1. Nama ngasuh kitai pechaya kitai endang benung idup ba “hari ti penudi”?

KATI nuan ada pengudah taun 1914? Enti pia, nuan benung idup ba maya “hari ti penudi” sistem tu. (2 Tim. 3:1) Semua kitai udah ninga tauka bisi ngasaika utai ke dipadah Jesus bekaul enggau “hari ti penudi.” Tu nyengkaum perang, lapar pungkang, tanah berenyang, penyakit, penyai majak nambah, sereta nembiak Jehovah diperinsa. (Mat. 24:3, 7-9, 12; Luk. 21:10-12) Kitai mega meda ulah mensia baka ke dipadah rasul Paul. (Peda kutak “ Pendiau Orang Kemayaharitu.”) Ketegal kitai nyembah Jehovah, kitai pechaya kitai endang benung idup “ba hari ti penudi.”

2. Nama tanya ke deka disaut kitai?

² Laban kitai nyau jauh ngejang ari taun 1914, kitai nemu diatu kitai endang benung diau ba pengujung “hari ti penudi.” Nya alai, kitai patut nemu saut ngagai sekeda tanya ti beguna bendar tu: Nama utai ke deka nyadi ba pengujung “hari ti penudi”? Lalu nama diasuh Jehovah gaga kitai seraya nganti utai nya nyadi?

3. Nitihka 1 Tesalonika 5:1-3, nama utai ke deka disebut bala pemerintah ba dunya?

³ Bacha 1 Tesalonika 5:1-3. Paul nyebut pasal “Hari Tuhan” tauka Hari Jehovah. Ba ayat tu, Hari Jehovah nunjukka siti timpuh ke berengkah enggau serang ke ninggang ‘Babilon ti Besai’ tauka gerempung pengarap pelesu, lalu timpuh nya  deka abis maya perang Armagedon nyadi. (Pem. 16:14, 16; 17:5) Sebedau “Hari” nya berengkah, bala pemerintah deka nyebut pasal “pemaik sereta likun.” Kadang-kadang sida ngena rambai jaku ti sama lebuh ngemansangka kaul enggau menua bukai. * Taja pia, rambai jaku “pemaik sereta likun” ke disebut dalam Bup Kudus mai reti ti enda sama. Nama kebuah? Lebuh bala pemerintah nyebut rambai jaku tu, mayuh orang deka ngumbai sida udah mujur ngaga dunya tu nyadi alai ti likun. Tang kebendar iya, ‘Penusah ti Besai’ deka berengkah lalu “pengerusak deka ngenyit” ninggang sida.​—Mat. 24:21.

4. (a) Nama utai ke enda ditemu kitai pasal rambai jaku ti bekaul enggau “pemaik sereta likun”? (b) Nama ditemu kitai pasal rambai jaku nya?

⁴ Bisi sekeda utai ke enda ditemu kitai bekaul enggau rambai jaku “pemaik sereta likun.” Kitai enda nemu nama utai ke ngasuh bala pemerintah nyebut nya tauka chara sida deka nyebut nya. Lalu kitai enda nemu sekalika rambai jaku nya deka disebut sekali aja tauka beberapa kali. Taja pia, bisi utai ke ditemu kitai bekaul enggau rambai jaku nya. Enda ngira nama deka nyadi, kitai nemu: Kitai anang arapka bala pemerintah ulih nyapai pemaik ba dunya. Bup Kudus meransang kitai bejaga lalu beratika kemaya rambai jaku nya disebut. Kebendar iya, nya kelai kena nunjukka Hari Jehovah deka berengkah!

5. Baka ni 1 Tesalonika 5:4-6 nulung kitai sedia napi Hari Jehovah?

⁵ Bacha 1 Tesalonika 5:4-6. Paul madahka utai ke patut digaga kitai ngambika ulih napi Hari Jehovah. Kitai enda patut “tinduk baka orang bukai.” Kitai enda tau enda “seruran dani” sereta mengkang bejaga. Ambika chunto, kitai patut bejimat ngambika mengkang neutral lalu anang masuk champur enggau isu politik. Enti kitai masuk champur, kitai “enggi dunya.” (Jhn. 15:19) Kitai nemu semina Perintah Petara aja ke ulih mai pemaik ba dunya.

