1. “Ni hmannung bik” caan ah kan nung ti kha zeinihdah a kan zumhter?

NANG cu 1914 hnuah a chuakmi na si ahcun “ni hmanung bik” caan chungah a nungmi na si. (2 Tim. 3:1) Hi vawlei thil sining he aa tlaiin Jesuh nih a chimchungmi hna kha kanmah theng nih kan ton i kan theih. Mah ah raldohnak, mangṭam, lihnin, ngal-eu zawtnak, tlaihkhihnak le Jehovah miphun pawl hremnak hna aa tel. (Matt. 24:3, 7-9, 12; Luka 21:10-12) Lamkaltu Paul nih a chimchungmi mi pawl zong kha kan hmuh hna. (“ Atu Chan I Mi Pawl An Ziaza” timi rinli kulh ah zoh.) Jehovah Tehte Hna nih “donghnak caan” ah kan nung ti kha kan hngalh.—Mik. 4:1, NW.

2. Zei biahalnak a phi dah kan hngalh a herh?

² 1914 thawkin caan tampi a liam cang caah kannih cu “ni hmanung bik” i a donghnak leiah kan nung cang. Donghnak caan a naih tuk cang caah a biapi tukmi biahalnak cheukhat i a phi kha kan hngalh a hau: “Ni hmanung bik” a donghnak leiah zei thil dah a cang lai? Mah a cang laimi thil pawl kan hngah buin Jehovah nih zeidah tuahter a kan duh?

3. Miphun hna nih 1 Thesalon 5:1-3 ah a chimchung bantukin zei thawng dah an thanh lai?

³ Kuatkhat Thesalon 5:1-3 rel. Paul nih “Bawipa Ni” kong kha a chim. A hnuhmai bia nih mah ni cu vawleicung i a hmaan lomi biaknak a simi “A Liannganmi Babilon” dohnak in aa thawk lainak kong le Armageddon a dongh lainak caan kong  kha a langhter. (Biat. 16:14, 16; 17:5) Mah “ni” aa thawk hlan deuh te ah miphun nih “a dai dih ko i a him dih ko” tiah an thanh lai. A caan ah vawlei hruaitu pawl nih miphun pakhat le pakhat karlak i an i pehtlaihnak a ṭhancho tikah mah bia kha an hman tawn. * Asinain Baibal ah a langhtermi “a dai dih ko i a him dih ko” timi thawngthanhnak cu mah he aa lo lo. Zeicah? Mah thawng an thanh tikah vawlei kha a him deuhmi le a dai deuhmi si awkah vawlei hruaitu pawl nih an tuah khawh cang tiah mi pawl nih an ruah lai caah a si. Asinain a tak ti ahcun “harnak nganpi” aa thawk lai i “rawhnak” nih a den hna lai.—Matt. 24:21.

4. (a) “A dai dih ko i a him dih ko” timi thawngthanhnak he aa tlaiin zeidah kan hngah awk a si? (b) Mah he aa tlaiin zeidah kan hngalh?

⁴ “A dai dih ko i a him dih ko” timi thawngthanhnak he aa tlaimi thil cheukhat kha kan hngalh. Asinain kan hngalh lomi thil cheukhat a um. Zei ruang ah dah an thanh lai asiloah zeitindah thanh a si lai ti kha kan hngal lo. Cun aa changchang tein maw thanh a si lai asiloah lunghmuih ngaiin voikhat te ah dah thanh a si lai ti zong kha kan hngal lo. Asinain mah hi cu kan hngalh: Vawlei kan daihter khawh timi vawlei hruaitu hna i hlennak bia kha kan zumh awk a si lo. Mah canah mah thawngthanhnak tu hi kan hngah awk a si. Mah cu “Bawipa ni” aa thawk cang lai timi hmelchunhnak kha a si.

5. “Bawipa ni” caah timhcia kan si nakhnga 1 Thesalon 5:4-6 nih zeidah kan tuah awk a si tiah dah a kan chimh?

⁵ Kuatkhat Thesalon 5:4-6 rel. Paul nih “Bawipa ni” caah timhcia kan si nakhnga zeidah kan tuah awk a si ti kha a kan chimh. “Midang bantukin kan i hngilh” awk a si ti lo. “Kan i ṭhangh” awk le “lung fim tein kan um” awk a si. Tahchunhnak ah, khoikalei hmanh ṭan lo awk le ramkhellei ah i tel lo awkah kan i ralrin a hau. Mah ah kan i tel sual a si ahcun “vawlei ta” kan hung si kho. (Johan 15:19) Vawlei a daihter khotu cu Pathian Pennak lawng a si ti kha kan hngalh.

