HOSỌ OPLỌN TỌN 40

Hẹn Alọnu Towe Ján to Vivọnu “Azán Godo Tọn lẹ” Tọn

MÌ HÒ (video kavi hoyidokanji lọ)

“Mì nọte gligli, masẹafọ bo nọ tindo nususu nado wà to azọ́n Oklunọ tọn mẹ to whepoponu.”—1 KỌL. 15:58.

OHÀN 58 Họntọn Jijọho Tọn lẹ Dindinmọ

BLADOPỌ *

1. Etẹwẹ hẹn mí kudeji dọ mí to gbẹnọ to “azán godo tọn lẹ” mẹ?

BE A yin jiji to 1914 godo wẹ ya? Eyin mọ wẹ, be a ko nọgbẹ̀ to “azán godo tọn” titonu ehe tọn lẹ mẹ. (2 Tim. 3:1) Mímẹpo wẹ ko sèhó gando nujijọ he Jesu dọ dọdai dọ yé na jọ to ojlẹ ehe mẹ lẹ go. Ehe bẹ awhàn, núdùdù whèdomẹ, aigba sisọsisọ, azọ̀nylankan lẹ, jideji sẹ́nhẹngba tọn po homẹkẹndido omẹ Jehovah tọn lẹ po hẹn. (Mat. 24:3, 7-9, 12; Luku 21:10-12) Mí ko sọ mọdọ gbẹtọ lẹ nọ yinuwa dile apọsteli Paulu dọ dọdai etọn do. (Pọ́n apotin lọ “ Jijọ Gbẹtọ lẹ Tọn to Egbehe.”) Taidi sinsẹ̀n-basitọ Jehovah tọn lẹ, mí kudeji dọ mí to gbẹnọ to “azán godo tọn lẹ” mẹ.—Mika 4:1.

2. Kanbiọ tẹlẹ wẹ mí dona mọ gblọndo na?

²Na ojlẹ susu ko juwayi sọn 1914 wutu, mí dona ko to gbẹnọ to vivọnu “azán godo tọn lẹ” tọn todin. Na opodo lọ ko sẹpọ taun wutu, mí dona yọ́n gblọndo kanbiọ titengbe delẹ tọn: Etẹlẹ wẹ na jọ to vivọnu “azán godo tọn lẹ” tọn? Podọ, etẹwẹ Jehovah nọ donukun dọ mí ni wà, dile mí to tepọn nujijọ enẹlẹ?

ETẸLẸ WẸ NA JỌ TO VIVỌNU “AZÁN GODO TỌN LẸ” TỌN?

3. Sọgbe hẹ dọdai he to 1 Tẹsalonikanu lẹ 5:1-3 mẹ, nulila tẹwẹ akọta lẹ na basi?

³Hia 1 Tẹsalonikanu lẹ 5:1-3. Paulu yí hodidọ lọ “azán Jehovah tọn” zan. To wefọ ehe mẹ, hodidọ ehe to alọdlẹndo ojlẹ he bẹjẹeji sọn mẹgbeyinyan sọta “Babilọni Daho lọ,” yèdọ sinsẹ̀n lalo lẹpo to pọmẹ ji, bo wá fó do Amagẹdọni. (Osọ. 16:14, 16; 17:5) Ojlẹ kleun de whẹpo “azán” enẹ nido bẹjẹeji, akọta lẹ na basi nulila “Jijọho po hihọ́ po!” tọn. To whedelẹnu, nukọntọ aihọn tọn lẹ nọ yí hodidọ mọnkọ lẹ zan to whenue yé to hodọ gando haṣinṣan he to akọta lẹ ṣẹnṣẹn hinhẹn pọnte go. * Ṣigba, nulila “jijọho po hihọ́ po” tọn he Biblu basi zẹẹmẹ etọn na gbọnvo. Etẹwutu? To whenue nulila ehe na yin bibasi, gbẹtọ lẹ sọgan lẹndọ nukọntọ aihọn tọn lẹ ko penugo nado hẹn aihọn lọ zun nọtẹn hihọ́ tọn de dogọ. Amọ́, na nugbo tọn, “nukunbibia daho” lọ na bẹjẹeji, podọ “vasudo ajiji” na bọdego.—Mat. 24:21.

