1. Yira ulhegheri ika mọ yira odi mem “asiḍio aruukunha phọ”?

ALHẠ phọ 1914 meten ni kụ ogbi omhạr anạ ḍughụm? Eḍighi idiphọ, pọ nạ m’arọl oomo adọl aghuḍum mọ anạ siẹn “[asiḍio] aruukuna” eghimoghọm araraạr aḅirinhi phọ ophọn. (2 Tim. 3:1) Oomo phọ ayira mokạr omiịn obobọ onaghạn ilọ araraạr phọ aZizọs aghaạph bọ mọ kemite nyiidiphọ aruukunha phọ. Iphẹn phọ eḅaramaạm raaghạm, igbakurọ, oḅomoghian aside, areezẹgh, osoroghu iilhogh, ḅilhẹ r’igbiphoghọm awe phọ aZihova. (Mat. 24:3, 7-9, 12; Luk 21:10-12) Yira mobilhẹ omiịn kẹn dị awe rozooghị eten phọ epẹ otelhedom aPọl aghaạph bọ. (Miịn igbe phọ “Eten Phọ Epẹ Awe Odi Bọ Nyiidiphọ.”) Idiphọ arebenhẹ aZihova yira okuphom ni owol mọ yira odi “eekunha asiḍio aruukunha phọ.”​—Mic. 4:1.

2. Ighẹn kụ asipuru dị ewạ mọ yira olhegheri ophagharanhaạn phọ?

² Eḍighi bọ edị amem meghị bọ ni iboom egbi k’a1914, pọ yira okạr kụ odi eekunha “asiḍio aruukunha phọ.” Loor esi iduọn eekunha phọ mekpụl bọ, ewạ ni dị yira kolegheri ophanyanhaạn iphigh asipuru phọ iphẹn: Eeghe araraạr kụ kemite eekunha “asiḍio aruukunha phọ”? AZihova rawạ mọ yira oḍighi ghan eeghe siẹn yira rokori bọ raraạr phọ ipẹ kemite bọ?

3. Odaphạn imiịn phọ ogẹ bọ siphẹ 1 Tesalonikạ 5:​1-3, eeghe odọ igbeel kụ idị areelhe phọ kogbeel?

³ Bạl 1 Tesalonikạ 5:1-3. APọl aghol mọ “aḍio  . .Omoọgh-we phọ.” Aḍio phọ, siẹn phọ remạ ghan emhiighom izuoghom ‘aBabilọn Ogbogh Phọ,’ eḍighi bọ oomo aruukụ iiḅereghị okpẹ phọ, kụ ekureriom r’Amagedọn. (Ogan. 16:14, 16; 17:5) Kụ egbi oteẹny  emhiighom “aḍio” phọ, areelhe phọ kogbeelhom ni mọ “Oomo ariisi mephooghị, ḅilẹ iiḅaghamị i/⁠lo!” (Abuniin abudị rogbạ ghan koteneghi inhọn arunhụ ogbạ mọ: “Eephọ r’eborọph.”) Abudaạm aḅirinhi phọ roḍighinhom ghan ni idọ ikpo-onhụ phọ iphẹn phọ mem lọ bidị rokaạph ilọ onhighemhị asiya igbo areelhe. * Toroboiperolbọ, igbeel “Oomo ariisi mephooghị, ḅilẹ iiḅaghamị i/⁠lo” mun oghaạph bọ siphẹ aBaibul phọ kegbatanhaạn ni. Eeghe kụ iḍighi? Mem dị iphẹn phọ emite, awe kootughiạn mọ abudaạm aḅirinhi phọ momhoọgh ekol oḍighi idị aḅirinhi phọ kaḍighi esi eborọph, r’eephọ. Bịn kụ ‘igbogh iiḅaghamhị’ phọ emiigh kụ ekọm “ekperenom amuphe.”​—Mat. 24:21.

4. (a) Yira kokori omhiịn eeghe ilọ igbeel “Oomo ariisi mephooghị, ḅilẹ iiḅaghamị i/⁠lo” phọ? (b) Kuolọ eeghe kụ edị yira olhegheri ni ilọ igbeel phọ?

