1. Ka achoururagüdübalin woun wawinwanduña lan lidan “lagumuhóun dan”?

ANHEIN lárigiñe lubéi irumu 1914 wagüriahóua, winwan wamaali sun wabagari lidan “lagumuhóun dan” le (2 Tim. 3:1). Sun wagía aganbaadiwa luagu lasuseredun le lariñagubei Hesusu luagu wadaani: wuribu, ilamaü, hárabaganali, sandi, laganwoundun wuribani luma héibaahoun lumutuniña Bungiu, lúmaya amu katei (Mat. 24:3, 7-9, 12; Luk. 21:10-12). Ariha wamaaña giñe gürigia óusera wuriba ítara kei lariñaguni apostolu Pábulu (ariha huméi rekuáduru “ Ida liña hagaburi gürigia uguñe weyu”). Chouru wamuti wagía lubúeingu Heowá wawinwanduña lan lidan lagumuchagüle “lagumuhóun dan” (Mik. 4:1).

2. Kaba álügüdahani wóunaba?

² Kei sügühali lubéi saragu irumu lúmagiñe lásügürün irumu 1914, ligíati, wawinwanduña lidan lagumuchagüle “lagumuhóun dan”. Yarafaali lagumuchagüle ubóu le, ligía lunti lubéi wóunabun bián álügüdahani súdiniti: Kaba asusereda lidan lagumuchagüle “lagumuhóun dan”? Ani ka lagurabubei Heowá lun wadügüni lidan awanha lan agurabaha?

3. Según le ariñawagúbei lidan 1 Tesalónikana 5:1-3, kaba awisahani híchiga néchanigu?

³ (Aliiha huméi 1 Tesalónikana 5:1-3). Adimurehati Pábulu, “lachülürüba lan weyu ligía” o luéyuri Heowá. Dimurei le, mini lan lidan bérusu le, lábürühoun tuagu “Babilónia to Wéiriboun”, sun relihión mama inarünitu to ubouaguboun ani lagumuchuba “weyu ligía” lidan Arümahedón (Aruf. 16:14, 16; 17:5). Murusun dan lubaragiñeme lagumeserun “weyu ligía” ábame hariñagun néchanigu  ibiha hamaali lan “darangilaü luma achoururuni”. Anihein dan yusu hamuti gumadimatiña ubouaguna libe dimurei burí le dan le hayanuhan luagu habuiduragüdüni lumadagua ageiraü luma amu burí ageiraü. * Gama lumoun, ámubei awisahani le uágubei tayanuhan Bíbülia. Ka uagu? Lugundun danme le lichugún awisahani le, hafiñeruba saragu gürigia ibihaaña lan gumadimatiña ubouaguna lun ñein lan ichouruni ubouagu. Ani le linarün katei, ábame “liabin günringuaü hawagun sódini” le lunbei ladügün lun ñein lan “saragu asufuriruni” (Mat. 24:21).

4. a) Ka katei ibidiñebei woun luagu lariñawagún “lídanñein darangilaü luma achoururuni sun katei”? b) Ka wasubudirubei luagu?

⁴ Subuditi fiu katei woun luagu awisahani “lídanñein darangilaü luma achoururuni sun katei”. Íbini ítara, anihein katei ibidiñeti woun, kei burí kaba lan adüga lunme hariñaguni néchanigu awisahani le ni ida luba lan hariñaguni. Ibidiñeti giñe woun, anhein ábanrügüba lubéi wéiyaasu lariñawagún o gabügürüguabei lan. Meberesenga ida luba lan hadügüni, anihein katei subudi wamuti: moun lumuti lan wígiraguagüdün woungua lun weyeedún ni lun wafiñerun hadügüba lan gumadimatiña ubouaguna lun ñein lan darangilaü. Ani anihán awisahani le wagurabubei, ligíaba seini yarafatimahali lan lagumeserun luéyuri Heowá.

5. Ida liña líderaguniwa 1 Tesalónikana 5:4-6 lun aranseñu wamá lubá liabin luéyuri Heowá?

⁵ (Aliiha huméi 1 Tesalónikana 5:4-6). Ariñaga lumuti Pábulu woun ka lan lunbei wadügüni lun aranseñu wamá lubá liabin luéyuri Heowá. Moun lumuti “warumugun kei híbiri”, mosu agagudúañu wamá, aranseñu wagíame. Kei hénpulu, lunti duari wamá luéi wádaragun woungua lidoun katei lánina polítika luma lidoun katei le lánina ubóu. Anhein hamuga wadüga gayaraabei ladügün lira lun ‘lánigu wamá ubóu’ (Huan 15:19). Subudi wamuti Larúeiharügübei lan Bungiu gayara ladügün lun ñein lan darangilaü lidan sun ubóu.