A dike nulila oklọ tọn akọta lẹ tọn gando “jijọho po hihọ́ po” go doyẹklọ we blo (Pọ́n hukan 3-6tọ *

4. (a) Etẹwẹ mí ma ko yọnẹn gando nulila “jijọho po hihọ́ po” tọn go? (b) Etẹwẹ mí ko yọnẹn gandego?

⁴Mí yọ́n nudelẹ gando nulila “jijọho po hihọ́ po” tọn go. Ṣigba, nudevo lẹ tin he mí ma yọnẹn. Mí ma yọ́n nuhe na sisẹ́ gandutọ lẹ nado basi nulila enẹ, kavi lehe e na yin bibasi do. Podọ, mí ma yọnẹn eyin vlavo nulila lọ na yin bibasi whladopo poun kavi na yin nulila debọdo-dego lẹ. Depope he whẹho lọ yin, nude tin he mí yọnẹn: Mí ma dona yin yẹdoklọ bo lẹndọ nukọntọ aihọn tọn lẹ sọgan hẹn jijọho wá aihọn mẹ nugbonugbo. Kakatimọ, nulila enẹ wẹ Biblu dọna mí nado to ṣiṣọ́. Ohia de wẹ e yin dọ “azán Jehovah tọn” ko to na bẹjẹeji!

5. Nawẹ 1 Tẹsalonikanu lẹ 5:4-6 gọalọna mí nado wleawufo na “azán Jehovah tọn” gbọn?

⁵Hia 1 Tẹsalonikanu lẹ 5:4-6. Tudohomẹnamẹ Paulu tọn do nuhe mí dona wà nado hẹn ẹn diun dọ mí ko wleawufo na “azán Jehovah tọn” hia. Mí ma dona “damlọn dile mẹhe pò lẹ nọ wà do.” Mí dona “nọ nukle” bosọ gbọṣi aṣeji. Di apajlẹ, mí dona to aṣeji ma nado hẹn kadaninọ mítọn bu gbọn alọdido to whẹho tonudidọ aihọn tọn lẹ mẹ dali. Eyin mí doalọ to yé mẹ, mí sọgan lẹzun “apadewhe aihọn tọn.” (Joh. 15:19) Mí yọnẹn dọ Ahọluduta Jiwheyẹwhe tọn kẹdẹ wẹ na hẹn jijọho wá aihọn mẹ.

6. Etẹwẹ mí jlo na gọalọna mẹdevo lẹ nado wà, podọ etẹwutu?

⁶Gbọnvona dọ mí dona gbọṣi nukle, mí sọ jlo na gọalọna mẹdevo lẹ nado yọ́n nuhe Biblu dọ dọ yé na wá jọ to aihọn mẹ lẹ. Mì gbọ mí ni hẹn do ayiha mẹ dọ whenue nukunbibia daho lọ na ko bẹjẹeji, whenu na ko fẹ́ na gbẹtọ lẹ nado wá Jehovah dè. Enẹwutu wẹ azọ́n yẹwhehodidọ tọn mítọn do yin niyaniya tọn sọmọ! *

NỌ HẸN ALỌNU TOWE JÁN TO AZỌ́N YẸWHEHODIDỌ TỌN MẸ

Dile mí to yẹwhehodọ to egbehe, mí nọ dohia dọ Ahọluduta Jiwheyẹwhe tọn kẹdẹ wẹ gán hẹn jijọho po hihọ́ nujọnu tọn po wá aihọn mẹ (Pọ́n hukan 7-9tọ)

7. Etẹwẹ Jehovah jlo dọ mí ni wà todin?

⁷To ojlẹ kleun he pò whẹpo “azán” Jehovah tọn nido bẹjẹeji ehe gblamẹ, ewọ jlo dọ mí ni hẹn alọnu mítọn ján to azọ́n yẹwhehodidọ tọn mẹ. Mí dona hẹn ẹn diun dọ mí “nọ tindo nususu nado wà to azọ́n Oklunọ tọn mẹ.” (1 Kọl. 15:58) Jesu dọ dọdai nuhe mí na wà tọn. To whenue e dọho gando nujijọ ayidego tọn he na wá aimẹ to azán godo tọn lẹ mẹ go, e yidogọ dọmọ: “Humọ, yẹwheho wẹndagbe lọ tọn dona yin didọ to akọta lẹpo mẹ whẹ́.” (Malku 13:4, 8, 10; Mat. 24:14) Yí nukun homẹ tọn do pọ́n: Whedepopenu he a tọ́n na lizọnyizọn lọ, a to mahẹ tindo to hẹndi dọdai Biblu tọn enẹ mẹ niyẹn!