⁴ Yira olegheri ni iniin araraạr ilọ igbeel “Oomo ariisi mephooghị, ḅilẹ iiḅaghamị i/⁠lo” phọ. Kuolọ emoọgh ni idị yira u/⁠legheri. Yira u/⁠legheri iyaạr phọ kekọm bọ kụ abudaạm mọ kogbeelhom bọ iduon phọ, obobọ eten phọ epẹ kogbeelhom bọ. Ḅilhẹ kẹn yira u/⁠legheri mughumọ keḍighi sikoọl igbeel obobọ keḍighi igbogh igbeel dị keleeny eeleeny mem bịn. Toroboiperolbọ iphẹn kụ idị yira olhegheri: Iyira kuu/⁠keleghi ootughiạn ghan mọ abudaạm aḅirinhi phọ kotue ni oseere eephọ siẹn oomo aḅirinhi phọ. Kparipẹ ghụn, ipẹ kụ igbeel phọ aBaibul phọ uḅenhị bọ iyira ogon phọ. Epẹ kụ eḍeenhaan emhiighom “aḍio omoọgh-we phọ”!

5. Ika kụ idị 1 Tesalonikạ 5:4-6 ulhoghonhaạn iyira ḍighaạgh ookolobian ilọ “aḍio omoọgh-we” phọ?

⁵ Bạl 1 Tesalonikạ 5:4-6. Oroma phọ aPọl uḅenhị iyira ipẹ yira kotue bọ okuphom owol mọ yira ookolhobian ni ilọ “aḍio omoọgh-we” phọ. Yira “ku/⁠naanị ghan idiphọ abuerị phọ.” Ewạ mọ “osumạ yogh” ooko loor ayira. Esi omaạm, ewạ dị yira kogona loor obọ yira kokạ ghan bọ dọl asạm mọ ayira esi ophinom abin raghaạph iikonoghiạn itooghị aḅirinhi phọ ophọn. Eḍighi maạr dị yira oḍighom aani, yira kotue ni bịn oḍighi ‘buọ aḅirini phọ.’ (Jọn 15:19) Yira olegheri mọ Omhạr phọ k’Enhaạn bịn kụ amamạn iyaạr dị ketue eseere eephọ siẹn oomo aḅirinhi phọ.

6. Eeghe kụ edị yira rowạ olhoghonhaạn aḍighaạgh bunhọn oḍighi, kụ eeghe kụ iḍighi?

⁶ Epel oomhanhamhi asiloor phọ ayira, ewạ kẹn dị yira koomhanhamhi aani bunhọn esi otughemhị ghan abidị ipẹ aBaibul phọ aghaạph bọ ilọ ipẹ kemite bọ mem eekunha phọ. Olhegheri mọ mem dị igbogh iiḅaghamhị phọ kụ memhiịgh, pọ amem meten dị awe kotu olegheri aZihova. Pọ kụ iyaạr phọ ewạ bọ ni oogboronhom oḍighi iphelegbeel phọ! *

7. AZihova rawạ mọ yira oḍighi eeghe iyaạr nyiidiphọ?

⁷ Siẹn eẹny amem mọ esugha bọ kụ egbi eteẹny emhiighom “aḍio” phọ odị, aZihova rawạ  mọ oghiọm ghisigh ogbeelhom oghaạph iiḅi iinhaghạn phọ. Ewạ ni dị yira kosighẹ ‘oomo inyaạm mọ ayira oḍighinhom ongọ Omoọgh-we phọ.’ (1 Kọr. 15:58) AZizọs aghaạph ni iyaạr phọ yira koḍighi bọ. Mem mọ odị aghaạph bọ ilọ oomo araraạr phọ ipẹ kemite bọ siẹn asiḍio eekunha phọ, odị aḅarạm mọ: “ḄiIẹ ooḅi oghaạph omạr phọ k’Enaạn phọ ophọn kokaạph ni oleenye oomo aḅirini phọ.” (Mạk 13:4, 8, 10; Mat. 24:14) Iduọn phọ pọ: Torobọ amem dị nạ aghị epẹ erugh phọ, pọ nạ rapinhom aani ghan bịn omhunhenhi imiịn aBaibul phọ!

