1-3. Ne a nisi pogai e mafai ei o ‵fuli a tōfiga o latou kolā e aofia i te taviniga tumau?

“MAI tua o se 21 tausaga ne fakamāumāu ne māua i te mā galuega fakamisionale, ne ma‵saki katoa a mā mātua,” ne fai mai a Robert mo Mary Jo. “Ne fia‵fia māua o tausi atu ki a latou. Kae se mea fakalogo‵mae foki ke tiakina te koga telā ne pele ‵ki ki a māua.”

² “I te iloaga ne māua me kō se mafai o toe ‵foki māua ki te mā galuega ona ko te fakamasaki‵saki, ne fanoa‵noa māua,” ko pati a William mo Terrie. “Ko sē taunu a te mā fakamoemoega ke tavini atu ki a Ieova i se fenua fakaa‵tea.”

³ “Ne iloa ne matou me i tino kolā e fakasaua mai ne ma‵nako ke ‵pono te ofisa lagolago telā ne tavini i ei au,” ne fai mai a Aleskey. “Koi fanoa‵noa eiloa matou i te taimi ne tiakina ei ne matou te Peteli.”

4. Ne a fesili ka sau‵tala tatou ki ei i te mataupu tenei?

⁴ E se gata i ei, e uke foki a tala o te fia afe i te kāiga Peteli mo nisi tino aka kolā ne maua ne latou a tōfiga ‵fou. * Ne faigata ki taina mo tuagane fakamaoni konei ke tiaki olotou tōfiga tāua konei. Se a te mea e mafai o fesoasoani atu ki a latou ke fakafesagai atu ki ‵fuliga konā? E mafai pefea o fesoasoani atu koe ki a latou? A tali ki fesili konā e mafai o fesoasoani mai ki a tatou katoa ke fakafesagai atu ki te ‵fuliga o fakanofonofoga i te olaga.

5. I te auala fea e mafai o pokotia tatou māfai ko isi ne fakama‵fuliga ki ‵tou tōfiga?

⁵ Faitalia me e tavini tumau tatou i te galuega talai io me i te Peteli, e mafai o ati aka ne tatou te loto alofa ki tino penā foki a te koga e tavini atu i ei tatou. Kafai ko tiakina ne tatou a koga konā ona ko nisi pogai, ka fati‵fati eiloa ‵tou loto. Ko misi ne tatou a latou kolā e ‵nofo, kae manava‵se tatou i a latou, maise loa māfai ne ‵tau o tiakina ne tatou te koga tenā ona ko fakasauaga. (Mata. 10:23; 2 Koli. 11:28, 29) E se gata i ei, e mafai o faigata ‵ki ke fanatu ki se koga fou io me foki atu ki tou fenua tonu kae ko sē masani ki tuu i konā. “Ko sē masani māua ki mā tuu kae penā foki te talai atu i te mā ‵gana eiloa,” ne fai mai a Robert mo Mary Jo. “Ne mafau‵fau māua me i a māua e pelā me ne tino fakaa‵tea.” Nisi tino kolā e ma‵fuli fakavave olotou tōfiga e fakafesagai atu ki fakalavelave i mea tau tupe. E mafai o fakalotolotolua, sē tokagamalie, kae loto vāi‵vai. Se a te mea e mafai o fesoasoani atu ki a latou?

6. E mafai pefea o fakapili‵pili atu tatou ki a Ieova?

⁶ Fakapili‵pili atu ki a Ieova. (Iako. 4:8) E mafai pefea o fai tatou penā? Mai te tali‵tonu ki a ia e pelā me ko te “Tino e Lagona ne ia a ‵talo.” (Sala. 65:2) “‵Ligi atu ki tua a mea i otou loto ki ana mua,” ko pati a te Salamo 62:8. A Ieova e mafai o fai ne ia a “mea e uke atu i lō mea kolā e fakamolemole io me mafau‵fau tatou ki ei.” (Efe. 3:20) E se fakatapula ne ia a mea fua kolā e fakamolemole atu tatou ki ei i ‵tou ‵talo. E mafai o fai ne ia a mea kolā ne seki fakamoe‵moe io me mafau‵fau tatou ki ei, ke faka‵lei aka i ei a ‵tou fakalavelave.

7. (a) Se a te mea ka fesoasoani mai ki a tatou ke tumau i fakapili‵pili atu ki a Ieova? (e) E ‵tusa mo te Epelu 6:10-12, se a te ikuga ka maua ne tatou māfai e tumau i te tavini fakamaoni atu ki a Ieova?

