1. Ang’o m’ubenyutho nia andha wabekwo i nindo mi kajikceng’?

KAN inyoliri i ng’ei oro 1914, ng’ei nia junyoli man i kwo peri zoo ikwo i kajikceng’ mi ng’om maeni. (2 Tim. 3:1) Wan ceke wadaru winjo kite ma lembe ma Yesu ular uyero pi rundi maeni ubepong’o ko. Lembene uketho i ie lwiny, ndru, digidi, thong’om, camuco m’umedere, man ragedo ma jubenyayu i kum dhanu pa Yehova. (Mat. 24:3, 7-9, 12; Lk. 21:10-12) Wabeneno bende nia kura mi dhanu utie tap calu ma jakwenda Paulo ular uyero. (Nen sanduku ma thiwie tie “ Kura mi dhanu i nindo ma tin eni.”) Wa Jumulembe pa Yehova wang’eyo nia andha ajiki mi ng’om maeni dong’ ni ceng’ini magwei.​—Mik. 4:1.

2. Wacikara niwang’u dwokowang’ penji ma kani?

² Calu nindo udaru kadhu lee niai i oro 1914, tin dong’ wabekwo i dong nindo mi ‘kajikceng’.’ Pieno kwayu wanwang’ dwokowang’ penji ma e ma pigi tek: Lembang’o ma bitimere i ajiki mi ‘kajikceng’’? Man Yehova ubemito watim ang’o kinde ma wabekuro lembe maeno?

3. Nimakere ku lembila ma nwang’ere i 1 Jutesaloniki 5:1-3, judong ng’om gibiyero wec ma kani?

³ Som 1 Jutesaloniki 5:1-3. ‘Ceng’ pa Yehova’ ma Paulo uweco pire i giragora maeni, unyutho nindo ma bicaku ku nyoth mi “Babeli ma dit” ma tie dini ceke mi ndra, man ma bithum ku lwiny mir Armagedon. (Nyu. 16:14, 16; 17:5) I wang’ “ceng’” maeno, judong ng’om gibiyero nia gidaru ketho “kwiocwiny ku bedomoth” iwi ng’om! Wang’ ma  pol, gibed gitio ku wec ma kumeno kinde ma gibeyiko winjiri m’i kind ng’om ma tung’ tung’. * Ento wec ma nia “kwiocwiny ku bedomoth” ma Biblia uweco pire bikoc ku maeno. Pirang’o? Pilembe kinde ma gibiyero wec maeno, dhanu ma dupa biparu nia judong ng’om gidaru ketho kwiocwiny i ng’om. Ento i andha, “masendi ma dit” bicaku man ‘nyoth bibino i wigi ndhu ndhu nica.’​—Mat. 24:21.

4. (a) Lembang’o ma wang’eyo ngo i kum wec ma nia “kwiocwiny ku bedomoth”? (b) Lembang’o ma wang’eyo i kum wec maeno?

⁴ Wang’eyo lembe moko iwi wec ma nia “kwiocwiny ku bedomoth” ma biwok. Ento lembe moko nuti ma wang’eyo ngo. Wang’eyo ngo nia ang’o ma bicwalu judong ng’om niyero wec maeno, man ayi ma gibiyere ko. Bende wang’eyo ngo ka nyo gibiyere wang’ acel kende kunoke gibiyere wang’ dupa. Re kadok lembene biwotho nenedi de, wang’eyo nia bimobim mi dhanu copo kelo ngo kwiocwiny. Pieno wabiweko ngo wec ma gibiyerone uwing wiwa, kum eno tie tap lembe ma Biblia uyero nia wakur. Man kinde ma gibiyero wecne, eno binyutho nia ‘ceng’ pa Yehova’ ubecicaku!

5. Nimakere ku 1 Jutesaloniki 5:4-6 ukwayu watim ang’o kara wabed ayika pi ‘ceng’ pa Yehova’?

⁵ Som 1 Jutesaloniki 5:4-6. Lembe ma jakwenda Paulo uyero i giragora maeni ubekonyowa ning’eyo gin m’ukwayu watim kara wabed ayika pi ‘ceng’ pa Yehova.’ Mi kwong’o, eyero nia “ku wanindu, calu dong dhanu” mange. Mir ario, ukwayu “wakur wabed nger de.” Ku lapor, umito wabed ku wang’wa kara kud wamond nyanok de i lembe moko ci m’uneno gamba mi ng’om maeni. Ka wabedo ngo ku wang’wa, wabipoi nia karaman wadaru mondo i lembgamba mi ng’om maeni. (Yoh. 15:19) Wang’eyo nia Ker pa Mungu kende re ma bikelo kwiocwiny iwi ng’om ngung’.