6. Ka ídemuei wabusenrubei wíchugun houn gürigia, ani ka uagu?

⁶ Amu luéi werederun agagudúañu, mosu giñe wíderaguniña amu gürigia lun “hagagudún”, lidan amu dimurei, wíderaguniña asubudirei le tariñagubei Bíbülia kaba lan asusereda lun ubóu le. Haritagua waméi luagu danme lan le lagumeserun saragu asufuriruni, tárühalime lun háluahabei lan gürigia Heowá. Ligía weiri lubéi lisudinin lapurichihóuniwa guentó. *

7. Ka lagurabubei Heowá lun wadügüni guentó?

⁷ Lidan murusun dan le anihaguabei lubaragiñe liabin luéyuri Heowá, agurabati Heowá lun werederun bereseguñu lidan apurichihani. Mosu wachoururuni bereseguñu waña lan lidan  “luadigimari Wabureme” (1 Ko. 15:58). Dan le ladimurehanbei Hesusu luagu burí katei súdiniti le lunbei lasuseredun lidan lagumuhóun dan, ariñaga lumuti lidan aban profesía kaba lan meha hadüga lubúeingu Bungiu. Ariñagati: “Lapurichihóuba uganu luáguti asalbaruni houn sun néchanigu” (Mar. 13:4, 8, 10; Mat. 24:14). Samina wamá luagu le: sagü wáfuridun apurichiha, wídehaña lidan lagunfulirun profesía tídangiñeti Bíbülia le.

8. Ida liña wasubudiruni laganwounduña lan apurichihani luáguti Larúeihan Bungiu?

⁸ Sagü irumu haganbuñein saragu gürigia uganu buiti luáguti Larúeihan Bungiu. Ariha waméi ida liña lan laganwoundun apurichihatiña luáguti Larúeihan Bungiu lidan sun ubóu lidan lagumuhóun dan le. Lidan irumu 1914, añahein meha 5,155 apurichihatiña lidan 43 ageiraü. Guentó, añaheinhaña kéiburi 8,500,000 apurichihatiña lidan 240 ageiraü. Lau sun lira, magumuchungili wadasin. Mosu wasigirun apurichihei Larúeiharügübei lan Bungiu gayara lagumuchun lau haturóbulin gürigia (Sal. 145:11-13).

9. Ka uagu mosu lunbei wasigirun apurichihei uganu luáguti Larúeihan Bungiu?

⁹ Wasigiramémeba apurichiha darime lariñagun Heowá darí ya. Átirigaali dan hemegeira gürigia lun hasubudiruni Heowá luma Hesusu? (Huan 17:3). Ibidiñeti woun. Le wasubudirubei sunme magumeserungili lan óunwenbu asufuriruni, “ha lúntiñabaña ibagari le magumuchaditi” gachansintiña lun haganbuni uganu buiti (Adü. 13:48). Ida luba wíderaguniña gürigia ha lubaragiñe ladarüdün?

10. Ka ídemuei líchugubei Heowá woun lun warufudahani inarüni houn gürigia?

¹⁰ Líchuguñein Heowá sun le wemegeirubei woun túmagiñe lóundarun lun warufudahani inarüni houn gürigia. Kéiburi, sagü dimaasu larufudahan woun lidan adamuridaguni le labadinaguabei dimaasu, le ñein lubéi wafurendeira kaba lan wariñaga lidan furumiñeti wayanuhan hama gürigia luma kaba lan wariñaga lidan furumiñeti wagiribudun abisidahaña gürigia, luma giñe ida luba lan wíchugun aturiahani houn gürigia. Rúharu giñe lóundarun Heowá ídemuei tau Agumeiraguagüdüni tótima wayusuruboun lun warufudahan. Gayaraati líderaguniwa katei le lidan:

• wagumeserun ayanuha hama gürigia,

• wadügün lun busén hamá haganbun,

• wínchahaniña lun busén hamá hasigirun afurendeira,

• warufudahani inarüni lidan wíchugun aturiahani luma

•   wagunbirahaniña ha arufudubaña busén hamá hafurendeirun lun hebelurun lidoun wani páhina lidan Internet luma lun hachülürün tidoun Luba Wadamuridagun.

Amu luéi ñein lan ídemuei le wama, lunti wayusuruni. * Kéiburi, ánhawa ayanuha luma aban gürigia le arufuduti busén lan lafurendeirun tuagu Bíbülia ani aba wígirun aban tratadu lun o aban garüdia, gayaraabei hasigirun haliiha luagu tema darime wagiribudun abisidahaña. Kada aban wádangiñe lunti beresegu lan lidan apurichihani sagü hati.