8. Yira ulhegheri ika mọ oḍighi iphelhegbeel Omhạr phọ apoph ni rakị ghisigh?

⁸ Yira kokaạph ika ilọ oghị aghisigh oḍighi iphelhegbeel Omhạr phọ? Lhạ etum lhạ, oḍighi phọ rakị ghan bịn ghisigh. Esi omaạm, tuutughiạn ipẹ onhụ abạl abukaaphọm mọ mabụgh bọ siẹn asiḍio eekunha phọ. Lhạ phọ 1914, onhụ abạl abukaaphọm dị omhạn 5,155 bịn kụ urọl, esi arere dị omhạn 43. Ḍio arodon, abukaaphọm dị omhạn ophaanyạ erubal r’oogh arukuron oonịr kụ odi, esi arere dị emhạn 240! Ghalhamọ r’iduọn phọ ni, oḍighi iphelhegbeel phọ ko/⁠mhunheen. Yira oghiọm ghisigh ogbeelhom ilọ Omhạr phọ k’Enhaạn idiphọ ogina itooghị dị ketue esiemhi eekunha iiḅaghamhị oomo omhạr awe.​—Ps. 145:11-13.

9. Eeghe kụ iḍighi kụ yira kokiọm bọ ni ghisigh ogbeelhom dom Omhạr phọ?

⁹ Oḍighi iphelhegbeel Omhạr phọ k’Enhaạn kakị ni ghisigh, tutụ aZihova aḅẹm mọ mekasiạn ni. Amem mọ esugha bọ dị awe kotu olegheri aZihova r’aZizọs Kraisr ebụgh ni iboom ḍughụm? (Jọn 17:3) Yira u/⁠legheri. Iyaạr dị yira olhegher pọ tutụ igbogh iiḅaghamhị phọ kemiigh, torobọ onyọ “abuphẹ Enaạn mesaḅạr bọ omoọgh aghuḍum k’agee-pọ phọ” kamegheron ni agey atu esi iiḅi iinhaghạn phọ. (Iiḍighi 13:48) Ika kụ idị yira kotue ologhonhaạn ḍighaạgh we phọ abuẹn phọ, kụ amem egbi oten?

10. Eeghe olhoghonhaạn ḍighaạgh kụ edị aZihova rungọ ghan iyira orue otughemhị awe igey phọ?

¹⁰ Dị eego esi oḍighom mọ odị, aZihova rungọ ghan ni iyira oomo phọ ipẹ ewạ bọ orue otughemhị awe igey phọ. Esi omaạm, rutughemhị ghan ni iyira torobọ awiki siphẹ ituughạ ogboku awiki phọ. Ituughạ phọ ipẹ phọ rilhoghonhaạn ghan iyira ḍighaạgh olhegheri ipẹ yira kotue bọ omiighom siphẹ eḅẹl eghị phọ ḅilhẹ r’oḅilhẹ oḅula. Eḅilhẹ ritughemhị ghan iyira ilọ otughemhị awe Baibul. Ookpomhoghan phọ aZihova oḅilhẹ kẹn omiteom raraạr dị edi siphẹ Igbe  Araraạr Osighẹ Otughemhiọm mọ ayira. Araraạr phọ iphẹn phọ rilhoghonhaạn ghan iyira ḍighaạgh . . .

• omhiighom araghaạph,

• oghaạph eten dị keḍạ ḍiḅeeraạn oye,

• oḍighi idị awe komoọgh eephuạ otuughạ ghan aBaibul phọ,

• otughemhị ipẹ eru bọ igey phọ mem ituughạ aBaibul phọ, ḅilhẹ

• r’oḍeenhaan awe websait phọ ayira oḅilhẹ omhạgh aani abidị mọ oru aani ituughạ phọ ayira.

Ii, i/⁠munheen esi omhoọgh araraạr phọ ipẹ phọ bịn. Yira omoọgh osighẹ ghan oḍighinhom. * Esi omaạm, mem lọ nạ amhoọgh oghaaphạn dị amhoon r’oye dị aḍeenhaan ḍiḅeeraạn epẹ erugh phọ, kụ nạ angọ nyodị trạkt obobọ amagazin obọ odị akị ghisigh abạl ghan tutụ nạ aḅilhẹ aḅula. Eḍighi oḍighi atorobọ onyọ ayira omhiịn mọ odị akuọm ni loor oḍighi iphelhegbeel Omhạr phọ torobọ unwanyụ.

