1. Mɛni lɛ ha nɛ wa ngɛ nɔ mi mami kaa wa ngɛ “nyagbe ligbi ɔmɛ” a mi ɔ?

ANƐ a fɔ mo ngɛ jeha 1914 ɔ se lo? Ke jã a lɛɛ o hi níhi a blɔ nya tomi nɛ ɔ “nyagbe ligbi ɔmɛ a mi” o wami be tsuo. (2 Tim. 3:1) Wɔ tsuo wa nu níhi nɛ Yesu gba kaa a maa ya nɔ ngɛ wa be nɛ ɔ mi ɔ. Ní nɛ ɔmɛ ekomɛ ji, ta, hwɔ, zugba mimiɛɛmi, gbenɔ hiɔhi, mlaa nɔ nɛ a be yee, kɛ Yehowa we bi yi mi nɛ a maa wa. (Mat. 24:3, 7-9, 12; Luka 21:10-12) Jehanɛ hu ɔ, wa na kaa nihi jeɔ suhi nɛ bɔfo Paulo tu a he munyu ɔ kpo. (Hyɛ daka nɛ ji, “ Bɔ Nɛ Nihi Baa A Je Mi Ha Mwɔnɛ ɔ.”) Kaa Yehowa sɔmɔli ɔ, wa ngɛ nɔ mi mami kaa wa ngɛ “nyagbe be” ɔmɛ a nyagbe ɔ mi.​—Mika 4:1.

2. Mɛni sane bimihi nɛ e sa nɛ wa ná a heto ɔmɛ?

² Kɛ je jeha 1914 ɔ kɛ ba si amlɔ nɛ ɔ, jehahi babauu be, enɛ ɔ he ɔ, wa ma nyɛ ma de ke wa ngɛ “nyagbe ligbi ɔmɛ” a nyagbe ɔ mi. Akɛnɛ níhi a blɔ nya tomi nɛ ɔ nyagbe ɔ su si ta he je ɔ, e sa nɛ wa ná sane bimihi nɛ a he hia nɛ ɔmɛ a heto: Mɛni níhi maa ya nɔ ngɛ “nyagbe ligbi ɔmɛ” a nyagbe ɔ mi? Nɛ mɛni Yehowa ngɛ blɔ hyɛe kaa waa pee be mi nɛ wa ngɛ mlɛe konɛ ní nɛ ɔmɛ nɛ a ba mi ɔ?

3. Kaa bɔ nɛ gbami nɛ ngɛ 1 Tɛsalonika Bi 5:1-3 ɔ tsɔɔ ɔ, mɛni adafi nɛ je ma amɛ maa hi fiae?

³ Kane 1 Tɛsalonika Bi 5:1-3. Paulo wo “Yehowa ligbi ɔ” nɔ ta. Kaa bɔ nɛ wa na ngɛ ngmami nɛ ɔ mi ɔ, Yehowa ligbi ɔ maa je sisi ke a tua “Babilon Ngua” a nɛ ji je ɔ tsuo lakpa jami ɔ, nɛ e maa gbe nya kɛ Hamagedɔn. (Kpoj.  16:14, 16; 17:5) Loko jamɛ a “ligbi ɔ” maa je sisi ɔ, je ma amɛ maa hi dee ke, “Tue mi jɔmi kɛ slɔkee si himi ba!” (Baiblo sisi tsɔɔmi kpa komɛ de ke: “Wa he mi jɔ wɔ, nɛ wa tue mi hu jɔ wɔ.”) Be komɛ ɔ, ma hɛ mi nyɛɛli tuɔ munyu komɛ kaa kikɛ ke a ngɛ kake peemi nɛ maa hi mahi a kpɛti ɔ he munyu tue ɔ. * Se “tue mi jɔmi kɛ slɔkee si himi” nɛ Baiblo ɔ gba kaa a maa hi dee ke e ba a je ekpa kulaa ngɛ enɛ ɔ he. Mɛni he je? Ke a fia adafi ɔ nɛ Baiblo ɔ gba kɛ fɔ si ɔ, nihi ma susu kaa hɛ mi nyɛɛli nɛ a ngɛ je ɔ mi ɔ ha nɛ je ɔ mi pee slɔkee pe sa a. Se ngɛ anɔkuale mi ɔ, “si kake too ɔ, hɛ mi kpatami maa ba,” kɛkɛ ɔ, “amanehlu ngua a” maa je sisi.​—Mat. 24:21.