⁷ Ke tumau i te fakapili‵pili atu ki a Ieova, fai‵tau ki te Tusi Tapu i aso katoa kae mafaufau ‵loto e uiga ki ei. E fai mai se misionale, penei: “Fakatumau se polokalame i aso katoa o tapuakiga a kāiga mo fakatokaga ki fakatasiga, pelā mo te mea ne fai ne koe i te koga ne tavini muamua i ei koe.” E se gata i ei, tumau i te aofia katoatoa i te talaiatuga o te tala ‵lei i tau fakapotopotoga fou. E masaua faeloa ne Ieova a latou kolā e tumau i te tavini fakamaoni atu ki a ia, faitalia me ko sē mafai o fai ne latou a mea katoa ne fai muamua ne latou.—Faitau te Epelu 6:10-12.

8. E mafai pefea o fesoasoani atu a pati i te 1 Ioane 2:15-17 ke fakafaigofie ne koe a tou olaga?

 ⁸ Fakafaigofie tou olaga. Ke mo a ma talia ne koe a te manavase ki mea o te lalolagi a Satani ke fai ei ke “ola sai‵tia” io me ke taofi ei koe mai te tavini atu ki a Ieova. (Mata. 13:22) ‵Teke atu a fakamalosiga mai te lalolagi io me ko taugasoa mo kāiga ‵pili ke ‵sala atu ki se puipuiga i mea tau tupe i te olaga tenei e pule ki ei a Satani. (Faitau te 1 Ioane 2:15-17.) Tali‵tonu ki a Ieova, telā e tauto mai me ka fakamalie ne ia a ‵tou manakoga faka-te-agaga, mea tau lagonaga, mo mea faka-te-foitino “i te taimi tonu.”—Epe. 4:16; 13:5, 6.

9. E ‵tusa mo te Faataoto 22:3, 7, kaia e tāua i ei ke ‵kalo kea‵tea mai te faiga o kaitalafu sē aoga, kae se a te mea e mafai o fesoasoani mai ke fai ne tatou a fakaikuga ‵poto?

⁹ ‵Kalo kea‵tea mai te faiga o kaitalafu sē aoga. (Faitau te Faataoto 22:3, 7.) A te ga‵sue fakavave ki se koga e mafai eiloa o uke a tupe e fakamāumāu ki ei, kae faigofie foki o iku atu ki te faiga o kaitalafu. Ke fakamu‵tana te kaitalafu, ke fakaeteete i te ‵togi a mea kolā e se manakogina malosi ne koe ki tupe kaitalafu. Kafai e ‵tu atu tatou i se tulaga mafatia i mea tau lagonaga, maise loa māfai e tausi atu ki tino pele kolā e ma‵saki, e mafai eiloa o faigata ke filifili aka ne tatou te aofaki o tupe e ma‵nako tatou o kaitalafu. I vaegā tulaga penā, masaua me i te “tuku atu o mea katoa” mo te faiga o “talosaga” e mafai o fesoasoani atu ke fai ne koe a fakaikuga ‵poto. Mai te tali atu ki au talosaga, e mafai o tuku mai ne Ieova ki a koe a te filemu telā ka “puipui ne ia otou loto mo te malosi o otou mafaufau,” mai te fesoasoani atu ke mafaufau faka‵lei koe ki mea e aunoa mo te manavase.—Fili. 4:6, 7; 1 Pe. 5:7.

10. E mafai pefea o ati aka ne tatou a vā fakataugasoa ‵lei?

¹⁰ Fakatumau a fesokotakiga ‵lei. Fakaasi atu ou lagonaga mo au tala ki ou taugasoa ‵lei, maise ki a latou kolā e isi ne olotou tala e uiga ki mea fakafiafia mo mea faiga‵ta ne oko ki a latou. Te faiga tenā e fesoasoani atu eiloa ke maua ne koe a te fiafia. (Fai. 4:9, 10) A ou taugasoa i te koga ne tavini muamua koe i ei ka tumau i te fai mo ou taugasoa. Kae nei la, i te koga fou e tavini ei koe, ko manakogina ke ‵sala atu koe ki taugasoa ‵fou. Masaua, ke maua sou taugasoa, e ‵tau o fai koe pelā me se tino atafai kae mata fiafia. E mafai pefea o maua ne koe a taugasoa ‵fou? Ke fai atu a tala ‵gali e uke e uiga ki tau taviniga ki a Ieova, kae fai ke lavea ne latou a te fiafia i tau taviniga ki a Ieova. E tiga eiloa e isi ne tino i te fakapotopotoga e se malamalama i tou loto finafinau i tau taviniga tumau, kae e mafai eiloa ne nisi tino o tau‵tali atu i tau fakaakoakoga kae fai mo ou taugasoa ‵lei. Kae ke fakaeteete foki ke mo a ma tō tavae malosi ne koe au galuega ne fai i te taviniga ki a Ieova, penā foki mo lagonaga sē ‵lei ne nofo mo koe.

