1-3. Nsonga ki ezimu ezisobora kuleetera abo abaali omu buheereza obw’akasumi koona kuruga omu buheereza bw’abo?

ROBERT na Mary Jo nibagamba ngu: “Hanyuma y’okumara emyaka 21 nituheereza nk’abamisaani, bazaire baitu boona bakeyongera kuceka. Nobukiraaba ngu kikatusemeza kugenda kubarolerra, tukasalirwa muno kuruga omu kiikaro ekitwali nituheerezamu habwokuba twali nitukigonza muno.”

² William na Terrie nibagamba ngu: “Obutwakimanyira ngu titukyasobora kuheereza omu ihanga erindi habw’oburwaire, tukarra. Kinu kikatusaliza muno habwokuba ekigendererwa kyaitu eky’okuheereza Yahwe omu ihanga erindi kyali ekitakyasoboka.”

³ Aleksey nagamba ati: “Nkaba nkimanyire ngu abarukutuhiganiza baali nibagonza kukinga ofiisi y’itaagi nambere nkaba nimpereza, baitu obubagikingire nkasalirwa muno habwokuba twali twine kuruga ha Beseri.”

4. Bikaguzo ki ebiturabazaaho omu kicweka kinu?

⁴ Haroho ab’oruganda n’abanyaanya itwe baingi abaali nibaheereza ha Beseri hamu n’omu buheereza obundi abasindikirwe kuheereza omu biikaro ebindi. * Ab’oruganda n’abanyaanya itwe banu abesigwa kibagumira obubaleka obuheereza obubabaire nibagonza muno. Kiki ekisobora kubakonyera kugumira enyikara enu? N’osobora ota kubakonyera? Ebigarukwamu eby’ebikaguzo binu nibisobora kutukonyera obututunga empindahinduka omu bwomeezi bwaitu.

5. Tukwatwaho tuta enyikara yaitu obwehinduka?

⁵ Obutuba nituheereza ha Beseri rundi omu buheereza bundi obw’embaganiza kyanguhire kugonza muno abantu hamu n’ekikaro ekiturukuheerezamu. Nahabweki kitusaliza muno obuturuga omu buheereza obu. Tusalirwa muno kusigaho ab’oruganda kandi kuhiganizibwa obukuba nukwo kutuletiire kuruga omu kiikaro eki tweralikirra muno habw’ab’oruganda abasigaire omu kiikaro eki. (Mat. 10:23; 2 Kol. 11:28, 29) Ekintu ekindi, obutusindikwa kuheereza omu kiikaro kindi rundi obutugaruka omu ka nikisobora kutugumira kwongera kumanyira. Robert na Mary Jo nibagamba ngu: “Obutwagarukire omu ka tukakyetegereza ngu twali nitwetaaga kwega buhyaka enyetwaza n’enyikara ey’ekiikaro kandi kikatugumira n’okutebeza omu rulimi rwaitu. Habw’okumara emyaka nyingi omu mahanga gandi tukehurra nk’abanyamahanga.” Abamu abatunga empindahinduka eza bwangu nibasobora kutunga ebizibu omu byentahya. Nibasobora kweralikirra muno, kulemwa kumanya eky’okukora hamu n’okuhwamu amaani. Kiki ekisobora kubakonyera?

6. Kiki ekitusemeriire kukora kwikara tuli haihi na Yahwe?

⁶ Ikara haihi na Yahwe. (Yak. 4:8) Eki nitusobora kukikora tuta? Tusemeriire kwesigira kimu ngu Yahwe ahurra esaara zaitu. (Zab. 65:2) Kandi Zabuli 62:8 n’egamba eti: “Musesege omutima gwanyu omu maisoge.” Yahwe n’asobora “okukora okukira byona ebitusobora okusaba nokutekereza.” (Bef. 3:20) Yahwe tagarukira hakutuha ebintu ebituba tumusabire byonka, baitu n’asobora kumaraho ebizibu byaitu omu omulingo ogutubaire tutarukunihira.

7. (a) Kiki ekiratukonyera kwikara haihi na Yahwe? (b) Kusigikirra ha Abaheburaniya 6:10-12, kiki ekirarugamu obuturagumizaamu nituheereza Yahwe n’obwesigwa?

