1—3. ა) მუ მიზეზეფიშ გურშენ შილებე დათირან დანიშნულებეფქ სრულ დროთ მსახურეფს?

„მისიონერო მსახურებაშ 21 ბედნერ წანაშ უკულ თე მსახურებაქ მიოტებელქ მაჸუეს, მუშენდა ჩქინ მშობლეფქ დელახეს. მართალ რე, მოხიოლდეს, ნამდა მშობლეფიშ გვერდით ვორდით დო ვულუანდით, მარა გამჭირდეს მიჸორდესინ ფერ ადგილიშ დო მსახურებაშ დოტებაქ“, — იშინანა რობერტ დო მერი ჯო.

² „მუჟამსით ქიგებგით, ნამდა ჯამრთელობაშ პრობლემეფიშ გურშენ ჩქინ დანიშნულებაშა ვადმართედეს, გურქ მანგარო დობჭყორდეს დო ქუმანგარინეს. ირიათო მოკოდეს ვემსახურითკო იეჰოვას შხვა ქიანას, მარა ჩქინ ოცნებაქ აკოცუ“, — იჩიებნა უილიამ დო ტერი.

³ „მიჩქუდეს, ნამდა მოწინააღმდეგეეფს ულამდეს ფილიალიშ კილუა, სოდეთ ვმსახურენდით. მარა მუჟამსით თექ ქუმოხვად, იშენით მანგარო გამჭირდეს ბეთელიშ დოტებაქ“, — იჩიებ ალექსეი.

4. მუ კითხვეფს გუვარჩიენთ თე სტატიას?

⁴ ბრელქ, მით სპეციალურ სრულ დროთ მსახურენდეს დო თეწკუმა ართო ბეთელიშ ოჯახიშ წევრეფქ ხოლო, ახალ დანიშნულება მიღეს. * თე ართგურ და დო ჯიმალეფშო შილებე ადვილ ვარდას თიცალ დავალებაშ მეტება, ნამუთ უჸორა. მუ მეხვარებ თინეფს ქიმიარჩქვანან მდგომარეობაშ თირუას? მუჭო შემლებნა ელუდირთათ თინეფს? თე კითხვეფშე პასუხეფიშ გაგება არძას მიმეხვარებნა თიმ დროს, მუჟამსით ჩქინ ცხოვრებას მუდგარენ ითირუ.

5. მუჭო შილებე იმოქმედას ჩქინწკუმა დანიშნულებაშ თირუაქ?

⁵ ვა უღჷ მნიშვნელობა, ბეთელს ვმსახურენთ დო ვარ თიშ გალე, შილებე მანგარო ქიმვარჩქვანათ დო ქიმეჸოროფან თი ხალხიქ ვარდა ადგილქ, სოდეთ ვორეთ. მუთუნნერ მიზეზიშ გურშენ თეცალ მსახურებაქ მიოტებელქ ქუმაჸუეს-და, თენა გურს მანგარო ქელმოჭუანა. ჩქი მონატრუნა თი და დო ჯიმალეფ, მით თექ სქიდნა დო ბწუხენთ თინეფშო, განსაკუთრებულო თი დროს, მუჟამსით თექიანობას თხოზინიშ გურშენ იბტენთ (მათ. 10:23; 2 კორ. 11:28, 29). თეს გეძინელ, შილებე მანგარო გამჭირდან შხვა ტერიტორიაშა გინულაქ, მუშენდა ახალ კულტურას ოკო მივარჩქვანათ. თაშ შილებე მოხვადას თიმწკუმა ხოლო, მუჟამსით ბრელ ხანიშ უკულ ჩქინ კუნთხუშა იფრთუთ. ჟიშე მოშინაფილ რობერტ დო მერი ჯო იჩიებნა: „ჩქინ კულტურაშა მიორჩქვანალქ მაჸუეს დო ჩქინ ნინაშა ქადაგებაქ ხოლო გამჭირდეს. ბრელ ხანს ვმსახურენდით შხვა ადგილს, ათეშენ ჩქინ ქიანას უცხოთ ბგინაფლენდით დუც“. ნამთინეს, მიდგას დანიშნულება ათირუ, ახალ ტერიტორიაშა გინულაშ უკულ შილებე თიცალ ხარჯეფქ გემკურჩქინდას, ნამუთ აიშახ ვა უღუდ. თე ირფელიშ გურშენ შილებე გაურკვევლობას რდან, დუც დაუცველო გინაფლენდან დო გურქ გუტირხან. მუ მეხვარებ თინეფს თეცალ დროს?

