1. ?Wanem i mekem yumi sua se yumi stap laef long “ol las dei”?

SIPOS yu yu bon afta long yia 1914, yu spenem ful laef blong yu long “ol las dei” blong rabis wol ya. (2 Tim. 3:1) Yumi evriwan i harem nius blong ol samting we Jisas i talem se bambae i hapen long taem ya. Hemia ol samting olsem faet, kakae i sot, etkwek, strong sik, fasin blong brekem loa i kam antap, mo ol man oli ronem mo kilim ol man blong Jehova. (Mat. 24:3, 7-9, 12; Luk 21:10-12) Mo tu, yumi luk se fasin blong ol man i sem mak long samting we aposol Pol i talem. (Yu luk bokis ya “ Fasin Blong Ol Man Tede.”) Ol man blong Jehova oli bilif fulwan se yumi stap laef long “ol las dei.”

2. ?Yumi mas faenem ansa blong wanem kwestin?

² Stat long 1914 kam kasem tede, plante yia oli pas finis. Taswe naoia yumi mas stap klosap long en blong “ol las dei.” From samting ya, yumi mas save ansa blong ol impoten kwestin ya: ?Wanem bambae i hapen long en blong “ol las dei”? ?Jehova i wantem se yumi mekem wanem taem yumi stap wet?

3. Folem profet tok blong 1 Tesalonaeka 5:1-3, ?ol nesen bambae oli talemaot wanem?

³ Ridim 1 Tesalonaeka 5:1-3. “Dei blong Jehova” we Pol i tokbaot, bambae i stat taem ol nesen oli agensem “Bigfala Babilon,” hemia ol giaman skul long wol, mo bambae i finis long Amagedon. (Rev. 16:14, 16; 17:5) Jes bifo we “dei” ya i stat, ol  nesen bambae oli talemaot se “i gat pis mo seftaem.” Samtaem ol lida blong wol oli yusum tok ya ‘pis mo seftaem,’ taem oli tokbaot olsem wanem blong mekem ol nesen oli joen gud. * Be samting we Baebol i tokbaot i defren. ?From wanem? From we taem oli talemaot se “i gat pis mo seftaem,” ol man bambae oli ting se ol lida ya oli mekem wol i kam sef moa. Be samting we i tru se, “bambae oli sek we bigfala trabol i kam wantaem nomo blong spolem olgeta.”—Mat. 24:21.

4. (1) ?Yumi no save wanem long saed blong tok ya “pis mo seftaem”? (2) ?Be yumi save wanem?

⁴ Yumi no save evri samting long saed blong taem ya we oli talemaot se “i gat pis mo seftaem.” Yumi no save wanem bambae i mekem ol lida blong wol oli talemaot, mo olsem wanem bambae oli talemaot. Mo yumi no save se bambae oli talemaot plante smosmol mesej o wan bigfala nius wantaem. Nating se i olsem wanem, yumi save samting ya: Yumi no mas letem nius ya i trikim yumi, nao yumi ting se ol lida blong wol oli save putum pis long fulwol. Be yumi mas luksave se hemia nao nius we yumi stap wet long hem, folem samting we Baebol i talem. !Hemia wan saen se “dei blong Jehova” bambae i stat!

5. Folem 1 Tesalonaeka 5:4-6, ?yumi mas mekem wanem blong rere from “dei blong Jehova”?

⁵ Ridim 1 Tesalonaeka 5:4-6. Ol vas ya oli talem samting we yumi mas mekem blong rere from “dei blong Jehova.” Yumi no mas “slip olsem ol narafala man,” be yumi mas “wekap,” we hed blong yumi i klia gud. Blong mekem olsem, yumi mas kwik blong luksave samting we bambae i pulum yumi blong joen long ol rao blong politik. Sipos yumi joen long ol samting olsem, yumi save kam “man blong wol ya.” (Jon 15:19) Yumi save finis se Kingdom blong God nomo bambae i putum pis long fulwol.

6. ?Yumi wantem halpem ol narafala blong oli mekem wanem? ?From wanem?

⁶ Long semtaem we yumi stap wekap, yumi wantem halpem ol narafala tu blong oli wekap. Oli mas luksave samting we Baebol i talem se bambae i hapen. Yumi no mas fogetem se taem bigfala trabol i stat, bambae i let tumas blong ol man oli kam long Jehova. !Taswe, i impoten tumas we yumi prij naoia! *

7. ?Jehova i wantem se yumi mekem wanem naoia?

⁷ Long sot taem we i stap bifo long “dei” ya, Jehova i wantem se yumi stap bisi long wok blong prij. Yumi mas meksua se yumi “gat plante wok blong mekem long wok blong Masta.” (1 Kor. 15:58) Taem Jisas i tokbaot ol impoten samting we bambae oli hapen long ol  las dei, hem i talemaot wok we bambae yumi mekem, i se: “Ol man oli mas talemaot gud nius long olgeta neson bifo we en i kam.” (Mak 13:4, 8, 10; Mat. 24:14) Traem tingbaot: !Evri taem we yu go prij, yu stap givhan blong mekem profet tok ya i kamtru!

