Xannaˈiyo Huuphe Yohuwaa 34
Ooratta Hanotan Ufayttiyo Ogiyaa
“Intte oottido oosuwaanne . . . Xoossaa siiqido siiquwaa Xoossai doganau worddanchcha gidenna.”—IBR. 6:10.
MAZAMURE 38 I Nena Minttana
HA XINAATIYAN *
1-3. Ubba wode haggaaziyaageeti he maataa agganaadan oottana danddayiya amaridabati aybee?
ROBERTINNE MERI JO kasebaa hassayidi hagaadan giidosona: “Nuuni misoonaawe gididi ufayssiya 21 layttaa takki simmin, nuna yelidaageeti sahettidosona. Nuuni eta heemmiyoogan ufayttida. SHin, nuuni keehi dosiyo sohuwaa aggidi yiidoogan azzanida.”
2 Wiiliyaaminne Teera hagaadan giidosona: “Nu sahuwaa gaasuwan, nuuni kase haggaaziyo sohuwaa simmana danddayennaagaa erido wode yeekkida. Nuuni kare biittan Yihoowayyo haggaazanawu ubbatookka koyoos, shin haˈˈi nuuni hegaadan oottana danddayokko.”
3 Aleksi hagaadan giis: “Nuna yedettiyaageeti taani haggaaziyo macara biiruwaa gorddissanawu koyiyoogaa nuuni erida. SHin, eti Beeteele gorddissin nuuni yaappe kiyido wodekka yiillotida.”
4. Ha huuphe yohuwan nuuni beˈana oyshati awugeetee?
4 Qassi, Beeteelen haggaaziyaageeta gujjin, ubba wode haggaaziya darotussi ooratta maatay imettiis. * Ha alˈˈo ishanttinne michchontti keehi xoqqu ootti xeelliyo maataa aggiyoogee etayyo keehi deexxiyaaba gidana danddayees. He laamiyaa meezetanawu eta aybi maaddana danddayii? Neeni eta waata maaddana danddayay? Ha oyshatu zaaroti deˈuwan laamettiyaabay gakkiyo wode nuna ubbaa maaddana danddayoosona.
LAAMETTIDABAA GENCCIYO OGIYAA
Ubba wode haggaaziyaageeti bantta maataa aggiyoogee paacciyaaba gidana danddayiyoy aybissee? (Mentto 5 xeella) *
5. Nu hanotay laamettiyoogee nuna ayba ogetun qohana danddayii?
5 Nuuni haggaaziyoy Beeteeleena gidin harasaana gidin, nuuni oottiyo sohuwaanne yan deˈiya asaa kaseegaappe aaruwan siiqiyoogaa tamaarana danddayoos. Hegaa gishshawu, nuussi imettida oosuwaa nuuni aggana koshshikko keehi azzanoos. Nuuni nu ishanttanne michchontta laamotoos, qassi nuuni yedetaa gaasuwan aggidi biikko, etassi keehi hirggoos. (Maa. 10:23; 2 Qor. 11:28, 29) Qassi, harasaa biyoogee keehippe metiyaaba gidana danddayees; ayssi giikko yan nuuni ooratta wogaa meezetana koshshennan aggenna. Nuuni yiido sohuwaa simmikkokka, nuuyyo hegaadan siyettana danddayees. Robertinne Meri Jo hagaadan giidosona: “Nu wogaynne nu qaalan sabbakiyoogee nuuyyo ooratta gidiis. Nuuni nu biittan hara biitta asa gididabadan nuussi siyettiis.” Amaridaageetussi hanotay laamettidoogaa gaasuwan qoppennan eta miishshaa metoy gakkana danddayees. Eti woppu geennan aggananne hidootaa qanxxana danddayoosona. Eta aybi maaddana danddayii?
