1. Finshi fyalenga tushininkishe ukuti tuleikala mu “nshiku sha kulekelesha”?

NGA ca kuti mwafyelwe pa numa ya mwaka wa 1914, ninshi mwafyelwe mu “nshiku sha kulekelesha” isha cino calo. (2 Tim. 3:1) Bonse twalyumfwapo ifintu ifyo Yesu asobele ukuti fikalacitika muno nshiku. Pa fyo Yesu asobele paba inkondo, ifipowe, ifinkukuma, ifikuko, no kufulisha kwa bubi. Kabili asobele no kuti abantu ba kwa Yehova bakalabacusha. (Mat. 24:3, 7-9, 12; Luka 21:10-12) Na kabili twaliimwena imibele abantu bakwata iyo umutumwa Paulo asobele. (Moneni akabokoshi akaleti “ Ifyo Abantu Baba Muno Nshiku.”) Fwe bapepa Yehova, twalishininkisha ukuti tuleikala “mu nshiku sha ku mpela.”—Mika 4:1.

2. Mepusho nshi tulingile ukwasuka?

² Apo napapita imyaka iingi ukutula mu 1914, ninshi tuli ku mpela sana iya “nshiku sha kulekelesha.” Pa mulandu wa kuti impela naipalama sana, tufwile ukwishiba amasuko ya mepusho yamo ayacindama pamo nga: Finshi fikacitika pa mpela ya “nshiku sha kulekelesha”? Kabili finshi Yehova afwaya tulecita ilyo ifyo fintu fishilacitika?

3. Ukulingana no busesemo ubwaba pe lembo lya 1 Abena Tesalonika 5:1-3, finshi inko shikabilisha?

³ Belengeni 1 Abena Tesalonika 5:1-3. Pali ili ilembo Paulo alandile pa “bushiku bwa kwa Yehova.” Amashiwi ya kuti “ubushiku bwa kwa Yehova” pali ili ilembo yapilibula inshita ukutula ilyo bakasansa “Babiloni Mukalamba,” e kutila imipepele ya bufi yonse, ukushinta ilyo inkondo ya Armagedone ikatendeka. (Ukus. 16:14, 16; 17:5) Ilyo ubu “bushiku” bushilatendeka, inko  shikalabilisha ukuti kuli “Umutende no mutelelwe!” Inshita shimo intungulushi sha muli cino calo shilalanda amashiwi ayapalana na aya nga shilefwaya ukuti ifyalo fileumfwana. * Lelo uku te kubilisha kwa kuti kuli “mutende no mutelelwe” uko Baibolo yalandapo. Twaishiba shani? Ilyo intungulushi shikabilisha ukuti kuli “Umutende no mutelelwe!” abantu abengi bakamona kwati intungulushi sha calo nashilenga mu calo conse mwaba umutende, tamuli nangu cimo ica kutiinya. Lelo icishinka ca kuti, ilyo line e lyo “ubucushi ubukalamba” bukatendeka, pakakonke no “bonaushi bwa kupumikisha.”—Mat. 24:21.

4. (a) Finshi ifyo tushaishiba pa fyo bakabilisha ukuti kuli “umutende no mutelelwe”? (b) Finshi twaishiba kale pali ili lyashi?

⁴ Twalishibako fimo pa fyo bakabilisha ukuti kuli “umutende no mutelelwe.” Nomba kwaliba ifyo tushaishiba. Tatwaishiba ifikalenga intungulushi sha calo shikabilishe ukuti kuli “umutende no mutelelwe, kabili tatwaishiba ifyo shikacita pa kubilisha. Na kabili tatwaishiba nampo nga shikabilisha fye umuku umo nelyo shikabilisha imiku iingi. Nampo nga ifi twalandapo e fyo cikaba nelyo iyo, ico twaishiba ca kuti: Tatufwile ukubepwa no kutendeka ukutontonkanya ukuti intungulushi sha calo kuti shalenga mu calo conse mwaba umutende. Lelo tulingile ukwishiba ukuti e kubilisha uko Baibolo yatweba. E kukaba icishibilo ca kuti “ubushiku bwa kwa Yehova” buli mu kutendeka!

5. Bushe ifyo ilembo lya 1 Abena Tesalonika 5:4-6 lilanda filenga shani twaipekanya ilyo “ubushiku bwa kwa Yehova” bushilafika?

⁵ Belengeni 1 Abena Tesalonika 5:4-6. Pali ili ilembo Paulo alitweba ifyo tufwile ukucita pa kuti tuipekanye ilyo “ubushiku bwa kwa Yehova” bushilafika. Atweba ukuti tatulingile ‘ukulaala nga bantu bambi.’ Lelo tufwile ukuba ‘abalola kabili abatekanya.’ Ku ca kumwenako, tulingile ukuba abalola pa kuti tatuleitumpa mu fikansa fya calo. Nga tuleitumpa mu fikansa fya calo kuti twaba “aba muli ici calo.” (Yoh. 15:19) Twalishiba ukuti Bufumu bwa kwa Lesa fye e bukalenga mu calo conse mukabe umutende.