4. (a) Mɛni nɛ wa li ngɛ adafi nɛ a maa hi fiae kaa “tue mi jɔmi kɛ slɔkee si himi ba” a he lolo? (b) Mɛni nɛ wa le ngɛ he momo?

⁴ Wa le ní komɛ ngɛ adafi nɛ a maa fia ke “tue mi jɔmi kɛ slɔkee si himi ba” a he. Se ní komɛ hu ngɛ nɛ wa li. Wa li nɔ́ nɛ ma ha nɛ a fia jamɛ a adafi ɔ, aloo bɔ nɛ a maa fia adafi ɔ ha. Wa li hu kaa a maa fia adafi ɔ nɔtonɔto, aloo si kake. Bɔ nɛ níhi maa ya nɔ ha fɛɛ ko ɔ, e sɛ nɛ jamɛ a adafi fiami ɔ nɛ ha nɛ wa susu kaa je ɔ hɛ mi nyɛɛli ɔmɛ ma nyɛ maa ngɔ tue mi jɔmi kɛ ba je ɔ mi. Jamɛ a adafi fiami ɔ mohu lɛ a bɔ wɔ kɔkɔ kaa waa hyɛ blɔ ɔ nɛ. E ji okadi nɛ tsɔɔ kaa “Yehowa ligbi ɔ” yaa je sisi!

5. Ngɛ mɛni blɔ nɔ nɛ 1 Tɛsalonika Bi 5:4-6 maa ye bua wɔ konɛ wa dla wa he kɛ to “Yehowa ligbi ɔ”?

⁵ Kane 1 Tɛsalonika Bi 5:4-6. Paulo munyu nɛ ngɛ ngmami nɛ ɔ mi ɔ tsɔɔ wɔ blɔ nɔ nɛ wa maa gu kɛ le kaa wa dla wa he kɛ to “Yehowa ligbi ɔ.” E sɛ nɛ “waa hi mahe mi kaa ni kpa amɛ.” Mohu ɔ, e sa nɛ “waa fɔ nyɔ” nɛ wa hɛ nɛ hi wa he nɔ. Kaa nɔ hyɛmi nɔ́ ɔ, e sɛ nɛ wa ha nɛ nɔ́ ko nɛ ha nɛ waa ngɔ wa he kɛ wo ma kudɔmi sanehi a mi. Ke waa kɛ wa he wo mi ɔ, wa maa pee nihi nɛ a “piɛɛ je ɔ he.” (Yoh. 15:19) Wa le kaa Mawu Matsɛ Yemi ɔ pɛ lɛ maa ngɔ tue mi jɔmi kɛ ba je ɔ mi.

6. Mɛni e sa nɛ waa ye bua ni kpahi nɛ a pee, nɛ mɛni he je?

⁶ E sa nɛ wa hɛ nɛ hi wa he nɔ, nɛ waa ye bua ni kpahi hu konɛ a le nɔ́ nɛ Baiblo ɔ gba kaa e maa ba hwɔɔ se. E sa nɛ wa kai kaa ke amanehlu ngua a ná nɛ e je sisi pɛ ɔ, nihi be nyɛe ma de ke a ma nɛ a ba sɔmɔ Yehowa. Enɛ ɔ he je nɛ fiɛɛmi ní tsumi ɔ he hia wawɛɛ amlɔ nɛ ɔ nɛ! *