6. Wabemito wakony dhanu gitim lembang’o, man pirang’o?

⁶ I andha, wabetimo kero mwa ceke nikio, man wabemito wakony dhanu mange de ging’ei nia lembe ma tin ubetimere ubepong’o lembila mi Biblia. Wabeii nikonyogi tin eni kum wang’eyo nia saa ma masendi ma dit bicaku, gibibedo mbe ku kare mi caku timo ni Yehova. Pieno, pire tie tek lee dit nia wakony dhanu ma fodi nyathi saa moko nuti eni! *

7. Yehova ubekwayu watim ang’o tin?

⁷ I nyathi dong saa m’udong’ i wang’ ma nindo pa Yehova ucaki, ebekwayu nia wamedara ku tic mi rweyo lembanyong’a. Dong’ pire tie tek nia ‘wasagara thiri thiri  i tic pa Rwoth.’ (1 Kor. 15:58) Yesu ular uyero pi tic mi lembanyong’a ma wabetimo tin. Kinde m’ebino kwanu lembe ma dongo dongo ma bitimere i nindo mi kajikceng’, emedo kumae: “Lembanyong’a ma juboth ko jubikolar yero be ni thek ceke.” (Mk. 13:4, 8, 10; Mat. 24:14) Ng’ei nia saa ceke m’iberweyo lembanyong’a, gin m’ibetimo ubepong’o lembila maeno!

8. Ang’o m’unyutho nia tic mi lembanyong’a ubemedere i wang’e?

⁸ Tic mi rweyo lembanyong’a mi Ker ubemedere i wang’e nenedi? Kubang’ oro, dhanu ma dupa ubewinjo lembanyong’a mi Ker. Ku lapor, kepar pir ayi ma wend jurwei lembanyong’a ubemedere ko iwi ng’om zoo i nindo maeni mi kajikceng’. I oro 1914, wend jurwei ubino 5 155 i ng’om 43. Ento tin wendgi tie milioni 8 ku nusu, man giberweyo lembanyong’a i ng’om ma tung’ tung’ 240! Re, tic mwane fodi ujik ungo. Ukwayu wamedara ninyutho ni dhanu nia Ker pa Mungu kende re ma bidaru peko ceke ma wanwang’ara ko tin.​—Zab. 145:11-13.

9. Pirang’o ukwayu wamedara asu nirweyo lembanyong’a mi Ker?

⁹ Tic mwa mi rweyo lembanyong’a mi Ker bimedere nitundo ma Yehova biyero en gire nia eromo. Nindo udong’ rukani ni dhanu kara gitund ning’eyo Yehova man Yesu Kristu? (Yoh. 17:3) Wang’eyo ngo. Gin ma wang’eyo tie nia nitundo ma masendi ma dit ucaki, ng’atu moko ci ‘m’adundene bedo ayika pi kwo ma rondo ku rondo’ bijolo lembanyong’a man ebing’io nitimo ni Yehova. (Tic. 13:48) Dong’ wacopo timo ang’o pi nikonyo dhanu maeno ma fodi nyathi saa moko nuti e?

10. Yehova ubekonyowa nenedi kara waponj dhanu ku lemandha?

¹⁰ Yehova ubetio ku dilo pare pi nimio iwa gin ceke ma watie ku yenyne kara waponj dhanu ku lemandha. Ku lapor, i coko m’i kind yenga wabed waponjo bodho ma tung’ tung’. Coko maeno konyowa ning’eyo lembe ma waromo yero i rombo ma kwong’a man kinde ma wadok liewo dhanu. Bende ekonyowa kara wanwang’ bodho mi telo wi ponji mi Biblia. M’umedo maeno, dilo pa Yehova umio iwa jamtic ma tung’ tung’ ma nwang’ere i Sanduku mi jamtic mi ponjo Biblia ku dhanu. Jamtic maeno konyowa . . .

• nicaku wec ku dhanu,

• nitelo nen migi,

•   niketho gibed kud ava mi ponjo lembe lee,

• nitelo wi ponji mi Biblia, man

• nikwayu ju m’ufoyo gimond i kusika mwa mir Internet man gibin i coko mwa.

