1. Kijanfè nou sèten kè nou ka viv pannan « sé dènyé jou-la » ?

ÈS OU fèt apré 1914 ? Si sé sa, dépi ou asi latè, sé yenki pannan « dènyé jou » a sistèm-lasa ou ka viv (2 Tim. 3:1). Jézi té anonsé kè pannan péryòd-lasa té ké ni lagè, moun té ké mò fen, té ké ni tranmanntè, té ké ni maladi, moun pa té’é ka rèspèkté lalwa ankò é yo té ké pèwsékité pèp a Bondyé plis ankò (Mat. 24:3, 7-9, 12 ; Lik 21:10-12). Noutout ka vwè é noutout ka tann kè sé biten-lasa ka réyalizé. Anplisdisa, nou ja vwè tèlman moun konpòwté-yo kon lapòt Pòl té anonsé ! (gadé ti karé-la «  Konnyéla, sé moun-la... »). Nou ki sé adoratè a Jéova, nou sèten kè nou ka viv pannan « sé dènyé jou-la » (Mich. 4:1).

2. A ki kèsyon nou ké réponn ?

² Onpakèt tan ja pasé dépi 1914. Sé pousa nou pé di kè jòdijou, « sé dènyé jou-la » toupré bout. Men konm nou sav kè fen a sistèm-la toupré rivé, nou bizwen konnèt répons a sé kèsyon lasa : Ki évènman ki ké fèt lè sé « dènyé jou-la » ké toupré bout ? É ka Jéova vlé-nou fè pannan nou ka atann sé évènman-lasa ?

3. Dapré pwofési-la ki adan 1 Tésalonisyen 5:1-3, ki anons sé nasyon-la ké fè ?

³ (Li 1 Tésalonisyen 5:1-3). Adan sé vèwsé-lasa, Pòl ka palé dè « jou a Jéova ». Lè nou ka gadé adan lézékriti,  yo ka sèvi èvè èksprésyon-lasa pou palé dè on péryòd ki ka koumansé lè yo ké ataké « Gran-Babilòn-la » kivédi tout sé fo rèlijyon-la. É péryòd-lasa ké fin èvè Awmagédon (Rév. 16:14, 16 ; 17:5). Jis avan jou-lasa koumansé, sé nasyon-la ké anonsé on mésaj. Yo ké anonsé « Lapé é lasékirité ! » Pawfwa, sé dirijan politik la ka itilizé èksprésyon ki ka sanm sila lè yo ka di kè fò sé nasyon-la antann-yo plibyen *. Men anons-la ki an Bib-la anrapò èvè « Lapé é lasékirité » pé’é ni menm rézilta-la. Poukwa ? Pas lèwvwè anons-lasa ké fèt, onlo moun pé rivé a kwè kè sé dirijan politik la rivé mèt lòd asi latè, é sé moun-la ké santi-yo ansékirité. Men an réyalité, aprésa, « gwo tribilasyon-la » ké koumansé é sé moun-la « ké détwi onsèl kou » (Mat. 24:21).

4. a) Ka i ka rété-nou a dékouvè anrapò èvè anons a « Lapé é lasékirité ! » ? b) Ka nou ja sav asi anons-lasa ?

⁴ Nou konnèt onlo biten asi anons a « Lapé é lasékirité ! ». Men ni onlo biten nou pa konnèt osi. Nou pa konnèt ka ki ké pousé sé chèf politik la a fè anons-lasa é nou pa konnèt kijan sa ké fèt nonplis. Nou pa konnèt si sé onsèl gwo anons ki ké fèt oben si sé ké plizyè anons. Men kèlkèswa sa ki ké pasé, onsèl biten nou sav sé kè fò pa nou lésé sé dirijan politik la fè-nou kwè kè yo rivé mèt lapé si latè. Men okontrè, lè yo ké palé dè lapé é dè lasékirité, nou ké sonjé mésaj-la ki an Bib-la é sa ké vlé di kè « jou a Jéova » toupré koumansé !

5. Kijan sa ki maké adan 1 Tésalonisyen 5:4-6 ka édé-nou préparé-nou pou « jou a Jéova » ?

⁵ (Li 1 Tésalonisyen 5:4-6). Adan sa Pòl maké, i ka di-nou ka pou nou fè pou nou paré lè « jou a Jéova » ké rivé. Fò pa nou « dòmi kon sélézòt moun-la ». Fò-nou « rété véyatif ». Pa ègzanp, fò-nou fè atansyon pou nou pa mélanjé-nou adan biten politik a mond-lasa. Si nou pa ka rété lwen a sé biten-lasa, nou pé touvé-nou ka « fè pati a mond-la » (Jan 15:19). Nou sav kè sé Wayòm a Bondyé tousèl ki pé mèt lapé si toutlatè.

