1. ¿Mbaʼérepa jaʼe jaikoha “umi ára pahápe”?

OIMÉRÕ nde renaséma áño 1914 rire, upéva heʼise tóda la vída reiko hague ko múndo “ára pahápe” (2 Tim. 3:1). Enterovete jahecha térã ñahendu mbaʼéichapa oñekumpli umi mbaʼe Jesús heʼi vaʼekue oikotaha ko tiémpope, por ehémplo, oĩ gérra, ñembyahýi, terremóto ha mbaʼasy. Avei hetave umi iñañáva ha opersegíva Jehová puévlope (Mat. 24:3, 7-9, 12; Luc. 21:10-12). Jahecha avei mbaʼéichapa umi hénte oñekomporta apóstol Pablo heʼi haguéicha. (Ehecha pe rrekuádro heʼíva “ Mbaʼéichapa umi hénte oñekomporta koʼág̃a”). Enterovete ñande jaadoráva Jehovápe ñaĩ konvensído jaikoha “umi ára pahápe”, ha upéva opa potaitemaha (Miq. 4:1).

2. ¿Mbaʼe porandúpa iporãta ñakontesta?

² Ojapóma ningo mas de 100 áño jaikóma hague “umi ára pahápe”, ha jaʼekuaa og̃uahẽ mbotaitemaha huʼãme. Upévare iporãta ñakontesta koʼã porandu iñimportantetéva: “¿Mbaʼe mbaʼépa oikóta oñemohuʼãvo koʼã ‘ára paha’? ¿Ha mbaʼépa Jehová oipota jajapo ñahaʼarõ aja?”.

3. Heʼiháicha 1 Tesalonicenses 5:1-3, ¿mbaʼépa oanunsiáta umi nasión?

³ (Elee 1 Tesalonicenses 5:1-3). Apóstol Pablo oñeʼẽ “Jehová ára” rehe. ¿Mbaʼépa hína upéva? Ko téxtope, “Jehová ára” haʼe hína pe tiémpo oñepyrũtava ojeataka vove ‘Babilonia Guasúpe’ haʼéva entéro umi rrelihión japu, ha opátava Armagedónpe (Apoc. 16:14, 16; 17:5). Oñepyrũ mboyvemi  upe “ára”, umi nasión oanunsiáta ‘jaikomaha pyʼaguapýpe ha segúro porã’. Umi goviérno sapyʼánte oipuru jepi koʼãichagua palávra omombeʼu hag̃ua mbaʼéichapa haʼekuéra oñehaʼã oiko porã umi ótro país ndive. * Péro pe anúnsio oñeʼẽha la Biblia idiferénteta. ¿Mbaʼérepa? Pórke ojejapo vove upe anúnsio, heta hénte oroviáta ojeikomaha pyʼaguapýpe umi goviérno rupive. Péro ndoikuaaiete upe rire ‘oñeimoʼãʼỹve jave oñehunditaha hikuái’ (Mat. 24:21).

4. a) ¿Mbaʼe mbaʼépa ndajaikuaái pe anúnsio ojejapótavagui? b) ¿Mbaʼépa la jaikuaáva upe anúnsiogui?

⁴ Oĩ ningo algúna kósa jaikuaáva upe anúnsiogui. Péro oĩ avei heta mbaʼe ndajaikuaáiva. Por ehémplo, ndajaikuaái mbaʼépa omomýita umi nasiónpe oanunsia hag̃ua ‘jaikomaha pyʼaguapýpe ha segúro porã’, ni mbaʼéichapa ojapóta upéva. Ndajaikuaái avei una véntepa ojeʼéta térãpa heta vése. Péro si jaikuaa porã ndajahejái vaʼerãha upe anúnsio ñanembotavy ha ñapensa umi goviérno añetehápe oguerumaha pe pyʼaguapy ko múndope. Upéva rangue, ñanemanduʼa vaʼerã upe anúnsio haʼeha pe señál ñahaʼarõitéva, ohechaukáva “Jehová ára” oñepyrũ mbotaitemaha.