I andha nibedo ku jamtic maeno kende uromo ngo. Mito watii kugi. * Ku lapor, ka waweko trakt kunoke gazeti ni ng’atu moko m’ufoyo ku lembanyong’a, ecopo dosome en gire nitundo ma wabidoliewe kendo. Dong’ kwayu wabed wamiyara wan giwa i tic mi rweyo lembanyong’a kubang’ dwi.

11. Pirang’o jucaku the Ponji mi Biblia nikadhu kud i Internet?

¹¹ Wakenen lembe mange m’ubenyutho nia Yehova ubemito ekony dhanu giponj lemandha. Dilo pare uwodho Ponji mi Biblia nikadhu kud i Internet i jw.org^®. Pirang’o jucaku the ponji maeni? Pilembe kubang’ dwi, dhanu dupa i wang’ ng’om zoo gibed gisayu niponjo Biblia nikadhu kud i Internet. Ponji ma nwang’ere i kusika mwa mir Internet romo konyo dhanu maeno kara gicak ponjo lemandha mi Biblia. Bende, dhanu moko ma waweco kugi gicopo yio ngo nia waponj kugi Biblia. Ka kumeno, icopo nyutho ire pi Ponji maeno ma nwang’ere i kusika mwa mir Internet kunoke icopo nyutho ire kaka m’ecopo nwang’ugi i ie. *

12. Ponji mi Biblia nikadhu kud i Internet copo ketho ng’atini nyang’ i lembang’o?

¹² Ponji mwa mi Biblia nikadhu kud i Internet utie ku kit thiwiwec ma e: “Won Biblia tie ng’a?,” “Dhanu ma Biblia uweco pigi,” man “Biblia umio iwa genogen.” Kinde ma ng’atini ubeponjo thiwiwec maenogi, ebinyang’ i penji ma e:

• Biblia copo konyo ng’atini nenedi?

• Yehova tie ng’a, Yesu tie ng’a, man jumalaika gitie jukani?

• Pirang’o Mungu ucwiyo dhanu?

• Pirang’o masendi man lembe ma reco upong’ i ng’om?

Ponjine ukoro bende kite ma Yehova . . .

• bidaru ko masendi man tho,

• kite m’ebicero ko ju m’utho, man

• kite m’ebiwilo ko bimobim mi dhanu ku Ker pare.

13. Nyo Ponji mi Biblia kud i Internet uwilo program mi ponjo Biblia ku dhanu? Kekor.

¹³ Ponji mi Biblia nikadhu kud i Internet uwilo ngo program mi ponjo Biblia ku dhanu. Yesu umio iwa tic mi ketho dhanu udok julub. Juyiko ponji maeno i ayi ma copo ketho ju m’umito ponjo lembe i Internet gimare man gibed kud ava mi ponjo lembe lee. Pieno, saa moko giromo yio ponji mi Biblia. I thum mi ponjiman, junyutho ni ng’atu m’usome nia ekwai Jamulembe moko uponj kude Biblia. Kubang’ nindo, dhanu ma kadhu 230 i wang’ ng’om zoo gitio ku kusika mwa mir Internet pi nikwayu juponj kugi Biblia. Niponjo Biblia ku ng’atuman acel acel utie lembe ma pire tek lee.

14. Nimakere ku telowic pa Yesu ma nwang’ere i Matayo 28:19, 20, ukwayu waii nitimo ang’o, man ke pirang’o?

¹⁴ Som Matayo 28:19, 20. Kinde ma wabetelo wi ponji mi Biblia, ukwayu watim kero ‘waketh dhanu udok julub . . . waponjgi giwor gin ceke ma Yesu ung’olo.’ Bende, ukwayu watim kero wakonygi ginyang’ nia pire tie tek lee ya gimar Yehova  man gitim ire. Eno uketho i ie nikonyo dhanu kara gimar lemandha man giketh gin ma gibeponjone i timo, githier kwo migi ni Yehova, man gilim batizo. Ka gitimo kumeno re ma gibiboth i ceng’ pa Yehova.​—1 Pet. 3:21.

15. Ukwayu ngo wanyoth saa mwa nitimo ang’o, man ke pirang’o?

¹⁵ Calu ma waneno i acaki mi ponji maeni, saa udong’ nyanok magwei i wang’ ajiki mi ng’om maeni. Pieno, kwayu ngo wanyoth saa mwa niponjo Biblia ku dhanu m’ubemaru ngo nidoko julub pa Kristu. (1 Kor. 9:26) Saa udong’ nyanok magwei! Ento dhanu fodi utie lee ma copo winjo rwonglembe mi Ker i wang’ m’ajikine utundi.

