1. Gin ango ma weko wamoko ni watye ka kwo “i kare me agikki”?

TIKA in kinywali i nge mwaka 1914? Ka tye kit meno, ci nongo ikwo kwoni ducu i “kare me agikki.” (2 Tem. 3:1) Wan ducu wawinyo pi jami ma Yecu otito ni bitimme i kare-ni. I kin jami magi tye iye lweny, kec, oyengyeng, two, medde pa tim maraco, ki dong keto aunauna i kom jo pa Jehovah. (Mat. 24:3, 7-9, 12; Luka 21:10-12) Watye ka neno bene ni kit pa dano rwatte ki gin ma lakwena Paulo otito. (Nen bok ma wiye tye ni “ Kit pa Dano i Kare-ni.”) Macalo luwor Jehovah, pe watye ki akalakala mo ni dong wadonyo matut tutwal “i kare me agikki.”

2. Lapeny mene ma mitte ni wagamgi?

² Pien kare dong okato malac nicakke i mwaka 1914, man nyuto ni watye ka kwo i agikki me “kare me agikki.” Kit macalo agikki piny dong cok tutwal-li, omyero wange lagam pi lapeny mogo ma pigi tego: Jami ango ma bitimme ka “kare me agikki” otum? Dok gin ango ma Jehovah mito ni watim ka wawoto ki kuro jami magi?

3. Ma lubbe ki lok pa lanebi ma tye i 1 Jo Tecalonika 5:1-3, lok angeya ango ma lobe gibimiyone?

³ Kwan 1 Jo Tecalonika 5:1-3. Paulo otito lok i kom “nino pa Rwot [Jehovah].” Kit ma kitiyo kwede i ginacoya man, nino pa Jehovah obedo kare ma cakke ki jwero “Babilon Madit,” ma en aye dini goba ducu me wi lobo-ni, dok gik ki Armagedon. (Yabo 16:14, 16; 17:5) Ma peya  “nino” meno ocakke, lobe gibimiyo lok angeya ni, “Kuc tye, piny okwe mot, gin mo marac pe!” Luloc me lobo i kine mukene gitiyo ki lok macal ki man ka gugure me yubo wat i kin lobe mapatpat. * Kadi bed kit meno, lok angeya ni “kuc tye, piny okwe mot, gin mo marac pe” ma Baibul otito-ni bibedo pat. Pingo? Ka man otimme, dano gitwero tamo ni luloc gukelo kuc i wi lobo dok ayelayela mo dong pe. Ento ki lok ada, “to biturugi atura” i kare me “twon can madit atika.”​—Mat. 24:21.

4. (a) Gin ango ma myero wakur nenone ma lubbe ki lok angeya ni “kuc tye, piny okwe mot, gin mo marac pe”? (b) Ngo ma dong wangeyo ma lubbe ki lok man?

⁴ Wangeyo jami mogo madok i kom lok angeya ni “kuc tye, piny okwe mot, gin mo marac pe!” Kadi bed kit meno, pe wangeyo jami ducu. Pe wangeyo ngo ma biweko lutela gimiyo lok angeya meno nyo kit ma kibimiyone kwede. Dok pe wangeyo ka ce kibimiyo lok angeya mapatpat ma kubbe ki lok man nyo acel keken. Ento wangeyo ni: Pe omyero wawek luloc gubwolwa ni gitwero kelo kuc i wi lobo. Me ka meno, Baibul otitiwa ni lok angeya meno aye obedo gin ma omyero wakur. Man obedo lanyut ni “nino pa Rwot [Jehovah]” dong cok cakke!

5. I yo ma nining ma 1 Jo Tecalonika 5:4-6 konyowa me bedo ma wayubbe pi “nino pa [Jehovah]”?

⁵ Kwan 1 Jo Tecalonika 5:4-6. Paulo otitiwa gin ma omyero watim wek wabed ma nongo wayubbe pi “nino pa [Jehovah].” Pe omyero “waninu anina macalo jo mukene.” Ento omyero “wabed ka neno piny kun wagwokke.” Me labolle, mitte ni wabed ma wangwa twolo wek pe wadony i tim me wibye me lobo man. Ka ni warwak wiwa i tim me wibye, ci nongo wadoko ‘jo me lobo.’ (Jon 15:19) Wangeyo ni Ker pa Lubanga keken aye bikelo kuc i lobo kany.