6. Midang kha zei tuah awkah dah kan bawmh hna awk a si, zeicah?

⁶ Ralring tein kan um lengah vawlei ah zeidah a cang lai timi Baibal chimchungbia kong kha midang nih an hngalh nakhnga kan bawmh hna a hau. Zeicahtiah harnak nganpi aa thawk tikah mi pawl caah Jehovah lei kir ṭhan cu a tlai tuk cang lai. Cucaah atu ah phungchim rian ah i tel cu a biapi tukmi a si. *

7. Atu ah zei tuah awkah dah Jehovah nih kan sinin aa ruahchan?

⁷ Jehovah “ni” aa thawk hlan caan tawite chungah phungchim rian kha i manh lo ngaiin ṭuan awkah Jehovah nih kan sinin aa  ruahchan. ‘Bawipa rian kha teimak tein kan ṭuan zungzal’ a hau. (1 Kor. 15:58) Jesuh nih zeidah kan tuah awk a si ti kha a chimchung. A biapimi thil kong a chim lioah ni hmanung bik caan chungah a cang dingmi he aa tlaiin hitin a chim chap: “Donghnak a phak hlanah thawngṭha bia cu miphun kip sinah chim hmasa a si lai.” (Mar. 13:4, 8, 10; Matt. 24:14) Phungchim na kal fatin mah Baibal chimchungbia a tlin nakhnga na bawmhmi a si ti kha ruat.

8. Phungchim rian cu zeitindah a ṭhancho?

⁸ Pennak kong thawngṭha chimnak rian cu a ṭhangcho maw? Kum fatin a ṭhangcho. Tahchunhnak ah, ni hmanung bik caan chungah Pennak kong a chimtu hna milu a karh ning kong kha ruathmanh. 1914 lioah ram 43 ah thawngthanhtu cu 5,155 an rak si. Tuchan ah cun ram 240 ah thawngthanhtu cu nuai 8.5 an si cang. Asinain kan rian cu a dih rih lo. Midang sinah Pathian Pennak lawng nih minung buaibainak vialte a tawnghtham khawh ti kha kan chim peng a hau.—Salm 145:11-13.

9. Pennak kong kha zeicah kan chim peng awk a si?

⁹ Pennak kong chimnak rian cu Jehovah nih liim a si cang a ti hlan tiang kan ngol awk a si lo. Mi nih Jehovah le Jesuh kong an hngalh nakhnga a caan zeizat dah a tang rih? (Johan 17:3) Kan hngal lo. Kan hngalhmi cu harnak nganpi aa thawk tiang “zungzal nunnak hmu dingah thim a simi hna” nih thawngṭha kha an lehrulh peng khawh rih ti kha a si. (Lam. 13:48) Mah mi pawl kha a tlai tuk hlanah zeitindah kan bawmh khawh hna?

10. Midang sinah biatak kong kan chim khawh nakhnga Jehovah nih zei hna dah a kan timhpiak?

¹⁰ Jehovah nih a bupi hmangin midang sinah biatak kong kan chim khawh nakhnga kan herhmi paoh kha a kan pek dih. Tahchunhnak ah, zarh fatin tuahmi zarhlai pumhnak in cawnpiaknak kan hmu. Mah pumhnak nih voikhatnak len lio le lennolh ah zeidah chim ding a si ti kha hngalh awkah a kan bawmh. Baibal cawnpiaknak zeitindah tuah ding a si timi kong zong a kan cawnpiak. Cun Jehovah bupi nih Cawnpiaknak Hriamnam a phunphun zong a kan timhpiak. Mah cawnpiaknak hriamnam hna nih . . .

• biahram thawk khawh awk,

• lungthawhnak an ngeih nakhnga bawmh awk,

• Baibal kong tam deuh cawn an duh nakhnga bawmh awk,

•   Baibal kan cawnpiak mi hna kha biatak kong cawnpiak awk le

• lungthawhnak a ngeimi hna kha kan website le kan Biakinn ah sawm hna awkah a kan bawmh.

Asinain mah hriamnam hna cu ngeih lawngin a za lo. Kan hman a hau. * Tahchunhnak ah, hngalh duhnak a ngeimi hna he nan i ton ahcun a hnu na rat ṭhan hlan tiang a rel awkah na chuah hlanah cazual asiloah mekazin kha pe ta. Kan rian cu Pennak kong chimnak rian ah thla fatin i manh lo ngaiin ṭuan peng kha a si.