16. Nimakere ku Lembanyutha 18:2, 4, 5, 8, ukwayu wan ceke watim ang’o? (Nen bende korolembe mi there.)

¹⁶ Som Lembanyutha 18:2, 4, 5, 8. Giragora maeni unyutho lembe mange ma Yehova ubekwayu i bang’ jurutic pare. Jukristu mandha gicikiri nikoc bor dit ku Babeli ma dit. I wang’ ma ng’atu moko ucak niponjo lemandha, saa moko nyo ebino i dini moko mi ndra. Copere nia ebed edikere i lembe ma tung’ tung’ mi dinine. Bende nyo ebed ekonyo dinine ku jamcinge. Pieno, i wang’ niyiyo nia ng’atu m’uponjo Biblia udok jarwei ma fodi ulimo ngo, ukwayu ewek dini mi ndra cen. Ecikere nikiewo ni judongo mi dini m’ebino i ie nia edaru wok kud i kindgi; kunoke kwayu ewek nidikere kugi magwei man ewok kud i dikiri moko ci m’utie ku winjiri ku Babeli ma dit. *

17. Jakristu ucikere nitimo ngo kit tic ma kani, man ke pirang’o?

¹⁷ Jakristu mandha ucikere nineno nia tic mi kum m’ebetimo umbe ku winjiri nyanok de ku dini mi ndra. (2 Kor. 6:14-17) Ku lapor, ecopo timo ngo tic mi dini moko ci mi ndra. Jakristu m’ubetimo tic i bang’ ng’atu mange kunoke i sosiete moko biyio ngo etim tic mi yiko udi mi dini mi ndra. Bende kan ebetelo wi tic pare gire, ecopo yio ngo nitimo tic moko ci mi dini mi ndra. Pirang’o wamaku yub ma ie tek kumeno? Pilembe wabemito ngo wadikara i timo moko ci mi dini m’ucido i wang’ Mungu.​—Isa. 52:11.

18. Umego moko m’ubino timo tic pare gire unyutho nenedi nia emoko i kum cik mir ukungu mi Biblia?

¹⁸ Oro ma dupa udaru kadhu, jugam jukwayu  umego moko m’ubino telo wi tic pare gire nia ecidh etim tic moko ma nok i kanisa moko i adhura m’ebino kwo i ie. Kadok ng’atu m’ubino kwaye ung’eyo cuu nia umego eno beyio ngo etim tic mi kanisa de, re ebino asu pilembe enwang’u ngo ng’atu mange ma copo timo tije. Umego maeno umoko asu i kum cik mi Biblia, man ekwero tic maeno. I yengane m’ulubo, gazeti ma bewok i ng’ombuca unyutho fotho pa jagobau moko m’ubejengo musalaba iwi otkanisane. Ka nwang’u umego mwa eno uyio tic eca, nwang’u fotho pare re m’uwok iwi gazeti maeno. Kepar pir ayi ma nwang’u lembe maeno copo cido ko nyinge i kind Jukristu wadi! Kepar bende pi kite ma nwang’u Yehova romo winjere ko.

19-20. (a) Waponjo lembang’o i thiwiwec maeni? (b) Ukwayu wanyang’ bende cuu i lembang’o?

¹⁹ Biblia unyutho nia lembila ma pire tek ma bipong’o ceng’ini eni, utie wec ma nia “kwiocwiny ku bedomoth” ma judong ng’om gibiyero. Calu Yehova ular unyutho iwa lembe maeno, wang’eyo nia dhanu copo kelo ngo kwiocwiny mandha man ma rio iwi ng’om. I wang’ ma lembe maeno utimere man nyoth ma rek uwok iwi dhanu, ukwayu watim ang’o? Yehova ubekwayuwa nia wamedara ku rweyo lembanyong’a mi Ker kud amora man watim kero niketho dhanu udok julub. Bende, wacikara nikoc bor dit ku dini ceke mi ndra. Eno ubenyutho bende nia kwayu ngo wadikara ku Babeli ma dit man kwayu ngo watim tic moko ci m’utie ku winjiri kude.

²⁰ Lembe mange de tie ma bilar timere i wang’ ajiki mi kajikceng’. Pi lembuno de, Yehova ubekwayu watim lembe moko. Gitie lembang’o, man wacopo yikara nenedi pi lembe moko ci ma bitimere ceng’ini eni? Wabidwoko wang’ penji maeno i thiwiwec m’ulubo.