6. Nama pengawa ke patut digaga kitai kena nulung orang, lalu nama kebuah?

⁶ Kelimpah ari patut mengkang bejaga ba pengarap, kitai mega deka nulung orang belajar pasal jaku ari Bup Kudus bekaul enggau utai ke deka nyadi ba dunya. Kitai patut ngereja nya ari diatu laban pengudah Penusah ti Besai berengkah, kitai enda ulih agi nulung orang nyembah Jehovah. Nya kebuah pengawa nginjil patut digaga enggau lengkas! *

7. Nama utai ke dikedekaka Jehovah ari kitai diatu?

⁷ Semina mimit aja awak ke agi tinggal sebedau Hari Jehovah berengkah. Nya kebuah,  Iya deka kitai mengkang kisuk ba pengawa nginjil. Kitai patut nentuka diri ‘bebendar gawa ke Tuan.’ (1 Kor. 15:58) Jesus bisi madahka utai ke deka digaga kitai. Lebuh iya nyebut pasal semua utai ke deka nyadi maya hari ti penudi, ku iya agi: “Lalu Berita Manah enda tau enda dulu ditusui ngagai semua bansa.” (Mrk. 13:4, 8, 10; Mat. 24:14) Uji pikirka: Tiap kali nuan enggau pengawa nginjil, nuan nulung ngamatka jaku ke dipadah ba Bup Kudus.

8. Baka ni kitai nemu pengawa nginjil ke dipejalaika kitai deka terus mansang?

⁸ Ni pemujur pengawa nginjil ke dipejalaika kitai? Ninting taun, mayuh orang ninga Berita Manah pasal Perintah Petara. Ambika chunto, pikirka penyampau bala penginjil ke majak nambah di serata dunya maya hari ti penudi tu. Ba taun 1914, kitai bisi 5,155 iku penginjil ba 43 buah menua. Kemayaharitu, kitai bisi kira-kira 8.5 juta iku penginjil ba 240 buah menua! Taja pia, pengawa nginjil kitai bedau agi tembu. Kitai enda tau enda terus madah ngagai orang, semina Perintah Petara aja ke ulih mutarka penusah mensia.​—Mas. 145:11-13.

9. Nama kebuah kitai enda tau enda terus nginjil?

⁹ Pengawa nginjil kitai deka terus dipejalaika seagi-agi Jehovah bedau ngasuh kitai ngetu. Berapa mayuh awak ke agi tinggal kena orang ngelala Petara Jehovah enggau Jesus Kristus? (Jhn. 17:3) Kitai enda nemu. Tang kitai nemu, orang “ke bisi pengingin deka bulih pengidup ti meruan belama iya” agi ulih nerima berita manah ari Bup Kudus, lalu milih nyembah Jehovah seagi-agi Penusah ti Besai bedau berengkah. (SKR. 13:48, NW) Baka ni kitai ulih nulung orang sebedau Penusah ti Besai berengkah?

10. Baka ni chara Jehovah nulung kitai ngajar orang pasal pemendar?

¹⁰ Nengah gerempung Iya, Jehovah meri kitai semua utai ke diguna kena ngajar orang pemendar ari Bup Kudus. Ambika chunto, ninting minggu kitai nerima latih ba gempuru tengan minggu. Gempuru tu nulung kitai nemu utai ke patut disebut lebuh keterubah datai nginjil sereta datai ngabas, lalu pia  mega chara ngajar orang Bup Kudus. Gerempung Jehovah mega udah nyediaka Perengka Kena Ngajar. Perengka tu nulung kitai . . .

• ngepunka randau,

• meransang minat,

• meransang orang belajar mayuh agi,

• ngajar pemelajar pemendar ari Bup Kudus, lalu

• meransang orang ke bisi minat ngelawa laman web kitai sereta datai ngagai gempuru kitai.

