1—3. Бәзи толуқ вақитлиқ хизмәтчиләр немә сәвәптин хизмитини қалдуриду?

 РОБЕРТ вә Мэри шундақ дәйду: «Биз 21 жил миссионер болуп хизмәт қилдуқ. Шу әҗайип жиллар болған еди. Лекин яшанған ата-анилиримизға ғәмхорлуқ қилишимиз зөрүр болди. Уларға ярдәм беришкә хошал болсақму, бәк яхши көрүп қалған җайдин кетишкә асан болмиған».

² «Саламәтлигимиз түпәйли хизмитимизни тохтитишимиз керәклигини билгәндә, көз йешимизни туталмидуқ. Сәвәви биз чәт әлдә Йәһваға хизмәт қилишни һәрдайим арзу қилаттуқ, амма әнди бу мүмкин әмәс еди»,— дәп бөлүшкән Вильям билән Терри дегән әр-аял.

³ Алексей мундақ дегән: «Һөкүмәт филиални япмақчи болғанлиғини билгән едуқ. Бирақ биз Бәйтәлдин кетишкә мәҗбур болғанда, бәрибир көңлүмиз бәкму йерим болди».

4. Бу мақалидә қандақ соалларни көрүп чиқимиз?

⁴ Шундақ өзгиришләргә дуч кәлгәнләрниң арисида миңлиған Бәйтәл хизмәтчилири вә башқа қериндашлар бар. Бу садиқ қериндашлар үчүн яхши көрүп қалған хизмитини тохтитиш асан әмәс болуши мүмкин b. Уларға өзгиришләргә көнүшкә немә ярдәм бериду? Сиз уларға қандақ яр-йөләк болалайсиз? Мошу соалларниң җавави һаятимизда өзгиришләр болғанда һәммимизгә ярдәм берәләйду.

5. Хизмитимиз өзгәргәндә, өзүмизни қандақ һис қилимиз?

⁵ Бәйтәлдә яки толуқ вақитлиқ хизмәтниң башқа түридә болайли, адәмләрни яхши көрүп қалимиз яки шу җайға үгинип кетимиз. Шуңа, кетишкә тоғра кәлсә,  худди қәлбимизгә пичақ санчилғандәк болиду. Көңлүмиз бағлинип қалған қериндашлардин айрилиш наһайити еғир вә биз уларни бәк сеғинимиз. Болупму қаршилиққа учриғанлиқтин, кетип қалған болсақ, шу йәрдә қалған қериндашлардин бәкму әнсирәймиз (Мәт. 10:23; Кор. 2-х. 11:28, 29). Шуниң билән, йеңи мәдәнийәткә үгиниш яки һәтта өз жутимизниң мәдәнийитигә қайтидин үгиниш қийин болиду. Роберт билән Мэри: «Өз мәдәнийитимиз биз үчүн ят болуп қалған. Ана тилимизда вәз қилишниму унтуп қаптимиз. Өз жутимизда өзүмизни чәт әлликтәк һис қилдуқ»,— дегән. Вәзиписи өзгәргәндә, бәзи қериндашлар туюқсиз пул тәрәптин қисилип қалиду. Шуниң үчүн улар әтә немә боларини билмәй, үмүтсизлинип, көңли йерим болуши мүмкин. Уларға немә ярдәм берәләйду?

6. Йәһва билән йеқин мунасивәтни қандақ сақлалаймиз?

⁶ Йәһва Худа билән йеқин мунасивәтни сақлаң (Яқуп 4:8). Буниң үчүн немә қилишимиз керәк? Йәһваға тайинишимиз лазим, чүнки У дуалиримизни аңлайду (Зәб. 65:2). Зәбур 62:8дә, (КТ): «Униң [Йәһваниң] алдиға ич-бағриңларни төкүңлар»,— дәп йезилған. У биз тилигәндин, һәтта ойлиғинимиздинму көп ишларни қилалайду (Әфәс. 3:20). Йәһва Худа дуалиримизға җавап берипла қоймай, ухлисақ чүшимизгә кирип чиқмайдиғандәк йол билән қийинчилиқлиримизни һәл қилалайду.