Nuuni Yihoowakko shiiqiyoogeenne an ammanettiyoogee keehi koshshiyaaba (Mentto 6-7 xeella) *
6. Nuuni waanidi Yihoowakko shiiqidi deˈana danddayiyoo?
6 Yihoowakko shiiqada deˈa. (Yaaq. 4:8) Hegaadan waati oottana danddayiyoo? ‘Woosaa siyiyaagan’ ammanettiyoogaana. (Maz. 65:2) Mazamure 62:8y, “Intte metuwaa ayyo yootite” yaagees. Yihooway “nuuni woossiyoobaa woi qoppiyoobaa ubbaappe keehi darissi oottanau” danddayees. (Efi. 3:20, 21) Yihooway nuussi immiyoy nuuni woosan oychchidobaa xalla gidenna. I nuuni mule qoppi erenna ogiyan nu metuwaa qaarana danddayees.
7. (a) Yihoowakko shiiqidi deˈanawu nuna aybi maaddanee? (b) Ibraawe 6:10-12y yootiyoogaadan, nuuni Yihoowayyo ammanettidi ubbatoo haggaaziyoogee ayba ayfe demissanee?
7 Yihoowakko shiiqidi deˈanawu, galla galla Geeshsha Maxaafaa nabbabananne nabbabidobaa wotti dentti qoppana koshshees. Kase misoonaawe gididi oottida issi ishay hagaadan giis: “Kase intte maddabettido sohuwan oottiyoogaadan, ubbatoo so asaa goynuwaa goynnitenne shiiquwawu giigettite.” Qassi, intte ooratta gubaaˈiyan mishiraachchuwaa sabbakanawu inttessi danddayettida ubbabaa oottite. Eti kaseegaadan ubbabaa oottana danddayennaba gidikkonne, aggennan baayyo ammanettidi oottiyaageeta Yihooway hassayees.—Ibraawe 6:10-12 nabbaba.
8. Koyro Yohaannisa 2:15-17n deˈiya qofay nu deˈuwan keehi koshshiyaaban xeelaa wottanaadan waati maaddana danddayii?
8 Ne deˈuwaa sima ootta. Seexaanaa alamiyaa hirggay Yihoowawu haggaaziyoogaa nena agissanaadan oottoppa. (Maa. 13:22) Yihoowayyo haggaazenna asay woy neeni daro miishshaa demmanaadan maaddanawu maliya laggeti woy dabboti yootiyoobaa siyoppa. (1 Yohaannisa 2:15-17 nabbaba.) Nuuyyo koshshiyaabaa ‘koshshiya wodiyan’ immanawu qaalaa gelida Yihoowan ammanetta. I nu ammanoy kaseegaappe aaruwan minnanaadaaninne nuuni woppu gaanaadan maaddana, qassi aquwaaban nuussi koshshiyaabaa I nuuyyo immana.—Ibr. 4:16; 13:5, 6.
9. Leemiso 22:3, 7y yootiyoogaadan, koshshennan acuwan gelennaadan naagettana bessiyoy aybissee, qassi loˈˈobaa kuuyanaadan nuna aybi maaddana danddayii?
9 Koshshennan acuwan gelennaadan naagetta. (Leemiso 22:3, 7 nabbaba.) Harasan daanawu biyoogee keehi alˈˈo gidana danddayees, qassi acuwan geliyoogee metennaba. Hegaa gishshawu, neessi tumuppe koshshennabaa shammanawu miishshaa talˈˈoppa. So asaappe issoy sahettin xeelliyo wodiyaagaa mala, unˈˈissiyaabay nuna gakkiyo wode, ay keena miishshaa talˈˈanaakko kuuyanawu metootana danddayoos. Hegaa mala hanotatun, mintta ‘woossiyoogee’ neeni loˈˈobaa kuuyanaadan maaddana danddayiyoogaa hassaya. Neeni woppu gaanaadan maaddiyoogan Yihooway ne woosaa zaarana danddayees, hegee neeni loˈˈobaa kuuyanaadan maaddees.—Pili. 4:6, 7; 1 PHe. 5:7.