6. Ka nou vlé fè pou nou édé sé moun-la, é poukwa nou ka fè sa ?

⁶ Nou ka rété véyatif, men anmenmtan nou ka éséyé ‘soukré’ sé moun-la lè nou ka édé-yo konprann kè sa Labib té anonsé ka réyalizé jòdijou. Fò-nou sonjé kè lè gwo tribilasyon-la ké koumansé, a moman-lasa i ké ja two ta pou moun mété-yo ka sèvi Jéova. Sé pousa fò-nou préché san tadé *.

7. Ka Jéova vé nou fè aprézan ?

⁷ Pannan ti tan-la ki ka rété la avan « jou » a-y rivé, Jéova vé nou rété byen okipé adan travay a prédikasyon-la. Fò-nou toujou aranjé-nou pou nou ni « onlo biten a fè adan travay a Ségnè-la » (1 Kor. 15:58). Jézi té ja di ka nou té’é ni a fè. Lè i fin palé dè tout sé évènman enpòwtan la ki té’é fèt pannan sé dènyé jou-la, mi sa i di : « Anplisdisa, fò préché bon nouvèl-la dabò pou tout sé nasyon-la » (Mawk 13:4, 8, 10 ; Mat. 24:14). Réfléchi si lidé-lasa : chakfwa ou ka préché, ou ka fè pa a-w pou pwofési-lasa réyalizé.

8. Poukwa nou pé di kè travay a prédikasyon-la ka kontinyé fè douvan ?

⁸ Ki bèl rézilta prédikasyon-la ka pòté ? Pi lanné ka pasé é pi ni moun ka tann bon nouvèl a Wayòm-la. Pa ègzanp, gadé kijan kantité pwoklamatè ki ni si toutlatè ka ògmanté pannan sé dènyé jou-la. An 1914 té ni 5 155 pwoklamatè adan 43 péyi. Konnyéla, yo a 8,5 milyon adan 240 péyi é téritwa ! Men sa pa vé di kè travay a prédikasyon-la fin. Fò-nou kontinyé anonsé sé moun-la kè Wayòm a Bondyé sé sèl solisyon a pwoblèm a limanité (Sòm 145:11-13).

9. Poukwa fò-nou kontinyé préché mésaj a Wayòm-la ?

⁹ Toutotan Jéova pa di kè travay a prédikasyon-la arété, nou ké kontinyé préché. Komen tan ka rété sé moun-la ankò pou aprann konnèt Jéova é Jézi ? (Jan 17:3). Nou pa sav. Men sa nou sav sé kè toutotan gwo tribilasyon-la po’o koumansé, moun ki ni « mantalité-la ki fo la pou ni lavi étèwnèl » pé aksèpté bon nouvèl-la toujou é yo pé chwazi sèvi Jéova (Akt 13:48). Kijan nou pé édé sé moun-la avan i two ta ?

10. Ka Jéova ka ban-nou pou édé-nou anségné sé moun-la ?

¹⁰ Jéova ka sèvi èvè òwganizasyon a-y pou ban-nou tousa nou bizwen pou anségné moun lavérité. Pa ègzanp, réinyon-la nou ni an simenn-la ka fòwmé-nou. Réinyon-lasa ka montré ka pou nou di lè sé prèmyé fwa nou ka jwenn on  moun é lè nou ka viré vwè on moun. I ka montré-nou osi kijan pou nou fè on étid. Anplisdisa, òwganizasyon a Jéova ka ban-nou on bwèt a zouti pou anségné é adan-y ni tousa nou bizwen. Grasa sé zouti-lasa nou pé...

• koumansé palé dè Labib èvè on moun,

• touvé on sijé ki ka entérésé sé moun-la,

• ba moun anvi konnèt plis asi Labib,

• anségné lavérité lè nou ka fè on étid,

• ankourajé moun ki ka kouté-nou ay asi sit entèwnèt an nou é envité-yo a vin adan Sal di Wayòm an nou.

Men apatoudi ni tout sé zouti-lasa. Fò-nou itilizé-yo *. Pa ègzanp, apré ou fè on bèl ti kozé èvè on moun kè lavérité ka entérésé, si ou lésé on trak oben on jounal ba-y, i ké pé li-y annatandan ou viré vwè-y ankò. Préché sé on rèsponsabilité nou ni. Donk fò-nou fè tousa nou pé pou nou fè travay-lasa chak mwa.