⁷ Kusobora kwikara tuli haihi na Yahwe tusemeriire kusoma Baibuli buli kiro kandi n’okwecumitirizaaho ebitusomere. Ow’oruganda omu ow’akaba ali mumisaani nagamba ati: “Gumizaamu n’entekaniza yawe ey’okuramya okw’eka hamu n’okwetekaniriza ensorrokano, nk’oku w’akoraga kara.” Kandi wekambe kutebeza n’ab’oruganda omu kitebe kyawe ekihyaka. Yahwe naijuka abo boona abaikara nibamuheereza n’obwesigwa, n’obubaraaba batakyasobora kumuheereza nk’oku bakoraga kara.​—Soma Abaheburaniya 6:10-12.

8. Ebigambo ebiri omu 1 Yohana 2:15-17 nibisobora bita kukukonyera kwebembeza ebintu ebirukukira obukuru?

⁸ Otaikiriza ebintu by’ensi kukuhugura. Otaikiriza okwetuntura okw’ensi ya Sitaani kukakulemesa kuheereza Yahwe. (Mat. 13:22) Otaikiriza abantu  abatarukuheereza Yahwe, banywani baawe, rundi abanyabuzaale abarukuzoka ngu nibakugondeza ebirungi kukubiihabiiha ngu osemeriire kuba na sente nyingi kusobora kuba n’obwomeezi oburungi. (Soma 1 Yohana 2:15-17.) Wesige Yahwe habwokuba araganiize kukuha ebyetaago byawe byona ha kaire konyini akorukubyetagiramu. Naija kukukonyera kwikara ogumire, akuhuumuze kandi akuhe n’ebyetaago byawe eby’omubiri.​—Baheb. 4:16; 13:5, 6.

9. Kusigikirra ha Enfumo 22:3, 7, habwaki osemeriire kwetantara kugwa omu mabanja, kandi kiki ekisobora kukukonyera kukora encwamu enungi?

⁹ Wetantale amabanja. (Soma Enfumo 22:3, 7.) Kufuruka nikisobora kukuletera ebizibu omu by’entahya kandi nikisobora kukurugirramu kugwa omu mabanja. Kusobora kwetantara amabanja, wetantale kwekoppa ebintu rundi kweyohoza sente kugura ebintu eby’otarukwetaaga. Obwoba oine ekizibu eky’amaani, nk’okurolerra omugonzebwa wawe ow’arwaire, nikisobora kukugumira kumanya sente zingaha ez’osemeriire kweyohoza kandi ez’orasobora kusasura. Omu nyikara nk’enu, kirungi kwijuke ngu ‘kusaba n’okwesengereza’ nibisobora kukukonyera kukora encwamu ey’ehikire. Yahwe nasobora kugarukamu esaara zaawe kuraba omu kukuha obusinge oburalinda ‘omutima gwawe n’ebitekerezo byawe,’ kandi kinu nikiija kukukonyera kukora encwamu enungi.​—Baf. 4:6, 7; 1 Pet. 5:7.

10. Nitusobora tuta kutunga abanywani abahyaka?

¹⁰ Tunga abanywani abarungi. Gambira abanywani ab’orukwesiga kandi abarabire omu nyikara nk’eyaawe omulingo orukwehurramu n’ebizibu eby’orukurabamu. Kinu nikisobora kukuletera kwehurra kurungi. (Mug. 4:9, 10) Abanywani abawatungire omu kiikaro nambere okaba n’oheereza nibaija kwikara baali banywani baawe. Baitu hati osemeriire kutunga abanywani abahyaka. Kandi oijuke ngu kusobora kutunga omunywani omurungi naiwe osemeriire kuba oli muywani murungi. Nosobora ota kutunga abanywani abahyaka? Bagambire ebirungi eby’otungire omu kuheereza Yahwe, kandi leka bakirole ngu n’oheereza Yahwe n’okusemererwa. Abamu omu kitebe nibasobora kutetegereza ensonga habwaki n’ogonza muno obuheereza bw’akasumi koona baitu abandi nibaija kukwatwaho ekyokurorraho kyawe kandi bafooke banywani baawe. Wetantale kwikara n’obazaaho muno ebintu eby’amaani ebiwakozere obw’okaba okyali omu kiikaro nambere okaba n’oheereza kandi otabazaaho enyehurra embi ey’osobora kuba oine.