6. Tufwile ukwafwa abantu pa kuti bacite finshi, kabili mulandu nshi?

⁶ Tufwile ukutwalilila ukuba abalola, kabili tulingile ukwafwa abantu pa kuti nabo beshibe ifyo Baibolo yasobela ifikacitika mu calo conse. Tulingile ukulaibukisha ukuti ubucushi bukalamba nga bwatendeka, takwakabe inshita ya kubafwa pa kuti batampe ukubombela Yehova. E co tulingile ukubafwila ino ine nshita! *

7. Finshi Yehova afwaya tulecita?

⁷ Yehova afwaya tutwalilile ukuba abacincila lintu tulebila imbila nsuma ilyo “ubushiku”  bwakwe bushilafika. Tulingile ukuba “abacincila pe mu mulimo wa kwa Shikulu.” (1 Kor. 15:58) Yesu alisobele ifyo twali no kulacita. Ilyo alelanda pa fintu ifikalamba ifyali no kulacitika mu nshiku sha kulekelesha, alandile no kuti: “Imbila nsuma ili no kubilwa mu nko shonse.” (Marko 13:4, 8, 10; Mat. 24:14) Tontonkanyeni pali ici: Lyonse nga mwaya mu kubila imbila nsuma, ninshi na imwe mulelenga ubu busesemo bufikilishiwe.

8. Bushe umulimo wa kubila pa Bufumu walunduluka shani?

⁸ Cila mwaka uyu mulimo ulalundulukilako. Ku ca kumwenako, moneni ifyo bakasabankanya ba Bufumu bafula mu calo conse muli shino nshiku sha kulekelesha. Mu 1914, bakasankanya bali 5,155 mu fyalo 43. Pali lelo bakasabankanya balicila pa mamilioni 8.5 mu fyalo 240! Lelo nangu bafulile ifi, umulimo wesu wena taulapwa. Tufwile ukutwalilila ukusambilisha abantu ukuti Ubufumu bwa kwa Lesa e bukapwisha fye amafya ayo abantu bakwata.—Amalu. 145:11-13.

9. Mulandu nshi tulingile ukutwalilila fye ukubila pa Bufumu?

⁹ Tukatwalilila ukubila imbila nsuma mpaka Yehova akatile capwa. Bushe inshita iisheleko pa kuti abantu beshibe Yehova Lesa na Yesu Kristu inono nangu ikalamba? (Yoh. 17:3) Kwena tatwaishiba. Ico twaishiba ca kuti bonse ‘ababa no mutima uusuma uufwaya umweo wa muyayaya’ kuti bakutika imbila nsuma, basalapo no kulabombela Yehova ilyo ubucushi bukalamba bushilatendeka. (Imil. 13:48) Finshi tulingile ukulacita pa kuti twafwe abantu ilyo ubucushi bukalamba bushilatendeka?

10. Finshi Yehova atupeela pa kuti tulesambilisha abantu icine?

¹⁰ Yehova ukupitila mu cilonganino cakwe alatupeela fyonse ifyo tukabila pa kuti tulesambilisha abantu icine. Ku ca kumwenako, cila mulungu tulasambilila ifya kubila imbila nsuma ilyo tulelongana ukulongana kwa mu kati ka mulungu. Muli uku kulongana tulasambilila ifya kucita pa muku wa kubalilapo twalanda no muntu, ne fya kucita ilyo twabwelela ku muntu uo twabilileko imbila nsuma. Na kabili tulasambilila ne fya kucita pa kusambilisha umuntu Baibolo. Icilonganino ca kwa Yehova calipekanya na Impapulo Tubomfya Sana pa Kusambilisha Abantu. Ishi mpapulo shilalenga twaishiba . . .

• ifya kutendeka ukulanshanya na bantu,

• ifya kucita pa kuti abantu batemwe imbila nsuma,

•   ifya kucita pa kulenga abantu balefwaisha ukwishibilapo na fimbi,

• ifya kucita pa kusambilisha abantu Baibolo, na

• ifya kulanga abantu webusaiti yesu ne fya kubeta ku Mayanda ya Bufumu.

Kwena tatulingile ukukwata fye ishi mpapulo. Tufwile no kulashibomfya. * Ku ca kumwenako, nga mwalanshanya bwino no muntu uulefwaya ukusambilila Baibolo, mwamupeela na trakiti nelyo magazini, akabelengelapo na fimbi mpaka mukalanshanye nankwe na kabili. Bonse Yehova alitupeela umulimo wa kubila pa Bufumu. Kanshi tufwile ukuba abacincila ilyo tulebila imbila nsuma cila mweshi.