7. Mɛni Yehowa ngɛ blɔ hyɛe kaa waa pee amlɔ nɛ ɔ?

⁷ Akɛnɛ e be kɛe nɛ “Yehowa ligbi ɔ” maa je sisi he je ɔ, e ngɛ blɔ hyɛe kaa waa ya nɔ nɛ waa kɛ hɛdɔ nɛ fiɛɛ sane  kpakpa a. E sa nɛ waa bɔ mɔde nɛ wa “tsu babauu ngɛ Nyɔmtsɛ ɔ ní tsumi ɔ mi.” (1 Kor. 15:58) Yesu sɛ hlami de nɔ́ nɛ e sa nɛ waa pee. Benɛ Yesu ngɛ ní nguanguahi tsuo nɛ maa ya nɔ ngɛ nyagbe be ɔ mi ɔ he munyu tue ɔ, e de kɛ piɛɛ he ke: “Jehanɛ hu ɔ, a maa fiɛɛ sane kpakpa a ngɛ je ma amɛ tsuo a mi kekle.” (Maak. 13:4, 8, 10; Mat. 24:14) Mo susu he nɛ o hyɛ: Be fɛɛ be nɛ o maa fiɛɛ sane kpakpa a, mo hu o ngɛ ye buae konɛ Baiblo gbami nɛ ɔ nɛ ba mi!

8. Ngɛ mɛni blɔ nɔ nɛ fiɛɛmi ní tsumi ɔ ngɛ hɛ mi yae?

⁸ Mɛni wa ma nyɛ ma de ngɛ bɔ nɛ fiɛɛmi ní tsumi ɔ ngɛ hɛ mi yae ha a he? Daa jeha a, ní tsumi nɛ ɔ ngɛ hɛ mi yae. Kaa nɔ hyɛmi nɔ́ ɔ, mo susu bɔ nɛ Matsɛ Yemi fiɛɛli ɔmɛ a he ngɛ hiɛe ngɛ nyagbe ligbi nɛ ɔmɛ a mi ha a he nɛ o hyɛ. Ngɛ jeha 1914 ɔ mi ɔ, fiɛɛli 5,155 nɛ a ngɛ mahi 43 a nɔ. Amlɔ nɛ ɔ, wa ngɛ fiɛɛli maa pee 8,500,000 ngɛ mahi 240 a nɔ! Se kɛ̃ ɔ, wa ní tsumi nɛ ɔ bɛ nyagbe lolo. E sa nɛ waa ya nɔ nɛ waa jaje kaa Mawu Matsɛ Yemi ɔ pɛ ji adesahi a nyagbahi a nya tsaba.​—La 145:11-13.

9. Mɛni he je nɛ e sa nɛ waa ya nɔ nɛ waa fiɛɛ Matsɛ Yemi sɛ gbi ɔ?

⁹ Wa maa fiɛɛ Matsɛ Yemi sane kpakpa a kɛ ya si be nɛ Yehowa ma de ke e hi. Be enyɛmɛ nɛ piɛ nɛ nihi kɛ ma nyɛ ma ba le Yehowa Mawu kɛ Yesu Kristo? (Yoh. 17:3) Wa be nyɛe maa tsɔɔ. Nɔ́ pɛ nɛ wa le ji kaa kɛ yaa si be nɛ amanehlu ngua a maa je sisi ɔ, nihi tsuo nɛ a ngɛ “su kpakpa nɛ ma ha nɛ a ná neneene wami” ɔ ma nyɛ maa kplɛɛ sane kpakpa a nɔ. (Níts. 13:48) Mɛni wa ma nyɛ maa pee kɛ ye bua nimli nɛ ɔmɛ loko e ba kpɛ se?

