1. ¿Nita nüne kä krüte näire ye ñobätä gare metre nie?

KÄ 1914 ye bitikäre mä därebare ngwane, mä därebare “kä mrä” o kä krüte ye näire (2 Tim. 3:1). Ni näire rü rakaikä, mrö nikai, dobo kri, bren käme, nitre töi rabai blo aune ja mikai ni Ngöbö mikaka täte rüere niebare Jesukwe ye tä nemen bare ni okwäbiti o nie tärä ni olote (Mat. 24:3, 7-9, 12; Luc. 21:10-12). Nitre rabai ja ngwen ño kä krüte näire ye apóstol Pablo niebare aune ye erere tuin nie (recuadro “ ¿Nitre tä ja ngwen ño kä nengwane?” mikadre ñärärä). Kä krüte ye näire nita nüne ye gare metre ni testiko Jehovakwe ie (Miq. 4:1).

2. ¿Kukwe meden ütiäte nikwe mikadre gare jai?

² Kä 1914 nükebe ni näire kä nikanina kwati krubäte ta, yebätä kä ne nibira krüte ni raba niere. Kä ne nibira krüte aisete nikwe kukwe ütiäte ne mikadre gare jai. ¿Dre rakaikä mrä? ¿Kukwe ye jämi nemen bare känenkri Jehová tö ni tuai dre nuainne?

3. Kukwe niebare 1 Tesalonicenses 5:2, 3 ye erere, ¿gobrantre käbiti tibien käkwe dre mikai gare?

³ (Ñäkädre 1 Tesalonicenses 5:2, 3 yebätä). * Köbö Jehovakwe niebare Pablokwe ye ngwane mikani gare kwe “Babilonia Kri” ye rüe rakadikä aune ye mikai krüte rü Armagedón  yete. “Babilonia Kri” nieta ye abokän kukwe jökrä ngwarbe mikata täte meden gärätä (Apoc. 16:14, 16; 17:5). Akwa “köbö Jehovakwe” rabaira rakadrekä jerekäbe ngwane “kä titibe aune kukwe blo ñaka” ye gobrantre rabai niere kä jökräbiti tibien. Gobrantre krikri tä kukwe ükete juta mada kräke ngwane tätre kukwe ye erere bäsi niere. * Akwa kukwe mikai gare nieta Bibliabätä ye ñaka ja erebe kukwe mada mikata gare yebe. ¿Ñobätä ñaka ja erebe? Ñobätä ñan aune kukwe ye mikai gare ngwane, gobrantre ye köböire kä jökräbiti tibien kä rabai jäme ye nitre kwati krubäte käkwe mikai era jai. Akwa ye ñaka metre ñobätä ñan aune “ja tare nikadi kri” aune nitre ye “gaite drekebe ngwarbe” (Mat. 24:21).

4. a) ¿“Kä titibe aune kukwe blo ñaka” niedi yebätä kukwe meden ñaka gare metre ta nie? b) ¿Drebrä gare nie?

⁴ “Kä titibe aune kukwe blo ñaka” niedi gobrantrekwe yebätä kukwe ruäre gare nie. Akwa mada abokän ñaka gare metre ta nie. Ñodre, ¿dre käkwe gobrantre töi mikai kukwe ye niere? ¿Mikai gare ño kwetre? ¿Kukwe ye mikai gare kiakia jatäri o niedi batibe? Ye ñaka gare nie. Kukwe bäri ütiäte nebrä gare nie. Nikwe ñaka ja ngöka manandre ietre ñan ñobätä aune gobrantre ñaka raba kä mike jäme kä tibienbätä. Ñakare aune, ye käkwe mikai gare “köbö Jehovakwe” ye rabaira rakadrekä jerekäbe aune ye ngübata nikwe.

5. ¿Kukwe nieta 1 Tesalonicenses 5:5, 6 ye tä ni dimike ño ja mikakäre juto “köbö Jehovakwe” kräke?

⁵ (Ñäkädre 1 Tesalonicenses 5:5, 6 yebätä). Nikwe dre nuaindre ja mikakäre juto “köbö Jehovakwe” kräke ye Pablokwe niebare. Ni ñaka tädre kübianinkä jabiti nitre mada ye erere, ñakare aune “ni tädre ngwäte” aune mokre. Ñodre, nikwe ja ngübadrebiti ñaka ja mikakäre política yete. Nikwe ñaka ja ngübaibiti ngwane, nikwe ja mikai nitre ja mikaka “Ngöbö rüere” yekri (Juan 15:18, 19). Gobran Ngöbökwe ye aibe köböire kä rabai jäme kä jökräbiti tibien ye gare nie.

6. ¿Drebätä ni tö nitre dimikai aune ñobätä?

