1-3. Ano an pipira nga hinungdan nga nagbabag-o an toka hadton aada ha bug-os-panahon nga pag-alagad?

“KATAPOS han amon 21 ka tuig nga makalilipay nga toka sugad nga misyonero, an amon mga kag-anak nagluya na tungod ha kalagas,” siring nira Robert ngan Mary Jo. “Nalilipay kami ha pag-ataman ha ira. Pero masakit la gihapon an pagbaya ha lugar nga amon gud hinigugma.”

² “Han hinbaroan namon nga diri na igintutugot han amon kahimsog nga bumalik kami ha amon toka, nagtangis kami,” siring nira William ngan Terrie. “An amon hingyap nga mag-alagad kan Jehova ha iba nga nasud diri na namon mahihimo.”

³ “Maaram kami nga karuyag ipasara han mga nagtitimaraot ha aton an sanga nga opisina diin ako nag-aalagad,” siring ni Aleksey. “Pero nasubo la gihapon ako han nahitabo ito ngan kinahanglan namon bumaya ha Bethel.”

4. Ano nga mga pakiana an hihisgotan hini nga artikulo?

⁴ Labot hini, aada pa an mga eksperyensya han yinukot nga Bethelite ngan iba pa nga nakakarawat hin bag-o nga mga toka. * Bangin makuri para hinin matinumanon nga kabugtoan an pagbaya ha ira hinigugma nga toka. Ano an makakabulig ha ira basi makapahiuyon ha pagbag-o? Paonan-o mo hira mabubuligan? An baton hini nga mga pakiana makakabulig ha aton ngatanan nga maatubang an mga pagbag-o ha kinabuhi.

5. Paonan-o an pagbag-o hin toka mahimo makaapekto ha aton?

⁵ Nag-aalagad man kita ha kanataran o ha Bethel, mahimo naton mapatubo an aton gugma ha mga tawo ngan bisan ha lugar diin kita nag-aalagad. Salit kon kinahanglan naton bumaya ha aton toka ha anoman nga hinungdan, nasusubo gud kita. Namimingaw kita ha aton mga babayaan, ngan nababaraka kita ha ira, labi na kon binaya kita tungod han pagtimaraot. (Mat. 10:23; 2 Cor. 11:28, 29) Dugang pa, an pagkaada bag-o nga toka​—o bisan an pag-uli ha kalugaringon nga lugar—​kaurogan na nga nagpapasabot nga kinahanglan mo na liwat magpahiuyon ha bag-o nga kultura. “Diri na kami pamilyar ha amon kultura ngan bisan ha pagsangyaw ha amon kalugaringon nga linggwahe,” siring nira Robert ngan Mary Jo. “Inabat namon nga baga hin taga-iba na kami nga nasud.” An pipira nga nagkaada bag-o nga toka bangin diri ginlalaoman nga magkaproblema ha pinansyal. Bangin umabat hira hin kawaray kasigurohan ngan panluya. Ano an makakabulig?

6. Paonan-o kita makakapabilin nga duok kan Jehova?

⁶ Magpabilin nga duok kan Jehova. (San. 4:8) Paonan-o naton ito mahihimo? Pinaagi ha pagsarig ha iya sugad nga an “Parapamati han pag-ampo.” (Sal. 65:2) “Isumat an ngatanan nga aada ha iyo kasingkasing ha iya atubangan,” siring han Salmo 62:8. Hi Jehova makakahimo hin “mas labaw pa gud kay ha ngatanan nga butang nga aton gin-aaro o ginhuhunahuna.” (Efe. 3:20) An iya iginhahatag labaw pa kay han aton espisipiko nga gin-aaro ha iya ha aton mga pag-ampo. Bangin sulbaron niya an aton problema ha paagi nga waray gud naton mahunahuna.

7. (a) Ano an mabulig ha aton basi makapabilin nga duok kan Jehova? (b) Sumala ha Hebreo 6:10-12, ano an magigin resulta kon padayon kita nga mag-aalagad kan Jehova nga matinumanon?