6. მუჭო შემლებნა ქუდოფსკიდათ იეჰოვაშ ხოლოს?

⁶ ქუდოსკიდით იეჰოვაშ ხოლოს (იაკ. 4:8). თეშ კეთება შემლებნა, მუჟამსით მივენდებუთ „ლოცვეფიშ მარჩქილე“ ღორონთ იეჰოვას (ფსალმ. 65:2). ფსალმუნიშ 62:8-ს ჭარჷ: „გურ გოუნწყით თის“. იეჰოვას შეულებ თიშე „ბრელით უმოსიშ კეთება, ვინემ ჩქი ფთხულენთ ვარდა აზრო მუმალენა“ (ეფეს. 3:20). შილებე ლოცვას იეჰოვას კონკრეტულ მუდგარენს ფთხულენდათ, მარა თინა უმოსის გაკეთენს ჩქინო. თიქ შილებე შურო ვეველუთინ ფერ საშვალებეფით მომგვარან პრობლემეფ.

7. ა) მუ მიმეხვარებნა ვორდათ იეჰოვაწკუმა ხოლოს? ბ) მუჭოთ ებრაელეფიშ 6:10—12-ს რე მოჩამილ, მუ შედეგ მაჸუნუ იეჰოვაშ ართგურო მსახურებას?

⁷ ბიბლიაშ ირდღაშიან კითხირ დო ნაკითხირშე ფიქრჷ მიგეხვარებნა, რდათ იეჰოვაწკუმა ხოლოს. ართ ჯიმა, ნამუთ ადრე მისიონერო მსახურენდჷ, იჩიებ: „გაგრძელით ოჯახურ თაყვანიშმცემლობაშ რეგულარულო ჩატარება დო შეხვალამეფშო მომზადება თეშ, მუჭოთ თეს ჯვეშ დანიშნულებაშ დროს ორთუდით“. თეს გეძინელ, ქეცადით სრულაშე მიღათ მონაწილება სახიოლო ამბეშ ქადაგებაშ  საქმეს ახალ კრებას. იეჰოვა ვეჭყოლიდუანს თინეფიშ ხანდას, მით ართგურო ომსახურ თის, თიშ უმკუჯინუო, ნამდა ჯვეშობურო თისხიშ კეთება ვეშულებნა (წეკითხით ებრაელები 6:10—12).

8. მუჭო მიგეხვარებნა 1 იოანეშ 2:15—17-ის ინოჭარილ სიტყვეფ თიშ გაგებას, მუ რე უმოს მნიშვნელოვან თქვან ცხოვრებას?

⁸ გემარტივით ცხოვრება. სატანაშ ქვეყნიერებას ხალხიშ უმენტაშ მატერიალურ ნივთეფიშ შიბას რე გინოჸუნელ. მარა ჩქი ოკო ვემეფჩათ თე ირფელს თიშ საშვალება, გემკმოჸოთან იეჰოვაშ მსახურებას (მათ. 13:22). ქეწინააღმდეგით ქვეყნიერებაშ, ვარდა თი მეგობრეფ დო ნათესეფიშ გავლენას, მით ვა რენა იეჰოვაშ მოწმეეფ დო ოცადნა დუგაჯერან, ნამდა უჯგუშ ცხოვრებაშო ბრელ ფარა რე საჭირო (წეკითხით 1 იოანე 2:15—17). ირიათო მიენდით იეჰოვას, ნამუთ გოპირნა, ნამდა „დროულო“ იზრუნენს თქვან სულიერ, ემოციურ დო მატერიალურ მოთხოვნილებეფშო (ებრ. 4:16; 13:5, 6).

9. მუჭოთ იგავეფიშ 22:3, 7-ის რე მოჩამილ, მუშენ რე მნიშვნელოვან დუდ ავარიდათ აუცილებერ ვა რენ ფერ ვალეფიშ ეჭოფუას დო მუ მიმეხვარებნა გონივრულ გადაწყვეტილებაშ მეღებას?

