1. Txini ennikosiha okuluvela wi nili “masaka omariha”?

WEYO obaliwe mvireli yaka ya 1914? Akala pumwenemo, weyo onkalawo mwari mwa “masaka omariha” a elabo eji yabure. (2 Tim. 3:1) Iyo notene ninowiwa dhopadduwa dhattagile ologa Yezu mwaha wa masaka aba. Dhilobodha sisi, koddo, dala, viredda dhoraveya, obure vina ofwara-fwariwa wa nlogo na Yehova. (Mt. 24:3, 7-9, 12; Lk. 21:10-12) Iyo ninowawona athu avirihagamo mikalelo dhattagile ologa murumiwi Paulo. (Koona kasha “ Mikalelo Dha Attu a Masaka Abano.”) Ninga emeleli a Yehova ninokuluvela wi nili “omagomelo wa masaka.”—Mik. 4:1.

2. Mavuzo gani anfwanyelihu wakula?

² Ohivira mudhidhi mwinjene oromana 1914, ovano nili omagomelo wa “masaka omariha.” Vowi omagomelo onowaddamela, ninofwanyela oziwa yowakula ya mavuzo mena amakamaka: Dhilobo gani dhinapadduwe omagomelo wa ‘masaka omariha’? Txini ennifunana Yehova wi nikose oku nijedhelaga dhopadduwadha esi?

3. Mowiwanana na nivuhulo na 1 Tesalónika 5:1-3, mukuwo gani onakose alamuleli amwilaboni?

³ Kengesa 1 Tesalónika 5:1-3. Paulo ohiloga “odha wa Nabuya.” Alabihedhaga nlebo nthi, waddana mudhidhi onarome olupeliwa “Babilónia, muthethe munddimuwa,” oli mwimeleli  wa marelijiau otene ottambi, vina mudhidhi onagome na Armageddo. (Ovuh. 16:14, 16; 17:5) “Odha” oku ohinaroma, alamuleli amwilaboni anele okosa mukuwo wa “dhetedhene dhifwasa, kulí yawopiha!” Asogorheli amwilaboni dila dhina anolabihedha mazu aba addagana ottugareya onani na malogo mena. * Mbwenye, mukuwo obu wa “dhetedhene dhifwasa, kulí yawopiha,” onloga Bibilia onakale wottiyana. Sabwaya? Sabwani esi dhigapadduwa, attu enjene txino anele wubuwela wi alamuleli amwilaboni ahiwodha odhana murenddele vina ofwasa. Mwebaribari, “orurumutxeyawá” onele wagwihedha “mmasosoni mamddimuwa.”—Mt. 24:21.

4. (a) Txini enfwanyelihu ojeedhela wona mwaha wa mukuwo wa “dhetedhene dhifwasa, kulí yawopiha”? (b) Txini enziwehu mwaha wa mukuwo obu?

⁴ Iyo ninziwa dhilobo dhing’onovi mwaha wa mukuwo obu wa “dhetedhene dhifwasa, kulí yawopiha.” Mbwenye, dhilobo dhina kaninziwa. Iyo kaninziwa txini enattukulele alamuleli okosa mukuwo obu obe mukalelo onakosiwani. Vina kaninnonelamo mapudduwo aba otene anathukulele ovuhiwa oku. Masiki na dhopadduwa esi, enziwa iyo jawi: Kaninfwanyela onyengetteya na dhubuwelo dhawi alamuleli ahiwodha odhana murenddele mwilaboni. Ottiya ejuwene, mukuwo obo bubuwene onaddela Bibilia wi ninofanyela ojeedhela. Ejo enakale ezinddiyelo enlagiha “odha wa Nabuya”!

5. Karta na 1 Tesalónika 5:4-6 ninnikamihedha dhavi okala womala nawale nijedhaga “odha wa Nabuya”?

⁵ Kengesa 1 Tesalónika 5:4-6. Paulo ohinikokomeza wi ninofwanyela okala womala nawale nijedhaga “odha wa Nabuya.” Nona “Iyo kanilí a mathiyu, kannedda mwipipini.” Ninofanyela ‘ohigona’ vina nikalevi txenjewa. Motagiha, ninofwanyela okala txenjewa wi ninakose mpaddi wa politika. Iyo kaninfuna okosa mpaddi wa politika, wila nihikale “athu a elabo.” (Jo. 15:19) Ninoziwa wi Omwene wa Mulugu bahi bunadhena murenddele mwilaboni.