11. Online Bible Study Lessons cu zei caah dah timhtuah a si?

¹¹ Jehovah nih biatak an cawn khawh nakhnga mi pawl a bawmh hna ning a dang lam pakhat cu jw.org^® chung i Online Bible Study Lessons timi kha a si. (BIBLE TEACHINGS > ONLINE LESSONS timi tangah zoh.) Mah cu zei caah dah timhtuah a si? Thla fatin vawleicung i mi thong tampi hna nih Baibal kong kha Internet in an hlathlai. Kan website ah aa telmi kong hna nih mah mi hna kha Baibal kong biatak hngalh awkah a bawmh khawh hna. Phung na chimhmi hna cheukhat cu Baibal cawnpiaknak kha cohlan awkah an i cungcang men lai. Cutin a si ahcun mah kong kha kan website in hmuhsak asiloah a kong kha link in kua. *

12. Online Bible Study Lessons in zei hna dah cawn khawh a si?

¹² Online Bible Study Lessons ah “Baibal le Baibal Ṭialtu Taktak,” “Baibal Ah An Kong Ṭialmi Hna,” le “Baibal Ah Aa Telmi Ruahchannak” timi kong hna aa tel. Mah kong hna nih:

• Baibal nih mi pakhat kha zeitindah a bawmh khawh?

• Jehovah, Jesuh le vancungmi cu ahodah an si?

• Pathian nih minung kha zeicah a ser hna?

• Sifah harnak hna le ṭhatlonak hi zeicah a um? timi kong hna kha a kan cawnpiak.

Mah kong hna zong hi a langhter . . .

• sifah harnak le thihnak kha Jehovah nih zeitindah a donghter lai?

• a thimi cu zeitindah a thawhter ṭhan hna lai?

• minung uknak kha Pathian Pennak nih zeitindah a airolh lai?

13. Baibal cawnpiaknak kha Online lessons in airolh a si tinak a si maw? Fianter.

¹³ Baibal cawnpiaknak kha Online lessons in airolh a si tinak a si lo. Jesuh nih zultu siternak tinvo sung a kan pek. Hngalh duhnak a ngeimi hna nih online lessons kha an zoh lai i an hngalhmi kong kha an sunsak lai, tam deuh in hngalh an duh lai i a hnuah Baibal cawnnak kha an cohlan lai tiah kan i ruahchan. A kong pakhat a dih fatin careltu nih Baibal cawnpiak awkah pakhatkhat kha thlahpiak dingin a hal khawh. Vawleicung pumpi ah website in nifatin Baibal cawnpiak awkah minung 230 hrawng nih an halmi kha kan hmuh. Cutin anmah he i ton in Baibal cawn cu a biapi tukmi a si.

14. Matthai 28:19, 20 ah Jesuh nih nawl a kan pek bantukin zei tuah awkah dah kan si khawh chungin kan i zuam, zeicah?

¹⁴ Matthai 28:19, 20 rel. Baibal cawnpiaknak kan tuah tikah ‘zultu siter’ awk le ‘[Jesuh nih] a kan fialmi vialte an zulh nakhnga va cawnpiak’ awkah kan si khawh chungin kan i zuam. Jehovah le a Pennak lei ṭan cu zeitluk in dah a biapit ti kha an hngalhthiam nakhnga kan bawmh hna. Mah cu an cawnmi ningin an nunnak thawngin le Jehovah sinah an i  pumpek i tipil an innak thawngin biatak an ta siter awkah bawmh kha a chim duhmi a si. Mah lawngah Jehovah ni in an luat kho lai.—1 Pet. 3:21.

15. Zei caah dah a caan kan sawksam awk a si lo, zeicah?

¹⁵ A hmasa ah a langhter bantukin hi vawlei donghnak caan cu a nai tuk cang. Cucaah Khrih zultu si awkah thlen duhnak a ngei lomi hna he Baibal cawn in a caan kan sawksam awk a si lo. (1 Kor. 9:26) Kan rian cu a biapi tukmi a si. A caan a tlai tuk hlanah Pennak kong thawngṭha theih a herhmi mi tampi an um rih.

