NHLOKOMHAKA YA DJONDZO 34
Titwananisi ni Xiyimu Loko u Nyikiwa Xiyavelo xa Nyiwani
“Hikuva Xikwembu axi na mona, xingakala xingarivali ntirho wa n’wina ni rirhandzu leri mirikombeke hi vito ra xona”. — HEV. 6:10.
LISIMU 38 Xikwembu Xitaku Tiyisa
LESWI HINGATASWI DJONDZA *
1-3. Hi swihi swivangelo leswi yendlaka vamakwerhu lavanga ka ntirho wa nkama hinkwawu swilava va cinca swiyavelo swa vona?
MAKWERHU mun’wani lweyi a vitaniwaka Robert ni nsati wa yena Mary Jo va li: “Loko se kuhundze 21 wa malembe nahi tirha ka xiyavelo xa hina xa wumisiyonariyo, vapsali va hina hinkwavu va sungule kuvabya. I ntiyiso swaku ahiswi tsakela kuva pfuna, kambe aswihi tikela kusuka ka ndhawu leyi se ahiyi rhandza ngopfu.”
2 Makwerhu William na Terrie va vule leswi: “Hi rilile loko hitwa swaku ahingahataswi kota kutlhelela ka xiyavelo xa hina, hi mhaka leswi se ahi vabya. Ahiswi lava hi mbilu hinkwayu kutirhela Yehovha ka tiko lin’wani kambe se aswingaha koteki.”
3 Makwerhu Aleksey a li: “Ahiswi tiva swaku vakaneti valava kupfala batele leli ahi tirha ka lona. Hambi leswo, hi vaviseke ngopfu loko se va lipfala naswona ahi boheka kusuka.”
4. Hi swihi swivutiso leswi hingata bula hi swona ka djondzo leyi?
4 Handle ka swikombiso leswi haha kuswi vonaka, kuni vamakwerhu votala lava avali ka ntirho wa nkama hinkwawu kupatsa ni lava ava tirha Betele, lava kumeke swiyavelo swa nyiwani. * Swingaha tika ngopfu ka vamakwerhu lava votshembeka kuva va tshika swiyevelo swa vona leswi vaswi rhandzaka ngopfu. Kambe i mpsini leswingava pfunaka kukota kulagusana ni kucinca koloko? Hingava pfunisa kuyini? Tinhlamulu ta swivutiso leswi tingahi pfuna hinkwerhu kukota kulangutana ni kucinca ka swiyimu awuton’wini.
KULANGUTANA NI KUCINCA KA SWIYIMU
Hi mhaka muni lavanga ka ntirho wa nkama hinkwawu swiva tikela loko va kuma xiyavelo xa nyiwani? (Vona paragrafu 5) *
5. Hinga khumbekisa kuyini loko hi nyikiwa xiyavelo xa nyiwani?
5 Kun’wani ni kun’wani lomu hi tirhaka kona, kungahava a nsin’wini kumbe a Betele hingaha tikuma hiva rhandza ngopfu a vanhu lava hi tirhaka na vona ni ndhawu leyi hi tshamaka ka yona. Hi mhaka leyo, ha vaviseka loko hi boheka kutshika xiyavelo xa hina. Hingaha tikuma nahiva xuva ngopfu vamakwerhu lava hiva siyeke. Naswona hingaha karhateka ngopfu hi vona, ngopfungopfu loko hiva siya hi mhaka kuxanisiwa hi vakaneti. (Mat. 10:23; 2 Kor. 11:28, 29) Xin’wana lexinga yendlaka switika kurhurha hiya ka ndhawu yin’wani i kutolovelana ni ndhavuko wa nyiwani. Hingaha titwisa xileswo hambiloko lomu hi yaka kona kuli lomu hi psaliweke kona. Robert na Mary Jo va li: “Ahingahawu tolovelanga ndhavuko wa tiko la hina naswona hambi kuchumayela hi lirimi la hina aswihi tikela. Leswi se ahi hete nkama wa kuleha nahi tshama ka tiko lin’wani, se ahi titwa hili vayendzi ka tiko la hina.” Van’wani lava va yamukelaka swiyavelo swin’wani, hi kuhantlisa vangaha kumana ni swikarhatu swa timale. Vangaha titwa vanga sirhelelekanga naswona va hele ntamu. I mpsini leswingava pfunaka?