6. Ninfunela nni wakamihedha athu ena, nanda sabwaya jani?

⁶ Okalavi txenjewa kunakwana, ninofwanyela wakamihedha athu ena oziwa txini enloga Bibilia mwaha wa dhilobo dhinapadduwe mwilaboni. Nubuweleni wi eji jofuneya ovanene sabwani goi enddimuwa egaroma, kunakalewo mudhidhi wa attu osunza omwebedha Yehova. Egali dhawene mabasa ehu olaleya ba namaguve! *

7. Ovanene Yehova onjeedhela wi nikose eni?

⁷ Mwari mwa mudhidhi mung’onovi ohalile  wa “odha wa Nabuya” ohinafiya, Yehova onjedhela wi iyo nizuzumele mabasa a olaleya. Notene ninofwanyela ozuzumela “mabasa a Nabuya.” (1 Kor. 15:58) Yezu wahittaga ologa enfanyeelelihu okosa. Mmaleliye ologa mwaha dhilobo dhotene dhigapadduwile masaka omariha, iyene owenjedhedha: “Enofuneya wi athu a malogo otene afiyedhiwena Muthaka wapama.” (Mk. 13:4, 8, 10; Mt. 24:14) Kobuwela wi: Mudhidhi wotene ondowiwe olaleya, onowakwanihedha nivuhulo ntti na Bibilia!

8. Mabasa olaleya miselu Dhomwene anunuwa dhavi?

⁸ Txini enalogihu mwaha wa wunuwa wa mabasa a olaleya? Yaka na yaka, attu enjene anovuruwana miselu dhapama Dhomwene. Motagiha, kobuwela mwaha wa munuwelo wa anamalaleya a Omwene a mwilaboni mwetemwene masaka abano omariha. Yaka ya 1914, ahikalawo anamalaleya 5.155 mwari mwa dhilabo 43. Ovano, akalawo anamalaleya owakwana amiliau 8.5 mwari mwa dhilabo 240! Mbwenye, mabasa ehu kanatti ogoma. Ninofwanyela odhowavi nalaleyaga attu ena wi Omwene wa Mulugu bahi bunagomihe makattamiho otene anna nlogo na attu.—Masal. 145:11-13.

9. Sabwaya jani enfanyeelelihu odhowavi nilaleyaga miselu dha Omwene?

⁹ Mabasa ehu olaleya mwaha wa Omwene anele odhowavi mpaka vanaloge Yehova wi ehakwana. Mudhidhi gani ohalilewo wi athu amuziwe Yehova Mulugu vina Yezu Kristu? (Jo. 17:3) Iyo kaninziwa. Enziwa iyo jawi mpaka goi enddimuwa oroma, “abale athomeliwe egumi yamukala-kala” anele orumela miselu dhapama. (Mer. 13:48) Ninawodhe dhavi wakamihedha attu abo mudhidhiya ohinakwana?

10. Nikamihedho gani ninnivaha Yehova wi nasunzihena attu ebaribari?

¹⁰ Modhela nikuru naye, Yehova ononivaha dhotene dhinfunihu wi nasunzihe attu ebaribari. Motagiha, iyo ninowakela mashagiho a matugumano a vari va sumana. Matugumano aba anonikamihedha oziwa txini enalogihu labo noroma vina labo na wiyelelawo wanawili. Vina mukalelo wa weddiha nsunzo na Bibilia. Nikuru na Yehova ninonivaha Vipano Dhehu Dhosunzihana. Vipano esi dhinokamihedha owodha . . .

•   oromana makani,

• oddiginyana murima,

• omuttukulela muttu ofuna omusunza Bibilia,

• osunzihana ebaribari modhela nsunzo na Bibilia, vina

• waziwihana athu ejile elihu vina ofwanya Numba Yomwene.

Txibarene, okana vipano esi bahi kinakwana. Ninofwanyela olabihedha. * Motagiha, ogamalile ologa makani olibiha na muttu olagihile efunelo, weyo onomuttiyedha revista obe folheto, iyene onohala engesaga mpaka labo ninamwiyeleliwe wili. Muttu-muttu wa iyo okana muthorho wa ozuzumela mabasa olaleya mweri dhetedhene.