5. ¿Mbaʼéichapa 1 Tesalonicenses 5:4-6 ñanepytyvõ ñaime hag̃ua preparádo og̃uahẽ vove “Jehová ára”?

⁵ (Elee 1 Tesalonicenses 5:4-6). Pablo omombeʼu ñandéve mbaʼépa jajapo vaʼerã ñaime hag̃ua preparádo og̃uahẽ vove “Jehová ára”. Haʼe heʼi porã: “Aníkena jake umi ótro ojapoháicha, síno japyta japayhápe”, ha ñañatende porã. Por ehémplo, ñañatende vaʼerã ani hag̃ua ñañentremete polítikape ha upéva káusa nañaneneutralvéi. Ndajajekuidáiramo, ikatu hína jaiko “umi hénte ko mundopegua oikoháicha” (Juan 15:19). Ñande jaikuaa porã Ñandejára Rréino añoite oguerutaha pyʼaguapy ko múndope.

6. ¿Mbaʼéichapa ikatu ñaipytyvõ umi héntepe, ha mbaʼérepa jajapo vaʼerã upéva?

⁶ Péro ndahaʼéi ñandénte la japáy vaʼerã, síno ñaipytyvõ vaʼerã avei umi héntepe opáy hag̃ua. Ñaipytyvõ vaʼerã chupekuéra oikuaa hag̃ua mbaʼépa la Biblia heʼi oikotaha ko múndore. Ñanemanduʼa vaʼerã oñepyrũma guive pe jehasa asy guasu, umi hénte ndaikatumoʼãveimaha oñepyrũ oservi Jehovápe. Upévare tekotevẽterei japredika koʼág̃a. *

7. ¿Mbaʼépa Jehová oipota jajapo koʼág̃a?

⁷ Saʼietereíma ningo ofalta og̃uahẽ hag̃ua “Jehová ára”, ha ñahaʼarõ aja upéva haʼe oipota japredika meme. ‘Siémpre ñanerembiapo heta vaʼerã ñande Ruvicha servísiope’ (1 Cor. 15:58). Jesús heʼi vaʼekue mbaʼépa oikóta kuri umi ára pahápe ha avei mbaʼépa  ojapóta Ñandejára siervokuéra. Haʼe heʼi: “Avei umi notísia porã ojepredika raẽ vaʼerã opa tetãrupi ou mboyve pe fin” (Mar. 13:4, 8, 10; Mat. 24:14). Epensamíntena: káda ke resẽ repredika, nde reipytyvõ hína oñekumpli hag̃ua ko profesía.

8. ¿Mbaʼérepa jaʼe ñane rembiapo okakuaaveha ohóvo?

⁸ Káda áño heta hetave umi hénte oaseptáva pe notísia porã oñeʼẽva Ñandejára Rréinore. Epensamína mbaʼéichapa heta hetave ohóvo umi opredikáva koʼã ára pahápe. Áño 1914-pe oĩ kuri 5.155 puvlikadór 43 paíspe. Koʼág̃a katu ñaime 8.500.000 rupi 240 país ha territóriope. Péro ñane rembiapo ndopái gueteri. Ñande jasegi vaʼerã ñamombeʼu umi héntepe Ñandejára Rréino añoite ikatuha osolusiona umi provléma jarekóva (Sal. 145:11-13).

9. ¿Mbaʼérepa jasegi vaʼerã japredika umi notísia porã?

⁹ Ñande jasegíta japredika Jehová heʼi peve pe tembiapo opamaha. ¿Mboy tiémpopa hemby umi hénte oikuaa hag̃ua Jehová ha Jesúspe? (Juan 17:3). Upéva ndajaikuaái. Péro si jaikuaa nog̃uahẽi aja pe jehasa asy guasu entéro “umi ipyʼaporãva ohupyty hag̃ua jeikove opaveʼỹva” ikatuha gueteri oasepta umi notísia porã ha oñepyrũ oservi Jehovápe (Hech. 13:48). Upévare koʼág̃ama ñaipytyvõ vaʼerã umichagua héntepe, ani tárde jepe. ¿Mbaʼéichapa ikatu jajapo upéva?