10. Mɛni yemi kɛ buami nɛ Yehowa kɛ ngɛ wɔ hae konɛ wa nyɛ nɛ waa tsɔɔ nihi anɔkuale ɔ?

¹⁰ Yehowa guɔ e we asafo ɔ nɔ kɛ haa wɔ níhi tsuo nɛ wa hia konɛ wa nyɛ nɛ waa tsɔɔ nihi anɔkuale ɔ. Kaa nɔ hyɛmi nɔ́ ɔ, wa náa tsɔsemi daa otsi ngɛ otsi kpɛti kpe ɔ sisi. Kpe nɛ ɔmɛ yeɔ bua wɔ nɛ wa leɔ nɔ́ nɛ wa ma de kekle ligbi nɛ wa na nɔ ko ngɛ fiɛɛmi mi, loo ke wa kpale ya slaa nɔ ko. E haa nɛ wa leɔ bɔ nɛ a peeɔ Baiblo mi ní kasemi ha. Jehanɛ hu ɔ, Yehowa asafo ɔ ha wɔ ní tsɔɔmi ga dadehi fuu. Ní nɛ ɔmɛ yeɔ bua wɔ nɛ wa nyɛɔ . . .

•   jeɔ ní sɛɛmi sisi,

• tleɔ nihi a bua jɔmi si,

• woɔ nihi he wami konɛ a bua nɛ jɔ kaa a maa kase níhi fuu,

• tsɔɔ nihi anɔkuale ɔ kɛ guɔ Baiblo mi ní kasemi nɔ, nɛ

• fɔɔ nihi nɛ a bua jɔ sɛ gbi ɔ he ɔ nine kɛ yaa wa wɛbsaiti ɔ kɛ Matsɛ Yemi Asa a nɔ.

Ngɛ anɔkuale mi ɔ, e hi kaa wa ngɛ ga dade nɛ ɔmɛ, se nɔ́ nɛ he hia ji kaa waa kɛ ma tsu ní. * Kaa nɔ hyɛmi nɔ́ ɔ, ke o kɛ nɔ ko nɛ e bua jɔ anɔkuale ɔ he ɔ sɛɛ ní, nɛ o ha lɛ dɛ womi aloo womi tɛtlɛɛ ko ɔ, e ma nyɛ maa hi kanee kɛ ya si benɛ o ma ya slaa lɛ ekohu. E ji wɔ tsuo wa blɔ nya ní tsumi kaa waa kɛ hɛdɔ maa fiɛɛ Matsɛ Yemi sɛ gbi ɔ daa nyɔhiɔ.

11. Mɛni he je nɛ a to Online Bible Study Lessons ɔ he blɔ nya a?

¹¹ Online Bible Study Lessons blɔ he ɔ nɛ ngɛ jw.org^® ɔ nɔ ɔ ji blɔ kpa ko hu nɛ Yehowa ngɛ nɔ gue kɛ ngɛ nihi anɔkuale ɔ tsɔɔe. Mɛni he je nɛ a to nɔ́ nɛ ɔ he blɔ nya a? Daa nyɔhiɔ ɔ, nimli akpe nyɔngma kɛ se yaa Intanɛti ɔ nɔ, nɛ a ya hlaa Baiblo mi sanehi. Baiblo mi sanehi nɛ a ngɛ wa wɛbsaiti ɔ nɔ ɔ ma nyɛ maa ye bua nihi konɛ a ba kase anɔkuale nɛ ngɛ Mawu Munyu ɔ mi ɔ. Eko ɔ, nihi nɛ o fiɛɛɔ kɛ haa mɛ ɔ a ti ni komɛ bua be he jɔe kaa o kɛ mɛ nɛ ba kase Baiblo ɔ. Ke e ba jã a, moo tsɔɔ mɛ fã nɛ ɔ nɛ ngɛ wa wɛbsaiti ɔ nɔ ɔ, aloo moo mane mɛ link nɛ kɛ mɛ maa ya he nɛ Baiblo mi tsɔɔmi nɛ ɔmɛ ngɛ ngɛ wɛbsaiti ɔ nɔ. *