⁹ აუცილებერ ვარენ-და, ვეგიდვათ ვალი (წეკითხით იგავები 22:3, 7). ცვლილებეფ შილებე დიდ ხარჯეფწკუმა რდას დაკავშირებულ დო ათეშენ ადვილო ქიგმადვან ვალეფქ. თექ ვა მოხვადასინ თიშენ, ჯგირ იჸუაფ ვალით ვეპიდათ თიცალ ნივთეფ, ნამუთ სინამდვილეს ვა მოსაჭირნა. მუჟამსით ემოციურო გლახათ ბგინაფლენთ დუც, მუშენდა ოჯახიშ დალახებურ წევრის ვულუანთ, შილებე ვალიშ ეჭოფუაშენ ქიდიბჭყათ ფიქრი. თეცალ სიტუაციეფიშ დროს, ირიათო რშუდან, ნამდა ლოცვა მიგეხვარებნა მიღათ გონივრულ გადაწყვეტილება. იეჰოვა უპასუხენს თქვან ლოცვას თით, ნამდა მერჩანა მშვიდობას, ნამუთ „დოთხილანს თქვან გურეფს დო გონებას“, მუთ მიგეხვარებნა გონივრულ გადაწყვეტილებაშ მეღებას (ფილ. 4:6, 7; 1 პეტ. 5:7).

10. შეილებნა მეგობრულ ურთიერთობეფიშ გავითარება?

¹⁰ დეახლოვით თიცალ კათას, მიდგას დადებით გავლენა აღვენუ თქვაწნკუმა. ქეჩით თქვან გრძნობეფ დო სირთულეეფიშ გურშენ მეგობრეფს, განსაკუთრებულო თინეფს, მით შილებე თეცალ სიტუაციას რდუ. თენა მიგეხვარებნა დუდ უჯგუშო იგინათ (ეკლ. 4:9, 10). თინეფ, მიდგას ჯვეშ დანიშნულებას მსაუხრებაშ დროს დემეგობრით, ირიათო თქვან მეგობრეფ იჸინა. მარა, ახალ დანიშნულებაშ მეღებაშ უკულ შხვეფს ხოლო ოკო დემეგობრათ. ირიათო რშუდან, მეგობრეფ გირჩქინათინ თეშო საჭირო რე, თქვა ხოლო რდათ მეგობრულ. მუჭო შეილებნა მეგობრულ ურთიერთობეფიშ გავითარება? ქეჩით შხვეფს თი კურთხევეფიშ გურშენ, ნამუთ იეჰოვაშ მსახურებაქ მოიღეს დო ქაძირეთ, ნამდა გოხიოლნა ღორონთიშ მსახურება. შილებე კრებას ნამთინეს ვარჩქილედას, მუშენ გიმირჩქინანთ სრულ დროთ მსახურებას თეცალ დიდ მონდომას, მარა შხვეფქ შილებე დეინტერესან თქვან მაგალითით დო დეგემეგობრან. გეგმირჩქინით  გურგოჩამილობა თით, ნამდა ბრელ ვეჩუათ თქვან დუდშენ ვარდა თი საქმეეფშე, მუთ იეჰოვაშ მსახურებას გიკეთებნა. თეს გეძინელ, ვართ თი უარყოფით გრძნობეფშე გამახვილათ ყურადღება, ნამუთ გიღნა.

11. მუჭო შეილებნა ბედნერ ქორწინებაშ შენარჩუნება?

¹¹ თქვან დანიშნულება მეუღლეშ ჯამრთელობაშ პრობლემეფიშ გურშენ მიოტეთ-და, თის ვეგედვათ ბრალ. მარა ჯამრთელობაშ პრობლემეფქ თქვა ქუგაშის-და, ვართ თქვან დუც გედვათ ბრალ დო ვეფიქრათ, ნამდა მეუღლეშ იმენდეფ ვა გამართლით. ქორშუდან, თქვა „ართ ხორც“ რეთ დო იეჰოვაშ წოხოლე დოდვით პირობა, ნამდა არძანერ მდგომარეობას ართიანს ქიმკაჯინედით (მათ. 19:5, 6). შილებე დანიშნულებაქ თიშენ გაჸუეს მიოტებელქ, ნამდა ქიგეგით, ბაღანას ელუთ. თაშ ქორენდ-და, დარწმუნით ბაღანა, ნამდა თინა უმოს მნიშვნელოვან რე თქვანო, ვინემ ჯვეშ დანიშნულება. დღას ვეგედვათ ბაღანას ბრალ, ნამდა თქვან დანიშნულებაქ თიშ გურშენ გაჸუეს მიოტებელქ. ხშირას ქუწით, ნამდა თქვანო თინა იეჰოვაშ „ჯილდო რე“ (ფსალმ. 127:3—5). თეწკუმა ართო, ქეჩით თი ძვირფას გამოცდილებაშ გურშენ, ნამუთ თქვან დანიშნულებაქ მერჩეს. თეშნერ საქციელით მეხვარებუთ ბაღანას, სრულ დროთ ემსახურას იეჰოვას.