11. Poukwa yo fè on ribrik ki ka pèwmèt moun étidyé Labib asi entèwnèt ?

¹¹ Jéova ka édé sé moun-la konnèt lavérité ondòt jan ankò. An-nou palé dè étid biblik ki pé fèt si entèwnèt * asi jw.org^®. Poukwa yo fè sé lèson biblik lasa ? Chak mwa, onpakèt moun si toutlatè ka chèché a étidyé Labib asi entèwnèt. Ében, asi sit an nou, ribrik-lasa pé pèwmèt-yo konnèt vérité ki adan Pawòl a Bondyé. Lè ou ka préché, ou ka pwopozé moun étidyé Labib men délè yo ka pè aksèpté. Adan on ka konsa, montré-yo ribrik-lasa dirèktèman asi sit an nou oben voyé lyen-la ki ka menné-yo asi ribrik-lasa ba yo.

12. Ka on moun pé aprann grasa lèson biblik ki asi entèwnèt ?

¹² Ni plizyè pawti adan sé lèson biblik lasa. Tit a chak pawti sé : « La Bible et son Auteur », « Les principaux personnages de la Bible » é « Le message d’espoir de la Bible ». Lè on moun ka étidyé sé diféran lèson-lasa, i pé aprann...

• kijan Labib pé édé-nou,

• kimoun ki Jéova, kimoun ki Jézi, é kimoun sé zanj-la yé,

• poukwa Bondyé kréyé lézimen,

• poukwa ni soufrans é poukwa lèmal ka ègzisté.

Sé lèson-la ka èspliké osi kijan Jéova...

• ké fè soufrans é lanmò disparèt,

• ké résisité sé mò-la,

• ké fè Wayòm a-y pran plas a tout gouvènman ki asi latè pas yo pa réyisi chanjé ayen.

13. Si on moun ka étidyé Labib asi entèwnèt, ès i bizwen étidyé èvè on Témwen kanmenm ? Bay on ti èsplikasyon.

¹³ Lèson biblik on moun pé fè asi entèwnèt pa ka ranplasé étid i pé fè èvè on Témwen. Fè disip, sé on rèsponsabilité Jézi ban-nou. Nou ka èspéré kè moun ki ka entérésé-yo a lavérité ké sèvi èvè sé lèson-la ki asi entèwnèt la. Nou ka èspéré osi kè yo ké enmé sa yo ka aprann é kè yo ké vé sav plis biten. Konsa, pétèt yo ké aksèpté étidyé Labib èvè on moun. Dayè sé sa yo ka ankourajé sé moun-la a fè an bout a chak lèson. Chakjou, ni apépré 230 moun toupatou si latè ki ka enskri-yo anlè sit an nou pou on moun vin étidyé èvè yo. Lè on anségnan ka fè étid a on moun sa ka ba moun-la on fòwmasyon ki enpòwtan toubònman !

14. Dapré sa Matyé 28:19, 20 ka di, ki éfò pou nou fè, é poukwa ?

¹⁴ (Li Matyé 28:19, 20). Lè nou ka étidyé èvè on moun, fò-nou fè éfò pou nou ‘fè disip’ é ‘aprann-yo fè tousa [Jézi] mandé-[nou] fè’ (Mat. 28:19, 20). Fò-nou édé sé moun-la konprann kè sé Jéova pou yo sèvi é kè fò-yo soutyenn wayòm a-y. Sé 2 biten ki enpòwtan toubònman. Savédi kè fò-nou ankourajé-yo apliké sa yo ka aprann an vi a yo. Anplisdisa, fò-nou ankourajé-yo ba Jéova vi a yo é pran lèbatèm. Sé yenki konsa yo ké pé rété vivan lè jou a Jéova ké rivé (1 Pyè 3:21).

15. Ka nou pé pa pèwmèt-nou dè fè, é poukwa ?

¹⁵ Kon nou di talè-la, fen a mond-lasa toupré rivé. Nou pé pa ka pèwmèt-nou dè kontinyé fè étid a moun ki pa ni pon lentansyon vin disip a Kris (1 Kor. 9:26). Fò-nou pòté bon mannèv an prédikasyon ! Ni bon enpé moun toujou ki po’o tann bon nouvèl a Wayòm-la é fò-yo tann-li avan i two ta.