12. Mɛni o ma nyɛ maa kase ngɛ Online Bible Study Lessons blɔ he ɔ?

¹² Níhi nɛ o maa na ngɛ Online Bible Study Lessons blɔ he ɔ ekomɛ ji: “The Bible and Its Author,” “The Bible’s Main Characters,” kɛ “The Bible’s Message of Hope.” Níhi nɛ wa ma nyɛ maa na ngɛ munyu nɛ ɔmɛ a mi ɔ ekomɛ ji:

• Bɔ nɛ Baiblo ɔ ma nyɛ maa ye bua nɔ ko ha

• Nihi nɛ Yehowa, Yesu kɛ bɔfo ɔmɛ ji

• Nɔ́ he je nɛ Mawu bɔ adesahi

• Nɔ́ he je nɛ nɔ́ nami kɛ ní yayamihi ngɛ je ɔ mi

Ní kpa komɛ hu nɛ wa maa na ngɛ munyu nɛ ɔmɛ a mi ɔ ekomɛ ji bɔ nɛ Yehowa . . .

• maa po nɔ́ nami kɛ gbenɔ se ha,

• ma tle ni gbogboe ɔmɛ si kɛ ba wami mi ha, kɛ

• maa ngɔ Mawu Matsɛ Yemi ɔ kɛ da adesa nɔ yemihi nɛ a yi manye ɔ nane mi ha.

13. Anɛ a ngɔ Online Bible Study Lessons ɔ kɛ da Baiblo ɔ nɛ waa kɛ nihi kaseɔ ɔ nane mi lo? Moo tsɔɔ nya.

¹³ A kɛ Online Bible Study Lessons ɔ da we Baiblo ɔ nɛ waa kɛ nihi kaseɔ ɔ nane mi. Yesu ha wɔ he blɔ kaa waa pee nihi kaseli. Wa ngɛ blɔ hyɛe kaa nihi nɛ a bua jɔ sane kpakpa a he ɔ a bua maa jɔ níhi nɛ ngɛ Online Bible Study Lessons blɔ he ɔ he, nɛ a maa suɔ nɛ a kase níhi fuu. Ke e ba jã a, eko ɔ, a maa kplɛɛ kaa waa kɛ mɛ nɛ kase Baiblo ɔ. Ngɛ ní kasemi ɔ eko fɛɛ eko nyagbe ɔ, a woɔ ní kanelɔ ɔ he wami kaa e ngma kɛ bi nɛ nɔ ko kɛ lɛ nɛ ba kase Baiblo ɔ. Ngɛ wa wɛbsaiti ɔ nɔ ɔ, nihi maa pee 230 kɛ se biɔ nɛ a kɛ mɛ nɛ ba kase Baiblo ɔ daa ligbi ngɛ je kɛ wɛ! Nɔ ko nɛ maa ba o ngɔ nɛ e kɛ mo ba kase Baiblo ɔ he hia wawɛɛ!

14. Ngɛ blɔ tsɔɔmi nɛ Yesu kɛ ha ngɛ Mateo 28:19, 20 ɔ nya a, mɛni nɛ e sa nɛ waa bɔ mɔde wawɛɛ kaa wa maa pee, nɛ mɛni he je?

¹⁴ Kane Mateo 28:19, 20. Ke wa ngɛ Baiblo mi ní kasemi pee ɔ, e sa nɛ waa bɔ mɔde wawɛɛ nɛ waa ‘pee nihi kaseli, nɛ́ waa tsɔɔ mɛ nɛ a ye níhi tsuo nɛ [Yesu] fã wɔ ɔmɛ a nɔ.’ E sa nɛ waa ye bua nihi konɛ a na nɔ́ he je nɛ e he hia nɛ a sɔmɔ Yehowa nɛ a fĩ e Matsɛ Yemi ɔ se ɔ. Enɛ ɔ tsɔɔ kaa e sa nɛ waa wo nihi he wami konɛ a pɛtɛ anɔkuale ɔ he, nɛ a kɛ níhi nɛ a ngɛ kasee ɔ nɛ tsu ní, a jɔɔ a wami nɔ ha Yehowa nɛ a ha nɛ a baptisi mɛ. Ja jã loko a yi ma ná wami ngɛ Yehowa ligbi ɔ nɔ.​—1 Pet. 3:21.