11. Ka uagu laranserúa lun lichugún aturiahani tídangiñeti Bíbülia lidan Internet?

¹¹ Ariha wamá amu igaburi ida liña lan líderaguniña Heowá gürigia asubudirei inarüni. Gayaraati lichugúnun Aturiahani tídangiñeti Bíbülia lidan jw.org^®. * Ka uagu ladügǘwa? Sagü hati saragu milu gürigia lídangiñe sun ubóu áluahatiña lidan Internet aturiahani tídangiñeti Bíbülia. Lau lídehan páhina le, gayaraati lasubudiragüdüni inarüni houn gürigia tuagu Lererun Bungiu. Añahein gürigia ha úmabaña wayanuhan másiñati machourun hamá lun hánharun lun haturiahanu Bíbülia wama. Lidan burí kesi le arufuda waméi fánreinti le houn lidan wani páhina lidan Internet o óunaha waméi houn lidan iñeñein le gufuranda habéi.

12. Ka gayaraabei lafurendeirún lídangiñe lichugún aturiahani tídangiñeti Bíbülia lidan Internet?

¹² Lidan aturiahani le dariwati tema kei burí, Bíbülia luma ka lan Abürügüdübarun, gürigia ha uágubaña tabahüdagua luma uganu lánina emenigini le tíchugubei woun. Lau haturiahani gürigia leksióun burí le hafurendeiruba:

• ida liña tíderaguniwa Bíbülia,

• ka Heowábei, ka Hesusubei ani kátaña ánheligu,

• ka uagu ladügaña Bungiu gürigia luma

• ka uagu anihein lubéi asufuriruni luma wuribani.

Lidan giñe aturiahani le akutihóuati giñe tema burí le:

• kaba ladüga Heowá lun lagumuchun lau asufuriruni luma lau óunweni,

• ida luba láguyuguagüdüniña hilaaña luma

• ida luba lasansiruniña urúeigu móunitiña luagu Larúeihan Bungiu.

13. Afuranguagüda huméi anhein adüga lubéi aturiahani lídangiñe Internet lun siñá lan larufudahóun lun kada gürigia.

¹³ Madügünti aturiahani líbeina le lun lasansirun wíchugun aturiahani houn gürigia hábiñe. Ru laali Hesusu chansi le woun lun wadügün disipulugu. Busentiwa lun haturiahan lidan Internet gürigia ha busenbaña hafurendeirun tuagu Bíbülia, busentiwa giñe lun gebegi lan le hafurendeirubei houn luma lun busén hamá hasigirun afurendeira. Anhein asusereda le, másiñati hánharun lun líchugun aban íbiri aturiahani houn tídangiñeti Bíbülia. Lárigiñe kada aturiahani lidan Internet, aba lagunbirahóun aliihati lun lamuriahan lun labisidahani aban íbiri lun líderaguni asigira afurendeira. Sagü weyu hamuriahan kei burí 230 gürigia lidan sun ubóu aturiahani tídangiñeti Bíbülia lidan Internet. Súdiniti lun larufudahóun lun kada gürigia.

14. Según le lariñagubei Hesusu lidan Matéu 28:19, 20, ka áfaaguni lunbei wadügüni, ani ka uagu?

¹⁴ (Aliiha huméi Matéu 28:19, 20). Dan le wíchugun aturiahani tídangiñeti Bíbülia, lunti wáfaagun lun wadügün disipulugu luma lun warufudahan houn gürigia lun gaganbadi hamá lun lugumadin Hesusu. Mosu giñe wíderaguniña lun gunfuranda hamani súdini lan houdin luéigiñe lóubadina Heowá luma luéigiñe lóubadina Larúeihan. Mini lan le lunti lan wínchahaniña lun hawinwanduni le hafurendeirubei, lau  hederegeruni habagari lun Heowá luma lun habadiseirun. Ítararügübei gayara lan hesefurun luéi luéyuri Heowá (1 Fe. 3:21).

15. Ka un madaani wamá, ani ka uagu?

¹⁵  Kei le aubei warihei murusunrügaali dan lun lagumuchun ubóu le. Ligíati, madanihadiwa lun wasigirun íchiga aturiahani houn ha marufudunbaña busén hamá lun lani hamá Kristu disipulugu (1 Ko. 9:26). Dasi le wadügübei lunti wadügüni lau lóufudagun, lugundun añahagua saragu gürigia ha mégeibaña haganbuni uganu luáguti Larúeihan Bungiu, lubaragiñe ladarüdün.