8. Nawẹ azọ́n yẹwhehodidọ Ahọluduta lọ tọn to kọdetọn dagbe tindo gbọn?

⁸Etẹwẹ mí sọgan dọ gando nukọnyiyi azọ́n yẹwhehodidọ Ahọluduta lọ tọn go? To owhe dopodopo mẹ, azọ́n ehe nọ to nukọnyi. Di apajlẹ, lẹnnupọndo jideji sọha wẹnlatọ Ahọluduta lọ tọn lẹ tọn lẹdo aihọn pé ji to azán godo tọn lẹ mẹ. To 1914, wẹnlatọ 5 155 wẹ tin to otò 43 mẹ. To egbehe, yé ko yì nudi livi 8 daa to otò 240 mẹ! Mahopọnna enẹ, azọ́n mítọn ma ko fó. Mí dona zindonukọn nado to Ahọluduta Jiwheyẹwhe tọn lá taidi pọngbọ dopo gee lọ na nuhahun gbẹtọvi tọn lẹpo.—Salm. 145:11-13.

9. Naegbọn mí dona zindonukọn nado to yẹwheho wẹndagbe Ahọluduta lọ tọn lá?

⁹Azọ́n yẹwhehodidọ Ahọluduta tọn mítọn ma na doalọte kakajẹ whenue Jehovah na dọ e pé. Ojlẹ nẹmu wẹ pò na gbẹtọvi lẹ nado wá yọ́n Jehovah Jiwheyẹwhe po Jesu Klisti po? (Joh. 17:3) Mí ma sọgan dọ. Amọ́, nuhe mí yọnẹn na taun tọn wẹ yindọ, kakajẹ whenue nukunbibia daho lọ na bẹjẹeji, mẹdepope he “tindo ninọmẹ ahun mẹ tọn he jẹna ogbẹ̀ madopodo” gbẹ́ sọgan kẹalọyi wẹndagbe lọ. (Owalọ 13:48) Nawẹ mí sọgan gọalọna omẹ ehelẹ whẹpo whenu nido fẹ́ gbọn?

10. Nawẹ Jehovah to alọgọna mí nado nọ plọn nugbo lọ gbẹtọ lẹ gbọn?

¹⁰Jehovah nọ gbọn titobasinanu etọn gblamẹ na mí nuhe mí tindo nuhudo etọn lẹpo nado plọn nugbo lọ gbẹtọ lẹ. Di apajlẹ, mí nọ mọ azọ́nplọnmẹ yí to sẹmẹsẹmẹ to opli osẹ ṣẹnṣẹn tọn lẹ ji. Opli ehe nọ gọalọna mí nado yọ́n nuhe mí na dọ to dlapọn tintan po gọyìpọn lẹ po whenu. Podọ, e nọ plọn mí lehe mí na nọ deanana plọnmẹ Biblu lẹ do. Titobasinanu Jehovah tọn ko sọ wleawuna Azọ́nwanu Mẹpinplọn tọn lẹ na mí. Azọ́nwanu ehelẹ nọ gọalọna mí nado . . .

bẹ hodọdopọ lẹ jẹeji,
fọnjlodotena gbẹtọ lẹ,
whàn gbẹtọ lẹ nado tindo ojlo nado plọnnu dogọ,
plọn nugbo lọ gbẹtọ lẹ to plọnmẹ Biblu lẹ whenu, podọ
basi oylọna mẹhe tindo ojlo lẹ nado dla nọtẹn Intẹnẹt tọn mítọn po Plitẹnhọ Ahọluduta tọn mítọn lẹ po pọ́n.

