1. Бис «калганчы кӱндерде» јадып турганыс деп, нениҥ учун алаҥзыбай јадыс?

СЛЕР 1914 јылдыҥ кийнинде чыккан болзогор, слердиҥ бастыра јӱрӱмигер бу телекейдиҥ «калганчы кӱндеринде» ӧдӱп јат (2 Тим. 3:1). Иисустыҥ озодоҥ јуу-согуш, ачана-торо, јерсилкиништер, оору-јобол, каршулу керектер эдип турган улустыҥ кӧптӧгӧнин, анайда ок Иегованыҥ албатызына истежӱлер болорын айдып салганын кажыбыс ла уккан эмей (Матф. 24:3, 7—9, 12; Лука 21:10—12). Бого коштой улустыҥ кылык-јаҥы элчи Павелдиҥ судурлаганына келижип турганын кӧрӧдис. (« Улус кандый болуп калган?» деген рамканы кӧрӱгер.) Бу ӱзе неме бис «калганчы кӱндерде» јададыс деп кӧргӱзип јат (Мих. 4:1).

2. Биске кандый сурактардыҥ карууларын таап алар керек?

² 1914 јылдаҥ бери кӧп ӧй ӧткӧн, айдарда, бис «калганчы кӱндердиҥ» калганчы кӱндеринде јададыс. Айса болзо, чак тӱгенериниҥ учы јууктап калган болордо, биске јаан учурлу мындый сурактардыҥ карууларын таап алар керек: «калганчы кӱндердиҥ» учында не болор? Мыныла колбой Иегова бистеҥ нени сакыйт?

3. 1 Фессалоникадагыларга 5:1—3-те айдылганыла, телекейлик башчылар кандый јар айдар?

³ 1 Фессалоникадагыларга 5:1—3 кычырыгар. Бу ӱлгерлерде Павел «Кайраканныҥ [Иегованыҥ] кӱни» керегинде айдат. Иегованыҥ кӱни дегени «Улу Вавилонго» — тӧгӱн  кудай јаҥдардыҥ телекейлик империязына табару башталганынаҥ ала Армагеддонло божойтон ӧйди темдектейт (Ачыл. 16:14, 16; 17:5). Шак ла бу кӱнниҥ башталарыныҥ алдында албатылар: «Амыр, кайдаҥ да јеткер јок!» — деп, јар айдар. Кезикте политикалык башчылар албатылар ортодо амыр колбулар тудары керегинде айдып, бого тӱҥей сӧстӧр айдыжат *. Је Агару Бичиктеги бичилген «амыр, кайдаҥ да јеткер јок» деп јарлалатаны, аҥылу болор. Нениҥ учун дезе ол ӧйдӧ телекейлик башчылар чыннаҥ ла амыр јӱрӱм экелди деп билдирер. Је чынынча болзо, бу ӧйдӧ олорго кенетийин јоголтыш келер (Матф. 24:21).

4. а) «Амыр, кайдаҥ да јеткер јок» деген јардыҥ айдылары керегинде бис база нени билип аларыс? б) Је эмди бис нени билерис?

⁴ «Амыр, кайдаҥ да јеткер јок» деген јардыҥ айдылары керегинде кезик јетирӱлерди билер де болзоос, је ончозын билбезис. Бу јар недеҥ улам башталарын ла канайып айдыларын бис база билбей јадыс. Бу јар јаҥыс катап айдылар ба, эмезе канча катап айдылар ба јартын билбезис. Је биске бир неме јарт: политикалык башчылар амырга јединер деп тӧгӱндетпес керек. Олордыҥ анайып айткан сӧстӧри — библиялык судурдыҥ бӱдӱп јатканы болор. Бу сӧстӧр Иегованыҥ кӱни удабас ла једип келериниҥ темдеги болот.

5. 1 Фессалоникадагыларга 5:4—6 «Иегованыҥ кӱнине» белетенип аларга канайып болужат?

⁵ 1 Фессалоникадагыларга 5:4—6 кычырыгар. Павелдиҥ сӧстӧри биске «Иегованыҥ кӱнине» белетенип аларга болужат. Бис «ӧскӧлӧри чилеп уйуктаба[с]» учурлу. Биске «ойгу ла сергек» болор керек. Темдектезе, политикалык керектерге кирижип, нейтралитетти буспаска, ајарыҥкай болор керек. Оноҥ башка, бис бу телекейдиҥ улузына кожулып каларыс (Иоанн 15:19). Је бис амыр-энчӱни јӱк ле Кудайдыҥ Каандыгы тургузар деп бӱдӱп јадыс.