6. Gin ango ma wamito konyo jo mukene me timone, dok pingo?

⁶ Medo i kom bedo ma wangwa twolo, mitte bene ni wakony jo mukene me pwonyo gin ma Baibul otito ni bitimme i wi lobo. Wi myero opo ni ka twon can madit atika-ni ocakke, nongo dong kare okato woko pi dano me lokke bot Jehovah. Meno aye tyen lok mumiyo ticwa me tito kwena mitte adada! *

7. Gin ango ma Jehovah mito ni watim?

⁷ I kare manok man mudong ma peya “nino” pa Jehovah ocakke, en mito ni wamedde ki tic matek i tito kwena.  Myero bene wanen ni wamedde ki “tic pa Rwot nino ducu.” (1 Kor. 15:58) Yecu otito con pi tic ma watimo-ni. I kare ma en oloko i kom jami ma pigi tego ma bitimme i kare me agikki, en omedo ni: “Myero kong gikwong tito lok me kwena maber bot rok ducu.” (Mar. 13:4, 8, 10; Mat. 24:14) Tam kong: Kare ducu ka icito i ticwa me pwony, nongo itye ka konyo i cobo lok pa lanebi meno!

8. Tic me tito pi Ker-ri tye ka wot nining?

⁸ Tic me tito kwena tye ka wot nining? Mwaka ki mwaka, tic man tye ka wot anyim. Me labolle, tam kong i kom medde pa wel lutit kwena i wi lobo ducu i kare man me agikki-ni. I mwaka 1914, onongo tye lutit kwena 5,155 ma gitye ka tic i lobe 43. I kare-ni, watye ki lutit kwena makato milion 8 ki nucu ma gitye ka tic i lobe 240 mapatpat! Kadi bed kit meno, ticwa peya otum. Omyero wamedde ki tito ni Ker pa Lubanga keken aye bicobo pekki pa dano ducu.​—Jab. 145:11-13.

9. Pingo omyero wamedde ki tito kwena me Ker-ri?

⁹ Ticwa me tito pi Ker-ri bimedde wang ma Jehovah owaco ni dong otum. Odong kare ma rom mene pi dano me ngeyo Lubanga Jehovah ki Yecu Kricito? (Jon 17:3) Pe wangeyo. Wangeyo ni ma peya twon can madit-ti ocakke, jo ‘ma myero me nongo kwo ma pe tum’ pud gitwero jolo lok me kwena maber. (Tic 13:48) Watwero konyo jo magi nining ma peya kare otum?

10. Kony ango ma Jehovah tye ka miniwa me pwonyo dano ki lok me ada?

¹⁰ Jehovah tye ka miniwa jami ducu ma wamito me pwonyo dano lok ada kun wok ki i dulle. Me labolle, wanongo pwonye cabit ki cabit i cokke me dye cabit. Cokke man konyowa me ngeyo gin ma watwero wacone i lim me acel ki i dok cen ka lim bene. Dok pwonyowa bene kit me kwano Baibul ki dano. Dul pa Jehovah bene ominiwa Jami Ticwa ma Pigi Tego me Pwony. Jami magi konyowa me . . .

•   cako lok ki dano,

• dongo miti pa dano,

• tugo cwiny dano me kwano Baibul,

• pwonyo dano lok ada me Baibul, ki

• lwongo dano wek gulim Odiwa me Ker nyo gucit i kabedowa me Intanet.

Ngene kene ni bedo ki jami tic magi keken pe romo. Omyero wati kwedgi. * Me labolle, i nge nongo mit pa nywako lok ki ngat mo ma onyuto miti, ka iweke trak nyo magajin, en twero medde ki kwan pire kene wang ma idok cen bote. Obedo ticwa ki acel acel me tic matek dwe ki dwe i tito kwena me Ker-ri.