10. ¿Mbaʼe mbaʼépa Jehová omeʼẽ ñandéve ñamboʼe hag̃ua umi héntepe pe añetegua?

¹⁰ Iñorganisasión rupive, Jehová omeʼẽ ñandéve entéro mbaʼe ñaikotevẽva ñamboʼe hag̃ua umi héntepe pe añetegua. Por ehémplo káda semána ñanerekomboʼe pe rreunión éntre semanaguápe. Ko rreunión ñanepytyvõ jaikuaa hag̃ua mbaʼépa ikatu jaʼe pe primera konversasiónpe, pe rrevisítape ha avei mbaʼéichapa ikatu jajapo estúdio bíblico. Jehová organisasión omeʼẽ avei ñandéve pe kit de enseñánsa. Péva ñanepytyvõ koʼã mbaʼépe:

• ñamoñepyrũ hag̃ua peteĩ konversasión,

• iñinteresánte hag̃ua la jaʼéva,

• ñaipytyvõ umi héntepe oikuaaseve hag̃ua la Bíbliagui,

• ñamboʼe hag̃ua pe añetegua jajapo jave estúdio bíblico, ha

• ñainvita umi oikuaasevévape oike hag̃ua ñande sítio de Internétpe ha oho hag̃ua Salón del Réinope.

 Péro ndahaʼéi jarekónte vaʼerã pe kit de enseñánsa, síno jaipuru vaʼerã. * Por ehémplo, reñemongeta kyreʼỹ rire peteĩ persónandi ikatu reheja chupe peteĩ tratádo térã peteĩ rrevísta, péicha haʼe ikatúta oleeve nde reju jey peve revisita hag̃ua chupe. Enterovetéva ñañehaʼã vaʼerã ñanerembiapo heta predikasiónpe káda mes.

11. ¿Maʼerãpa ojejapo pe seksión Estúdio bíblico Internétpe?

¹¹ Jahechamína mbaʼéichapa Jehová oipytyvõ avei umi héntepe oikuaa hag̃ua pe añetegua. Ñande sítio de Internétpe oĩ pe Estúdio bíblico Internétpe. * ¿Maʼerãpa ojejapo upéva? Káda mes hetaiterei persóna ko múndo tuichakuére oheka Internétpe estúdio bíblico. Umi leksión oĩva ñande sítiope ikatu oipytyvõ chupekuéra oikuaa hag̃ua mbaʼépa añetehápe omboʼe la Biblia. Oĩ persóna sapyʼánte odudáva oasepta hag̃ua peteĩ estúdio bíblico. Oimérõ upéicha, ikatu jahechauka chupekuéra ko seksión oĩva ñande sítiope, térã ñamondo chupe pe direksión otopa hag̃ua peteĩ idióma ontendévape.

12. ¿Mbaʼépa umi hénte ikatu oaprende pe Estúdio bíblico Internétpe?

¹² Pe Estúdio bíblico Internétpe oñeanalisa heta téma, por ehémplo, la Biblia ha ijapohare, umi personáhe prinsipál oĩva la Bíbliape ha mbaʼe esperánsapa omeʼẽ ñandéve Ñandejára Ñeʼẽ. Umi hénte ostudiávo umi leksión, oaprendéta koʼã mbaʼe:

• mbaʼéichapa la Biblia ñanepytyvõ,

• mávapa Jehová, Jesús ha umi ánhel,

• mbaʼérepa Ñandejára okrea yvyporakuérape, ha

• mbaʼérepa oĩ sufrimiénto ha hénte iñañáva.

Umi leksión avei ohechauka koʼã mbaʼe:

• mbaʼéichapa Jehová oipeʼáta pe sufrimiénto ha ñemano,

• mbaʼéichapa omoingove jeýta umi omano vaʼekuépe, ha

• mbaʼéichapa Irréino rupive ohundíta umi goviérno umáno ndovaléivape mbaʼeverã.