11. Nsunzo na Bibilia Online mu jw.org nisasanyedheliweni?

¹¹ Yehova onowakamihedha attu osunza ebaribari modhela, wavaha Nsunzo na Bibilia Online mu jw.org. Nsunzo na Bibilia Online mu jw.org nisasanyedheliweni? Vamwerini, muthengo mwinjene wa attu orugunuwa elabo yotene anotamela masunzo a Bibilia mu interneti. Masunziho a mu websiteni mwehu anowodha wakamihedha attu aba osunza ebaribari ya Mazu a Mulugu. Txino attu ena alaleyiliwe kalagihile efunelo yorumeela nsunzo na Bibilia. Akala pumwenemo, katonyihedhe website wehu obe wavahedhe muselu wofanyana masunzihoya. *

12. Muttu onkosa Nsunzo na Bibilia Online onsunza eni?

¹² Masunziho a Nsunzo na Bibilia mu Online anloga mitoma esi: “Bibilia Mwinyaya Bani,” “Bibilia Onloga Eni,” vina “Bibilia Onovaha Muselu wa Njedhelo.” Mitoma esi, dhinele wasunziha:

• Mukalelo onwodha Bibilia omukamihedha muttu

• Oziwa Yehova bani, Yezu bani vina anju bani

• Oziwa Mulugu wattanddeleni attu

• Mulugu onttiyelani obure na goi okalagawovi

Masunzihoya anologa mukalelo onakose Yehova wi . . .

• agomihe goi na okwa,

• avenyihe abale akwile wi eyelele okalawo wili, vina

• watxinja alamuleli amwilaboni wi emetxe Omwene wa Mulugu.

13. Nsunzo na Bibilia online ninotxinja nsunzo na Bibilia ninkosiwa na Munamoona wa Yehova? Katapulela.

¹³ Nsunzo na Bibilia online kanitxinja nsunzo na Bibilia ninkosiwa na Munamoona wa Yehova. Yezu ohinivaha gari ya wakosa anamafwara. Ninojedhela wi masunzihoya online, anele oddiginya murima dhabale anfuna omusunza Bibilia. Dhawene, txino awene anele orumela nsunzo na Bibilia. Omagomelo wa nsunzona, vahikala vego vanwobiwa namasunzaya wi amutamele Munamoona wa Yehova wila amusunzihe Bibilia. Siku na siku, mu websiteni mwehu athu owakwana 230 mwilaboni mwetemwene, anokumbirha masunzo na Bibilia! Jamakamaka okana muttu onusunziha Bibilia!

14. Mowiwanana na nikokomezo na Yezu nili va Mateu 28:19, 20, ninavilibihedhe okosa eni, nanda sabwaya jani?

¹⁴ Kengesa Mateu 28:19, 20. Nigeeddihaga nsunzo na Bibilia, ninofwanyela ovilibihedha ‘wakosa anamafwara . . . , wasunziha awene ovirihamo dhotene dhinisunzihile Yezu.’ Ninofwanyela wakamihedha attu ononelamo  sabwaya ekalelani yapama osakula omulabela Yehova vina Omwene waye. Eji entapulela wattukulela attu osunza ebaribari, ovirihamo dhinsunzani, ovivelela wa Yehova, vina obatiziwa. Dhawene anele ovuneya nsaka ninafiye siku na Yehova.—1 Ped. 3:21.

15. Ninkoodda ononga mudhidhi na eni, nanda sabwaya jani?

¹⁵ Ninga moonelihu, ovanene ohalile mudhidhi mung’onovi wi elabo eji yabure egome. Nona, kaninfuna oyelela mudhidhi na anamasunza a Bibilia ahinvirihamo esile dhinsunzani vina ahinfuna omulabela Yehova. (1 Kor. 9:26) Mabasa ehu ba namaguve! Akalawo attu enjene anna efunelo ya wiwa miselu esi Dhomwene, mudhidhiya ohinagoma.