10. Nuuni loˈˈo laggeta waatidi demmana danddayiyoo?
10 Neeyyo loˈˈo leemiso gidiya asatuura laggeta. Nena gakkidabaanne neeyyo siyettiyaabaa ne mata laggetussi yoota; qassi nena gakkidabay kase eta gakkidaba gidana danddayees. Neeni hegaadan oottikko, ufayttana danddayaasa. (Era. 4:9, 10) Neeni kase haggaaziyo heeran laggetidoogeeti neessi lagge gididi deˈana. Haˈˈi ne ooratta hanotan neeni haratuura laggetana koshshees. Neeni neeyyo laggeti deˈanaadan koyikko, keha gidana koshshees. Neeni ooratta laggeta waatada demmana danddayay? Neeni kase Yihoowawu haggaaziyo wode demmido loˈˈoban ufayttidoogaa harati akeekana mala etawu hegaa yoota. Gubaaˈiyan deˈiya amaridaageeti neeni ubba wode haggaazuwaa dosiyo gaasuwaa akeekennan aggana danddayoosona; shin harati nebaa loytti eranawunne neeyyo loˈˈo lagge gidanawu koyana danddayoosona. SHin, neeni nebaa woy ne Yihoowayyo haggaaziyo wode oottidobaanne neeyyo siyettiya ufayssennabaa haratuyyo keehi darobaa haasayoppa.
11. Intte aqo deˈoy ubbatoo ufayssiyaagaa gidanaadan waatana danddayeetii?
11 Neeni ne maataa aggidoy ne aqo laggiyaa harggiyaa gaasuwaana gidikko, A woy O amassaloppa. Woy qassi, neeni harggikko ne aqo laggiyaa azzanttidabadan qoppada nena mooranchchadan xeelloppa. Intte “issi asa” gidiyoogaanne intte aqo oyqqiyo wode, aybi hanikkokka issoy issuwawu koshshiyaabaa kunttanawu Yihoowa sinttan maacettidoogaa hassayite. (Maa. 19:5, 6) Halchchennan naˈi yelettidoogaa gaasuwan intte maataa aggidaba gidikko, intte maataappe intte naˈi inttessi aadhdhiyoogaa I eranaadan oottite. Intte naˈa Xoossaappe intteyyo imettida ‘woytodan’ xeelliyoogaa, intte ubbatoo assi yootite. (Maz. 127:3-5) Qassi, intte kase maatan oottiyo wode demmido ufayssiyaabaa ayyo yootite. Yaatiyoogee intteegaadan intte naˈi ubba wode Yihoowawu haggaazanaadan maaddana danddayees.
HARATI WAATI MAADDANA DANDDAYIYOONAA?
12. (a) Ubba wode haggaaziyaageeti aggennan bantta maatan oottanaadan nuuni waati maaddana danddayiyoo? (b) Eti bantta ooratta hanotaara meezetanaadan nuuni waati maaddana danddayiyoo?
12 Daro gubaaˈeti, qassi daro ishanttinne michchontti ubba wode haggaaziyaageeti aggennan haggaazanaadan maaddiyoogee ufayssiyaaba. Bantta oosuwaa aggennan oottanaadan eta minttettiyoogan, etassi asatettaaban koshshiyaabaa immiyoogan woy eti banttappe haakkidi deˈiya bantta soo asawu koshshiyaabaa kunttanaadan eta maaddiyoogan hegaadan oottoosona. (Gal. 6:2) Ubba wode haggaaziyaageeti intte gubaaˈiyaa kiitettikko, etayyo aawatettay laamettidoogee eti iitabaa woy moorobaa oottidoogaana giidi qoppoppite. * Etayyo hanotay metenna mala eta maaddite. Sahuwaa gaasuwan eti darobaa oottana xayikkonne, eta pashkki giidi mokki ekkite; qassi eti kase oottidobawu eta galatite. Etaara loytti erettite. Eta eraappe, loohissuwaappenne eta deˈuwan hanidabaappe tamaarite.
