1. ¿Chumngelu (chemu) kimnieiñ taiñ mongelen afaelchi antü mew?

EPE kom iñchiñ choyüngeiñ dew ñi rupan 1914 tripantu, feymu kom taiñ mongen mu mülerkeiñ afaelchi antü mew (2 Tim. 3:⁠1). Kom iñchiñ allkükeiñ ñi femtripameken Jesus ñi feypikünuel tañi müleal weychan (awkan), fütrake ngüñün, nüyün, fütrake kutran, ñi doy wedañmawün pu che, ñi doy kayñetungeken Ngünechen ñi pu che, ka kakelu femngechi dungu (Mat. 24:⁠3, 7-9, 12; Luka 21:⁠10-12). Kafey pekeiñ ñi femtripameken ti apostol Pablo ñi feypin tañi chumngeal tati pu che (inaduamnge ti wichulechi dungu “ Ñi chumngen pu che famülke mu”). Feymu iñchiñ, Chaw Ngünechen tañi pu che ngen, kimnieiñ taiñ mongelen “pichilewechi antü mew” (Miq. 4:⁠1).

2. ¿Chem epu dungu duamnieiñ taiñ kimal?

² Rume fentren tripantu rupawyey 1914 tripantu mu, fey pichilewepelay ñi afal ta antü. Feley llemay, pichilewey ñi apümkangeal kom wedake dungu. Feymu duamnieiñ taiñ kimal chem dungu rupayay epe puwkülele ñi afal ta antü ka chem ayükey Jewba taiñ femal petu ñi puwnon feychi antü.

3. Ñi feypin 1 Tesalonisense 5:⁠2, 3, ¿chem dungu feypiay Mapu mew müleyechi pu longkolelu?

³ Biblia feypi: “Eymün fente küme kimnieymün Jewba ñi antü küpaley kiñe weñefe reke akualu ta pun mew. Tati pu che feypiay: ‘Kom kümelkaley. Ngelay chem dungu rume’. Feychi mu müten apümkarumengeay engün, chumngechi aku kutranrumelu kiñe püñeñachi domo. Tüfa engün pepi montulayay  rume” (1 Tesalonisense 5:⁠2, 3, TNM). Tüfachi texto mew Pablo feypi “Jewba ñi antü”, tüfa konay apümkangele tati koylake religion ka fentepuway Armagedon pingechi weychan mew (Apok. 16:⁠14, 16; 17:⁠5). Epe puwkülele ñi akual “Jewba ñi antü”, Mapu mew müleyechi pu longkolelu feypiay: “Kom kümelkaley. Ngelay chem dungu rume”. Tati pu gobierno kiñeke mew feypikey femngechi dungu ayünieel engün ñi norümal kiñewün kidu engün ñi dungu. * Welu Biblia feypin mu tüfachi dungu kalekey ñi feypiken tüfa engün famülke mu. ¿Chumngelu? Feypingele feychi dungu, pu che trokiway ñi trürümuwün kom Mapu mew ñi dungu tati pu gobierno, femngechi ñi doy küme duamküleal mongen mu. Welu “feychi mu müten apümkarumengeay engün” (Mat. 24:⁠21).

4. 1) ¿Chem dungu ñi rupayal kimlaiñ? 2) Welu, ¿chem dungu kimtukunieiñ?

⁴ Kimlaiñ chumngelu feypingeay: “Kom kümelkaley. Ngelay chem dungu rume”, ka kimlaiñ chumngechi femngeay tüfa. Kafey petu kimlaiñ tunten rupa feypingeay. Chumngechi rupafule rume tüfachi dungu, kimnieiñ pu gobierno ñi femürpunoal tüfachi dungu, fey eluwlayaiñ taiñ ngünenkanoaetew engün. Fey llemay, küme kimnieiñ feypingele “kom kümelkaley. Ngelay chem dungu rume”, femtriparpuay Biblia ñi feypikünuel ñi akual “Jewba tañi antü”.

5. Ñi feypilen 1 Tesalonisense 5:⁠6, ¿chumngechi kellukeeiñmu taiñ pepikawküleal akule “Jewba tañi antü”?

⁵ Biblia feypi: “Feymu umawkülelayaiñ kakelu che reke, doy may nepeluwküleaiñ [trepeluwküleaiñ] taiñ kimkonküleal” (1 Tesalonisense 5:⁠6, TNM). Pablo ngülamtueiñmu chumngechi taiñ pepikawküleal akule “Jewba tañi antü”. Ngelay taiñ umawküleal chumngechi ñi femken kakelu che. Doy may trepeleaiñ ka kimkonküleaiñ taiñ ngüneduamal chem ñi rupameken. ¿Chumngechi femafuiñ tüfa? Kiñe dungu, kimkonküleaiñ fente ñi kuñiwün-ngen koneltuleal politiko dungu mew. Femngechi femfuliyiñ, reyükonküleafuiñ “tüfachi Mapu tuwün pu che mew” (Juan 15:⁠19, TNM). Kimnieiñ Chaw Ngünechen tañi Ngünenien müten küme elkünutuay ti Mapu ñi rüf kümelkaleal kom che.