13. ¿Orremplasápa umi leksión oĩva Internétpe pe estúdio bíblico jajapóvape umi héntepe? Emyesakã.

¹³ Umi leksión oĩva Internétpe norremplasái pe estúdio bíblico jajapóvape umi persónandi. Jesús omanda vaʼekue ñandéve ñaipytyvõ hag̃ua umi héntepe oiko hag̃ua chuguikuéra idisípulo, ha upéva peteĩ priviléhio tuichaitereíva. Umi leksión oĩva Internétpe ojejapo ikatu hag̃uáicha umi hénte olee, ovalora la oaprendéva ha oikuaaseve. Péicha oikóramo ikatu hína upéi oasepta peteĩ estúdio bíblico. Opávo káda leksión, oñeinvita pe persónape ojerure hag̃ua álgien toho hendápe omboʼe hag̃ua chupe la Biblia. Ñande sítio de Internet rupive, ko múndo tuichakuére káda día ojejerure mas de 230 estúdio bíblico. Iñimportanteterei ningo koʼã persóna ostudia la Biblia peteĩ Testígondi.

14. Jesús omanda haguéicha Mateo 28:19, 20-pe, ¿mbaʼépa ñañehaʼãmbaite vaʼerã jajapo, ha mbaʼérepa?

¹⁴ (Elee Mateo 28:19, 20). Jajapo jave umi estúdio bíblico ñañehaʼãmbaite vaʼerã ñaipytyvõ umi héntepe oiko hag̃ua chuguikuéra Jesús disípulo ha ñamboʼe chupekuéra ojapo hag̃ua entéro mbaʼe haʼe omanda vaʼekue. Ñaipytyvõ vaʼerã chupekuéra ontende hag̃ua iñimportanteha oservi Jehovápe ha oapoja Irréino. Upéva heʼise tekotevẽha ñamokyreʼỹ  chupekuéra ojapo hag̃ua umi mbaʼe oaprendéva, ojededika Jehovápe ha ojevautisa. Upéicharõ añoite ojesalváta hikuái Jehová árape (1 Ped. 3:21).

15. ¿Mbaʼé mbaʼépepa ndaikatúi japerde ñane tiémpo, ha mbaʼérepa?

¹⁵ Jaʼéma haguéicha ajeʼi, saʼipaitéma pe tiémpo hembýva oñehundi hag̃ua Satanás múndo. Upévare ndaikatúi japerde ñane tiémpo jastudiávo umi persóna ndojapóivandi mbaʼeveichagua kámbio oiko hag̃ua chuguikuéra Jesús disípulo (1 Cor. 9:26). Ko traváho ningo iñurhenteterei. Oĩ hetaiterei hénte tekotevẽva gueteri ohendu umi notísia porã tardeterei mboyve.

16. Heʼiháicha Apocalipsis 18:2, 4, 5, 8, ¿mbaʼépa enterovéva jajapo vaʼerã? (Ehecha avei pe nóta).

¹⁶ (Elee Apocalipsis 18:2, 4, 5, 8). Koʼã versíkulo ohechauka ótra kósa Jehová ojeruréva isiervokuéragui. Enterovete kristiáno verdadéro ñañemomombyryete vaʼerã Babilonia Guasúgui. Peteĩ estudiánte oaprende mboyve la Biblia omboʼéva, ikatu oĩ raʼe peteĩ rrelihión japúpe. Ikatu oime oho raʼe irreunionkuérape ha opartisipa umi aktivida ojejapóvape upépe. Ikatu voi oime omeʼẽ jepi pláta upe organisasiónpe. Upévare oiko mboyve chugui puvlikadór no vautisádo, pe estudiánte ojasegura vaʼerã ojeiete pe rrelihión japúgui. Haʼe ojapo vaʼerã peteĩ kárta de rrenúnsia térã ojapo ótra kósa ojeiete hag̃ua upe rrelihióngui térã oimeraẽ organisasión oĩvagui Babilonia Guasu poguýpe. *

17. ¿Mbaʼeichagua traváhopa ñamboyke vaʼerã, ha mbaʼérepa?

