1-3. Die yen erọnvwọn evo re sa nẹrhẹ e wene iruo rẹ iniọvo rehẹ ẹga ọkieje?

ROBERT vẹ Mary Jo da ta: “Avwanre vwọ ghwọrọ ẹgbukpe 21 vwẹ iruo rẹ imishọnare nu, jẹ ọsẹ vẹ oni rẹ avwanre ghworo mamọ re. Avwanre vwo owenvwe ra vwọ vwẹ ukẹcha kẹ ayen, jẹ ọ da avwanre mamọ nẹ avwanre che vrẹn nẹ asan rẹ avwanre vwo ẹguọnọ kpahen na.”

² William vẹ Terrie da ta: “Avwanre vwọ mrẹvughe nẹ avwanre rhe che se rhivwin kpo iruo avwanre-e, fikirẹ jẹ omakpokpọ evwo, avwanre da viẹ. Avwanre guọnọ ga Jihova vwẹ ẹkuotọ ọrhorha, jẹ enẹna e rhe che se ruo ọfa-a.”

³ Aleksey da ta: “Avwanre riẹnre nẹ igomẹnti cha reyọ oghọn ukoko re me da ga na. Ẹkẹvuọvo, ivun miovwo avwanre ọke rẹ igomẹnti vwọ reyọ oghọn ukoko na, ọnana da nẹrhẹ avwanre vrẹn nẹ Bẹtẹl.”

4. Enọ vọ yen a cha fuẹrẹn vwẹ uyono nana?

⁴ Vwọba, e wene iruo rẹ iniọvo buebun rehẹ ẹga ọkieje, ọtiọyen ji te iniọvo re ga vwẹ Bẹtẹl. * Ọ sa bẹn vwọ kẹ iniọvo nana rẹ ayen vwọ yanjẹ iruo rẹ ayen vwo ẹguọnọ kpahen mamọ. Die yen sa vwẹ ukẹcha kẹ ayen vwo yerin ghene ewene na? Ukẹcha vọ yen wọ sa vwọ kẹ ayen? Ẹkpahọnphiyọ rẹ enọ yena cha chọn avwanre uko siẹrẹ ewene da vwomaphia vwẹ akpeyeren avwanre.

5. Idjerhe vọ yen ewene vwẹ iruo rẹ avwanre se vwo djobọte avwanre?

⁵ Ọ da dianẹ Bẹtẹl yen avwanre da ga yẹrẹ asan efa, e se vwo ẹguọnọ rẹ ihwo na vẹ asan na. Ọtiọyena, avwanre muomaphiyọ ọ da dianẹ avwanre che vrẹn nẹ asan na. Ọ da avwanre mamọ ọke ra da yanjẹ iniọvo na vwo, udu ji bru avwanre kpahen ayen, marho ọ da dianẹ omukpahen yen nẹrhẹ avwanre vrẹn nẹ asan na. (Mat. 10:23; 2 Kọr. 11:28, 29) Vwọba, ọ sa dia bẹnbẹn re vwo yono ẹkuruemu kpokpọ, ọ da dianẹ e ji avwanre kpo asan ọfa yẹrẹ ọ da tobọ dianẹ e ji avwanre kpo. Robert vẹ Mary Jo da ta: “Avwanre rha riẹn ẹkuruemu rẹ orho avwanre-e, a vwọ tobọ reyọ ejajẹ rẹ avwanre vwo ghwoghwo dede kọ bẹn kẹ avwanre. Kẹ avwanre rhe họhọ erhorha vwẹ ẹkuotọ rẹ obọ rẹ avwanre na.” Ihwo rẹ iruo rayen weneri se vwo ebẹnbẹn rẹ igho kpregede. Oshọ se mu ayen, udu se bru ayen, ẹwẹn rayen je sa kuọrọn. Die yen sa chọn ayen uko?