Na nugbo tọn, e ma ko pé nado tindo azọ́nwanu ehelẹ poun. Mí dona nọ yí yé zan. * Di apajlẹ, eyin a tindo hodọdopọ kọfanamẹ tọn de hẹ jlodotọ de, bo jo alọnuwe pẹvi kavi linlinnamẹwe de do na ẹn, e sọgan to owe lọ hia kakajẹ whenue a na penugo bo vọ́ mọ ẹn to whedevonu. Azọngban dopodopo mítọn tọn wẹ nado nọ hẹn alọnu etọn ján to osun lẹpo mẹ to azọ́n yẹwhehodidọ Ahọluduta lọ tọn mẹ.

11. Naegbọn adà lọ Nupinplọn sọn Biblu mẹ to Intẹnẹt Ji do yin awuwlena?

¹¹Nado mọ apajlẹ lehe Jehovah to alọgọna gbẹtọ lẹ nado plọn nugbo lọ do tọn devo, pọ́n adà lọ Online Bible Study Lessons (Nupinplọn sọn Biblu mẹ to Intẹnẹt Ji) to jw.org^®ji. Naegbọn nuplọnmẹ ehelẹ do yin awuwlena? To osun dopodopo mẹ, gbẹtọ fọtọ́n susu lẹ lẹdo aihọn pé wẹ nọ dindona nuplọnmẹ Biblu tọn lẹ to Intẹnẹt ji. Nuplọnmẹ he tin to nọtẹn Intẹnẹt tọn mítọn ji lẹ sọgan gọalọna omẹ ehelẹ nado jẹ nugbo he to Ohó Jiwheyẹwhe tọn mẹ plọn ji. Delẹ to mẹhe a dọhona lẹ mẹ sọgan nọ whleawu nado kẹalọyi plọnmẹ Biblu de. Eyin mọ wẹ, nọ do adà ehe hia yé to nọtẹn Intẹnẹt tọn mítọn ji kavi do alọdlẹndonu nuplọnmẹ lọ lẹ tọn de hlan yé. * Eyin e yọnbasi, a sọgan dlẹnalọdo nuplọnmẹ lọ lẹ to ogbè he yé sè de mẹ.

12. Etẹwẹ mẹde sọgan plọn sọn adà lọ Nupinplọn sọn Biblu mẹ to Intẹnẹt Ji mẹ?

¹²Adà lọ Online Bible Study Lessons (Nupinplọn sọn Biblu mẹ to Intẹnẹt Ji) dọhodo hosọ delẹ ji taidi: “The Bible and Its Author” (Biblu po Dowatọ Etọn Po), “The Bible’s Main Characters” (Omẹ Tangan He Go Biblu Donù Lẹ) po “The Bible’s Message of Hope” (Owẹ̀n Todido Tọn He to Biblu Mẹ) po. To whenue mẹde to hosọ ehelẹ plọn, e na mọ:

Lehe Biblu sọgan gọalọnamẹ do
Mẹhe Jehovah, Jesu po angẹli lẹ po yin
Nuhewutu Jiwheyẹwhe do dá gbẹtọvi lẹ
Nuhewutu yajiji po nuylankan lẹ po do tin

Nuplọnmẹ lọ lẹ sọ gbadopọnna lehe Jehovah na . . .

hẹn opodo wá na yajiji po okú po do,
hẹn oṣiọ lẹ gọwá ogbẹ̀ do, bo
yí Ahọluduta Jiwheyẹwhe tọn do diọtẹnna gandudu gbẹtọvi tọn he gboawupo lẹ do.