Amat, semina ngembuan perengka dikena ngajar aja enda chukup. Kitai patut ngena sida. * Ambika chunto, enti nuan ninggalka siti surat mit tauka majalah enggau orang ke bisi minat pengudah seduai bisi randau ti ngerinduka ati, iya ulih macha utai nya dulu seraya nganti nuan datai baru berandau enggau iya. Endang tanggung pengawa kitai enggau naka ulih mengkang kisuk ba pengawa nginjil ninting bulan.

11. Nama kebuah Online Bible Study Lessons disediaka?

¹¹ Peratika siti agi chara ke dikena Jehovah ngajar orang pemendar, iya nya Online Bible Study Lessons ba jw.org^®. * Nama kebuah chara belajar tu disediaka? Ninting bulan, bepuluh ribu iku orang di serata dunya ngiga chara belajarka Bup Kudus nengah Internet. Topik ba laman web kitai ulih nulung orang nemu pemendar ba Bup Kudus. Sekeda orang ke enggau nuan berandau engka kakang ati deka belajarka Bup Kudus enggau nuan. Enti pia, pandangka Online Bible Study Lessons ke bisi ba laman web kitai tauka anjung link nya ngagai sida.

12. Nama ulih dipelajar orang ari Online Bible Study Lessons?

¹² Topik ke bisi ba Online Bible Study Lessons: “Bup Kudus enggau Pengarang Iya,” “Sida ke Disebut dalam Bup Kudus,” enggau “Pengadang Ari Bup Kudus.” Topik tu ngajar pasal:

• Chara Bup Kudus nulung orang

• Sapa Jehovah, Jesus, enggau bala melikat

• Kebuah Petara nempa mensia

• Kebuah bisi pemerinsa enggau penyai

Utai ke dipelajar mega berandau pasal chara Jehovah deka . . .

• muai pemerinsa enggau pemati,

• ngidupka baru orang ti udah mati, sereta

• nganti perintah mensia ngena Perintah Petara.

13. Kati Online Bible Study Lessons disedia kena nganti pengawa belajarka Bup Kudus enggau pemelajar? Terangka.

¹³ Online Bible Study Lessons ukai dikena nganti pengawa belajarka Bup Kudus enggau pemelajar. Jesus udah meri kitai peluang ngaga orang nyadi murid iya. Kitai ngarapka sida ke bisi minat macha topik ke bisi ba Online Bible Study Lessons, rindu enggau utai ke dibacha, lalu deka belajar mayuh agi. Enggau nya, sida engka deka nerima pengawa belajarka Bup Kudus. Ba pengujung tiap iti pelajar, sida ke macha nengah online diperansang nganjung peminta ngasuh orang datai belajarka Bup Kudus enggau sida. Ninting hari, gerempung kitai nerima kira-kira 230 iti peminta ari orang di serata dunya ke deka belajarka Bup Kudus!

14. Nitihka pesan Jesus ba Matthew 28:19, 20, nama utai ke patut digaga kitai enggau naka ulih, lalu nama kebuah?

¹⁴ Bacha Matthew 28:19, 20. Lebuh ngajar orang Bup Kudus, kitai enggau naka ulih  ngaga sida nyadi murid Jesus lalu ngajar sida ngasika semua pesan ti udah diberi Jesus. Kitai patut nulung orang meretika kebuah nya beguna bendar sida milih nyembah Jehovah sereta nyukung Perintah Iya. Reti nya, kitai patut enggau naka ulih meransang orang nitihka utai ke dipelajar, nyerahka pengidup ngagai Jehovah lalu dibaptisa. Enggau nya, sida ulih selamat maya Hari Jehovah datai.​—1 Pet. 3:21.

15. Nama patut diseliahka kitai, lalu nama kebuah?

¹⁵ Baka ke udah dipadah tadi, kitai semina bisi mimit aja awak ke agi tinggal sebedau pengujung dunya datai. Ketegal tu, kitai anang masau jam belajar enggau orang ke nadai ati deka nyembah Jehovah. (1 Kor. 9:26) Pengawa kitai patut digaga enggau lengkas! Laban agi mayuh orang ke bedau ninga pesan pasal Perintah Petara.

