1. Akoz nou konvenki ki nou pe viv dan “bann dernyen zour”?

ESKI ou’n ne apre lannen 1914? Si wi, ou’n viv tou ou lavi dan “bann dernyen zour” sa lemonn. (2 Tim. 3:1) Nou tou nou’n tann konsernan bann levennman ki Zezi ti dir pou arive dan bann dernyen zour. Sa i enkli lager, mankman manze, tranblemandter, lepidemi, dimoun ki kas lalwa e ki persekit pep Zeova. (Mat. 24:3, 7-9, 12, not; Lik 21:10-12) Nou’n osi vwar ki dimoun i konport zot parey zapot Pol ti predir. (Vwar sa bwat “ Lafason ki dimoun i ete ozordi.”) Konman Temwen Zeova, nou konvenki ki nou pe viv “dan peryod final bann zour.”​—Mik. 4:1, NWT.

2. Ki serten kestyon enportan nou pou diskite dan sa lartik?

² En kantite letan in pase depi 1914, alor i bezwen ki nou pe viv pandan dernyen zour “bann dernyen zour.” Vi ki lafen i sitan pros, nou bezwen konn larepons serten kestyon enportan: Ki bann levennman ki pou arive a lafen “bann dernyen zour”? Osi, ki Zeova i anvi nou fer anmezir ki nou esper sa bann levennman?

3. Dapre sa profesi dan 1 Tesalonisyen 5:1-3, ki lanons bann nasyon pou fer?

³ Lir 1 Tesalonisyen 5:1-3. Zapot Pol i koz lo “zour Zeova.” Dan sa verse, zour Zeova pe refer avek en peryod letan. Sa “zour” pou konmanse ler “Gran Babilonn” ki reprezant tou fo larelizyon i ganny atake e i pou termin avek Armagedon. (Rev. 16:14, 16; 17:5) Zis avan sa “zour” i konmanse, bann nasyon pou fer en lanons konmkwa i  annan “lape ek sekirite!” Parfwa, bann dirizan lemonn i servi bann lekspresyon parey ler zot koz lo sa ki zot pe fer pour amelyor lanmitye ant bann pei. * Par kont, sa lanons ki Labib i koz lo la pou diferan. Akoz? Parski ler sa i arive, bokou dimoun pou krwar ki bann dirizan lemonn in reisi fer lemonn en landrwa kot tou dimoun i santi zot sen e sof. Me an realite, “gran ladetres” pou pe al konmanse e apre, “destriksyon pou vin lo zot en sel kou.”​—Mat. 24:21.

4. (a) Kwa ki nou pa ankor konnen konsernan sa lanons konmkwa i annan “lape ek sekirite”? (b) Ki nou deza konnen lo sa lanons?

⁴ Menm si i annan serten keksoz ki nou konnen lo sa lanons konmkwa i annan “lape ek sekirite,” i annan serten keksoz ki nou pa konnen. Par egzanp, nou pa konnen kwa ki pou arive ki pou fer bann dirizan fer sa lanons. Nou pa konnen ki mannyer sa lanons pou ganny fer. Nou osi pa konnen si i pou en sel lanons oubyen si i pou en seri lanons. Me sa ki nou konnen, se ki bann dirizan imen pa kapab anmenn lape lo later. Alor nou pa devret les sa lanons anbet nou. O kontrer, sa lanons i sa siny ki “zour Zeova” pe al konmanse. Sanmenm sa ki nou pe espere!

5. Dapre 1 Tesalonisyen 5:4-6, ki nou bezwen fer pour ki nou pare pour “zour Zeova”?

⁵ Lir 1 Tesalonisyen 5:4-6. Pour ki nou pare pour “zour Zeova,” nou bezwen aplik konsey Pol. Nou pa devret “dormi parey lezot pe fer.” Nou bezwen “reste eveye.” Par egzanp, nou bezwen fer sir ki nou pa zanmen partisip dan bann zafer politik. Si nou ti partisip dan sa bann keksoz, nou ti pou “form parti sa lemonn.” (Zan 15:19) Nou konnen ki zis Rwayonm Bondye ki pou anmenn lape partou lo later.