I swa lisima akuva hiva kusuhi na Yehovha ni kutlhela himu tshemba (Vona maparagrafu 6-7) *
6. Hinga tshamisa kuyini na hili kusuhi na Yehovha?
6 Tshama uli kusuhi na Yehovha. (Yak. 4:8) Hingaswi yendlisa kuyini leswo? Hi kumu tshemba tanihi hi “mutwi wa xikhongelo”. (Pis. 65:2) Tipisalema 62:8 yi li: “Chululani timbilu ta n’wina emahlweni ka xona.” Yehovha Xikwembu xa hina angahi yendlela hi ‘kutlula ngopfu swinene [swilo] hinkwaswu leswi hingaswikombelaka, kumbe leswi hingaswipimisaka’. (Efe. 3:20) Yehovha angahi nyiki leswi hiswi kombelaka ntsena ka swikhongelo swa hina. Kambe anga yendla swilo leswi ahingaswi nyimelanga leswaku ahi lunghisela swikarhatu swa hina.
7. a) I ncini lexingahi pfunaka kutshama na hili kusuhi na Yehovha? b) Hi kuya hi Vaheveru 6:10-12, hi lihi vuyelo leli vaka kona loko hi tama hi tirhela Yehovha hi kutshembeka?
7 Leswaku hiva kusuhi na Yehovha swilava hi lerha Bibele siku ni siku hi tlhela hi yanakanyisisa hi lona. Makwerhu mun’wani lweyi khale a ali missiyonáriyo a te: “Tama uvani xiyimisu xa djondzo ya ndjangu ni kulunghiselela minhlanganu kufana ni leswi awuswi yendlisa xiswona na wuli ka xiyavelo xa wena xa khale.” Naswona tama u yendla hinkwaswu leswi ungaswi kotaka ka ntirho wa kuchumayela ka bandla la wena la nyiwani. Yehovha wava khumbuka hinkwavu lava tamaka vamu tirhela hi kutshembeka hambiloko vangaha swikoti kuyendla leswi avaswi yendla khale. — Lerha Vaheveru 6:10-12.
8. Marito lawa manga ka 1 Yohane 2:15-17, mangaku pfunisa kuyini leswaku u vevukisa wutomi la wena?
8 Vevukisa wutomi la wena. Unga pfumeleli kuvilela ka misava leyi ya Sathana kukavanyeta ntirho lowo uwu yendlelaka Yehovha. (Mat. 13:22) Ahi fanelanga hi pfumelela vanhu lava kalaka vanga tirheli Yehovha, vofana ni vanghanu ni maxaka vahi byela swaku kulaveka hi vani male ya yinyingi leswaku hita hanya wutomi la kuyampsa. (Lerha 1 Yohane 2:15-17.) Tshemba Yehovha hikusa hi yena a tshembisaka kuhi nyika leswi hiswi lavaka hi nkama lowu faneleke. Naswona ata hi pfuna leswaku hi tiyisa lipfumelo la hina, ahi nyika kurhula ni swilo leswi hiswi lavaka leswaku hi hanya. — Hev. 4:16; 13:5, 6.
9. Hi kuya hi Swivuriso 22:3, 7, hi mhaka muni swili swa lisima kukala hinga ceneki male loko kungana xilaveko naswona i mpsini leswingahi pfunaka kuyendla swiboho swa wutlharhi?
9 Unga ceneki male loko kungana xilaveko. (Lerha Swivuriso 22:3, 7.) Kurhurha swingaha hi luzisa male yotala naswona swingaha hi vangela swikweneti. Akuva hi pumba a swikweneti swilava hi tshika kuceneka male leswaku hi xava swilo swaku ahina xilaveko xa swona. Hi xikombiso loko hili ka xiyimu xa kukarhata, xa kufana ni kuvabyeliwa hi xaka, swingaha hi tikela kutiva swaku hi fanele hi ceneka male muni akuva hi kota kumu tendera. Loko uli ka swiyimu swa kufana ni leswi, khumbuka swaku ‘kukhongela . . . [ni] kukombela’ swingaku pfuna akuva u yendla swiboho swa wutlharhi. Yehovha anga hlamula swikhongelo swa wena hi kukupfuna leswaku u kuma kurhula ni kutlhela u yendla swiboho leswi twisisekaka. — Filp. 4:6, 7; 1 Pet. 5:7.
