1-3. Mang boch i fan nrayog ni nge thil e maruwel rok e piin yad be pigpig u polo’ e tayim rorad?

I YOG Robert nge Mary Jo nra gaargow: “Tomuren 21 e duw ni kug missionary gow, ma gamow l’agruw ni m’ar e gallabthir romow. Gamow ba felfelan’ ni nggu ayuwegew yad. Machane, kari kireban’mow ni nggu chuwgow ko gin ni kan pi’mow ngay ya ri gamow baadag u rom.”

² William nge Terrie e rognew ni lungurow: “Nap’an nug nangew ndabkiyog ni nggu ululgow ko maruwel ni kan pi’ ngomow ni bochan e m’ar romow, mug yorgow nib elmerin. Kab kafram i yib ni gamow baadag ni nggu pigpiggow ngak Jehovah u yugu reb e nam, machane chiney e dabkiyog.”

³ I yog Aleksey ni gaar: “Gamad manang ni baadag e piin be togopuluw ngomad ni ngar taleged e maruwel ko branch ofis ni gu be pigpig riy. Machane nap’an nra bad ra ninged e Bethel min taleg e maruwel romad u rom, ma aram e thingar gu chuwgad u rom. Kari kireban’mad ko re n’em.”

4. Mang l’agruw e deer ni gad ra weliy ko re article ney?

⁴ Maku reb e, boor e walag ni yad ma pigpig u polo’ e tayim rorad nib muun ngay e piin yad ma pigpig u Bethel ni kan pi’ yugu boch e maruwel nib beech ngorad. * Dabisiy nib mo’maw’ ni nge digey e pi walag ney e maruwel ni yad be rin’ nrib ga’ fan u wan’rad. Ere mang e rayog ni nge ayuwegrad u nap’an ni ke thil e maruwel rorad? Ma uw rogon nrayog ni ngam ayuwegrad? Fulweg ko gal deer ney e rayog ni nge ayuwegdad u nap’an ni ke thil boch ban’en u rogon e par rodad.

5. Faanra thil e maruwel ni kan pi’ ngodad, ma mang boch ban’en nrayog ni nge rin’ e re n’ey ngodad?

⁵ Demtrug ko gad be pigpig u Bethel ara kan taydad ni ngaud machibgad,  ma rayog ni nge t’uf e girdi’ rodad mu kud adaged e gin ni gad be pigpig riy. Ere faanra yan i taw nga ba ngiyal’ ni ke t’uf ni ngad chuwgad, ma rayog ni ngari kireban’dad. Gad ma tawrengnag pi walagdad, maku ma magafan’dad ngorad nib ga’ ni faanra thingar da chuwgad ni bochan e gafgow ni yibe tay ngodad. (Matt. 10:23; 2 Kor. 11:28, 29) Maku reb e, rayog ni nge mo’maw’ ni nga darod nga yugu bang nib thil ni bochan e rayog nthingar da guyed rogon ni ngad mechamgad nga reb e yalen nib thil. Mus ni faanra ngad sulod nga tafedad ma rayog ni ngkud lemgad ni aray rogon. I yog Robert nge Mary Jo ni lungurow: “Da kug nangew e yalen romow, ma mus ni nggu machibgow ko thin romow nda kug nangew rogon. Gowa bod ni gamow l’agruw ni’ nu bang.” Ku bay boch e walag ni kan thilyeg e maruwel rorad ni ku rayog ni ngar mada’naged e magawon ko salpiy. Rayog ni nge maruwaran’rad, ara dabki pagan’rad, fa reb e mulan’rad ni bochan e re n’ey. Ere mang e rayog ni nge ayuwegrad?