6. Улуска кандый болуш јетирер керек, нениҥ учун?

⁶ Биске јӱк ле бойыс ойгу јӱрер керек эмес, је улуска бӱгӱнги кӱндерде бӱдӱп турган библиялык судурларды кӧргӱзип, кӧгӱс уйкунаҥ ойгонорго болужар керек. Улу тӱбек баштала берзе, Иегованыҥ јанына турарга ӧткӱре орой болуп калар деп ундыбай турактар. Бат, оныҥ учун эмди ле јарлаар керек! *

7. Иегова бисти нени этсин деп айдат?

⁷ Иегованыҥ кӱни башталарына јетире коркышту ас ӧй арткан болордо, Кудай бисти эрчимдӱ јарлазын деп айдат. Оныҥ учун биске бойыстаҥ: «„Кайраканга иштеерине“ бастыра бойымды бередим бе?» —  деп сураар керек (1 Кор. 15:58). Иисус бисти кандый иш бӱдӱретенисти озодоҥ айдып салган. Калганчы кӱндерде не болорын куучындап тура, ол: «Ончо калыктарга кере болзын деп, Каандык керегинде Сӱӱнчилӱ Јар јер-ӱстине јарлалар» — деп айткан (Марк 13:4, 8, 10; Матф. 24:14). Оныҥ учун сананып ийзеер, јарлаар ишке барган тужыгарда, слер библиялык судурды бӱдӱрип јадыгар!

8. Каандык керегинде јарлалып турган иш кандый једимдерге једет?

⁸ Каандык керегинде сӱӱнчилӱ јарды јарлайтан иш кандый једимдерге једет? Бу јарды јарлап турган Каандыктыҥ јарчыларыныҥ тоозы бастыра јердиҥ ӱстинде кажы ла јыл кӧптӧп јат. Темдектезе, 1914 јылда 43 ороондо 5 155 јарчы болгон. Је бӱгӱнги кӱнде 240 ороондо ло јерлерде 8 јарым миллион кире јарчы иштейт! Је иш тӱгенгелек. Биске оноҥ ло ары улуска кижиликтиҥ уур-кӱчтериниҥ аайына јӱк ле Кудайдыҥ Каандыгы чыгар аргалу деп куучындаар керек (Сар. 145:11—13).

9. Бис Каандык керегинде јарды нениҥ учун оноҥ ло ары јарлаар учурлу?

⁹ Бис сӱӱнчилӱ јарды Иегова токтотпогончо ло јарлаарыс. Улуска Иегова ла Иисус Христос керегинде билип аларга, база канча кире ӧй арткан? (Иоанн 17:3). Бис бу сурактыҥ каруузын билбезис. Је «чыннаҥ ла ӱргӱлји јӱрӱм аларга турган улуста» (ЈТ) улу тӱбектеҥ озо сӱӱнчилӱ јарды алынатан арга барын јарт билерис (Ап. ижи 13:48). Бис андый улуска, ӧткӱре орой болголокто, канайып болужар аргалу?

10. Иегова биске улусты чындыкка ӱредерге канайып болужат?

¹⁰ Иегова биске бойыныҥ организациязы ажыра улусты чындыкка ӱредетен ончо немени јеткилинче берет. Темдектезе, бис кажы ла неделе сайын иштеер кӱндердеги туштажуга јӱредис. Бу туштажуда бис куучын баштаарына, такып барарына ла Агару Бичикле ӱредӱ ӧткӱрерине ӱренедис. Анайда ок Иегованыҥ организациязы биске јарлаар иштиҥ јепселдерин берген. Бу јепселдер биске:

• куучын баштаарга,

• јилбилӱ эдип куучындаарга,

• кижи Агару Бичикти кӧптӧдӧ билерге кӱӱнзезин деп болужарга,

• Агару Бичикти ӱренген тушта чындыкка ӱредерге,

•   јилбиркеп турган улусты бистиҥ сайтка кирзин деп кӱӱнзедерге ле Каандыктыҥ Туразына кычырарга болужат.

Бу јепселдердиҥ бар болгоныла болорзынбай, олорды тузаланар керек *. Темдектезе, јакшы куучындашкан кижиге буклет эмезе журнал артыргызып салза, ол кижи оны такып тушташкалагыста кычырып јадаар эди. Бистиҥ кажыбыста ла Каандык керегинде јарды кажы ла ай эрчимдӱ јарлайтан молју бар.