6. Mavọ yen avwanre se vwo sikẹrẹ Jihova?

⁶ Sikẹrẹ Jihova. (Jems 4:8) Mavọ yen e se vwo ru ọtiọyen? Ọyen a vwọ vwẹrosuọ kidie ọyehẹ ohwo “ro nyo ẹrhovwo.” (Une 65:2) Une Rẹ Ejiro 62:8 da ta: “Ku udu wẹn ejobi phihọ otọ vwẹ obaro rọye.” Jihova “sa kẹ okẹ ro buru vwẹ ogangan rọye rọ hẹ udu rẹ avwanre vwẹ emu ejobi rẹ avwanre nọre eyẹ rẹ avwanre roro.” (Ẹfe. 3:20) Ọ dia oborẹ avwanre nọ mie vwẹ ẹrhovwo ọvo yen o ruẹ kẹ avwanre-e. Ọ sa rhuẹrẹ ebẹnbẹn rẹ avwanre phiyọ vwẹ idjerhe re rhẹro rọye-en.

7. (a) Die yen cha chọn avwanre uko vwo sikẹre Jihova? (b) Kirobo ri Hibru 6:10-12 tare, die yen che nẹ obuko rọyen rhe siẹrẹ a da fuevun ga Jihova ọkieje?

⁷ Sikẹrẹ Jihova phiyọ womarẹ isese ri Baibol ri kẹdẹ kẹdẹ kugbe erorokodo. Oniọvo ọvo rọ gare kerẹ imishọnare jovwo, da ta: “Muomaphiyọ ẹga orua rẹ ọkieje wẹn, ji muegbe vwọ kẹ uyono kirobo wo ruẹ jovwo.” Vwọba, muomaphiyọ iruo rẹ aghwoghwo na vwẹ ukoko kpokpọ wẹn na. Jihova karophiyọ ihwo ri fuevun ga ọkieje, ọ da tobọ dianẹ ayen rhe se ruẹ te oborẹ ayen ruẹ jovwo-o.—Se Hibru 6:10-12.

8. Mavọ yen eta rehẹ 1 Jọn 2:15-17 sa vwọ chọn wẹ uko vwo yerin akpọ ri kekpe?

 ⁸ Yeren akpọ ri kekpe. Wọ vwẹ uphẹn vwọ kẹ ẹnwan rẹ akpọ rẹ Eshu nana nẹ o “keke” we, yẹrẹ nẹrhẹ wọ dobọ rẹ ẹga ri Jihova ji-i. (Mat. 13:22) Sen ọnyẹ rẹ akpọ nana, igbeyan yẹrẹ ihwo rẹ orua re tanẹ igho yen cha nẹrhẹ ohwo yerin omamọ rẹ akpọ. (Se 1 Jọn 2:15-17.) Vwẹroso Jihova ro veri nẹ ọ cha kẹ avwanre oborẹ avwanre guọnọre vwẹ “ọke” ro fori. Ọ cha nẹrhẹ esegbuyota avwanre ganphiyọ, nẹrhẹ udu avwanre totọ, je kẹ avwanre ekuakua rẹ ugboma rẹ avwanre ghene guọnọ dẹn.—Hib. 4:16; 13:5, 6.

9. Vwo nene obo rehẹ Isẹ 22:3, 7, diesorọ a vwọ kẹnoma kẹ osa rẹ okamuka, die kọyen cha chọn avwanre uko vwo brorhiẹn rọ gbare?