16. Mowiwanana na Ovuhulela 18:2, 4, 5, 8, txini enfanyelela Akristu otene okosa? (Koona yowenjedhedha.)

¹⁶ Kengesa Ovuhulela 18:2, 4, 5, 8. Versu esi dhinotonyihedha dhilobo dhinjeedhela Yehova wi alabeli aye akose. Akristu otene ebaribari anofwanyela woniha wi ahittiyana na Babilónia Munddimuwa. Ahinatti osunza ebaribari, namasunza wa Bibilia txino wankosa mpaddi wa relijiau yottambi. Txino iyene wandhowa okapela vina wankamihedha mabasaya wenewo. Obe txino wanvaha kobiri wi akamihedhena kapela yaye. Akala namasunza Bibilia onofuna okala namalaleya wohibatiziwa, onofwanyela ogwadda mandano aye na marelijiau ottambi. Iyene onofanyela olebela karta kapela yaye, obe otamela mukalelo mwina wa waziwiha wi iyene kankosa vina mpaddi wa makuru a Babilónia Munddimuwa. *

17. Mabasa gani anfwanyela Mukristu orabela, nanda sabwaya jani?

¹⁷ Mukristu webaribari onofwanyela okuluvela wi mabasa ankosiye kaniwanana na mpaddi wa Babilónia Munddimuwa. (2 Kor. 6:14-17) Motagiha, iyene kanfwanyela okala namalaba wa kapela. Ottiya ejo, Mukristu onlaba kanfwanyela okamihedha mparha obe mimburo dhinunuwiha mabasa a marelijiau ottambi. Vina Mukristu onna oyesa wa mabasa anwodhiye, kanfwanyela otamela mabasa ankosa mpaddi wa Babilónia Munddimuwa. Ninfwanyelela nni okala ovikomene? Sabwani iyo kaninfuna okosa mabasawa wi ninattege vamodha nawene, velani makuru aba akwarula vamentoni va Mulugu.—Iza. 52:11. *

18. Magano a mBibiliani amukamihedhile dhavi mbali dhahi okala ovikomene na mabasa aye?

 ¹⁸ Vyaka dhivirile, wahikalawo mwimeleli wafuna wi munddimuwa dhahi wa mulogo wali namasema, amukamihedhe okosa mabasa mwari mwa kapela ya musidadi mwakala mbali oddule. Mwimeleliya wanziwa wi mbali oddule wahimwaddela wi iyene karumela okosa mabasa a makapela. Mbwenye mwimeleli oddule wahisegedheya kamoona muttu mwina wi akose mabasaya. Masiki dhawene, mbali oddule wahittiddelavi magano a mBibiliani vina wahikoodda-wene okosa mabasa abale. Sumana yina, anamavuwiha miselu ahilagiha foto ya namasema mwina akomelaga mwigimanyo kapelaya. Kowiliwa wi mbalihu wela orumela mabasa abale, txino foto ejile egali yaye. Kobuwela mukalelo ogapigidhehile mweddelo waye vamodha na wa abali ena! Kobuwela vina mukalelo ogewilemo Yehova.

19-20. (a) Txini esunzilehu mpaka ovanene? (b) Txini enasunzihu mwari mwa mutoma ondawo?

¹⁹ Mowiwanana na nivuhulo na Bibilia, nipadduwo ninddimuwa ninfarela ninakosiwe na alamuleli amwilaboni ninakale mukuwo wa “dhetedhene dhifwasa, kulí yawopiha.” Ninomutamaalela Yehova sabwa ya onisunziha, iyo ninoziwa wi alamuleli amwilaboni kanawodhe odhana murenddele wamukalakala. Txini enfanyeelelihu okosa ovanene dhilobo esi dhihinapadduwa vina goi enddimuwa ehinafiya? Yehova onjedhela wi nizuzumele mabasa olaleya miselu Dhomwene vina wakosa anamafwara. Bilivi dhawene, ninofwanyela orabela okamihedha marelijiau otene ottambi. Eji entapulela ogwadda mandano nawene vina orabela ganyo obe mabasa otene ankosa mpaddi wa Babilónia Munddimuwa.

²⁰ Akalawo mapadduwo mena anfarelana a omagomelo wa “masaka omariha.” Ehikalawo elobo yina enjeedhela Yehova wi iyo nikose. Mapadduwo gani, nanda ninawodhe dhavi ovisasanyedha na dhilobo dhotene dhinapadduwe mohigoneela? Ninele wona mwari mwa mutoma ondawo.