10. Hingava kumisa kuyini vanghanu va nyiwani?
10 Tama uva ni vanghanu va kahle. Bula ni vanghanu va wena lava uva tshembaka, uva byela leswi u titwisaka xiswona ni swikarhatu leswi u kumanaka na swona, ngopfungopfu lava tshameke vava ka xiyimu xa kufana ni xa wena. Loko u yendla leswo switaku pfuna swaku u titwa na wuyampsa. (Ekl. 4:9, 10) Vanghanu lava awuli na vona ka xiyavelo xa wena xa khale vahata tama vali vanghanu vawena. Kambe swoswi, ka xiyavelo xa wena xa nyiwani, u fanele ulava vanghanu van’wani va nyiwani. Khumbuka swaku akuva uvani vanghanu, na wena u fanele uvani xinghanu. Ungava kumisa kuyini vanghanu va nyiwani? Byela van’wani swilo leswinene leswiku humeleleke ka ntirho wa Yehovha leswaku na vona vata vona ntsaku lowu ungana wona. Van’wani a bandleni swingaha yendleka vangaswi twisisi swaku hi mhaka muni u rhandza ntirho wa nkama hinkwawu, kambe van’wani vangaha lava kutiva swotala hi wona ivi vava vanghanu va wena lavakulu. Kambe tivoneli leswaku unga vulavuli ngopfu hi wena kumbe swilo leswi se uswi yendleleke Yehovha ni matitwelo yobiha lawa uveke na wona.
11. Unga yendlisa kuyini leswaku wukati la wena li tama litsakisa?
11 Loko u boheka kutshika xiyavelo xa wena hileswi lweyi unga chada na yena a vabyaka, ungamu soli. Kumbe loko wena u sungula kuvabya, unga titwi nandzu u pimisa swaku hi wena unga chela mati. Khumbuka swaku n’wina vambirhi ‘munyama yin’we’ naswona loko mu chadile mutshembise Yehovha swaku muta hlayisana hambiloko koba lexi dumaka. (Mat. 19:5, 6) Loko u boheka kutshika xiyavelo xa wena hi mhaka leswi mu kumeke n’wana na mungamu nyimelanga, tiyiseka leswaku wamu byela n’wana wa wena swaku i wa lisima kutlula xiyavelo lexi awuli na xona. Mutiyisekisi leswaku yena “i hakelo” leyi taka hi ka Xikwembu. (Pis. 127:3-5) Xin’wani lexinga xa lisima i kumu byela swilo swa kuhlamalisa leswiku humeleleke loko wahali ka xiyavelo xa wena. Loko u yendla leswo, uta pfuna n’wana wa wena kuva na yena a tirhela Yehovha ka ntirho wa nkama hinkwawu hilaha na wena u yendleke ha kona.
LESWI VAMAKWERHU VALE BANDLENI VANGASWI YENDLAKA
12. a) Hingava pfunisa kuyini lavanga ka ntirho wa nkama hinkwawu leswaku va tama vali ka swiyavelo swa vona? b) Hingava pfunisa kuyini leswaku va tolovelana ni xiyavelo xa vona xa nyiwani?
12 Vamakwerhu votala lavanga mabandleni va yendla leswi vangaswi kotaka akuva va pfuna lavanga ka ntirho wa nkama hinkwawu leswaku va hetisisa swiyavelo swa vona. Va yendla leswo hi kuva khutaza leswaku tama va yendla ntirho wa vona, kuva nyika male yokarhi kumbe swilo swokarhi leswi vaswi lavaka. Naswona vangahava pfuna kutendera maxaka ya vona lawa vama siyeke. (Gal. 6:2) Loko vamakwerhu lavanga ka ntirho wa nkama hinkwawu va rhumeliwa ka bandla leli unga ka lona unga pimisi leswaku va cinceliwe xiyavelo hileswi va yendleke xilo xokarhi xa kukala xingali kahle kumbe vayo tsandzeka kuhetisisa ntirho wa vona. * Kuhambana ni leswo, va pfuni leswaku va titwananisa ni kucinca koloko. Va hoyozeli hi kutsaka u tlhela uva bumabumela hi ntirho lowu vawu yendleke hambiloko vangahaswi koti kuyendla leswi ava kota kuswiyendla hileswi se va vabyaka. Zama kuva tiva kuyampsa. Londzola wutivi leli vangana lona, kuleteliwa ni ntokoto wa vona.