⁹ Kẹnoma kẹ esa rẹ okamuka. (Se Isẹ 22:3, 7.) Ra vwọ kua nẹ asan kpo asan reyọ igho, ọtiọyena kọ phẹrẹ ohwo vwọ riesa. Wo se vwo siobọ resa kpotọ, gba kẹnoma kẹ re vwo momo igho vwọ de ekuakua ri fiemu-u. Jẹ, ọ sa bẹn ọkiọvo ra vwọ riẹn uchosa ra cha re ọke ra da guọnọ igho re che vwo sivwin ohwo rẹ orua rọ muọga. Vwẹ ẹdia tiọyena, karophiyọ nẹ “oyare kugbe ẹkpẹvwẹ” sa chọn wẹ uko vwo brorhiẹn rẹ aghwanre. Jihova cha kpahenphiyọ ẹrhovwo wẹn womarẹ ọ cha vwọ vwẹ ufuoma rọyen vwo sun ubiudu vẹ “iroro” wẹn, ọke yena ku wo se brorhiẹn rọ gbare.—Fil. 4:6, 7; 1 Pita 5:7.

10. Mavọ yen avwanre se vwo mu igbeyan kpokpọ?

¹⁰ Vwo omamọ rẹ igbeyan. Vuẹ igbeyan wẹn obo wo roro, marho kẹ i ri hirharoku ẹdia wẹn na jovwo re. Ọnana sa nẹrhẹ ẹwẹn wẹn totọ. (Aghwo. 4:9, 10) Igbeyan awanre wẹn je cha dia igbeyan wẹn. Ẹkẹvuọvo vwẹ iruo kpokpọ wẹn na, ofori nẹ wo mu igbeyan kpokpọ. Karophiyọ nẹ wo ki se mu ugbeyan ofori nẹ wọ dia ugbeyan. Mavọ yen wo se vwo mu igbeyan kpokpọ? Gbikun rẹ oborẹ wo rhiẹromrẹ re vwẹ ẹga ri Jihova vwọ kẹ ihwo, ji djephia vwọrẹ uruemu wẹn nẹ ẹga ri Jihova kẹ wẹ aghọghọ. Ọ da tobọ dianẹ iniọvo evo vwo ẹruọ rẹ obo re nẹrhẹ oma ẹga ọkieje vwerhen owẹ-ẹ, efa se sikẹrẹ owẹ fikirẹ omamọ rẹ uruemu wẹn, je dia igbeyan wẹn. Ẹkẹvuọvo, nomaso wo vwo jẹ oma wẹn edjephia, wọ je tẹnroviẹ iroro echọchọ-ọ.

11. Mavọ yen omavwerhovwẹn sa vwọ dia evunrẹ orọnvwe wẹn?

¹¹ Ọ da dianẹ wọ yanjẹ iruo ẹga wẹn vwo fikirẹ jẹ omakpokpọ evwo rẹ aye wẹn, wọ hanrhọ-ọ. Ọ da rha dianẹ wẹwẹ kọyen jẹ omakpokpọ evwo, wo ji roro nẹ wo ku ọrivẹ wẹn phiyotọ-ọ. Karophiyọ nẹ, ovwan ihwo ivẹ na “oma ọvo,” wo ji ve kẹ Jihova nẹ otoro obo re phiare-e, ovwan  cha vwẹrote ohwohwo. (Mat. 19:5, 6) Kẹ, ọ da rha dianẹ aye wẹn mrevun kpregede vwo, jẹ ọmọ na riẹn nẹ ọ ghanre kẹ ovwan nẹ iruo na. Vwo imuẹro kẹ nẹ ọyen “osa” ro nẹ obọ ri Jihova rhe. (Une 127:3-5) Je vwẹ ọke vuọvo na vwọ vuẹ kpahen omavwerhovwẹn rẹ ovwan mrẹre vwẹ iruo na. Wo de ru ọtiọyen, ọ sa nẹrhẹ ọmọ wẹn vwẹ akpeyeren rọyen eje vwọ ga Jihova kirobo rẹ ovwan ruru.

12. (a) Mavọ yen a sa vwọ vwẹ ukẹcha kẹ iniọvo rehẹ ẹga ọkieje rere ayen sa vwọ daji iruo rayen? (b) Die yen avwanre che ru rere ewene na sa vwọ lọhọ kẹ ayen?