⁷ Basi makapabilin nga duok kan Jehova, adlaw-adlaw nga basaha ngan pamalandonga an Kasuratan. Usa nga misyonero hadto an nagsiring: “Tipigi an regular nga eskedyol han pagsingba ha pamilya ngan pag-andam para ha mga katirok sugad han imo ginhihimo ha imo daan nga toka.” Padayon liwat nga makigbahin hin bug-os ha pagsangyaw han maopay nga sumat ha imo bag-o nga kongregasyon. Diri mangangalimtan ni Jehova adton padayon nga nag-aalagad ha iya hin matinumanon, bisan kon diri na nira nahihimo an ngatanan nga ira nahihimo hadto.​—Basaha an Hebreo 6:10-12.

8. Paonan-o an 1 Juan 2:15-17 makakabulig nga matipigan nga simple an imo kinabuhi?

 ⁸ Tipigi nga simple an imo kinabuhi. Ayaw tuguti nga ‘matabonan’ an imo espirituwal nga mga buruhaton han mga kabaraka han kalibotan ni Satanas. (Mat. 13:22) Ayaw pagpadara ha pag-aghat han kalibotan o han kasangkayan o mga paryente nga maopay an intensyon nga mamiling hin pinansyal nga kasigurohan ha sistema ni Satanas. (Basaha an 1 Juan 2:15-17.) Sarig kan Jehova nga nagsasaad nga magtatagana han ngatanan naton nga panginahanglan ha espirituwal, emosyonal, ngan materyal ha “husto nga panahon.”​—Heb. 4:16; 13:5, 6.

9. Sumala ha Proberbios 22:3, 7, kay ano nga importante nga likyan an diri ginkikinahanglan nga pangutang, ngan ano an mabulig ha aton nga makagdesisyon hin maaramon?

⁹ Likyi an diri ginkikinahanglan nga pangutang. (Basaha an Proberbios 22:3, 7.) Bangin magin magasto gud an pagbalhin, ngan masayon la nga magkaada mga utang. Para malikyan an damu nga utang, likyi an pangutang basi la ipalit hin mga diri kinahanglanon. Kon aada kita ha nakakaistres nga kahimtang, sugad ha pag-ataman ha aton may sakit nga hinigugma, bangin makurian kita pagdesisyon kon ano kadaku an uutangon. Ha sugad nga sitwasyon, hinumdumi nga an “pag-ampo ngan pangamuyo” mabulig ha imo ha pagdesisyon hin maaramon. Mahimo batunon ni Jehova an imo mga pag-ampo pinaagi ha paghatag han kamurayawan nga “magbabantay han [imo] kasingkasing ngan han [imo] panhunahuna,” nga mabulig ha imo nga magin kalmado ngan makagdesisyon hin husto.​—Fil. 4:6, 7; 1 Ped. 5:7.

10. Paonan-o kita magkakaada bag-o nga mga sangkay?

¹⁰ Tipigi an maopay nga relasyon. Isumat an imo inaabat ngan mga eksperyensya ha mag-opay nga kasangkayan, labi na hadton bangin nakaeksperyensya liwat han kalipay ngan pagsari nga pariho han imo. Mabulig ito nga mawara an imo kasakit ha emosyon. (Ecles. 4:9, 10) An imo kasangkayan ha imo daan nga toka magpapabilin nga imo kasangkayan. Yana ha imo bag-o nga toka, kinahanglan mamiling ka hin bag-o nga kasangkayan. Hinumdumi nga basi magkaada sangkay, kinahanglan magin makisangkayon ka. Paonan-o ka magkakaada bag-o nga mga sangkay? Isumat ha iba an mag-opay nga eksperyensya ha imo pag-alagad kan Jehova basi abaton nira an imo kalipay ha pag-alagad. Bisan kon may pipira ha kongregasyon nga diri nakakasabot han imo kadasig para ha bug-os-panahon nga pag-alagad, an iba bangin mag-apresyar han imo susbaranan ngan magin mga sangkay mo. Pero pagbantay nga diri sobra nga ig-inistorya an imo mga nabuhat, ngan diri magpokus ha negatibo nga mga inaabat.