16. Nitihka Pemandang 18:2, 4, 5, 8, nama utai ke enda tau enda digaga semua kitai? (Peda mega nota kaki.)

¹⁶ Bacha Pemandang 18:2, 4, 5, 8. Ayat tu madahka utai bukai ke patut digaga nembiak Jehovah. Sida enda tau bisi sebarang kaul enggau pengarap pelesu. Sebedau belajarka Bup Kudus, pemelajar engka nyadi raban pengarap pelesu. Iya engka enggau pengawa sembah sereta pengawa ke bukai ti diatur pengarap nya. Tauka iya engka bisi meri duit ngagai gerempung pengarap nya. Sebedau pemelajar Bup Kudus tau nyadi penginjil ti bedau dibaptisa, iya enda tau bisi kaul enggau pengarap pelesu. Iya patut nulis surat ngagai gerija madahka diri badu agi enggau gerija nya tauka gerempung bukai ke bekaul enggau pengarap pelesu. *

17. Nama kereja sekular ke enda tau enda diseliahka nembiak Jehovah, lalu nama kebuah?

¹⁷ Orang ke nyembah Jehovah enda tau enda nentuka kereja sekular iya nadai kaul enggau pengarap pelesu. (2 Kor. 6:14-17) Ambika chunto, iya enda gawa ba gerija. Pia mega, orang Kristian ke gawa enggau orang nentuka diri enda gawa ba endur ke dikena orang bejalaika pengawa sembah ti pelesu. Lalu enti orang Kristian bisi bisnis kediri empu, iya mega tentu enggai nerima kereja tauka kunterik ke bisi kaul enggau pengarap pelesu. Nama kebuah kitai patut terit ba pekara tu? Laban kitai enggai bisi kaul enggau  ajar sereta pengawa ti salah ke digaga gerempung pengarap pelesu, ti enda tuchi ba mata Petara.​—Isa. 52:11. *

18. Baka ni seiku menyadi Kristian nitihka prinsip Bup Kudus bekaul enggau kereja sekular iya?

¹⁸ Betaun ti udah, seiku kunteriktor luar minta seiku tuai gempuru ke bisi bisnes kediri empu betukang ba gerija. Kunteriktor nya nemu menyadi tu seruran madahka diri enggai ngereja pengawa ba gerija. Tang maya nya, kunteriktor nya amat-amat begunaka orang betukang ba gerija nya. Taja pia, menyadi nya tetap nitihka prinsip Bup Kudus lalu enggai nerima pengawa nya. Minggu siti, surat kabar ba menua nya mandangka gambar seiku tukang kayu ke ngelekatka regang ba gerija nya. Enti sema menyadi lelaki nya enda nitihka prinsip Bup Kudus lalu nerima pengawa nya, tentu gambar iya ke ayan ba surat kabar nya. Tu tentu ulih ngenyaika nama iya! Pia mega, uji pikirka asai ati Jehovah.

19-20. (a) Nama udah dipelajarka kitai ba artikel tu? (b) Nama utai bukai ke patut dipelajarka kitai?

¹⁹ Bup Kudus madahka siti utai ti besai deka nyadi enda lama agi, iya nya bala pemerintah ba dunya deka nyebut “pemaik sereta likun.” Ketegal Jehovah udah ngajar kitai, kitai nemu bala pemerintah nya enda ulih mujur ngulihka pemaik ti bendar ba dunya tu. Nama patut digaga kitai sebedau utai tu nyadi? Jehovah deka kitai mengkang kisuk ba pengawa nginjil lalu nguji ngaga mayuh agi orang nyadi murid. Kitai mega patut nyeraraka diri ari semua pengarap pelesu. Tu nyengkaum badu agi nyadi raban sereta nyeliahka diri ari bekereja enggau gerempung pengarap pelesu.

²⁰ Bisi utai bukai ke deka nyadi maya pengujung “hari ti penudi.” Lalu bisi utai bukai mega ke diasuh Jehovah gaga kitai. Nama utai bukai ke deka nyadi nya lalu nama utai bukai ke diasuh Jehovah gaga kitai? Kitai deka berandauka nya ba artikel pengudah tu.