6. ¿Chem duamfali taiñ femal? Ka, ¿chem longkontukuaiñ?

⁶ Taiñ mongen mew müley taiñ nepeluwküleal, welu kafey duamfali taiñ nepelafiel reke ta kakelu che. Femngechi ñi kimal engün Biblia tañi feypikünuel ñi rupayal Mapu mew. Longkontukuaiñ: akule ti fütra kutrankawün, feychi mu pu che pepi fülkonlayay Jewba mu. Feymu rume duamfali taiñ amuldungucheal. *

7. Jewba, ¿chem ayükey taiñ femal famülke mu?

⁷ Jewba ayükey taiñ rumel amuldungumekeal tüfachi pichilewechi antü mew. Müley taiñ ngüneduamuwal ñi küme küdawelniefiel ta Jewba kake antü mew (1 Kor. 15:⁠58). Jesus nütramkalu fillke dungu ñi ruparkeafel afaelchi antü mu, feypi chem femmekeafuyngün Jewba tañi pu che, piam: “Petu ñi puwnon ñi afael ta antü, tati montun werkün dungu feley tañi kimelngeael ta kom chüf mapu mew” (Mar. 13:⁠4, 8, 10; Mat. 24:⁠14). Longkontukunge tüfa: fill rupa amuldungun mu iñchiñ koneltuleiñ ñi wechutripameken Jesus tañi feypikünuel.

8. ¿Chem pengeli ñi doy alün-ngerpun pu amuldungukelu?

⁸ Fill tripantu, doy fentren che allkütukey Ngünechen tañi kümeke dungu. Ngüneduamnge chumngechi ñi doy alün-ngerpun pu amuldungukelu Chaw Ngünechen ñi kümeke dungu afaelchi antü mew. 1914 tripantu mu, mülefuy 5.155 amuldungukelu 43 trokiñ mapu mew. Welu famülke mu, müley doy 8.500.000 amuldungukelu 240 trokiñ mapu mew. Welu fentepuwlay taiñ küdaw, amuleaiñ taiñ amuldungucheken Chaw Ngünechen tañi Ngünenien müten rüf kümelkayafuy tati pu che (Sal. 145:⁠11-13).

9. ¿Chumngelu fentekünukelaiñ taiñ amuldungual?

⁹ Amuldungucheaiñ “fantepuwpe” feypile wüla Jewba. ¿Tuntelewey pu che ñi kimürpuafiel ta Jewba ka Jesukristo? (Juan 17:⁠3). Kimlaiñ. Welu kimnieiñ may petu ñi akunon ti fütra kutrankawün kom pu che “eluwlu ñi rumel mongeleal” allkütuafuy Chaw Ngünechen ñi kümeke dungu, fey ñi poyeafiel (Hecho 13:⁠48, TNM). ¿Chumngechi kelluafuiñ pu che petu elungele ñi montual engün?

10. ¿Chem kellu elueiñmu Jewba taiñ kimeltucheal?

¹⁰ Jewba tañi adkünuelchi trokiñche kimeltukeeiñmu chumngechi amuldungucheal tati kümeke dungu. ¿Chumngechi kimeltungekeiñ? Fill semana femngekey ti trawün Taiñ Mongen ka Taiñ Amuldungukeel. Tüfachi trawün mew kimeltungekeiñ chumngechi wüne nütramkayafiel ta che, chumngechi wiñopemetuafiel ka chumngechi chillkatulelafiel Biblia. Kafey Jewba tañi trokiñche elueiñmu fillke kellu taiñ kimeltucheal. ¿Chem femkeiñ tüfachi fillke kellun mu?

•   Doy küme entukeiñ nütram we nütramkafiel mu ta che.

• Doy ayüfali taiñ nütramkan.

• Kellukefiyiñ pu che ñi doy küpa kimal Biblia mu.

• Kimeltulelkefiyiñ tati rüf dungu pu chillkatukelu Biblia.

• Feypikefiyiñ pu che ñi konal jw.org^® mu ka ñi amual taiñ trawün mu.

Welu re nielayafiyiñ müten tüfachi fillke papel ka video, kafey müley taiñ eluafiel ta che ka pengelelafiel. * Rakiduamaiñ, küme nütramkafiliyiñ kiñe che ayülu tañi doy kimal, eluafuiñ kiñe pichi papel kam kiñe chillka, femngechi ñi papeltual tati che petu taiñ wiñopemetunofiel. Kiduke iñchiñ müley taiñ amuldungual tunte taiñ pepi femkeel fill küyen.