11. Nimusobora muta kwikara mwine okusemererwa omu ka yanyu?

¹¹ Obworaaba warugire omu buheereza bwawe habwokuba omugonzebwa waawe akarwara, otamujunaana. Kandi obworaaba niiwe w’arwaire, tosemeriire kwehurra kubi okatekereza ngu niiwe waletiire omugonzebwa waawe kuruga omu buheereza obwakaba nagonza. Oijuke ngu muli “mubiri gumu” kandi obumwatahire obuswere mukaragaana omu maiso ga Yahwe ngu nimwija  kurolerrangana omu nyikara zoona. (Mat. 19:5, 6) Enda eyimutetekaniriize obweraaba niyo yabaletiire kuruga omu buheereza bwanyu, mugumye omwana wanyu ngu w’omugaso muno kukira n’obuheereza obumukaba murumu. Kandi mwikale nimumugumya ngu nimumurora nk’obugwetwa kuruga hali Ruhanga. (Zab. 127:3-5) Akaire nuko kamu mumugambire ebirungi ebimwatungire obumukaba mukyali omu buheereza bwanyu. Kinu nikisobora kwekambisa omwana wanyu kutaaha obuheereza obw’akasumi koona nk’oku mwakozere.

12. (a) Nitusobora tuta kukonyera abo abali omu buheereza obw’akasumi koona kugumizaamu n’obuheereza bwabo? (b) Nitusobora tuta kubakonyera kwanguhirwa kugumira enyikara y’abo empyaka?

¹² Ebitebe bingi hamu n’ab’oruganda n’abanyaanya itwe nibakonyera abo abali omu buheereza obw’akasumi koona kugumizaamu n’obuheereza bwabo. Kinu bakikozere kuraba omu kubekambisa kwikara omu buheereza obwa kasumi koona, kubakonyera omu byentahya, rundi kukonyera abanyabuzaale b’ab’oruganda n’abanyaanya itwe abarukuheereza omu biikaro ebya hara. (Bag. 6:2) Abo abakaba bali omu buheereza obw’akasumi koona kakuba baija omu kitebe kyanyu timusemeriire kutekereza ngu obuheereza bw’abo bukahwaho habwokuba babaire batarukwekamba rundi babafubiire habw’okukora ensobi. * Baitu mubakonyere kugumira enyikara yabo empyaka. Mubatangirre kurungi kandi mubasiime habw’ebi byona ebi babaire nibakora n’obukiraaba ngu habw’oburwaire tibakyasobora kuheereza nk’oku baheerezaaga kara. Bafoole banywani baawe. N’osobora n’okwegera h’amagezi gaabo, kutendekwa kw’abo rundi ebibarabiremu.

13. Bukonyezi ki obutusobora kuha abo abatakyali omu buheereza bwabo?

 ¹³ Ab’oruganda n’abanyaanya itwe banu nibasobora nokwetaaga obukonyezi obw’okuserra enju, endubata, omulimo rundi ebyetaago ebindi. Haroho n’ebintu ebimu ebitusemeriire kubakonyera kumanya, nk’ekyokurorraho booleke nambere basobora kugura eby’okulya n’engoye ebya sente entaito. Baitu ekirukukira obukuru, nukwo kulengaho kwetegereza enyikara yabo. Nibasobora kuba barwaire rundi omunyabuzaale wabo nuwe arwaire. Nibasobora kuba baine obujune habw’okufeerwa omugonzebwa wabo. * Kandi n’obubaraaba batarukukyoleka, nibasobora kuba baine obujune habwokuba bagonzaaga muno ab’oruganda n’abanyaanya itwe ab’omu kiikaro nambere baheerezaaga. Nikisobora kubatwarra akasumi kugumira obujune bunu n’okwongera kutekaana kurungi.

14. Ab’oruganda n’abanyaanya itwe bakakonyera bata munyaanya itwe omu kugumira enyikara ye hanyuma y’okuruga omu buheereza bwe?