11. Агару Бичикти ӱренетен онлайн-курстыҥ амадузы кандый?

¹¹ Иегова улусты чындыкла таныжып алзын деп, база бир аргала болужат — jw.org^® сайтта Агару Бичикти ӱренетен онлайн-курс бар. Бу курстыҥ амадузы кандый? Кажы ла ай бастыра јердиҥ ӱстинде канча муҥ улус интернеттеҥ Агару Бичикти ӱренетен курстар бедиреп јат. Оныҥ учун бистиҥ онлайн-курс улуска Кудайдыҥ Сӧзиндеги чындыкла таныжарга болужар аргалу. Кезик улус бисле Агару Бичикти ӱренерге алаҥзып турган болор. Андый улуска бистиҥ сайттагы бу онлайн-курсты кӧргӱзип беригер эмезе кижиге бу курстыҥ ссылказын аткарып ийигер *.

12. Агару Бичикти ӱренетен онлайн-курс кандый сурактардыҥ карууларын аларга болужат?

¹² Агару Бичикти ӱренетен онлайн-курста мындый темалар бар: «Агару Бичик. Оныҥ Чӱмдеечизи кем?», «Агару Бичикте кем керегинде айдылат?», «Агару Бичик кандый ижемји берет?». Бу курс мындый сурактардыҥ карууларын аларга болужар.

• Агару Бичик канайып болужар аргалу?

• Иегова, Иисус Христос ло ангелдер олор кемдер?

• Кудай улусты кандый амадулу јайаган?

• Кыйын-шыра јердиҥ ӱстинде нениҥ учун андый кӧп?

Анайда ок бу курста Иегова:

• кыйын-шыраны ла ӧлӱмди канайып јоголтор,

• божоп калган улусты канайып тиргизер, анайда ок

• кижиликтиҥ башкаруларын Кудайдыҥ Каандыгына канайып солыыр деген сурактар кӧрӱлет.

13. Агару Бичикти јарчыныҥ болужыла ӱренерин онлайн-курс солыйт па? Јартап беригер.

¹³ Агару Бичикти јарчыныҥ болужыла ӱренерин онлайн-курс солыбай јат. Иисус ӱренчиктер белетейтен ишти бистерге берген эмей. Јилбиркеп турган кижиге бу курсты ӧдӧри јарай берзе, ол оноҥ ары ӱренерге кӱӱнзеер болор деп иженип јадыс. Анайып, ол Агару Бичикти ӱренерге јӧпсинер болор. Кажы ла уроктыҥ кийнинеҥ кижиге Агару Бичикти јарчыныҥ болужыла ӱренетен заявка бичип ийетен арга берилет. Бастыра јердиҥ ӱстинеҥ кажы ла кӱн 230-таҥ ажыра заявка келет! Мынаҥ Агару Бичикти кижи бойы таҥынаҥ ӱренип болбозы кӧрӱнип јат!

14. Матфей 28:19, 20-ле болзо, бис нени эдер учурлу, нениҥ учун?

¹⁴ Матфей 28:19, 20 кычырыгар. Агару Бичикле ӱредӱ ӧткӱрип тура, бис Иисустыҥ: «Јакарганымды ончозын бӱдӱрерге ӱредигер» — деген сӧстӧри аайынча, ӱренчиктер белетеер учурлу. Улуска Иегованы ла оныҥ Каандыгын талдап алары эҥ јаан учурлу болгонын оҥдоп алзын деп болужар керек. Мынайып болужарга, олорды  библиялык чындыкла јӱрерине, јӱрӱмин Иеговага учурлаарына ла сууга чӧҥӱрилерине кӱӱнзедер керек. Јӱк ле анайып олор Иегованыҥ кӱнин ӧдӱп чыгар (1 Петр 3:21).

15. Ӧйди неге калас јылыйтпас керек, нениҥ учун?

¹⁵ Ӧрӧги айдылганыла, бу телекейдиҥ учына јетире коркышту ас ӧй арткан. Оныҥ учун бисте Христостыҥ ӱренчиги болорго солынарга кӱӱнзебей турган улусла Агару Бичикти ӱренерине ӧйди калас ӧткӱрер аргабыс јок (1 Кор. 9:26). Ӧй бисти сакыбас! Ӧткӱре орой болголокто, база да кӧп улуска Каандык керегинде сӱӱнчилӱ јарды јарлаар керек!

16. Ачылта 18:2, 4, 5, 8-ле болзо, бистиҥ кажыбыска ла нени эдер керек? (Сносканы база кӧрӱгер.)