6. Uw rogon ni ngad pared ni gad ba chugur ngak Jehovah?

⁶ Mu par ni gab chugur ngak Jehovah. (Jas. 4:8) Uw rogon ni ngad rin’ed e re n’ey? Thingari pagan’dad ngak ni ir e En Ma Rung’ag e “meybil.” (Ps. 65:2) Be gaar e Psalm 62:8 (BT): “Mu weliyed ngak urngin e magafan’ romed.” Rayog rok Jehovah ni “nge maruwel nge pag rogon ko tin ni kad wenigniged ngak, ara ke taw e lem rodad ngay.” (Efe. 3:20) Gathi kemus ni tin ni gad ma ning ngak Jehovah u lan e meybil e ra pi’ ngodad, ya ku rayog ni nge pithig e magawon rodad u reb e kanawo’ ndad lemnaged nra rin’ riy.

7. (a) Mang e ra ayuwegdad ni ngad pared ni gad ba chugur ngak Jehovah? (b) Faan gad ra ulul ngad pigpiggad ngak Jehovah u fithik’ e yul’yul’, ma mang angin nra yib ngodad nrogon ni bay ko Hebrews 6:10-12?

⁷ Ra ngam par ni gab chugur ngak Jehovah, ma aram e thingar um beeg e Bible ni gubin e rran, ma ga be fal’eg i lemnag e thin riy. Bay reb e walag ni i missionary kafram ni gaar: “Mu tay ba ngiyal’ ni fan ko fol Bible ni tabinaw nge ba ngiyal’ ni ngaum fal’eg rogom ko muulung mag fol riy ni bod ni um rin’ u nap’an ni um moy ko gin ni kan piem ngay.” Maku reb e, ngam ulul ngaum un ko machib u rogon nrayog rom ko bin nib beech e ulung ni ka fin mu un ngay. Der ma pag Jehovah talin e piin yad ma pigpig ngak u fithik’ e yul’yul’ ni mus ni faanra dabkiyog ni ngar rin’ed boch ban’en ni bod rogon ni ur rin’ed kafram.​—Mu beeg e Hebrews 6:10-12.

8. Uw rogon nra ayuwegem fapi thin ko 1 John 2:15-17 ni ngam momnag e par rom?

⁸ Mmomnag e par rom. Dab mu pag e pi n’en ni ma magafan’uy ngay ko re fayleng rok Satan ney ni nge “thang” e tirok Got ban’en u wan’um. (Matt. 13:22) Dab mu pag e girdi’ ko re fayleng ney, ara pi fager  rom, ara girdi’ rom ni ngar towasariyed gur ni ngam guy rogon ni nge yoor e salpiy rom u lan e re m’ag rok Satan ney ya nge yag ni fel’ e par rom. (Mu beeg e 1 John 2:15-17.) Nge pagan’um ngak Jehovah ya ir e en ke micheg nra ayuweg e michan’ rodad ni nge par nib gel, me gapaseg lanin’dad, miki pi’ e tin nib t’uf ko par rodad “ko ngiyal’ ndabi siy” ni nge pi’ riy.​—Heb. 4:16; 13:5, 6.

9. Mang nib ga’ fan ndab da ted e malfith u boch ban’en ndariy rogon nrogon ni bay ko Proverbs 22:3, 7? Mang e rayog ni nge ayuwegdad ni ngad dugliyed boch ban’en u fithik’ e gonop?

⁹ Dab mu tay e malfith u boch ban’en ndariy rogon. (Mu beeg e Proverbs 22:3, 7.) Faanra ngam chuw ngam man mu par nga bang ma rayog ni boor e salpiy nthingar mu n’ag ko re n’ey mu kum aw riy nga tabon e malfith. Machane, faanra nge buchuuw e malfith rom ma aram e thingar mu guy rogon ndab kum tay e malfith u boch ban’en nde t’uf rom. Faanra gad be mochuch, ara gad be ayuweg be’ nib t’uf rodad ni ke m’ar, ma rayog ni nge mo’maw’ ni ngad dugliyed ko uw urngin ban’en ni ngad ted e malfith riy. Faanra kam mada’nag boch ban’en ni aray rogon ma dab mu pagtalin ni faan ga ra ‘meybil ngak Got mag ning ngak e tin ni nge yog ngom,’ ma aram e rayog ni ngam nang rogon ni ngam dugliy boch ban’en u fithik’ e gonop. Ra fulweg Jehovah taban e meybil rom ni aram e ra pi’ e gapas rok ngom ni nge ‘yororiy gum’irchaem nge tafinay rom,’ ya nge yag nim fal’eg i lemnag boch ban’en nib gapas lanin’um.​—Fil. 4:6, 7; 1 Pet. 5:7.