11. ¿Chumngelu pepikangey ti trokiñ Chillkatuaymi Biblia internet mew pingelu?

¹¹ Chaw Jewba, ¿chumngechi ka kellukefi tati pu che ñi kimürpual tati rüf dungu? Taiñ pagina internet mu müley kiñe trokiñ, Chillkatuaymi Biblia internet mew pingey. * ¿Chumngelu pepikangey feytachi trokiñ? Wall Mapu püle, fentren che fill küyen kintukey internet mu ñi chillkatual tati Biblia. Pefile engün tüfachi kellu jw.org mu, eluwafuyngün ñi kimürpuafiel ta Biblia. Kafey, kiñeke che taiñ nütramkakefiel ayülayafuy taiñ chillkatulelafiel Biblia. Femngechi dungu rupale, pengelelafiyiñ tüfachi pu che feychi trokiñ internet mu ka werkülelafuiñ engün chumngechi ñi konal kiñe kewün dungu mu ñi kimnieel.

12. Pu che, ¿chem kimürpuafuy ti trokiñ ñi chillkatuafiel Biblia internet mu?

¹² Tüfachi trokiñ ñi chillkatual Biblia internet mu ngüneduamkey Biblia ñi dungu, iney tañi dewmaetew, pu che doy nütramkangelu Biblia mu ka ti maneluwün Biblia mew mülelu. Pu che, ¿chem kimürpuay tüfachi trokiñ mu?

• Chumngechi kellukeeiñmu Biblia.

• Iney am ta Jewba, Jesus ka pu kümeke püllü.

• Chumngelu Chaw Ngünechen dewmafi tati pu che.

• Chumngelu müley ta kutrankawün ka wedake dungu.

¿Ka chem kimeltukey ti trokiñ mülelu jw.org?

• Chumngechi apümafi Jewba ti kutrankawün ka lan dungu.

• Chumngechi wiñomongeltuafi Jewba tati pu layelu.

• Chumngechi elkünuay Jewba tañi Ngünenien, fey ñi apümkayafiel pu che ñi gobierno, tüfa am rüf kelluchekenolu.

13. Küme kimfalkünunge, kiñe che chillkatule internet mu, ¿duamniepey may ñi pemeaetew kiñe amuldungukelu?

¹³ Kiñe che chillkatule rume ti Biblia tüfachi trokiñ mu internet mew mülelu ka duamniey kiñe amuldungukelu ñi chillkatulelaetew ti Biblia. Jesus elueiñmu tüfachi falin küdaw, kimeltuafiel pu che ñi discipulo ngerpual. Ayünieiñ pu che ñi ngüneduamal ti trokiñ ñi chillkatual Biblia mülelu internet mu, fey ñi falintual ñi ngüneduamün ka ñi doy küpa kimal Biblia mew. Femngechi femfule tati che, ayüafuy chi ñi chillkatulelaetew ti Biblia kiñe amuldungukelu. Afchi fillke chillkatun ñi ngüneduampeel tati che, fey mangelngekey ñi feypial tañi pemeaetew kiñe che tañi doy küme kimelelaetew. Fill antü doy 230 che wall Mapu püle tuwlu wirintukuy taiñ pagina internet mew ñi pemeaetew kiñe amuldungukelu, fey ñi chillkatual Biblia. Rume duamfali pu che ñi kiduke kimeltulelngeal tati Biblia.

14. Jesus ñi feypin Matew 28:⁠19, 20 mu, ¿chem femaiñ chillkatulelfiliyiñ pu che? Ka, ¿chumngelu am?

¹⁴ (Papeltunge Matew 28:⁠19, 20). Chillkatulelfiliyiñ tati pu che, küme kimeltuafiyiñ kom ñi werküel ta Jesus, femngechi tañi discipulo ngerpual engün. Kimeltulelafiyiñ pu che fente ñi falin-ngen kidu engün ñi poyeafiel ta Jewba. Feymu yafültukuafiyiñ ta che ñi inanieal tañi mongen mu kom ñi kimürpuel Biblia mu ka ñi wültukual tañi mongen Jewba mu, fey ñi fautisawal. ¿Chumngelu am? Femngechi femfule engün müten, montuafuyngün akule Jewba tañi antü (1 Ped. 3:⁠21).

15. ¿Chem ngünam dungu femlayaiñ? Ka, ¿chumngelu?

¹⁵ Dew ngüneduampeiñ ñi pichilewen tañi afal kom ñi ngünenieel tati Weküfü. Feymu ngünamkalayaiñ taiñ küdaw, fey pu che pinole ñi poyeafiel ta Jewba, fentekünuaiñ ñi chillkatulelafiel feyti pu che (1 Kor. 9:⁠26). Epe puwkülelu am ñi afal ta antü, fentren che duamtuniey ñi allkütual Ngünechen tañi werkün dungu, feymu rume duamfali kimeltulelafiel engün.