11. E mafai pefea ne koe o fakatumau te fiafia i tou olaga avaga?

¹¹ Kafai ne ‵tau o tiakina ne koe tou tōfiga  ona ko tau avaga e fakamasakisaki, ke mo a ma ‵losi atu ki a ia. I te suā feitu, kafai foki koe e fakamasakisaki, sa loto vāivāi mai te mafaufau me ko fakafanoanoa ne koe a tau avaga. Masaua, a koulua ko fai mo “foitino e tasi,” kae ne tauto koe ki a Ieova me ka fakatau tausi koulua suā tino ki te suā tino faitalia me se a te mea e tupu. (Mata. 19:5, 6) Kafai ko tiakina ne koe a tou tōfiga ona i a koe ko faitama, masaua me e iloa ne tau tama me e tāua fakafia atu a ia ki a koe i lō te tōfiga tenā. Fakatalitonu atu ki tau tamaliki me e kilo atu koe ki a ia e pelā me “se taui” mai te Atua. (Sala. 127:3-5) E se gata i ei, fai atu ki a ia a mea ‵gali ne fai ne koe i te koga ne tavini muamua koe i ei. A te faiga tenā e mafai o fakamalosi atu ki tau tama ke fakaaoga a tena olaga i te taviniga fakafiafia ki a Ieova e pelā mo te mea ne fai ne koe.

12. (a) E mafai pefea o fesoasoani atu tatou ki a latou kolā e aofia i te taviniga tumau ke tumau i olotou tōfiga? (e) E mafai pefea o fesoasoani atu tatou ke fakamasani latou ki olotou tōfiga ‵fou?

¹² Se mea gali me e uke a fakapotopotoga mo tino taki tokotasi e fai ne latou a mea e mafai o fai ke mafai ne latou kolā e aofia i te taviniga tumau o tumau i olotou tōfiga. E fai latou penā mai te fakamalosi atu ke tumau latou i te ga‵lue, fesoasoani atu ki a latou i mea tau tupe mo mea faka-te-foitino, io me fesoasoani atu ki a latou ke tausi atu ki olotou kāiga i te fale. (Kala. 6:2) Kafai e maua ne latou kolā e aofia i te taviniga tumau se tōfiga fou i tau fakapotopotoga, sa kilo atu ki te fakamafuliga tenā e pelā me se fakaasiga me e se ‵lei olotou galuega fai io me ne polopoloki ‵mafa latou. * I lō te fai penā, fesoasoani atu ki a latou ke fakamasani ki te  ‵fuliga tenā. Tali fiafia latou kae fakamālō atu ki a latou mō te galuega ne fai ne latou, faitalia loa me e fakatapulagina ne masaki a mea e mafai ne latou o fai. Fakamasani ki a latou. Tauloto mai i olotou fakaakoakoga, te ‵poko o te lotou iloaga mo mea ne fai ne latou.

13. Se a te fesoasoani e mafai o tuku atu ne tatou ki a latou kolā e maua ne latou se tōfiga fou?

¹³ Muamua la, a latou kolā e maua ne latou se tōfiga fou e mafai o ma‵nako ki tou fesoasoani ke ‵sala atu ki se fale, mea fakateletele, galuega mo nisi mea kolā e manakogina. Kāti e ma‵nako foki ki ne fakamatalaga e uiga ki mea kolā e ‵tau o fai i aso takitasi, e pelā mo te ‵togiga o lafoga. A ko te ‵toe mea tāua, e ma‵nako latou ke loto malamalama koe i a latou. E mafai eiloa o faigata ki a latou ke fakafesagai atu ki olotou ma‵saki io me ko ma‵saki a olotou kāiga. E mafai eiloa o fanoa‵noa latou i se mate o se tino pele. * Kae e mafai foki o fanoa‵noa latou māfai ko misi ne latou a olotou kāiga faka-te-agaga i fakapotopotoga kolā ne tavini muamua latou i ei. E manakogina ‵ki ne latou a taimi e uke ke fakafesagai atu ki lagonaga konā.

