kongrigesen bilong yu, no ken kisim tingting kranki olsem ol i no mekim gut wok o ol i mekim rong. * Helpim ol long lain gut long nupela asainmen bilong ol. Welkamim ol na tok amamas long wok ol i bin mekim, maski sik i pasim ol long mekim bikpela wok olsem long pastaim. Toktok gut wantaim ol. Yu inap kisim planti gutpela skul long save, trening, na ekspiriens bilong ol.
13. Olsem wanem yumi inap helpim ol lain i kisim nupela asainmen?
13 Pastaim, ating ol lain i kisim nupela asainmen bai nidim helpim long sait bilong ples slip, kar, wok mani, na ol narapela samting. Ating ol bai nidim tu infomesen long sait bilong baim takis na insurens samting. Ol bai amamas sapos yu inap pilim hevi bilong ol. Ating ol yet o wanpela wanblut i gat hevi long sait bilong helt. Ating ol i krai sori long wanpela pren o wanblut i dai. * Na tu, taim ol i stap ol yet, ol inap krai bikos ol i misim yet ol pren ol i lusim long olpela asainmen. Longpela haptaim inap lus paslain long ol inap strongim bel na daunim wari.
14. Olsem wanem ol asples bratasista i helpim wanpela sista long lain long nupela asainmen?
14 Taim yu autim tok wantaim ol na soim gutpela pasin, dispela inap helpim ol long lain gut long nupela asainmen. Wanpela sista husat i stap long fultaim sevis long narapela kantri inap planti yia, em i tok: “Long olpela asainmen, mi mekim ol Baibel stadi long olgeta de. Long nupela asainmen, i hatwok long ritim skripsa o soim vidio taim mi autim tok. Tasol ol asples bratasista i askim mi long go wantaim ol long lukim ol gobek na ol Baibel stadi. Mi luksave olsem ol i givim bel tru long mekim ol Baibel stadi, na dispela i kirapim mi long holim stretpela tingting long ol lain i stap long teritori. Mi lain long wei bilong kirapim tok wantaim ol manmeri long dispela ples. Olgeta dispela samting i helpim mi long kisim bek amamas bilong mi.”
WOK STRONG YET!
Painim olgeta kain rot bilong autim tok long nupela teritori (Lukim paragraf 15-16) *
15. Olsem wanem yu inap mekim gut nupela asainmen?
15 Yu inap mekim gut nupela asainmen. Taim asainmen i senis, no ken ting olsem yu no bin mekim gut wok o save bilong yu i kamap olpela. Luksave long ol samting Jehova i mekim bilong helpim yu, na wok strong yet long autim tok. Bihainim pasin bilong ol Kristen long taim bilong ol aposel. Ol i “autim gutnius bilong tok bilong God long [olgeta] hap ol i go long en.” (Apo. 8:1, 4) Taim yu wok strong yet long autim tok, yu inap kisim planti blesing. Tingim dispela eksampel: Taim gavman bilong wanpela kantri i rausim ol painia, ol dispela painia i go long narapela kantri i stap klostu—dispela kantri i sot tru long ol pablisa long autim tok long tokples bilong ol dispela painia. Insait long sampela mun tasol, planti manmeri i joinim ol nupela grup long tokples em ol painia i autim tok long en.
16. Olsem wanem yu inap kisim amamas long nupela asainmen?
16 “Yupela i mas amamas long Jehova, em i strong bilong yupela.” (Neh. 8:10, ftn.) Maski yumi laikim tumas asainmen bilong yumi, dispela i no nambawan samting. Nambawan samting yumi mas amamas long en em pasin bilong pas gut wantaim Jehova. Olsem na yumi mas wokabaut yet wantaim Jehova, larim em i givim savetingting long yumi, stiaim yumi, na sambai long yumi. Tingim, yu laikim olpela asainmen bilong yu bikos yu bin givim bel tru long helpim ol manmeri. Olsem na yu mas givim bel tru long inapim nupela asainmen, na Jehova bai helpim yu long laikim dispela asainmen.—Ekl. 7:10.
17. Yumi mas holim wanem tingting long asainmen bilong yumi long nau?
17 Tingim: Asainmen i save senis, tasol pasin bilong lotuim Jehova em samting bilong i stap oltaim. Long nupela taim, yumi olgeta inap kisim nupela asainmen. Aleksey, yumi stori long em long kirap bilong dispela stadi, em i bilip olsem ol senis i kamap long asainmen bilong em long nau i redim em long ol senis bai kamap bihain. Em i tok: “Mi save olsem Jehova i stap tru na nupela taim bai kamap, tasol mi pilim olsem Jehova na nupela taim i stap longwe. Tasol nau mi tingim olsem Jehova i stap klostu tru na mi pilim olsem nupela taim i kam klostu pinis.” (Apo. 2:25) Maski yumi gat wanem asainmen, oltaim yumi mas stap klostu long Jehova. Em i no inap tru long lusim yumi. Em bai helpim yumi long kisim amamas long asainmen bilong yumi.—Ais. 41:13.
SINGSING 90 [53] Strongim Bel Bilong Narapela Narapela
^ par. 5 Sampela taim, ol bratasista insait long fultaim sevis i lusim asainmen bilong ol, o ating ol i kisim nupela asainmen. Dispela atikol i stori long ol hatwok ol i bungim na ol samting ol inap mekim bilong helpim ol long lain long nupela asainmen. Na tu, atikol i stori long ol samting ol narapela inap mekim bilong strongim na sambai long ol fultaim sevan, na ol stiatok we inap helpim yumi olgeta taim senis i kamap.
^ par. 4 Taim krismas bilong ol brata i kamap bikpela, ol i save trenim ol yangpela brata long kisim ples bilong ol long mekim wok. Lukim ol atikol “Ol Lapun Kristen—Jehova i Amamas Long Yupela i Stap Gut Long Em,” long Wastaua bilong Septemba 2018, na “Stap Bel Isi Yet Maski Senis i Kamap,” long Wastaua bilong Oktoba 2018.
^ par. 12 Ol elda long olpela kongrigesen bilong ol i mas hariap long raitim pas i stori long wok ol i bin mekim, na bai ol inap mekim yet wok olsem painia, elda, o kongrigesen sevan.
^ par. 13 Lukim atikol “Helpim Bilong Ol Man i Krai Sori,” long No. 3 Kirap! bilong 2018.
^ par. 57 STORI BILONG PIKSA: Tupela marit i mekim wok misineri long narapela kantri na ol i aiwara taim ol i tok gutbai long kongrigesen.
^ par. 59 STORI BILONG PIKSA: Tupela wankain marit i stap long asples bilong ol, na oltaim ol i beten askim Jehova long strongim ol long karim hevi.
^ par. 61 STORI BILONG PIKSA: Jehova i helpim tupela wankain marit na ol inap insait gen long fultaim sevis. Ol i bin lainim narapela tokples taim ol i mekim wok misineri. Olsem na ol i yusim dispela tokples long autim tok long ol manmeri long teritori i stap aninit long nupela kongrigesen bilong ol.