13. Be dogbigbapọnna nuplọnmẹ Intẹnẹt ji tọn lẹ diọtẹnna tito plọnmẹ Biblu tọn wẹ ya? Basi zẹẹmẹ.

¹³Nuplọnmẹ Intẹnẹt ji tọn lọ lẹ ma diọtẹnna tito plọnmẹ Biblu tọn. Jesu ko na mí lẹblanulọkẹyi lọ nado hẹn gbẹtọ lẹ zun devi lẹ. Todido mítọn wẹ yindọ mẹhe tindo ojlo lẹ na gbadopọnna nuplọnmẹ Intẹnẹt ji tọn lọ lẹ, yiwanna nuhe yé plọn lẹ bo nasọ jlo nado plọnnu dogọ. Gbọnmọ dali, yé sọgan kẹalọyi plọnmẹ Biblu de. To vivọnu nuplọnmẹ dopodopo tọn, nuplọntọ lọ nọ yin tulina nado do obiọ Intẹnẹt ji tọn de hlan, na mẹplọntọ de nido nọ wá e dè bo plọn Biblu hẹ ẹ tlọlọ. Lẹdo aihọn pé, madozẹnzẹn gbẹtọ 230 linlán tọn wẹ nọ basi obiọ gbọn nọtẹn Intẹnẹt tọn mítọn ji egbesọegbesọ nado plọn Biblu! Biblu pinplọn hẹ mẹde nukun sọ nukun yin nujọnu taun!

NỌ TO VIVẸNUDO ZỌNMII NADO HẸN GBẸTỌ LẸ ZUN DEVI

14. Sọgbe hẹ anademẹ Jesu tọn he tin to Matiu 28:19, 20 mẹ lẹ, etẹwẹ mí nọ dovivẹnu nado wà, podọ etẹwutu?

¹⁴Hia Matiu 28:19, 20. Dile mí to anadena plọnmẹ Biblu lẹ, mí dona nọ wà nuhe go mí pé lẹpo nado nọ ‘hẹn gbẹtọ lẹ zun devi lẹ, bo nọ plọn yé nado payi nuhe Jesu ko degbe etọn lẹpo go.’ Mí dona nọ gọalọna gbẹtọ lẹ nado mọnukunnujẹemẹ dọ nujọnu taun wẹ e yin na yé nado nọ adà Jehovah po Ahọluduta etọn po tọn mẹ. Ehe zẹẹmẹdo dọ mí dona nọ dovivẹnu nado na tuli gbẹtọ lẹ nado hẹn nugbo lọ zun yedetiti tọn, gbọn nuhe plọn yé te lẹ yíyí do yizan mẹ, gbẹzan yetọn kinklandowiwe hlan Jehovah po baptẹm yíyí po dali. Gbọn mọwiwà kẹdẹ dali wẹ yé na lùn azán Jehovah tọn tọ́n.—1 Pita 3:21.

15. Etẹwẹ mí ma dona hẹn whenu gú na, podọ etẹwutu?

¹⁵Dile mí dọ do to bẹjẹeji, ojlẹ vude poun wẹ pò na titonu ehe nido wá vivọnu. Enẹwutu, mí ma dona hẹn whenu gú nado to Biblu plọn hẹ mẹhe ma jlo nugbonugbo nado lẹzun devi Klisti tọn lẹ. (1 Kọl. 9:26) Azọ́n niyaniya tọn wẹ azọ́n mítọn! Mẹsusu gbẹ́ dona sè owẹ̀n Ahọluduta lọ tọn whẹpo whenu nido fẹ́.

NỌLA MLẸNMLẸN NA SINSẸ̀N LALO WUNMẸ LẸPO

16. Sọgbe hẹ Osọhia 18:2, 4, 5, 8, etẹwẹ mímẹpo dona wà? (Sọ pọ́n nudọnamẹ odò tọn.)

¹⁶Hia Osọhia 18:2, 4, 5, 8. Wefọ ehelẹ do nudevo he Jehovah nọ donukun sọn sinsẹ̀n-basitọ etọn lẹ si hia. Klistiani nugbo lẹpo dona hẹn ẹn diun dọ emi ma tindo kanṣiṣa depope hẹ Babilọni Daho lọ. Nuplọntọ de sọgan ko yin hagbẹ sinsẹ̀n lalo de tọn whẹpo do wá yọ́n nugbo lọ. E sọgan ko nọ yì nuwiwa sinsẹ̀n lọ tọn lẹ bosọ nọ doalọ to yé mẹ. Kavi e sọgan ko nọ basi nunina akuẹ tọn na sinsẹ̀n mọnkọ de. Whẹpo nuplọntọ de nido yin alọkẹyi taidi wẹnlatọ he ma ko yí baptẹm, ewọ dona sánkanna haṣinṣan etọn lẹpo hẹ sinsẹ̀n lalo. E dona do wekanhlanmẹ gbẹ́mẹ tintọ́n sọn tọn de hlan yé kavi to alọ devo mẹ, dohia dọ emi masọ yin hagbẹ ṣọṣi emitọn hoho tọn, gọna pipli devo depope tọn he do kanṣiṣa hẹ Babilọni Daho lọ tọn ba. *