¹² Ọ vwerhoma nẹ ikoko buebun vẹ iniọvo ọvuọvo davwẹngba rayen eje vwọ vwẹ ukẹcha kẹ iniọvo rehẹ ẹga ọkieje rere ayen sa vwọ daji iruo na. Ayen ru ọnana womarẹ uchebro vẹ ekuakua rẹ ugboma rẹ ayen vwọ kẹ iniọvo nana. Ayen je vwẹ ukẹcha vwọ kẹ ihwo rẹ orua rẹ iniọvo nana ri dia awusheri. (Gal. 6:2) E de ji iniọvo rehẹ ẹga ọkieje rhe ukoko wẹn, wo roro nẹ orọnvwọn ọvo ayen ru chọ yẹrẹ umwemwu ayen ruru yen sorọ-ọ. * Ukperẹ ọtiọyen, vwẹ ukẹcha kẹ ayen rere ewene na sa vwọ lọhọ kẹ ayen. Nabọ dede ayen, ji kpẹvwẹ ayen fikirẹ iruo rẹ ayen ru re, ọ da tobọ dianẹ jẹ omakpokpọ evwo cha sa nẹrhẹ ayen ru te oborẹ ayen ruẹ jovwo-o. Sikẹrẹ ayen. Yono vwo nẹ udje, erianriẹn vẹ oborẹ ayen rhiẹromrẹ re.

13. Ukẹcha vọ yen a sa vwọ kẹ iniọvo re wene iruo rayen?

¹³ Iniọvo re wene iruo rayen sa guọnọ ukẹcha wẹn vwọ mrẹ asan rayen cha dia,  oborẹ ayen cha fa oma wan, iruo rẹ ayen che ru, yẹrẹ erọnvwọn efa. Ayen je sa guọnọ ukẹcha vwẹ ẹdia ri shekpahen osa rẹ uyovwin ra hwa yẹrẹ ishọransi. Marho kparobọ, avwanre davwẹngba vwo vwo ẹruọ rẹ ẹdia rayen, ukperẹ e vwo vwere oma kẹ ayen. Ayen yẹrẹ ihwo rẹ orua rayen se jẹ omakpokpọ evwo. Ọ sa dianẹ ayen vwere uvweri fikirẹ ohwo rayen vwo ẹguọnọ kpahen ro ghwuru. * Ọ je sa dianẹ ayen muomaphiyọ kidie ayen yanjẹ igbeyan rayen vwo vwẹ asan rẹ ayen hepha jovwo. Ọ reyọ ọke a ke sa kpairoro vrẹ iroro tiọyena ri tighi ẹwẹn rẹ ohwo.

14. Mavọ yen ighwoghwota evo vwọ vwẹ ukẹcha vwọ kẹ oniọvo aye ọvo re wene iruo rọyen?

¹⁴ Ọke vwọ yanran na, obicha vẹ udje wẹn sa chọn ayen uko vwo ru ewene na. Oniọvo aye ọvo rọ gare vwẹ ikpe buebun vwẹ ẹkuotọ ọrhorha ọvo, da ta: “Vwẹ asan me da ga jovwo, kẹdẹ kẹdẹ yen me vwo yono ihwo Baibol na. Ẹkẹvuọvo, vwẹ asan kpokpọ nana, ọ pha bẹnbẹn me vwọ mrẹ ohwo mi se se Baibol yẹrẹ dje ividio kẹ. Ighwoghwota rehẹ ukoko kpokpọ na ke durhie uvwe nẹ mi nene ayen kpo orhivwinbrura. Oruru vẹ uduefiogbere rẹ iniọvo na vwo yono ihwo Baibol na nẹrhẹ me sa reyọ ẹro abavọ vwo ni asan kpokpọ na. Mi de rhi yono obo ra tuẹn otaẹtakuẹgbe phiyọ. Enana eje nẹrhẹ me rhoma vwo aghọghọ.”