11. Utụ eeghe kụ omiteom bọ Online Bible Study Lessons phọ?

¹¹ Enhọn eten dị aZihova raloghonhaạn ḍighaạgh we orue olhegheri igey phọ pọ Online Bible Study Lessons phọ edi bọ siphẹ jw.org^®. (Pogh siphẹ BIBLE TEACHINGS > ONLINE LESSONS.) Eeghe kụ iḍighi kụ omiteom bọ raraạr ituughạ phọ iphẹn phọ? Torobọ unwanyụ, asimuunịr awe siẹn oomo aḅirinhi phọ rokị ghan siphẹ intanẹt phọ owạ araraạr ituughạ aBaibul phọ. Araraạr ituughạ aBaibul phọ edi bọ siphẹ awebsaịt phọ ayira ketue ni eloghonhaạn ḍighaạgh we olhegheri igey phọ ilọ Ikpo Onhụ Phọ Enhaạn. Ḅilhẹ kẹn, buniin awe dị nạ kakaaphạn epẹ erugh phọ ko/⁠meera dị nạ katuughạ Baibul phọ r’abidị. Kụ eḍighi idiphọ, pọ ḍeenhaan bidị pakirị agạ awebsaịt phọ ayira kesighẹ bọ bidị ekimọm siphẹ Online Bible Study Lessons phọ. *

12. Eeghe araraạr kụ edị oye katue atuughạ siphẹ Online Bible Study Lessons phọ?

¹² Online Bible Study Lessons phọ ayira raaḅeghiọn ghan ilọ: “ABaibul r’Opọ amiteom bọ Baibul phọ,” “Okạr Awe ABaibul phọ,” ḅilhẹ r’ilọ “Adom Oḍuom olhoghi aBaibul phọ.” Siphẹ arumhuoghaạph phọ ipẹ phọ oye phọ katuughạ:

• Idị aBaibul phọ katue aloghonhaạn oye ḍighaạgh

• Ilọ odọ awe phọ aZihova, aZizọs ḅilhẹ r’aruukpaạny phọ oru bọ

• Ipẹ Enhaạn atụ bọ kụ alhẹm we

• Ipẹ eḍighi bọ kụ ikarạph r’imhinhimhiịn edi ghan bọ

Online Bible Study Lessons phọ eḅilhẹ kẹn ekaạph ipẹ aZihova . . .

• kasiemhi bọ eekunha imhinhimhiịn r’aḍuugh,

• kaḅerion bọ buphẹ momhuughu bọ angọ ghuḍum, ḅilhẹ

• r’ipẹ aZihova kasighẹ bọ Omhạr phọ odị anmeom itooghị omhạr awe.

13. Online Bible Study Lessons phọ asighẹ ni esi iikolhobian ituughạ aBaibul phọ ḍughụm? Gbạ.

¹³ Online Bible Study Lessons phọ o/⁠sighẹ esi iikolhobian ituughạ aBaibul phọ. AZizọs mungọ iyira eepoogh oḍighi awe bumatuạn. Umiteom raraạr ituughạ phọ iphẹn phọ pidị awe dị omhoọgh ḍiḅeeraạn obạl, kụ osereghiạn, oḅilhẹ owạ olhegheri obughẹ. Eeni ipẹ phọ etue ni enyu bidị otuughạ aBaibul phọ. Eekunha atorobọ ituughạ phọ, emoọgh ni esi dị opọ aạl bọ kagẹ alọgh ilọ owạ oye dị kakị atuughạ aBaibul phọ r’odị. Dị eego esi awebsaịt phọ, ookpomhoghan phọ romiịn ghan ni ilọm ilọ otuughạ aBaibul phọ dị emhạn ni 230, torobọ aḍio oomo isiẹn aḅirinhi phọ! ltuughạ dị iyạl awe okạr orọl ude kụ rotuughạ emạn ni maạr!