6. Ki nou anvi ed lezot pour fer e akoz?

⁶ I vre ki nou bezwen reste eveye, me nou osi anvi ed lezot pour “eveye,” setadir pour konn sa ki Labib i dir konsernan lavenir. Nou bezwen gard antet ki ler gran ladetres i konmanse, i pou tro tar pour dimoun konmans servi Zeova. I pour sa rezon ki nou travay predikasyon i sitan irzan! *

7. Ki Zeova i ekspekte nou fer la konmela?

⁷ Vi ki napa bokou letan avan ki “zour” Zeova i konmanse, Zeova i ekspekte ki nou reste okipe dan sa travay predikasyon. Nou bezwen fer sir ki nou “annan bokou keksoz pour fer dan travay Senyer.” (1 Kor. 15:58) Zezi ti predir sa ki nou pou fer. Ler i ti koz lo bann keksoz  enportan ki ti pou arive dan bann dernyen zour, i ti dir: “Me premyerman, sa bon nouvel i bezwen ganny anonse dan tou nasyon.” (Mark 13:4, 8, 10; Mat. 24:14) Zis mazinen: Sak fwa ou al predikasyon, ou pe ede akonpli sa profesi!

8. Ki mannyer nou konnen ki sa travay predikasyon pe marse?

⁸ Ki sa travay predikasyon in akonpli? Tou le-z-an, plis dimoun pe tann sa bon nouvel Rwayonm. Dan sa bann dernyen zour lakantite proklanmater in ogmante partou dan lemonn. Par egzanp, an 1914 i ti annan 5,155 proklanmater dan 43 pei. Me ozordi, i annan apepre 8.5 milyon proklanmater dan 240 pei! Me kantmenm sa, nou travay pa ankor fini. Nou bezwen kontinyen anonse ki Rwayonm Bondye i sel solisyon pour tou nou problenm.​—Ps. 145:11-13.

9. Akoz nou devret kontinyen anons sa bon nouvel Rwayonm?

⁹ Nou pou kontinyen anons sa bon nouvel Rwayonm ziska ki Zeova i dir nou arete. Ki kantite letan i reste pour dimoun aprann konn Zeova ek Zezi Kri? (Zan 17:3) Nou pa konnen. Me nou konnen ki tan ki gran ladetres pa ankor konmanse, tou dimoun ki annan “sa bon kondisyon leker pour ganny lavi eternel” i ankor kapab aksepte sa bon nouvel e swazir pour servi Zeova. (Akt 13:48) Ki mannyer nou kapab ed sa bann dimoun avan i tro tar?

10. Ki mannyer Zeova pe ed nou ansenny dimoun laverite?

¹⁰ Zeova pe servi son lorganizasyon pour donn nou tou sa ki nou bezwen pour ansenny dimoun laverite. Par egzanp, tou le semenn nou ganny formen dan nou renyon lasemenn. Dan sa renyon, nou aprann ki mannyer pour fer en premye konversasyon ek bann retourn vizit dan predikasyon. Nou osi aprann ki mannyer pour fer bann letid Labib. Lorganizasyon Zeova in osi donn nou bann Zouti predikasyon. Sa bann zouti i ed nou pour . . .

• konmans en konversasyon,

• anons sa mesaz dan en fason ki enteres dimoun,

• fer dimoun anvi aprann plis lo Labib,

• fer bann letid Labib,

•   ankouraz bann ki enterese pour al lo nou sit Enternet e pour asiste renyon.

Byensir, i pa ase pour zis annan sa bann zouti. Nou bezwen servi zot. * Par egzanp, apre ki ou’n ganny en bon konversasyon avek en dimoun ki enterese, ou kapab donn li en trak oubyen en magazin e i pou kapab lir plis lo sa topik ki zot in diskite ziska laprosenn fwa ki ou zwenn li. I nou responsabilite pour fer tou sa ki nou kapab dan sa travay predikasyon tou le mwan.