16. Dapré sa ki maké adan Révélasyon 18:2, 4, 5, 8, ka fò-noutout fè ? (gadé nòt-la osi).

¹⁶ (Li Révélasyon 18:2, 4, 5, 8). Sé vèwsé-lasa ka montré ni ondòt biten ankò Jéova ka atann dè sèwvitè a-y. Fò tout sé vré krétyen-la rété lwen Gran Babilòn-la. Pétèt avan i vin konnèt lavérité, on étidyan a Labib té adan on fo rèlijyon. Pétèt i té k’ay lanmès, i té ka pawtisipé adan sa Légliz a-y té ka òwganizé oben i té ka bay on monné pou soutyenn légliz-lasa. Men pou i pé sa vin on pwoklamatè ki po’o batizé, fò i koupé lépon karéman èvè fo-rèlijyon-la. Sa té’é byen kè i voyé on lèt ba Légliz-la pou di-yo radyé-y oben kè i touvé ondòt mwayen pou fè-yo konprann sa. Men sa ki pli enpòwtan, sé kè yo konprann byen kè non sèlman i vé pa fè pawti a légliz-lasa ankò, men kè i vé pa ay adan pondòt biten ki lyanné èvè Gran Babilòn-la nonplis *.

17. Ki travay on krétyen pa dwèt aksèpté é poukwa ?

¹⁷ Fò on vré krétyen gadé byen si travay a-y pa lyanné èvè Gran Babilòn-la (2 Kor. 6:14-17). Pa ègzanp, i pé’é travay pou on Légliz anponjan. Anplisdisa, menmsi on krétyen ka travay pou on antrèpriz, i pé ké pawtisipé adan pon gwo travo ki ka fèt on koté fo-rèlijyon-la  ka itilizé. É si i ni antrèpriz a-y, i pé’é signé pon kalté kontra pou travay pou Gran Babilòn-la. Poukwa nou karé si sa konsa ? Pas nou vé pa pawtisipé adan pon aktivité, ni adan pon péché a rèlijyon ki pa pwòp pou Bondyé * (Iz. 52:11).

18. On frè té ni a désidé si i ka aksèpté on travay ou si i pa ka aksèpté-y men i rété fidèl a prensip a Labib. Kijan i fè sa ?

¹⁸ An-nou palé dè on ansyen ki té chawpantyé é ki té ka travay pou limenm. Ni kèlkè lanné dè sa, on antrèprènè mandé frè-lasa si i pé fè dé ti travo adan on légliz ki té an vil-la la frè-la té ka rété la. I té sav frè-la té toujou di kè i pé’é jen travay adan pon légliz, men i pa té ka touvé pondòt moun pou fè sé travo-la. Men frè-la pa démòd é i rété fidèl a prensip a Labib. I pa aksèpté travay-la. Simenn apré, adan jounal a péyi-la, té ni foto a ondòt chawpantyé ki té ka maré on kwa asi légliz-la. Si frè-la té lagé on may, sé foto a-y ki té’é anlè jounal-lasa ! Ou ka imajiné-w kijan sa té’é sali répitasyon a-y lè sé frè é sè-la té’é vwè sa ! É kanta sa Jéova té’é rèsanti, pa menm palé !

19-20. a) Ka nou aprann jousalè ? b) Ki dòt biten pou nou konnèt ankò ?

¹⁹ Dapré sa pwofési a Labib ka di, ni on gran évènman mondyal ki ké fèt talè. Sé nasyon-la ké di : « Lapé é lasékirité ! ». Grasa sa Jéova aprann-nou, nou sav kè sé nasyon-la pé’é pé mèt on lapé sèryé, ki ka diré, asi latè. Lè évènman-lasa ké fèt, lafen ké rivé onsèl kou. Alò ka pou nou fè avan sa ? Jéova vé nou rété okipé ka préché Wayòm a-y, é kè nou kontinyé fè tousa nou pé pou fè plis disip. Anmenmditan, fò-nou koupé lépon èvè fo-rèlijyon-la. Pou nou rivé fè sa, fò-nou fè-yo woté non an nou asi lis a moun ki adan Gran Babilòn-la, é fò pa nou aksèpté on travay ki ni on rapò èvè-y nonplis.

²⁰ Ni dòt évènman ki ké fèt lè sé « dènyé jou »-la ké toupré bout. É ni dòt biten ankò Jéova vlé nou fè. Ki biten ésa ? É kijan nou pé préparé-nou pou tousa ki kay fèt talè ? Sé sa nou ké vwè adan awtik-la ki ka vin la.