¹⁷ Peteĩ kristiáno verdadéro ojasegura vaʼerã ani hag̃ua pe itraváho ojeheʼa Babilonia Guasúre (2 Cor. 6:14-17). Por ehémplo haʼe ndahaʼemoʼãi peteĩ iglésia empleádo. Avei peteĩ kristiáno ombaʼapóva peteĩ patrónpe g̃uarã ndojapomoʼãi peteĩ traváho tuicháva peteĩ lugár ojepurúvape pe adorasión fálsape. Ha oimérõ haʼe voi hína pe negósio jára, ndoofresemoʼãi itraváho ni ndoaseptamoʼãi peteĩ oférta ojapóva chupe Babilonia Guasu, ni peteĩva umi organisasión oĩva ipoguýpe. ¿Mbaʼérepa ñapensa upéicha? Pórke ndajaapojaséi chupekuéra umi mbaʼe ojapóvape ni nañamoirũséi chupekuéra ipekádope. Koʼã organisasión rrelihiósa ningo ikyʼa Ñandejára renondépe (Is. 52:11). *

18. ¿Mbaʼéichapa peteĩ ermáno osegi la Biblia omboʼéva ojejerurérõ guare chupe ombaʼapo hag̃ua peteĩ iglésiape?

 ¹⁸ Ojapo unos kuánto áño peteĩ kontratísta ojerure hague peteĩ ansiánope ojapo hag̃ua chupe peteĩ traváho de karpintería pe iglésia oĩvape isiudápe. Ko ermáno ningo oreko voi la inegósio, ha pe kontratísta oikuaa pe ermáno siémpre heʼi hague nombaʼapomoʼãiha peteĩ iglésiape. Péro ko vuéltape ko karai oikotevẽ urhénte ojejapo chupe upe traváho. Upéicharõ jepe, pe ermáno osegi umi enseñánsa oĩva la Bíbliape ha ndoaseptái upe traváho. Una semána rire pe diário upe siudagua ohechauka peteĩ fóto peteĩ karpintéro okolokahápe peteĩ kurusu pe iglésiape. Ñane ermáno okambiárire opensáva ha oasepta pe traváho, ifóto kuri la osẽtava pe diáriope. Ñapensamíntena mbaʼeichaitépa upéva oheja vaíta kuri chupe umi ermáno renondépe, ha mbaʼeichaitépa avei omoñeñandúta kuri Jehovápe.

19, 20. a) ¿Mbaʼe mbaʼépa ñaaprende ko artíkulope? b) ¿Mbaʼépa ñaaprendevéta hína?

¹⁹ La Biblia ohechauka koʼẽrõitéma oñekumplitaha peteĩ profesía. ¿Mbaʼépa hína upéva? Umi nasión heʼíta ‘jaikomaha pyʼaguapýpe ha segúro porã’. Péro Jehová ñanerekomboʼe rupi ñande jaikuaa haʼekuéra ndoguerumoʼãiha pe pyʼaguapy añetetéva ha odurátava pára siémpre. ¿Mbaʼépa jajapo vaʼerã oñekumpli mboyve upe profesía ha oñepyrũ pe jehasa asy guasu? Jehová oipota ñanerembiapo heta japredikávo umi notísia porã ha ñañehaʼãvo ñaipytyvõ umi héntepe oiko hag̃ua chuguikuéra Jesús disípulo. Avei tekotevẽ ñañemomombyry umi rrelihión japúgui, upéva heʼise ñasẽte vaʼerãha umi organisasión rrelihiósagui ha ndajaaseptái umi traváho oĩva Babilonia Guasu poguýpe.

²⁰ Oĩ hetave mbaʼe oiko vaʼerã koʼã “ára pahápe”, ha oĩ avei heta mbaʼe Jehová oipotáva jajapo. ¿Mbaʼépa hína umíva? ¿Ha mbaʼéichapa ikatu jajeprepara umi mbaʼe oikótavape g̃uarã koʼẽrõite? Koʼã mbaʼe jahecháta pe artíkulo oúvape.