15. Mɛni nɛ e he hia we nɛ waa pee, nɛ mɛni he je?

¹⁵ Kaa bɔ nɛ wa sɛ hlami de ɔ, be nɛ piɛ kɛ je piɔ kɛ ya si be nɛ níhi a blɔ nya tomi nɛ ɔ maa ba nyagbe ɔ pi kulaa. Enɛ ɔ he ɔ, e he hia we nɛ waa ya nɔ nɛ waa kɛ nihi nɛ a pee we a juɛmi kaa a ma ba pee Kristo kaseli ɔ nɛ kase Baiblo ɔ. (1 Kor. 9:26) E biɔ nɛ waa kɛ oya yemi nɛ tsu wa ní tsumi ɔ! Nihi fuu ngɛ nɛ e sa kaa a nu Matsɛ Yemi sɛ gbi ɔ loko be nɛ be.

16. Ngɛ Kpo Jemi 18:2, 4, 5, 8 ɔ nya a, mɛni e sa nɛ wɔ tsuo waa pee? (Hyɛ sisi ningma a hulɔ.)

¹⁶ Kane Kpo Jemi 18:2, 4, 5, 8. Ngmami nɛ ɔmɛ tsɔɔ nɔ́ kpa ko hu nɛ Yehowa suɔ kaa e sɔmɔli nɛ a pee. E sa nɛ anɔkuale Kristofohi tsuo nɛ a ha nɛ slɔɔto nɛ ngɛ a kɛ Babilon Ngua a kpɛti ɔ nɛ pee heii. E ma nyɛ maa ba kaa loko nɔ ko ma ba kase anɔkuale ɔ, nɔ ɔ ngɛ lakpa jami ko mi momo. Eko ɔ, e yaa sɔlemi, nɛ e kɛ e he woɔ jami ɔ mi ní peepeehi a mi. Aloo eko ɔ, e kɛ sika fĩɔ jami ɔ se. Loko a ma ha Baiblo kaselɔ ko he blɔ kaa fiɛɛlɔ nɛ a baptisii we lɛ ɔ, e sa nɛ e kɛ lakpa jami nɛ po tako mi kulaa. E sa nɛ e ngma sɛ womi kɛ ya ha e jami ɔ nɛ e de mɛ kaa e piɛɛ we a he hu, aloo e je e he kɛ je kuu fɛɛ kuu nɛ e kɛ Babilon Ngua a ngɛ tsakpa a he. *

17. Mɛni ní tsumi nɛ e sa nɛ Kristofo no nɛ yu e he ngɛ he, nɛ mɛni he je?

¹⁷ E sa nɛ anɔkuale Kristofo no nɛ e hyɛ saminya konɛ ní tsumi nɛ e ma tsu ɔ kɛ Babilon Ngua a nɛ ko hi tsakpa ko. (2 Kor. 6:14-17) Kaa nɔ hyɛmi nɔ́ ɔ, Kristofo no ko be suɔe nɛ sɔlemi ko nɛ ngɔ lɛ kaa e ní tsulɔ. Jehanɛ hu ɔ, ke e tsuɔ ní kɛ haa nɔ ko ɔ, e be suɔe nɛ e tsu ní tsumi ngua ko ngɛ lakpa jami he ɔmɛ. Nɛ ke  e ngɛ lɛ nitsɛ e ní tsumi hu ɔ, e be suɔe nɛ e ya ngɔ ní tsumi ko nɛ ma ha nɛ e tsu ní ha kuu ko nɛ kɛ Babilon Ngua a ngɛ tsakpa. Mɛni he je nɛ wa be ní nɛ ɔmɛ pee ɔ? Ejakaa wa sume nɛ waa piɛɛ lakpa jami kuuhi nɛ a he tsɔ we ngɛ Mawu hɛ mi ɔ a he ngɛ a ní tsumi kɛ a yayami ɔmɛ a mi.​—Yes. 52:11. *