17. Agbasazọ́n wunmẹ tẹwẹ Klistiani de dona dapana, podọ etẹwutu?

¹⁷Klistiani nugbo de dona hẹn ẹn diun dọ agbasazọ́n emitọn ma tindo kanṣiṣa depope hẹ Babilọni Daho lọ. (2 Kọl. 6:14-17) Di apajlẹ, e ma na yin azọ́nwatọ ṣọṣi de tọn. Humọ, Klistiani de he azọ́nwhé devo yí do azọ́nmẹ ma na jlo nado wazọ́n susu to nọtẹn he nọ nọgodona sinsẹ̀n lalo de. Podọ, eyin e tindo azọ́nwhé etọn titi, e họnwun dọ e ma na dín kavi kẹalọyi azọ́n to adà Babilọni Daho lọ tọn depope mẹ. Naegbọn mí nọ ze afọdide nujikudo tọn enẹ? Na mí ma jlo na tindo mahẹ to azọ́n po ylando sinsẹ̀n he Jiwheyẹwhe nọ pọnhlan di mawé enẹlẹ tọn po mẹ wutu.—Isa. 52:11. *

18. Nawẹ mẹmẹsunnu de tẹdo nunọwhinnusẹ́n Biblu tọn lẹ go na nuhe dù agbasazọ́n etọn gbọn?

¹⁸To owhe susu lẹ die wayi, dawe de biọ to mẹho agun tọn he do azọ́nwhé etọn titi de si nado wà whlẹpipa-zọ́n kleun de to ṣọṣi de mẹ to tòdaho he mẹ mẹmẹsunnu lọ nọ nọ̀. Dawe lọ yọnẹn dọ mẹmẹsunnu lọ ma nọ yigbe gbede nado wazọ́n to ṣọṣi lẹ mẹ. Ṣigba to ojlẹ ehe uwọ mẹ, dawe lọ to nuhà eyin emi na mọ mẹdevo na azọ́n lọ. Mahopọnna enẹ, mẹmẹsunnu lọ tẹdo nunọwhinnusẹ́n Biblu tọn lẹ go bo gbẹ́ azọ́n lọ. To osẹ he bọdego mẹ, linlinwe lẹdo lọ tọn do fọto whlẹpatọ devo tọn hia he to satin de whè do ṣọṣi lọ go. Eyin mẹmẹsunnu mítọn ko gboawupo nado hẹn teninọ etọn go wẹ, be fọto etọn wẹ na ko sọawuhia. Pọ́n lehe enẹ na ko kọnmasin do yinkọ dagbe etọn go to Klistiani hatọ etọn lẹ ṣẹnṣẹn do sọ! Sọ lẹnnupọndo nuhe na ko yin numọtolanmẹ Jehovah tọn ji.

ETẸWẸ MÍ PLỌN?

19, 20. (a) Etẹwẹ mí ko plọn kakajẹ din? (b) Nudevo tẹlẹ wẹ mí dona plọn?

¹⁹Sọgbe hẹ dọdai Biblu tọn, nujijọ ayidego tọn devo he na wá aihọn ji to madẹnmẹ wẹ nulila “jijọho po hihọ́ po” tọn he akọta lẹ na basi. Na nuhe Jehovah nọ plọn mí lẹ wutu, mí yọnẹn dọ akọta lẹ ma na hẹn jijọho nujọnu tọn he dẹn-to-aimẹ wá. Etẹwẹ mí dona wà whẹpo nujijọ enẹ nido wá aimẹ bọ vasudo ajiji nido bọdego? Jehovah jlo dọ mí ni hẹn alọnu mítọn ján to owẹ̀n Ahọluduta lọ tọn lilá mẹ, bo dovivẹnu nado hẹn gbẹtọ susu dogọ zun devi lẹ. To ojlẹ dopolọ mẹ, mí dona nọla na sinsẹ̀n lalo lẹpo. Ehe dohia dọ mí ma dona sọ yin dopo to hagbẹ etọn lẹ mẹ ba, podọ mí na dapana azọ́n depope he tindo kanṣiṣa hẹ Babilọni Daho lọ.

