1. Nganong kombinsido ta nga nagkinabuhi ta sa “kataposang mga adlaw”?

NATAWO ka ba human sa 1914? Kon mao, nagkinabuhi ka sulod sa “kataposang mga adlaw” niining presenteng sistema sa mga butang. (2 Tim. 3:1) Kitang tanan nakabalita bahin sa mga panghitabo nga gitagna ni Jesus para niining panahona. Naglakip kini sa mga gubat, kanihit sa pagkaon, linog, kamatay, pag-uswag sa kalapasan, ug paglutos sa katawhan ni Jehova. (Mat. 24:3, 7-9, 12; Luc. 21:10-12) Nakita sab nato nga ang mga tawo migawi sama nianang gitagna ni apostol Pablo. (Tan-awa ang kahong “ Ang Kinaiya sa mga Tawo Karon.”) Ingong mga magsisimba ni Jehova, kombinsido ta nga nagkinabuhi ta sa “kaulahiang bahin sa mga adlaw.”​—Miq. 4:1.

2. Unsang mga pangutana ang kinahanglang tubagon?

² Kay taas na ang panahon nga milabay sukad niadtong 1914, ania na gyod ta sa ulahing bahin sa “kataposang mga adlaw.” Duol na kaayo ang kataposan, busa kinahanglang mahibaloan nato ang tubag sa pipila ka importanteng mga pangutana: Unsay mahitabo sa kataposan sa “kataposang mga adlaw”? Ug unsay gidahom ni Jehova nga atong buhaton samtang nagpaabot ta sa maong mga panghitabo?

3. Sumala sa tagna sa 1 Tesalonica 5:1-3, unsay ideklarar sa mga lider sa kalibotan?

³ Basaha ang 1 Tesalonica 5:1-3. Si Pablo naghisgot bahin sa “adlaw ni Jehova.” Niining tekstoha, kini nagtumong sa yugto  sa panahon nga magsugod dihang atakehon ang “Bantogang Babilonya,” ang tibuok kalibotang imperyo sa bakak nga relihiyon, ug matapos sa Armagedon. (Pin. 16:14, 16; 17:5) Sa dili pa magsugod kana nga “adlaw,” ang mga lider sa kalibotan moproklamar ug “Kalinaw ug kasegurohan!” Ang mga lider sa kalibotan mogamit usahay ug susamang ekspresyon dihang maghisgot sila bahin sa pagpauswag sa relasyon tali sa mga nasod. * Pero lahi niana ang pagdeklarar sa “kalinaw ug kasegurohan” nga giingon sa Bibliya. Ngano? Dihang mahitabo kini, daghan ang maghunahuna nga ang mga lider sa kalibotan milampos sa paghimo sa kalibotan nga mas luwas. Pero sa pagkatinuod, magsugod na ang “dakong kasakitan” ug unya mahitabo ang “kalit nga kalaglagan.”​—Mat. 24:21.

4. (a) Unsa pay angay natong mahibaloan bahin sa pagdeklarar ug “kalinaw ug kasegurohan”? (b) Unsa may nahibaloan na nato bahin niana?

⁴ Duna tay nahibaloan bahin sa pagdeklarar ug “kalinaw ug kasegurohan.” Pero wala ta mahibalo sa ubang detalye. Wala ta mahibalo kon unsay makaaghat sa mga lider sa pagdeklarar niana o kon sa unsang paagi himoon nila kana. Ug wala ta mahibalo kon kana ba kas-a lang nga deklarasyon o sunodsunod ba nga pahibalo. Bisan unsa pay mahitabo, mao ni atong nahibaloan: Dili ta angayng malimbongan sa paghunahuna nga makab-ot gyod sa mga lider ang kalinaw sa tibuok kalibotan. Hinunoa, angay natong hunahunaon nga mao na kana ang deklarasyon nga giingon sa Bibliya nga atong bantayan. Ilhanan kana nga magsugod na ang “adlaw ni Jehova”!

5. Sa unsang paagi ang 1 Tesalonica 5:4-6 makatabang nato nga mahimong andam sa “adlaw ni Jehova”?

⁵ Basaha ang 1 Tesalonica 5:4-6. Gisultian ta ni Pablo kon unsay angay natong buhaton aron mahimo tang andam sa “adlaw ni Jehova.” Dili ta angayng “mangatulog sama sa uban.” Kinahanglan nga ‘pabilin tang magmata’ ug magmaalerto. Pananglitan, kinahanglang alerto ta sa kapeligrohan nga makompromiso ang atong neyutralidad pinaagi sa pag-apil-apil sa politikal nga mga isyu sa kalibotan. Kon mag-apil-apil ta niana, mahimo tang “bahin sa kalibotan.” (Juan 15:19) Nahibalo ta nga ang Gingharian sa Diyos lang ang makapatunghag kalinaw sa kalibotan.