16. Según Arufudúni 18:2, 4, 5, 8, ka lunbei wadügüni? (Ariha huméi abürüdǘni).

¹⁶ (Aliiha huméi Arufudúni 18:2, 4, 5, 8). Lidan burí bérusu le arufudati amu katei le lagurabubei Heowá lun wadügün. Sun kristiánugu inarünitiña lunti wadisedun sunsuinagubei tuéi Babilónia to Wéiriboun. Gayaraati gürigia lan ha eresibirubaña aturiahani tídangiñeti Bíbülia tílana meha somu relihión to mama inarünitu lubaragiñe hasubudiruni inarüni. Másiñati ñüdün hamá lidan kultu o lemesi, o gadan lániña somu burí fedu le tadügübei o ídeha hamá lidan burí lichugún seinsu. Lubaragiñe hiridún keisi apurichihatiña ha mabadiseirungiña, lunti hígiruni sun katei le gániti tuma relihión mama inarünitu. Mosu hóunahan aban gárada tidoun binadu haligilisin o lidoun binadu hadamurin le gániti tuma Babilónia to Wéiriboun lun hariñagun mánhaña lan ni kata tuma. *

17. Ka luwuyeri wadagimanu lunbei maha wamá wagía kristiánugu lun, ani ka uagu?

¹⁷ Wagía kristiánugu inarünitiña lunti wachoururuni mani tan Babilónia to Wéiriboun ni kata lidan wawadigimari (2 Ko. 6:14-17). Kei hénpulu, mawadigimaridun báadiwa tuma ni aban ligilisi. Gama lumoun, ánhawa awadigimarida tuma aban kónpeni, mawadigimaridun báadiwa tun lidan somu fulasu le ayusurúbei lun áhuduraguni mama inarüniti. Ánheinti wagía lubéi laburiñabaña wani bísinisi, mawadigimaridun báadiwa ni lun wánharun lun wadagimanu le gániti tuma Babilónia to Wéiriboun. Ka uagu hóusera ítara? Ladüga mabusenrun wamá lun gafanran wamá lidan le tadügübei ni lidan lifigoun óundaruni le tani relihión le wíyebei lun Bungiu (Isa. 52:11). *

18. Ka ladügübei aban íbiri dan le lamuriahóunbei luma lun lawadigimaridun tidan aban ligilisi?

 ¹⁸ Átiri irumu guentó, aba lamuriahan aban wügüri le arihibei lau wadagimanu luma aban wéiyaali lidan afiñeni le gánibei bísinisi lungua lun ladügün aban liraüraü wadagimanu lun tidan aban ligilisi le lánina sarafangei lidan aban uburugu le ñein lubéi lawinwanda. Subudi lumuti meha le arihibei lau wadagimanu súnwandan lan lariñagun íbiri mawadigimaridunbei lan tidan ni aban ligilisi. Gama lumoun, lidan ókaasion ligía, busenti meha wügüri le somu gürigia lau lóufudagun lun ladügüni wadagimanu. Íbini ítara, inebeti adundehani tídangiñeti Bíbülia lun íbiri ani máhati lun wadagimanu. Aban dimaasu lárigiñe, aba tagumeiraguagüdün periodiku to ñeinna aban iyawaü lau aban sarafangei afidira aban gurúa tuagu ligilisi. Lun hamuga anha lan íbiri lun wadagimanu ligía láfurida yebe tidan periodiku. Samina wamá luagu dañu le yebe lunbei gani lani hawagu íbirigu luma ida luba lan yebe lasandiragun Heowá lungua.

19, 20. a) Ka wafurendeirubei darí guentó? b) Ka amu katei lunbei wafurendeiruni?

¹⁹ Según profesía le tídanbei Bíbülia, le lunbei lasuseredun yarafa madise ubouagu lariñawagún “lídanñein darangilaü luma achoururuni sun katei”. Gama lumoun, arufudahaali Heowá woun manügün habéi lan néchanigu darangilaü le dayarüti ani le durati. Ka lunbei wadügüni lubaragiñe lasuseredun le luma “liabin günringuaü hawagun sódini”? Agurabati Bungiu lun wasigirun beresegu apurichihei uganu luáguti Larúeihan luma lun wálugun wadügün disipulugu. Ani lunti giñe wadisedun tuéi relihión to mama inarünitu, mini lan le, mama wamá lílana óundaruni tani relihión luma lun magana lan wawadigimari ni kata le gániti tuma Babilónia to Wéiriboun.

²⁰ Aniheingua saragu katei le lunbei lasuseredun lidan lagumuchagüle “lagumuhóun dan” ani agurabati giñe Heowá saragu katei lun wadügüni. Ka katei? Ani ida luba waranserun lubá le lunbei liabin ámuñegü? Warihinbei lidan leweñegua arütíkulu.