13. Ooratta maatay imettidoogeeta nuuni waati maaddana danddayiyoo?
13 Ooratta maatay imettidoogeeti keettaa, issisaa baanawu koshshiyaabaa, oosuwaanne hara koshshiyaabata demmanawu koyro intte maadoy koshshana danddayees. Qaraxaa qanxxiyoogaanne inshuranssiyaa demmiyoogaa mala ubba galla deˈuwaara gayttidaban koyettiyaabaakka eti erana koshshennan aggenna. SHin, intte eta hanotaa akeekanawu maliyoogee etawu keehi koshshiyaaba. Eti woy eta son issi uri sahettennan waayi aggana. Eti siiqiyo uri hayqqidoogaa gaasuwan azzaniyaageeta gidana danddayoosona. * Qassi eti haasayana xayikkonne, kase eti haggaazido heeran deˈiya bantta laggeta laamotiyoogaa gaasuwan azzanana danddayoosona. Etawu kirqqi gaanaadan oottiya ha hanotata genccanawu etassi wodiyaa koshshees.
14. Issi michchiyaa ba ooratta hanotaara meezetanaadan A biido gubaaˈiyaa ishanttinne michchontti waati maaddidonaa?
14 Neeni loˈˈo leemiso gidada etaara sabbakiyo wodenne eta minttettiyo wode, eti meezetanaadan maaddana danddayaasa. Kare biittan daro layttawu haggaazida issi michchiyaa hagaadan gaasu: “Taani kase haggaaziyo sohuwan, galla galla Geeshsha Maxaafaa xinaateta xannaˈissays. Ooratti maddabettido sohuwan, issi xiqisiyaa nabbabanawu woy haggaazuwan issi biiduwaa bessanawukka metootays. SHin taani ooratti biido gubaaˈiyaa ishanttinne michchontti eti zaarettidi oychchiyoogeetukkonne xannaˈissiyoogeetukko etaara baanaadan tana oychchoosona. Ammanettidi minnidi oottiya he ishanttinne michchontti Geeshsha Maxaafaa xinaateta xannaˈissiyoogaa beˈiyoogee taani moottaa dosanaadan oottiis. Taani ooratta haggaazo moottan asaa haasayissiyoogaa waata doommanaakko tamaaraas. Ha ubbabay taani zaarettada ufayttanaadan oottiis.”
NEEYYO DANDDAYETTIDA UBBAN AGGENNAN OOTTA!
Intte moottan haggaazuwaa aassiyo ogeta koyite (Mentto 15-16 xeella) *
15. Neeni ne ooratta hanotan muruta ayfiyaa waata demmana danddayay?
15 Neeni ne ooratta hanotan muruta ayfiyaa demmana danddayaasa. Kase haggaaziyo wode neeni loytta oottabeennabadan woy qassi haˈˈi neeni goˈˈennabadan qoppoppa. Haˈˈi nena Yihooway daro ogiyan maaddiiddi deˈiyoogaa qoppa, qassi aggennan sabbaka. Koyro xeetu layttan deˈida ammanettida Kiristtaanetu leemisuwaa kaalla. Eti “qaalaa yootiiddi, ubbasaa biidosona.” (Oos. 8:1, 4) Neeni ubbatoo sabbakikko loˈˈo ayfiyaa demmana danddayaasa. Leemisuwawu, issi biittaappe aqinyeta yedettin eta qaalan aassiyaageeti keehi koshshiyo shooro biitti eti biidosona. Amarida aginatu giddon, eesuwan dicciya citay yan eqqiis.
16. Intte ooratta maatan waani ufayttana danddayeetii?
16 “GODAA ufaissai intteyyo wolqqa.” (Nah. 8:10) Nuuni nu maataa siiqikkonne, maatan gidennan, nuuni Yihoowaara dabbotido dabbotan keehi ufayttana koshshees. Yaatiyo gishshawu, ufayttanawu koyikko, nuuni Yihoowaara matatti deˈana, aadhdhida eratettaa, kaaletuwaanne maaduwaa appe demmanaagaa muletoo ammanettana koshshees. Intte kase haggaaziyo sohuwan deˈiya asaa maaddanawu inttessi danddayettida ubbaa oottidoogan kase maataa intte dosidoogaa hassayite. Intte wozanaa intte ooratta maatan wottite, qassi intte hegaakka siiqanaadan Yihooway waati maaddiyaakko akeekite.—Era. 7:10.