13. Hingava pfunisa kuyini lavanga ka xiyavelo xa nyiwani?
13 A kusunguleni, lava kumeke xiyavelo xa nyiwani vangaha lava kupfuniwa hi hina swaku va kuma ndhawu ya kutshama ka yona, ndhawu ya kukhwela maxapa, kukuma ntirho ni swilo swin’wani leswi vaswi lavaka. Vangaha lava kupfuniwa hi swilo swin’wani swofana ni kukombiwa lomu kuhakeliwaka kona mati ni magezi. Kambe xa lisima ngopfu, hi fanele hi zama kutwisisa xiyimu xa vona. Swingaha yendleka va vabya kumbe va vabyeliwa hi xaka la vona. Swingaha yendleka va feliwe hi munhu lweyi vamu rhandzaka. * Naswona, hambiloko vangahi byeli swingaha yendleka va vaviseka hileswi va xuvaka vanghanu lava ava li na vona ka xiyavelo xa vona xa khale. Vangaha heta nkama wa kuleha na va titwisa xileswi naswona vangaxi tivi xa kuxi yendla.
14. Vamakwerhu vale bandleni lokarhi vamu pfunise kuyini makwerhu wa xisati leswaku a tolovelana ni xiyavelo xa yena xa nyiwani?
14 Loko u tirha na vona nsin’wini ni kuva khutaza hi kuva vekela xikombiso lexinene u tava uva pfuna kutolovelana ni xiyimu. Makwerhu wa xisati lweyi a tirheke malembe yotala tikweni lin’wani a li: “Ka xiyavelo xa mina xa khale a ni djondza ni vanhu siku ni siku. Kambe swoswi, hambi kudjondzela munhu ndzimana ya Bibele kumbe kumu komba vhidiyo swa karhata. Kambe vamakwerhu ka bandla la mina la nyiwani va nirhamba leswaku hiya ka mayendzo ya vona yovuyela ni le ka swidjondzo. Kambe kuvona vamakwerhu lava votshembeka ni lava hisekaka va fambisa swidjondzo swa Bibele leswi yendlaka nhluvuku swini yendla niyi rhandza ndhawu leyi hi chumayeka ka yona. Ni djondze kusungula mabulu ka teritoriyo leli la nyiwani. Swilo leswi hinkwaswu swini pfunile leswaku ni tlhela ni kuma ntsaku.”
YENDLA HINKWASWU LESWI UNGASWI KOTAKA A NTIRHWENI WA YEHOVHA
Lava tindlela ta kukulisa a ntirho wa wena ka tiritoriyo la n’wina (Vona maparagrafu 15-16) *
15. Unga yendla yini leswaku swi kufambela kahle ka xiyavelo xa wena xa nyiwani?
15 Unga yendla yini leswaku swi kufambela kahle ka xiyavelo xa wena xa nyiwani? Unga pimisi swaku awungawu yendli kahle ntirho wa wena ka xiyavelo xa wena xa khale kumbe kutivona ingi awu pfuni nchumu. Pimisa hi leswi Yehovha aku pfuniseke xiswona naswona tama u chumayela. Tekelela xikombiso xa Vakreste vale nkameni wa vapostola, lava “avafambafamba hinkwaku, na vatwalisa Evhangeli kumbe mahungu yotsakisa”. (Mint. 8:1, 4) Loko u tama u chumayela, ungaha kuma vuyelo lotsakisa swinene. Hi xikombiso, akuni maphayona man’wani lawa manga hlongoliwa maya ka tiko lin’wani la le kusuhani leli na lona a li li ni xilaveko xa vachumayeli lava ava vulavulaka lirimi leli maphayona lawa a mali tiva. Kutani, kuvumbiwe mintlawa ya nyiwani naswona ndzeni ka tihweti nyana, vanhu votala va sungule kunhlagamela ka yona.
16. Ungawu kumisa kuyini ntsaku ka xiyavelo xa wena xa nyiwani?
16 “Kutsaka loku taka hi ka Yehovha i xisirhelelo xa n’wina.” (Neh. 8:10) Lexihi tiselaka ntsaku wa wukulu i wuxaka la hina na Yehovha kungali xiyavelo xa hina, hambiloko hoxi rhandzisa kuyini. Hi mhaka leyo, loko hi lava kuva lava tsakeke, hi fanele hi tshama na hili kusuhi na Yehovha naswona hi titshega hi wutivi, nkongomiso ni nseketelo wa yena. Khumbuka leswaku lexingaku yendla u rhandza xiyavelo xa wena hileswi awu tikarhatela kupfuna vanhu. Ni swoswi tirha hi mbilu hinkwayu ka xiyavelo xa wena xa nyiwani kutani uta vona leswi Yehovha angataku pfunisa xiswona leswaku u xi rhandza. — Ekl. 7:10.