11. Mulandu nshi icilonganino ca kwa Yehova cabikila icipande pa jw.org icitila Online Bible Study Lessons?

¹¹ Kwaliba na cimbi ico Yehova apekanya pa kuti abantu basambilile icine. Icilonganino cakwe calibika icipande ca mu ciNgeleshi pa webusaiti yesu iya jw.org^®. icitila Online Bible Study Lessons. Mulandu nshi icilonganino cakwe cabikilako ici cipande? Cila mweshi abantu abengi nga nshi mwi sonde lyonse balaya pa Intaneti pa kuti basambililepo fimo pali Baibolo. Amasambililo ayaba pa webusaiti yesu kuti yalenga aba bantu baishiba fimo ifyaba mu Cebo ca kwa Lesa. Abantu bamo abo mubilako imbila nsuma nalimo balashimunuka ukusumina ukutendeka ukusambilila Baibolo. Nga ca kuti bamo balashimunuka, mulebalanga ici cipande pa webusaiti yesu nelyo mulebatumina linki iingabatwala kuli ici cipande. *

12. Finshi umuntu engeshiba nga alesambilila icipande icitila Online Bible Study Lessons?

¹² Mu cipande ca pa jw.org mwaba amasambililo pamo nga: “The Bible and Its Author,” (Nani Umwine wa Baibolo)“The Bible’s Main Characters,” (Abantu Abo Baibolo Yalandapo Sana) na “The Bible’s Message of Hope.” (Ubukombe bwa mu Baibolo Ubulenga Abantu Baba ne Subilo). Umuntu nga alesambilila aya masambililo, kuti aishiba:

• Ifyo Baibolo ingafwa umuntu

• Ifyo Yehova aba, ifyo Yesu aba, ne fyo bamalaika baba

• Ico Lesa abumbiile abantu

• Icalenga amacushi ne fyabipa fitwalilile ukubako

Na kabili ici cipande cilalanda pa fyo Yehova . . .

• akafumyapo amacushi ne mfwa,

• akabuusha abafwa, ne fyo

• akafumyapo amabuteko ya bantunse no kubikapo Ubufumu bwakwe.

13. Bushe umuntu nga asambilila amasambililo ayaba pa webusaiti yesu ninshi talingile ukukwata uwa kumusambilisha? Londololeni.

¹³ Amasambililo yaba muli ici icipande tayapyana isambililo lya Baibolo. Yesu alitupeela umulimo wa kupanga abasambi. Ico babikilako ici cipande ni pa kuti abalefwaya ukusambilila icine basambilileko fimo, batemwe ifyo balesambilila, kabili bafwaishe ukwishibilapo na fimbi. Nga bacita ifi, kuti basumina ukusambilila Baibolo. Pa mpela ya cila isambililo paliba apo uulebelenga engalemba nga alefwaya ukukwata uwa kumusambilisha Baibolo. Cila bushiku mwi sonde lyonse kulaba abantu ukucila pali 230 abalemba pa webusaiti yesu ukuti balefwaya uwa kubasambilisha Baibolo! Ala cilawama sana nga ca kuti uulefwaya ukusambilila Baibolo nakwata uulemusambilisha!

14. Ukulingana ne fyo Yesu alandile ifyaba pali Mateo 28:19, 20, cinshi ico tulingile ukulaesha na maka ukucita, kabili mulandu nshi?

¹⁴ Belengeni Mateo 28:19, 20. Ilyo tuletungulula amasambililo ya Baibolo, tuleesha  na maka ‘ukulenga abantu baba abasambi kabili tulebasambilisha ukulakonka fyonse ifyo [Yesu] alandile.’ Tulingile ukulenga abantu baishiba ico cacindamina ukusalapo ukubombela Yehova no kutungilila Ubufumu bwakwe. Ici cilepilibula ukuti tufwile ukukoselesha abantu ukulakonka ifyo balesambilila, kabili tulingile ukulabakoselesha ukuipeela kuli Yehova no kubatishiwa. Nga bacita ifi, kuti baisapusuka ubushiku bwa kwa Yehova.—1 Pet. 3:21.

15. Pa mulandu wa kuti inshita isheleko inono, cinshi tushilingile ukucita, kabili mulandu nshi?

¹⁵ Nga fintu tulandilepo kale, kushele fye inshita iinono ninshi impela ya calo ca kwa Satana yafika. Kanshi tatukwete inshita ya kutwalilila ukulasambilisha abantu Baibolo aba kuti tabalefwaya ukuba abasambi ba kwa Kristu. (1 Kor. 9:26) E ico tufwile ukwangufyanya ukubomba umulimo wesu! Kuli abantu abengi nga nshi abalingile ukumfwa imbila nsuma ya Bufumu ilyo inshita ishilapwa.