14. Odaphạn itọ phọ aZizọs edi bọ siphẹ Matiu 28:19, 20, eeghe kụ edị ewạ mọ yira okparaghạ oḍighi, kụ eeghe kụ iḍighi?

¹⁴ Bạl Matiu 28:19, 20. Iduọn yira rotughemhị bọ we Baibul phọ, oḍighi oomo ipẹ yira kotue bọ ‘oḍighi awe bumatuạn . . . , otughemị bidị ooko oomo araraạr phọ [aZizọs] atọ bọ.’ Ewạ mọ yira olhoghonhaạn ḍighaạgh we omhiịn iyaạr phọ emhạn bọ ni maạr okumu aZihova ḅilhẹ r’obakị aani Omhạr phọ odị. Iduọn phọ pọ remạ ghan mọ yira okparaghạ ghan olhoghonhaạn awe ḍighaạgh dị bidị kosighẹ oḍighinhom ipẹ bidị rotuughạ bọ, oḅọgh loor ongọ aZihova, kụ oḍiiny muụm. Ipẹ bịn kụ idị bidị kotue okpetenhaan ḍio phọ aZihova.​—1 Pit. 3:21.

15. Yira u/⁠moọgh mem oḍighi eeghe, kụ eeghe kụ iḍighi?

¹⁵ Iduọn moghaạph bo ni okaram, amem mọ esugha bọ dị aḅirinhi phọ kasi eekunha i/⁠bụgh mun. Loor ephigh phọ ephẹn phọ, ku/⁠piemhi mem ayira oghiọm aghisigh otughemhị ghan awe dị u/⁠moọgh ḍiḅeeraạn oḍighi abumatuạn aKraist. (1 Kọr. 9:26) Oḍighi phọ awạ ni m’oogboronhom! Awe okpolhan ni dị remoghi mọ oghaạph dom Omhạr phọ oḅenhị kụ amem egbi oten.

16. Odaphạn Ogananami 18:2, 4, 5, 8, eeghe kụ edị ewạ mo oomo ayira oḍighi? (Miịn kẹn igẹ phọ edi bọ ude phọ.)

¹⁶ Bạl Ogananami 18:2, 4, 5, 8. Asiikpịgh aBaibul phọ iphẹn phọ eḅilhẹ emạ enhọn iyaạr dị aZihova rawạ ḍighaạgh arebenhẹ phọ odị. Oomo abugey aKristẹn omoọgh ogbatạn asiloor abidị osighẹ esi aBabilọn ogbogh phọ. Oye dị purukụ alhegheri aani igey phọ eeni amhoọgh ghan ni eniin ekarạph ekụ iiḅereghị dị aghị ghan. Eeni odị aghị ghan ni iiḍighi ekụ iiḅereghị phọ, aḅilhẹ aphinhom aani ghan bin. Obobọ eeni masogh aani ghan ni ikpoki angọ ekụ iiḅereghị phọ epẹ phọ. Tutụ komạ oye idiphọ okaaphọm dị ko/ḍiiny muụm, pọ odị kamiịn ni mọ odị aḍuạ ni esi oomo odọ amasian r’ikarạph aruukụ iiḅereghị. Odị kagẹ ni ḍinyạ dị keḍeenhaan mọ odị ko/⁠lọ ekụ iiḅereghị phọ epẹ mun, akiọm bidị obobọ torobọ enhọn ekụ dị emhoọgh masian r’aBabilọn Ogbogh phọ. *