8. ?Wanem i soemaot se wok blong talemaot Kingdom i stap gohed gud?

⁸ ?Olsem wanem? ?Wok ya blong talemaot Kingdom i stap gohed gud? Yes, evri yia wok ya i stap kam bigwan moa. Tingbaot olsem wanem namba blong ol pablisa i kam antap long ol las dei. Long 1914, i gat 5,155 pablisa long 43 kantri. !Be tede i gat samwe long 8 milian haf pablisa long 240 kantri! Nating se i olsem, wok blong yumi i no finis yet. Yumi mas gohed blong talemaot se Kingdom blong God nomo bambae i finisim ol trabol we man i kasem.—Sam 145:11-13.

9. ?From wanem yumi mas gohed blong talemaot Kingdom?

⁹ Jehova nomo bambae i talem wetaem wok blong talemaot Kingdom i finis. ?Hamas taem i stap yet blong ol man oli save Jehova mo Jisas? (Jon 17:3) Yumi no save. Be yumi save se go kasem taem we bigfala trabol i stat, ol man we “oli stret blong kasem laef we i no save finis” oli save lesin yet long gud nius, mo kam man blong Jehova. (Wok 13:48) ?Yumi save mekem wanem blong givhan long olgeta, bifo we i let tumas?

10. ?Jehova i givim wanem long yumi blong tijim ol man?

¹⁰ Jehova i stap yusum oganaesesen blong hem blong givim evri samting we yumi nidim blong tijim ol man. Traem tingbaot trening we yumi kasem evri wik long miting ya Kristin Wok Mo Laef. Miting ya i givhan long yumi blong save wanem blong talem taem yumi prij mo mekem ol visit. Mo i tijim yumi olsem wanem blong lidim ol Baebol Stadi. Mo tu, oganaesesen blong Jehova i givim Ol Tul Blong Tijim Man. Ol tul ya oli halpem yumi blong . . .

• statem storian,

• pulum tingting blong man,

• mekem ol man oli wantem save moa,

• tijim ol Baebol stadi, mo

• pulum ol man blong oli luk websaet mo kam long Haos Kingdom.

I no naf blong gat ol tul ya nomo. Yumi mas yusum olgeta tu. * Sipos yu givim wan traket o  magasin long wan man we yu storian gud wetem hem, bambae hem i gat sam save blong ridim go kasem nekis taem we yu luk hem. I stap long yumi nomo blong mekem plan blong stap bisi evri manis long wok blong talemaot Kingdom.

11. ?From wanem i gat Ol Lesen Blong Stadi Baebol Long Intenet?

¹¹ Wan narafala samting we Jehova i givim blong halpem ol man blong oli save trutok, hemia Ol Lesen Blong Stadi Baebol Long Intenet we oli stap long jw.org. * ?From wanem yumi statem ol lesen ya? From we evri manis, plante taosen man long wol oli lukaot ol Baebol lesen long Intenet. Ol lesen long websaet blong yumi oli save givhan long man blong i stat blong lanem trutok. Sam man we yumi storian wetem olgeta oli fraet blong stadi Baebol wetem wan man. Sipos i olsem, yumi save soemaot ol lesen ya long websaet long wan lanwis we oli save, o sanem link long olgeta.

12. ?Ol man oli save lanem wanem long Ol Lesen Blong Stadi Baebol Long Intenet?

¹² Ol Lesen Blong Stadi Baebol Long Intenet oli tokbaot ol topik ya: “Baebol Mo Stamba Blong Hem,” “Ol Impoten Man Long Baebol,” mo “Ol Tok Blong Baebol We i Givim Hop.” Insaed long ol haf ya, i gat ol save olsem:

• ?Olsem wanem Baebol i save givhan long wan man?

• ?Hu ya Jehova, Jisas, mo ol enjel?

• ?From wanem God i wokem ol man?

• ?From wanem i gat ol nogud fasin mo ol man oli safa?

Mo tu, ol lesen ya oli tokbaot olsem wanem Jehova bambae i . . .

• finisim ol trabol we i mekem man i safa mo i ded,

• mekem ol dedman oli laef bakegen

• tekemaot ol gavman blong man mo putum Kingdom long ples blong olgeta.

13. ?Ol lesen long Intenet oli tekem ples blong Baebol stadi we ol man oli save mekem wetem yumi? Eksplenem.

¹³ Ol lesen ya long Intenet oli no tekem ples blong Baebol stadi we man i save mekem wetem yumi. Jisas i givim gudfala wok ya long yumi blong tijim ol man blong oli kam disaepol. Yumi hop se ol man we oli intres bambae oli ridim ol lesen long Intenet, oli glad long samting we oli lanem, nao bambae oli wantem lanem moa. Sipos i olsem, ating bambae oli wantem se yumi mekem Baebol stadi long olgeta. Long en blong evri lesen, man i save askem blong wan i kam luk hem blong mekem Baebol stadi wetem hem. !Evri dei, bitim 230 man long wol oli askem Baebol stadi long websaet blong yumi! !I impoten we yumi mekem stadi long olgeta wanwan!