11. Akoz i annan Online Bible Study Lessons?

¹¹ En lot fason ki Zeova pe ed dimoun aprann laverite i atraver Online Bible Study Lessons lo jw.org^®. Akoz i annan sa bann leson? Tou le mwan, i annan en kantite dimoun partou dan lemonn ki servi Enternet pour rode ki zot kapab aprann lo Labib. Alor, bann leson lo nou sit Enternet i kapab ed sa bann dimoun pour konmans aprann lo Parol Bondye. Osi, i kapab ki ou zwenn serten dimoun ki ezite aksepte en letid Labib. Si sa i arive, montre zot sa bann leson lo nou sit Enternet oubyen anvoy zot en link pour sa bann leson. *

12. Ki en dimoun i kapab aprann ler i etidye Online Bible Study Lessons?

¹² Nou Online Bible Study Lessons i diskit lo sa bann size swivan: “The Bible and Its Author,” “The Bible’s Main Characters” ek “The Bible’s Message of Hope.” Ler en dimoun i etidye sa bann leson, i pou aprann:

• Ki mannyer Labib i kapab ed en dimoun

• Lekel Zeova, Zezi ek bann lanz

• Akoz Bondye in kree bann imen

• Akoz i annan soufrans ek bann move keksoz

Sa bann leson i osi eksplike ki mannyer Zeova pou . . .

• retir soufrans ek lanmor,

• resisit bann mor e

• ranplas bann gouvernman imen ki pa marse avek Rwayonm Bondye.

13. Si en dimoun i fini etidye Online Bible Study Lessons, eski i ankor bezwen etidye Labib avek en Temwen? Eksplike.

¹³ Sa bann leson lo nou sit Enternet pa vedir ki nou pa bezwen etidye Labib avek bann dimoun. Zezi in donn nou sa privilez pour fer disip. Nou swete ki bann ki etidye sa bann leson pou apresye sa ki zot aprann e ki sa pou fer zot anvi konn plis. Si sa i arive, petet zot pou aksepte en letid Labib. A lafen sak leson, sa dimoun i ganny demande si i ti a kontan etidye Labib avek son prop ansenyan. Sak zour lo nou sit Enternet, i annan apepre 230 dimoun sorti partou dan lemonn ki demann en letid Labib personnel. I vreman enportan pour zot etidye Labib avek en Temwen Zeova!

14. Dapre parol Zezi dan Matye 28:19, 20, ki nou bezwen esey fer e akoz?

¹⁴ Lir Matye 28:19, 20. Anmezir ki nou etidye Labib avek bann dimoun, nou bezwen fer nou mye pour ‘fer zot vin disip’ e “ansenny zot pour obei tou sa ki [Zezi in] donn zot lord pour fer.” Nou bezwen ed dimoun konpran akoz i enportan pour zot swazir pour servi Zeova e siport son Rwayonm. Sa i vedir nou bezwen esey ed zot aplik sa ki zot aprann, dedye zot lavi avek Zeova e batize. Zot bezwen fer sa  pour zot pa ganny detrir pandan zour Zeova.​—1 Pyer 3:21.

15. Ki nou pa kapab kontinyen fer e akoz?

¹⁵ Parey i’n ganny mansyonnen pli boner, i pa reste bokou letan avan lafen sa lemonn i arive. Alor nou pa kapab kontinyen etidye Labib avek bann dimoun ki pa fer bann sanzman ki montre ki zot anvi vin en serviter Zeova. (1 Kor. 9:26) Nou travay i irzan! I ankor annan bokou dimoun ki bezwen tann sa mesaz Rwayonm avan i tro tar.