²⁰Nujijọ devo lẹ na bọdego to vivọnu “azán godo tọn lẹ” tọn. Nudevo lẹ sọ tin he Jehovah nọ donukun dọ mí ni wà. Etẹwẹ yin onú lọ lẹ, podọ nawẹ mí sọgan wleawudai na nuhe to nukọn ja to sọgodo he to yakẹ de mẹ lẹpo gbọn? Mí na mọ ehe to hosọ he bọdego mẹ.

OHÀN 71 Awhànpa Jehovah Tọn Wẹ Mí!

^ huk. 5 To madẹnmẹ, mí to nukundo nulila akọta lẹ tọn dọ, emi ko hẹn “jijọho po hihọ́ po!” wá. Enẹ na dohia dọ nukunbibia daho lọ ko to na bẹjẹeji. Etẹwẹ Jehovah jlo dọ mí ni to wiwà kakajẹ whenẹnu? Hosọ ehe na gọalọna mí nado mọ gblọndo lọ.

^ huk. 3 Di apajlẹ, to nọtẹn Intẹnẹt tọn etọn ji, Plidopọ Akọta lẹ tọn sọalọakọ́n dọ emi nọ “hẹn jijọho po hihọ́ po tin-to-aimẹ lẹdo aihọn pé.”

^ huk. 6 Pọ́n hosọ lọ, “Whẹdida Jiwheyẹwhe Tọn lẹ—Be Ewọ Nọ Na Avase to Gigọ́ mẹ to Whelẹponu Ya?” to zinjẹgbonu ehe mẹ.

^ huk. 23 Nado mọ nudọnamẹ gigọ́ gando lehe mí na nọ yí Azọ́nwanu Mẹpinplọn tọn lọ lẹ zan do go, pọ́n hosọ lọ “Nọ Plọnmẹ Nugbo Lọ” to Atọ̀họ̀-Nuhihọ́ lọ Tọn octobre 2018 tọn mẹ.

^ huk. 11 Nuplọnmẹ lọ lẹ tin-to-aimẹ to alọnu to Glẹnsigbe po Portugal-gbè po mẹ, podọ to nukọn mẹ yé na tin to ogbè devo lẹ mẹ.

^ huk. 16 Mí sọ dona dapana pipli delẹ taidi ogbẹ́ jọja lẹ tọn kavi nọtẹn ayidedai tọn delẹ he do kanṣiṣa hẹ sinsẹ̀n lalo. Dile etlẹ yindọ susu ogbẹ́ jọja lẹ tọn mọnkọ, he nọ bẹ sunnu po yọnnu po hẹn lẹ, nọ tẹnpọn nado dohia dọ nuwiwa yetọn lẹ ma do kanṣiṣa de hẹ sinsẹ̀n sọmọ, nugbo lọ wẹ yindọ sinsẹ̀n wẹ nọ deanana nuwiwa po yanwle ogbẹ́ enẹlẹ tọn lẹ po.

^ huk. 17 Nado mọ nudọnamẹ dogọ do pọndohlan Owe-wiwe lẹ tọn gando agbasazọ́n he tindo kanṣiṣa hẹ sinsẹ̀n lalo lẹ go ji, pọ́n “Kanbiọ lẹ sọn Wehiatọ lẹ Dè” to Atọ̀họ̀-Nuhihọ́ lọ Tọn 15 avril 1999 tọn mẹ.

^ huk. 83 ZẸẸMẸ YẸDIDE LẸ TỌN: Nulila “jijọho po hihọ́ po” tọn he yin bibasi to televiziọn ji paṣa ahisinọ kafe-satẹn de tọn lẹ. Linlin enẹ ma doyẹklọ asu po asi po Kunnudetọ de he nọte pẹẹde nado gbọjẹ to lizọnyizọn lọ mẹ.

ATỌ̀HỌ̀-NUHIHỌ́ LỌ TỌN—ZINJẸGBONU OPLỌN TỌN