6. Gusto natong tabangan ang uban sa pagbuhat sa unsa, ug ngano?

⁶ Gawas nga pabilin tang magmata, gusto sab natong tabangan ang uban nga makamata maylabot sa gitagna sa Bibliya nga mahitabo sa kalibotan. Hinumdoman nato nga sa dihang magsugod na ang dakong kasakitan, ulahi na ang tanan para sa mga tawo sa pag-alagad kang Jehova. Kanay hinungdan nga dinalian kaayo ang atong buluhatong pagsangyaw! *

7. Unsay gidahom ni Jehova nga atong buhaton karon?

⁷ Sa mubong panahon nga nahibilin una magsugod ang “adlaw” ni Jehova, gidahom niya nga magmapuliki ta sa pagsangyaw. Kinahanglang seguroon nato nga kita “puliki diha sa buluhaton sa Ginoo.” (1 Cor. 15:58) Gitagna ni Jesus kon unsay atong buhaton. Dihang naghisgot siya bahin sa tanang talagsaong butang nga mahitabo sa kataposang mga adlaw, siya miingon: “Dugang pa, ang maayong balita kinahanglang iwali una sa tanang kanasoran.” (Mar. 13:4, 8, 10; Mat. 24:14) Hunahunaa kini: Matag higayon nga mosangyaw ka, nakigbahin ka sa katumanan niana nga tagna sa Bibliya!

8. Sa unsang paagi ang pagsangyaw sa Gingharian padayong nag-uswag?

⁸ Unsay atong ikasulti bahin sa pag-uswag sa pagsangyaw sa Gingharian? Kada tuig, nagauswag kini nga buluhaton. Pananglitan, hunahunaa ang pagdaghan sa magmamantala sa Gingharian sa tibuok kalibotan panahon sa kataposang mga adlaw. Niadtong 1914, dihay 5,155 ka magmamantala sa 43 ka kayutaan. Karon, duna nay mga 8.5 ka milyong magmamantala sa 240 ka kayutaan! Bisan pa niana, wala pa mahuman ang atong buluhaton. Kinahanglang magpadayon ta sa pagmantala sa Gingharian sa Diyos ingong bugtong solusyon sa tanang problema sa katawhan.​—Sal. 145:11-13.

9. Nganong kinahanglan tang magpadayon sa pagsangyaw sa Gingharian?

⁹ Ayha ra matapos ang atong pagsangyaw sa Gingharian kon moingon na si Jehova nga nahuman na kana. Unsa na lang ka mubo ang nahibiling panahon aron ang mga tawo makaila kang Jehova nga Diyos ug kang Jesu-Kristo? (Juan 17:3) Wala ta mahibalo. Pero nahibalo ta nga hangtod dili pa magsugod ang dakong kasakitan, si bisan kinsa nga “nakiling sa pagdawat sa kamatuoran nga motultol sa kinabuhing walay kataposan” puwede pang modawat sa maayong balita. (Buh. 13:48) Sa unsang paagi matabangan nato kining mga tawhana sa dili pa ulahi ang tanan?

10. Unsang tabang ang gihatag ni Jehova kanato sa pagtudlo sa mga tawo sa kamatuoran?

¹⁰ Pinaagi sa iyang organisasyon, si Jehova naghatag kanato sa tanan natong gikinahanglan sa pagtudlo sa mga tawo sa kamatuoran. Pananglitan, kada semana gibansay ta diha sa midweek nga tigom. Kini nga tigom nagtabang kanato nga mahibaloan kon unsay isulti sa unang pagduaw ug sa pagbalikduaw. Ug nagtudlo  ni kanato kon unsaon pagdumalag mga pagtuon sa Bibliya. Ang organisasyon ni Jehova nagtagana sab sa Teaching Toolbox. Kini makatabang nato sa . . .

• pagsugod sa pagpakig-estorya,

• pagpukaw sa interes,

• pagdasig sa mga tawo nga mokat-og dugang,

• pagtudlo sa kamatuoran ngadto sa mga Bible study, ug

• pag-awhag sa mga interesado sa pag-abli sa atong website ug pag-adto sa atong Kingdom Hall.