11. Paonan-o mo matitipigan nga malipayon an iyo pag-asawa?

¹¹ Kon kinahanglan mo bumaya ha imo toka tungod han problema ha kahimsog han imo padis, ayaw hiya basola. Ha luyo nga bahin, kon ikaw an  may problema ha kahimsog, ayaw kakonsensya ngan ayaw hunahunaa nga napakyas mo an imo padis. Hinumdumi nga “usa [kamo] nga unod,” ngan nagsaad kamo kan Jehova nga aatamanon niyo an usa kag usa ha bisan ano nga kahimtang. (Mat. 19:5, 6) Kon binaya kamo ha toka tungod ha waray planoha nga pagburod, siguroha nga maipasilsil ha iyo anak nga mas importante hiya kay ha iyo toka hadto. Pasariga an iyo anak nga “usa [hiya] nga balos” tikang ha Dios. (Sal. 127:3-5) Ngan ig-istorya liwat ha iya an iyo makalilipay nga mga eksperyensya ha iyo toka. An pagbuhat hito mahimo mag-aghat ha iyo anak nga gamiton an iya kinabuhi ha malipayon nga pag-alagad kan Jehova pariho han iyo ginhimo.

12. (a) Paonan-o naton mabubuligan adton aada ha bug-os-panahon nga pag-alagad nga makapabilin ha ira toka? (b) Paonan-o naton hira mabubuligan nga magin masayon an ira pagpahiuyon ha bag-o nga toka?

¹² Makalilipay, ginbubuhat han damu nga kongregasyon ngan kabugtoan an ira mahihimo basi buligan adton aada ha bug-os-panahon nga pag-alagad nga makapabilin ha ira toka. Ginhihimo nira ito pinaagi ha pagdasig ha ira nga magpadayon ha ira buruhaton, paghatag ha ira hin pinansyal o iba pa nga materyal nga bulig, o pagbulig ha ira ha pag-ataman han ira pamilya nga hirayo ha ira. (Gal. 6:2) Kon adton aada ha bug-os-panahon nga pag-alagad makakarawat hin bag-o nga toka ngada ha iyo kongregasyon, ayaw ito hunahunaa sugad nga indikasyon nga napakyas hira o gindisiplina. * Lugod, buligi hira nga magin masayon an pagpahiuyon ha pagbag-o. Abiabiha hira ngan kumendasyuni tungod han ira mga nahimo, bisan kon nalilimitahan na hira yana han diri maopay nga kahimsog. Kilalaha hira. Mahibaro tikang ha ira hura nga kahibaro, pagbansay, ngan eksperyensya.

13. Paonan-o naton mabubuligan adton nakakakarawat hin bag-o nga toka?

 ¹³ Ha tinikangan, bangin adton nakakakarawat hin bag-o nga toka magkinahanglan han imo bulig para ha urukyan, transportasyon, trabaho, ngan iba pa nga kinahanglanon. Bangin magkinahanglan liwat hira hin bag-o nga impormasyon mahitungod ha pipira nga butang, sugad han pagbayad hin buhis ngan pagkuha hin insurance. Labaw ha ngatanan, ginkikinahanglan nira an imo pag-intindi, diri kalooy. Bangin nag-aantos hira hin sakit o an ira kapamilya. Bangin nasusubo gud hira tungod ha kamatyi hin hinigugma. * Ngan bisan kon diri nira igin-iistorya, bangin nasusubo gud liwat hira tungod kay namimingaw hira ha ira kasangkayan ha ira toka hadto. Ginkikinahanglan an panahon basi mawara an sugad kakuri ngan iba-iba nga emosyon.