14. Folem ol tok blong Jisas long Matiu 28:19, 20, ?yumi traem mekem wanem? ?From wanem?

¹⁴ Ridim Matiu 28:19, 20. Taem yumi mekem ol Baebol stadi, yumi traem pulum ol man ‘oli kam disaepol, mo tijim olgeta blong oli folem olgeta tok we Jisas i talem.’ Yumi mas givhan long ol man blong oli kasem save se i impoten tumas we oli wosipim Jehova mo obei long Kingdom blong hem. Hemia i min se, yumi mas traem mekem se man i glad blong folem samting we hem i lanem, givim laef blong hem i go long Jehova, mo baptaes. Hemia nomo bambae i sevem laef blong hem long dei blong Jehova.—1 Pita 3:21.

15. ?Yumi no save mekem wanem? ?From wanem?

¹⁵ Olsem yumi tokbaot finis, i gat smol taem nomo i stap bifo we en i kam. Taswe, ol man oli mas tekem aksen blong kam disaepol  blong Kraes, sipos no, yumi no save gohed blong stadi Baebol wetem olgeta. (1 Kor. 9:26) !Taem i sot! I gat plante man yet we oli mas harem gud nius blong Kingdom bifo we i let tumas.

16. Folem Revelesen 18:2, 4, 5, 8, ?yumi evriwan i mas mekem wanem? (Yu luk futnot tu.)

¹⁶ Ridim Revelesen 18:2, 4, 5, 8. Ol vas ya oli tokbaot wan narafala samting we Jehova i wantem se man i mekem blong wosipim hem. Ol trufala Kristin oli mas kamaot fulwan long Bigfala Babilon. Bifo we wan man i lanem trutok, maet hem i joen long wan giaman skul. Ating hem i go long jos oltaem, i joen long sam wok blong jos, o i givim mane long jos. Blong kam wan pablisa we i no baptaes, hem i mas lego giaman skul ya fulwan. Hem i mas raetem wan leta o mekem wan narafala samting olsem, blong talem se hem i no moa memba blong jos ya o enikaen oganaesesen we i joen wetem Bigfala Babilon. *

17. ?Wanem wok we wan trufala Kristin i no save mekem? ?From wanem?

¹⁷ Wan trufala Kristin i mas meksua se wok blong hem blong winim mane i no joen nating wetem Bigfala Babilon. (2 Kor. 6:14-17) Hemia i min se, hem i no save wok blong wan jos. Mo tu, sipos hem i wok blong wan narafala kampani (olsem man blong wokem lektrik o fiksimap paep wota), hem i no save mekem bigfala wok long wan ples blong giaman wosip. Sipos hem i gat prapa bisnes blong hem, bambae hem i no traem blong kasem wan wok o mekem wan kontrak wetem Bigfala Babilon. ?From wanem yumi gat strong tingting olsem? From we taem yumi joen long enikaen wok blong ol giaman skul we oli doti long fes blong God, yumi joen long ol sin blong olgeta, mo yumi no wantem olsem.—Aes. 52:11. *

18. ?Olsem wanem wan brata i stanap strong long samting we Baebol i talem?

¹⁸ Plante yia bifo, wan man i askem long wan elda we i gat prapa bisnes blong hem olsem kapenta, blong i mekem smol wok long wan jos. Man ya i save se brata i no wok long ol jos, be hem i no save faenem wan narafala blong mekem wok ya. Nating se i olsem, brata i stanap strong long samting we Baebol i talem mo i no tekem wok ya. Wan wik biaen, i gat wan pija long niuspepa blong wan narafala kapenta we i stap putum wan kros long jos ya. Sipos brata i no bin obei long Baebol,  bambae hem nao i stap long pija ya. !Tingbaot olsem wanem samting ya i save spolem gudnem blong hem long kongregesen! !Mo tu, tingbaot olsem wanem i save mekem Jehova i harem nogud!

19-20. (1) Kam kasem naoia, ?yumi lanem wanem? (2) ?Bambae yumi tokbaot wanem long nekis stadi?

¹⁹ Folem profet tok blong Baebol, nekis bigfala samting we bambae i hapen long wol, hemia se ol nesen bambae oli talemaot “pis mo seftaem.” From samting we Jehova i talem, yumi save se ol nesen bambae oli no putum trufala pis long wol. Bifo we samting ya i hapen mo bigfala trabol i faerap, ?yumi mas mekem wanem? Jehova i wantem se yumi stap bisi long wok blong talemaot Kingdom mo pulum ol man oli kam disaepol. Long semtaem, yumi mas stap longwe long ol giaman skul. Hemia i min se yumi no moa memba blong wan jos, mo yumi no wok blong Bigfala Babilon.

²⁰ I gat sam narafala samting we bambae oli hapen klosap long en blong “ol las dei.” Mo i gat sam samting we Jehova i wantem se yumi mekem. ?Wanem ol samting ya? ?Olsem wanem yumi save rere from ol samting we bambae oli hapen i no longtaem? Bambae yumi luk long nekis stadi.