7. а) Йәһва билән йеқин мунасивәтни сақлашқа немә ярдәм бериду? ә) Ибранийларға 6:10—12гә асасән, садақәтмәнлик билән хизмәт қилишни давамлаштуруш немә үчүн муһим?

⁷ Йәһва билән яхши мунасивәттә болуш үчүн Язмиларни күндә оқуп, оқуғанлиримиз үстидин чоңқур ойлинишимиз керәк. Миссионер болуп хизмәт қилған бир қериндаш мундақ дәйду: «Илгирики хизмитимиздикигә охшаш һәр һәптә учришишларға тәйярлиқ қилип, аиләвий ибадәтни өткүзүң. Шуңа кейинму бу адитиңизни ташлимаң». Шундақла йеңи җамаәт билән дайим вәз қилип туруң. Бурунқидәк көп хизмәт қилалмисиңизму, садақәтмәнлик билән қилған хизмитиңизни Йәһва Худа һәргиз унтуп қалмайду (Ибранийларға 6:10—12ни оқуң).

8. Йоһанниң 1-хети 2:15—17дики сөзләр аддий һаят кәчүрүшкә қандақ ярдәм бериду?

⁸ Аддий һаят кәчүрүң. Шәйтанниң  дуниясидики нурғун кишиләр маддий нәрсиләрни ойлап, ғәм-әндишигә берилиду. Лекин сиз ғәм-әндишиләрниң Худаға хизмәт қилишиңизға тосалғу болушиға йол бәрмәң (Мәт. 13:22). Йәһва Худаға ишәнмәйдиған дост-бурадәр яки қериндашлириңиз ярдәм бәрмәкчи болуп, сизни көп пул тепишқа үндисә, буни рәт қилиң (Йоһанниң 1-хети 2:15—17ни оқуң). Муһтаҗ болғанда роһий җәһәттин, һис-туйғу вә маддий җәһәттин керәклик һәммисини «өз вақтида» тәминләп беришкә вәдә қилған Йәһва Худаға тайиниң. У ишәнчиңизни мустәһкәмләп, көңлүңизни орниға чүширип, сиз немигә муһтаҗ болсиңиз, шуни бериду (Ибр. 4:16; 13:5, 6).

9. Пәнд-нәсиһәтләр 22:3, 7дә йезилғандәк, қәриз алмаслиқ немә үчүн муһим? Дана қарар чиқиришқа немә ярдәм бериду?

⁹ Қәриз алмаслиққа һәрикәт қилиң (Пәнд-нәсиһәтләр 22:3, 7ни оқуң). Көчүш үчүн көп пул керәк болғанлиқтин, қәризгә петип кетиш оңай. Шуңа һаҗити йоқ нәрсини қәризгә сетивалмаң. Қийин әһвалға чүшүп қалғанда, мәсилән йеқинлириңизниң бирси ағрип қалғанда, қәризгә қанчә пул елишни билмәй қелишиңиз мүмкин. Шундақ вақитларда «дуа һәм илтиҗа» қилиш дана қарар чиқиришиңизға ярдәм бериду. Йәһва Худа дуайиңизға җавап берип, қәлбиңиз билән әқлиңизни тинчландуриду. Шу чағда һәммини таразиға селип, тоғра қарар чиқириш асан болиду (Флп. 4:6, 7; Пет. 1-х. 5:7).

10. Йеңи достларни тепиш үчүн қандақ қилсақ болиду?

¹⁰ Аилиңиз вә достлириңиз билән яхши мунасивәтни сақлаң. Йеқин достлириңизға, болупму охшаш синақни баштин кәчүргәнләргә, дәрдиңизни төкүп, қандақ һис-туйғуда екәнлигиңизни ейтип бериң. Шундақ қилсиңиз, йеникләп қалисиз (Вәз 4:9, 10). Бурунқи достлириңиз билән дост болуп қалсиңизму, һазир йеңи достларни тепишиңиз керәк. Достларни тепиш үчүн, авал өзүңиз дост болушиңиз керәклигини унтумаң. Йеңи достларни қандақ тепишқа болиду? Башқиларға хизмитиңиздә болған қизиқарлиқ вақиәләрни ейтип бериң. Шу чағда улар Йәһваға хизмәт қилиштин хошаллиқ тапидиғанлиғиңизни көриду. Җамаәттикиләрниң бәзилири толуқ вақитлиқ хизмәтни яхши көрүшиңизниң сәвәвини чүшәнмәслиги мүмкин. Башқилири болса, шу хизмәт һәққидә билгүси келип, сиз билән достлишишни халайдиғанду. Лекин өзүңиз, хизмәттики утуқлириңиз вә сәлбий һис-туйғулириңиз тоғрилиқла сөзлимәслигиңиз муһим.