18. Ngɛ mɛni blɔ nɔ nɛ nyɛminyumu ko kɛ Baiblo sisi tomi mlaahi tsu ní ngɛ ní nɛ e tsuɔ ɔ he?

¹⁸ Jeha komɛ nɛ be ɔ, nitsumitsɛ ko de asafo mi nɔkɔtɔma ko nɛ e ji kapitɛ ɔ kaa e ba tsu nɔ́ ko ha lɛ ngɛ sɔlemi tsu ko nɛ ngɛ he nɛ asafo mi nɔkɔtɔma a ngɛ ɔ he. Nitsumitsɛ ɔ le kaa nyɛminyumu nɛ ɔ pɔɔ demi ke e be ní tsue ngɛ sɔlemi tsu ko he. Se nitsumitsɛ ɔ hia nɔ ko nɛ e tsu ní tsumi nɛ ɔ ha lɛ kpatakpata. Se kɛ̃ ɔ, nyɛminyumu ɔ bɔ mɔde nɛ e kɛ Baiblo sisi tomi mlaahi tsu ní, nɛ e kua ní tsumi ɔ. Otsi nɛ nyɛɛ se ɔ, a na foni ko ngɛ adafi fiami womi ko mi nɛ kapitɛ ko ngɛ klɔɔs kae ngɛ sɔlemi tsu ko he. Kaa wa nyɛminyumu ɔ kplɛɛ ní tsumi nɛ ɔ nɔ ɔ, jinɛ e foni nɛ a maa na ngɛ adafi fiami womi ɔ mi ɔ nɛ. Hyɛ bɔ nɛ e nyɛmimɛ Kristofo ɔmɛ ko na lɛ ha! Nɛ kɛ o susu kaa Yehowa hu ko nu he ha kɛɛ?

19-20. (a) Mɛni wa ba kase? (b) Mɛni ji ní kpahi hu nɛ e sa nɛ waa le?

¹⁹ Baiblo ɔ gba kaa e be kɛe nɛ nɔ́ ngua ko maa ya nɔ ngɛ je kɛ wɛ, nɛ lɔ ɔ ji be nɛ je ma amɛ ma de ke “tue mi jɔmi kɛ slɔkee si himi ba” a nɛ. Se nɔ́ nɛ Yehowa tsɔɔ wɔ ɔ he je ɔ, wa le kaa je ma amɛ be nyɛe maa ngɔ tue mi jɔmi nitsɛnitsɛ nɛ maa hi si daa kɛ ba. Loko jamɛ a be ɔ maa su nɛ hɛ mi kpatami ɔ maa nyɛɛ se ɔ, mɛni e sa nɛ waa pee? Yehowa suɔ kaa waa ya nɔ nɛ waa fiɛɛ Matsɛ Yemi sɛ gbi ɔ nɛ waa pee nihi fuu kaseli. Jamɛ a be ɔ mi nɔuu ɔ, e sa nɛ waa yu wa he kulaa ngɛ lakpa jami he. Enɛ ɔ biɔ nɛ waa kɛ Babilon Ngua a nɛ po tako mi, nɛ́ wa ko tsu ní tsumi ko nɛ e kɛ lɛ ngɛ tsakpa hulɔ.

²⁰ Ní kpa komɛ maa ya nɔ ngɛ “nyagbe ligbi ɔmɛ” a nyagbe ɔ mi. Se ní komɛ hu ngɛ nɛ Yehowa ngɛ blɔ hyɛe kaa waa pee. Mɛni ji ní nɛ ɔmɛ, nɛ kɛ wa maa pee kɛɛ kɛ dla wa he kɛ to níhi nɛ e be kɛe nɛ a maa ba a? Wa maa na heto ɔmɛ ngɛ ní kasemi nɛ nyɛɛ se ɔ mi.