⁶ Ni tö nitre mada dimikai ja ngwen ngwäte ni erere, ye abokän dre rakaikä nitre ñaka Ngöbö mike täte yebätä nieta Bibliakwe ye ni tö mikai gare ietre. Ja tare nika jatadi kri ye ngwane, kä ñaka rabaira ietre Jehová känänkäre ye nikwe ngwandre törö jai. Ye medenbätä nikwe kukwe driedre kä nengwane ye bäri ütiäte. *

7. ¿Jehová tö ni tuai dre nuainne?

⁷ Kä nebera braibe ne kwe “köbö Jehovakwe” ye rükadre yebätä nikwe kä diandrekä  jai kukwe driekäre aune ñaka kä juandre ngwarbe ta ie niara tö. Aisete nikwe ja di ngwandre “sribi ni Dänkienkwe” ye nuainne mantre jetebe (1 Cor. 15:58). Kukwe jatai näkainkä kä krüte näire niebare Jesukwe ngwane, ni Ngöbö mikaka täte täi dre nuainne ye mikani gare kwe. Niebare kwe: “Kä ne ngämi niken ta, känenkri kukwe kuin tibtä, ye rabadi diribare ni kä jökräbtiye” (Mar. 13:4, 8, 10; Mat. 24:14). Töbike kukwe nebätä. Nita kukwe driere batire batire ngwane nita kukwe ye mike nemen bare.

8. Kukwe drieta nikwe ye tä kukwe kwin mike nemen bare, ¿ye ñobätä ni raba niere?

⁸ Kä kwatire kwatire te nitre kwati krubäte tä kukwe kwin Gobran Ngöbökwe yebätä ye kukwe nuin. Nitre kukwe driekä Gobran Ngöbökwe yebätä ye jatani nirien ño kä krüte ne näire ye ani mike gare jai. Ñodre, kä 1914 yete ja mräkätre kukwe driekä nämäne 5,155 juta 43 yete. Kä nengwane ni niena 8 millón 500 mil kukwe driere juta 240 jene jene te. Akwa sribi ne jämi krüte nie. Gobran Ngöbökwe aibe käkwe kukwe ükaite nitre kä tibienbätä kräke ye nikwe driedre jankunu (Sal. 145:11-13).

9. ¿Ñobätä nikwe kukwe kwin Gobran Ngöbökwe yebätä driere jankunu?

⁹ Nibira debe, ñaka kukwe drie jankunu niedi Jehovakwe nie ye ngwane batibe nikwe ñaka nuaindi mada. ¿Akwa kä täte nuäi nitre käne Jehová aune Jesús mikakäre gare jai? (Juan 17:3). Ñaka gare nie, akwa ja tare nikadi kri ye kömika jämi känenkri nitre töita nünanbätä kärekäre yei kä täi kukwe kwin käbämikata ja känenkäre ye kukwe nuakäre (Hech. 13:48, TNM). ¿Nikwe nitre dimikai ño ja tare nikadi kri ye känenkri?

10. ¿Jehová tä dre bien nie kukwe metre ye driekäre nitre ie?

¹⁰ Juta ükaninte Jehovakwe ye tä kukwe keta kabre bien nie kukwe metre ye driekäre nitre ie. Ñodre, nikwe kukwe driedre ju ju te, ni tuadrebitita bätä ni tötikadre ño Bibliabätä ye drieta nie bämän kratire kratire gätä Nita Dirire aune Ja Ngwen Ño yebiti. Arato, tärä aune video dirikäre bäri ye tä nikwe. Ye raba ni dimike kukwe jatäri ne nuainkäre:

• Blita kömike

• Nitre töi mike kukwe mike gare bäri jai

• Nitre töi mike ja tötike

• Kukwe metre Bibliabätä mike gare ni ja tötikaka ie

•   Nitre tö kukwe mikai gare bäri jai ye nübaire Internet käi nikwe mike gare jai aune nübaire niken Ju Ja Ükarakrö yete

Ebökänä, tärä aune video dirikäre bäri tä nikwe akwa nikwe sribidrebiti. * Ñodre, nita blite ni tö kukwe mikai gare bäri jai yebe ngwane, nita tärä mikete ie ye köböire niara raba kukwe mike gare bäri jai nememe ni rabaita känti ngwane. Sö kratire kratire ni itire itire rabadre ja di ngwen käre kukwe driere.

11. ¿Ja tötika Bibliabätä Internete ye ñobätä sribebare?