10. Uw rogon ni nge yag boch e fager nib beech ngodad?

¹⁰ Mu par ni gab chugur ko piin rayog ni ngar ayuweged gur. Mu weliy lanin’um nge tin ke buch rom ngak e pi fager rom nri gimed ba chugur, nib ga’ ni piin ni kar mada’naged e pi n’en ni ga be mada’nag. Faan ga ra rin’ ni aray rogon ma rayog ni nge fel’ boch e tafinay rom. (Ekl. 4:9, 10) Pi fager ni ke yag ngom ko gin ni um pigpig riy e ka yad ra par ni fager rom. Machane chiney ni kam man nga bang nib thil e ba t’uf ni ngkum gay boch e fager nib beech. Dab mu pagtalin ni faanra nge yag e fager ngom, mab t’uf ni ngaum gol ko girdi’. Uw rogon ni nge yag boch e fager nib beech ngom? Mu weliy boch ban’en nib manigil ni ke buch rom u nap’an ni ga be pigpig ngak Jehovah ya nge yag nra nanged rogon e felfelan’ ni ga be tay ko pigpig rom ngak Jehovah. Mus ni faanra bay boch e girdi’ u lan e ulung ndab ra nanged fan nri ga baadag ni ngam pigpig u polo’ e tayim rom, machane bay boch e girdi’ ni yad ra adag ni ngar nanged boch ban’en u murung’agem mar manged fager rom. Machane mu kol ayuw ndab um par ni ga be weliy murung’agen e tin ke yag ni ngam rin’, ara boch ban’en ni kam guy ara kan rin’ ni dabum.

11. Uw rogon ni nge par e mabgol rom ni bay e felfelan’ riy?

¹¹ Faanra thingar mu tal ko maruwel ni kan pi’ ngom ni bochan e ke m’ar e en mabgol rom, ma dab mu lemnag ni ir e kireb rok. Maku reb e, faanra gur e kam m’ar, ma dab mu lemnag ni gur e bay ban’en nib kireb ni ga be rin’, ara mu lemnag ni kam kirebnag laniyan’ e en mabgol rom. Dab mu pagtalin ni kam “taab girdi’gow,” ma kam michegew u p’eowchen Jehovah ni gimew ra ayuwegmew ndemtrug e n’en ni ke buch romew. (Matt. 19:5, 6) Faanra kam  talgow leengim u reb e maruwel ni kan pi’ ngomew ni bochan e ke diyen, ma ngam guyew rogon ni nge nang fakmew ni kab ga’ fan ko maruwel ni um rin’ew kafram. Um parew ma gimew be yog ngak ni ir reb e “tow’ath” ni ke pi’ Got ngomew. (Ps. 127:3-5) Maku reb e, ngaum weliyew ngak murung’agen e pi n’en nib manigil ni i buch romew u nap’an ni gimew be pigpig ko gin kan pi’mew ngay kafram. Faan gimew ra rin’ ni aray rogon, ma rayog ni ngam k’aringew fakmew ni nge adag ni nge pigpig ngak Jehovah u polo’ e tayim rok ni bod ni um rin’ew kafram.

12. (a) Uw rogon ni ngad ayuweged e piin yad ma pigpig u polo’ e tayim rorad ni ngar ululgad ko maruwel ni kan pi’ ngorad? (b) Uw rogon ni ngad ayuweged yad ni nge mom rogon ni ngar mechamgad ko maruwel nib beech ni kan pi’ ngorad?