12. ა) მუჭო შემლებნა სრულ დროთ მსახურეფს მივეხვარათ მსახურებაშ გაგრძელებას? ბ) მუჭო შემლებნა მივეხვარათ თინეფს, მიდგაქ შხვა დანიშნულება მიღჷ, ადვილო ქიმიარჩქვანან ცვლილებეფს?

¹² ოცქვაფალ რე, ნამდა ბრელ კრება დო თითოულ და დო ჯიმა ირნერო უნწყუნს ხეს სრულ დროთ მსახურეფს, გაგრძელან მუნეფიშ დანიშნულება. თინეფ თეს შხვადოშხვა საშვალებათ ორთნა. მაგალთო, გურშა ელუკინანა გაგრძელან მსახურება, ფინანსურო ვარდა შხვა მატერიალურ საშვალებეფით ელურენა დო ოხვარნა მშობლეფიშ მიკოჯინას, მით ჸუდეს აფნა დოტებულ (გალ. 6:2). სრულ დროთ მსახურეფქ დანიშნულებაშ თირუაშ უკულ თქვან კრებაშა გეგნორთეს-და,  ვეფიქრათ, ნამდა საქმექ ჯგირო ვაკეთებუეს ვარდა მუდგარენ დაშებულ აფნა. * თეშ მანგიორო, ქიმეხვარით, ადვილო ქიმიარჩქვანან ცვლილებეფს. მთელ გურით მიღით თინეფ დო ქაცქვეთ კეთებულ საქმეშენ, თიშ უმკუჯინუო, ნამდა ჯამრთელობაშ პრობლემეფიშ გურშენ ჯვეშობურო ვამსახურებენა. უჯგუშო გეჩინებაფეთ თინეფ დო ქეცადით ქიდიგურუათ თინეფიშ რჩქინა დო გამოცდილებაშე.

13. მუჭო შემლებნა თინეფიშ მოხვარა, მით ახალ დანიშნულებას ღებულენს?

¹³ დუდშე თინეფს, მიდგაქ ახალ დანიშნულება მიღეს, შილებე დესაჭირან ჸუდეშ, ტრანსპორტიშ დო სამუშაშ გორუაქ ვარდა შხვა საჭირო საკითხეფიშ მოგვარებაქ. თქვან მოხვარა თიცალ საკითხეფიშ გაგებას ხოლო დესაჭირებნა, მუთ ოხუ გინაგაფალეფს დო დაზღვევას. მუთ არძაშ უმოს მნიშვნელოვან რე, თე და დო ჯიმალეფს ჩქინ მხარეშე სიცოდილიშ გიმორჩქინა ვარინ, თინეფიშ სიტუაციაშა მიშულა ოსაჭირნა. შილებე თე და დო ჯიმალეფს მუნეფიშ ვარდა ნათესეფიშ ჯამრთელობაშ პრობლემეფ აწუხენდან ვარდა საჸოროფო პიროვნებაშ ღურას გენიცადენდან. * თეს გეძინელ, შილებე ვეჩიებდან, მარა მანგარო უჭირდან თი მეგობრეფშე შორს რინა, მით ჯვეშ დანიშნულებაშ დროს ჸუნდეს. დრო რე საჭირო, ნამდა გიორჯგინან თე გრძნობეფს.

14. მუჭო მეხვარ ადგილობრივ და დო ჯიმალეფქ ართ დას ახალ დანიშნულებაშ მერჩქვანას?

¹⁴ თეწკუმა ართო, შეილებნა ელუდირთათ დო პირად მაგალით მეჩათ თე და დო ჯიმალეფს, მუთ მეხვარებ თინეფს მიარჩქვანან ახალ დანიშნულებას. ართ და, ნამუთ შხვა ქიანას ბრელ წანას მსახურენდჷ იჩიებ: „ჩქიმ ჯვეშ დანიშნულებაშ დროს ირდღას ვატარენდჷ ბიბლიაშ გურაფას. მარა ახალ დანიშნულებაშ მეღებაშ უკულ ძნელ რდუ მსახურებაშ დროს ბიბლიურ მუხლიშ ეშაკითხირ ვარდა ვიდეოშ ძირაფა. ჩქიმ ახალ კრებას ადგილობრივ და დო ჯიმალეფს დაინტერესებულეფშა დო ბიბლიაშ გურაფეფშა მეპჸუნდჷ. მუჟამსით ვორწყედ, მუჭო ატარენდეს ბიბლიაშ გურაფას თე გურგედვალირ დო გაბედულ და დო ჯიმალეფ, თი ტერიტორიაშე, სოდეთ ვმსახურენდით, უჯგუშ წარმოდგენაქ ქუმაშუ. ქიდიბგურე, მუჭო დიბჭყიკო რაგად ახალ ტერიტორიას.  თე ირფელქ მიმეხვარ, კინ დიფრთინეკო ხიოლ“.