Siyempre, dili igo nga duna ta niini nga mga galamiton. Kinahanglang gamiton nato kini. * Pananglitan, kon binlan nimog tract o magasin ang usa ka interesado human mo magkaestorya, naa siyay mabasa hangtod nga magkaestorya mog balik. Responsibilidad nato nga magmapuliki kada bulan sa pagsangyaw sa Gingharian.

11. Nganong gihimo ang Online Bible Study Lessons?

¹¹ Ingong laing pananglitan kon giunsa pagtabang ni Jehova ang mga tawo nga makakat-on sa kamatuoran, konsideraha ang Online Bible Study Lessons sa jw.org^®. (Tan-awa ang BIBLE TEACHINGS > ONLINE LESSONS.) Nganong gihimo kini nga mga leksiyon? Kada bulan, libolibong tawo sa tibuok kalibotan ang mosusi sa Internet aron makakat-on bahin sa Bibliya. Pinaagi niini nga mga leksiyon sa atong website, kining mga tawhana makasugod sa pagkakat-on sa kamatuoran bahin sa Pulong sa Diyos. Dugang pa, ang pipila ka tawo nga imong maestorya magduhaduha tingali sa pagpa-Bible study. Kon mao, ipakita kanila kini nga seksiyon sa atong website o padad-i silag link sa maong mga leksiyon. *

12. Unsay makat-onan sa mga tawo sa Online Bible Study Lessons?

¹² Ang atong Online Bible Study Lessons nag-apil sa mosunod nga mga topiko: “The Bible and Its Author,” “The Bible’s Main Characters,” ug “The Bible’s Message of Hope.” Samtang magtuon niini nga mga ulohan, ang mga tawo makakat-on:

• Kon sa unsang paagi ang Bibliya makatabang sa tawo

• Kon kinsa si Jehova, Jesus, ug mga anghel

• Kon nganong gilalang sa Diyos ang tawo

• Kon nganong dunay pag-antos ug pagkadaotan

Ang mga leksiyon maghisgot sab kon unsay buhaton ni Jehova aron . . .

• matapos ang pag-antos ug kamatayon,

• mabanhaw ang mga patay, ug

• mapulihan sa Gingharian sa Diyos ang pakyas nga mga gobyerno sa tawo.

13. Kapuli ba ang online lessons sa kahikayan sa pagdumalag Bible study? Ipatin-aw.

¹³ Ang online lessons dili kapuli sa kahikayan sa pag-Bible study. Si Jesus naghatag nato sa pribilehiyo nga maghimog mga tinun-an. Naglaom ta nga ang mga interesado mosusi sa online lessons, makaapresyar sa ilang nakat-onan, ug mokat-on pag dugang. Kon mao, basin magpa-Bible study na sila. Sa kataposan sa matag leksiyon, dapiton sila sa pag-submit ug request para sa personal nga instruktor nga mo-Bible study nila. Pinaagi sa atong website, ang organisasyon makadawat kada adlaw ug kapin sa 230 ka Bible study request gikan sa tibuok kalibotan! Importante kaayo nga dunay personal nga motudlo sa usa ka interesado!

14. Sumala sa sugo ni Jesus diha sa Mateo 28:19, 20, unsay atong paningkamotan, ug ngano?

¹⁴ Basaha ang Mateo 28:19, 20. Samtang magdumala tag Bible study, kinahanglang  maningkamot ta sa paghimog mga tinun-an, nga ‘magtudlo kanila sa pagtuman sa tanang gisugo ni Jesus.’ Kinahanglang tabangan nato ang mga tawo nga masabtan nga importanteng mobarog sila dapig kang Jehova ug sa iyang Gingharian. Nagpasabot ni nga maningkamot ta sa pagdasig sa mga tawo nga magpadapat sa ilang nakat-onan, magpahinungod sa ilang kinabuhi kang Jehova, ug magpabawtismo. Nianang paagiha lang nga maluwas sila sa adlaw ni Jehova.​—1 Ped. 3:21.

15. Wala tay panahon sa unsa, ug ngano?

¹⁵ Sa nahisgotan na, mubo na lang kaayo ang panahon nga nahibilin una matapos kining sistemaha sa mga butang. Tungod niana, wala tay panahon nga magsigeg Bible study sa mga tawo nga wala mohimog mga kausaban aron mahimong mga tinun-an sa Kristo. (1 Cor. 9:26) Dinalian ang atong buluhaton! Daghan pa ang kinahanglang makadungog sa mensahe sa Gingharian sa dili pa ulahi ang tanan.