17. Ighẹn odọ iiḍighi kụ idị i/⁠wạ mọ onyọ aKristẹn aḍighi, kụ eeghe kụ iḍighi?

¹⁷ Ogey onyọ aKristẹn amhiịn ni mọ oḍighi owạ kụ olhe phọ odị o/⁠mhoọgh iyaạr oḍighinhom r’aBabilọn Ogbogh phọ. (2 Kọr. 6:14-17) Esi omaạm, odị ka/ḍigh oḍighi ḍighaạgh asiosị. Ḅilhẹ kẹn, onyọ aKristẹn dị onhọn oyẹ asighẹ  aani oḍighi ku/⁠meera oghị okumuan esi dị kepophe ikarạph aruukụ iiḅereghị. Kụ eḍighi maạr dị odị raloor kụ amhoọgh esi oḍighi phọ, ku/⁠merenyan oḍighi obobọ ku/⁠sighẹ kontrạt ḍighaạgh atorobọ apakirị aBabilọn Ogbogh phọ. Eeghe kụ iḍighi kụ yira oghim bọ edạ dị ekpạr iduọn phọ? Loor esi dị, yira u/⁠wạ ophinhom aani bin iiḍighi r’ikarạph abuọ aruukụ iiḅereghị phọ ipẹ i/ḅaạl bọ ghisigh Enhaạn.​—Isa. 52:11. *

18. Ika kụ idị oniin onyọ umor aḅạr sinhị iilhogh aBaibul idị egbolhomaam oḍighi?

¹⁸ Siạ dị meten, oye dị rapamạgh ghan iiḍighi amhạgh ni oniin okumor oye ookpomhoghan dị amhoọgh oḍighi aḍighaạgh mọ aghị aḍighi oọny oḍighi esi otu asiosị epẹ emhạ phọ onyọ umor phọ arugh bọ. Oye phọ alegheri ni mọ onyọ umor phọ raḅẹm ghan ni mọ onọ ka/ḍighi oḍighi otu asiosị. Kuolọ oye phọ awạ ghan r’inyapiịm oye dị kaḍighi oḍighi phọ. Ghalhamọ r’iduọn phọ ni, onyọ umor phọ aḅạr ri sinhị iilhogh aBaibul phọ bịn o/⁠ghị oḍighi phọ. Eeḍio phọ etum bọ siphẹ, aḍinyạ iinhaghạn iḍeenhaan ni afoto ophodiphọ oyẹ phọ aghị bọ, dị rakạn ghan akrọs siphẹ asiosị phọ. Mughumọ onyọ umor phọ ayira o/⁠daphạn bọ sinhị iilhogh aBaibul phọ, obọ afoto odị kụ mumite bọ pạ phọ. Tuutughiạn odọ idị ipẹ phọ mikaạph ilọ odọ oye phọ odị aru bọ igbo Ookpomhoghan phọ! Tuutughiạn kẹn ilọ ipẹ aZihova muloghoma bọ.

19-20. (a) Yira okạr otuughạ eeghe siẹn phọ? (b) Kụ yira koḅilhẹ otuughạ ilọ eeghe?

¹⁹ Odaphạn imiịn aBaibul phọ, enhọn egbogh iyaạr dị kemite oọny amem pọ igbeel phọ areelhe phọ kogbeel bọ mọ “Oomo ariisi mephooghị, ḅilẹ iiḅaghamị i/⁠lo” mun phọ. Rosẹph ni esi iphẹn aZihova mutughemhị bọ iyira, yira olegheri ni mọ areelhe phọ ko/⁠tue omoọgh egey eephọ dị kebia. Yira koḍighi eeghe, kụ egbi eteẹny amem dị ipẹ pho kemite bọ ḅilhẹ ekperenhom amuphe phọ kedaphạm bọ? AZihova rawạ mọ oghiọm ghisigh ogbeelhom ghan dom Omhạr phọ ḅilhẹ r’okparaghạ oḍighi awe bumatuạn. Eniin phọ amem mọ, ewạ mọ yira oḍuạ esi atorobọ ekarạph ekụ iiḅereghị. Ipẹ phọ eḅaramaạm oḍuạ esi ooḍikuan ḅilhẹ r’oghel oḍighi dị amhoọgh maạr oḍighinhom r’aBabilọn ogbogh phọ.

²⁰ Inhọn araraạr edi ni dị kedaphạm mem “asiḍio eekunha phọ.” Inhọn araraạr eḅilhẹ ni edi dị aZihova rawạ m’oḍighi. Ighẹn kụ araraạr phọ iphẹn phọ, kụ ika kụ idị yira kotue ookolhobian siloor ayira ilọ ipẹ retu bọ ghisigh? Yira komiịn ophagharanhaạn phọ siphẹ emhuoghaạph phọ etum bọ siẹn.