16. Biathlam 18:2, 4, 5, 8 ningin kan dihlak in zeidah kan tuah a herh? (A tanglei fianternak zongah zoh.)

¹⁶ Biathlam 18:2, 4, 5, 8 rel. Mah Baibal caang hna ah Jehovah nih amah a biatu hna sinin aa ruahchanmi thil pakhat kong a langhter. A hmaanmi Khrihfa dihlak cu a Liannganmi Babilon he an i pehtlai lai lo. Baibal a cawngmi pakhat cu biatak a hngalh hlanah a hmaan lomi biaknak ah aa telmi a si men lai. Biaknak puai le an rianṭuannak hna ah aa tel men lai. Asiloah mah bu caah tangka a pek men lai. Asinain tipil a ing rih lomi thawngthanhtu a si khawh nakhnga a hmaan lomi biaknak he an i pehtlaihnak vialte kha a chah dih a hau. Church asiloah a Liannganmi Babilon he aa pehtlaimi bu in chuahnak ca a ṭial awk a si. An i pehtlaihnak vialte kha a chah dih a hau. *

17. A hmaanmi Khrihfa pakhat nih zei bantuk rian dah a hrial awk a si, zeicah?

¹⁷ A hmaanmi Khrihfa pakhat i vawlei lei a rian cu a Liannganmi Babilon he aa pehtlaimi a si nakhnga lo aa ralrin a hau. (2 Kor. 6:14-17) Tahchunhnak ah, anih cu church ah rian a ṭuan lai lo. Mah lengah a hmaan lomi biaknak caah an hmanmi inn ah lakhruak in a chuakmi a si lomi, nifa ṭuanmi rian hna kha a cohlan awk a si lo. Pumpak rian a ṭuanmi a si zongah a Liannganmi Babilon he aa pehtlaimi rian hna kha a cohlan awk a si lo. Zeicah cutin kan tuah awk a si? Zeicahtiah Pathian hmaiah a thiang lomi biaknak rianṭuannak le an sualnak hna ah i tel kan duh lo caah a si.—Isa. 52:11. *

18. Unaupa pakhat nih vawlei lei rian he aa tlaiin Baibal phunglam kha zeitindah a zulh?

¹⁸ A luancia kum tlawmpal lioah pumpak  rian a ngeimi Khrihfa upa pakhat kha a umnak khua i church ah lehtama ṭuan dingin rian tlaitu nih a sawm. Unaupa nih church hna ah rian ka ṭuan lai lo tiah a chim pengmi kha rian tlaitu nih a hngalh. Asinain atu ah rianṭuantu a herh tuk. Mah tikah unaupa nih Baibal phunglam kha a zulh i rian kha a al. A hmaizarh ah church vailamtah he cuanter in rian a cohlangmi lehtama pa hmanthlak kha cuka hmun i thanhca ah aa tel. Unaupa nih Baibal phunglam kha buar in mah rian kha rak cohlang sehlaw thanhca ah a hmanthlak kha aa tel lai. Zumtu khat Khrihfa pawl lakah zeitluk in dah a min a chiat lai ti khi ruathmanh. Jehovah nih zeitindah a intuar lai ti zong khi ruathmanh.

19-20. (a) Zei hna dah kan hngalh? (b) Zei hna dah kan hngalh rih lai?

¹⁹ Baibal ah a chimchung bantukin vawlei ah a rauhhlan ah a cang hngami, a biapi tukmi pakhat cu vawlei uktu pawl nih “a dai dih ko i a him dih ko” tiah an thanh hngami kha a si. Asinain Jehovah nih a kan cawnpiak caah miphun nih hlawhtlinnak taktak le daihnak taktak an hmu lai lo ti kha kan hngalh. Mah thil a can le hrawhnak a phanh hlanah zeidah kan tuah awk a si? Jehovah nih Pennak kong thawngṭha chimnak le zultu siternak rian ah kan rian i tamter awkah kan sinin aa ruahchan. Cun a hmaan lomi biaknak dihlak he kan i pehtlaih lo a hau. Mah ah a Liannganmi Babilon chungin chuah le a Liannganmi Babilon he aa pehtlaimi rian pawl hrial hna aa tel.

²⁰ “Ni hmanung bik” i donghnak caan chungah a dang thil a cang hngami a um rih. Jehovah nih kan sinin a dang thil tuah awk aa ruahchanmi zong a um rih. Mah hna cu zeidah an si, hmailei ah a cang hngami thil caah kanmah tein zeitindah kan i timhtuah khawh? Mah kong kha a hnu capar ah kan i ruah hna lai.