16. Apokalipsi 18:⁠2, 4, 5, 8 ñi feypilen mu, ¿chem müley taiñ femal kom iñchiñ? (Inaduamnge ti kimal dungu).

¹⁶ (Papeltunge Apokalipsi 18:⁠2, 4, 5, 8). Tüfachi pu versiculo pengeli ka dungu ayünielu Jewba taiñ femal. Iñchiñ pu rüf cristiano ngen müley taiñ famtripaleal tati koylake religion mu. Rakiduamnge tüfa, kiñeke che koneltulefuy koylake religion mu petu ñi kimürpunofiel ti rüf dungu. Amukefuy iglesia mu ka wülkefuy plata ñi kullial tañi femngekeel fillke dungu. Tüfachi pu che müley ñi koneltuwenoal tati koylake religion mu, femngechi ñi elungeal tañi amuldungual ti trawünche mew. Müley ñi wirintukual kiñe carta mu ñi koneltuwenon feychi religion mu kam kakelu trokiñche nüwkülelu tati koylake religion mu. *

17. Iñchiñ pu cristiano ngen, ¿chem küdaw famentuafiyiñ? Ka, ¿chumngelu?

¹⁷ Iñchiñ tati pu rüf cristiano ngen müley taiñ küme dullial taiñ küdaw, fey ñi koneltulenoal pichin no rume koylake religion mu (2 Kor. 6:⁠14-17). Eluwlayaiñ taiñ rumel küdawküleal tati iglesia mu. Kafey küdawelfiliyiñ kiñe empresa ñi küdawal gasfiteria, electricidad kam kakelu küdaw, fey alüñma küdawmelayaiñ kiñe iglesia mu. Kam ngen küdaw ngeliyiñ, eluwlayaiñ taiñ ingkatuaetew ti koylake religion ka feypilayafiyiñ rume taiñ eluaetew küdaw. ¿Chumngelu femngechi femaiñ? Iñchiñ ayünielaiñ taiñ kelluntukual ti koylake religion ñi kimeltun ka ñi culpan dungu mu, tüfa am  podküley reke ñi culpan mew Ngünechen ñi adkiñ mu (Is. 52:⁠11). *

18. Kiñe peñi ingkatungelu ñi küdawal kiñe iglesia mu, ¿chumi?

¹⁸ Ngüneduamaiñ ñi rupan kuyfi mu kiñe peñi longkolelu trawünche mew. Kidu ngen-ngefuy tañi küdaw mew ka adümkefuy carpinteria küdaw, fey kiñe wentru ingkatueyew ñi pichi küdawmeal kiñe iglesia mu tañi waria mew mülelu. Ti wentru kimniefuy taiñ peñi ñi feypikeel ñi küdawnoal chem iglesia mew no rume. Welu ti wentru rume duamniefuy kiñe che ñi femürpual ti küdaw. Feyngelu rume, taiñ peñi inafi Biblia ñi ngülam ka famentufi ti küdaw. Kiñe semana rupalu, ti diario mu tripay kiñe adentun, fey pengeli kangelu wentru ñi tukumekefiel kiñe cruz ti iglesia mew. Taiñ peñi llowfule ti küdaw, tripayafuy diario mu. Femngechi dungu rupafule, yamngewelayafuy trawünche mu ka rume weñangkülafuy ta Jewba.

19, 20. 1) ¿Chem kimürpuiñ tüfachi chillkatun mu? 2) ¿Chem ngüneduamaiñ küpalechi chillkatun mu?

¹⁹ Chumngechi ñi kimeltukeel Biblia, epe puwküley ñi feypingeal: “Kom kümelkaley. Ngelay chem dungu rume”. Welu Jewba kimeltukeeiñmu femngechi feypile Mapu mew müleyechi pu longkolelu re koyla müten tati. Welu petu ñi feypingenon tüfa ka ñi akunon tati fütra kutrankawün, ¿chem ayükey Jewba taiñ femal? Rumel amuldungumekeaiñ Chaw Ngünechen ñi kümeke dungu ka eluwaiñ taiñ kelluafiel doy fentren che Jesus ñi discipulo ngerpual. Kafey famtripaleaiñ koylake religion mu. Taiñ femürpual tüfa, koneltuwelayaiñ chem religioso trokiñche no rume ka famentuafiyiñ chem küdaw rume nüwkülelu koylake religion mu.

²⁰ Küpalechi chillkatun mew ngüneduamaiñ küla ramtun: ¿ka chem dungu rupayay tüfachi pichilewechi antü mew? Jewba, ¿ka chem ayükey taiñ femal? Ka, ¿chumafuiñ iñchiñ taiñ pepikawküleal?