11. Pingo kiyubo bute me Online Bible Study Lessons i kabedowa me Intanet?

¹¹ Yub me kwano Baibul ki dano ki i Intanet ma kilwongo ni Online Bible Study Lessons bene tye ka konyo dano mapol me pwonyo lok me ada. (Nen i te BIBLE TEACHINGS > ONLINE LESSONS.) Pingo kiyubo pwony magi? Dwe ki dwe, dano milion mapol giyenyo kit me kwano Baibul ki i Intanet. But kabedowa me Intanet man twero konyogi me cako pwonyo lok ada me Baibul. Jo mukene ma waloko kwedgi gilworo kwano Baibul kwedwa. Ka tye kit meno, ci iromo nyutigi bute man i kabedowa me Intanet nyo cwalo botgi link ma terogi i pwony magi. Ka twere, iromo nyutigi pwony magi i leb mo ma giniang iye. *

12. Gin ango ma dano twero pwonyo ki i Online Bible Study Lessons?

¹² Bute me Online Bible Study Lessons tye ki pwony magi: “Baibul ki Ngat ma Omiyo Kicoyo,” “Jo ma Kiloko i Komgi i Baibul,” ki “Kwena me Baibul ma Miyowa Gen.” Pwony magi konyo dano me ngeyo:

• Kit ma Baibul twero konyo kwede dano

• Anga ma Jehovah, Yecu, ki lumalaika gubedo

• Gin mumiyo Lubanga ocweyo dano

• Gin mumiyo deno can ki tim maraco tye

Pwony magi bene ginyamo kit ma Jehovah . . .

• bigiko kwede deno can ki to,

• bicero jo muto, dok

• bileyo ka wang gamente pa dano ki Ker pa Lubanga.

13. Tika pwony me Baibul me Intanet-ti bileyo kaka yub me kwano Baibul ki dano wang ki wang? Tit kong.

¹³ Pwony ma nonge i Intanet-ti pe bileyo ka wang yub me kwano Baibul ki dano. Yecu omiyo botwa mot me loko dano wek gudok lupwonnyene. Watye ki gen ni jo ma gitye ki miti gibikwano pwony ma i Intanet-ti, gidongo pwoc pi gin ma gupwonyo, dok gibibedo ki miti me pwonyo jami mapol mukene. Ka tye ki meno, ci gwok gitwero ye kwano Baibul kwedwa. I agikki me pwony acel acel, kiwaco ki ngat ma tye ka kwan-ni ni opong fom me penyo pi lapwony ma twero kwano Baibul kwede wang ki wang. Nino ki nino dulwa nongo fom ki bot dano ma romo 230 ki i wi lobo ducu ma gipenyo ki i Intanet ni kikwan Baibul kwedgi! Kwan man ma ibedo ki lapwonnyi wang ki wang pire tek tutwal!

14. Ma lubbe ki tira pa Yecu ma tye i Matayo 28:19, 20, ngo ma omyero watute me timone, dok pingo?

¹⁴ Kwan Matayo 28:19, 20. Ka wawoto ki kwano Baibul ki dano, omyero watute me ‘loko dano . . . , ki pwonyogi gin ducu ma dong Yecu ocikowa kwede.’ Mitte ni wakony dano me niang kit ma pire tek kwede pigi me cung pi Jehovah ki Kerre. Man tyen lokke ni watug cwinygi me keto ada i tic i kwogi ki lubo gin ma gipwonyo,  dyero kwogi bot Jehovah ki nongo batija. Meno keken aye biweko gibwot i nino pa Jehovah.​—1 Pet. 3:21.

15. Gin ango ma pe watye ki cawa pire, dok pingo?

¹⁵ Kit ma kitito kwede con, kare dong odong manok adada wek agikki obin. Pi tyen lok man, wape ki cawa me bedo ka kwano Baibul ki jo ma pe gimito moko tamgi me doko lupwonnye pa Kricito. (1 Kor. 9:26) Kare dong odic woko! Tye jo mapol ma mitte ni guwiny kwena me Ker-ri ma peya agikki obino.