¹¹ ¿Kukwe medenbiti arato Jehovata kukwe metre ye mike gare nitre ie? Ani blite keteitibätä. Ye abokän Ja tötika Bibliabätä Internete * ye drieta jw.org^® yete. ¿Ñobätä sribebare? Ñobätä ñan aune sö kratire kratire nitre kwati kä jökräbiti tibien tä kukwe Bibliabätä ye känene Internet yete. Kukwe ükaninte jw.org yete ye tä nitre dimike ne kwe kukwe metre Ngöböbätä ye rabadre gare ietre. Nitre ruäre ben nita blite ye ñan törbadre ja tötikai Bibliabätä nibe ngwane ni raba Internet käi jw.org ye driere ietre ne kwe känändre kwetre jai.

12. ¿Ja tötika Bibliabätä Internete yekänti dre raba nemen gare nie?

¹² Kukwe ükaninte Internete ni tötikakäre ye tä kukwe Bibliabätä aune nire töita tikanibätä ye mike gare, arato nitre kirabe Ngöbö mikani täte ye kädrieta bätä kukwe käbämikata ja känenkäre ye mikata gare. Nitre käkwe kukwe yebätä ja tötikai ngwane kukweta ükaninte jatäri ne rabai gare ietre:

• Biblia tä ni dimike ño

• Jehová, Jesús aune angeletre ye nire nire

• Ñobätä Ngöbökwe ni sribebare

• Ñobätä ja tare nikata aune kukwe tare aibe nemen bare

Ni tötikata nekänti kukwe ne mikata gare arato:

• Jehovakwe dre nuaindi gata aune ja tare nika ye diankakäre

• Nitre krütanina ye rükaita nire ño

• Gobrantre kä tibienbätä ye täte Gobran Ngöbökwe ükaite ño

13. ¿Nitre tötikata gwi ye täte nitre tötikai Internet aibe te?

¹³ Nita nitre tötike gwi ye erere nuaindi jankunu ñobätä ñan aune nitre mikadre ja tötikaka Bibliabätä ye sribi bäri ütiäte mikani Jesukwe ni kisete. Aisete kukweta ükaninte Internete ye nitre käkwe mikadre gare jai aune kukwe rabadre gare ietre ye jatadre tarere aune törbadre mikai gare bäri jai yei ni tö. Nitre yei kukwe rabai gare ngwane törba nemen ni tuai niken jakänti ja tötike Bibliabätä. Nitre tötikata ünä Internete ye bitikäre nitre ye nübaita ne kwe ja tötikadre bäri kwe ni testiko Jehovakwe ben. Ñodre nitre 230 näre kä jökräbiti tibien tä köbö kwatire kwatire te kukwe tike jw.org yete ja tötika käräkäre. Ni itire itire ben ja tötikadre gwi ye ütiäte krubäte.

14. Jesukwe kukwe niebare Mateo 28:19, 20 ye erere, ¿nita ja di ngwen dre nuainne aune ñobätä?

¹⁴ (Ñäkädre Mateo 28:19, 20 yebätä). Nita nitre tötike Bibliabätä ngwane nikwe ja di ngwandre ne kwe ni ye rabadre ni ja tötikaka Jesukwe erere aune Jesús tö tuai dre nuainne ye jökrä nikwe driedre ietre. Ütiäte krubäte niaratre käkwe ja mikadre Jehovakri aune Gobran kwe yekri ye nikwe dimikadre mike nüke gare jai. Ye abokän kukwe metre nemen gare ietre ye erere mikadre täte kwetre aune ja diandrekä mento kwetre Jehová kräke biti  ja ngökadre ñöte kwetre meden gärätä. Ja di ngwandi kwetre ye erere nuainne ngwane, ye aibe köböire rabaite nire köbö Jehovakwe yete (1 Ped. 3:21).

15. ¿Dre kräke kä ñan nebera nie aune ñobätä?

¹⁵ Nibira gare nie ye erere kä nebera braibe ne kwe nitre kä nebätä gadrete. Ye medenbätä nita nitre tötike ye ñan tö kukwe Ngöbökwe mikai täte ngwane nikwe ñaka tötikadre jankunu, ñobätä ñan aune kä nebera braibe krubäte (1 Cor. 9:26). Sribi nuainta nikwe ne kräke kä nebera braibe nie. Kukwe kwin Gobran Ngöbökwe yebätä ye nitre kwati jämi kukwe nuin aune kukwe tare jämi nemen bare ye känenkri nikwe mikadre gare ietre.