14. Ne fesoasoani atu pefea a tino talai ki se tuagane ke fakamasani ki tena tōfiga fou?

¹⁴ I te taimi e talai fakatasi ei koutou, e mafai eiloa o fesoasoani atu tau fakaakoakoga ‵lei ke fakamasani latou ki te ‵fuliga tenā. “I te koga ne tavini muamua au i ei, ne fai ne au a akoga faka-te-Tusi Tapu i aso katoa,” ne fai mai se tuagane telā ne tavini atu mō se fia tausaga i se fenua fakaa‵tea. “I toku tōfiga fou, ne tai faigata loa ke maua se avanoaga ke faitau se tusi faitau mai te Tusi Tapu io me fakaasi se vitio i te galuega talai. Kae ne ‵kami au ne tino talai i konā ki olotou toe asiga mo akoga. A te kilo atu ki taina mo tuagane loto finafinau kae loto ma‵losi konei e fai ne latou a akoga faka-te-Tusi Tapu kolā e ga‵solo ki mua, ne fakamalosi mai ke maua ne au se kilokiloga ‵lei. Ne tauloto au ke iloa o kamata a sau‵talaga i se koga talai fou. Ne fesoasoani mai a mea katoa konei ke toe maua ne au a te fiafia.”

15. E mafai pefea o manuia koe i tou tōfiga fou?

¹⁵ E mafai o manuia koe i tou tōfiga fou. Sa mafaufau me ne fai ne koe se mea sē ‵lei i tou tōfiga mua. Mafaufau ki auala e uke e fesoasoani atu ei a Ieova ki a koe i te taimi nei kae tumau i te talai atu. Fakaakoako ki Kelisiano fakamaoni i te senitenali muamua. Faitalia me e ‵nofo latou i fea, ne olo atu latou “i te fenua kātoa o folafola te tala ‵lei e uiga ki te muna a te Atua.” (Galu. 8:1, 4) Au taumafaiga ke tumau i te talai atu e mafai o maua mai i ei a ikuga ‵lei. E pelā me se fakaakoakoga, ne olo atu a paenia kolā ne fakatapu i se fenua e tasi ki te suā fenua telā e manakogina malosi i ei a tino kolā e fai‵pati ki te ‵gana tenā. I ne nāi masina, ne faka‵tu aka i ei a potukau kolā ne ga‵solo ki mua.

16. E mafai pefea o fiafia koe i tou tōfiga fou?

¹⁶ “Te fiafia o Ieova ko te otou ‵pui malosi.” (Nee. 8:10) E ‵tau o maua ne tatou te fiafia mai te ‵tou fesokotakiga mo Ieova kae e se mai ‵tou tōfiga, faitalia me pefea te fakatāua ne tatou. Tela la ke tumau i te sa‵sale fakatasi mo Ieova kae ‵sala atu ki a ia mō te poto, takitakiga mo te fesoasoani. Masaua me ne fiafia koe ki tou tōfiga muamua me ne fai ne koe te ‵toe mea e mafai o fai ke fesoasoani atu ki tino i ei. Ke na fiafia foki koe ki tou tōfiga fou kae onoono aka la ki te auala e fesoasoani atu ei a Ieova ke fiafia foki koe ki ei.—Fai. 7:10.

17. Se a te mea e ‵tau o masaua ne tatou e uiga ki tou tōfiga ‵fou?

¹⁷ E ‵tau o masaua ne tatou me i te ‵tou taviniga e fai ki a Ieova e tumau ki te se-gata-mai, kae ko ‵tou tōfiga konei e maua fua ne tatou mō se taimi toetoe. I te lalolagi fou, e mafai eiloa o ma‵fuli a ‵tou tōfiga. E pelā mo Aleksey, telā ne taku mai i te kamataga, ne talitonu me ne fai ne tōfiga konei ke fakatoka a ia mō tōfiga i aso mai mua. “Ne iloa faeloa ne ia me i a Ieova mo tena lalolagi fou ne mea ‵tonu eiloa, kae e foliga mai pelā me koi tai ‵mao malie,” ne fai mai a Aleksey. “Nei la, ko pili ‵ki eiloa au ki a Ieova, kae ko te lalolagi fou ko pili ‵ki mai .” (Galu. 2:25) Faitalia me se a te tōfiga e maua ne koe, ke na tumau i te sa‵sale fakatasi mo Ieova. Ka se tuku tiaki ne ia tatou, kae ka fesoasoani mai ke maua ne tatou a te fiafia i te faiga o so se mea e mafai ne tatou o fai i tena taviniga—faitalia te koga e tavini ei tatou.—Isa. 41:13.