14. Paonan-o an lokal nga mga magwarali nakabulig ha usa nga sister nga makapahiuyon ha iya bag-o nga toka?

¹⁴ Ha pagkayana, an imo bulig ngan susbaranan makakabulig ha ira nga makapahiuyon. “Ha akon daan nga toka, kada adlaw ako nagdudumara hin mga pag-aram ha Biblia,” siring han usa nga sister nga nag-alagad hin damu ka tuig ha iba nga nasud. “Ha akon bag-o nga toka, makuri bisan an pakaabri han Biblia o pagpakita hin video ha ministeryo. Pero igin-uupod ako han lokal nga mga magwarali ha ira mga pagbalik-bisita ngan pag-Bible study. Samtang nakikita ko inin madasigon ngan maisugon nga kabugtoan nga nagdudumara hin nag-uuswag nga mga Bible study nagin mas positibo ako. Nahibaro ako pagtikang hin pakiistorya ha akon bag-o nga teritoryo. Ini ngatanan nakabulig ha akon nga magin malipayon utro.”

15. Paonan-o ka maglalampos ha imo bag-o nga toka?

¹⁵ Mahimo ka maglampos ha imo bag-o nga toka. Ayaw hunahunaa an pagbag-o sugad nga kapakyasan o nagpapakita nga diri ka na importante. Hunahunaa an mga bulig ni Jehova ha imo ngan padayon nga magsangyaw. Subara an matinumanon nga mga Kristiano ha siyahan nga siglo. Bisan hain hira, ‘napakadto [hira] ha iba-iba nga dapit hito nga mga tuna nga nagpapasamwak  han maopay nga sumat han pulong.’ (Buh. 8:1, 4) An imo paningkamot nga padayon nga magsangyaw mahimo magkaada mag-opay nga resulta. Pananglitan, an mga payunir nga ginpaiwas ha usa nga nasud binalhin ha kahirani nga nasud diin daku liwat an panginahanglan hin magwarali ha ira linggwahe. Ha sulod hin mga bulan, nagkaada bag-o ngan nag-uuswag nga mga grupo.

16. Paonan-o ka magigin malipayon ha bag-o nga toka?

¹⁶ “An kalipay nga iginhahatag ni Jehova amo an iyo kusog.” (Neh. 8:10, ftn.) Kinahanglan hi Jehova an nangunguna nga hinungdan han aton kalipay diri an aton toka, anoman ito kabirilhon ha aton. Salit, padayon nga maglakat kaupod hi Jehova, pangaro ha iya hin kinaadman, giya, ngan bulig. Hinumdumi nga nagkaada ka gugma ha imo daan nga toka tungod kay ginhimo mo an pinakamaopay basi mabuligan an mga tawo didto. Himoa an pinakamaopay ha imo toka yana ngan kitaa kon paonan-o ka ginbubuligan ni Jehova nga higugmaon liwat ito.​—Ecles. 7:10.

17. Ano an kinahanglan naton hinumdoman mahitungod ha aton toka yana?

¹⁷ Kinahanglan naton hinumdoman nga an aton pag-alagad kan Jehova waray kataposan, pero an aton toka yana temporaryo la. Ha bag-o nga kalibotan, bangin kita ngatanan magkaada bag-o nga toka. Hi Aleksey, nga gin-unabi ha tinikangan, natoo nga an iya mga naieksperyensyahan yana nag-aandam ha iya para hito. “Maaram ako nga tinuod hi Jehova ngan an bag-o nga kalibotan, pero baga hin hirayo hira ha akon,” siring ni Aleksey. “Yana, nakikita ko na hi Jehova ha akon mismo atubangan ngan an bag-o nga kalibotan amo na an akon sunod nga destinasyon.” (Buh. 2:25) Anoman an aton toka, padayon kita nga maglakat kaupod ni Jehova. Diri gud kita niya babayaan, lugod bubuligan kita niya nga magin malipayon ha pagbuhat han aton bug-os nga mahihimo ha pag-alagad ha iya​—diin man ito.​—Isa. 41:13.