17. Nuuyyo ha wodiyan deˈiya maataa xeelliyaagan nuuni ay hassayana bessii?
17 Nuuni Yihoowayyo merinawu haggaazanaagaa hassayana bessees; qassi haˈˈi nuuni ayyo oottiyoobay ooratta alamiyan nuuni oottanabaara issi mala waayi gidana. Doomettan abaa denttido Aleksi A hanotay laamettidoogee sinttappe laamettanabawu I giigettanaadan maaddiyoogaa yootiis. Aleksi hagaadan giis: “Yihoowaynne ooratta alamee beettiyaagaa keena qoncce gidiyoogaa taani erikkonne, amarida hanotan eti haakkidaba milatoosona. Taani haˈˈi Yihoowakko keehi shiiqaas, qassi ooratta alamee keehi mata wode yiyaabadan taayyo siyettees.” (Oos. 2:25) Nu maatay ayba gidikkokka, nuuni Yihoowakko shiiqidi deˈana koyoos. I nuna mule yeggi aggenna; qassi nuuni A haggaazuwan oottana danddayiyoobay ayba gidinkka, awan gidinkka nuuni ufayttanaadan I maaddana.—Isi. 41:13.
MAZAMURE 90 Issoy Issuwaa Minttettite
^ MENT. 5 Issi issitoo, ishanttinne michchontti ubba wode haggaazuwaa aggana woy ooratta haggaazo maataa ekkana danddayoosona. Ha huuphe yohoy eta gakkiya metotubaanne eti metootennan bantta ooratta hanotaa meezetanaadan aybi maaddana danddayiyaakko yootees. Harati eta minttettanawunne maaddanawu ay oottana danddayiyaakko, qassi nuna deˈuwan oorattabay gakkiyo wode Geeshsha Maxaafay waati maaddana danddayiyaakkokka ha huuphe yohoy qonccissees.
^ MENT. 4 Hegaadankka, aawatettay deˈiyo layttan sugida daro ishantti bantta aawatettaa yelaga ishanttussi immidosona. Wochiyo Keela Masqqalaa 2018, “Cimida Kiristtaanetoo—Intte Ammanettiyoogaa Yihooway Nashshees” giyaagaanne Wochiyo Keela Xiqimitaa 2018, “Hanotay Laamettikkonne Sarotettan Deˈa” giya huuphe yohota xeella.
^ MENT. 12 Eti aqinye, cima, woy gubaaˈiyawu oottiyaagaa gididi aggennan oottana mala eti haggaaziyo gubaaˈiyan deˈiya cimati danddayettida keenan eesuwaara eta hanotaa qonccissiya dabddaabbiyaa xaafana koshshees.
^ MENT. 13 “Kayyottiyaageeta Maaddiyaabaa,” giya 2018 Beegottite!, paydo 3 xeella.
^ MENT. 57 MISILIYAA QONCCISSUWAA: Kare biittan haggaaziya misoonaawe azinaynne machchiyaa he biittaappe aggidi biyo wode bantta gubaaˈiyaa yeekiiddi sarotoosona.
^ MENT. 59 MISILIYAA QONCCISSUWAA: He aqo laggeti bantta yeletido biitti simmidi, banttana gakkiya metuwan genccanaadan Yihooway maaddana mala A minttidi woossoosona.
^ MENT. 61 MISILIYAA QONCCISSUWAA: Yihooway maaddin, he aqo laggeti zaarettidi ubba wode haggaaziyaageeta gididosona. Eti bantta ooratta gubaaˈiyaa moottan deˈiya hara biittaappe yiidaageetussi mishiraachchuwaa yootanawu misoonaawe gididi oottiyo wode tamaarido qaalaa goˈettoosona.