16. Dapre Revelasyon 18:2, 4, 5, 8, ki nou tou nou bezwen fer? (Vwar not osi.)

¹⁶ Lir Revelasyon 18:2, 4, 5, 8. Sa bann verse i montre nou en lot keksoz ki Zeova i ekspekte avek son bann serviter. Tou vre Kretyen i bezwen fer sir ki zot napa nanryen pour fer avek Gran Babilonn. Avan ki en etidyan Labib ti aprann laverite, i kapab ki i ti form parti en fo larelizyon. Petet i ti al zot bann servis relizye e partisip dan zot bann aktivite. Oubyen i kapab ki i ti fer bann kontribisyon pour sa lorganizasyon. Avan ki en etidyan Labib i kapab vin en proklanmater non batize, i bezwen fer sir ki i nepli annan nanryen pour fer avek fo larelizyon. I devret ekri en let sa legliz oubyen okenn lezot lorganizasyon relizye ki i ti form parti e dir zot ki i nepli enn zot manm. *

17. Ki kalite travay bann Kretyen i bezwen evite fer e akoz?

¹⁷ En vre Kretyen i bezwen fer sir ki son travay napa nanryen pour fer avek Gran Babilonn. (2 Kor. 6:14-17) Par egzanp, i pa pou anploye avek en legliz. Deplis, en Kretyen ki anploye avek en biznes pa pou anvi fer en kantite travay lo en batiman ki promot fo ladorasyon. Osi, si i annan son prop biznes, i pa pou fer bann demars pour ganny en kontra oubyen aksepte en kontra pour travay avek okenn lorganizasyon ki annan pour fer avek Gran Babilonn. Akoz sa i en keksoz vreman serye? Parski nou pa anvi pran par dan okenn keksoz ki annan pour fer avek fo lansennyman ek move pratik bann fo larelizyon ki enpir dan lizye Bondye.​—Iza. 52:11. *

18. Ki mannyer en frer ti swiv bann prensip Labib konsernan son travay?

 ¹⁸ Plizyer lannen pase, en kontrakter ti demann en ansyen ki ti annan son prop biznes pour fer en pti travay sarpantye kot en legliz dan sa lavil kot sa frer ti reste. Sa kontrakter ti konnen ki sa frer ti’n toultan dir ki i pa pou travay kot bann legliz. Me safwasi, sa kontrakter ti vreman bezwen en dimoun pour fer sa travay. Kantmenm sa, sa frer ti determinen pour swiv bann prensip Labib e i pa ti aksepte sa travay. Dan zournal son semenn answit, i ti annan portre en lot sarpantye pe met en lakrwa lo sa legliz. Si sa frer ti’n sanz son nide e aksepte sa louvraz, i kapab ki i ti pou son portre dan sa zournal. Pa sa ti pou’n kapab gat son repitasyon parmi bann frer ek ser! Mazin osi lo ki mannyer Zeova ti pou’n santi.

19-20. (a) Ki nou’n aprann ziska aprezan? (b) Kwa ankor ki nou bezwen aprann?

¹⁹ Dapre Labib, sa lot profesi enportan ki pou ganny akonplir byento, se ki bann dirizan lemonn pou fer sa lanons konmkwa i annan “lape ek sekirite.” Gras a Zeova, nou konnen ki bann nasyon pa pou kapab anmenn vre lape ki dire. Ki nou devret fer avan ki sa i arive e destriksyon i vin en sel kou? Zeova i ekspekte ki nou reste okipe dan sa travay predikasyon e ki nou kontinyen esey fer plis disip. An menm tan, nou bezwen fer sir ki nou napa nanryen pour fer avek tou fo larelizyon. Sa i osi vedir ki nou nepli en manm Gran Babilonn e ki nou pa fer okenn travay ki annan pour fer avek fo larelizyon.

²⁰ I annan lezot levennman ki pou arive pandan dernyen zour “bann dernyen zour.” I osi annan lezot keksoz Zeova i ekspekte nou fer. Ki sa bann keksoz e ki mannyer nou kapab prepar nou pour sa ki pou arive byento? Nou pou vwar sa dan sa lot lartik.