17. I mpsini leswi hi faneleke hiswi khumbuka hi xiyavelo lexi hinga ka xona swoswi?
17 Hi fanele hi khumbuka leswaku Yehovha hitamu tirhela hilaha kunga heliki naswona ntirho lowu himu yendlelaka wona swoswi, swinga yendleka kungali wona lowu hingatamu yendlela wona a misaveni leyimpsha. Aleksey lweyi hinga bula hi yena aku sunguleni ka djondzo leyi a vule swaku kucinca loku a kumane na kona ndzeni ka xiyavelo xa yena kumu pfuna kuti lunghiselela kucinca loko angata kumana na kona ankameni lowu taka. Yena a li: “A niswi tiva swaku Yehovha a kona hi kakunene ni leswaku Misava leyimpsha yitava kona, kambe minkama yin’wani ani titwa nili kule na yena. Kambe swoswi ni titwa nili kusuhi hintamu na Yehovha ni leswaku misava leyimpsha yi le kusuhi ni kufika.” (Mint. 2:25) Hambiloko hova ka xiyavelo xihi na xihi hi fanele hi tshama na hili kusuhi na Yehovha. Yena, angehi tshiki ni siku ni lin’we kambe atahi pfuna leswaku hi kuma ntsaku ka ntirho wun’wana ni wun’wana lowu himu yendlelaka wona kun’wani ni kun’wani laha hinga kona. — Esa. 41:13.
LISIMU 102 “Hi Fanela Kupfuna Lava Tsaneke”
^ ndz. 5 Minkama yin’wani vamakwerhu lavanga ka ntirho wa nkama hinkwawu va boheka kutshika swiyavelo swa vona kumbe va yamukela xiyavelo xa nyiwani. Ka djondzo leyi hita bula hi swikarhatu leswi va kumanaka na swona ni kutlhela hi vona swaku hingava pfunisa kuyini leswaku va titwananisa ni kucinca ka swiyimu. Naswona hita vona swaku van’wani vangava khutazisa kuyini ni kuva seketela ni leswaku Bibele lingahi pfunisa kuyini hinkwerhu loko swiyimu swicinca.
^ ndz. 4 Swihi hilaha kufaka hi vamakwerhu lava se vanga vakulu hi ntanga, va boheka kuteka wutihlamuleli leli vangana lona va nyika vamakwerhu lava ha liki vampsha. Vona nhlokomhaka leyinge: “Vakreste Lava Dyuhaleke Ku Tshembeka Ka N’wina I Ka Risima Eka Yehovha” leyi kumekaka ka Murindzi wa Setembro wa 2018 (hi Xitsonga), ni leyinge: “Rhula Mbilu Hambiloko Wutomi la Wena Li Cinca” leyi kumekaka ka Murindzi wa Outubro wa 2018.
^ ndz. 12 Madoda ya bandla leli avali ka lona ma fanele ma tekela kutsala papila la kuva tivisa ka bandla lin’wani, akuva loko vali madoda, maphayona kumbe vapfunisi va madoda vanga hlweli kutirhisiwa.
^ ndz. 13 Vona Khindlimuka! wawu 3 wa 2018, lweyi anga ni nhlokomhaka leyinge: “Leswi Nga Pfunaka Lava Feriweke” (hi Xitsonga).
^ ndz. 57 NHLAMUSELO WA SWIFANISO: Nuna na nsati lava ava tirha ka xiyavelo xa wumisiyonariyo a tikweni lin’wani, va vhalelisa bandla navanga tsakanga hileswi va bohekaka kutshika xiyavelo xa vona.
^ ndz. 59 NHLAMUSELO WA SWIFANISO: Loko se va tlhelele ka tiko la vona, va tshamela kukhongela va kombela leswaku Yehovha ava pfuna kulangutana ni swikarhatu swa vona.
^ ndz. 61 NHLAMUSELO WA SWIFANISO: Hi kupfuniwa hi Yehovha vamakwerhu lava lava tekaneke va tlhelela ka ntirho wa nkama hinkwawu. Va tirhisa lirimi leli va li djondzeke navahali va misiyonariyo leswaku vachumayela vanhu lava taka hi matikweni man’wana lava vanga kona ka teritoriyo la bandla la vona.