¹⁴ Kakuba okora nabo omu buheereza kandi okabateraho ekyokurorraho ekirungi, nikisobora kubanguhira kugumira enyikara yabo empyaka. Munyaanya itwe ay’amazire emyaka nyingi naheereza omu nsi endi nagamba ati: “Obunkaba nkyali omu buheereza bwange, buli kiro nayegesaaga ebeegi ba Baibuli. Baitu obunaizire kunu, nkaba ntasobora n’okutunga omugisa ogw’okusomera omuntu ekyahandiikirwe rundi kumwoleka vidiyo. Baitu ab’oruganda n’abanyaanya itwe omu kitebe kyange ekihyaka bagendaga na nyowe obubabaga nibagarukira abantu batebiize n’abeegi baabo aba Baibuli. Obunaroraga ab’oruganda n’abanyaanya itwe banu abesigwa kandi abekambi nibegesa abeegi ba Baibuli kikankonyera kuba n’entekereza ehikire ha kicweka ekiturukutebezaamu. Nkega emiringo empyaka ey’okutandika kubaza n’abantu ab’omu kiikaro kinu. Binu byona bikankonyera kwongera kutunga okusemererwa.”

15. Nosobora ota kwikara n’oheereza Yahwe n’okusemererwa omu kiikaro ekihyaka?

¹⁵ Nosobora kutunga kusemererwa n’omu kiikaro ekihyaka eky’orumu. Otatekereza ngu otahikirize  kurungi obuheereza obw’okaba orumu rundi ngu tokyaine mugaso. Tekerezaaho emiringo Yahwe akukonyiremu kandi oikale n’otebeza. Hondera eky’okurorraho eky’Abakristaayo ab’omu kyasa ky’okubanza. Hoona nambere bagenzere, bakagumizaamu “nibatebeza Ekigambo.” (Eng. 8:1, 4) Obworaikara notamu amaani kutebeza nikisobora kurugamu ebirungi. Ekyokurorraho, haroho bapayoniya ababingirwe omu ihanga erimu baitu bacwamu kugenda omu ihanga erindi erikaba liri haihi nabo kandi nambere hakaba hali obwetaago bw’amaani obw’abantu ababazaaga orulimi rwabo. Hanyuma y’emyezi nke, abantu baingi baketeraniza ha gurupu ezikaba ziri omu biikaro nambere bapayoniya banu bagiire kutebeza.

16. Nosobora ota kutunga okusemererwa omu buheereza bwawe obuhyaka?

¹⁶ “Okusemererwa kwa [Yahwe] nigo mani ganyu.” (Neh. 8:10) Okusemererwa kwaitu kusemeriire kuruga hali Yahwe hatali obuheereza bw’embaganiza obutwine, n’obuturaaba nitubugonza muno. Nahabweki, obworaba nogonza kutunga okusemererwa, ikara haihi na Yahwe, kandi oikale n’omwesigira kimu. Oijuke ngu kuteeka omutima gwawe gwona ha kukonyera abantu abandi, nikyo kyakuletiire kugonza obuheereza obw’okaba orumu. Na hati, omutima guteeke ha kukonyera abandi nukwo orole omulingo Yahwe arakukonyera kugonza obuheereza obuhyaka.​—Mug. 7:10.

17. Kiki ekitusemeriire kwijuka obukirukuhika ha buheereza obw’embaganiza obutusobora kuba turumu omu kasumi kanu?

¹⁷ Tusemeriire kukimanya ngu nitwija kuheereza Yahwe ebiro n’ebiro baitu kandi obuheereza bw’emabaganiza obuturumu nibusobora kuhwaho akaire koona. Omu nsi empyaka itwena nitwija kuheereza Yahwe omu miringo empyaka. Aleksey, outubalizehoga ha kubanza nakigumya ngu ebiturukurabamu hati nibitukonyera kwetekaniriza empindahinduka ezitulitunga omu nsi empyaka. Nagamba ati: “Nkaba nkimanyire ngu Yahwe aroho kandi ngu ensi empyaka negenda kwija, baitu natekerezaaga ngu tekabaire kwija. Baitu hati Yahwe nimurorra kimu ali omu maiso gange kandi nkimanyire ngu n’ensi empyaka eri haihi muno.” (Eng. 2:25) Obuheereza obw’embaganiza tikiri nikyo kikuru baitu ekikuru nukwo kwikakara nituheereza Yahwe. Tali tuleka baitu naija kwikara n’atukonyera kumuheereza twine okusemererwa hoona nambere tuli.​—Is. 41:13.