16. Sumala sa Pinadayag 18:2, 4, 5, 8, unsay kinahanglan natong buhaton? (Tan-awa sab ang footnote.)

¹⁶ Basaha ang Pinadayag 18:2, 4, 5, 8. Gipakita niining tekstoha kon unsa pay gidahom ni Jehova sa iyang mga magsisimba. Kinahanglang paneguroon sa tanang matuod nga mga Kristohanon nga bulag gyod sila sa Bantogang Babilonya. Sa wala pa makakat-on sa kamatuoran, ang usa ka Bible study membro tingali sa bakak nga relihiyon. Tingali nagtambongan siya sa relihiyosong mga serbisyo niini ug nagaapil sa mga kalihokan niini. O basin naghatag siyag donasyon sa maong relihiyon. Sa dili pa siya maaprobahan ingong dili bawtismadong magmamantala, kinahanglang bug-os siyang mobulag sa bakak nga relihiyon. Kinahanglan siyang mosulat sa iyang kanhing relihiyon o sa bisan unsang organisasyon nga konektado sa Bantogang Babilonya o mohimog laing paagi sa pagpahibalo nga dili na siya membro niini. *

17. Unsang sekular nga trabaho ang kinahanglang likayan sa usa ka Kristohanon, ug ngano?

¹⁷ Kinahanglang seguroon sa matuod nga Kristohanon nga ang iyang sekular nga trabaho dili konektado sa Bantogang Babilonya. (2 Cor. 6:14-17) Pananglitan, dili siya puwedeng manarbaho sa usa ka simbahan. Dugang pa, ang usa ka Kristohanon nga empleyado sa usa ka negosyo dili mohimog dakong trabaho diha sa pasilidad nga gigamit sa bakak nga pagsimba. Ug kon naa siyay negosyo, dili siya mokuha o modawat ug trabaho para sa bisan unsang bahin  sa Bantogang Babilonya. Nganong lig-on ang atong baroganan niini? Tungod kay dili nato gustong makaambit sa mga buhat ug sala sa relihiyosong mga organisasyon nga hugaw sa panglantaw sa Diyos.​—Isa. 52:11. *

18. Sa unsang paagi gisunod sa usa ka brader ang mga prinsipyo sa Bibliya maylabot sa sekular nga trabaho?

¹⁸ Katuigan kanhi, ang usa ka ansiyano nga may kaugalingong negosyo gitanyagan sa usa ka kontraktor sa paghimog diyutayng pandayonon sa simbahan sa ilang lungsod. Nahibalo ang kontraktor nga pirmeng mobalibad ang brader sa mga trabahoon sa simbahan. Pero niining higayona, ang kontraktor naglisod pagpangitag motrabaho. Bisan pa niana, wala ikompromiso sa brader ang mga prinsipyo sa Bibliya ug iyang gibalibaran ang trabaho. Pagkasunod semana, migawas sa lokal nga mantalaan ang letrato sa laing panday nga nagtaod ug krus sa simbahan. Kon mikompromiso pa ang brader, siya unta toy makita diha sa mantalaan. Hunahunaa ang posibleng epekto niana sa mga igsoon. Hunahunaa sab ang bation ni Jehova.

19-20. (a) Unsay atong nakat-onan? (b) Unsa pay angay natong mahibaloan?

¹⁹ Ang Bibliya nag-ingon nga ang sunod nga importanteng tagna nga matuman sa dili madugay mao ang pagproklamar sa mga nasod ug “kalinaw ug kasegurohan.” Tungod sa gitudlo ni Jehova kanato, nahibalo ta nga ang mga nasod dili makakab-ot sa tinuod, dumalayong kalinaw. Unsay angay natong buhaton sa dili pa mahitabo ang maong pagproklamar ug ang mosunod nga kalit nga kalaglagan? Gidahom ni Jehova nga magmapuliki ta sa pagsangyaw sa Gingharian ug sa paghimo pag dugang nga mga tinun-an. Sa samang higayon, kinahanglang mobulag ta sa tanang bahin sa bakak nga relihiyon. Nagpasabot nâ nga mobiya ta sa pagkahimong membro sa Bantogang Babilonya ug mobalibad sa trabaho nga konektado niana.

²⁰ Duna pay ubang mga butang nga mahitabo sa kinaulahiang bahin sa “kataposang mga adlaw.” Duna poy ubang mga butang nga gidahom ni Jehova nga atong himoon. Unsa kini, ug unsaon nato pag-andam ang kaugalingon sa tanang mahitabo sa umaabot? Mahibaloan nâ nato sa sunod nga artikulo.