11. Һәмрайиңиз билән яхши мунасивәтни қандақ сақлалайсиз?

¹¹ Әгәр һәмрайиңизниң саламәтлиги начарлишип, толуқ вақитлиқ хизмәтни  тохтатқан болсиңиз, уни әйиплимәң. Йә болмиса, сизниң саламәтлигиңиз начарлап кәтсә, һәмрайимниң роһини чүшәрдим дәп өзүңизни әйиплимәң, һәргиз ундақ дәп ойлимаң. Чүнки силәр «бир тән» болуп, Йәһваниң алдида вәзийәт мәйли қандақ болсун, бир-бириңларға ғәмхорлуқ қилишқа вәдә қилған (Мәт. 19:5, 6). Әгәр балилиқ болуп қалғанлиқтин хизмитиңларни тохтитишқа тоғра кәлсә, балиңиз сиз үчүн у һәрқандақ вәзипидин муһимирақ екәнлигини билсун. Балиңизға у силәр үчүн Худадин кәлгән соға екәнлигини пат-пат ейтип туруң (Зәб. 127:3—5). Униңдин башқа, балиңизға хизмитиңларда болған әҗайип вақиәләрни ейтип бериңлар. Бу уни силәргә охшаш, Йәһваға толуқ вақит хизмәт қилишқа дәвәт қилиши мүмкин.

12. а) Толуқ вақитлиқ хизмәттә болғанларға давамлиқ хизмәт қилишқа қандақ ярдәм берәләймиз? ә) Уларниң өзгиришләргә көнүши үчүн биз немә қилалаймиз?

¹² Көплигән җамаәтләр вә қериндашлар толуқ вақитлиқ хизмәттә болғанларға давамлиқ хизмәт қилишқа ярдәм бериш үчүн қолидин кәлгининиң һәммисини қилиду. Мәсилән, хизмитини тохтатмаслиққа үндәйду, маддий яки башқа тәрәптин ярдәм бериду яки аилә әзалириға ғәмхорлуқ қилиду (Гал. 6:2). Толуқ вақитлиқ хизмәтчиләр җамаитиңизгә тәйинләнсә, улар яхши хизмәт қилмапту яки хаталиқ өткүзүп қоюпту дәп ойлимаң c. Әксинчә, һаятидики өзгиришләргә көнүшкә ярдәм бериң. Уларни қучақ йейип қарши елиң. Һазир саламәтлиги  түпәйлидин бурунқидәк хизмәт қилалмисиму, уларни қилған хизмити үчүн махтаң. Улар билән йеқинирақ тонушуң. Уларниң билими вә тәҗрибиси мол, шуңа көпни көргән улардин үгиниң.

13. Башқа йәргә тәйинләнгән қериндашлар қандақ ярдәмгә муһтаҗ?

¹³ Бешида башқа йәргә тәйинләнгән қериндашлар ярдәмгә муһтаҗ болиду. Мәсилән, уларға өй, иш яки керәк болған башқа нәрсиләрни тепишқа ярдәм бериш лазим. Шундақла уларға селиқ төләш, нопус тизимлитиш яки тиббий ярдәм елиш тоғрилиқ чүшәндүрүп бериш лазим. Әң муһими, улар ич ағритишимизға әмәс, уларниң вәзийитини чүшинишимизгә муһтаҗ. Бәлким, улар өзлириниң яки туққанлириниң саламәтлиги түпәйли қийинчилиқ тартиватқан болуши яки болмиса улар йеқинидин айрилип қалған d. Бурун хизмәт қилған йеридә қалған достлирини сеғинип, ялғуз болғанда ичидә һәсрәт чекип жүргәнду. Шундақ дәрт вә һәр түрлүк һис-туйғулар билән күрәш қилиш үчүн, вақит керәк.