¹² Boor e ulung nge yugu boch e walag ni yad ma rin’ e tin nrayog rorad ni ngar ayuweged e piin yad ma pigpig u polo’ e tayim rorad ni ngar ululgad ko maruwel ni kan pi’ ngorad. Rogon ni yad ma rin’ e re n’ey e aram e yad ma pi’ e athamgil nga lanin’rad ni ngar ululgad ko maruwel rorad, ara ra pied boch e salpiy ara boch ban’en nib t’uf ko par rorad, ara ra ayuweged e gallabthir ko pi walag ney ni yad ba palog ko gin ni bay pi fakrad riy. (Gal. 6:2) Faanra bay boch e walag ni yad ma pigpig u polo’ e tayim rorad ni kan pi’rad ko ulung rom u nap’an ni kan thilyeg e maruwel rorad, ma dab mu lemnag ni fan e re n’ey e bochan nib kireb rogon e maruwel ni yad be tay ara bay ban’en nib kireb ni kar rin’ed. * Ya n’en ni ngam rin’ e ngam guy rogon ni nge mom rogon ni ngar mechamgad ngay. Mu dag ngorad ni kam felfelan’ ni kar bad ko ulung rom mag pining e magar ngorad ko maruwel ni kar rin’ed ni mus ni faanra dabkiyog ni ngar rin’ed boch ban’en e chiney ni bochan e kar m’argad. Mu guy rogon ni ngam nangrad. Mag fil ban’en ko tin yad manang, nge tin kar filed, nge tin kar rin’ed.

13. Uw rogon nrayog ni ngad ayuweged e piin ni ka fin ni pi’ reb e maruwel nib beech ngorad?

 ¹³ Ra som’on, ma sana rayog nib t’uf ni ngam ayuweg e piin ni ka fin ni pi’ reb e maruwel nib beech ngorad ni ngar pirieged bang ni ngar pared riy, nge rogon rayog ni ngar milekaggad nga bang, nge maruwel, nge ku boch ban’en nib t’uf rorad. Ku rayog nib t’uf ni ngan ayuwegrad u boch ban’en ni bod rogon e tax ni yima pi’ nge rogon ni nge yag e insurance ngorad. N’en nrib t’uf rorad e aram e ngad guyed rogon ni ngad nanged rogon e magawon rorad. Rayog ni yad be magawon ni bochan e m’ar rorad ara bochan ni ke m’ar be’ u lan e tabinaw rorad. Fa reb e rayog ni be kireban’rad ni bochan e ke yim’ be’ nib t’uf rorad. * Ma reb e rayog ni be kireban’rad ni bochan e kar tawrengnaged e pi fager rorad ko gin ni ur moyed riy ni yugu aram rogon ndarur weliyed lanin’rad ngodad. Ba t’uf e tayim ni nge athamgil e pi walag ney u fithik’ e pi n’ey.

14. Uw rogon ni ayuweg e pi walag u reb e ulung reb e walag nib pin ni nge mecham ko machib ko gin ni ka fin ni pi’ ngay?

¹⁴ Faanra um machibgad u taabang ma ga be pi’ e athamgil nga lanin’rad u daken e ngongol rom, ma aram e rayog ni ngam ayuwegrad ni ngar mechamgad ko par ko gin ni ka fin ra bad ngay. Reb e walag nib pin ni ke yoor e duw ni ke pigpig u reb e nam ni gathi nam rok e gaar: “Nap’an ni ug moy ko gin nni pieg ngay, ma boor e girdi’ ni gu ma fil e Bible ngorad ni gubin e rran. Nap’an nni pieg nga yugu bang ma rib mo’maw’ rogon e machib riy. Mus ni nggu beeg reb e thin nu Bible ku be’ u nap’an e machib ara nggu dag reb e video ma rib mo’maw’. Machane pi walag u lan e ulung e yad ma piningeg ni nggu un ngorad u nap’an ni ngar sulod ngak be’ ara nga ranod ra guyed e piin yad ma fil e Bible ngorad. Nap’an nug guy e pi walag nem ni yad ba yul’yul’ ma yad ba pasig ni yad be fil e Bible ngak boch e girdi’, ma aram me yag ni nggu sap nga fel’ngin e gin ni gu be machib riy. Gu fil rogon ni nggu non ko girdi’ u rom. Ma gubin e pi n’ey ni ayuwegeg nge yag ni ngkug felfelan’ bayay.”