16. Apocalipsis 18:2, 4, 5, 8 tä niere ye erere, ¿ni itire itire rabadre dre nuainne? (Nota mikadre ñärärä).

¹⁶ (Ñäkädre Apocalipsis 18:2, 4, 5, 8 yebätä). Kukwe nieta texto nekänti ne ñan aibe Jehová tö nuainmana nie. Ni jökrä testiko kukwe metre mikaka täte rabadre ja denkä täte mento Babilonia Kri yebätä. Ruäre ngwane nitre ja tötikaka Bibliabätä ye jämi ja tötike ni testiko Jehovakwe ben känenkri nämänentre iglesia madate o nämäne ngwian bien kukwe ngwarbe ye kräke. Nitre ja tötikaka ye kädeka jämi ni kukwe driekä erere ngwane rabadre ja denkä täte mento iglesia ngwarbe yebätä o kukwe mada mika nämäne täte kwetre yebätä. Niaratre ye rabadre tärä sribere biti bien mikakäre gare niaratre ñan tö nibira jire ja tuai iglesia yete o kukwe mada ngwarbe tä sribire gwairebe Babilonia Kri yebe yebätä. *

17. ¿Sribi ño ni kristiano metre ñaka rabadre kain ngäbiti aune ñobätä?

¹⁷ Ni kristiano tä kukwe metre mike täte ye rabadre ja ngübarebiti sribi ño tä kwe yebätä, ñobätä ñan aune sribi ruäre ye Babilonia Kri tä ütiä bien (2 Cor. 6:14-17). Ni ñaka sribidre jire iglesia ngwarbe kräke. Ñodre, nita sribire empresa kräke ye käkwe ribedre nie, nikwe sribi ruäre nuaindre ju iglesia ngwarbe kräke ngwane nikwe ñaka nuaindre. Arato, sribi tä jeñe nikwe ngwane nikwe ñaka ja kukwei kitadrekä sribikäre iglesia ngwarbe ye kräke o sribi driedre kwetre nie ye ngwane ni ñaka sribi ye kadre ngäbiti jire ñobätä ñan aune ye kite Babilonia Kri yekri. ¿Ñobätä nita ja töi mike kwatibe kore? Ñobätä ñan aune ni ñaka tö ja mritai nitre kukwe ngwarbe mikaka täte yebe, ne madakäre ye tuin käme krubäte Ngöböi (Is. 52:11). *

18. Ja mräkä iti ie sribi driebare iglesiate, ¿akwa niarakwe dre nuainbare?

 ¹⁸ Bati ni contratista käkwe niebare ni umbre ji ngwanka konkrekasionte ie, rabadre sribi ruäre nuainne iglesia keteiti ükatekäre. Ja mräkä ye nämäne sribire jeñe jakrä aune niara ñaka sribi nuaindi jire iglesia ngwarbe kräke nämäne niere ye nämäne gare ni contratista ie. Akwa ni contratista nämäne ja di ribere jötrö ngwarbe sribi ye nuainkäre, akwa yebiti ta ja mräkä umbre ji ngwanka ne käkwe kukwe ja jie ngwankäre Bibliabätä ye mikani täte aune ñaka sribi ye nuainbare kwe. Ye bitikäre bämän nikani krati ta ngwane ni iti nämäne kruso mike iglesia yete ye üai nämäne mikani periodicobätä. Ja mräkä ji ngwanka ne käkwe sribi ye nuaindre akräke niara ara üai tädre mikani periódico yebätä. Töbike kukwe nebätä, ¿niarakwe ye nuaindre akräke blitadre ño niarabätä aune ja rabadre ruin ño Jehovai raba ruin mäi?

19, 20. a) ¿Dre nibira gare nie? b) ¿Nikwe dre mikadre gare jai mada?

¹⁹ Biblia tä mike gare ye erere, kukwe keteiti ütiäte krubäte köböra nemen bare ye abokän gobrantre krikri käkwe “kä titibe aune kukwe blo ñaka” niedi. Akwa gobrantre kä nebätä ye köböire kä ñaka raba nemen titibe ye Jehová tä driere nie. ¿Nitre gaite drekebe ye känenkri nikwe dre nuaindre? Nikwe ñaka kä juandre ngwarbe ta aune käre nikwe kukwe kwin Gobran Ngöbökwe yebätä ye driedre aune nikwe nitre mikadre ja tötikaka Jesukwe yei Ngöbö tö. Arato ni kämikadrekä täte kukwe ngwarbe mikata täte yebätä ie niara tö. Ye abokän iglesia keta kabre tä kukwe ruäre ükete yebätä ni ñaka tädre jire aune sribi ruäre nuainta ye Babilonia Kri tä ütiä bien aisete nikwe ñaka sribi ye erere kadre ngäbiti jire.

²⁰ Kukwe mada keta kabre rakaikä jatäri kä krüte näire aune nikwe kukwe mada mada nuaindre ie Jehová tö arato, ¿ye abokän kukwe meden meden? Aune ¿ño ni raba ja mike juto kukwe köböra nemen bare ye kräke? Kukwe ja tötikara ja känenkäre yebätä nikwe mikai gare jai.