16. Nga fintu tubelenga pa Ukusokolola 18:2, 4, 5, 8, cinshi ifwe bonse tulingile ukucita? (Moneni na futunoti.)

¹⁶ Belengeni Ukusokolola 18:2, 4, 5, 8. Ifi ifikomo filanda na pali fimbi ifyo Yehova afwaya abamupepa balecita. Bonse Abena Kristu ba cine bafwile ukutaluka kuli fyonse ifyo ababa muli Babiloni Mukalamba bacita. Ilyo umusambi wa Baibolo talasambilila icine, nalimo ali mu mipepele ya bufi. Nalimo alelongana pamo na ababamo kabili alecita ne fyo bacita. Na kabili nalimo aletuula ne ndalama muli iyo imipepele. Ilyo umusambi wa Baibolo tabalamusuminisha ukuba kasabankanya uushabatishiwa, afwile ukufuminina fye mu mipepele ya bufi. Afwile ukulembela icalici nelyo akabungwe kalata uko alepepa kale no kubeba ukuti naleka ukupepa nabo. *

17. Ni ncito ya musango nshi iyo Umwina Kristu ashilingile ukubomba, kabili mulandu nshi?

¹⁷ Umwina Kristu wa cine talingile nangu panono ukubomba incito iyakuma imipepele ya bufi. (2 Kor. 6:14-17) Ku ca kumwenako, tafwile ukwingila incito kwi calici. Kabili Umwina Kristu uubomba ku kampani akashili ka mipepele talingile ukubombela sana pa cikuulwa ca mipepele ya bufi. Na kabili nga ca kuti alaibombela, tafwile ukusumina ukubomba imilimo nangu imo iingatungilila Babiloni Mukalamba. Mulandu nshi tushifwaila nangu panono ukutungilila Babiloni Mukalamba? Pantu tatufwaya nangu panono ukukuma ku milimo ne membu  sha mipepele iyo Lesa alanda ukuti yalikowela.—Esa. 52:11. *

18. Bushe munyinefwe umo akonkele shani amashinte ya mafunde ya mu Baibolo pa ncito yakwe?

¹⁸ Inshita imo umwaume umo uwakwete incito ya kubombela pe calici alefwaya ukwingisha eluda incito iinono pali ili icalici ilyali mwi tauni umo eluda aleikala. Uyu mwaume alishibe ukuti uyu munyinefwe lyonse alekaana ukubombela pa macalici. Lelo pali iyi nshita ulya mwaume takwete umbi uwa kubomba iyo ncito. Nangu cali ifi, munyinefwe atwalilile fye ukukonka amashinte ya mafunde ya mu Baibolo kabili alikeene iyo ncito. Umulungu wakonkelepo, mu nyunshipepala mwali icikope ca muntu uwalebika umusalaba pe calici ilyo munyinefwe akeene ukubombelapo. Munyinefwe asumina ilya ncito, nga e o bakopele muli iyi inyunshipepala. Tontonkanyeni pa fyo Abena Kristu banankwe bali no kulamumona! Kabili tontonkanyeni pa fyo Yehova na o ali no kulamumona.

19-20. (a) Finshi twasambilila muli cino cipande? (b) Finshi fimbi ifyo tulingile ukusambilila?

¹⁹ Ukulingana ne fyo Baibolo yasobele, icintu icikalamba icili no kucitika mwi sonde lyonse ca kuti intungulushi sha calo shili no kubilisha ukuti kuli “umutende no mutelelwe.” Pa mulandu ne fyo Yehova atusambilisha, twalishiba ukuti intungulushi sha calo te kuti shilenge mu calo mwaba umutende wa cine cine kabili uwingatwalilila. Finshi tulingile ukulacita ilyo bashilabilisha, na lintu ubonaushi bwa kupumikisha ubukakonkapo bushilacitika? Yehova afwaya ukuti tutwalilile ukuba abacincila ilyo tulebila imbila nsuma ya Bufumu, kabili afwaya tulebombesha pa kuti tulelenga abantu na bambi baleba abasambi. Pa nshita imo ine, tufwile ukutaluka fyonse ifyakuma imipepele ya bufi. Ici cilolele mu kuti tatulingile ukuba mu mipepele ya bufi kabili tatufwile ukubomba incito yonse iyakuma Babiloni Mukalamba.

²⁰ Kuli na fimbi ifili no kucitika ku mpela ya “nshiku sha kulekelesha.” Kwaliba na fimbi ifyo Yehova afwaya tulecita. Finshi fili no kucitika, kabili finshi tufwile ukucita pa kuti tuipekanye ilyo ifili no kucitika ku ntanshi fishilacitika? Ifi e fyo tukasambilila mu cipande cikonkelepo.