15. Uw rogon ni nge yib angin e tin ga be rin’ ko gin ni ka fin ni piem ngay?

¹⁵ Rayog ni nge yib angin e pi n’en ni ga ra rin’ ko gin ni ka fin ni piem ngay. Dab mu lemnag nib kireb rogon e maruwel ni um rin’ ko gin ni um moy riy ara daki ga’ fam e chiney. Mu lemnag urngin e kanawo’  ni be ayuwegem Jehovah riy e chiney mag ulul ko machib. Mu folwok ko pi Kristiano ni yad ba yul’yul’ ni ur moyed ko bin som’on e chibog. Demtrug e gin ni u ranod riy i yan, ma ur ‘machibnaged ngak e girdi’ fare Thin Nib Fel’ ni yib rok Got.’ (Acts 8:1, 4) Ga ra athamgil ngam ulul ko machib ma rayog ni nge yib angin nib fel’. Bod ni, bay boch e walag ni yad ma pioneer nnog ngorad ni ngar chuwgad ko nam ni kan pi’rad ngay, ma aram ma ranod nga reb e binaw nib chugur e ngaram ni kub t’uf e ayuw riy ko machib ni bochan e ku boor e girdi’ u rom ni yad ma non ko thin rorad. In e pul nga tomuren, ma aram min tababnag boch e ulung u rom nib beech, ma kub papey ni i ga’ e pi ulung nem.

16. Uw rogon ni ngam felfelan’ ko maruwel nib beech ni kan pi’ ngom?

¹⁶ “Felfelan’ ni ma pi’ Somol ngomed e bay i pi’ gelngimed.” (Neh. 8:10) Demtrug gelngin nri gad baadag e maruwel ni kan pi’ ngodad, ma felfelan’ rodad e thingari yib ko tha’ u thildad Jehovah ma gathi maruwel ni kan pi’ ngodad. Ere faanra gad baadag ni ngad pared ni gad ba felfelan’, ma susun e ngad pared ni gad ba chugur ngak Jehovah ma gad taga’ ko gonop rok, nge rogon ni be pow’iydad, nge ayuw rok. Dab mu pagtalin ni fan nri ga baadag e maruwel ni um rin’ kafram e bochan ni ga be rin’ e tin nrayog rom ni ngam ayuweg e girdi’ ko gin ni kan piem ngay. Ere mu rin’ e tin nrayog rom ni fan ko maruwel ni kan pi’ ngom e chiney, mag guy rogon nra ayuwegem Jehovah ni ngkum adag e biney e maruwel.​—Ekl. 7:10.

17. Mang e thingar dab da paged talin u murung’agen e maruwel ni gad be rin’ e chiney?

¹⁷ Thingar dab da paged talin ni pigpig ni gad be tay ngak Jehovah e ban’en ni gad ra rin’ ni manemus, ma maruwel ni kan pi’ ngodad e chiney e bay n’umngin nap’an me mus. Maruwel ni gad be rin’ e chiney e rayog ni gathi aram e maruwel ni gad ra rin’ u lan e bin nib beech e fayleng. Aleksey ni faan kan weliy murung’agen u tabolngin e re article ney e ba mich u wan’ ni pi n’en ni be buch rok e chiney e be fal’eg rogon ni fan ko par rodad boch nga m’on. I yog ni gaar: “Gu manang nriyul’ ni bay Jehovah, maku riyul’ nra yib e bin nib beech e fayleng, machane gu ra lemnag ma gowa ban’en nib palog rog. Machane chiney e gowa rayog ni ngguy Jehovah nib sak’iy u p’eowcheg, ma gu manang ni kari chugur ni nge yib e bin nib beech e fayleng.” (Acts 2:25) Demtrug e maruwel ni kan pi’ ngodad, ma ngad pared ni gad ba chugur ngak Jehovah. Ya dariy e ngiyal’ nra pagdad, maku ra ayuwegdad ni ngad felfelan’gad ko tin ni gad be rin’ ni fan ngak ndemtrug e gin ni gad bay riy.​—Isa. 41:13.