15. Mavọ yen wo se vwo phikparobọ siẹrẹ e de wene iruo ẹga wẹn?

¹⁵ Wo se phikparobọ siẹrẹ e de wene iruo ẹga wẹn. Wo roro nẹ obo wo ru chọ yen nẹrhẹ e ewene iruo wẹ-ẹn, yẹrẹ obo wo ruru fiemu-u. Roro kpahen idjerhe sansan ri Jihova vwọ chọn wẹ uko enẹna, rere wo muomaphiyọ iruo aghwoghwo wẹn. Vwẹrokere udje rẹ Inenikristi rẹ ẹgbukpe ujorin ẹsosuọ ri fuevun. Otoro asan rẹ ayen hepha-a, ayen “yanran kpo  asan kasan re ghwoghwo ota na.” (Iruo 8:1, 4) O muẹro nẹ ẹgbaẹdavwọn wo vwo ghwoghwo ota na che fierere. Kerẹ udje, ekobaro evo ra djẹ nẹ ẹkuotọ ọvo, djẹ kpo ẹkuotọ ọfa rọ kẹrẹ ayen, rọ je guọnọ ukẹcha de re ghwoghwo. Ejajẹ rayen yen a jẹ vwẹ ẹkuotọ yena. Vwẹ uvwre emeranvwe evo, ihwo buebun da vwomaba ẹko kpokpọ ra da jẹ ejajẹ rẹ ekobaro na.

16. Mavọ yen wọ sa vwọ mrẹ aghọghọ vwẹ iruo kpokpọ wẹn?

¹⁶ “Aghọghọ rẹ Ọrovwohwo ọye hẹ ogangan” wẹn. (Neh. 8:10) E jẹ Jihova dia esiri rẹ aghọghọ avwanre ukperẹ iruo rẹ avwanre, otoro obo ro je avwanre te-e. Ọtiọyena, avwanre da guọnọ sẹro rẹ aghọghọ avwanre, e gbe jẹ e sikẹrẹ Jihova je vwẹroso aghwanre, odjekẹ vẹ obicha rọyen. Karophiyọ nẹ wo vwo ẹguọnọ rẹ iruo wẹn ri jovwo kidie wọ davwẹngba vwọ vwẹ ukẹcha kẹ ihwo rehẹ etiyin. Eriyina, gbe muomaphiyọ iruo kpokpọ wẹn na, rere wọ mrẹ oborẹ Jihova cha chọn wẹ uko vwo vwo ẹguọnọ rọyen.—Aghwo. 7:10.

17. Die yen ofori nẹ a karophiyọ kpahen iruo rẹ ẹga rẹ avwanre?

¹⁷ Karophiyọ nẹ ẹga ri Jihova yen cha dia bẹdẹ, ọ dia iruo rẹ ẹga avwanre-e. Ọkiọvo, e se wene iruo rẹ avwanre vwẹ akpọ kpokpọ na. Aleksey re djunute vwẹ ọtonphiyọ, vwo imuẹro nẹ obo ro rhiẹromrẹ enẹna muegbe rọyen hẹrhẹ okẹ obaro na. Ọ da ta: “O muvwẹro nẹ Jihova herọ, akpọ kpokpọ na je cha rhe, jẹ ọkiọvo ki mi no nẹ ayen pha shesheri. Asaọkiephana, me nabọ sikẹrẹ Jihova re, ọ je họhọ nẹ akpọ kpokpọ na cha rhe kẹrẹkpẹ.” (Iruo 2:25) Otoro oka rẹ iruo ra vwọ kẹ avwanre-e, e jẹ avwanre sikẹrẹ Jihova. Ọ cha yanjẹ avwanre vwo-o, ukperẹ ọtiọyen, ọ cha chọn avwanre uko vwọ mrẹ aghọghọ vwẹ kemu kemu rẹ avwanre ruẹ vwẹ ẹga rọyen, otoro asan ra da ga-a.—Aiz. 41:13.