15. მუჭო შეილებნა მიოჭირინუათ წარმატებას ახალ დანიშნულებას?

¹⁵ თქვა შეილებნა წარმატებას მიოჭირინუათ თქვან ახალ დანიშნულებას. დღას ვეფიქრათ, ნამდა თე ცვლილება თქვანო უკახალე გინოდგუმილ ნაბიჯ რე ვარდა თიშენ გათირეს დანიშნულებაქ, ნამდა მუდგარენ არასწორას აკეთით. ქოძირით იეჰოვაშ ხე თქვან ცხოვრებას დო გაგრძელით ქადაგება. მიაჸუნით პირველ საუკუნეს მახორუ ართგურ ქრისტიანეფიშ მაგალითის. თინეფ, სოდგა ვარდესკონ, „გილეშეს დო აცხადენდეს სიტყვას“ (საქ. 8:1, 4). ქადაგებას გაგრძელენთ-და, თეს ჯგირ შედეგეფ მაჸუნუ. ართ ქიანას, პიონერეფს ქუდატებაფუეს თექიანობა, მარა თინეფქ მეზობელ ქიანაშა გეგნორთეს, სოდეთ მუნეფიშ ნინაშა მარაგადე მაუწყებელეფიშ დიდ საჭიროება რდუ. მუსხირენ თუთაშა ჯგუფეფქ დეარს, ნამდგას ბრელ ახალ პიროვნება ქიმიაძინ.

16. მუჭო შეილებნა ხიოლიშ ძირაფა ახალ დანიშნულებას?

¹⁶ „იეჰოვაშ ხიოლ თქვან სიმანგარე რე!“ (ნეემ. 8:10). ჩქინდა ხიოლ იეჰოვაწკუმა ურთიერთობას ოკო მოუღუდას დო ვართ ხოლო ჩქინ დანიშნულებას; ვა უღჷ მნიშვნელობა, მუსხით მიჸორა თე საქმე. ათეშენ, ქუმოკონა ხიოლქ ვამდინან-და, იეჰოვაწკუმა ხოლოს ოკო ვორდათ დო თიშ სიბრძნეშ, ხემძღვანელობაშ დო მოხვარაშ იმენდ ოკო მიღდან. ქორშუდან, თქვან ჯვეშ დანიშნულება თიშენ გიჸორდეს, ნამდა მთელ გურით გოკოდეს ხალხიშ მოხვარა. ასე მთელ გურით ქეშუდირთით ახალ დანიშნულებას დო ქოძირუნთ, მუჭო მიგეხვარებნა იეჰოვა, ქიჸოროფუათ თე დანიშნულება ხოლო (ეკლ. 7:10).

17. მუ ოკო ფშუდან ირიათო?

¹⁷ დღას ვაგმოჭყორდან, იეჰოვაშ მსახურება მარადიულო იჸუაფ, მარა ჩქინ დანიშნულება დროებით რე. ახალ ქვეყნიერებას არძა მიღენს ახალ დანიშნულებას. სტატიაშ დაჭყაფუს მოშინაფილ ალექსეი რაგადანს, ნამდა თეცალ ცვლილებეფ მეხვარებ თის მემზადას მომავალ ცვლილებეფშო. თინა იჩიებ: „ჩქიმო იეჰოვა დო ახალ ქვეყნიერება ირიათო რეალურ რდუ. მარა ასე იეჰოვაწკუმა უმოს ხოლოს ბგინაფლენქ დუც დო დარწმუნებულ ვორექ, ახალ ქვეყნიერება ხოლო მალას იჸუაფ“ (საქ. 2:25). ვა უღჷ მნიშვნელობა, მუ დანიშნულება მიღნა, მოკონა ირიათო ხოლოს ვორდათ იეჰოვაწკუმა. ვართ თის უღჷ მნიშვნელობა, მუ დავალებას მიბღენთ, იეჰოვა დღას ვემმოტენა დო მიმეხვარებნა მიღდან ხიოლ ირნერ საქმეს, მუდგაშ კეთება შემლებნა თიშ მსახურებას (ეს. 41:13).