¹⁶ Ачылта 18:2, 4, 5, 8 кычырыгар. Бу ӱлгерлерде Иегова бойыныҥ ишчилеринеҥ база нени сакып турганы айдылат. Чындык христиандарда Улу Вавилонло кандый да колбу болбос учурлу. Кижи Иегованыҥ Керечизи болордоҥ озо, тӧгӱн кудай јаҥда јӱрӱп, оныҥ керектерине турушкан ла службаларына јӱрген болордоҥ айабас, эмезе ол бу кудай јаҥга акча-манатла јӧмӧшкӧн болор. Оныҥ учун јарчы болордоҥ озо, ого тӧгӱн кудай јаҥла бастыра колбуларын ӱзер керек, темдектезе, Улу Вавилонло колбулу серкпенеҥ эмезе организациянаҥ јӱрӱп јатканын самара ажыра эмезе база кандый бир арга ажыра айдып салар керек *.

17. Христиан кижи кандый ишти эдерге јӧпсинбес, нениҥ учун?

¹⁷ Чындык христиан кижиге бойыныҥ ижинде Улу Вавилонло бир де колбу јок по деп, бӱдӱмјиленип алар керек (2 Кор. 6:14—17). Темдектезе, ол серкпеге ишке де кирерге јӧпсинбес, анайда ок тӧгӱн кудай јаҥныҥ бажырып турган јерлеринде кандый бир јаан иш эдерге де јӧпсинбес. Ол эмезе ондо бойыныҥ бизнеси бар болзо, Улу Вавилонло колбулу контракт тургуспас эмезе заказ албас. Бис нениҥ учун анайып эдип јадыс? Нениҥ учун дезе Кудайдыҥ кӧзинде кирлӱ кудай јаҥдардыҥ керектерине ле кинчектерине кирип каларга кӱӱнзебей јадыс (Иса. 52:11) *.

18. Бир ака иш јанынаҥ бек шӱӱп алган кӧрӱмин канайып кӧргӱскен?

¹⁸ Канча да јыл кайра, бир аксагал агашла узанып иштеген. Бир катап ого оныҥ калазында турган серкпеде јаан эмес иш эдетен заказ келген. Мынаҥ озо ака серкпеде иштеерге бир де јӧпсинбей туратан, заказ эткен  кижи де аканыҥ кӧрӱмин билер болгон. Је бу учуралда, проектти тургуза ла эдетен кижи керек болгон. Је ака библиялык принциптерди буспаска, заказты тӱҥей ле албаган. Кӧрӧр болзо, бир неделе ӧдӧ берерде, јербойыныҥ газединде ол заказты алган кижиниҥ, серкпениҥ ӱстине крест тургузып јаткан фотојуругы јӱрген. Бистиҥ ака заказты алып ийген болзо, газетте бойыныҥ фотозын кӧрӱп ийер эди. Сананып кӧрзӧӧр, мыны кӧрӱп, јуун ака керегинде нени сананар эди? А Иегова нени сезер эди?

19, 20. а) Бис нени билип алдыс? б) База нени билип алар керек?

¹⁹ Агару Бичикле болзо, удабас јаан учурлу судур бӱдер — бу телекейдиҥ башчылары: «Амыр, кайдаҥ да јеткер јок!» — деп, јар айдар. Бис Иегова Кудайыстыҥ болужыла, албатылар качан да бузылбайтан амыр-энчӱ тургузып болбос деп, билип алганыс. Је бу јар айдылгалакта ла кенетийин јоголтылыш келгелекте, биске нени эдер керек? Иегова бисти Каандык керегинде јарды эрчимдӱ јарлазын ла јаҥы ӱренчиктерди оноҥ ло ары бедирезин деп кӱӱнзейт. Анайда ок тӧгӱн кудай јаҥдарла бисте бир де колбу болбос учурлу. Бу дегежин, Улу Вавилонныҥ организацияларынаҥ чыгарын ла бистиҥ ижис тӧгӱн кудай јаҥла колбулу эмес деп, бӱдӱмјилӱ болорын темдектейт.

²⁰ Је «калганчы кӱндердиҥ» калганчы кӱндеринде мынаҥ да ӧскӧ немелер болор. Оныҥ учун Иегова бистеҥ кандый да алтамдар эдерин сакыыр. Бу кандый алтамдар? Кандый немелер болор? Удабас болотон айалгага белетенип аларга, биске нени эдер керек? Бу сурактар келер јӧрмӧлдӧ шӱӱжилер.