14. Йәрлик җамаәт бир қериндашниң өзгиришләргә көнүшигә қандақ ярдәм бәргән?

¹⁴ Улар билән биллә вәз қилсиңиз вә яхши үлгә көрсәтсиңиз, өзгиришләргә көнүшигә ярдәм берәләйсиз. Нурғун жиллар чәт әлдә хизмәт қилған қериндаш мундақ дәйду: «Бурунқи хизмитимдә мән адәмләр билән һәр күни Муқәддәс китапни үгинәттим. Йеңи территориядә болса, Муқәддәс китаптин айәтни оқуп бериш яки видеони көрситишниң өзи қийин болған. Лекин йәрлик җамаәттики қериндашлар мени қайта йолуқушлириға яки үгинишлиригә чақирған. Шу садиқ вә тиришчан қериндашларниң адәмләргә роһий җәһәттин өсүшкә ярдәм бәргәнлигини көрүп, мән бу территориягә болған көзқаришимни өзгәрттим. Мән сөһбәт башлашни үгинивалдим. Шуңа, қайтидин хошаллиқ билән хизмәт қилишқа башлидим».

15. Хизмитиңиз өзгәрсиму, утуққа қандақ еришәләйсиз?

¹⁵ Хизмитиңиз өзгәрсиму, сиз утуқлуқ болалайсиз. Мән яхши хизмәт қилалмидим яки әнди бир тийинға әрзимәймән дәп ойлимаң. Һаятиңизда Йәһваниң қолини көрүшкә тиришип, вәз қилишни тохтатмаң. Биринчи әсирдики садақәтмән етиқатдашлардин үлгә елиң. Улар «барған җайлирида Худа сөзи һәққидики хуш хәвәрни җакалиди» (Әлч. 8:1, 4). Қилған әмгигиңиз зайә кәтмәйду. Мәсилән, бир дөләттин қоғлап чиқирилған пионерлар хошна дөләткә көчкән. Шу дөләттиму улар үгәнгән тилда вәз қилишқа муһтаҗлиқ бар еди. Бирнәччә айниң ичидә шу тилдики топқа нурғун кишиләр қошулған.

16. Йеңи хизмитиңиздә хошал болушқа немә ярдәм бериду?

¹⁶ «Йәһваниң хурсәнлиги силәр үчүн күч-қудрәттур» (Нәһ. 8:10). Биз хизмитимизни бәк яхши көрсәкму, хошаллиғимиз вәзипимизгә әмәс, Йәһва билән болған мунасивитимизгә бағлиқ болуши керәк. Шуңа хошал болушни халисақ, Йәһва Худаға бәк йеқин болуп, Униңдин даналиқ, йол-йоруқ вә ярдәм издишимиз зөрүр. Бәлким, сиз бар күчиңиз билән адәмләргә ярдәм бәргәнликтин, илгирики хизмитиңизни яхши көрүп қалғансиз. Ундақта, һазирқи хизмитиңизгиму бар күчиңизни селиң. Шу чағда Йәһва мошу хизмәтни яхши көрүп қелишиңизға ярдәм бериду (Вәз 7:10).

17. Биз немини унтумаслиғимиз керәк?

¹⁷ Хизмитимиз өзгәрсиму, Йәһва Худаға мәңгү хизмәт қилидиғанлиғимизни унтумаң. Йеңи дунияда һәммимизниң хизмити өзгириши мүмкин. Жуқурида тилға елинған Алексей хизмитиниң өзгәргәнлиги уни келәчәктики өзгиришләргә тәйярлаватиду дәп ишиниду. У мундақ дәйду: «Мән һәрқачан Худаға вә йеңи дунияниң келидиғанлиғиға ишәнгән едим, лекин һазир Йәһваға йеқин екәнлигимни һис қиливатимән. Һазир мән йеңи дунияниң босуғисида турғинимға ишәнчим камил» (Әлч. 2:25). Мәйли қандақ вәзипимиз болушидин қәтъийнәзәр, давамлиқ Йәһва Худаға хизмәт қилайли. У бизни һечқачан ташлимайду вә биз мәйли қәйәрдә хизмәт қилайли, хошал болушимизға ярдәм бериду (Йәшая 41:13).