16. Ma lubbe ki Niyabo 18:2, 4, 5, 8, gin ango ma omyero wan ducu watim? (Nen bene lok ma tye i tere piny.)

¹⁶ Kwan Niyabo 18:2, 4, 5, 8. Tyeng magi gikonyowa me niang gin mukene ma Jehovah mito ni jo ma giwore gutim. Lukricitayo ducu me ada omyero gunen ni pe giroyo wigi i gin mo keken ma kubbe ki woro me goba. Ma peya latin kwan me Baibul opwonyo lok ada, twero bedo ni en obedo lamemba me dini goba. Oromo bedo ni en onongo nywako i worogi kacel ki tic mogo ma kwako dini meno. Nyo bene en onongo miyo ajog mogo me cwako kor dul ma tye i te dini meno. Ma peya kimoko ni latin kwan me Baibul man odok latit kwena ma peya onongo batija, en myero onen ni ejuko gin mo keken ma kubbe ki dini goba. En myero oco waraga bot kanicane macon nyo dul mo keken ma kubbe ki dini goba me tittigi ni pe dong etye lamembagi. *

17. Dog tic ango ma Lakricitayo omyero ogwokke ki iye, dok pingo?

¹⁷ Lakricitayo me ada myero onen ni dog ticce bene pe kubbe ki dini goba. (2 Kor. 6:14-17) Me labolle, en pe twero bedo latic pa kanica. Medo i kom meno, Lakricitayo ma tye latic i te biacara mukene myero ogwokke ki timo tic mapol i gedo ma kitiyo kwede pi woro goba. Dok ka en tye ki biacarane, en pe myero oyeny tic nyo omak kontrak me tic pi dul mo keken ma kubbe ki Babilon Madit. Pingo wamoko tam dok wacung matek kit man? Pien, pe wamito ni wanywak i tic kacel ki bal pa dul ma tye i te dini goba ma Lubanga waco ni komgi ki keni.​—Ic. 52:11. *

18. Omego mo acel ocung matek nining pi pwony me Baibul ma lubbe ki dog ticce?

 ¹⁸ Mwaki mogo angec, labiacara mo ma omako kontrak me tic i kanica openyo laelda mo ma tye ki biacarane ni okonye ki tiyo tic me payo bao i kanica man. Labiacara man onongo ngeyo ni omego-ni kare ducu pe ye tic i kom odi lega. Ento i wang-ngi, labiacara-ni onongo cawa odiye dok tye ki miti matek me nongo ngat mo pi tic man. Kadi bed kit meno, omego-ni omoko matek i kom pwony me Baibul dok okwero tic man. I cabit ma lubo meno, gajeti okatti ki cal lapa bao mukene ma tye ka ngabo yatariya i kor ot lega meno. Kono onongo ominwa-ni olok tamme ci oye tic man, onongo calle aye bikatti i gajeti man. Tam kong kit ma man onongo bicwero kwede cwiny Lukricitayo luwote! Tam bene kit ma Jehovah onongo biwinyone kwede.

19-20. (a) Gin ango ma dong wapwonyo? (b) Ngo mukene ma omyero watim?

¹⁹ Ma lubbe ki lok pa lunebi me Baibul, gin mukene ma bitimme i wi lobo ducu obedo miyo lok angeya ma lutela gibimiyo ni “kuc tye, piny okwe mot.” Wapwoyo Jehovah adada pien opwonyowa ni lutela me lobe pe gibikelo kuc ma rii. Gin ango ma omyero watim ma peya kimiyo lok angeya man ma to bilubo kore-ni? Jehovah mito ni wamedde ki tito pi Ker-ri dok watute matek me konyo dano wek gudok lupwonnye pa Kricito. Ka wawoto ki timo man, omyero pe watim gin mo keken ma weko wanywako i tim me dini goba. Man bene tyen lokke ni wajuk bedo lumemba me Babilon Madit dok pe waye dog tic mo keken ma kubowa ki dini goba.

²⁰ Tye bene jami mukene ma bitimme i “kare me agikki.” Tye jami mogo ma Jehovah bene mito ni watim. Jami magi gubedo ngo, dok watwero yubbe pi gin ducu ma bitimme i anyim nining? Wabineno i pwony ma lubo man.